Narayaniyam Dashaka 81

snigdhāṃ mugdhāṃ satatamapi tāṃ lālayan satyabhāmāṃ
yātō bhūyaḥ saha khalu tayā yājñasēnīvivāham ।
pārthaprītyai punarapi manāgāsthitō hastipuryāṃ
saśakraprasthaṃ puramapi vibhō saṃvidhāyāgatō’bhūḥ ॥1॥

bhadrāṃ bhadrāṃ bhavadavarajāṃ kauravēṇārthyamānāṃ
tvadvāchā tāmahṛta kuhanāmaskarī śakrasūnuḥ ।
tatra kruddhaṃ balamanunayan pratyagāstēna sārdhaṃ
śakraprasthaṃ priyasakhamudē satyabhāmāsahāyaḥ ॥2॥

tatra krīḍannapi cha yamunākūladṛṣṭāṃ gṛhītvā
tāṃ kālindīṃ nagaramagamaḥ khāṇḍavaprīṇitāgniḥ ।
bhrātṛtrastāṃ praṇayavivaśāṃ dēva paitṛṣvasēyīṃ
rājñāṃ madhyē sapadi jahṛṣē mitravindāmavantīm ॥3॥

satyāṃ gatvā punarudavahō nagnajinnandanāṃ tāṃ
badhvā saptāpi cha vṛṣavarān saptamūrtirnimēṣāt ।
bhadrāṃ nāma pradaduratha tē dēva santardanādyā-
statsōdaryā varada bhavataḥ sā’pi paitṛṣvasēyī ॥4॥

pārthādyairapyakṛtalavanaṃ tōyamātrābhilakṣyaṃ
lakṣaṃ Chitvā śapharamavṛthā lakṣmaṇāṃ madrakanyām ।
aṣṭāvēvaṃ tava samabhavan vallabhāstatra madhyē
śuśrōtha tvaṃ surapatigirā bhaumaduśchēṣṭitāni ॥5॥

smṛtāyātaṃ pakṣipravaramadhirūḍhastvamagamō
vahannaṅkē bhāmāmupavanamivārātibhavanam ।
vibhindan durgāṇi truṭitapṛtanāśōṇitarasaiḥ
puraṃ tāvat prāgjyōtiṣamakuruthāḥ śōṇitapuram ॥6॥

murastvāṃ pañchāsyō jaladhivanamadhyādudapatat
sa chakrē chakrēṇa pradalitaśirā maṅkṣu bhavatā ।
chaturdantairdantāvalapatibhirindhānasamaraṃ
rathāṅgēna Chitvā narakamakarōstīrṇanarakam ॥7॥

stutō bhūmyā rājyaṃ sapadi bhagadattē’sya tanayē
gajañchaikaṃ datvā prajighayitha nāgānnijapurīm ।
khalēnābaddhānāṃ svagatamanasāṃ ṣōḍaśa punaḥ
sahasrāṇi strīṇāmapi cha dhanarāśiṃ cha vipulam ॥8॥

bhaumāpāhṛtakuṇḍalaṃ tadaditērdātuṃ prayātō divaṃ
śakrādyairmahitaḥ samaṃ dayitayā dyustrīṣu dattahriyā ।
hṛtvā kalpataruṃ ruṣābhipatitaṃ jitvēndramabhyāgama-
stattu śrīmadadōṣa īdṛśa iti vyākhyātumēvākṛthāḥ ॥9॥

kalpadruṃ satyabhāmābhavanabhuvi sṛjan dvyaṣṭasāhasrayōṣāḥ
svīkṛtya pratyagāraṃ vihitabahuvapurlālayan kēlibhēdaiḥ ।
āścharyānnāradālōkitavividhagatistatra tatrāpi gēhē
bhūyaḥ sarvāsu kurvan daśa daśa tanayān pāhi vātālayēśa ॥10॥