Narayaniyam Dashaka 71

yatnēṣu sarvēṣvapi nāvakēśī kēśī sa bhōjēśituriṣṭabandhuḥ ।
tvāṃ sindhujāvāpya itīva matvā samprāptavān sindhujavājirūpaḥ ॥1॥

gandharvatāmēṣa gatō’pi rūkṣairnādaiḥ samudvējitasarvalōkaḥ ।
bhavadvilōkāvadhi gōpavāṭīṃ pramardya pāpaḥ punarāpatattvām ॥2॥

tārkṣyārpitāṅghrēstava tārkṣya ēṣa chikṣēpa vakṣōbhuvi nāma pādam ।
bhṛgōḥ padāghātakathāṃ niśamya svēnāpi śakyaṃ taditīva mōhāt ॥3॥

pravañchayannasya khurāñchalaṃ drāgamuñcha chikṣēpitha dūradūram
sammūrchChitō’pi hyatimūrchChitēna krōdhōṣmaṇā khāditumādrutastvām ॥4॥

tvaṃ vāhadaṇḍē kṛtadhīścha vāhādaṇḍaṃ nyadhāstasya mukhē tadānīm ।
tad vṛddhiruddhaśvasanō gatāsuḥ saptībhavannapyayamaikyamāgāt ॥5॥

ālambhamātrēṇa paśōḥ surāṇāṃ prasādakē nūtna ivāśvamēdhē ।
kṛtē tvayā harṣavaśāt surēndrāstvāṃ tuṣṭuvuḥ kēśavanāmadhēyam ॥6॥

kaṃsāya tē śaurisutatvamuktvā taṃ tadvadhōtkaṃ pratirudhya vāchā।
prāptēna kēśikṣapaṇāvasānē śrīnāradēna tvamabhiṣṭutō’bhūḥ ॥7॥

kadāpi gōpaiḥ saha kānanāntē nilāyanakrīḍanalōlupaṃ tvām ।
mayātmajaḥ prāpa durantamāyō vyōmābhidhō vyōmacharōparōdhī ॥8॥

sa chōrapālāyitavallavēṣu chōrāyitō gōpaśiśūn paśūṃścha
guhāsu kṛtvā pidadhē śilābhistvayā cha buddhvā parimarditō’bhūt ॥9॥

ēvaṃ vidhaiśchādbhutakēlibhēdairānandamūrchChāmatulāṃ vrajasya ।
padē padē nūtanayannasīmāṃ parātmarūpin pavanēśa pāyāḥ ॥10॥