Narayaniyam Dashaka 52

anyāvatāranikarēṣvanirīkṣitaṃ tē
bhūmātirēkamabhivīkṣya tadāghamōkṣē ।
brahmā parīkṣitumanāḥ sa parōkṣabhāvaṃ
ninyē’tha vatsakagaṇān pravitatya māyām ॥1॥

vatsānavīkṣya vivaśē paśupōtkarē tā-
nānētukāma iva dhātṛmatānuvartī ।
tvaṃ sāmibhuktakabalō gatavāṃstadānīṃ
bhuktāṃstirō’dhita sarōjabhavaḥ kumārān ॥2॥

vatsāyitastadanu gōpagaṇāyitastvaṃ
śikyādibhāṇḍamuralīgavalādirūpaḥ ।
prāgvadvihṛtya vipinēṣu chirāya sāyaṃ
tvaṃ māyayā’tha bahudhā vrajamāyayātha ॥3॥

tvāmēva śikyagavalādimayaṃ dadhānō
bhūyastvamēva paśuvatsakabālarūpaḥ ।
gōrūpiṇībhirapi gōpavadhūmayībhi-
rāsāditō’si jananībhiratipraharṣāt ॥4॥

jīvaṃ hi kañchidabhimānavaśātsvakīyaṃ
matvā tanūja iti rāgabharaṃ vahantyaḥ ।
ātmānamēva tu bhavantamavāpya sūnuṃ
prītiṃ yayurna kiyatīṃ vanitāścha gāvaḥ ॥5॥

ēvaṃ pratikṣaṇavijṛmbhitaharṣabhāra-
niśśēṣagōpagaṇalālitabhūrimūrtim ।
tvāmagrajō’pi bubudhē kila vatsarāntē
brahmātmanōrapi mahān yuvayōrviśēṣaḥ ॥6॥

varṣāvadhau navapurātanavatsapālān
dṛṣṭvā vivēkamasṛṇē druhiṇē vimūḍhē ।
prādīdṛśaḥ pratinavān makuṭāṅgadādi
bhūṣāṃśchaturbhujayujaḥ sajalāmbudābhān ॥7॥

pratyēkamēva kamalāparilālitāṅgān
bhōgīndrabhōgaśayanān nayanābhirāmān ।
līlānimīlitadṛśaḥ sanakādiyōgi-
vyāsēvitān kamalabhūrbhavatō dadarśa ॥8॥

nārāyaṇākṛtimasaṅkhyatamāṃ nirīkṣya
sarvatra sēvakamapi svamavēkṣya dhātā ।
māyānimagnahṛdayō vimumōha yāva-
dēkō babhūvitha tadā kabalārdhapāṇiḥ ॥9॥

naśyanmadē tadanu viśvapatiṃ muhustvāṃ
natvā cha nūtavati dhātari dhāma yātē ।
pōtaiḥ samaṃ pramuditaiḥ praviśan nikētaṃ
vātālayādhipa vibhō paripāhi rōgāt ॥10॥