Narayaniyam Dashaka 7

ēvaṃ dēva chaturdaśātmakajagadrūpēṇa jātaḥ puna-
stasyōrdhvaṃ khalu satyalōkanilayē jātō’si dhātā svayam ।
yaṃ śaṃsanti hiraṇyagarbhamakhilatrailōkyajīvātmakaṃ
yō’bhūt sphītarajōvikāravikasannānāsisṛkṣārasaḥ ॥1॥

sō’yaṃ viśvavisargadattahṛdayaḥ sampaśyamānaḥ svayaṃ
bōdhaṃ khalvanavāpya viśvaviṣayaṃ chintākulastasthivān ।
tāvattvaṃ jagatāṃ patē tapa tapētyēvaṃ hi vaihāyasīṃ
vāṇīmēnamaśiśravaḥ śrutisukhāṃ kurvaṃstapaḥprēraṇām ॥2॥

kō’sau māmavadat pumāniti jalāpūrṇē jaganmaṇḍalē
dikṣūdvīkṣya kimapyanīkṣitavatā vākyārthamutpaśyatā ।
divyaṃ varṣasahasramāttatapasā tēna tvamārādhita –
stasmai darśitavānasi svanilayaṃ vaikuṇṭhamēkādbhutam ॥3॥

māyā yatra kadāpi nō vikurutē bhātē jagadbhyō bahiḥ
śōkakrōdhavimōhasādhvasamukhā bhāvāstu dūraṃ gatāḥ ।
sāndrānandajharī cha yatra paramajyōtiḥprakāśātmakē
tattē dhāma vibhāvitaṃ vijayatē vaikuṇṭharūpaṃ vibhō ॥4॥

yasminnāma chaturbhujā harimaṇiśyāmāvadātatviṣō
nānābhūṣaṇaratnadīpitadiśō rājadvimānālayāḥ ।
bhaktiprāptatathāvidhōnnatapadā dīvyanti divyā janā-
tattē dhāma nirastasarvaśamalaṃ vaikuṇṭharūpaṃ jayēt ॥5॥

nānādivyavadhūjanairabhivṛtā vidyullatātulyayā
viśvōnmādanahṛdyagātralatayā vidyōtitāśāntarā ।
tvatpādāmbujasaurabhaikakutukāllakṣmīḥ svayaṃ lakṣyatē
yasmin vismayanīyadivyavibhavaṃ tattē padaṃ dēhi mē ॥6॥

tatraivaṃ pratidarśitē nijapadē ratnāsanādhyāsitaṃ
bhāsvatkōṭilasatkirīṭakaṭakādyākalpadīprākṛti ।
śrīvatsāṅkitamāttakaustubhamaṇichChāyāruṇaṃ kāraṇaṃ
viśvēṣāṃ tava rūpamaikṣata vidhistattē vibhō bhātu mē ॥7॥

kālāmbhōdakalāyakōmalaruchīchakrēṇa chakraṃ diśā –
māvṛṇvānamudāramandahasitasyandaprasannānanam ।
rājatkambugadāripaṅkajadharaśrīmadbhujāmaṇḍalaṃ
sraṣṭustuṣṭikaraṃ vapustava vibhō madrōgamudvāsayēt ॥8॥

dṛṣṭvā sambhṛtasambhramaḥ kamalabhūstvatpādapāthōruhē
harṣāvēśavaśaṃvadō nipatitaḥ prītyā kṛtārthībhavan ।
jānāsyēva manīṣitaṃ mama vibhō jñānaṃ tadāpādaya
dvaitādvaitabhavatsvarūpaparamityāchaṣṭa taṃ tvāṃ bhajē ॥9॥

ātāmrē charaṇē vinamramatha taṃ hastēna hastē spṛśan
bōdhastē bhavitā na sargavidhibhirbandhō’pi sañjāyatē ।
ityābhāṣya giraṃ pratōṣya nitarāṃ tachchittagūḍhaḥ svayaṃ
sṛṣṭau taṃ samudairayaḥ sa bhagavannullāsayōllāghatām ॥10॥