Mooka Pancha Sathi 5 – Mandasmitha Satakam

badhnīmō vayamañjaliṃ pratidinaṃ bandhachChidē dēhināṃ
kandarpāgamatantramūlaguravē kalyāṇakēlībhuvē ।
kāmākṣyā ghanasārapuñjarajasē kāmadruhaśchakṣuṣāṃ
mandārastabakaprabhāmadamuṣē mandasmitajyōtiṣē ॥1॥

sadhrīchē navamallikāsumanasāṃ nāsāgramuktāmaṇē-
rāchāryāya mṛṇālakāṇḍamahasāṃ naisargikāya dviṣē ।
svardhunyā saha yudhvēna himaruchērardhāsanādhyāsinē
kāmākṣyāḥ smitamañjarīdhavalimādvaitāya tasmai namaḥ ॥2॥

karpūradyutichāturīmatitarāmalpīyasīṃ kurvatī
daurbhāgyōdayamēva saṃvidadhatī dauṣākarīṇāṃ tviṣām ।
kṣullānēva manōjñamallinikarānphullānapi vyañjatī
kāmākṣyā mṛdulasmitāṃśulaharī kāmaprasūrastu mē ॥3॥

yā pīnastanamaṇḍalōpari lasatkarpūralēpāyatē
yā nīlēkṣaṇarātrikāntitatiṣu jyōtsnāprarōhāyatē ।
yā saundaryadhunītaraṅgatatiṣu vyālōlahaṃsāyatē
kāmākṣyāḥ śiśirīkarōtu hṛdayaṃ sā mē smitaprāchurī ॥4॥

yēṣāṃ gachChati pūrvapakṣasaraṇiṃ kaumudvataḥ śvētimā
yēṣāṃ santatamārurukṣati tulākakṣyāṃ śarachchandramāḥ ।
yēṣāmichChati kamburapyasulabhāmantēvasatprakriyāṃ
kāmākṣyā mamatāṃ harantu mama tē hāsatviṣāmaṅkurāḥ ॥5॥

āśāsīmasu santataṃ vidadhatī naiśākarīṃ vyākriyāṃ
kāśānāmabhimānabhaṅgakalanākauśalyamābibhratī ।
īśānēna vilōkitā sakutukaṃ kāmākṣi tē kalmaṣa-
klēśāpāyakarī chakāsti laharī mandasmitajyōtiṣām ॥6॥

ārūḍhasya samunnatastanataṭīsāmrājyasiṃhāsanaṃ
kandarpasya vibhōrjagattrayaprākaṭyamudrānidhēḥ ।
yasyāśchāmarachāturīṃ kalayatē raśmichChaṭā chañchalā
sā mandasmitamañjarī bhavatu naḥ kāmāya kāmākṣi tē ॥7॥

śambhōryā parirambhasambhramavidhau nairmalyasīmānidhiḥ
gairvāṇīva taraṅgiṇī kṛtamṛdusyandāṃ kalindātmajām ।
kalmāṣīkurutē kalaṅkasuṣamāṃ kaṇṭhasthalīchumbinīṃ
kāmākṣyāḥ smitakandalī bhavatu naḥ kalyāṇasandōhinī ॥8॥

jētuṃ hāralatāmiva stanataṭīṃ sañjagmuṣī santataṃ
gantuṃ nirmalatāmiva dviguṇitāṃ magnā kṛpāstrōtasi ।
labdhuṃ vismayanīyatāmiva haraṃ rāgākulaṃ kurvatī
mañjustē smitamañjarī bhavabhayaṃ mathnātu kāmākṣi mē ॥9॥

śvētāpi prakaṭaṃ niśākararuchāṃ mālinyamātanvatī
śītāpi smarapāvakaṃ paśupatēḥ sandhukṣayantī sadā ।
svābhāvyādadharāśritāpi namatāmuchchairdiśantī gatiṃ
kāmākṣi sphuṭamantarā sphuratu nastvanmandahāsaprabhā ॥10॥

vaktraśrīsarasījalē taralitabhrūvallikallōlitē
kālimnā dadhatī kaṭākṣajanuṣā mādhuvratīṃ vyāpṛtim ।
nirnidrāmalapuṇḍarīkakuhanāpāṇḍityamābibhratī
kāmākṣyāḥ smitachāturī mama manaḥ kātaryamunmūlayēt ॥11॥

nityaṃ bādhitabandhujīvamadharaṃ maitrījuṣaṃ pallavaiḥ
śuddhasya dvijamaṇḍalasya cha tiraskartāramapyāśritā ।
yā vaimalyavatī sadaiva namatāṃ chētaḥ punītētarāṃ
kāmākṣyā hṛdayaṃ prasādayatu mē sā mandahāsaprabhā ॥12॥

druhyantī tamasē muhuḥ kumudinīsāhāyyamābibhratī
yāntī chandrakiśōraśēkharavapuḥsaudhāṅgaṇē prēṅkhaṇam ।
jñānāmbhōnidhivīchikāṃ sumanasāṃ kūlaṅkaṣāṃ kurvatī
kāmākṣyāḥ smitakaumudī haratu mē saṃsāratāpōdayam ॥13॥

kāśmīradravadhātukardamaruchā kalmāṣatāṃ bibhratī
haṃsaudhairiva kurvatī parichitiṃ hārīkṛtairmauktikaiḥ ।
vakṣōjanmatuṣāraśailakaṭakē sañchāramātanvatī
kāmākṣyā mṛdulasmitadyutimayī bhāgīrathī bhāsatē ॥14॥

kambōrvaṃśaparamparā iva kṛpāsantānavallībhuvaḥ
samphullastabakā iva prasṛmarā mūrtāḥ prasādā iva ।
vākpīyūṣakaṇā iva tripathagāparyāyabhēdā iva
bhrājantē tava mandahāsakiraṇāḥ kāñchīpurīnāyikē ॥15॥

vakṣōjē ghanasārapatrarachanābhaṅgīsapatnāyitā
kaṇṭhē mauktikahārayaṣṭikiraṇavyāpāramudrāyitā ।
ōṣṭhaśrīnikurumbapallavapuṭē prēṅkhatprasūnāyitā
kāmākṣi sphuratāṃ madīyahṛdayē tvanmandahāsaprabhā ॥16॥

yēṣāṃ bindurivōpari prachalitō nāsāgramuktāmaṇiḥ
yēṣāṃ dīna ivādhikaṇṭhamayatē hāraḥ karālambanam ।
yēṣāṃ bandhurivōṣṭhayōraruṇimā dhattē svayaṃ rañjanaṃ
kāmākṣyāḥ prabhavantu tē mama śivōllāsāya hāsāṅkurāḥ ॥17॥

yā jāḍyāmbunidhiṃ kṣiṇōti bhajatāṃ vairāyatē kairavaiḥ
nityaṃ yāṃ niyamēna yā cha yatatē kartuṃ triṇētrōtsavam ।
bimbaṃ chāndramasaṃ cha vañchayati yā garvēṇa sā tādṛśī
kāmākṣi smitamañjarī tava kathaṃ jyōtsnētyasau kīrtyatē ॥18॥

āruḍhā rabhasātpuraḥ puraripōrāślēṣaṇōpakramē
yā tē mātarupaiti divyataṭinīśaṅkākarī tatkṣaṇam ।
ōṣṭhau vēpayati bhruvau kuṭilayatyānamrayatyānanaṃ
tāṃ vandē mṛduhāsapūrasuṣamāmēkāmranāthapriyē ॥19॥

vaktrēndōstava chandrikā smitatatirvalgu sphurantī satāṃ
syāchchēdyuktimidaṃ chakōramanasāṃ kāmākṣi kautūhalam ।
ētachchitramaharniśaṃ yadadhikāmēṣā ruchiṃ gāhatē
bimbōṣṭhadyumaṇiprabhāsvapi cha yadbibbōkamālambatē ॥20॥

sādṛśyaṃ kalaśāmbudhērvahati yatkāmākṣi mandasmitaṃ
śōbhāmōṣṭharuchāmba vidrumabhavāmētādbhidāṃ brūmahē ।
ēkasmāduditaṃ purā kila papau śarvaḥ purāṇaḥ pumān
ētanmadhyasamudbhavaṃ rasayatē mādhuryarūpaṃ rasam ॥21॥

uttuṅgastanakumbhaśailakaṭakē vistārikastūrikā-
patraśrījuṣi chañchalāḥ smitaruchaḥ kāmākṣi tē kōmalāḥ ।
sandhyādīdhitirañjitā iva muhuḥ sāndrādharajyōtiṣā
vyālōlāmalaśāradābhraśakalavyāpāramātanvatē ॥22॥

kṣīraṃ dūrata ēva tiṣṭhatu kathaṃ vaimalyamātrādidaṃ
mātastē sahapāṭhavīthimayatāṃ mandasmitairmañjulaiḥ ।
kiṃ chēyaṃ tu bhidāsti dōhanavaśādēkaṃ tu sañjāyatē
kāmākṣi svayamarthitaṃ praṇamatāmanyattu dōduhyatē ॥23॥

karpūrairamṛtairjagajjanani tē kāmākṣi chandrātapaiḥ
muktāhāraguṇairmṛṇālavalayairmugdhasmitaśrīriyam ।
śrīkāñchīpuranāyikē samatayā saṃstūyatē sajjanaiḥ
tattādṛṅmama tāpaśāntividhayē kiṃ dēvi mandāyatē ॥24॥

madhyēgarbhitamañjuvākyalaharīmādhvījharīśītalā
mandārastabakāyatē janani tē mandasmitāṃśuchChaṭā ।
yasyā vardhayituṃ muhurvikasanaṃ kāmākṣi kāmadruhō
valgurvīkṣaṇavibhramavyatikarō vāsantamāsāyatē ॥25॥

bimbōṣṭhadyutipuñjarañjitaruchistvanmandahāsachChaṭā ।
kalyāṇaṃ girisārvabhaumatanayē kallōlayatvāśu mē ।
phullanmallipinaddhahallakamayī mālēva yā pēśalā
śrīkāñchīśvari māramarditururōmadhyē muhurlambatē ॥26॥

bibhrāṇā śaradabhravibhramadaśāṃ vidyōtamānāpyasō
kāmākṣi smitamañjarī kirati tē kāruṇyadhārārasam ।
āścharyaṃ śiśirīkarōti jagatīśchālōkya chaināmahō
kāmaṃ khēlati nīlakaṇṭhahṛdayaṃ kautūhalāndōlitam ॥27॥

prēṅkhatprauḍhakaṭākṣakuñjakuharēṣvatyachChaguchChāyitaṃ
vaktrēnduchChavisindhuvīchinichayē phēnapratānāyitam ।
nairantaryavijṛmbhitastanataṭē naichōlapaṭṭāyitaṃ
kāluṣyaṃ kabalīkarōtu mama tē kāmākṣi mandasmitam ॥28॥

pīyūṣaṃ tava mantharasmitamiti vyarthaiva sāpaprathā
kāmākṣi dhruvamīdṛśaṃ yadi bhavēdētatkathaṃ vā śivē ।
mandārasya kathālavaṃ na sahatē mathnāti mandākinī-
minduṃ nindati kīrtitē’pi kalaśīpāthōdhimīrṣyāyatē ॥29॥

viśvēṣāṃ nayanōtsavaṃ vitanutāṃ vidyōtatāṃ chandramā
vikhyātō madanāntakēna mukuṭīmadhyē cha sammānyatām ।
āḥ kiṃ jātamanēna hāsasuṣamāmālōkya kāmākṣi tē
kālaṅkīmavalambatē khalu daśāṃ kalmāṣahīnō’pyasau ॥30॥

chētaḥ śītalayantu naḥ paśupatērānandajīvātavō
namrāṇāṃ nayanādhvasīmasu śarachchandrātapōpakramāḥ ।
saṃsārākhyasarōruhākarakhalīkārē tuṣārōtkarāḥ
kāmākṣi smarakīrtibījanikarāstvanmandahāsāṅkurāḥ ॥31॥

karmaughākhyatamaḥkachākachikarānkāmākṣi sañchintayē
tvanmandasmitarōchiṣāṃ tribhuvanakṣēmaṅkarānaṅkurān ।
yē vaktraṃ śiśiraśriyō vikasitaṃ chandrātapāmbhōruha-
dvēṣōddhēṣōṇachāturīmiva tiraskartuṃ pariṣkurvatē ॥32॥

kuryurnaḥ kulaśailarājatanayē kūlaṅkaṣaṃ maṅgalaṃ
kundaspardhanachuñchavastava śivē mandasmitaprakramāḥ ।
yē kāmākṣi samastasākṣinayanaṃ santōṣayantīśvaraṃ
karpūraprakarā iva prasṛmarāḥ puṃsāmasādhāraṇāḥ ॥33॥

kamrēṇa snapayasva karmakuhanāchōrēṇa mārāgama-
vyākhyāśikṣaṇadīkṣitēna viduṣāmakṣīṇalakṣmīpuṣā ।
kāmākṣi smitakandalēna kaluṣasphōṭakriyāchuñchunā
kāruṇyāmṛtavīchikāviharaṇaprāchuryadhuryēṇa mām ॥34॥

tvanmandasmitakandalasya niyataṃ kāmākṣi śaṅkāmahē
bimbaḥ kaśchana nūtanaḥ prachalitō naiśākaraḥ śīkaraḥ ।
kiñcha kṣīrapayōnidhiḥ pratinidhiḥ svarvāhinīvīchikā-
bibvōkō’pi viḍamba ēva kuhanā mallīmatallīruchaḥ ॥35॥

duṣkarmārkanisargakarkaśamahassamparkatapataṃ mila-
tpaṅkaṃ śaṅkaravallabhē mama manaḥ kāñchīpurālaṅkriyē ।
amba tvanmṛdulasmitāmṛtarasē maṅktvā vidhūya vyathā-
mānandōdayasaudhaśṛṅgapadavīmārōḍhumākāṅkṣati ॥36॥

namrāṇāṃ nagarājaśēkharasutē nākālayānāṃ puraḥ
kāmākṣi tvarayā vipatpraśamēna kāruṇyadhārāḥ kiran ।
āgachChantamanugrahaṃ prakaṭayannānandabījāni tē
nāsīrē mṛduhāsa ēva tanutē nāthē sudhāśītalaḥ ॥37॥

kāmākṣi prathamānavibhramanidhiḥ kandarpadarpaprasūḥ
mugdhastē mṛduhāsa ēva girijē muṣṇātu mē kilbiṣam ।
yaṃ draṣṭuṃ vihitē karagraha umē śambhustrapāmīlitaṃ
svairaṃ kārayati sma tāṇḍavavinōdānandinā taṇḍunā ॥38॥

kṣuṇṇaṃ kēnachidēva dhīramanasā kutrāpi nānājanaiḥ
karmagranthiniyantritairasugamaṃ kāmākṣi sāmānyataḥ ।
mugdhairdruṣṭumaśakyamēva manasā mūḍhasaya mē mauktikaṃ
mārgaṃ darśayatu pradīpa iva tē mandasmitaśrīriyam ॥39॥

jyōtsnākāntibhirēva nirmalataraṃ naiśākaraṃ maṇḍalaṃ
haṃsairēva śaradvilāsasamayē vyākōchamambhōruham ।
svachChairēva vikasvarairuḍuguṇaiḥ kāmākṣi bimbaṃ divaḥ
puṇyairēva mṛdusmitaistava mukhaṃ puṣṇāti śōbhābharam ॥40॥

mānagranthividhuntudēna rabhasādāsvādyamānē nava-
prēmāḍambarapūrṇimāhimakarē kāmākṣi tē tatkṣaṇam ।
ālōkya smitachandrikāṃ punarimāmunmīlanaṃ jagmuṣīṃ
chētaḥ śīlayatē chakōracharitaṃ chandrārdhachūḍāmaṇēḥ ॥41॥

kāmākṣi smitamañjarīṃ tava bhajē yasyāstviṣāmaṅkurā-
nāpīnastanapānalālasatayā niśśaṅkamaṅkēśayaḥ ।
ūrdhvaṃ vīkṣya vikarṣati prasṛmarānuddāmayā śuṇḍayā
sūnusutē bisaśaṅkayāśu kuhanādantāvalagrāmaṇīḥ ॥42॥

gāḍhāślēṣavimardasambhramavaśāduddāmamuktāguṇa-
prālambē kuchakumbhayōrvigalitē dakṣadviṣō vakṣasi ।
yā sakhyēna pinahyati prachurayā bhāsā tadīyāṃ daśāṃ
sā mē khēlatu kāmakōṭi hṛdayē sāndrasmitāṃśuchChaṭā ॥43॥

mandārē tava mantharasmitaruchāṃ mātsaryamālōkyatē
kāmākṣi smaraśāsanē cha niyatō rāgōdayō lakṣyatē ।
chāndrīṣu dyutimañjarīṣu cha mahāndvēṣāṅkurō dṛśyatē
śuddhānāṃ kathamīdṛśī girisutē’tiśuddhā daśā kathyatām ॥44॥

pīyūṣaṃ khalu pīyatē surajanairdugdhāmbudhirmathyatē
māhēśaiścha jaṭākalāpanigaḍairmandākinī nahyatē ।
śītāṃśuḥ paribhūyatē cha tamasā tasmādanētādṛśī
kāmākṣi smitamañjarī tava vachōvaidagdhyamullaṅghatē ॥45॥

āśaṅkē tava mandahāsalaharīmanyādṛśīṃ chandrikā-
mēkāmrēśakuṭumbini pratipadaṃ yasyāḥ prabhāsaṅgamē ।
vakṣōjāmburuhē na tē rachayataḥ kāñchiddaśāṃ kauṅmalī-
māsyāmbhōruhamamba kiñcha śanakairālambatē phullatām ॥46॥

āstīrṇādharakāntipallavachayē pātaṃ muhurjagmuṣī
māradrōhiṇi kandalatsmaraśarajvālāvalīrvyañjatī ।
nindantī ghanasārahāravalayajyōtsnāmṛṇālāni tē
kāmākṣi smitachāturī virahiṇīrītiṃ jagāhētarām ॥47॥

sūryālōkavidhau vikāsamadhikaṃ yāntī harantī tama-
ssandōhaṃ namatāṃ nijasmaraṇatō dōṣākaradvēṣiṇī ।
niryāntī vadanāravindakuharānnirdhūtajāḍyā nṛṇāṃ
śrīkāmākṣi tava smitadyutimayī chitrīyatē chandrikā ॥48॥

kuṇṭhīkuryuramī kubōdhaghaṭanāmasmanmanōmāthinīṃ
śrīkāmākṣi śivaṅkarāstava śivē śrīmandahāsāṅkurāḥ ।
yē tanvanti nirantaraṃ taruṇimastambēramagrāmaṇī-
kumbhadvandvaviḍambini stanataṭē muktākuthāḍambaram ॥49॥

prēṅkhantaḥ śaradambudā iva śanaiḥ prēmānilaiḥ prēritā
majjantō mandanārikaṇṭhasuṣamāsindhau muhurmantharam ।
śrīkāmākṣi tava smitāṃśunikarāḥ śyāmāyamānaśriyō
nīlāmbhōdharanaipuṇīṃ tata itō nirnidrayantyañjasā ॥50॥

vyāpāraṃ chaturānanaikavihṛtau vyākurvatī kurvatī
rudrākṣagrahaṇaṃ mahēśi satataṃ vāgūrmikallōlitā ।
utphullaṃ dhavalāravindamadharīkṛtya sphurantī sadā
śrīkāmākṣi sarasvatī vijayatē tvanmandahāsaprabhā ॥51॥

karpūradyutitaskarēṇa mahasā kalmāṣayatyānanaṃ
śrīkāñchīpuranāyikē patiriva śrīmandahāsō’pi tē ।
āliṅgatyatipīvarāṃ stanataṭīṃ bimbādharaṃ chumbati
prauḍhaṃ rāgabharaṃ vyanakti manasō dhairyaṃ dhunītētarām ॥52॥

vaiśadyēna cha viśvatāpaharaṇakrīḍāpaṭīyastayā
pāṇḍityēna pachēlimēna jagatāṃ nētrōtsavōtpādēna ।
kāmākṣi smitakandalaistava tulāmārōḍhumudyōginī
jyōtsnāsau jalarāśipōṣaṇatayā dūṣyāṃ prapannā daśām ॥53॥

lāvaṇyāmbujinīmṛṇālavalayaiḥ śṛṅgāragandhadvipa-
grāmaṇyaḥ śrutichāmaraistaruṇimasvārājyatējōṅkuraiḥ ।
ānandāmṛtasindhuvīchipṛṣatairāsyābjahaṃsaistava
śrīkāmākṣi mathāna mandahasitairmatkaṃ manaḥkalmaṣam ॥54॥

uttuṅgastanamaṇḍalīparichalanmāṇikyahārachChaṭā-
chañchachChōṇimapuñjamadhyasaraṇiṃ mātaḥ pariṣkurvatī ।
yā vaidagdhyamupaiti śaṅkarajaṭākāntāravāṭīpata-
tsvarvāpīpayasaḥ smitadyutirasau kāmākṣi tē mañjulā ॥55॥

sannāmaikajuṣā janēna sulabhaṃ saṃsūchayantī śanai-
ruttuṅgasya chirādanugrahatarōrutpatsyamānaṃ phalam ।
prāthamyēna vikasvarā kusumavatprāgalbhyamabhyēyuṣī
kāmākṣi smitachāturī tava mama kṣēmaṅkarī kalpatām ॥56॥

dhānuṣkāgrasarasya lōlakuṭilabhrūlēkhayā bibhratō
līlālōkaśilīmukhaṃ navavayassāmrājyalakṣmīpuṣaḥ ।
jētuṃ manmathamardinaṃ janani tē kāmākṣi hāsaḥ svayaṃ
valgurvibhramabhūbhṛtō vitanutē sēnāpatiprakriyām ॥57॥

yannākampata kālakūṭakabalīkārē chuchumbē na yad-
glānyā chakṣuṣi rūṣitānalaśikhē rudrasya tattādṛśam ।
chētō yatprasabhaṃ smarajvaraśikhijvālēna lēlihyatē
tatkāmākṣi tava smitāṃśukalikāhēlābhavaṃ prābhavam ॥58॥

sambhinnēva suparvalōkataṭinī vīchīchayairyāmunaiḥ
sammiśrēva śaśāṅkadīptilaharī nīlairmahānīradaiḥ ।
kāmākṣi sphuritā tava smitaruchiḥ kālāñjanaspardhinā
kālimnā kacharōchiṣāṃ vyatikarē kāñchiddaśāmaśnutē ॥59॥

jānīmō jagadīśvarapraṇayini tvanmandahāsaprabhāṃ
śrīkāmākṣi sarōjinīmabhinavāmēṣā yataḥ sarvadā ।
āsyēndōravalōkēna paśupatērabhyēti samphullatāṃ
tandrālustadabhāva ēva tanutē tadvaiparītyakramam ॥60॥

yāntī lōhitimānamabhrataṭinī dhātuchChaṭākardamaiḥ
bhāntī bālagabhastimālikiraṇairmēghāvalī śāradī ।
bimbōṣṭhadyutipuñjachumbanakalāśōṇāyamānēna tē
kāmākṣi smitarōchiṣā samadaśāmārōḍhumākāṅkṣatē ॥61॥

śrīkāmākṣi mukhēndubhūṣaṇamidaṃ mandasmitaṃ tāvakaṃ
nētrānandakaraṃ tathā himakarō gachChēdyathā tigmatām ।
śītaṃ dēvi tathā yathā himajalaṃ santāpamudrāspadaṃ
śvētaṃ kiñcha tathā yathā malinatāṃ dhattē cha muktāmaṇiḥ ॥62॥

tvanmandasmitamañjarīṃ prasṛmarāṃ kāmākṣi chandrātapaṃ
santaḥ santatamāmanantyamalatā tallakṣaṇaṃ lakṣyatē ।
asmākaṃ na dhunōti tāpakamadhikaṃ dhūnōti nābhyantaraṃ
dhvāntaṃ tatkhalu duḥkhinō vayamidaṃ kēnōti nō vidmahē ॥63॥

namrasya praṇayaprarūḍhakalahachChēdāya pādābjayōḥ
mandaṃ chandrakiśōraśēkharamaṇēḥ kāmākṣi rāgēṇa tē ।
bandhūkaprasavaśriyaṃ jitavatō baṃhīyasīṃ tādṛśīṃ
bimbōṣṭhasya ruchiṃ nirasya hasitajyōtsnā vayasyāyatē ॥64॥

muktānāṃ parimōchanaṃ vidadhatastatprītiniṣpādinī
bhūyō dūrata ēva dhūtamarutastatpālanaṃ tanvatī ।
udbhūtasya jalāntarādavirataṃ taddūratāṃ jagmuṣī
kāmākṣi smitamañjarī tava kathaṃ kambōstulāmaśnutē ॥65॥

śrīkāmākṣi tava smitadyutijharīvaidagdhyalīlāyitaṃ
paśyantō’pi nirantaraṃ suvimalammanyā jaganmaṇḍalē ।
lōkaṃ hāsayituṃ kimarthamaniśaṃ prākāśyamātanvatē
mandākṣaṃ virahayya maṅgalataraṃ mandārachandrādayaḥ ॥66॥

kṣīrābdhērapi śailarājatanayē tvanmandahāsasya cha
śrīkāmākṣi valakṣimōdayanidhēḥ kiñchidbhidāṃ brūmahē ।
ēkasmai puruṣāya dēvi sa dadau lakṣmīṃ kadāchitpurā
sarvēbhyō’pi dadātyasau tu satataṃ lakṣmīṃ cha vāgīśvarīm ॥67॥

śrīkāñchīpuraratnadīpakalikē tānyēva mēnātmajē
chākōrāṇi kulāni dēvi sutarāṃ dhanyāni manyāmahē ।
kampātīrakuṭumbachaṅkramakalāchuñchūni chañchūpuṭaiḥ
nityaṃ yāni tava smitēndumahasāmāsvādamātanvatē ॥68॥

śaityaprakramamāśritō’pi namatāṃ jāḍyaprathāṃ dhūnayan
nairmalyaṃ paramaṃ gatō’pi giriśaṃ rāgākulaṃ chārayan ।
līlālāpapurassarō’pi satataṃ vāchaṃyamānprīṇayan
kāmākṣi smitarōchiṣāṃ tava samullāsaḥ kathaṃ varṇyatē ॥69॥

śrōṇīchañchalamēkhalāmukharitaṃ līlāgataṃ mantharaṃ
bhrūvallīchalanaṃ kaṭākṣavalanaṃ mandākṣavīkṣāchaṇam ।
yadvaidagdhyamukhēna manmatharipuṃ sammōhayantyañjasā
śrīkāmākṣi tava smitāya satataṃ tasmai namsakurmahē ॥70॥

śrīkāmākṣi manōjñamandahasitajyōtiṣprarōhē tava
sphītaśvētimasārvabhaumasaraṇiprāgalbhyamabhyēyuṣi ।
chandrō’yaṃ yuvarājatāṃ kalayatē chēṭīdhuraṃ chandrikā
śuddhā sā cha sudhājharī sahacharīsādharmyamālambatē ॥71॥

jyōtsnā kiṃ tanutē phalaṃ tanumatāmauṣṇyapraśāntiṃ vinā
tvanmandasmitarōchiṣā tanumatāṃ kāmākṣi rōchiṣṇunā ।
santāpō vinivāryatē navavayaḥprāchuryamaṅkūryatē
saundaryaṃ paripūryatē jagati sā kīrtiścha sañchāryatē ॥72॥

vaimalyaṃ kumudaśriyāṃ himaruchaḥ kāntyaiva sandhukṣyatē
jyōtsnārōchirapi pradōṣasamayaṃ prāpyaiva sampadyatē ।
svachChatvaṃ navamauktikasya paramaṃ saṃskāratō dṛśyatē
kāmākṣyāḥ smitadīdhitērviśadimā naisargikō bhāsatē ॥73॥

prākāśyaṃ paramēśvarapraṇayini tvanmandahāsaśriyaḥ
śrīkāmākṣi mama kṣiṇōtu mamatāvaichakṣaṇīmakṣayām ।
yadbhītyēva nilīyatē himakarō mēghōdarē śuktikā-
garbhē mauktikamaṇḍalī cha sarasīmadhyē mṛṇālī cha sā ॥74॥

hērambē cha guhē harṣabharitaṃ vātsalyamaṅkūrayat
māradrōhiṇi pūruṣē sahabhuvaṃ prēmāṅkuraṃ vyañjayat ।
ānamrēṣu janēṣu pūrṇakaruṇāvaidagdhyamuttālayat
kāmākṣi smitamañjasā tava kathaṅkāraṃ mayā kathyatē ॥75॥

saṅkruddhadvijarājakō’pyavirataṃ kurvandvijaiḥ saṅgamaṃ
vāṇīpaddhatidūragō’pi satataṃ tatsāhacharyaṃ vahan ।
aśrāntaṃ paśudurlabhō’pi kalayanpatyau paśūnāṃ ratiṃ
śrīkāmākṣi tava smitāmṛtarasasyandō mayi spandatām ॥76॥

śrīkāmākṣi mahēśvarē nirupamaprēmāṅkuraprakramamṃ
nityaṃ yaḥ prakaṭīkarōti sahajāmunnidrayanmādhurīm ।
tattādṛktava mandahāsamahimā mātaḥ kathaṃ mānitāṃ
tanmūrdhnā suranimnagāṃ cha kalikāmindōścha tāṃ nindati ॥77॥

yē mādhuryavihāramaṇṭapabhuvō yē śaityamudrākarā
yē vaiśadyadaśāviśēṣasubhagāstē mandahāsāṅkurāḥ ।
kāmākṣyāḥ sahajaṃ guṇatrayamidaṃ paryāyataḥ kurvatāṃ
vāṇīgumphanaḍambarē cha hṛdayē kīrtiprarōhē cha mē ॥78॥

kāmākṣyā mṛdulasmitāṃśunikarā dakṣāntakē vīkṣaṇē
mandākṣagrahilā himadyutimayūkhākṣēpadīkṣāṅkurāḥ ।
dākṣyaṃ pakṣmalayantu mākṣikaguḍadrākṣābhavaṃ vākṣu mē
sūkṣmaṃ mōkṣapathaṃ nirīkṣitumapi prakṣālayēyurmanaḥ ॥79॥

jātyā śītaśītalāni madhurāṇyētāni pūtāni tē
gāṅgānīva payāṃsi dēvi paṭalānyalpasmitajyōtiṣām ।
ēnaḥpaṅkaparamparāmalinitāmēkāmranāthapriyē
prajñānātsutarāṃ madīyadhiṣaṇāṃ prakṣālayantu kṣaṇāt ॥80॥

aśrāntaṃ paratantritaḥ paśupatistvanmandahāsāṅkuraiḥ
śrīkāmākṣi tadīyavarṇasamatāsaṅgēna śaṅkāmahē ।
induṃ nākadhunīṃ cha śēkharayatē mālāṃ cha dhattē navaiḥ
vaikuṇṭhairavakuṇṭhanaṃ cha kurutē dhūlīchayairbhāsmanaiḥ ॥81॥

śrīkāñchīpuradēvatē mṛduvachassaurabhyamudrāspadaṃ
prauḍhaprēmalatānavīnakusumaṃ mandasmitaṃ tāvakam ।
mandaṃ kandalati priyasya vadanālōkē samābhāṣaṇē
ślakṣṇē kuṅmalati prarūḍhapulakē chāślōṣaṇē phullati ॥82॥

kiṃ traisrōtasamambikē pariṇataṃ srōtaśchaturthaṃ navaṃ
pīyūṣasya samastatāpaharaṇaṃ kiṃvā dvitīyaṃ vapuḥ ।
kiṃsvittvannikaṭaṃ gataṃ madhurimābhyāsāya gavyaṃ payaḥ
śrīkāñchīpuranāyakapriyatamē mandasmitaṃ tāvakam ॥83॥

bhūṣā vaktrasarōruhasya sahajā vāchāṃ sakhī śāśvatī
nīvī vibhramasantatēḥ paśupatēḥ saudhī dṛśāṃ pāraṇā ।
jīvāturmadanaśriyaḥ śaśiruchēruchchāṭanī dēvatā
śrīkāmākṣi girāmabhūmimayatē hāsaprabhāmañjarī ॥84॥

sūtiḥ śvētimakandalasya vasatiḥ śṛṅgārasāraśriyaḥ
pūrtiḥ sūktijharīrasasya laharī kāruṇyapāthōnidhēḥ ।
vāṭī kāchana kausumī madhurimasvārājyalakṣmyāstava
śrīkāmākṣi mamāstu maṅgalakarī hāsaprabhāchāturī ॥85॥

jantūnāṃ janiduḥkhamṛtyulaharīsantāpanaṃ kṛntataḥ
prauḍhānugrahapūrṇaśītalaruchō nityōdayaṃ bibhrataḥ ।
śrīkāmākṣi visṛtvarā iva karā hāsāṅkurāstē haṭhā-
dālōkēna nihanyurandhatamasastōmasya mē santatim ॥86॥

uttuṅgastanamaṇḍalasya vilasallāvaṇyalīlānaṭī-
raṅgasya sphuṭamūrdhvasīmani muhuḥ prākāśyamabhyēyuṣī ।
śrīkāmākṣi tava smitadyutitatirbimbōṣṭhakāntyaṅkuraiḥ
chitrāṃ vidrumamudritāṃ vitanutē mauktīṃ vitānaśriyam ॥87॥

svābhāvyāttava vaktramēva lalitaṃ santōṣasampādanaṃ
śambhōḥ kiṃ punarañchitasmitaruchaḥ pāṇḍityapātrīkṛtam ।
ambhōjaṃ svata ēva sarvajagatāṃ chakṣuḥpriyambhāvukaṃ
kāmākṣi sphuritē śaradvikasitē kīdṛgvidhaṃ bhrājatē ॥88॥

pumbhirnirmalamānasaurvidadhatē maitrīṃ dṛḍhaṃ nirmalāṃ
labdhvā karmalayaṃ cha nirmalatarāṃ kīrtiṃ labhantētarām ।
sūktiṃ pakṣmalayanti nirmalatamāṃ yattāvakāḥ sēvakāḥ
tatkāmākṣi tava smitasya kalayā nairmalyasīmānidhēḥ ॥89॥

ākarṣannayanāni nākisadasāṃ śaityēna saṃstambhaya-
nninduṃ kiñcha vimōhayanpaśupatiṃ viśvārtimuchchāṭayan ।
hiṃsatsaṃsṛtiḍambaraṃ tava śivē hāsāhvayō māntrikaḥ
śrīkāmākṣi madīyamānasatamōvidvēṣaṇē chēṣṭatām ॥90॥

kṣēpīyaḥ kṣapayantu kalmaṣabhayānyasmākamalpasmita-
jyōtirmaṇḍalachaṅkramāstava śivē kāmākṣi rōchiṣṇavaḥ ।
pīḍākarmaṭhakarmagharmasamayavyāpāratāpānala-
śrīpātā navaharṣavarṣaṇasudhāsrōtasvinīśīkarāḥ ॥91॥

śrīkāmākṣi tava smitaindavamahaḥpūrē parimphūrjati
prauḍhāṃ vāridhichāturīṃ kalayatē bhaktātmanāṃ prātibham ।
daurgatyaprasarāstamaḥpaṭalikāsādharmyamābibhratē
sarvaṃ kairavasāhacharyapadavīrītiṃ vidhattē param ॥92॥

mandārādiṣu manmathārimahiṣi prākāśyarītiṃ nijāṃ
kādāchitkatayā viśaṅkya bahuśō vaiśadyamudrāguṇaḥ ।
sātatyēna tava smitē vitanutē svairāsanāvāsanām ॥93॥

indhānē bhavavītihōtranivahē karmaughachaṇḍānila-
prauḍhimnā bahulīkṛtē nipatitaṃ santāpachintākulam ।
mātarmāṃ pariṣiñcha kiñchidamalaiḥ pīyūṣavarṣairiva
śrīkāmākṣi tava smitadyutikaṇaiḥ śaiśiryalīlākaraiḥ ॥94॥

bhāṣāyā rasanāgrakhēlanajuṣaḥ śṛṅgāramudrāsakhī-
līlājātaratēḥ sukhēna niyamasnānāya mēnātmajē ।
śrīkāmākṣi sudhāmayīva śiśirā srōtasvinī tāvakī
gāḍhānandataraṅgitā vijayatē hāsaprabhāchāturī ॥95॥

santāpaṃ viralīkarōtu sakalaṃ kāmākṣi machchētanā
majjantī madhurasmitāmaradhunīkallōlajālēṣu tē ।
nairantaryamupētya manmathamarullōlēṣu yēṣu sphuṭaṃ
prēmēnduḥ pratibimbitō vitanutē kautūhalaṃ dhūrjaṭēḥ ॥96॥

chētaḥkṣīrapayōdhimantharachaladrāgākhyamanthāchala-
kṣōbhavyāpṛtisambhavāṃ janani tē mandasmitaśrīsudhām ।
svādaṃsvādamudītakautukarasā nētratrayī śāṅkarī
śrīkāmākṣi nirantaraṃ pariṇamatyānandavīchīmayī ॥97॥

ālōkē tava pañchasāyakaripōruddāmakautūhala-
prēṅkhanmārutaghaṭṭanaprachalitādānandadugdhāmbudhēḥ ।
kāchidvīchirudañchati pratinavā saṃvitprarōhātmikā
tāṃ kāmākṣi kavīśvarāḥ smitamiti vyākurvatē sarvadā ॥98॥

sūktiḥ śīlayatē kimadritanayē mandasmitāttē muhuḥ
mādhuryāgamasampradāyamathavā sūktērnu mandasmitam ।
itthaṃ kāmapi gāhatē mama manaḥ sandēhamārgabhramiṃ
śrīkāmākṣi na pāramārthyasaraṇisphūrtau nidhattē padam ॥99॥

krīḍālōlakṛpāsarōruhamukhīsaudhāṅgaṇēbhyaḥ kavi-
śrēṇīvākparipāṭikāmṛtajharīsūtīgṛhēbhyaḥ śivē ।
nirvāṇāṅkurasārvabhaumapadavīsiṃhāsanēbhyastava
śrīkāmākṣi manōjñamandahasitajyōtiṣkaṇēbhyō namaḥ ॥100॥

āryāmēva vibhāvayanmanasi yaḥ pādāravindaṃ puraḥ
paśyannārabhatē stutiṃ sa niyataṃ labdhvā kaṭākṣachChavim ।
kāmākṣyā mṛdulasmitāṃśulaharījyōtsnāvayasyānvitām
ārōhatyapavargasaudhavalabhīmānandavīchīmayīm ॥101॥

॥ iti mandasmitaśatakaṃ sampūrṇam ॥

॥ iti śrī mūkapañchaśatī sampūrṇā ॥

॥auṃ tat sat ॥