Narayaniyam Dashaka 90

vṛkabhṛgumunimōhinyambarīṣādivṛttē-
ṣvayi tava hi mahattvaṃ sarvaśarvādijaitram ।
sthitamiha paramātman niṣkalārvāgabhinnaṃ
kimapi yadavabhātaṃ taddhi rūpaṃ tavaiva ॥1॥

mūrtitrayēśvarasadāśivapañchakaṃ yat
prāhuḥ parātmavapurēva sadāśivō’smin ।
tatrēśvarastu sa vikuṇṭhapadastvamēva
tritvaṃ punarbhajasi satyapadē tribhāgē ॥2॥

tatrāpi sāttvikatanuṃ tava viṣṇumāhu-
rdhātā tu sattvaviralō rajasaiva pūrṇaḥ ।
sattvōtkaṭatvamapi chāsti tamōvikāra-
chēṣṭādikañcha tava śaṅkaranāmni mūrtau ॥3॥

taṃ cha trimūrtyatigataṃ parapūruṣaṃ tvāṃ
śarvātmanāpi khalu sarvamayatvahētōḥ ।
śaṃsantyupāsanavidhau tadapi svatastu
tvadrūpamityatidṛḍhaṃ bahu naḥ pramāṇam ॥4॥

śrīśaṅkarō’pi bhagavān sakalēṣu tāva-
ttvāmēva mānayati yō na hi pakṣapātī ।
tvanniṣṭhamēva sa hi nāmasahasrakādi
vyākhyāt bhavatstutiparaścha gatiṃ gatō’ntē ॥5॥

mūrtitrayātigamuvācha cha mantraśāstra-
syādau kalāyasuṣamaṃ sakalēśvaraṃ tvām ।
dhyānaṃ cha niṣkalamasau praṇavē khalūktvā
tvāmēva tatra sakalaṃ nijagāda nānyam ॥6॥

samastasārē cha purāṇasaṅgrahē
visaṃśayaṃ tvanmahimaiva varṇyatē ।
trimūrtiyuksatyapadatribhāgataḥ
paraṃ padaṃ tē kathitaṃ na śūlinaḥ ॥7॥

yat brāhmakalpa iha bhāgavatadvitīya-
skandhōditaṃ vapuranāvṛtamīśa dhātrē ।
tasyaiva nāma hariśarvamukhaṃ jagāda
śrīmādhavaḥ śivaparō’pi purāṇasārē ॥8॥

yē svaprakṛtyanuguṇā giriśaṃ bhajantē
tēṣāṃ phalaṃ hi dṛḍhayaiva tadīyabhaktyā।
vyāsō hi tēna kṛtavānadhikārihētōḥ
skandādikēṣu tava hānivachō’rthavādaiḥ ॥9॥

bhūtārthakīrtiranuvādaviruddhavādau
trēdhārthavādagatayaḥ khalu rōchanārthāḥ ।
skāndādikēṣu bahavō’tra viruddhavādā-
stvattāmasatvaparibhūtyupaśikṣaṇādyāḥ ॥10॥

yat kiñchidapyaviduṣā’pi vibhō mayōktaṃ
tanmantraśāstravachanādyabhidṛṣṭamēva ।
vyāsōktisāramayabhāgavatōpagīta
klēśān vidhūya kuru bhaktibharaṃ parātman ॥11॥