Narayaniyam Dashaka 58

tvayi viharaṇalōlē bālajālaiḥ pralamba-
pramathanasavilambē dhēnavaḥ svairachārāḥ ।
tṛṇakutukaniviṣṭā dūradūraṃ charantyaḥ
kimapi vipinamaiṣīkākhyamīṣāmbabhūvuḥ ॥1॥

anadhigatanidāghakrauryavṛndāvanāntāt
bahiridamupayātāḥ kānanaṃ dhēnavastāḥ ।
tava virahaviṣaṇṇā ūṣmalagrīṣmatāpa-
prasaravisaradambhasyākulāḥ stambhamāpuḥ ॥2॥

tadanu saha sahāyairdūramanviṣya śaurē
galitasaraṇimuñjāraṇyasañjātakhēdam ।
paśukulamabhivīkṣya kṣipramānētumārā-
ttvayi gatavati hī hī sarvatō’gnirjajṛmbhē ॥3॥

sakalahariti dīptē ghōrabhāṅkārabhīmē
śikhini vihatamārgā ardhadagdhā ivārtāḥ ।
ahaha bhuvanabandhō pāhi pāhīti sarvē
śaraṇamupagatāstvāṃ tāpahartāramēkam ॥4॥

alamalamatibhītyā sarvatō mīlayadhvaṃ
dṛśamiti tava vāchā mīlitākṣēṣu tēṣu ।
kva nu davadahanō’sau kutra muñjāṭavī sā
sapadi vavṛtirē tē hanta bhāṇḍīradēśē ॥5॥

jaya jaya tava māyā kēyamīśēti tēṣāṃ
nutibhiruditahāsō baddhanānāvilāsaḥ ।
punarapi vipināntē prācharaḥ pāṭalādi-
prasavanikaramātragrāhyagharmānubhāvē ॥6॥

tvayi vimukhamivōchchaistāpabhāraṃ vahantaṃ
tava bhajanavadantaḥ paṅkamuchChōṣayantam ।
tava bhujavadudañchadbhūritējaḥpravāhaṃ
tapasamayamanaiṣīryāmunēṣu sthalēṣu ॥7॥

tadanu jaladajālaistvadvapustulyabhābhi-
rvikasadamalavidyutpītavāsōvilāsaiḥ ।
sakalabhuvanabhājāṃ harṣadāṃ varṣavēlāṃ
kṣitidharakuharēṣu svairavāsī vyanaiṣīḥ ॥8॥

kuharatalaniviṣṭaṃ tvāṃ gariṣṭhaṃ girīndraḥ
śikhikulanavakēkākākubhiḥ stōtrakārī ।
sphuṭakuṭajakadambastōmapuṣpāñjaliṃ cha
pravidadhadanubhējē dēva gōvardhanō’sau ॥9॥

atha śaradamupētāṃ tāṃ bhavadbhaktachētō-
vimalasalilapūrāṃ mānayan kānanēṣu ।
tṛṇamamalavanāntē chāru sañchārayan gāḥ
pavanapurapatē tvaṃ dēhi mē dēhasaukhyam ॥10॥