Muchukunda Stuti

vimōhitō’yaṃ jana īśa māyayā
tvadīyayā tvāṃ cha bhajatyanarthadṛk ।
sukhāya duḥkhaprabhavēṣu sajjatē
gṛhēṣu yōṣitpuruṣaścha vañchitaḥ ॥ 1 ॥
labdhvā janō durlabhamatra mānuṣaṃ
kathañchidavyaṅgamayatnatō’nagha ।
pādāravindaṃ na bhajatyasanmati-
rgṛhāndhakūpē patitō yathā paśuḥ ॥ 2 ॥
mamaiṣa kālō’jita niṣphalō gatō
rājyaśriyōnnaddhamadasya bhūpatē ।
martyātmabuddhēḥ sutadārakōśabhū-
ṣvāsajjamānasya durantachintayā ॥ 3 ॥
kalēvarē’smin ghaṭakuḍyasannibhē
nirūḍhamānō naradēva ityaham ।
vṛtō rathēbhāśvapadātyanīkapairgāṃ
paryaṭaṃstvāgaṇayan sudurmadaḥ ॥ 4 ॥
pramattamuchchairiti kṛtyachintayā
prabhuddhalōbhaṃ viṣayēṣu lālasam ।
tvamapramattaḥ sahasā’bhipadyasē
kṣullēlihānō’hirivākhumantakaḥ ॥ 5 ॥
purā rathairhēmapariṣkṛtaiścharan
mataṅgajairvā naradēvasañjñitaḥ ।
sa ēva kālēna duratyayēna tē
kalēvarō viṭkṛmibhasmasañjñitaḥ ॥ 6 ॥
nirjitya dikchakramabhūtavigrahō
varāsanasthaḥ samarājavanditaḥ ।
gṛhēṣu maithunyasukhēṣu yōṣitāṃ
krīḍāmṛga pūruṣa īśa nīyatē ॥ 7 ॥
karōti karmāṇi tapaḥsu niṣṭhitō
nivṛttabhōgastadapēkṣayā dadat ।
punaścha bhūyēyamahaṃ svarāḍiti
prabuddhatarṣō na sukhāya kalpatē ॥ 8 ॥
bhavāpavargō bhramatō yadā bhavē-
jjanasya tarhyachyuta satsamāgamaḥ ।
satsaṅgamō yarhi tadaiva sadgatau
parāvarēśē tvayi jāyatē matiḥ ॥ 9 ॥
manyē mamānugraha īśa tē kṛtō
rājyānubandhāpagamō yadṛchChayā ।
yaḥ prārthyatē sādhubhirēkacharyayā
vanaṃ vivikṣadbhirakhaṇḍabhūmipaiḥ ॥ 10 ॥
na kāmayē’nyaṃ tava pādasēvanād-
akiñchanaprārthyatamādvaraṃ vibhō ।
ārādhya kastvāṃ hyapavargadaṃ harē
vṛṇīta āryō varamātmabandhanam ॥ 11 ॥
tasmādvisṛjyāśiṣa īśa sarvatō
rajastamaḥsattvaguṇānubandhanāḥ ।
nirañjanaṃ nirguṇamadvayaṃ paraṃ
tvāṃ jñaptimātraṃ puruṣaṃ vrajāmyaham ॥ 12 ॥
chiramiha vṛjinārtastapyamānō’nutāpaiḥ
avitṛṣaṣaḍamitrō labdhaśāntiḥ kathañchit ।
śaraṇada samupētastvatpadābjaṃ parātman
abhayamamṛtamaśōkaṃ pāhi mā’pannamīśa ॥ 13 ॥

iti śrīmadbhāgavatāntargatā muchukundakṛtā śrīviṣṇustutiḥ samāptā ।