Narayaniyam Dashaka 24

hiraṇyākṣē pōtripravaravapuṣā dēva bhavatā
hatē śōkakrōdhaglapitadhṛtirētasya sahajaḥ ।
hiraṇyaprārambhaḥ kaśipuramarārātisadasi
pratijñamātēnē tava kila vadhārthaṃ madhuripō ॥1॥

vidhātāraṃ ghōraṃ sa khalu tapasitvā nachirataḥ
puraḥ sākṣātkurvan suranaramṛgādyairanidhanam ।
varaṃ labdhvā dṛptō jagadiha bhavannāyakamidaṃ
parikṣundannindrādaharata divaṃ tvāmagaṇayan ॥2॥

nihantuṃ tvāṃ bhūyastava padamavāptasya cha ripō-
rbahirdṛṣṭērantardadhitha hṛdayē sūkṣmavapuṣā ।
nadannuchchaistatrāpyakhilabhuvanāntē cha mṛgayan
bhiyā yātaṃ matvā sa khalu jitakāśī nivavṛtē ॥3॥

tatō’sya prahlādaḥ samajani sutō garbhavasatau
munērvīṇāpāṇēradhigatabhavadbhaktimahimā ।
sa vai jātyā daityaḥ śiśurapi samētya tvayi ratiṃ
gatastvadbhaktānāṃ varada paramōdāharaṇatām ॥4॥

surārīṇāṃ hāsyaṃ tava charaṇadāsyaṃ nijasutē
sa dṛṣṭvā duṣṭātmā gurubhiraśiśikṣachchiramamum ।
guruprōktaṃ chāsāvidamidamabhadrāya dṛḍhami-
tyapākurvan sarvaṃ tava charaṇabhaktyaiva vavṛdhē ॥ 5 ॥

adhītēṣu śrēṣṭhaṃ kimiti paripṛṣṭē’tha tanayē
bhavadbhaktiṃ varyāmabhigadati paryākuladhṛtiḥ ।
gurubhyō rōṣitvā sahajamatirasyētyabhividan
vadhōpāyānasmin vyatanuta bhavatpādaśaraṇē ॥6॥

sa śūlairāviddhaḥ subahu mathitō diggajagaṇai-
rmahāsarpairdaṣṭō’pyanaśanagarāhāravidhutaḥ ।
girīndravakṣiptō’pyahaha! paramātmannayi vibhō
tvayi nyastātmatvāt kimapi na nipīḍāmabhajata ॥7॥

tataḥ śaṅkāviṣṭaḥ sa punaratiduṣṭō’sya janakō
gurūktyā tadgēhē kila varuṇapāśaistamaruṇat ।
gurōśchāsānnidhyē sa punaranugān daityatanayān
bhavadbhaktēstattvaṃ paramamapi vijñānamaśiṣat ॥8॥

pitā śṛṇvan bālaprakaramakhilaṃ tvatstutiparaṃ
ruṣāndhaḥ prāhainaṃ kulahataka kastē balamiti ।
balaṃ mē vaikuṇṭhastava cha jagatāṃ chāpi sa balaṃ
sa ēva trailōkyaṃ sakalamiti dhīrō’yamagadīt ॥9॥

arē kvāsau kvāsau sakalajagadātmā haririti
prabhintē sma stambhaṃ chalitakaravālō ditisutaḥ ।
ataḥ paśchādviṣṇō na hi vaditumīśō’smi sahasā
kṛpātman viśvātman pavanapuravāsin mṛḍaya mām ॥10॥