Narayaniyam Dashaka 1

sāndrānandāvabōdhātmakamanupamitaṃ kāladēśāvadhibhyāṃ
nirmuktaṃ nityamuktaṃ nigamaśatasahasrēṇa nirbhāsyamānam ।
aspaṣṭaṃ dṛṣṭamātrē punarurupuruṣārthātmakaṃ brahma tatvaṃ
tattāvadbhāti sākṣād gurupavanapurē hanta bhāgyaṃ janānām ॥ 1 ॥

ēvandurlabhyavastunyapi sulabhatayā hastalabdhē yadanyat
tanvā vāchā dhiyā vā bhajati bata janaḥ kṣudrataiva sphuṭēyam ।
ētē tāvadvayaṃ tu sthirataramanasā viśvapīḍāpahatyai
niśśēṣātmānamēnaṃ gurupavanapurādhīśamēvāśrayāmaḥ ॥ 2 ॥

sattvaṃ yattat parābhyāmaparikalanatō nirmalaṃ tēna tāvat
bhūtairbhūtēndriyaistē vapuriti bahuśaḥ śrūyatē vyāsavākyam।
tat svachChtvādyadāchChāditaparasukhachidgarbhanirbhāsarūpaṃ
tasmin dhanyā ramantē śrutimatimadhurē sugrahē vigrahē tē ॥ 3 ॥

niṣkampē nityapūrṇē niravadhiparamānandapīyūṣarūpē
nirlīnānēkamuktāvalisubhagatamē nirmalabrahmasindhau ।
kallōlōllāsatulyaṃ khalu vimalataraṃ sattvamāhustadātmā
kasmānnō niṣkalastvaṃ sakala iti vachastvatkalāsvēva bhūman ॥ 4 ॥

nirvyāpārō’pi niṣkāraṇamaja bhajasē yatkriyāmīkṣaṇākhyāṃ
tēnaivōdēti līnā prakṛtirasatikalpā’pi kalpādikālē।
tasyāḥ saṃśuddhamaṃśaṃ kamapi tamatirōdhāyakaṃ sattvarūpaṃ
sa tvaṃ dhṛtvā dadhāsi svamahimavibhavākuṇṭha vaikuṇṭha rūpaṃ॥5॥

tattē pratyagradhārādharalalitakalāyāvalīkēlikāraṃ
lāvaṇyasyaikasāraṃ sukṛtijanadṛśāṃ pūrṇapuṇyāvatāram।
lakṣmīniśśaṅkalīlānilayanamamṛtasyandasandōhamantaḥ
siñchat sañchintakānāṃ vapuranukalayē mārutāgāranātha ॥6॥

kaṣṭā tē sṛṣṭichēṣṭā bahutarabhavakhēdāvahā jīvabhājā-
mityēvaṃ pūrvamālōchitamajita mayā naivamadyābhijānē।
nōchējjīvāḥ kathaṃ vā madhurataramidaṃ tvadvapuśchidrasārdraṃ
nētraiḥ śrōtraiścha pītvā paramarasasudhāmbhōdhipūrē ramēran॥7॥

namrāṇāṃ sannidhattē satatamapi purastairanabhyarthitāna –
pyarthān kāmānajasraṃ vitarati paramānandasāndrāṃ gatiṃ cha।
itthaṃ niśśēṣalabhyō niravadhikaphalaḥ pārijātō harē tvaṃ
kṣudraṃ taṃ śakravāṭīdrumamabhilaṣati vyarthamarthivrajō’yam॥8॥

kāruṇyātkāmamanyaṃ dadati khalu parē svātmadastvaṃ viśēṣā-
daiśvaryādīśatē’nyē jagati parajanē svātmanō’pīśvarastvam।
tvayyuchchairāramanti pratipadamadhurē chētanāḥ sphītabhāgyā-
stvaṃ chātmārāma ēvētyatulaguṇagaṇādhāra śaurē namastē॥9॥

aiśvaryaṃ śaṅkarādīśvaraviniyamanaṃ viśvatējōharāṇāṃ
tējassaṃhāri vīryaṃ vimalamapi yaśō nispṛhaiśchōpagītam।
aṅgāsaṅgā sadā śrīrakhilavidasi na kvāpi tē saṅgavārtā
tadvātāgāravāsin murahara bhagavachChabdamukhyāśrayō’si॥10॥