Govinda Damodara Stotram (Selected Verses)

karāravindēna padāravindaṃ
mukhāravindē vinivēśayantam ।
vaṭasya patrasya puṭē śayānaṃ
bālaṃ mukundaṃ manasā smarāmi ॥

śrīkṛṣṇa gōvinda harē murārē
hē nātha nārāyaṇa vāsudēva ।
jihvē pibasvāmṛtamētadēva
gōvinda dāmōdara mādhavēti ॥ 1

vikrētukāmākhilagōpakanyā
murāripādārpitachittavṛttiḥ ।
dadhyādikaṃ mōhavaśādavōchat
gōvinda dāmōdara mādhavēti ॥ 2

gṛhē gṛhē gōpavadhūkadambāḥ
sarvē militvā samavāpya yōgam ।
puṇyāni nāmāni paṭhanti nityaṃ
gōvinda dāmōdara mādhavēti ॥ 3

sukhaṃ śayānā nilayē nijē’pi
nāmāni viṣṇōḥ pravadanti martyāḥ ।
tē niśchitaṃ tanmayatāṃ vrajanti
gōvinda dāmōdara mādhavēti ॥ 4

jihvē sadaivaṃ bhaja sundarāṇi
nāmāni kṛṣṇasya manōharāṇi ।
samasta bhaktārtivināśanāni
gōvinda dāmōdara mādhavēti ॥ 5

sukhāvasānē idamēva sāraṃ
duḥkhāvasānē idamēva jñēyam ।
dēhāvasānē idamēva jāpyaṃ
gōvinda dāmōdara mādhavēti ॥ 6

jihvē rasajñē madhurapriyē tvaṃ
satyaṃ hitaṃ tvāṃ paramaṃ vadāmi ।
avarṇayēthā madhurākṣarāṇi
gōvinda dāmōdara mādhavēti ॥ 7

tvāmēva yāchē mama dēhi jihvē
samāgatē daṇḍadharē kṛtāntē ।
vaktavyamēvaṃ madhuraṃ subhaktyā
gōvinda dāmōdara mādhavēti ॥ 8

śrīkṛṣṇa rādhāvara gōkulēśa
gōpāla gōvardhananātha viṣṇō ।
jihvē pibasvāmṛtamētadēva
gōvinda dāmōdara mādhavēti ॥ 9