Narayaniyam Dashaka 38

ānandarūpa bhagavannayi tē’vatārē
prāptē pradīptabhavadaṅganirīyamāṇaiḥ ।
kāntivrajairiva ghanāghanamaṇḍalairdyā-
māvṛṇvatī viruruchē kila varṣavēlā ॥1॥

āśāsu śītalatarāsu payōdatōyai-
rāśāsitāptivivaśēṣu cha sajjanēṣu ।
naiśākarōdayavidhau niśi madhyamāyāṃ
klēśāpahastrijagatāṃ tvamihāvirāsīḥ ॥2॥

bālyaspṛśā’pi vapuṣā dadhuṣā vibhūtī-
rudyatkirīṭakaṭakāṅgadahārabhāsā ।
śaṅkhārivārijagadāparibhāsitēna
mēghāsitēna parilēsitha sūtigēhē ॥3॥

vakṣaḥsthalīsukhanilīnavilāsilakṣmī-
mandākṣalakṣitakaṭākṣavimōkṣabhēdaiḥ ।
tanmandirasya khalakaṃsakṛtāmalakṣmī-
munmārjayanniva virējitha vāsudēva ॥4॥

śauristu dhīramunimaṇḍalachētasō’pi
dūrasthitaṃ vapurudīkṣya nijēkṣaṇābhyām ॥
ānandavāṣpapulakōdgamagadgadārdra-
stuṣṭāva dṛṣṭimakarandarasaṃ bhavantam ॥5॥

dēva prasīda parapūruṣa tāpavallī-
nirlūnadātrasamanētrakalāvilāsin ।
khēdānapākuru kṛpāgurubhiḥ kaṭākṣai-
rityādi tēna muditēna chiraṃ nutō’bhūḥ ॥6॥

mātrā cha nētrasalilāstṛtagātravalyā
stōtrairabhiṣṭutaguṇaḥ karuṇālayastvam ।
prāchīnajanmayugalaṃ pratibōdhya tābhyāṃ
māturgirā dadhitha mānuṣabālavēṣam ॥7॥

tvatprēritastadanu nandatanūjayā tē
vyatyāsamārachayituṃ sa hi śūrasūnuḥ ।
tvāṃ hastayōradhṛta chittavidhāryamāryai-
rambhōruhasthakalahaṃsakiśōraramyam ॥8॥

jātā tadā paśupasadmani yōganidrā ।
nidrāvimudritamathākṛta pauralōkam ।
tvatprēraṇāt kimiva chitramachētanairyad-
dvāraiḥ svayaṃ vyaghaṭi saṅghaṭitaiḥ sugāḍham ॥9॥

śēṣēṇa bhūriphaṇavāritavāriṇā’tha
svairaṃ pradarśitapathō maṇidīpitēna ।
tvāṃ dhārayan sa khalu dhanyatamaḥ pratasthē
sō’yaṃ tvamīśa mama nāśaya rōgavēgān ॥10॥