Narayaniyam Dashaka 59

tvadvapurnavakalāyakōmalaṃ prēmadōhanamaśēṣamōhanam ।
brahma tattvaparachinmudātmakaṃ vīkṣya sammumuhuranvahaṃ striyaḥ ॥1॥

manmathōnmathitamānasāḥ kramāttvadvilōkanaratāstatastataḥ ।
gōpikāstava na sēhirē harē kānanōpagatimapyaharmukhē ॥2॥

nirgatē bhavati dattadṛṣṭayastvadgatēna manasā mṛgēkṣaṇāḥ ।
vēṇunādamupakarṇya dūratastvadvilāsakathayā’bhirēmirē ॥3॥

kānanāntamitavān bhavānapi snigdhapādapatalē manōramē ।
vyatyayākalitapādamāsthitaḥ pratyapūrayata vēṇunālikām ॥4॥

mārabāṇadhutakhēcharīkulaṃ nirvikārapaśupakṣimaṇḍalam ।
drāvaṇaṃ cha dṛṣadāmapi prabhō tāvakaṃ vyajani vēṇukūjitam ॥5॥

vēṇurandhrataralāṅgulīdalaṃ tālasañchalitapādapallavam ।
tat sthitaṃ tava parōkṣamapyahō saṃvichintya mumuhurvrajāṅganāḥ ॥6॥

nirviśaṅkabhavadaṅgadarśinīḥ khēcharīḥ khagamṛgān paśūnapi ।
tvatpadapraṇayi kānanaṃ cha tāḥ dhanyadhanyamiti nanvamānayan ॥7॥

āpibēyamadharāmṛtaṃ kadā vēṇubhuktarasaśēṣamēkadā ।
dūratō bata kṛtaṃ durāśayētyākulā muhurimāḥ samāmuhan ॥8॥

pratyahaṃ cha punaritthamaṅganāśchittayōnijanitādanugrahāt ।
baddharāgavivaśāstvayi prabhō nityamāpuriha kṛtyamūḍhatām ॥9॥

rāgastāvajjāyatē hi svabhāvā-
nmōkṣōpāyō yatnataḥ syānna vā syāt ।
tāsāṃ tvēkaṃ taddvayaṃ labdhamāsīt
bhāgyaṃ bhāgyaṃ pāhi māṃ mārutēśa ॥10॥