Narayaniyam Dashaka 87

kuchēlanāmā bhavataḥ satīrthyatāṃ gataḥ sa sāndīpanimandirē dvijaḥ ।
tvadēkarāgēṇa dhanādinisspṛhō dināni ninyē praśamī gṛhāśramī ॥1॥

samānaśīlā’pi tadīyavallabhā tathaiva nō chittajayaṃ samēyuṣī ।
kadāchidūchē bata vṛttilabdhayē ramāpatiḥ kiṃ na sakhā niṣēvyatē ॥2॥

itīritō’yaṃ priyayā kṣudhārtayā jugupsamānō’pi dhanē madāvahē ।
tadā tvadālōkanakautukādyayau vahan paṭāntē pṛthukānupāyanam ॥3॥

gatō’yamāścharyamayīṃ bhavatpurīṃ gṛhēṣu śaibyābhavanaṃ samēyivān ।
praviśya vaikuṇṭhamivāpa nirvṛtiṃ tavātisambhāvanayā tu kiṃ punaḥ ॥4॥

prapūjitaṃ taṃ priyayā cha vījitaṃ karē gṛhītvā’kathayaḥ purākṛtam ।
yadindhanārthaṃ gurudārachōditairapartuvarṣa tadamarṣi kānanē ॥5॥

trapājuṣō’smāt pṛthukaṃ balādatha pragṛhya muṣṭau sakṛdāśitē tvayā ।
kṛtaṃ kṛtaṃ nanviyatēti sambhramādramā kilōpētya karaṃ rurōdha tē ॥6॥

bhaktēṣu bhaktēna sa mānitastvayā purīṃ vasannēkaniśāṃ mahāsukham ।
batāparēdyurdraviṇaṃ vinā yayau vichitrarūpastava khalvanugrahaḥ ॥7॥

yadi hyayāchiṣyamadāsyadachyutō vadāmi bhāryāṃ kimiti vrajannasau ।
tvaduktilīlāsmitamagnadhīḥ punaḥ kramādapaśyanmaṇidīpramālayam ॥8॥

kiṃ mārgavibhraṃśa iti bhramman kṣaṇaṃ gṛhaṃ praviṣṭaḥ sa dadarśa vallabhām ।
sakhīparītāṃ maṇihēmabhūṣitāṃ bubōdha cha tvatkaruṇāṃ mahādbhutām ॥9॥

sa ratnaśālāsu vasannapi svayaṃ samunnamadbhaktibharō’mṛtaṃ yayau ।
tvamēvamāpūritabhaktavāñChitō marutpurādhīśa harasva mē gadān ॥10॥