Narayaniyam Dashaka 70

iti tvayi rasākulaṃ ramitavallabhē vallavāḥ
kadāpi puramambikāmiturambikākānanē ।
samētya bhavatā samaṃ niśi niṣēvya divyōtsavaṃ
sukhaṃ suṣupuragrasīdvrajapamugranāgastadā ॥1॥

samunmukhamathōlmukairabhihatē’pi tasmin balā-
damuñchati bhavatpadē nyapati pāhi pāhīti taiḥ ।
tadā khalu padā bhavān samupagamya pasparśa taṃ
babhau sa cha nijāṃ tanuṃ samupasādya vaidyadharīm ॥2॥

sudarśanadhara prabhō nanu sudarśanākhyō’smyahaṃ
munīn kvachidapāhasaṃ ta iha māṃ vyadhurvāhasam ।
bhavatpadasamarpaṇādamalatāṃ gatō’smītyasau
stuvan nijapadaṃ yayau vrajapadaṃ cha gōpā mudā ॥3॥

kadāpi khalu sīriṇā viharati tvayi strījanai-
rjahāra dhanadānugaḥ sa kila śaṅkhachūḍō’balāḥ ।
atidrutamanudrutastamatha muktanārījanaṃ
rurōjitha śirōmaṇiṃ halabhṛtē cha tasyādadāḥ ॥4॥

dinēṣu cha suhṛjjanaissaha vanēṣu līlāparaṃ
manōbhavamanōharaṃ rasitavēṇunādāmṛtam ।
bhavantamamarīdṛśāmamṛtapāraṇādāyinaṃ
vichintya kimu nālapan virahatāpitā gōpikāḥ ॥5॥

bhōjarājabhṛtakastvatha kaśchit kaṣṭaduṣṭapathadṛṣṭirariṣṭaḥ ।
niṣṭhurākṛtirapaṣṭhuninādastiṣṭhatē sma bhavatē vṛṣarūpī ॥6॥

śākvarō’tha jagatīdhṛtihārī mūrtimēṣa bṛhatīṃ pradadhānaḥ ।
paṅktimāśu parighūrṇya paśūnāṃ Chandasāṃ nidhimavāpa bhavantam ॥7॥

tuṅgaśṛṅgamukhamāśvabhiyantaṃ saṅgṛhayya rabhasādabhiyaṃ tam ।
bhadrarūpamapi daityamabhadraṃ mardayannamadayaḥ suralōkam ॥8॥

chitramadya bhagavan vṛṣaghātāt susthirā’jani vṛṣasthitirurvyām ।
vardhatē cha vṛṣachētasi bhūyān mōda ityabhinutō’si suraistvam ॥9॥

aukṣakāṇi paridhāvata dūraṃ vīkṣyatāmayamihōkṣavibhēdī ।
itthamāttahasitaiḥ saha gōpairgēhagastvamava vātapurēśa ॥10॥