Narayaniyam Dashaka 19

pṛthōstu naptā pṛthudharmakarmaṭhaḥ
prāchīnabarhiryuvatau śatadrutau ।
prachētasō nāma suchētasaḥ sutā-
najījanattvatkaruṇāṅkurāniva ॥1॥

pituḥ sisṛkṣāniratasya śāsanād-
bhavattapasyābhiratā daśāpi tē
payōnidhiṃ paśchimamētya tattaṭē
sarōvaraṃ sandadṛśurmanōharam ॥2॥

tadā bhavattīrthamidaṃ samāgatō
bhavō bhavatsēvakadarśanādṛtaḥ ।
prakāśamāsādya puraḥ prachētasā-
mupādiśat bhaktatamastava stavam ॥3॥

stavaṃ japantastamamī jalāntarē
bhavantamāsēviṣatāyutaṃ samāḥ ।
bhavatsukhāsvādarasādamīṣviyān
babhūva kālō dhruvavanna śīghratā ॥4॥

tapōbhirēṣāmatimātravardhibhiḥ
sa yajñahiṃsāniratō’pi pāvitaḥ ।
pitā’pi tēṣāṃ gṛhayātanārada-
pradarśitātmā bhavadātmatāṃ yayau ॥5॥

kṛpābalēnaiva puraḥ prachētasāṃ
prakāśamāgāḥ patagēndravāhanaḥ ।
virāji chakrādivarāyudhāṃśubhi-
rbhujābhiraṣṭābhirudañchitadyutiḥ ॥6॥

prachētasāṃ tāvadayāchatāmapi
tvamēva kāruṇyabharādvarānadāḥ ।
bhavadvichintā’pi śivāya dēhināṃ
bhavatvasau rudranutiścha kāmadā ॥7॥

avāpya kāntāṃ tanayāṃ mahīruhāṃ
tayā ramadhvaṃ daśalakṣavatsarīm ।
sutō’stu dakṣō nanu tatkṣaṇāchcha māṃ
prayāsyathēti nyagadō mudaiva tān ॥8॥

tataścha tē bhūtalarōdhinastarūn
krudhā dahantō druhiṇēna vāritāḥ ।
drumaiścha dattāṃ tanayāmavāpya tāṃ
tvaduktakālaṃ sukhinō’bhirēmirē ॥9॥

avāpya dakṣaṃ cha sutaṃ kṛtādhvarāḥ
prachētasō nāradalabdhayā dhiyā ।
avāpurānandapadaṃ tathāvidha-
stvamīśa vātālayanātha pāhi mām ॥10॥