Narayaniyam Dashaka 36

atrēḥ putratayā purā tvamanasūyāyāṃ hi dattābhidhō
jātaḥ śiṣyanibandhatandritamanāḥ svasthaścharan kāntayā ।
dṛṣṭō bhaktatamēna hēhayamahīpālēna tasmai varā-
naṣṭaiśvaryamukhān pradāya daditha svēnaiva chāntē vadham ॥1॥

satyaṃ kartumathārjunasya cha varaṃ tachChaktimātrānataṃ
brahmadvēṣi tadākhilaṃ nṛpakulaṃ hantuṃ cha bhūmērbharam ।
sañjātō jamadagnitō bhṛgukulē tvaṃ rēṇukāyāṃ harē
rāmō nāma tadātmajēṣvavarajaḥ pitrōradhāḥ sammadam ॥2॥

labdhāmnāyagaṇaśchaturdaśavayā gandharvarājē manā-
gāsaktāṃ kila mātaraṃ prati pituḥ krōdhākulasyājñayā ।
tātājñātigasōdaraiḥ samamimāṃ Chitvā’tha śāntāt pitu-
stēṣāṃ jīvanayōgamāpitha varaṃ mātā cha tē’dādvarān ॥3॥

pitrā mātṛmudē stavāhṛtaviyaddhēnōrnijādāśramāt
prasthāyātha bhṛgōrgirā himagirāvārādhya gaurīpatim ।
labdhvā tatparaśuṃ taduktadanujachChēdī mahāstrādikaṃ
prāptō mitramathākṛtavraṇamuniṃ prāpyāgamaḥ svāśramam ॥4॥

ākhēṭōpagatō’rjunaḥ suragavīsamprāptasampadgaṇai-
stvatpitrā paripūjitaḥ puragatō durmantrivāchā punaḥ ।
gāṃ krētuṃ sachivaṃ nyayuṅkta kudhiyā tēnāpi rundhanmuni-
prāṇakṣēpasarōṣagōhatachamūchakrēṇa vatsō hṛtaḥ ॥5॥

śukrōjjīvitatātavākyachalitakrōdhō’tha sakhyā samaṃ
bibhraddhyātamahōdarōpanihitaṃ chāpaṃ kuṭhāraṃ śarān ।
ārūḍhaḥ sahavāhayantṛkarathaṃ māhiṣmatīmāviśan
vāgbhirvatsamadāśuṣi kṣitipatau samprāstuthāḥ saṅgaram ॥6॥

putrāṇāmayutēna saptadaśabhiśchākṣauhiṇībhirmahā-
sēnānībhiranēkamitranivahairvyājṛmbhitāyōdhanaḥ ।
sadyastvatkakuṭhārabāṇavidalanniśśēṣasainyōtkarō
bhītipradrutanaṣṭaśiṣṭatanayastvāmāpatat hēhayaḥ ॥7॥

līlāvāritanarmadājalavalallaṅkēśagarvāpaha-
śrīmadbāhusahasramuktabahuśastrāstraṃ nirundhannamum ।
chakrē tvayyatha vaiṣṇavē’pi viphalē buddhvā hariṃ tvāṃ mudā
dhyāyantaṃ Chitasarvadōṣamavadhīḥ sō’gāt paraṃ tē padam ॥8॥

bhūyō’marṣitahēhayātmajagaṇaistātē hatē rēṇukā-
māghnānāṃ hṛdayaṃ nirīkṣya bahuśō ghōrāṃ pratijñāṃ vahan ।
dhyānānītarathāyudhastvamakṛthā vipradruhaḥ kṣatriyān
dikchakrēṣu kuṭhārayan viśikhayan niḥkṣatriyāṃ mēdinīm ॥9॥

tātōjjīvanakṛnnṛpālakakulaṃ trissaptakṛtvō jayan
santarpyātha samantapañchakamahāraktahṛdaughē pitṛn
yajñē kṣmāmapi kāśyapādiṣu diśan sālvēna yudhyan punaḥ
kṛṣṇō’muṃ nihaniṣyatīti śamitō yuddhāt kumārairbhavān ॥10॥

nyasyāstrāṇi mahēndrabhūbhṛti tapastanvan punarmajjitāṃ
gōkarṇāvadhi sāgarēṇa dharaṇīṃ dṛṣṭvārthitastāpasaiḥ ।
dhyātēṣvāsadhṛtānalāstrachakitaṃ sindhuṃ sruvakṣēpaṇā-
dutsāryōddhṛtakēralō bhṛgupatē vātēśa saṃrakṣa mām ॥11॥