KYTS 6.4 Yagnena Vai Prajaapatih Prajaa Asrujata – Krishna Yajurveda Taittiriya Samhita Patha

kṛṣṇa yajurvēdīya taittirīya saṃhitāyāṃ ṣaṣṭhakāṇḍē chaturthaḥ praśnaḥ – sōmamantrabrāhmaṇanirūpaṇaṃ

ō-nnamaḥ paramātmanē, śrī mahāgaṇapatayē namaḥ,
śrī gurubhyō namaḥ । ha̠ri̠ḥ ōm ॥

ya̠jñēna̠ vai pra̠jāpa̍tiḥ pra̠jā a̍sṛjata̠ tā u̍pa̠yaḍbhi̍-rē̠vāsṛ̍jata̠ yadu̍pa̠yaja̍ upa̠yaja̍ti pra̠jā ē̠va ta-dyaja̍māna-ssṛjatē jaghanā̠rdhādava̍ dyati jaghanā̠rdhāddhi pra̠jāḥ pra̠jāya̍ntē sthavima̠tō-‘va̍ dyati sthavima̠tō hi pra̠jāḥ pra̠jāya̠ntē ‘sa̍mbhinda̠nnava̍ dyati prā̠ṇānā̠-masa̍mbhēdāya̠ na pa̠ryāva̍rtayati̠ ya-tpa̍ryāva̠rtayē̍dudāva̠rtaḥ pra̠jā grāhu̍ka-ssyā-thsamu̠dra-ṅga̍chCha̠ svāhētyā̍ha̠ rēta̍ [rēta̍ḥ, ē̠va] 1

ē̠va ta-dda̍dhātya̠ntari̍kṣa-ṅgachCha̠ svāhētyā̍hā̠-‘ntari̍kṣēṇai̠vāsmai̎ pra̠jāḥ pra ja̍nayatya̠ntari̍kṣa̠gg̠ hyanu̍ pra̠jāḥ pra̠jāya̍ntē dē̠vagṃ sa̍vi̠tāra̍-ṅgachCha̠ svāhētyā̍ha savi̠tṛpra̍sūta ē̠vāsmai̎ pra̠jāḥ pra ja̍nayatya-hōrā̠trē ga̍chCha̠ svāhētyā̍hā-hōrā̠trābhyā̍-mē̠vāsmai̎ pra̠jāḥ pra ja̍nayatya-hōrā̠trē hyanu̍ pra̠jāḥ pra̠jāya̍ntē mi̠trāvaru̍ṇau gachCha̠ svāhē- [svāhā̎, ityā̍ha] 2

-tyā̍ha pra̠jāsvē̠va prajā̍tāsu prāṇāpā̠nau da̍dhāti̠ sōma̍-ṅgachCha̠ svāhētyā̍ha sau̠myā hi dē̠vata̍yā pra̠jā ya̠jña-ṅga̍chCha̠ svāhētyā̍ha pra̠jā ē̠va ya̠jñiyā̎ḥ karōti̠ Chandāgṃ̍si gachCha̠ svāhētyā̍ha pa̠śavō̠ vai Chandāgṃ̍si pa̠śūnē̠vāva̍ rundhē̠ dyāvā̍pṛthi̠vī ga̍chCha̠ svāhētyā̍ha pra̠jā ē̠va prajā̍tā̠ dyāvā̍pṛthi̠vībhyā̍mubha̠yata̠ḥ pari̍ gṛhṇāti̠ nabhō̍ [nabha̍ḥ, di̠vya-ṅga̍chCha̠] 3

di̠vya-ṅga̍chCha̠ svāhētyā̍ha pra̠jābhya̍ ē̠va prajā̍tābhyō̠ vṛṣṭi̠-nniya̍chChatya̠gniṃ vai̎śvāna̠ra-ṅga̍chCha̠ svāhētyā̍ha pra̠jā ē̠va prajā̍tā a̠syā-mprati̍ ṣṭhāpayati prā̠ṇānā̠ṃ vā ē̠ṣō-‘va̍ dyati̠ yō̍-‘va̠dyati̍ gu̠dasya̠ manō̍ mē̠ hārdi̍ ya̠chChētyā̍ha prā̠ṇānē̠va ya̍thāsthā̠namupa̍ hvayatē pa̠śōrvā āla̍bdhasya̠ hṛda̍ya̠gṃ̠ śugṛ̍chChati̠ sā hṛ̍dayaśū̠la- [hṛ̍dayaśū̠lam, a̠bhi samē̍ti̠] 4

-ma̠bhi samē̍ti̠ ya-tpṛ̍thi̠vyāgṃ hṛ̍dayaśū̠la-mu̍dvā̠sayē̎-tpṛthi̠vīgṃ śu̠chā-‘rpa̍yē̠-dyada̠phsva̍pa-śśu̠chā-‘rpa̍yē̠chChuṣka̍sya chā̠-”rdrasya̍ cha sa̠ndhāvudvā̍sayatyu̠bhaya̍sya̠ śāntyai̠ ya-ndvi̠ṣyā-tta-ndhyā̍yē-chChu̠chaivaina̍-marpayati ॥ 5 ॥
(rētō̍ – mi̠trāvaru̍ṇau gachCha̠ svāhā̠ – nabhō̍ – hṛdayaśū̠laṃ – dvātrigṃ̍śachcha) (a. 1)

dē̠vā vai ya̠jñamāgnī̎ddhrē̠ vya̍bhajanta̠ tatō̠ yada̠tyaśi̍ṣyata̠ tada̍bruva̠n vasa̍tu̠ nu na̍ i̠damiti̠ ta-dva̍satī̠varī̍ṇāṃ vasatī vari̠tva-ntasmi̍-nprā̠tarna sama̍śaknuva̠-ntada̠phsu prāvē̍śaya̠-ntā va̍satī̠ varī̍rabhavan vasatī̠varī̎rgṛhṇāti ya̠jñō vai va̍satī̠ varī̎rya̠jñamē̠vā-”rabhya̍ gṛhī̠tvōpa̍ vasati̠ yasyāgṛ̍hītā a̠bhi ni̠mrōchē̠-danā̍rabdhō-‘sya ya̠jña-ssyā̎- [ya̠jña-ssyā̎t, ya̠jñaṃ vi] 6

-dya̠jñaṃ vi chChi̍ndyā-jjyōti̠ṣyā̍ vā gṛhṇī̠yāddhira̍ṇyaṃ vā ‘va̠dhāya̠ saśu̍krāṇāmē̠va gṛ̍hṇāti̠ yō vā̎ brāhma̠ṇō ba̍huyā̠jī tasya̠ kumbhyā̍nā-ṅgṛhṇīyā̠-thsa hi gṛ̍hī̠ta va̍satīvarīkō vasatī̠varī̎rgṛhṇāti pa̠śavō̠ vai va̍satī̠varī̎ḥ pa̠śūnē̠vā-”rabhya̍ gṛhī̠tvōpa̍ vasati̠ yada̍nvī̠pa-ntiṣṭha̍-ngṛhṇī̠yānni̠rmārgu̍kā asmā-tpa̠śava̍-ssyuḥ pratī̠pa-ntiṣṭha̍-ngṛhṇāti prati̠ruddhyai̠vāsmai̍ pa̠śū-ngṛ̍hṇā̠tīndrō̍ [pa̠śū-ngṛ̍hṇā̠tīndra̍ḥ, vṛ̠tra-] 7

vṛ̠tra-ma̍ha̠n-thsō̎-‘(1̠)pō̎-‘(1̠)bhya̍mriyata̠ tāsā̠ṃ yanmēddhya̍ṃ ya̠jñiya̠gṃ̠ sadē̍va̠māsī̠-ttadatya̍muchyata̠ tā vaha̍ntīrabhava̠n vaha̍ntīnā-ṅgṛhṇāti̠ yā ē̠va mēddhyā̍ ya̠jñiyā̠-ssadē̍vā̠ āpa̠stā sā̍mē̠va gṛ̍hṇāti̠ nānta̠mā vaha̍ntī̠ratī̍yā̠-dyada̍nta̠mā vaha̍ntīratī̠yā-dya̠jñamati̍ manyēta̠ na sthā̍va̠rāṇā̎-ṅgṛhṇīyā̠-dvaru̍ṇagṛhītā̠ vai sthā̍va̠rā ya-thsthā̍va̠rāṇā̎-ṅgṛhṇī̠yā- [ya-thsthā̍va̠rāṇā̎-ṅgṛhṇī̠yāt, varu̍ṇēnāsya] 8

-dvaru̍ṇēnāsya ya̠jña-ṅgrā̍hayē̠-dyadvai divā̠ bhava̍tya̠pō rātri̠ḥ pra vi̍śati̠ tasmā̎-ttā̠mrā āpō̠ divā̍ dadṛśrē̠ yannakta̠-mbhava̍tya̠pō-‘ha̠ḥ pra vi̍śati̠ tasmā̎chcha̠ndrā āpō̠ nakta̍-ndadṛśrē Chā̠yāyai̍ chā̠-”tapa̍taścha sa̠dhau-ṅgṛ̍hṇātya-hōrā̠trayō̍rē̠vāsmai̠ varṇa̍-ṅgṛhṇāti ha̠viṣma̍tīri̠mā āpa̠ ityā̍ha ha̠viṣkṛ̍tānāmē̠va gṛ̍hṇāti ha̠viṣmāgṃ̍ astu̠- [astu, sūrya̠] 9

sūrya̠ ityā̍ha̠ saśu̍krāṇāmē̠va gṛ̍hṇātyanu̠ṣṭubhā̍ gṛhṇāti̠ vāgvā a̍nu̠ṣṭug vā̠chaivainā̠-ssarva̍yā gṛhṇāti̠ chatu̍ṣpadaya̠rchā gṛ̍hṇāti̠ tri-ssā̍dayati sa̠pta sa-mpa̍dyantē sa̠ptapa̍dā̠ śakva̍rī pa̠śava̠-śśakva̍rī pa̠śūnē̠vāva̍ rundhē̠ ‘smai vai lō̠kāya̠ gār​ha̍patya̠ ā dhī̍yatē̠-‘muṣmā̍ āhava̠nīyō̠ ya-dgār​ha̍patya upasā̠dayē̍da̠smin ँlō̠kē pa̍śu̠mān-thsyā̠-dyadā̍hava̠nīyē̠-‘-muṣmi̍- [-muṣminn̍, lō̠kē pa̍śu̠mān​thsyā̍-] 10

ँllō̠kē pa̍śu̠mān​thsyā̍-du̠bhayō̠rupa̍ sādayatyu̠bhayō̍rē̠vaina̍ṃ lō̠kayō̎ḥ paśu̠manta̍-ṅkarōti sa̠rvata̠ḥ pari̍ harati̠ rakṣa̍sā̠mapa̍hatyā indrāgni̠yōrbhā̍ga̠dhēyī̠-ssthētyā̍ha yathāya̠jurē̠vaitadāgnī̎ddhra̠ upa̍ vāsayatyē̠tadvai ya̠jñasyāpa̍rājita̠ṃ yadāgnī̎ddhra̠ṃ yadē̠va ya̠jñasyāpa̍rājita̠-ntadē̠vainā̠ upa̍ vāsayati̠ yata̠ḥ khalu̠ vai ya̠jñasya̠ vita̍tasya̠ na kri̠yatē̠ tadanu̍ ya̠jñagṃ rakṣā̠g̠syava̍ charanti̠ ya-dvaha̍ntīnā-ṅgṛ̠hṇāti̍ kri̠yamā̍ṇamē̠va ta-dya̠jñasya̍ śayē̠ rakṣa̍sā̠-mana̍nvavachārāya̠ na hyē̍tā ī̠laya̠ntyā tṛ̍tīyasava̠nā-tpari̍ śērē ya̠jñasya̠ santa̍tyai ॥ 11 ॥
(syā̠ – dindrō̍ – gṛhṇī̠yā – da̍stva̠ – muṣmi̍n – kri̠yatē̠ – ṣaḍvigṃ̍śatiścha) (a. 2)

bra̠hma̠vā̠dinō̍ vadanti̠ sa tvā a̍ddhva̠ryu-ssyā̠dya-ssōma̍-mupāva̠hara̠n-thsarvā̎bhyō dē̠vatā̎bhya upāva̠harē̠-diti̍ hṛ̠dē tvētyā̍ha manu̠ṣyē̎bhya ē̠vaitēna̍ karōti̠ mana̍sē̠ tvētyā̍ha pi̠tṛbhya̍ ē̠vaitēna̍ karōti di̠vē tvā̠ sūryā̍ya̠ tvētyā̍ha dē̠vēbhya̍ ē̠vaitēna̍ karōtyē̠tāva̍tī̠-rvai dē̠vatā̠stābhya̍ ē̠vaina̠gṃ̠ sarvā̎bhya u̠pāva̍harati pu̠rā vā̠chaḥ [vā̠chaḥ, prava̍ditōḥ] 12

prava̍ditōḥ prātaranuvā̠ka-mu̠pāka̍rōti̠ yāva̍tyē̠va vā-ktā-mava̍ rundhē̠ ‘pō-‘grē̍-‘bhi̠vyāha̍rati ya̠jñō vā āpō̍ ya̠jñamē̠vābhi vācha̠ṃ visṛ̍jati̠ sarvā̍ṇi̠ Chandā̠g̠syanvā̍ha pa̠śavō̠ vai Chandāgṃ̍si pa̠śūnē̠vāva̍ rundhē gāyatri̠yā tēja̍skāmasya̠ pari̍ daddhyā-ttri̠ṣṭubhē̎mdri̠yakā̍masya̠ jaga̍tyā pa̠śukā̍masyā-‘nu̠ṣṭubhā̎ prati̠ṣṭhākā̍masya pa̠ṅktyā ya̠jñakā̍masya vi̠rājā-‘nna̍kāmasya śṛ̠ṇōtva̠gni-ssa̠midhā̠ hava̍- [hava̎m, ma̠ ityā̍ha] 13

-mma̠ ityā̍ha savi̠tṛpra̍sūta ē̠va dē̠vatā̎bhyō ni̠vēdyā̠-‘pō-‘chChai̎tya̠pa i̍ṣya hōta̠-rityā̍hēṣi̠tagṃ hi karma̍ kri̠yatē̠ maitrā̍varuṇasya chamasāddhvarya̠vā dra̠vētyā̍ha mi̠trāvaru̍ṇau̠ vā a̠pā-nnē̠tārau̠ tābhyā̍mē̠vainā̠ achChai̍ti̠ dēvī̍rāpō apā-nnapā̠-dityā̠hā-”hu̍tyai̠vainā̍ ni̠ṣkrīya̍ gṛhṇā̠tyathō̍ ha̠viṣkṛ̍tānā-mē̠vābhighṛ̍tānā-ṅgṛhṇāti̠- [-mē̠vābhighṛ̍tānā-ṅgṛhṇāti, kār​ṣi̍-ra̠sītyā̍ha̠] 14

kār​ṣi̍-ra̠sītyā̍ha̠ śama̍lamē̠vā-”sā̠mapa̍ plāvayati samu̠drasya̠ vō-‘kṣi̍tyā̠ unna̍ya̠ ityā̍ha̠ tasmā̍da̠dyamā̍nāḥ pī̠yamā̍nā̠ āpō̠ na kṣī̍yantē̠ yōni̠rvai ya̠jñasya̠ chātvā̍laṃ ya̠jñō va̍satī̠varīr̍. hōtṛchama̠sa-ñcha̍ maitrāvaruṇachama̠sa-ñcha̍ sa̠gg̠spar​śya̍ vasatī̠varī̠rvyāna̍yati ya̠jñasya̍ sayōni̠tvāyāthō̠ svādē̠vainā̠ yōnē̠ḥ pra ja̍nayatyaddhva̠ryō-‘vē̍ra̠pā(3) ityā̍hō̠tē -ma̍nannamuru̠tēmāḥ pa̠śyēti̠ vāvaitadā̍ha̠ yadya̍gniṣṭō̠mō ju̠hōti̠ yadyu̠kthya̍ḥ pari̠dhau ni mā̎r​ṣṭi̠ yadya̍tirā̠trō yaju̠rvada̠-npra pa̍dyatē yajñakratū̠nāṃ vyāvṛ̍ttyai ॥ 15 ॥
(vā̠chō-hava̍-ma̠bhighṛ̍tānā-ṅgṛhṇātyu̠ – ta – pañcha̍vigṃśatiścha) (a. 3)

dē̠vasya̍ tvā savi̠tuḥ pra̍sa̠va iti̠ grāvā̍ṇa̠mā da̍ttē̠ prasū̎tyā a̠śvinō̎-rbā̠hubhyā̠mityā̍hā̠śvinau̠ hi dē̠vānā̍maddhva̠ryū āstā̎-mpū̠ṣṇō hastā̎bhyā̠mityā̍ha̠ yatyai̍ pa̠śavō̠ vai sōmō̎ vyā̠na u̍pāgṃśu̠sava̍nō̠ yadu̍pāgṃśu̠sava̍na-ma̠bhi mimī̍tē vyā̠namē̠va pa̠śuṣu̍ dadhā̠tīndrā̍ya̠ tvēndrā̍ya̠ tvēti̍ mimīta̠ indrā̍ya̠ hi sōma̍ āhri̠yatē̠ pañcha̠ kṛtvō̠ yaju̍ṣā mimītē̠ [mimītē, pañchā̎kṣarā] 16

pañchā̎kṣarā pa̠ṅktiḥ pāṅktō̍ ya̠jñō ya̠jñamē̠vāva̍ rundhē̠ pañcha̠ kṛtva̍stū̠ṣṇī-ndaśa̠ sa-mpa̍dyantē̠ daśā̎kṣarā vi̠rāḍanna̍ṃ vi̠rā-ḍvi̠rājai̠vānnādya̠mava̍ rundhē śvā̠trā-sstha̍ vṛtra̠tura̠ ityā̍hai̠ṣa vā a̠pāgṃ sō̍mapī̠thō ya ē̠vaṃ vēda̠ nā-‘phsvārti̠mārchCha̍ti̠ yattē̍ sōma di̠vi jyōti̠rityā̍hai̠bhya ē̠vaina̍- [ē̠vaina̎m, lō̠kēbhya̠] 17

ँllō̠kēbhya̠-ssa-mbha̍rati̠ sōmō̠ vai rājā̠ diśō̠-‘bhya̍ddhyāya̠-thsa diśō-‘nu̠ prāvi̍śa̠-tprāgapā̠guda̍gadha̠rāgityā̍ha di̠gbhya ē̠vaina̠gṃ̠ sa-mbha̍ra̠tyathō̠ diśa̍ ē̠vāsmā̠ ava̍ ru̠ndhē ‘mba̠ ni ṣva̠rētyā̍ha̠ kāmu̍kā ēna̠gg̠ striyō̍ bhavanti̠ ya ē̠vaṃ vēda̠ ya-ttē̍ sō̠mādā̎bhya̠-nnāma̠ jāgṛ̠vī- [jāgṛ̠vīti̍, ā̠hai̠ṣa vai] 18

-tyā̍hai̠ṣa vai sōma̍sya sōmapī̠thō ya ē̠vaṃ vēda̠ na sau̠myāmārti̠mārchCha̍ti̠ ghnanti̠ vā ē̠ta-thsōma̠ṃ yada̍bhiṣu̠ṇvantya̠gṃ̠ śūnapa̍ gṛhṇāti̠ trāya̍ta ē̠vaina̍-mprā̠ṇā vā a̠gṃ̠śava̍ḥ pa̠śava̠-ssōmō̠ ‘gṃ̠śū-npuna̠rapi̍ sṛjati prā̠ṇānē̠va pa̠śuṣu̍ dadhāti̠ dvaudvā̠vapi̍ sṛjati̠ tasmā̠-ddvaudvau̎ prā̠ṇāḥ ॥ 19 ॥
(yaju̍ṣā mimīta – ēna̠ṃ – jāgṛ̠vīti̠ – chatu̍śchatvārigṃśachcha) (a. 4)

prā̠ṇō vā ē̠ṣa yadu̍pā̠gṃ̠śu ryadupā̠g̠śva̍grā̠ grahā̍ gṛ̠hyantē̎ prā̠ṇamē̠vānu̠ pra ya̍ntyaru̠ṇō ha̍ smā̠-”haupa̍vēśiḥ prātassava̠na ē̠vāhaṃ ya̠jñagṃ sagg​ sthā̍payāmi̠ tēna̠ tata̠-ssagg​sthi̍tēna charā̠mītya̠ṣṭau kṛtvō-‘grē̠-‘bhiṣu̍ṇō-tya̠ṣṭākṣa̍rā gāya̠trī gā̍ya̠tra-mprā̍tassava̠na-mprā̍tassava̠namē̠va tēnā̎ ”pnō̠tyēkā̍daśa̠ kṛtvō̎ dvi̠tīya̠-mēkā̍daśākṣarā tri̠ṣṭu-ptraiṣṭu̍bha̠-mmāddhya̍ndina̠gṃ̠- [-mmāddhya̍ndinam, sava̍na̠-] 20

-sava̍na̠-mmāddhya̍ndinamē̠va sava̍na̠-ntēnā̎-”pnōti̠ dvāda̍śa̠ kṛtva̍stṛ̠tīya̠-ndvāda̍śākṣarā̠ jaga̍tī̠ jāga̍ta-ntṛtīyasava̠na-ntṛ̍tīyasava̠namē̠va tēnā̎ ”pnōtyē̠tāgṃ ha̠ vāva sa ya̠jñasya̠ sagg​sthi̍timuvā̠chā ska̍ndā̠yāska̍nna̠gṃ̠ hi ta-dya-dya̠jñasya̠ sagg​sthi̍tasya̠ skanda̠tyathō̠ khalvā̍hurgāya̠trī vāva prā̍tassava̠nē nāti̠vāda̠ ityana̍tivāduka ēna̠-mbhrātṛ̍vyō bhavati̠ ya ē̠vaṃ vēda̠ tasmā̍-da̠ṣṭāva̍ṣṭau̠ [-da̠ṣṭāva̍ṣṭau, kṛtvō̍] 21

kṛtvō̍-‘bhi̠ṣutya̍-mbrahmavā̠dinō̍ vadanti pa̠vitra̍vantō̠-‘nyē grahā̍ gṛ̠hyantē̠ kimpa̍vitra upā̠gṃ̠śuriti̠ vākpa̍vitra̠ iti̍ brūyā-dvā̠chaspata̍yē pavasva vāji̠nnityā̍ha vā̠chaivaina̍-mpavayati̠ vṛṣṇō̍ a̠gṃ̠śubhyā̠mityā̍ha̠ vṛṣṇō̠ hyē̍tāva̠gṃ̠śū yau sōma̍sya̠ gabha̍stipūta̠ ityā̍ha̠ gabha̍stinā̠ hyē̍na-mpa̠vaya̍ti dē̠vō dē̠vānā̎-mpa̠vitra̍ma̠sītyā̍ha dē̠vō hyē̍ṣa [hyē̍ṣaḥ, sa-ndē̠vānā̎-] 22

sa-ndē̠vānā̎-mpa̠vitra̠ṃ yēṣā̎-mbhā̠gō-‘si̠ tēbhya̠stvētyā̍ha̠ yēṣā̠g̠ hyē̍ṣa bhā̠gastēbhya̍ ēna-ṅgṛ̠hṇāti̠ svā-ṅkṛ̍tō̠-‘sītyā̍ha prā̠ṇamē̠va svama̍kṛta̠ madhu̍matīrna̠ iṣa̍skṛ̠dhītyā̍ha̠ sarva̍mē̠vāsmā̍ i̠dagg​ sva̍dayati̠ viśvē̎bhya-stvēndri̠yēbhyō̍ di̠vyēbhya̠ḥ pārthi̍vēbhya̠ ityā̍hō̠bhayē̎ṣvē̠va dē̍vamanu̠ṣyēṣu̍ prā̠ṇā-nda̍dhāti̠ mana̍stvā̠- [mana̍stvā, a̠ṣṭvityā̍ha̠] 23

-‘ṣṭvityā̍ha̠ mana̍ ē̠vāśñu̍ta u̠rva̍ntari̍kṣa̠-manvi̠hītyā̍hā-ntarikṣadēva̠tyō̍ hi prā̠ṇa-ssvāhā̎ tvā subhava̠-ssūryā̠yētyā̍ha prā̠ṇā vai svabha̍vasō dē̠vāstēṣvē̠va pa̠rōkṣa̍-ñjuhōti dē̠vēbhya̍stvā marīchi̠pēbhya̠ ityā̍hā ”di̠tyasya̠ vai ra̠śmayō̍ dē̠vā ma̍rīchi̠pāstēṣā̠-nta-dbhā̍ga̠dhēya̠-ntānē̠va tēna̍ prīṇāti̠ yadi̍ kā̠mayē̍ta̠ var​ṣu̍kaḥ pa̠rjanya̍- [pa̠rjanya̍ḥ, syā̠diti̠] 24

-ssyā̠diti̠ nīchā̠ hastē̍na̠ ni mṛ̍jyā̠-dvṛṣṭi̍mē̠va ni ya̍chChati̠ yadi̍ kā̠mayē̠tāva̍r​ṣuka-ssyā̠dityu̍ttā̠nēna̠ ni mṛ̍jyā̠-dvṛṣṭi̍mē̠vō-dya̍chChati̠ yadya̍bhi̠charē̍da̠mu-ñja̠hyatha̍ tvā hōṣyā̠mīti̍ brūyā̠dāhu̍timē̠vaina̍-mprē̠phsan. ha̍nti̠ yadi̍ dū̠rē syādā tami̍tōstiṣṭhē-tprā̠ṇamē̠vāsyā̍nu̠gatya̍ hanti̠ yadya̍bhi̠charē̍da̠muṣya̍- [yadya̍bhi̠charē̍da̠muṣya̍, tvā̠ prā̠ṇē] 25

-tvā prā̠ṇē sā̍dayā̠mīti̍ sādayē̠dasa̍nnō̠ vai prā̠ṇaḥ prā̠ṇamē̠vāsya̍ sādayati ṣa̠ḍbhira̠gṃ̠śubhi̍ḥ pavayati̠ ṣa-ḍvā ṛ̠tava̍ ṛ̠tubhi̍rē̠vaina̍-mpavayati̠ triḥ pa̍vayati̠ traya̍ i̠mē lō̠kā ē̠bhirē̠vaina̍ṃ lō̠kaiḥ pa̍vayati brahmavā̠dinō̍ vadanti̠ kasmā̎-thsa̠tyā-ttraya̍ḥ paśū̠nāgṃ hastā̍dānā̠ iti̠ ya-ttriru̍pā̠gṃ̠ śugṃ hastē̍na vigṛ̠hṇāti̠ tasmā̠-ttraya̍ḥ paśū̠nāgṃ hastā̍dānā̠ḥ puru̍ṣō ha̠stī ma̠rkaṭa̍ḥ ॥ 26 ॥
(mādhya̍dinna – ma̠ṣṭāva̍ṣṭā – vē̠ṣa – mana̍stvā – pa̠rjanyō̠ – ‘muṣya̠ – puru̍ṣō̠ – dvē cha̍) (a. 5)

dē̠vā vai ya-dya̠jñē-‘ku̍rvata̠ tadasu̍rā akurvata̠ tē dē̠vā u̍pā̠gṃ̠śau ya̠jñagṃ sa̠gg̠sthāpya̍mapaśya̠-ntamu̍pā̠gṃ̠śau sama̍sthāpaya̠-ntē-‘su̍rā̠ vajra̍mu̠dyatya̍ dē̠vāna̠bhyā̍yanta̠ tē dē̠vā bibhya̍ta̠ indra̠mupā̍dhāva̠-ntānindrō̎-‘ntaryā̠mēṇā̠ntara̍dhatta̠ tada̍ntaryā̠masyā̎mtaryāma̠tvaṃ yada̍ntaryā̠mō gṛ̠hyatē̠ bhrātṛ̍vyānē̠va ta-dyaja̍mānō̠-‘ntardha̍ttē̠ ‘ntastē̍ [-‘ntardha̍ttē̠ ‘ntastē̎, da̠dhā̠mi̠ dyāvā̍pṛthi̠vī] 27

dadhāmi̠ dyāvā̍pṛthi̠vī a̠ntaru̠-rva̍ntari̍kṣa̠-mityā̍hai̠bhirē̠va lō̠kairyaja̍mānō̠ bhrātṛ̍vyāna̠ntardha̍ttē̠ tē dē̠vā a̍manya̠ntēndrō̠ vā i̠dama̍bhū̠dya-dva̠yagg​ sma iti̠ tē̎-‘bruva̠-nmagha̍va̠nnanu̍ na̠ ā bha̠jēti̍ sa̠jōṣā̍ dē̠vairava̍rai̠ḥ parai̠śchētya̍bravī̠dyē chai̠va dē̠vāḥ parē̠ yē chāva̍rē̠ tānu̠bhayā̍- [tānu̠bhayān̍, a̠nvābha̍ja-thsa̠jōṣā̍] 28

-na̠nvābha̍ja-thsa̠jōṣā̍ dē̠vairava̍rai̠ḥ parai̠śchētyā̍ha̠ yē chai̠va dē̠vāḥ parē̠ yē chāva̍rē̠ tānu̠bhayā̍-na̠nvābha̍ja-tyantaryā̠mē ma̍ghava-nmādaya̠svētyā̍ha ya̠jñādē̠va yaja̍māna̠-nnāntarē̎tyupayā̠ma-gṛ̍hītō̠ ‘sītyā̍hāpā̠nasya̠ dhṛtyai̠ yadu̠bhāva̍pavi̠trau gṛ̠hyēyā̍tā-mprā̠ṇama̍pā̠nō-‘nu̠ nyṛ̍chChē-tpra̠māyu̍ka-ssyā-tpa̠vitra̍vānantaryā̠mō gṛ̍hyatē [gṛ̍hyatē, prā̠ṇā̠pā̠nayō̠-rvidhṛ̍tyai] 29

prāṇāpā̠nayō̠-rvidhṛ̍tyai prāṇāpā̠nau vā ē̠tau yadu̍pāg​śvantaryā̠mau vyā̠na u̍pāgṃśu̠ sava̍nō̠ ya-ṅkā̠mayē̍ta pra̠māyu̍ka-ssyā̠dityasagg̍ spṛṣṭau̠ tasya̍ sādayē-dvyā̠nēnai̠vāsya̍ prāṇāpā̠nau vi chChi̍natti tā̠ja-kpra mī̍yatē̠ ya-ṅkā̠mayē̍ta̠ sarva̠māyu̍riyā̠diti̠ sagg​ spṛ̍ṣṭau̠ tasya̍ sādayē-dvyā̠nēnai̠vāsya̍ prāṇāpā̠nau sa-nta̍nōti̠ sarva̠māyu̍rēti ॥ 30 ॥
(ta̠ – u̠bhayā̎n – gṛhyatē̠ – chatu̍śchatvārigṃśachcha) (a. 6)

vāgvā ē̠ṣā yadai̎mdravāya̠vō yadai̎mdravāya̠vāgrā̠ grahā̍ gṛ̠hyantē̠ vācha̍mē̠vānu̠ pra ya̍nti vā̠yu-ndē̠vā a̍bruva̠n-thsōma̠gṃ̠ rājā̍nagṃ hanā̠mēti̠ sō̎-‘bravī̠-dvara̍ṃ vṛṇai̠ mada̍grā ē̠va vō̠ grahā̍ gṛhyāntā̠ iti̠ tasmā̍daindravāya̠vāgrā̠ grahā̍ gṛhyantē̠ tama̍ghna̠n-thsō̍-‘pūya̠-tta-ndē̠vā nōpā̍dhṛṣṇuva̠-ntē vā̠yuma̍bruva-nni̠ma-nna̍-ssvada̠yē- [-nni̠ma-nna̍-ssvadaya, iti̠ sō̎-‘bravī̠-] 31

-ti̠ sō̎-‘bravī̠-dvara̍ṃ vṛṇai maddēva̠tyā̎nyē̠va va̠ḥ pātrā̎ṇyuchyāntā̠ iti̠ tasmā̎nnānādēva̠tyā̍ni̠ santi̍ vāya̠vyā̎nyuchyantē̠ tamē̎bhyō vā̠yurē̠vāsva̍daya̠-ttasmā̠dya-tpūya̍ti̠ ta-tpra̍vā̠tē vi ṣa̍janti vā̠yur​hi tasya̍ pavayi̠tā sva̍dayi̠tā tasya̍ vi̠graha̍ṇa̠-nnāvi̍nda̠n-thsādi̍tirabravī̠-dvara̍ṃ vṛṇā̠ atha̠ mayā̠ vi gṛ̍hṇīddhva-mmaddēva̠tyā̍ ē̠va va̠-ssōmā̎- [va̠-ssōmā̎ḥ, sa̠nnā] 32

-ssa̠nnā a̍sa̠-nnityu̍payā̠magṛ̍hītō̠-‘sī-tyā̍hā-ditidēva̠tyā̎stēna̠ yāni̠ hi dā̍ru̠mayā̍ṇi̠ pātrā̎ṇya̠syai tāni̠ yōnē̠-ssambhū̍tāni̠ yāni̍ mṛ̠nmayā̍ni sā̠kṣā-ttānya̠syai tasmā̍dē̠vamā̍ha̠ vāgvai parā̠chya-vyā̍kṛtā-‘vada̠-ttē dē̠vā indra̍mabruvanni̠mā-nnō̠ vācha̠ṃ vyāku̠rviti̠ sō̎-‘bravī̠-dvara̍ṃ vṛṇai̠ mahya̍-ñchai̠vaiṣa vā̠yavē̍ cha sa̠ha gṛ̍hyātā̠ iti̠ tasmā̍daindravāya̠va-ssa̠ha gṛ̍hyatē̠ tāmindrō̍ maddhya̠tō̍-‘va̠kramya̠ vyāka̍rō̠-ttasmā̍di̠yaṃ vyākṛ̍tā̠ vāgu̍dyatē̠ tasmā̎-thsa̠kṛdindrā̍ya maddhya̠tō gṛ̍hyatē̠ dvirvā̠yavē̠ dvau hi sa varā̠vavṛ̍ṇīta ॥ 33 ॥
(sva̠da̠ya̠ – sōmā̎ḥ – sa̠hā – ṣṭāvigṃ̍śatiścha) (a. 7)

mi̠tra-ndē̠vā a̍bruva̠n-thsōma̠gṃ̠ rājā̍nagṃ hanā̠mēti̠ sō̎-‘bravī̠nnāhagṃ sarva̍sya̠ vā a̠ha-mmi̠trama̠smīti̠ tama̍bruva̠n̠. hanā̍mai̠vēti̠ sō̎-‘bravī̠-dvara̍ṃ vṛṇai̠ paya̍sai̠va mē̠ sōmagg̍ śrīṇa̠nniti̠ tasmā̎-nmaitrāvaru̠ṇa-mpaya̍sā śrīṇanti̠ tasmā̎-tpa̠śavō-‘pā̎krāma-nmi̠tra-ssan krū̠rama̍ka̠riti̍ krū̠rami̍va̠ khalu̠ vā ē̠ṣa [vā ē̠ṣaḥ, ka̠rō̠ti̠ ya-ssōmē̍na̠] 34

ka̍rōti̠ ya-ssōmē̍na̠ yaja̍tē̠ tasmā̎-tpa̠śavō-‘pa̍ krāmanti̠ yanmai̎trāvaru̠ṇa-mpaya̍sā śrī̠ṇāti̍ pa̠śubhi̍rē̠va tanmi̠tragṃ sa̍ma̠rdhaya̍ti pa̠śubhi̠ryaja̍māna-mpu̠rā khalu̠ vāvaiva-mmi̠trō̍-‘vē̠dapa̠ ma-tkrū̠ra-ñcha̠kruṣa̍ḥ pa̠śava̍ḥ kramiṣya̠ntīti̠ tasmā̍dē̠vama̍vṛṇīta̠ varu̍ṇa-ndē̠vā a̍bruva̠-ntvayā-‘gṃ̍śa̠bhuvā̠ sōma̠gṃ̠ rājā̍nagṃ hanā̠mēti̠ sō̎-‘bravī̠-dvara̍ṃ vṛṇai̠ mahya̍-ñchai̠- [mahya̍-ñcha, ē̠vaiṣa mi̠trāya̍] 35

-vaiṣa mi̠trāya̍ cha sa̠ha gṛ̍hyātā̠ iti̠ tasmā̎nmaitrāvaru̠ṇa-ssa̠ha gṛ̍hyatē̠ tasmā̠-drājñā̠ rājā̍namagṃśa̠bhuvā̎ ghnanti̠ vaiśyē̍na̠ vaiśyagṃ̍ śū̠drēṇa̍ śū̠dra-nna vā i̠da-ndivā̠ na nakta̍māsī̠davyā̍vṛtta̠-ntē dē̠vā mi̠trāvaru̍ṇāvabruvanni̠da-nnō̠ vivā̍sayata̠miti̠ tāva̍brūtā̠ṃ vara̍ṃ vṛṇāvahā̠ ēka̍ ē̠vā-”va-tpūrvō̠ grahō̍ gṛhyātā̠ iti̠ tasmā̍daindravāya̠vaḥ pūrvō̍ maitrāvaru̠ṇā-dgṛ̍hyatē prāṇāpā̠nau hyē̍tau yadu̍pāg​-śvantaryā̠mau mi̠trō-‘ha̠raja̍naya̠-dvaru̍ṇō̠ rātri̠-ntatō̠ vā i̠daṃ vyau̎chCha̠dya-nmai̎trāvaru̠ṇō gṛ̠hyatē̠ vyu̍ṣṭyai ॥ 36 ॥
(ē̠ṣa – chai̎ – ndravāya̠vō – dvāvigṃ̍śatiścha) (a. 8)

ya̠jñasya̠ śirō̎-‘chChidyata̠ tē dē̠vā a̠śvinā̍vabruva-nbhi̠ṣajau̠ vai stha̍ i̠daṃ ya̠jñasya̠ śira̠ḥ prati̍ dhatta̠miti̠ tāva̍brūtā̠ṃ vara̍ṃ vṛṇāvahai̠ graha̍ ē̠va nā̠vatrāpi̍ gṛhyatā̠miti̠ tābhyā̍-mē̠tamā̎śvi̠na-ma̍gṛhṇa̠-ntatō̠ vai tau ya̠jñasya̠ śira̠ḥ pratya̍dhattā̠ṃ yadā̎śvi̠nō gṛ̠hyatē̍ ya̠jñasya̠ niṣkṛ̍tyai̠ tau dē̠vā a̍bruva̠nnapū̍tau̠ vā i̠mau ma̍nuṣyacha̠rau [ ] 37

bhi̠ṣajā̠viti̠ tasmā̎-dbrāhma̠ṇēna̍ bhēṣa̠ja-nna kā̠rya̍mapū̍tō̠ hyē̎(1̠)ṣō̍ ‘mē̠ddhyō yō bhi̠ṣaktau ba̍hiṣpavamā̠nēna̍ pavayi̠tvā tābhyā̍-mē̠tamā̎śvi̠na-ma̍gṛhṇa̠-ntasmā̎-dbahiṣpavamā̠nē stu̠ta ā̎śvi̠nō gṛ̍hyatē̠ tasmā̍dē̠vaṃ vi̠duṣā̍ bahiṣpavamā̠na u̍pa̠sadya̍ḥ pa̠vitra̠ṃ vai ba̍hiṣpavamā̠na ā̠tmāna̍mē̠va pa̍vayatē̠ tayō̎-‘strē̠dhā bhaiṣa̍jya̠ṃ vi nya̍dadhura̠gnau tṛtī̍yama̠phsu tṛtī̍ya-mbrāhma̠ṇē tṛtī̍ya̠-ntasmā̍dudapā̠tra- [tṛtī̍ya̠-ntasmā̍dudapā̠tram, u̠pa̠ni̠dhāya̍] 38

-mu̍pani̠dhāya̍ brāhma̠ṇa-nda̍kṣiṇa̠tō ni̠ṣādya̍ bhēṣa̠ja-ṅku̍ryā̠-dyāva̍dē̠va bhē̍ṣa̠ja-ntēna̍ karōti sa̠mardhu̍kamasya kṛ̠ta-mbha̍vati brahmavā̠dinō̍ vadanti̠ kasmā̎-thsa̠tyādēka̍pātrā dvidēva̠tyā̍ gṛ̠hyantē̎ dvi̠pātrā̍ hūyanta̠ iti̠ yadēka̍pātrā gṛ̠hyantē̠ tasmā̠dēkō̎-‘ntara̠taḥ prā̠ṇō dvi̠pātrā̍ hūyantē̠ tasmā̠-ddvaudvau̍ ba̠hiṣṭā̎-tprā̠ṇāḥ prā̠ṇā vā ē̠tē ya-ddvi̍dēva̠tyā̎ḥ pa̠śava̠ iḍā̠ yadiḍā̠-mpūrvā̎-ndvidēva̠tyē̎bhya upa̠hvayē̍ta [ ] 39

pa̠śubhi̍ḥ prā̠ṇāna̠ntarda̍dhīta pra̠māyu̍ka-ssyā-ddvidēva̠tyā̎-nbhakṣayi̠tvēḍā̠mupa̍ hvayatē prā̠ṇānē̠vā-”tma-ndhi̠tvā pa̠śūnupa̍ hvayatē̠ vāgvā ai̎mdravāya̠vaśchakṣu̍-rmaitrāvaru̠ṇa-śśrōtra̍māśvi̠naḥ pu̠rastā̍daindravāya̠va-mbha̍kṣayati̠ tasmā̎-tpu̠rastā̎-dvā̠chā va̍dati pu̠rastā̎nmaitrāvaru̠ṇa-ntasmā̎-tpu̠rastā̠chchakṣu̍ṣā paśyati sa̠rvata̍ḥ pari̠hāra̍māśvi̠na-ntasmā̎-thsa̠rvata̠-śśrōtrē̍ṇa śṛṇōti prā̠ṇā vā ē̠tē ya-ddvi̍dēva̠tyā̍ [ya-ddvi̍dēva̠tyā̎ḥ, ari̍ktāni̠] 40

ari̍ktāni̠ pātrā̍ṇi sādayati̠ tasmā̠dari̍ktā antara̠taḥ prā̠ṇā yata̠ḥ khalu̠ vai ya̠jñasya̠ vita̍tasya̠ na kri̠yatē̠ tadanu̍ ya̠jñagṃ rakṣā̠g̠syava̍ charanti̠ yadari̍ktāni̠ pātrā̍ṇi sā̠daya̍ti kri̠yamā̍ṇamē̠va ta-dya̠jñasya̍ śayē̠ rakṣa̍sā̠ -mana̍nvavachārāya̠ dakṣi̍ṇasya havi̠rdhāna̠syōtta̍rasyāṃ varta̠nyāgṃ sā̍dayati vā̠chyē̍va vācha̍-ndadhā̠tyā tṛ̍tīyasava̠nā-tpari̍ śērē ya̠jñasya̠ santa̍tyai ॥ 41 ॥
(ma̠nu̠ṣya̠cha̠rā – vu̍dapā̠tra – mu̍pa̠hvayē̍ta – dvidēva̠tyā̎ḥ – ṣaṭcha̍tvārigṃśachcha) (a. 9)

bṛha̠spati̍rdē̠vānā̎-mpu̠rōhi̍ta̠ āsī̠-chChaṇḍā̠markā̠-vasu̍rāṇā̠-mbrahma̍ṇ vantō dē̠vā āsa̠-nbrahma̍ṇ va̠ntō-‘su̍rā̠stē̎(1̠) ‘nyō̎-‘nya-nnāśa̍knuva-nna̠bhibha̍vitu̠-ntē dē̠vā-śśaṇḍā̠markā̠-vupā̍mantrayanta̠ tā va̍brūtā̠ṃ vara̍ṃ vṛṇāvahai̠ grahā̍vē̠va nā̠vatrāpi̍ gṛhyētā̠miti̠ tābhyā̍mē̠tau śu̠krāma̠nthinā̍-vagṛhṇa̠-ntatō̍ dē̠vā abha̍va̠-nparā-‘su̍rā̠ yasyai̠vaṃ vi̠duṣa̍-śśu̠krāma̠nthinau̍ gṛ̠hyētē̠ bhava̍tyā̠tmanā̠ parā̎- [parā̎, a̠sya̠ bhrātṛ̍vyō] 42

-‘sya̠ bhrātṛ̍vyō bhavati̠ tau dē̠vā a̍pa̠nudyā̠-”tmana̠ indrā̍yājuhavu̠-rapa̍nuttau̠ śaṇḍā̠markau̍ sa̠hāmunēti̍ brūyā̠dya-ndvi̠ṣyādyamē̠va dvēṣṭi̠ tēnai̍nau sa̠hāpa̍ nudatē̠ sa pra̍tha̠ma-ssaṅkṛ̍ti-rvi̠śvaka̠rmētyē̠vainā̍-vā̠tmana̠ indrā̍yā-juhavu̠rindrō̠ hyē̍tāni̍ rū̠pāṇi̠ kari̍kra̠dacha̍rada̠sau vā ā̍di̠tya-śśu̠kraścha̠ndramā̍ ma̠nthya̍pi̠-gṛhya̠ prāñchau̠ ni- [prāñchau̠ niḥ, krā̠ma̠ta̠-stasmā̠-] 43

-ṣkrā̍mata̠-stasmā̠-tprāñchau̠ yantau̠ na pa̍śyanti pra̠tyañchā̍vā̠vṛtya̍ juhuta̠stasmā̎-tpra̠tyañchau̠ yantau̍ paśyanti̠ chakṣu̍ṣī̠ vā ē̠tē ya̠jñasya̠ yachChu̠krāma̠nthinau̠ nāsi̍kōttaravē̠dira̠bhita̍ḥ pari̠kramya̍ juhuta̠stasmā̍da̠bhitō̠ nāsi̍kā̠-ñchakṣu̍ṣī̠ tasmā̠nnāsi̍kayā̠ chakṣu̍ṣī̠ vidhṛ̍tē sa̠rvata̠ḥ pari̍ krāmatō̠ rakṣa̍sā̠mapa̍hatyai dē̠vā vai yāḥ prāchī̠rāhu̍tī̠raju̍havu̠ryē pu̠rastā̠dasu̍rā̠ āsa̠-ntāg​stābhi̠ḥ prā- [āsa̠-ntāg​stābhi̠ḥ pra, a̠nu̠da̠nta̠ yāḥ] 44

-ṇu̍danta̠ yāḥ pra̠tīchī̠ryē pa̠śchādasu̍rā̠ āsa̠-ntāg​stābhi̠rapā̍nudanta̠ prāchī̍ra̠nyā āhu̍tayō hū̠yantē̎ pra̠tyañchau̍ śu̠krāma̠nthinau̍ pa̠śchāchchai̠va pu̠rastā̎chcha̠ yaja̍mānō̠ bhrātṛ̍vyā̠-npra ṇu̍datē̠ tasmā̠-tparā̍chīḥ pra̠jāḥ pra vī̍yantē pra̠tīchī̎rjāyantē śu̠krāma̠nthinau̠ vā anu̍ pra̠jāḥ pra jā̍yantē̠-‘ttrīśchā̠dyā̎ścha su̠vīrā̎ḥ pra̠jāḥ pra̍ja̠naya̠-nparī̍hi śu̠kra-śśu̠kraśō̍chiṣā [śu̠kra-śśu̠kraśō̍chiṣā, su̠pra̠jāḥ pra̠jāḥ] 45

supra̠jāḥ pra̠jāḥ pra̍ja̠naya̠-nparī̍hi ma̠nthī ma̠nthiśō̍chi̠ṣētyā̍hai̠tā vai su̠vīrā̠ yā a̠ttrīrē̠tā-ssu̍pra̠jā yā ā̠dyā̍ ya ē̠vaṃ vēdā̠trya̍sya pra̠jā jā̍yatē̠ nā-”dyā̎ pra̠jāpa̍tē̠rakṣya̍śvaya̠-tta-tparā̍-”pata̠-tta-dvika̍ṅkata̠-mprāvi̍śa̠-tta-dvika̍ṅkatē̠ nāra̍mata̠ ta-dyava̠-mprāvi̍śa̠-tta-dyavē̍-‘ramata̠ ta-dyava̍sya- [ta-dyava̍sya, ya̠va̠tvaṃ ya-dvaika̍ṅkata-] 46

yava̠tvaṃ ya-dvaika̍ṅkata-mmanthipā̠tra-mbhava̍ti̠ saktu̍bhi-śśrī̠ṇāti̍ pra̠jāpa̍tērē̠va tachchakṣu̠-ssa-mbha̍rati brahmavā̠dinō̍ vadanti̠ kasmā̎-thsa̠tyānma̍nthipā̠tragṃ sadō̠ nāśñu̍ta̠ ityā̎rtapā̠tragṃ hīti̍ brūyā̠-dyada̍śñuvī̠tāndhō̎-‘ddhva̠ryu-ssyā̠dārti̠mārchChē̠-ttasmā̠nnāśñu̍tē ॥ 47 ॥
(ā̠tmanā̠ parā̠ – ni – ṣpra – śu̠kraśō̍chiṣā̠ – yava̍sya – sa̠ptatrigṃ̍śachcha) (a. 10)

dē̠vā vai ya-dya̠jñē-‘ku̍rvata̠ tadasu̍rā akurvata̠ tē dē̠vā ā̎graya̠ṇāgrā̠-ngrahā̍napaśya̠-ntāna̍gṛhṇata̠ tatō̠ vai tē-‘gra̠-mparyā̍ya̠n̠. yasyai̠vaṃ vi̠duṣa̍ āgraya̠ṇāgrā̠ grahā̍ gṛ̠hyantē-‘gra̍mē̠va sa̍mā̠nānā̠-mparyē̍ti ru̠gṇava̍tya̠rchā bhrātṛ̍vyavatō gṛhṇīyā̠-dbhrātṛ̍vyasyai̠va ru̠ktvā-‘gragṃ̍ samā̠nānā̠-mparyē̍ti̠ yē dē̍vā di̠vyēkā̍daśa̠ sthētyā̍hai̠- [sthētyā̍ha, ē̠tāva̍tī̠rvai] 48

-tāva̍tī̠rvai dē̠vatā̠stābhya̍ ē̠vaina̠gṃ̠ sarvā̎bhyō gṛhṇātyē̠ṣa tē̠ yōni̠ rviśvē̎bhyastvā dē̠vēbhya̠ ityā̍ha vaiśvadē̠vō hyē̍ṣa dē̠vata̍yā̠ vāgvai dē̠vēbhyō-‘pā̎krāma-dya̠jñāyāti̍ṣṭhamānā̠ tē dē̠vā vā̠chyapa̍krāntāyā-ntū̠ṣṇī-ṅgrahā̍nagṛhṇata̠ sāma̍nyata̠ vāga̠ntarya̍nti̠ vai mēti̠ sā-”gra̍ya̠ṇa-mpratyāga̍chCha̠-ttadā̎graya̠ṇasyā̎-”grayaṇa̠tva- [-”grayaṇa̠tvam, tasmā̍dāgraya̠ṇē] 49

-ntasmā̍dāgraya̠ṇē vāgvi sṛ̍jyatē̠ ya-ttū̠ṣṇī-mpūrvē̠ grahā̍ gṛ̠hyantē̠ yathā̎thsā̠rīya̍ti ma̠ ākha̠ iya̍ti̠ nāpa̍ rāthsyā̠-mītyu̍pāvasṛ̠jatyē̠vamē̠va tada̍ddhva̠ryurā̎graya̠ṇa-ṅgṛ̍hī̠tvā ya̠jñamā̠rabhya̠ vācha̠ṃ vi sṛ̍jatē̠ trir​hi-ṅka̍rōtyudgā̠tṝ-nē̠va ta-dvṛ̍ṇītē pra̠jāpa̍ti̠rvā ē̠ṣa yadā̎graya̠ṇō yadā̎graya̠ṇa-ṅgṛ̍hī̠tvā hi̍-ṅka̠rōti̍ pra̠jāpa̍tirē̠va [ ] 50

ta-tpra̠jā a̠bhi ji̍ghrati̠ tasmā̎-dva̠thsa-ñjā̠ta-ṅgaura̠bhi ji̍ghratyā̠tmā vā ē̠ṣa ya̠jñasya̠ yadā̎graya̠ṇa-ssava̍nēsavanē̠-‘bhi gṛ̍hṇātyā̠tmannē̠va ya̠jñagṃ sa-nta̍nōtyu̠pari̍ṣṭā̠dā na̍yati̠ rēta̍ ē̠va ta-dda̍dhātya̠dhastā̠dupa̍ gṛhṇāti̠ pra ja̍nayatyē̠va tadbra̍hmavā̠dinō̍ vadanti̠ kasmā̎-thsa̠tyā-dgā̍ya̠trī kani̍ṣṭhā̠ Chanda̍sāgṃ sa̠tī sarvā̍ṇi̠ sava̍nāni vaha̠tītyē̠ṣa vai gā̍yatri̠yai va̠thsō yadā̎graya̠ṇastamē̠va tada̍bhini̠varta̠gṃ̠ sarvā̍ṇi̠ sava̍nāni vahati̠ tasmā̎-dva̠thsama̠pākṛ̍ta̠-ṅgaura̠bhi ni va̍rtatē ॥ 51 ॥
(ā̠hā̠-” – gra̠ya̠ṇa̠tvaṃ – pra̠jāpa̍tirē̠vē – ti̍ – vigṃśa̠tiścha̍) (a. 11)

(ya̠jñēna̠ tā u̍pa̠yaḍbhi̍ – rdē̠vā vai ya̠jñamāgnī̎dhrē – brahmavā̠dina̠-ssa tvai – dē̠vasya̠ grāvā̍ṇaṃ – prā̠ṇō vā u̍pā̠g̠śva̍grā – dē̠vā vā u̍pā̠gṃ̠śau – vāgvai – mi̠traṃ – ँya̠jñasya̠ – bṛha̠spati̍ – rdē̠vā vā ā̎graya̠ṇāgrā̠ – nēkā̍daśa)

(ya̠jñēna̍ – lō̠kē pa̍śu̠mān-thsyā̠th – sava̍na̠-mmādhya̍ndina̠ṃ – ँvāgvā – ari̍ktāni̠ – ta-tpra̠jā – ēka̍pañchā̠śat)

(ya̠jñēna̠, ni va̍rtatē)

॥ hari̍ḥ ōm ॥

॥ kṛṣṇa yajurvēdīya taittirīya saṃhitāyāṃ ṣaṣṭhakāṇḍē chaturthaḥ praśna-ssamāptaḥ ॥