Narayaniyam Dashaka 48

mudā suraughaistvamudārasammadai-
rudīrya dāmōdara ityabhiṣṭutaḥ ।
mṛdudaraḥ svairamulūkhalē laga-
nnadūratō dvau kakubhāvudaikṣathāḥ ॥1॥

kubērasūnurnalakūbarābhidhaḥ
parō maṇigrīva iti prathāṃ gataḥ ।
mahēśasēvādhigataśriyōnmadau
chiraṃ kila tvadvimukhāvakhēlatām ॥2॥

surāpagāyāṃ kila tau madōtkaṭau
surāpagāyadbahuyauvatāvṛtau ।
vivāsasau kēliparau sa nāradō
bhavatpadaikapravaṇō niraikṣata ॥3॥

bhiyā priyālōkamupāttavāsasaṃ
purō nirīkṣyāpi madāndhachētasau ।
imau bhavadbhaktyupaśāntisiddhayē
munirjagau śāntimṛtē kutaḥ sukham ॥4॥

yuvāmavāptau kakubhātmatāṃ chiraṃ
hariṃ nirīkṣyātha padaṃ svamāpnutam ।
itīrētau tau bhavadīkṣaṇaspṛhāṃ
gatau vrajāntē kakubhau babhūvatuḥ ॥5॥

atandramindradruyugaṃ tathāvidhaṃ
samēyuṣā mantharagāminā tvayā ।
tirāyitōlūkhalarōdhanirdhutau
chirāya jīrṇau paripātitau tarū ॥6॥

abhāji śākhidvitayaṃ yadā tvayā
tadaiva tadgarbhatalānnirēyuṣā ।
mahātviṣā yakṣayugēna tatkṣaṇā-
dabhāji gōvinda bhavānapi stavaiḥ ॥7॥

ihānyabhaktō’pi samēṣyati kramāt
bhavantamētau khalu rudrasēvakau ।
muniprasādādbhavdaṅghrimāgatau
gatau vṛṇānau khalu bhaktimuttamām ॥8॥

tatastarūddāraṇadāruṇārava-
prakampisampātini gōpamaṇḍalē ।
vilajjitatvajjananīmukhēkṣiṇā
vyamōkṣi nandēna bhavān vimōkṣadaḥ ॥9॥

mahīruhōrmadhyagatō batārbhakō
harēḥ prabhāvādaparikṣatō’dhunā ।
iti bruvāṇairgamitō gṛhaṃ bhavān
marutpurādhīśvara pāhi māṃ gadāt ॥10॥