Narayaniyam Dashaka 41

vrajēśvaraiḥ śaurivachō niśamya samāvrajannadhvani bhītachētāḥ ।
niṣpiṣṭaniśśēṣataruṃ nirīkṣya kañchitpadārthaṃ śaraṇaṃ gatasvām ॥1॥

niśamya gōpīvachanādudantaṃ sarvē’pi gōpā bhayavismayāndhāḥ ।
tvatpātitaṃ ghōrapiśāchadēhaṃ dēhurvidūrē’tha kuṭhārakṛttam ॥2॥

tvatpītapūtastanatachCharīrāt samuchchalannuchchatarō hi dhūmaḥ ।
śaṅkāmadhādāgaravaḥ kimēṣa kiṃ chāndanō gaulgulavō’thavēti ॥3॥

madaṅgasaṅgasya phalaṃ na dūrē kṣaṇēna tāvat bhavatāmapi syāt ।
ityullapan vallavatallajēbhyaḥ tvaṃ pūtanāmātanuthāḥ sugandhim ॥4॥

chitraṃ piśāchyā na hataḥ kumāraḥ chitraṃ puraivākathi śauriṇēdam ।
iti praśaṃsan kila gōpalōkō bhavanmukhālōkarasē nyamāṅkṣīt ॥5॥

dinēdinē’tha prativṛddhalakṣmīrakṣīṇamāṅgalyaśatō vrajō’yam ।
bhavannivāsādayi vāsudēva pramōdasāndraḥ paritō virējē ॥6॥

gṛhēṣu tē kōmalarūpahāsamithaḥkathāsaṅkulitāḥ kamanyaḥ ।
vṛttēṣu kṛtyēṣu bhavannirīkṣāsamāgatāḥ pratyahamatyanandan ॥7॥

ahō kumārō mayi dattadṛṣṭiḥ smitaṃ kṛtaṃ māṃ prati vatsakēna ।
ēhyēhi māmityupasārya pāṇī tvayīśa kiṃ kiṃ na kṛtaṃ vadhūbhiḥ ॥8॥

bhavadvapuḥsparśanakautukēna karātkaraṃ gōpavadhūjanēna ।
nītastvamātāmrasarōjamālāvyālambilōlambatulāmalāsīḥ ॥9॥

nipāyayantī stanamaṅkagaṃ tvāṃ vilōkayantī vadanaṃ hasantī ।
daśāṃ yaśōdā katamāṃ na bhējē sa tādṛśaḥ pāhi harē gadānmām ॥10॥