Narayaniyam Dashaka 35

nītassugrīvamaitrīṃ tadanu hanumatā dundubhēḥ kāyamuchchaiḥ
kṣiptvāṅguṣṭhēna bhūyō luluvitha yugapat patriṇā sapta sālān ।
hatvā sugrīvaghātōdyatamatulabalaṃ bālinaṃ vyājavṛttyā
varṣāvēlāmanaiṣīrvirahataralitastvaṃ mataṅgāśramāntē ॥1॥

sugrīvēṇānujōktyā sabhayamabhiyatā vyūhitāṃ vāhinīṃ tā-
mṛkṣāṇāṃ vīkṣya dikṣu drutamatha dayitāmārgaṇāyāvanamrām ।
sandēśaṃ chāṅgulīyaṃ pavanasutakarē prādiśō mōdaśālī
mārgē mārgē mamārgē kapibhirapi tadā tvatpriyā saprayāsaiḥ ॥2॥

tvadvārtākarṇanōdyadgarudurujavasampātisampātivākya-
prōttīrṇārṇōdhirantarnagari janakajāṃ vīkṣya datvāṅgulīyam ।
prakṣudyōdyānamakṣakṣapaṇachaṇaraṇaḥ sōḍhabandhō daśāsyaṃ
dṛṣṭvā pluṣṭvā cha laṅkāṃ jhaṭiti sa hanumān mauliratnaṃ dadau tē ॥3॥

tvaṃ sugrīvāṅgadādiprabalakapichamūchakravikrāntabhūmī-
chakrō’bhikramya pārējaladhi niśicharēndrānujāśrīyamāṇaḥ ।
tatprōktāṃ śatruvārtāṃ rahasi niśamayan prārthanāpārthyarōṣa-
prāstāgnēyāstratējastrasadudadhigirā labdhavān madhyamārgam ॥4॥

kīśairāśāntarōpāhṛtagirinikaraiḥ sētumādhāpya yātō
yātūnyāmardya daṃṣṭrānakhaśikhariśilāsālaśastraiḥ svasainyaiḥ ।
vyākurvan sānujastvaṃ samarabhuvi paraṃ vikramaṃ śakrajētrā
vēgānnāgāstrabaddhaḥ patagapatigarunmārutairmōchitō’bhūḥ ॥5॥

saumitristvatra śaktiprahṛtigaladasurvātajānītaśaila-
ghrāṇāt prāṇānupētō vyakṛṇuta kusṛtiślāghinaṃ mēghanādam ।
māyākṣōbhēṣu vaibhīṣaṇavachanahṛtastambhanaḥ kumbhakarṇaṃ
samprāptaṃ kampitōrvītalamakhilachamūbhakṣiṇaṃ vyakṣiṇōstvam ॥6॥

gṛhṇan jambhārisamprēṣitarathakavachau rāvaṇēnābhiyuddhyan
brahmāstrēṇāsya bhindan galatatimabalāmagniśuddhāṃ pragṛhṇan ।
dēvaśrēṇīvarōjjīvitasamaramṛtairakṣataiḥ ṛkṣasaṅghai-
rlaṅkābhartrā cha sākaṃ nijanagaramagāḥ sapriyaḥ puṣpakēṇa ॥7॥

prītō divyābhiṣēkairayutasamadhikān vatsarān paryaraṃsī-
rmaithilyāṃ pāpavāchā śiva! śiva! kila tāṃ garbhiṇīmabhyahāsīḥ ।
śatrughnēnārdayitvā lavaṇaniśicharaṃ prārdayaḥ śūdrapāśaṃ
tāvadvālmīkigēhē kṛtavasatirupāsūta sītā sutau tē ॥8॥

vālmīkēstvatsutōdgāpitamadhurakṛtērājñayā yajñavāṭē
sītāṃ tvayyāptukāmē kṣitimaviśadasau tvaṃ cha kālārthitō’bhūḥ ।
hētōḥ saumitrighātī svayamatha sarayūmagnaniśśēṣabhṛtyaiḥ
sākaṃ nākaṃ prayātō nijapadamagamō dēva vaikuṇṭhamādyam ॥9॥

sō’yaṃ martyāvatārastava khalu niyataṃ martyaśikṣārthamēvaṃ
viślēṣārtirnirāgastyajanamapi bhavēt kāmadharmātisaktyā ।
nō chēt svātmānubhūtēḥ kva nu tava manasō vikriyā chakrapāṇē
sa tvaṃ sattvaikamūrtē pavanapurapatē vyādhunu vyādhitāpān ॥10॥