Narayaniyam Dashaka 22

ajāmilō nāma mahīsuraḥ purā
charan vibhō dharmapathān gṛhāśramī ।
gurōrgirā kānanamētya dṛṣṭavān
sudhṛṣṭaśīlāṃ kulaṭāṃ madākulām ॥1॥

svataḥ praśāntō’pi tadāhṛtāśayaḥ
svadharmamutsṛjya tayā samāraman ।
adharmakārī daśamī bhavan puna-
rdadhau bhavannāmayutē sutē ratim ॥2॥

sa mṛtyukālē yamarājakiṅkarān
bhayaṅkarāṃstrīnabhilakṣayan bhiyā ।
purā manāk tvatsmṛtivāsanābalāt
juhāva nārāyaṇanāmakaṃ sutam ॥3॥

durāśayasyāpi tadātvanirgata-
tvadīyanāmākṣaramātravaibhavāt ।
purō’bhipēturbhavadīyapārṣadāḥ
chaturbhujāḥ pītapaṭā manōramāḥ ॥4॥

amuṃ cha sampāśya vikarṣatō bhaṭān
vimuñchatētyārurudhurbalādamī ।
nivāritāstē cha bhavajjanaistadā
tadīyapāpaṃ nikhilaṃ nyavēdayan ॥5॥

bhavantu pāpāni kathaṃ tu niṣkṛtē
kṛtē’pi bhō daṇḍanamasti paṇḍitāḥ ।
na niṣkṛtiḥ kiṃ viditā bhavādṛśā-
miti prabhō tvatpuruṣā babhāṣirē ॥6॥

śrutismṛtibhyāṃ vihitā vratādayaḥ
punanti pāpaṃ na lunanti vāsanām ।
anantasēvā tu nikṛntati dvayī-
miti prabhō tvatpuruṣā babhāṣirē ॥7॥

anēna bhō janmasahasrakōṭibhiḥ
kṛtēṣu pāpēṣvapi niṣkṛtiḥ kṛtā ।
yadagrahīnnāma bhayākulō harē-
riti prabhō tvatpuruṣā babhāṣirē ॥8॥

nṛṇāmabuddhyāpi mukundakīrtanaṃ
dahatyaghaughān mahimāsya tādṛśaḥ ।
yathāgnirēdhāṃsi yathauṣadhaṃ gadā –
niti prabhō tvatpuruṣā babhāṣirē ॥9॥

itīritairyāmyabhaṭairapāsṛtē
bhavadbhaṭānāṃ cha gaṇē tirōhitē ।
bhavatsmṛtiṃ kañchana kālamācharan
bhavatpadaṃ prāpi bhavadbhaṭairasau ॥10॥

svakiṅkarāvēdanaśaṅkitō yama-
stvadaṅghribhaktēṣu na gamyatāmiti ।
svakīyabhṛtyānaśiśikṣaduchchakaiḥ
sa dēva vātālayanātha pāhi mām ॥11॥