Mritasanjivana Kavacha Stotram

ēvamārādhya gaurīśaṃ dēvaṃ mṛtyuñjayēśvaram ।
mṛtasañjīvanaṃ nāmnā kavachaṃ prajapēt sadā ॥ 1 ॥

sārātsārataraṃ puṇyaṃ guhyādguhyataraṃ śubham ।
mahādēvasya kavachaṃ mṛtasañjīvanāmakam ॥ 2 ॥

samāhitamanā bhūtvā śṛṇuṣva kavachaṃ śubham ।
śṛtvaitaddivya kavachaṃ rahasyaṃ kuru sarvadā ॥ 3 ॥

varābhayakarō yajvā sarvadēvaniṣēvitaḥ ।
mṛtyuñjayō mahādēvaḥ prāchyāṃ māṃ pātu sarvadā ॥ 4 ॥

dadhānaḥ śaktimabhayāṃ trimukhaṃ ṣaḍbhujaḥ prabhuḥ ।
sadāśivō’gnirūpī māmāgnēyyāṃ pātu sarvadā ॥ 5 ॥

aṣṭādaśabhujōpētō daṇḍābhayakarō vibhuḥ ।
yamarūpī mahādēvō dakṣiṇasyāṃ sadāvatu ॥ 6 ॥

khaḍgābhayakarō dhīrō rakṣōgaṇaniṣēvitaḥ ।
rakṣōrūpī mahēśō māṃ nairṛtyāṃ sarvadāvatu ॥ 7 ॥

pāśābhayabhujaḥ sarvaratnākaraniṣēvitaḥ ।
varuṇātmā mahādēvaḥ paśchimē māṃ sadāvatu ॥ 8 ॥

gadābhayakaraḥ prāṇanāyakaḥ sarvadāgatiḥ ।
vāyavyāṃ mārutātmā māṃ śaṅkaraḥ pātu sarvadā ॥ 9 ॥

śaṅkhābhayakarasthō māṃ nāyakaḥ paramēśvaraḥ ।
sarvātmāntaradigbhāgē pātu māṃ śaṅkaraḥ prabhuḥ ॥ 10 ॥

śūlābhayakaraḥ sarvavidyānāmadhināyakaḥ ।
īśānātmā tathaiśānyāṃ pātu māṃ paramēśvaraḥ ॥ 11 ॥

ūrdhvabhāgē brahmarūpī viśvātmādhaḥ sadāvatu ।
śirō mē śaṅkaraḥ pātu lalāṭaṃ chandraśēkharaḥ ॥ 12 ॥

bhrūmadhyaṃ sarvalōkēśastrinētrō lōchanē’vatu ।
bhrūyugmaṃ giriśaḥ pātu karṇau pātu mahēśvaraḥ ॥ 13 ॥

nāsikāṃ mē mahādēva ōṣṭhau pātu vṛṣadhvajaḥ ।
jihvāṃ mē dakṣiṇāmūrtirdantānmē giriśō’vatu ॥ 14 ॥

mṛtyuñjayō mukhaṃ pātu kaṇṭhaṃ mē nāgabhūṣaṇaḥ ।
pināki matkarau pātu triśūli hṛdayaṃ mama ॥ 15 ॥

pañchavaktraḥ stanau pātu udaraṃ jagadīśvaraḥ ।
nābhiṃ pātu virūpākṣaḥ pārśvau mē pārvatīpatiḥ ॥ 16 ॥

kaṭadvayaṃ girīśō mē pṛṣṭhaṃ mē pramathādhipaḥ ।
guhyaṃ mahēśvaraḥ pātu mamōrū pātu bhairavaḥ ॥ 17 ॥

jānunī mē jagaddhartā jaṅghē mē jagadambikā ।
pādau mē satataṃ pātu lōkavandyaḥ sadāśivaḥ ॥ 18 ॥

giriśaḥ pātu mē bhāryāṃ bhavaḥ pātu sutānmama ।
mṛtyuñjayō mamāyuṣyaṃ chittaṃ mē gaṇanāyakaḥ ॥ 19 ॥

sarvāṅgaṃ mē sadā pātu kālakālaḥ sadāśivaḥ ।
ētattē kavachaṃ puṇyaṃ dēvatānāṃ cha durlabham ॥ 20 ॥

mṛtasañjīvanaṃ nāmnā mahādēvēna kīrtitam ।
sahasrāvartanaṃ chāsya puraścharaṇamīritam ॥ 21 ॥

yaḥ paṭhēchchṛṇuyānnityaṃ śrāvayētsu samāhitaḥ ।
sa kālamṛtyuṃ nirjitya sadāyuṣyaṃ samaśnutē ॥ 22 ॥

hastēna vā yadā spṛṣṭvā mṛtaṃ sañjīvayatyasau ।
ādhayōvyādhayastasya na bhavanti kadāchana ॥ 23 ॥

kālamṛtyumapi prāptamasau jayati sarvadā ।
aṇimādiguṇaiśvaryaṃ labhatē mānavōttamaḥ ॥ 24 ॥

yuddhārambhē paṭhitvēdamaṣṭāviṃśativārakam ।
yuddhamadhyē sthitaḥ śatruḥ sadyaḥ sarvairna dṛśyatē ॥ 25 ॥

na brahmādīni chāstrāṇi kṣayaṃ kurvanti tasya vai ।
vijayaṃ labhatē dēvayuddhamadhyē’pi sarvadā ॥ 26 ॥

prātarutthāya satataṃ yaḥ paṭhētkavachaṃ śubham ।
akṣayyaṃ labhatē saukhyamihalōkē paratra cha ॥ 27 ॥

sarvavyādhivinirmuktaḥ sarvarōgavivarjitaḥ ।
ajarāmaraṇō bhūtvā sadā ṣōḍaśavārṣikaḥ ॥ 28 ॥

vicharatyakhilānlōkānprāpya bhōgāṃścha durlabhān ।
tasmādidaṃ mahāgōpyaṃ kavachaṃ samudāhṛtam ॥ 29 ॥

mṛtasañjīvanaṃ nāmnā dēvatairapi durlabham ॥ 30 ॥

iti vasiṣṭha kṛta mṛtasañjīvana kavacha stōtram ॥