Narayaniyam Dashaka 12

svāyambhuvō manurathō janasargaśīlō
dṛṣṭvā mahīmasamayē salilē nimagnām ।
sraṣṭāramāpa śaraṇaṃ bhavadaṅghrisēvā-
tuṣṭāśayaṃ munijanaiḥ saha satyalōkē ॥1॥

kaṣṭaṃ prajāḥ sṛjati mayyavanirnimagnā
sthānaṃ sarōjabhava kalpaya tat prajānām ।
ityēvamēṣa kathitō manunā svayambhūḥ –
rambhōruhākṣa tava pādayugaṃ vyachintīt ॥ 2 ॥

hā hā vibhō jalamahaṃ nyapibaṃ purastā-
dadyāpi majjati mahī kimahaṃ karōmi ।
itthaṃ tvadaṅghriyugalaṃ śaraṇaṃ yatō’sya
nāsāpuṭāt samabhavaḥ śiśukōlarūpī ।3॥

aṅguṣṭhamātravapurutpatitaḥ purastāt
bhōyō’tha kumbhisadṛśaḥ samajṛmbhathāstvam ।
abhrē tathāvidhamudīkṣya bhavantamuchchai –
rvismēratāṃ vidhiragāt saha sūnubhiḥ svaiḥ ॥4॥

kō’sāvachintyamahimā kiṭirutthitō mē
nāsāpuṭāt kimu bhavēdajitasya māyā ।
itthaṃ vichintayati dhātari śailamātraḥ
sadyō bhavan kila jagarjitha ghōraghōram ॥5॥

taṃ tē ninādamupakarṇya janastapaḥsthāḥ
satyasthitāścha munayō nunuvurbhavantam ।
tatstōtraharṣulamanāḥ pariṇadya bhūya-
stōyāśayaṃ vipulamūrtiravātarastvam ॥6॥

ūrdhvaprasāriparidhūmravidhūtarōmā
prōtkṣiptavāladhiravāṅmukhaghōraghōṇaḥ ।
tūrṇapradīrṇajaladaḥ parighūrṇadakṣṇā
stōtṛn munīn śiśirayannavatēritha tvam ॥7॥

antarjalaṃ tadanusaṅkulanakrachakraṃ
bhrāmyattimiṅgilakulaṃ kaluṣōrmimālam ।
āviśya bhīṣaṇaravēṇa rasātalasthā –
nākampayan vasumatīmagavēṣayastvam ॥8॥

dṛṣṭvā’tha daityahatakēna rasātalāntē
saṃvēśitāṃ jhaṭiti kūṭakiṭirvibhō tvam ।
āpātukānavigaṇayya surārikhēṭān
daṃṣṭrāṅkurēṇa vasudhāmadadhāḥ salīlam ॥9॥

abhyuddharannatha dharāṃ daśanāgralagna
mustāṅkurāṅkita ivādhikapīvarātmā ।
uddhūtaghōrasalilājjaladhērudañchan
krīḍāvarāhavapurīśvara pāhi rōgāt ॥10॥