Narayaniyam Dashaka 73

niśamayya tavātha yānavārtāṃ bhṛśamārtāḥ paśupālabālikāstāḥ ।
kimidaṃ kimidaṃ kathaṃ nvitīmāḥ samavētāḥ paridēvitānyakurvan ॥1॥

karuṇānidhirēṣa nandasūnuḥ kathamasmān visṛjēdananyanāthāḥ ।
bata naḥ kimu daivamēvamāsīditi tāstvadgatamānasā vilēpuḥ ॥2॥

charamapraharē pratiṣṭhamānaḥ saha pitrā nijamitramaṇḍalaiścha ।
paritāpabharaṃ nitambinīnāṃ śamayiṣyan vyamuchaḥ sakhāyamēkam ॥3॥

achirādupayāmi sannidhiṃ vō bhavitā sādhu mayaiva saṅgamaśrīḥ ।
amṛtāmbunidhau nimajjayiṣyē drutamityāśvasitā vadhūrakārṣīḥ ॥4॥

saviṣādabharaṃ sayāchñamuchchaiḥ atidūraṃ vanitābhirīkṣyamāṇaḥ ।
mṛdu taddiśi pātayannapāṅgān sabalō’krūrarathēna nirgatō’bhūḥ ॥5॥

anasā bahulēna vallavānāṃ manasā chānugatō’tha vallabhānām ।
vanamārtamṛgaṃ viṣaṇṇavṛkṣaṃ samatītō yamunātaṭīmayāsīḥ ॥6॥

niyamāya nimajya vāriṇi tvāmabhivīkṣyātha rathē’pi gāndinēyaḥ ।
vivaśō’jani kiṃ nvidaṃ vibhōstē nanu chitraṃ tvavalōkanaṃ samantāt ॥7॥

punarēṣa nimajya puṇyaśālī puruṣaṃ tvāṃ paramaṃ bhujaṅgabhōgē ।
arikambugadāmbujaiḥ sphurantaṃ surasiddhaughaparītamālulōkē ॥8॥

sa tadā paramātmasaukhyasindhau vinimagnaḥ praṇuvan prakārabhēdaiḥ ।
avilōkya punaścha harṣasindhōranuvṛttyā pulakāvṛtō yayau tvām ॥9॥

kimu śītalimā mahān jalē yat pulakō’sāviti chōditēna tēna ।
atiharṣaniruttarēṇa sārdhaṃ rathavāsī pavanēśa pāhi māṃ tvam ॥10॥