KYTS 6.3 Chaatvaalaad Dhishniyaanupavapati – Krishna Yajurveda Taittiriya Samhita Patha

kṛṣṇa yajurvēdīya taittirīya saṃhitāyāṃ ṣaṣṭhakāṇḍē tṛtīyaḥ praśnaḥ – sōmamantrabrāhmaṇanirūpaṇaṃ

ō-nnamaḥ paramātmanē, śrī mahāgaṇapatayē namaḥ,
śrī gurubhyō namaḥ । ha̠ri̠ḥ ōm ॥

chātvā̍lā̠-ddhiṣṇi̍yā̠nupa̍ vapati̠ yōni̠rvai ya̠jñasya̠ chātvā̍laṃ ya̠jñasya̍ sayōni̠tvāya̍ dē̠vā vai ya̠jña-mparā̍-‘jayanta̠ tamāgnī̎ddhrā̠-tpuna̠rapā̍jayannē̠tadvai ya̠jñasyā-pa̍rājita̠ṃ yadāgnī̎ddhra̠ṃ yadāgnī̎ddhrā̠ddhiṣṇi̍yān. vi̠hara̍ti̠ yadē̠va ya̠jñasyā-pa̍rājita̠-ntata̍ ē̠vaina̠-mpuna̍stanutē parā̠jityē̍va̠ khalu̠ vā ē̠tē ya̍nti̠ yē ba̍hiṣpavamā̠nagṃ sarpa̍nti bahiṣpavamā̠nē stu̠ta [stu̠tē, ā̠hāgnī̍da̠gnīn. vi] 1

ā̠hāgnī̍da̠gnīn. vi ha̍ra ba̠r̠hi-sstṛ̍ṇāhi purō̠ḍāśā̠gṃ̠ ala̍-ṅku̠rviti̍ ya̠jñamē̠vāpa̠jitya̠ puna̍stanvā̠nā ya̠ntyaṅgā̍rai̠rdvē sava̍nē̠ vi ha̍rati śa̠lākā̍bhi-stṛ̠tīyagṃ̍ saśukra̠tvāyāthō̠ sa-mbha̍ratyē̠vaina̠ddhiṣṇi̍yā̠ vā a̠muṣmi̍n ँlō̠kē sōma̍marakṣa̠-ntēbhyō-‘dhi̠ sōma̠mā-‘ha̍ra̠-nta ma̍nva̠vāya̠nta-mparya̍viśa̠n̠. ya ē̠vaṃ vēda̍ vi̠ndatē̍ [ya ē̠vaṃ vēda̍ vi̠ndatē̎, pa̠ri̠vē̠ṣṭāra̠-ntē] 2

parivē̠ṣṭāra̠-ntē sō̍mapī̠thēna̠ vyā̎rdhyanta̠ tē dē̠vēṣu̍ sōmapī̠thamai̎chChanta̠ tā-ndē̠vā a̍bruva̠-ndvēdvē̠ nāma̍nī kuruddhva̠matha̠ pra vā̠-”phsyatha̠ na vētya̠gnayō̠ vā atha̠ dhiṣṇi̍yā̠stasmā̎-ddvi̠nāmā̎ brāhma̠ṇō-‘rdhu̍ka̠stēṣā̠ṃ yē nēdi̍ṣṭha-mpa̠ryavi̍śa̠-ntē sō̍mapī̠tha-mprā-‘pnu̍vannāhava̠nīya̍ āgnī̠ddhrīyō̍ hō̠trīyō̍ mārjā̠līya̠stasmā̠-ttēṣu̍ juhvatyati̠hāya̠ vaṣa̍-ṭkarōti̠ vi hyē̍ [vi hi, ē̠tē sō̍mapī̠thēnā-”rdhya̍nta] 3

-tē sō̍mapī̠thēnā-”rdhya̍nta dē̠vā vai yāḥ prāchī̠-rāhu̍tī̠-raju̍havu̠ryē pu̠rastā̠dasu̍rā̠ āsa̠-ntāg​ stābhi̠ḥ prāṇu̍danta̠ yāḥ pra̠tīchī̠ryē pa̠śchādasu̍rā̠ āsa̠-ntāg​stābhi̠-rapā̍nudanta̠ prāchī̍ra̠nyā āhu̍tayō hū̠yantē̎ pra̠tyaṅṅāsī̍nō̠ dhiṣṇi̍yā̠n. vyāghā̍rayati pa̠śchāchchai̠va pu̠rastā̎chcha̠ yaja̍mānō̠ bhrātṛ̍vyā̠-npra ṇu̍datē̠ tasmā̠-tparā̍chīḥ pra̠jāḥ pra vī̍yantē pra̠tīchī̎- [pra̠tīchī̎ḥ, jā̠ya̠ntē̠ prā̠ṇā vā ē̠tē] 4

-rjāyantē prā̠ṇā vā ē̠tē yaddhiṣṇi̍yā̠ yada̍ddhva̠ryuḥ pra̠tya-ndhiṣṇi̍yā-nati̠sarpē̎-tprā̠ṇān-thsaṅka̍r​ṣē-tpra̠māyu̍ka-ssyā̠nnābhi̠rvā ē̠ṣā ya̠jñasya̠ yaddhōtō̠rdhvaḥ khalu̠ vai nābhyai̎ prā̠ṇō-‘vā̍ṃapā̠nō yada̍dhva̠ryuḥ pra̠tyaṃ hōtā̍ramati̠sarpē̍dapā̠nē prā̠ṇa-nda̍dhyā-tpra̠māyu̍ka-ssyā̠nnāddhva̠ryurupa̍ gāyē̠-dvāgvī̎ryō̠ vā a̍ddhva̠ryu-ryada̍ddhva̠ryuru̍pa̠-gāyē̍du-dgā̠trē [ ] 5

vācha̠gṃ̠ sa-mpra ya̍chChē-dupa̠dāsu̍kā-‘sya̠ vā-khsyā̎dbrahmavā̠dinō̍ vadanti̠ nāsagg̍sthitē̠ sōmē̎-‘ddhva̠ryuḥ pra̠tyaṅ-khsadō-‘tī̍yā̠datha̍ ka̠thā dā̎kṣi̠ṇāni̠ hōtu̍mēti̠ yāmō̠ hi sa tēṣā̠-ṅkasmā̠ aha̍ dē̠vā yāma̠ṃ vā-‘yā̍ma̠ṃ vā-‘nu̍ jñāsya̠ntītyu-tta̍rē̠ṇā-”gnī̎ddhra-mpa̠rītya̍ juhōti dākṣi̠ṇāni̠ na prā̠ṇān​thsa-ṅka̍r​ṣati̠ nya̍nyē dhiṣṇi̍yā u̠pyantē̠ nānyē yā-nni̠vapa̍ti̠ tēna̠ tā-nprī̍ṇāti̠ yā-nnani̠vapa̍ti̠ yada̍nudi̠śati̠ tēna̠ tān ॥ 6 ॥
(stu̠tē – vi̠ndatē̠ – hi – vī̍yantē pra̠tīchī̍ – rudgrā̠tra – u̠pyantē̠ – chatu̍rdaśa cha) (a. 1)

su̠va̠rgāya̠ vā ē̠tāni̍ lō̠kāya̍ hūyantē̠ ya-dvai̍sarja̠nāni̠ dvābhyā̠-ṅgār​ha̍patyē juhōti dvi̠pā-dyaja̍māna̠ḥ prati̍ṣṭhityā̠ āgnī̎ddhrē juhōtya̠ntari̍kṣa ē̠vā-”kra̍mata āhava̠nīyē̍ juhōti suva̠rgamē̠vaina̍ṃ lō̠ka-ṅga̍mayati dē̠vān. vai su̍va̠rgaṃ lō̠kaṃ ya̠tō rakṣāg̍sya jighāgṃsa̠ntē sōmē̍na̠ rājñā̠ rakṣāg̍-syapa̠hatyā̠ptu-mā̠tmāna̍-ṅkṛ̠tvā su̍va̠rgaṃ lō̠kamā̍ya̠-nrakṣa̍sā̠-manu̍palābhā̠yā ”tta̠-ssōmō̍ bhava̠tyatha̍ [bhava̠tyatha̍, vai̠sa̠rja̠nāni̍ juhōti̠] 7

vaisarja̠nāni̍ juhōti̠ rakṣa̍sā̠mapa̍hatyai̠ tvagṃ sō̍ma tanū̠kṛdbhya̠ ityā̍ha tanū̠kṛddhya̍ṣa dvēṣō̎bhyō̠-‘nyakṛ̍tēbhya̠ ityā̍hā̠nyakṛ̍tāni̠ hi rakṣāg̍syu̠ru ya̠ntā-‘si̠ varū̍tha̠mityā̍hō̠ru ṇa̍skṛ̠dhīti̠ vāvaitadā̍ha juṣā̠ṇō a̠pturājya̍sya vē̠tvityā̍hā̠ptumē̠va yaja̍māna-ṅkṛ̠tvā su̍va̠rgaṃ lō̠ka-ṅga̍mayati̠ rakṣa̍sā̠-manu̍palābhā̠yā-” sōma̍-ndadata̠ [sōma̍-ndadatē, ā grāvṇṇa̠ ā] 8

ā grāvṇṇa̠ ā vā̍ya̠vyā̎nyā drō̍ṇakala̠śamu-tpatnī̠mā na̍ya̠ntyanvanāgṃ̍si̠ pra va̍rtayanti̠ yāva̍dē̠vāsyāsti̠ tēna̍ sa̠ha su̍va̠rgaṃ lō̠kamē̍ti̠ naya̍vatya̠rchā-”gnī̎ddhrē juhōti suva̠rgasya̍ lō̠kasyā̠bhinī̎tyai̠ grāvṇṇō̍ vāya̠vyā̍ni drōṇakala̠śamāgnī̎ddhra̠ upa̍ vāsayati̠ vi hyē̍na̠-ntairgṛ̠hṇatē̠ ya-thsa̠hōpa̍vā̠sayē̍-dapuvā̠yēta̍ sau̠myarchā pra pā̍dayati̠ svayai̠- [pra pā̍dayati̠ svaya̎, ē̠vaina̍-ndē̠vata̍yā̠] 9

-vaina̍-ndē̠vata̍yā̠ pra pā̍daya̠tyadi̍tyā̠-ssadō̠-‘syadi̍tyā̠-ssada̠ ā sī̠dētyā̍ha yathāya̠jurē̠vaita-dyaja̍mānō̠ vā ē̠tasya̍ pu̠rā gō̠ptā bha̍vatyē̠ṣa vō̍ dēva savita̠-ssōma̠ ityā̍ha savi̠tṛpra̍sūta ē̠vaina̍-ndē̠vatā̎bhya̠-ssa-mpraya̍chChatyē̠ta-ttvagṃ sō̍ma dē̠vō dē̠vānupā̍gā̠ ityā̍ha dē̠vō hyē̍ṣa sa- [dē̠vō hyē̍ṣa sann, dē̠vānu̠paitī̠dama̠ha-] 10

-ndē̠vānu̠paitī̠dama̠ha-mma̍nu̠ṣyō̍ manu̠ṣyā̍nityā̍ha manu̠ṣyō̎(1̠) hyē̍ṣa sa-nma̍nu̠ṣyā̍nu̠paiti̠ yadē̠ta-dyaju̠rna brū̠yādapra̍jā apa̠śuryaja̍māna-ssyā-thsa̠ha pra̠jayā̍ sa̠ha rā̠yaspōṣē̠ṇētyā̍ha pra̠jayai̠va pa̠śubhi̍-ssa̠hēmaṃ lō̠kamu̠pāva̍rtatē̠ namō̍ dē̠vēbhya̠ ityā̍ha namaskā̠rō hi dē̠vānāg̍ sva̠dhā pi̠tṛbhya̠ ityā̍ha svadhākā̠rō hi [svadhākā̠rō hi, pi̠tṛ̠ṇāmi̠dama̠ha-] 11

pi̍tṛ̠ṇāmi̠dama̠ha-nnirvaru̍ṇasya̠ pāśā̠dityā̍ha varuṇapā̠śādē̠va nirmu̍chya̠tē ‘gnē̎ vratapata ā̠tmana̠ḥ pūrvā̍ ta̠nūrā̠dēyētyā̍hu̠ḥ kō hi tadvēda̠ ya-dvasī̍yā̠n-thsvē vaśē̍ bhū̠tē puna̍rvā̠ dadā̍ti̠ na vēti̠ grāvā̍ṇō̠ vai sōma̍sya̠ rājñō̍ malimlusē̠nā ya ē̠vaṃ vi̠dvā-ngrāvṇṇa̠ āgnī̎ddhra upavā̠saya̍ti̠ naina̍-mmalimlusē̠nā vi̍ndati ॥ 12 ॥
(atha̍-dadatē̠ – svayā̠ – santh – sva̍dhākā̠rō hi – vi̍ndati) (a. 2)

vai̠ṣṇa̠vyarchā hu̠tvā yūpa̠machChai̍ti vaiṣṇa̠vō vai dē̠vata̍yā̠ yūpa̠-ssvayai̠vaina̍-ndē̠vata̠yā ‘chChai̠tyatya̠nyānagā̠-nnānyā-nupā̍gā̠mityā̠hāti̠ hya̍nyānēti̠ nānyā-nu̠paitya̠rvāktvā̠ parai̍ravida-mpa̠rō-‘va̍rai̠rityā̍hā̠rvāghyē̍na̠-mparai̎rvi̠ndati̍ pa̠rō-‘va̍rai̠sta-ntvā̍ juṣē [juṣē, vai̠ṣṇa̠va-ndē̍vaya̠jyāyā̠] 13

vaiṣṇa̠va-ndē̍vaya̠jyāyā̠ ityā̍ha dēvaya̠jyāyai̠ hyē̍na-ñju̠ṣatē̍ dē̠vastvā̍ savi̠tā maddhvā̍-‘na̠ktvityā̍ha̠ tēja̍sai̠vaina̍-mana̠ktyōṣa̍dhē̠ trāya̍svaina̠gg̠ svadhi̍tē̠ mainagṃ̍ higṃsī̠rityā̍ha̠ vajrō̠ vai svadhi̍ti̠-śśāntyai̠ svadhi̍tērvṛ̠kṣasya̠ bibhya̍taḥ pratha̠mēna̠ śaka̍lēna sa̠ha tēja̠ḥ parā̍ patati̠ yaḥ pra̍tha̠ma-śśaka̍laḥ parā̠patē̠-ttamapyā ha̍rē̠-thsatē̍jasa- [ha̍rē̠-thsatē̍jasam, ē̠vaina̠mā] 14

-mē̠vaina̠mā ha̍ratī̠mē vai lō̠kā yūpā̎-tpraya̠tō bi̍bhyati̠ diva̠magrē̍ṇa̠ mā lē̍khīra̠ntari̍kṣa̠-mmaddhyē̍na̠ mā higṃ̍sī̠rityā̍hai̠bhya ē̠vaina̍ṃ lō̠kēbhya̍-śśamayati̠ vana̍spatē śa̠tava̍l​śō̠ vi rō̠hētyā̠vraścha̍nē juhōti̠ tasmā̍-dā̠vraścha̍nā-dvṛ̠kṣāṇā̠-mbhūyāgṃ̍sa̠ utti̍ṣṭhanti sa̠hasra̍val​śā̠ vi va̠yagṃ ru̍hē̠mētyā̍hā̠- ”śiṣa̍mē̠vaitāmā śā̠stē ‘na̍kṣasaṅga- [śā̠stē ‘na̍kṣasaṅgam, vṛ̠śchē̠-dyada̍kṣasa̠ṅgaṃ-] 15

-ँvṛśchē̠-dyada̍kṣasa̠ṅgaṃ vṛ̠śchēda̍dhaī̠ṣaṃ yaja̍mānasya pra̠māyu̍kagg​ syā̠dya-ṅkā̠mayē̠tāpra̍tiṣṭhita-ssyā̠dityā̍rō̠ha-ntasma̍ vṛśchēdē̠ṣa vai vana̠spatī̍nā̠-mapra̍tiṣṭhi̠tō-‘pra̍tiṣṭhita ē̠va bha̍vati̠ ya-ṅkā̠mayē̍tāpa̠śu-ssyā̠ditya̍pa̠rṇa-ntasmai̠ śuṣkā̎graṃ vṛśchēdē̠ṣa vai vana̠spatī̍nā-mapaśa̠vyō̍-‘pa̠śurē̠va bha̍vati̠ ya-ṅkā̠mayē̍ta paśu̠mān-thsyā̠diti̍ bahupa̠rṇa-ntasmai̍ bahuśā̠khaṃ vṛ̍śchēdē̠ṣa vai [ ] 16

vana̠spatī̍nā-mpaśa̠vya̍ḥ paśu̠mānē̠va bha̍vati̠ prati̍ṣṭhitaṃ vṛśchē-tprati̠ṣṭhākā̍masyai̠ṣa vai vana̠spatī̍nā̠-mprati̍ṣṭhitō̠ ya-ssa̠mē bhūmyai̠ svādyōnē̍ rū̠ḍhaḥ pratyē̠va ti̍ṣṭhati̠ yaḥ pra̠tyaṅṅupa̍nata̠staṃ vṛ̍śchē̠-thsa hi mēdha̍ma̠bhyupa̍nata̠ḥ pañchā̍ratni̠-ntasmai̍ vṛśchē̠dya-ṅkā̠mayē̠tōpai̍na̠mutta̍rō ya̠jñō na̍mē̠diti̠ pañchā̎kṣarā pa̠ṅktiḥ pāṅktō̍ ya̠jña upai̍na̠mutta̍rō ya̠jñō [ya̠jñaḥ, na̠ma̠ti̠ ṣaḍa̍ratni] 17

na̍mati̠ ṣaḍa̍ratni-mprati̠ṣṭhākā̍masya̠ ṣaḍvā ṛ̠tava̍ ṛ̠tuṣvē̠va prati̍ tiṣṭhati sa̠ptāra̍tni-mpa̠śukā̍masya sa̠ptapa̍dā̠ śakva̍rī pa̠śava̠-śśakva̍rī pa̠śūnē̠vāva̍ rundhē̠ navā̍ratni̠-ntēja̍skāmasya tri̠vṛtā̠ stōmē̍na̠ sammi̍ta̠-ntēja̍stri̠vṛ-ttē̍ja̠svyē̍va bha̍va̠-tyēkā̍daśāratni-mindri̠yakā̍ma̠-syaikā̍daśākṣarā tri̠ṣṭugi̍ndri̠ya-ntri̠ṣṭugi̍ndriyā̠vyē̍va bha̍vati̠ pañcha̍daśāratni̠-mbhrātṛ̍vyavataḥ pañchada̠śō vajrō̠ bhrātṛ̍vyābhibhūtyai sa̠ptada̍śāratni-mpra̠jākā̍masya saptada̠śaḥ pra̠jāpa̍tiḥ pra̠jāpa̍tē̠rāptyā̠ ēka̍vigṃśatyaratni-mprati̠ṣṭhākā̍ma-syaikavi̠gṃ̠śa-sstōmā̍nā-mprati̠ṣṭhā prati̍ṣṭhityā a̠ṣṭāśri̍rbhava-tya̠ṣṭākṣa̍rā gāya̠trī tējō̍ gāya̠trī gā̍ya̠trī ya̍jñamu̠kha-ntēja̍sai̠va gā̍yatri̠yā ya̍jñamu̠khēna̠ sammi̍taḥ ॥ 18 ॥
(ju̠ṣē̠ – satē̍jasa̠ – mana̍kṣasaṅgaṃ – bahuśā̠khaṃ vṛ̍śchēdē̠ṣa vai – ya̠jña upai̍na̠mutta̍rō ya̠jña – āptyā̠ – ēkā̠nnavigṃ̍śa̠tiścha̍) (a. 3)

pṛ̠thi̠vyai tvā̠-‘ntari̍kṣāya tvā di̠vē tvētyā̍hai̠bhya ē̠vaina̍ṃ lō̠kēbhya̠ḥ prōkṣa̍ti̠ parā̎mcha̠-mprōkṣa̍ti̠ parā̍ṅiva̠ hi su̍va̠rgō lō̠kaḥ krū̠rami̍va̠ vā ē̠ta-tka̍rōti̠ ya-tkhana̍tya̠pō-‘va̍ nayati̠ śāntyai̠ yava̍matī̠rava̍ naya̠tyūrgvai yavō̠ yaja̍mānēna̠ yūpa̠-ssammi̍tō̠ yāvā̍nē̠va yaja̍māna̠-stāva̍tī-mē̠vāsmi̠-nnūrja̍-ndadhāti [mē̠vāsmi̠-nnūrja̍-ndadhāti, pi̠tṛ̠ṇāgṃ sada̍nama̠sīti̍] 19

pitṛ̠ṇāgṃ sada̍nama̠sīti̍ ba̠r̠hirava̍ stṛṇāti pitṛdēva̠tyā̎(1̠)gg̠ hyē̍ta-dyannikhā̍ta̠ṃ ya-dba̠r̠hirana̍vastīrya minu̠yā-tpi̍tṛdēva̠tyō̍ nikhā̍ta-ssyā-dba̠r̠hira̍va̠stīrya̍ minōtya̠syāmē̠vaina̍-mminōti yūpaśaka̠lamavā̎syati̠ satē̍jasamē̠vaina̍-mminōti dē̠vastvā̍ savi̠tā maddhvā̍-‘na̠ktvityā̍ha̠ tēja̍sai̠vaina̍manakti supippa̠lābhya̠-stvauṣa̍dhībhya̠ iti̍ cha̠ṣāla̠-mprati̍- [cha̠ṣāla̠-mprati̍, mu̠ñcha̠ti̠ tasmā̎chChīr​ṣa̠ta] 20

-muñchati̠ tasmā̎chChīr​ṣa̠ta ōṣa̍dhaya̠ḥ phala̍-ṅgṛhṇantya̠nakti̠ tējō̠ vā ājya̠ṃ yaja̍mānēnāgni̠ṣṭhā-‘śri̠-ssammi̍tā̠ yada̍gni̠ṣṭhā-maśri̍ma̠nakti̠ yaja̍mānamē̠va tēja̍sā ‘naktyā̠nta-ma̍naktyā̠ntamē̠va yaja̍māna̠-ntēja̍sānakti sa̠rvata̠ḥ pari̍ mṛśa̠tyapa̍rivarga-mē̠vāsmi̠-ntējō̍ dadhā̠tyu-ddivagg̍ stabhā̠nā-‘ntari̍kṣa-mpṛ̠ṇētyā̍hai̠ṣāṃ lō̠kānā̠ṃ vidhṛ̍tyai vaiṣṇa̠vyarchā [vaiṣṇa̠vyarchā, ka̠lpa̠ya̠ti̠ vai̠ṣṇa̠vō vai] 21

ka̍lpayati vaiṣṇa̠vō vai dē̠vata̍yā̠ yūpa̠-ssvayai̠vaina̍-ndē̠vata̍yā kalpayati̠ dvābhyā̎-ṅkalpayati dvi̠pā-dyaja̍māna̠ḥ prati̍ṣṭhityai̠ ya-ṅkā̠mayē̍ta̠ tēja̍saina-ndē̠vatā̍bhirindri̠yēṇa̠ vya̍rdhayēya̠-mitya̍gni̠ṣṭhā-ntasyāśri̍-māhava̠nīyā̍di̠tthaṃ vē̠tthaṃ vā-‘ti̍ nāvayē̠-ttēja̍sai̠vaina̍-ndē̠vatā̍bhirindri̠yēṇa̠ vya̍rdhayati̠ ya-ṅkā̠mayē̍ta̠ tēja̍saina-ndē̠vatā̍bhirindri̠yēṇa̠ sama̍rdhayēya̠mi- [sama̍rdhayēya̠miti̍, a̠gni̠ṣṭhā-] 22

-tya̍gni̠ṣṭhā-ntasyāśri̍māhava̠nīyē̍na̠ sa-mmi̍nuyā̠-ttēja̍sai̠vaina̍-ndē̠vatā̍bhirindri̠yēṇa̠ sama̍rdhayati brahma̠vani̍-ntvā kṣatra̠vani̠mityā̍ha yathāya̠jurē̠vaita-tpari̍ vyaya̠tyūrgvai ra̍śa̠nā yaja̍mānēna̠ yūpa̠-ssammi̍tō̠ yaja̍mānamē̠vōrjā sama̍rdhayati nābhida̠ghnē pari̍ vyayati nābhida̠ghna ē̠vāsmā̠ ūrja̍-ndadhāti̠ tasmā̎nnābhida̠ghna ū̠rjā bhu̍ñjatē̠ ya-ṅkā̠mayē̍tō̠rjaina̠ṃ- [ya-ṅkā̠mayē̍tō̠rjaina̎m, vya̍rdhayēya̠-] 23

ँvya̍rdhayēya̠-mityū̠rdhvāṃ vā̠ tasyāvā̍chī̠ṃ vā-‘vō̍hēdū̠rjaivaina̠ṃ vya̍rdhayati̠ yadi̍ kā̠mayē̍ta̠ var​ṣu̍kaḥ pa̠rjanya̍-ssyā̠ditya-vā̍chī̠mavō̍hē̠-dvṛṣṭi̍mē̠va ni ya̍chChati̠ yadi̍ kā̠mayē̠tāva̍r​ṣuka-ssyā̠dityū̠rdhvāmudū̍hē̠-dvṛṣṭi̍mē̠vō-dya̍chChati pitṛ̠ṇā-nnikhā̍ta-mmanu̠ṣyā̍ṇāmū̠rdhva-nnikhā̍tā̠dā ra̍śa̠nāyā̠ ōṣa̍dhīnāgṃ raśa̠nā viśvē̍ṣā- [viśvē̍ṣām, dē̠vānā̍-] 24

-ndē̠vānā̍-mū̠rdhvagṃ ra̍śa̠nāyā̠ ā cha̠ṣālā̠dindra̍sya cha̠ṣālagṃ̍ sā̠ddhyānā̠mati̍rikta̠gṃ̠ sa vā ē̠ṣa sa̍rvadēva̠tyō̍ yadyūpō̠ yadyūpa̍-mmi̠nōti̠ sarvā̍ ē̠va dē̠vatā̎ḥ prīṇāti ya̠jñēna̠ vai dē̠vā-ssu̍va̠rgaṃ lō̠kamā̍ya̠-ntē̍-‘manyanta manu̠ṣyā̍ nō̠-‘nvābha̍viṣya̠ntīti̠ tē yūpē̍na yōpayi̠tvā su̍va̠rgaṃ ँlō̠kamā̍ya̠-ntamṛṣa̍yō̠ yūpē̍nai̠vānu̠ prājā̍na̠-nta-dyūpa̍sya yūpa̠tvaṃ- [yūpa̠tvam, ya-dyūpa̍-] 25

ँya-dyūpa̍-mmi̠nōti̍ suva̠rgasya̍ lō̠kasya̠ prajñā̎tyai pu̠rastā̎-nminōti pu̠rastā̠ddhi ya̠jñasya̍ prajñā̠yatē pra̍jñāta̠gṃ̠ hi ta-dyadati̍panna ā̠huri̠da-ṅkā̠rya̍māsī̠diti̍ sā̠ddhyā vai dē̠vā ya̠jñamatya̍manyanta̠ tān. ya̠jñō nāspṛ̍śa̠-ttān. ya-dya̠jñasyāti̍rikta̠māsī̠-ttada̍spṛśa̠dati̍rikta̠ṃ vā ē̠ta-dya̠jñasya̠ yada̠gnāva̠gni-mma̍thi̠tvā pra̠hara̠tyati̍riktamē̠ta- [pra̠hara̠tyati̍riktamē̠tat, yūpa̍sya̠] 26

-dyūpa̍sya̠ yadū̠rdhva-ñcha̠ṣālā̠-ttēṣā̠-nta-dbhā̍ga̠dhēya̠-ntānē̠va tēna̍ prīṇāti dē̠vā vai sagg​sthi̍tē̠ sōmē̠ pra sruchō-‘ha̍ra̠-npra yūpa̠-ntē̍-‘manyanta yajñavēśa̠saṃ vā i̠da-ṅku̍rma̠ iti̠ tē pra̍sta̠ragg​ sru̠chā-nni̠ṣkraya̍ṇa-mapaśya̠n-thsvaru̠ṃ yūpa̍sya̠ sagg​sthi̍tē̠ sōmē̠ pra pra̍sta̠ragṃ hara̍ti ju̠hōti̠ svaru̠maya̍jñavēśasāya ॥ 27 ॥
(da̠dhā̠ti̠ – pratyṛ̠ – chā – sama̍rdhayēya̠mityū̠ – rjaina̠ṃ – ँviśvē̍ṣāṃ – ँyūpa̠tva – mati̍riktamē̠ta-d- dvicha̍tvārigṃśachcha) (a. 4)

sā̠ddhyā vai dē̠vā a̠smiँllō̠ka ā̍sa̠-nnānya-tki̍-ñcha̠na mi̠ṣa-ttē̎-‘gnimē̠vāgnayē̠ mēdhā̠yā ‘la̍bhanta̠ na hya̍nyadā̍la̠bhyaṃ̍-mavi̍nda̠-ntatō̠ vā i̠māḥ pra̠jāḥ prājā̍yanta̠ yada̠gnāva̠gni-mma̍thi̠tvā pra̠hara̍ti pra̠jānā̎-mpra̠jana̍nāya ru̠drō vā ē̠ṣa yada̠gniryaja̍mānaḥ pa̠śurya-tpa̠śumā̠labhyā̠gni-mmanthē̎-dru̠drāya̠ yaja̍māna̠- [yaja̍mānam, api̍ daddhyā-] 28

-mapi̍ daddhyā-tpra̠māyu̍ka-ssyā̠dathō̠ khalvā̍hura̠gni-ssarvā̍ dē̠vatā̍ ha̠virē̠tadya-tpa̠śuriti̠ ya-tpa̠śumā̠labhyā̠gni-mmantha̍ti ha̠vyāyai̠vā-”sa̍nnāya̠ sarvā̍ dē̠vatā̍ janaya-tyupā̠kṛtyai̠va manthya̠-stannēvā-”la̍bdha̠-nnēvānā̍labdha-ma̠gnē-rja̠nitra̍-ma̠sītyā̍hā̠gnēr​hyē̍ta-jja̠nitra̠ṃ vṛṣa̍ṇau stha̠ ityā̍ha̠ vṛṣa̍ṇau̠ [vṛṣa̍ṇau, hyē̍tā-] 29

hyē̍tā-vu̠rvaśya̍syā̠yu-ra̠sītyā̍ha mithuna̠tvāya̍ ghṛ̠tēnā̠ktē vṛṣa̍ṇa-ndadhāthā̠mityā̍ha̠ vṛṣa̍ṇa̠gg̠ hyē̍tē dadhā̍tē̠ yē a̠gni-ṅgā̍ya̠tra-ñChandō-‘nu̠ pra jā̍ya̠svētyā̍ha̠ Chandō̍bhirē̠vaina̠-mpra ja̍nayatya̠gnayē̍ ma̠thyamā̍nā̠yānu̍ brū̠hītyā̍ha sāvi̠trīmṛcha̠manvā̍ha savi̠tṛpra̍sūta ē̠vaina̍-mmanthati jā̠tāyānu̍ brūhi [brūhi, pra̠hri̠yamā̍ṇā̠yā-‘nu̍] 30

prahri̠yamā̍ṇā̠yā-‘nu̍ brū̠hītyā̍ha̠ kāṇḍē̍kāṇḍa ē̠vaina̍-ṅkri̠yamā̍ṇē̠ sama̍rdhayati gāya̠trī-ssarvā̠ anvā̍ha gāya̠traCha̍ndā̠ vā a̠gni-ssvēnai̠vaina̠-ñChanda̍sā̠ sama̍rdhayatya̠gniḥ pu̠rā bhava̍tya̠gni-mma̍thi̠tvā pra ha̍rati̠ tau sa̠bhaṃva̍ntau̠ yaja̍mānama̠bhi sa-mbha̍vatō̠ bhava̍ta-nna̠-ssama̍nasā̠vityā̍ha̠ śāntyai̎ pra̠hṛtya̍ juhōti jā̠tāyai̠vāsmā̠ anna̠mapi̍ dadhā̠tyājyē̍na juhōtyē̠tadvā a̠gnēḥ pri̠ya-ndhāma̠ yadājya̍-mpri̠yēṇai̠vaina̠-ndhāmnā̠ sama̍rdhaya̠tyathō̠ tēja̍sā ॥ 31 ॥
(yaja̍māna-māha̠ vṛṣa̍ṇau-jā̠tāyānu̍ brū̠hyā-pya̠ -ṣṭāda̍śa cha) (a. 5)

i̠ṣē tvēti̍ ba̠r̠hirā da̍tta i̠chChata̍ iva̠ hyē̍ṣa yō yaja̍ta upa̠vīra̠sītyā̠hōpa̠ hyē̍nānāka̠rōtyupō̍ dē̠vā-ndaivī̠rviśa̠ḥ prāgu̠rityā̍ha̠ daivī̠r​hyē̍tā viśa̍-ssa̠tīrdē̠vānu̍pa̠yanti̠ vahnī̍ru̠śija̠ ityā̍ha̠rtvijō̠ vai vahna̍ya u̠śija̠-stasmā̍dē̠vamā̍ha̠ bṛha̍spatē dhā̠rayā̠ vasū̠nī- [vasū̠nīti̍, ā̠ha̠ brahma̠ vai] 32

-tyā̍ha̠ brahma̠ vai dē̠vānā̠-mbṛha̠spati̠ rbrahma̍ṇai̠vāsmai̍ pa̠śūnava̍ rundhē ha̠vyā tē̎ svadantā̠mityā̍ha sva̠daya̍tyē̠vainā̠-ndēva̍ tvaṣṭa̠rvasu̍ ra̠ṇvētyā̍ha̠ tvaṣṭā̠ vai pa̍śū̠nā-mmi̍thu̠nānāgṃ̍ rūpa̠kṛ-drū̠pamē̠va pa̠śuṣu̍ dadhāti̠ rēva̍tī̠ rama̍ddhva̠mityā̍ha pa̠śavō̠ vai rē̠vatī̎ḥ pa̠śūnē̠vāsmai̍ ramayati dē̠vasya̍ tvā savi̠tuḥ pra̍sa̠va iti̍ [iti̍, ra̠śa̠nāmā da̍ttē̠] 33

raśa̠nāmā da̍ttē̠ prasū̎tyā a̠śvinō̎rbā̠hubhyā̠-mityā̍hā̠śvinau̠ hi dē̠vānā̍maddhva̠ryū āstā̎-mpū̠ṣṇō hastā̎bhyā̠mityā̍ha̠ yatyā̍ ṛ̠tasya̍ tvā dēvahavi̠ḥ pāśē̠nā-” ra̍bha̠ ityā̍ha sa̠tyaṃ vā ṛ̠tagṃ sa̠tyēnai̠vaina̍mṛ̠tēnā ”ra̍bhatē ‘kṣṇa̠yā pari̍ harati̠ vaddhya̠gṃ̠ hi pra̠tyañcha̍-mprati mu̠ñchanti̠ vyāvṛ̍ttyai̠ dhar​ṣā̠ mānu̍ṣā̠niti̠ ni yu̍nakti̠ dhṛtyā̍ a̠dbhya- [a̠dbhyaḥ, tvauṣa̍dhībhya̠ḥ] 34

-stvauṣa̍dhībhya̠ḥ prōkṣā̠mītyā̍hā̠dbhyō hyē̍ṣa ōṣa̍dhībhya-ssa̠bhaṃva̍ti̠ ya-tpa̠śura̠pā-mpē̠rura̠sītyā̍hai̠ṣa hya̍pā-mpā̠tā yō mēdhā̍yā-” ra̠bhyatē̎ svā̠tta-ñchi̠-thsadē̍vagṃ ha̠vyamāpō̍ dēvī̠-ssvada̍taina̠mityā̍ha sva̠daya̍tyē̠vaina̍-mu̠pari̍ṣṭā̠-tprōkṣa̍tyu̠pari̍ṣṭādē̠vaina̠-mmēddhya̍-ṅkarōti pā̠yaya̍tyantara̠ta ē̠vaina̠-mmēddhya̍-ṅkarōtya̠dhastā̠dupō̎kṣati sa̠rvata̍ ē̠vaina̠-mmēddhya̍-ṅkarōti ॥ 35 ॥
(vasū̠nīti̍-prasa̠va itya̠-dbhyō̎-‘ntara̠ta ē̠vaina̠ṃ – daśa̍ cha) (a. 6)

a̠gninā̠ vai hōtrā̍ dē̠vā asu̍rā-na̠bhya̍bhava-nna̠gnayē̍ sami̠ddhyamā̍nā̠yānu̍ brū̠hītyā̍ha̠ bhrātṛ̍vyābhibhūtyai sa̠ptada̍śa sāmidhē̠nīranvā̍ha saptada̠śaḥ pra̠jāpa̍tiḥ pra̠jāpa̍tē̠rāptyai̍ sa̠ptada̠śānvā̍ha̠ dvāda̍śa̠ māsā̠ḥ pañcha̠rtava̠-ssa sa̍ṃvathsa̠ra-ssa̍ṃvathsa̠ra-mpra̠jā anu̠ prajā̍yantē pra̠jānā̎-mpra̠jana̍nāya dē̠vā vai sā̍midhē̠nīra̠nūchya̍ ya̠jña-nnānva̍paśya̠n-thsa pra̠jāpa̍ti-stū̠ṣṇī-mā̍ghā̠ra- [-mā̍ghā̠ram, ā ‘ghā̍raya̠-ttatō̠ vai] 36

-mā ‘ghā̍raya̠-ttatō̠ vai dē̠vā ya̠jñamanva̍paśya̠n̠. ya-ttū̠ṣṇī-mā̍ghā̠ra-mā̍ghā̠raya̍ti ya̠jñasyānu̍khyātyā̠ asu̍rēṣu̠ vai ya̠jña ā̍sī̠-tta-ndē̠vāstū̎ṣṇīgṃ hō̠mēnā̍vṛñjata̠ ya-ttū̠ṣṇī-mā̍ghā̠ra-mā̍ghā̠raya̍ti̠ bhrātṛ̍vyasyai̠ va ta-dya̠jñaṃ vṛ̍ṅktē pari̠dhī̍n-thsa-mmā̎r​ṣṭi pu̠nātyē̠vainā̠-ntristri̠-ssa-mmā̎r​ṣṭi̠ tryā̍vṛ̠ddhi ya̠jñō-‘thō̠ rakṣa̍sā̠mapa̍hatyai̠ dvāda̍śa̠ sa-mpa̍dyantē̠ dvāda̍śa̠ [dvāda̍śa, māsā̎-ssaṃvathsa̠ra-] 37

māsā̎-ssaṃvathsa̠ra-ssa̍ṃvathsa̠ramē̠va prī̍ṇā̠tyathō̍ saṃvathsa̠ramē̠vāsmā̠ upa̍ dadhāti suva̠rgasya̍ lō̠kasya̠ sama̍ṣṭyai̠ śirō̠ vā ē̠ta-dya̠jñasya̠ yadā̍ghā̠rō̎-‘gni-ssarvā̍ dē̠vatā̠ yadā̍ghā̠ra-mā̍ghā̠raya̍ti śīr​ṣa̠ta ē̠va ya̠jñasya̠ yaja̍māna̠-ssarvā̍ dē̠vatā̠ ava̍ rundhē̠ śirō̠ vā ē̠ta-dya̠jñasya̠ yadā̍ghā̠ra ā̠tmā pa̠śurā̍ghā̠ramā̠ghārya̍ pa̠śugṃ sama̍naktyā̠tmannē̠va ya̠jñasya̠ [ya̠jñasya̍, śira̠ḥ prati̍ dadhāti̠] 38

śira̠ḥ prati̍ dadhāti̠ sa-ntē̎ prā̠ṇō vā̠yunā̍ gachChatā̠mityā̍ha vāyudēva̠tyō̍ vai prā̠ṇō vā̠yāvē̠vāsya̍ prā̠ṇa-ñju̍hōti̠ saṃ yaja̍trai̠raṅgā̍ni̠ saṃ ya̠jñapa̍tirā̠śiṣētyā̍ha ya̠jñapa̍timē̠vāsyā̠-”śiṣa̍-ṅgamayati vi̠śvarū̍pō̠ vai tvā̠ṣṭra u̠pari̍ṣṭā-tpa̠śuma̠bhya̍vamī̠-ttasmā̍-du̠pari̍ṣṭā-tpa̠śōrnāva̍ dyanti̠ yadu̠pari̍ṣṭā-tpa̠śugṃ sa̍ma̠nakti̠ mēddhya̍mē̠vai- [mēddhya̍mē̠va, ē̠na̠-ṅka̠rō̠tyṛ̠tvijō̍] 39

-na̍-ṅkarōtyṛ̠tvijō̍ vṛṇītē̠ Chandāg̍syē̠va vṛ̍ṇītē sa̠pta vṛ̍ṇītē sa̠pta grā̠myāḥ pa̠śava̍-ssa̠ptā-”ra̠ṇyā-ssa̠pta Chandāg̍syu̠bhaya̠syā va̍ruddhyā̠ ēkā̍daśa prayā̠jān. ya̍jati̠ daśa̠ vai pa̠śōḥ prā̠ṇā ā̠tmaikā̍da̠śō yāvā̍nē̠va pa̠śusta-mpra ya̍jati va̠pāmēka̠ḥ pari̍ śaya ā̠tmaivā-”tmāna̠-mpari̍ śayē̠ vajrō̠ vai svadhi̍ti̠rvajrō̍ yūpaśaka̠lō ghṛ̠ta-ṅkhalu̠ vai dē̠vā vajra̍-ṅkṛ̠tvā sōma̍maghna-nghṛ̠tēnā̠ktau pa̠śu-ntrā̍yēthā̠mityā̍ha̠ vajrē̍ṇai̠vaina̠ṃ vaśē̍ kṛ̠tvā-”la̍bhatē ॥ 40 ॥
(ā̠ghā̠raṃ – pa̍dyantē̠ dvāda̍śā̠ – ”tmannē̠va ya̠jñasya̠ – mēdhya̍mē̠va – khalu̠ vā – a̠ṣṭāda̍śa cha) (a. 7)

parya̍gni karōti sarva̠huta̍mē̠vaina̍-ṅkarō̠tya-ska̍ndā̠yā-ska̍nna̠gṃ̠ hi ta-dya-ddhu̠tasya̠ skanda̍ti̠ triḥ parya̍gni karōti̠ tryā̍vṛ̠ddhi ya̠jñō-‘thō̠ rakṣa̍sā̠mapa̍hatyai brahmavā̠dinō̍ vadantyanvā̠rabhya̍ḥ pa̠śū(3)-rnānvā̠rabhyā(3) iti̍ mṛ̠tyavē̠ vā ē̠ṣa nī̍yatē̠ ya-tpa̠śustaṃ yada̍nvā̠rabhē̍ta pra̠māyu̍kō̠ yaja̍māna-ssyā̠dathō̠ khalvā̍hu-ssuva̠rgāya̠ vā ē̠ṣa lō̠kāya̍ nīyatē̠ ya- [yat, pa̠śuriti̠] 41

-tpa̠śuriti̠ yannānvā̠rabhē̍ta suva̠rgāllō̠kā-dyaja̍mānō hīyēta vapā̠śrapa̍ṇībhyā-ma̠nvāra̍bhatē̠ tannēvā̠nvāra̍bdha̠-nnēvāna̍nvārabdha̠mupa̠ prēṣya̍ hōtar​ha̠vyā dē̠vēbhya̠ ityā̍hēṣi̠tagṃ hi karma̍ kri̠yatē̠ rēva̍tīrya̠jñapa̍ti-mpriya̠dhā ”vi̍śa̠tētyā̍ha yathāya̠jurē̠vaitada̠gninā̍ pu̠rastā̍dēti̠ rakṣa̍sā̠mapa̍hatyai pṛthi̠vyā-ssa̠pṛñcha̍ḥ pā̠hīti̍ ba̠r̠hi- [ba̠r̠hiḥ, upā̎-‘sya̠tya-ska̍ndā̠yā-] 42

-rupā̎-‘sya̠tya-ska̍ndā̠yā-ska̍nna̠gṃ̠ hi ta-dya-dba̠r̠hiṣi̠ skanda̠tyathō̍ bar​hi̠ṣada̍mē̠vaina̍-ṅkarōti̠ parā̠ṃā va̍rtatē-‘ddhva̠ryuḥ pa̠śō-ssa̎jña̠mpyamā̍nā-tpa̠śubhya̍ ē̠va tanni hnu̍ta ā̠tmanō-‘nā̎vraskāya̠ gachCha̍ti̠ śriya̠-mpra pa̠śūnā̎pnōti̠ ya ē̠vaṃ vēda̍ pa̠śchāllō̍kā̠ vā ē̠ṣā prāchyu̠dānī̍yatē̠ ya-tpatnī̠ nama̍sta ātā̠nētyā̍hā-”di̠tyasya̠ vai ra̠śmaya̍ [ra̠śmaya̍ḥ, ā̠tā̠nāstēbhya̍] 43

ātā̠nāstēbhya̍ ē̠va nama̍skarōtyana̠rvā prēhītyā̍ha̠ bhrātṛ̍vyō̠ vā arvā̠ bhrātṛ̍vyāpanuttyai ghṛ̠tasya̍ ku̠lyāmanu̍ sa̠ha pra̠jayā̍ sa̠ha rā̠yaspōṣē̠ṇē-tyā̍hā̠ ”śiṣa̍mē̠vaitāmā śā̎sta̠ āpō̍ dēvī-śśuddhāyuva̠ ityā̍ha yathāya̠jurē̠vaitat ॥ 44 ॥
(lō̠kāya̍ nīyatē̠ ya-d- ba̠ra̠.hī – ra̠śmaya̍ḥ – sa̠ptatrigṃ̍śachcha) (a. 8)

pa̠śōrvā āla̍bdhasya prā̠ṇāñChugṛ̍chChati̠ vākta̠ ā pyā̍yatā-mprā̠ṇasta̠ ā pyā̍yatā̠mityā̍ha prā̠ṇēbhya̍ ē̠vāsya̠ śuchagṃ̍ śamayati̠ sā prā̠ṇēbhyō-‘dhi̍ pṛthi̠vīgṃ śu-kpra vi̍śati̠ śamahō̎bhyā̠miti̠ ni na̍yatyahōrā̠trābhyā̍mē̠va pṛ̍thi̠vyai śuchagṃ̍ śamaya̠tyōṣa̍dhē̠ trā̍yasvaina̠gg̠ svadhi̍tē̠ mainagṃ̍ higṃsī̠rityā̍ha̠ vajrō̠ vai svadhi̍ti̠- [svadhi̍tiḥ, śāntyai̍ pār​śva̠ta] 45

-śśāntyai̍ pār​śva̠ta ā chChya̍ti maddhya̠tō hi ma̍nu̠ṣyā̍ ā̠ chChyanti̍ tira̠śchīna̠mā chChya̍tyanū̠chīna̠gṃ̠ hi ma̍nu̠ṣyā̍ ā̠chChyanti̠ vyāvṛ̍ttyai̠ rakṣa̍sā-mbhā̠gō̍-‘sīti̍ sthavima̠tō ba̠r̠hira̠ktvā-‘pā̎syatya̠snaiva rakṣāgṃ̍si ni̠rava̍dayata i̠dama̠hagṃ rakṣō̍-‘dha̠ma-ntamō̍ nayāmi̠ yō̎-‘smā-ndvēṣṭi̠ ya-ñcha̍ va̠ya-ndvi̠ṣma ityā̍ha̠ dvau vāva puru̍ṣau̠ ya-ñchai̠va [ ] 46

dvēṣṭi̠ yaśchai̍na̠-ndvēṣṭi̠ tāvu̠bhāva̍dha̠ma-ntamō̍ nayatī̠ṣē tvēti̍ va̠pāmutkhi̍datī̠chChata̍ iva̠ hyē̍ṣa yō yaja̍tē̠ yadu̍patṛ̠ndyā-dru̠drō̎-‘sya pa̠śū-nghātu̍ka-ssyā̠-dyannōpa̍tṛ̠ndyā-daya̍tā syā-da̠nyayō̍patṛ̠ṇattya̠nyayā̠ na dhṛtyai̍ ghṛ̠tēna̍ dyāvāpṛthivī̠ prōrṇvā̍thā̠mityā̍ha̠ dyāvā̍pṛthi̠vī ē̠va rasē̍nāna̠ktyachChi̍nnō̠ [rasē̍nāna̠ktyachChi̍nnaḥ, rāya̍-ssu̠vīra̠] 47

rāya̍-ssu̠vīra̠ ityā̍ha yathāya̠jurē̠vaita-tkrū̠rami̍va̠ vā ē̠ta-tka̍rōti̠ ya-dva̠pā-mu̍tkhi̠da-tyu̠rva̍ntari̍kṣa̠-manvi̠hītyā̍ha̠ śāntyai̠ pra vā ē̠ṣō̎-‘smāllō̠kāchchya̍vatē̠ yaḥ pa̠śu-mmṛ̠tyavē̍ nī̠yamā̍namanvā̠rabha̍tē vapā̠śrapa̍ṇī̠ puna̍ra̠nvāra̍bhatē̠-‘sminnē̠va lō̠kē prati̍ tiṣṭhatya̠gninā̍ pu̠rastā̍dēti̠ rakṣa̍sā̠mapa̍hatyā̠ athō̍ dē̠vatā̍ ē̠va ha̠vyēnā- [ē̠va ha̠vyēna̍, anvē̍ti̠] 48

-nvē̍ti̠ nānta̠mamaṅgā̍ra̠mati̍ harē̠-dyada̍nta̠mamaṅgā̍ramati̠ harē̎-ddē̠vatā̠ ati̍ manyēta̠ vāyō̠ vīhi̍ stō̠kānā̠mityā̍ha̠ tasmā̠-dvibha̍ktā-sstō̠kā ava̍ padya̠ntē-‘gra̠ṃ vā ē̠ta-tpa̍śū̠nāṃ ya-dva̠pā-‘gra̠mōṣa̍dhīnā-mba̠r̠hiragrē̍ṇai̠vāgra̠gṃ̠ sama̍rdhaya̠tyathō̠ ōṣa̍dhīṣvē̠va pa̠śū-nprati̍ṣṭhāpayati̠ svāhā̍kṛtībhya̠ḥ prēṣyētyā̍ha [ ] 49

ya̠jñasya̠ sami̍ṣṭyai prāṇāpā̠nau vā ē̠tau pa̍śū̠nāṃ ya-tpṛ̍ṣadā̠jyamā̠tmā va̠pā pṛ̍ṣadā̠jyama̍bhi̠ghārya̍ va̠pāma̠bhi ghā̍rayatyā̠tmannē̠va pa̍śū̠nā-mprā̍ṇāpā̠nau da̍dhāti̠ svāhō̠rdhvana̍bhasa-mmāru̠ta-ṅga̍chChata̠mityā̍hō̠rdhvana̍bhā ha sma̠ vai mā̍ru̠tō dē̠vānā̎ṃ vapā̠śrapa̍ṇī̠ pra ha̍rati̠ tēnai̠vainē̠ pra ha̍rati̠ viṣū̍chī̠ pra ha̍rati̠ tasmā̠-dviṣva̍ñchau prāṇāpā̠nau ॥ 50 ॥
(svadhi̍ti – śchai̠vā – chChi̍nnō – ha̠vyēnē̠ – ṣyētyā̍ha̠ – ṣaṭcha̍tvārigṃśachcha) (a. 9)

pa̠śumā̠labhya̍ purō̠ḍāśa̠-nnirva̍pati̠ samē̍dhamē̠vaina̠mā la̍bhatē va̠payā̎ pra̠charya̍ purō̠ḍāśē̍na̠ pra cha̍ra̠tyūrgvai pu̍rō̠ḍāśa̠ ūrja̍mē̠va pa̍śū̠nā-mma̍ddhya̠tō da̍dhā̠tyathō̍ pa̠śōrē̠va Chi̠dramapi̍ dadhāti pṛṣadā̠jyasyō̍pa̠hatya̠ triḥ pṛ̍chChati śṛ̠tagṃ ha̠vī(3)-śśa̍mita̠riti̠ triṣa̍tyā̠ hi dē̠vā yō-‘śṛ̍tagṃ śṛ̠tamāha̠ sa ēna̍sā prāṇāpā̠nau vā ē̠tau pa̍śū̠nāṃ- [ē̠tau pa̍śū̠nām, ya-tpṛ̍ṣadā̠jya-mpa̠śōḥ] 51

-ँya-tpṛ̍ṣadā̠jya-mpa̠śōḥ khalu̠ vā āla̍bdhasya̠ hṛda̍yamā̠tmā-‘bhi samē̍ti̠ ya-tpṛ̍ṣadā̠jyēna̠ hṛda̍ya-mabhighā̠raya̍tyā̠tmannē̠va pa̍śū̠nā-mprā̍ṇāpā̠nau da̍dhāti pa̠śunā̠ vai dē̠vā-ssu̍va̠rgaṃ lō̠kamā̍ya̠-ntē̍-‘manyanta manu̠ṣyā̍ nō̠-‘nvābha̍viṣya̠ntīti̠ tasya̠ śira̍-śChi̠ttvā mēdha̠-mprākṣā̍raya̠n​thsa pra̠kṣō̍-‘bhava̠-tta-tpra̠kṣasya̍ prakṣa̠tvaṃ ya-tpla̍kṣaśā̠khō-tta̍raba̠r̠hi-rbhava̍ti̠ samē̍dhasyai̠va [ ] 52

pa̠śōrava̍ dyati pa̠śuṃ vai hri̠yamā̍ṇa̠gṃ̠ rakṣā̠g̠syanu̍ sachantē-‘nta̠rā yūpa̍-ñchā-”hava̠nīya̍-ñcha harati̠ rakṣa̍sā̠mapa̍hatyai pa̠śōrvā āla̍bdhasya̠ manō-‘pa̍ krāmati ma̠nōtā̍yai ha̠viṣō̍-‘vadī̠yamā̍na̠syānu̍ brū̠hītyā̍ha̠ mana̍ ē̠vāsyāva̍ rundha̠ ēkā̍daśāva̠dānā̠nyava̍ dyati̠ daśa̠ vai pa̠śōḥ prā̠ṇā ā̠tmaikā̍da̠śō yāvā̍nē̠va pa̠śustasyā-‘va̍- [pa̠śustasyā-‘va̍, dya̠ti̠ hṛda̍ya̠syā-] 53

-dyati̠ hṛda̍ya̠syā-grē-‘va̍ dya̠tyatha̍ ji̠hvāyā̠ atha̠ vakṣa̍sō̠ yadvai hṛda̍yēnābhi̠gachCha̍ti̠ tajji̠hvayā̍ vadati̠ yajji̠hvayā̠ vada̍ti̠ tadura̠sō-‘dhi̠ nirva̍datyē̠tadvai pa̠śōrya̍thāpū̠rvaṃ yasyai̠vama̍va̠dāya̍ yathā̠kāma̠-mutta̍rēṣāmava̠dyati̍ yathā pū̠rvamē̠vāsya̍ pa̠śōrava̍tta-mbhavati maddhya̠tō gu̠dasyāva̍ dyati maddhya̠tō hi prā̠ṇa u̍tta̠masyāva̍ dya- [u̍tta̠masyāva̍ dyati, u̠tta̠mō hi prā̠ṇō] 54

-tyutta̠mō hi prā̠ṇō yadīta̍ra̠ṃ yadīta̍ra-mu̠bhaya̍mē̠vājā̍mi̠ jāya̍mānō̠ vai brā̎hma̠ṇa-stri̠bhir-ṛ̍ṇa̠vā jā̍yatē brahma̠charyē̠ṇar​ṣi̍bhyō ya̠jñēna̍ dē̠vēbhya̍ḥ pra̠jayā̍ pi̠tṛbhya̍ ē̠ṣa vā a̍nṛ̠ṇō yaḥ pu̠trī yajvā̎ brahmachārivā̠sī tada̍va̠dānai̍-rē̠vā-‘va̍ dayatē̠ tada̍va̠dānā̍nā-mavadāna̠tva-ndē̍vāsu̠rā-ssaṃya̍ttā āsa̠-ntē dē̠vā a̠gnima̍bruva̠-ntvayā̍ vī̠rēṇāsu̍rāna̠bhi bha̍vā̠mēti̠ [bha̍vā̠mēti̍, sō̎-‘bravī̠-dvara̍ṃ vṛṇai] 55

sō̎-‘bravī̠-dvara̍ṃ vṛṇai pa̠śōru̍ddhā̠ramuddha̍rā̠ iti̠ sa ē̠tamu̍ddhā̠ramuda̍harata̠ dōḥ pū̎rvā̠rdhasya̍ gu̠da-mma̍ddhya̠ta-śśrōṇi̍-ñjaghanā̠rdhasya̠ tatō̍ dē̠vā abha̍va̠-nparā-‘su̍rā̠ ya-ttrya̠ṅgāṇāgṃ̍ samava̠dyati̠ bhrātṛ̍vyābhibhūtyai̠ bhava̍tyā̠tmanā̠ parā̎-‘sya̠ bhrātṛ̍vyō bhavatyakṣṇa̠yā-‘va̍ dyati̠ tasmā̍dakṣṇa̠yā pa̠śavō-‘ṅgā̍ni̠ pra ha̍ranti̠ prati̍ṣṭhityai ॥ 56 ॥
(ē̠tau pa̍śū̠nāgṃ – samē̍dhasyai̠va – tasyā-‘vō̎ – tta̠masyāva̍ dya̠tī – ti̠ – pañcha̍chatvārigṃśachcha) (a. 10)

mēda̍sā̠ sruchau̠ prōrṇō̍ti̠ mēdō̍rūpā̠ vai pa̠śavō̍ rū̠pamē̠va pa̠śuṣu̍ dadhāti yū̠ṣanna̍va̠dhāya̠ prōrṇō̍ti̠ rasō̠ vā ē̠ṣa pa̍śū̠nāṃ yadyū rasa̍mē̠va pa̠śuṣu̍ dadhāti pā̠r​śvēna̍ vasāhō̠ma-mprayau̍ti̠ maddhya̠ṃ vā ē̠ta-tpa̍śū̠nāṃ ya-tpā̠r​śvagṃ rasa̍ ē̠ṣa pa̍śū̠nāṃ yadvasā̠ ya-tpā̠r​śvēna̍ vasāhō̠ma-mpra̠yauti̍ maddhya̠ta ē̠va pa̍śū̠nāgṃ rasa̍-ndadhāti̠ ghnanti̠ [ghnanti̍, vā ē̠ta-tpa̠śu-] 57

vā ē̠ta-tpa̠śuṃ ya-thsa̎jña̠mpaya̍ntyai̠ndraḥ khalu̠ vai dē̠vata̍yā prā̠ṇa ai̠ndrō̍-‘pā̠na ai̠ndraḥ prā̠ṇō aṅgē̍aṅgē̠ ni dē̎ddhya̠dityā̍ha prāṇāpā̠nāvē̠va pa̠śuṣu̍ dadhāti̠ dēva̍ tvaṣṭa̠rbhūri̍ tē̠ sagṃ sa̍mē̠tvityā̍ha tvā̠ṣṭrā hi dē̠vata̍yā pa̠śavō̠ viṣu̍rūpā̠ ya-thsala̍kṣmāṇō̠ bhava̠thētyā̍ha̠ viṣu̍rūpā̠ hyē̍tē santa̠-ssala̍kṣmāṇa ē̠tar​hi̠ bhava̍nti dēva̠trā yanta̠- [dēva̠trā yanta̎m, ava̍sē̠] 58

-mava̍sē̠ sakhā̠yō-‘nu̍ tvā mā̠tā pi̠tarō̍ mada̠ntvityā̠hā-nu̍matamē̠vaina̍-mmā̠trā pi̠trā su̍va̠rgaṃ lō̠ka-ṅga̍mayatyardha̠rchē va̍sāhō̠ma-ñju̍hōtya̠sau vā a̍rdha̠rcha i̠yama̍rdha̠rcha i̠mē ē̠va rasē̍nānakti̠ diśō̍ juhōti̠ diśa̍ ē̠va rasē̍nāna̠ktyathō̍ di̠gbhya ē̠vōrja̠gṃ̠ rasa̠mava̍ rundhē prāṇāpā̠nau vā ē̠tau pa̍śū̠nāṃ ya-tpṛ̍ṣadā̠jyaṃ vā̍naspa̠tyāḥ khalu̠ [khalu̍, vai dē̠vata̍yā pa̠śavō̠] 59

vai dē̠vata̍yā pa̠śavō̠ ya-tpṛ̍ṣadā̠jyasyō̍-pa̠hatyā-”ha̠ vana̠spata̠yē-‘nu̍ brūhi̠ vana̠spata̍yē̠ prēṣyēti̍ prāṇāpā̠nāvē̠va pa̠śuṣu̍ dadhātya̠nyasyā̎nyasya samava̠ttagṃ sa̠mava̍dyati̠ tasmā̠nnānā̍rūpāḥ pa̠śavō̍ yū̠ṣṇōpa̍ siñchati̠ rasō̠ vā ē̠ṣa pa̍śū̠nāṃ yadyū rasa̍mē̠va pa̠śuṣu̍ dadhā̠tīḍā̠mupa̍ hvayatē pa̠śavō̠ vā iḍā̍ pa̠śūnē̠vōpa̍ hvayatē cha̠turupa̍ hvayatē̠ [cha̠turupa̍ hvayatē, chatu̍ṣpādō̠ hi] 60

chatu̍ṣpādō̠ hi pa̠śavō̠ ya-ṅkā̠mayē̍tā pa̠śu-ssyā̠ditya̍mē̠daska̠-ntasmā̠ ā da̍ddhyā̠nmēdō̍rūpā̠ vai pa̠śavō̍ rū̠pēṇai̠vaina̍-mpa̠śubhyō̠ nirbha̍jatyapa̠śurē̠va bha̍vati̠ ya-ṅkā̠mayē̍ta paśu̠mān-thsyā̠diti̠ mēda̍sva̠-ttasmā̠ ā da̍ddhyā̠nmēdō̍rūpā̠ vai pa̠śavō̍ rū̠pēṇai̠vāsmai̍ pa̠śūnava̍ rundhē paśu̠mānē̠va bha̍vati pra̠jāpa̍tirya̠jñama̍sṛjata̠ sa ājya̍- [sa ājya̎m, pu̠rastā̍dasṛjata] 61

-mpu̠rastā̍dasṛjata pa̠śu-mma̍ddhya̠taḥ pṛ̍ṣadā̠jya-mpa̠śchā-ttasmā̠dājyē̍na prayā̠jā i̍jyantē pa̠śunā̍ maddhya̠taḥ pṛ̍ṣadā̠jyēnā̍-nūyā̠jā-stasmā̍dē̠tanmi̠śrami̍va paśchā-thsṛ̠ṣṭagg​ hyēkā̍daśānūyā̠jān. ya̍jati̠ daśa̠ vai pa̠śōḥ prā̠ṇā ā̠tmaikā̍da̠śō yāvā̍nē̠va pa̠śustamanu̍ yajati̠ ghnanti̠ vā ē̠ta-tpa̠śuṃ ya-thsa̎m(2)jña̠paya̍nti vā prāṇāpā̠nau khalu̠ vā ē̠tau pa̍śū̠nāṃ ya-tpṛ̍ṣadā̠jyaṃ ya-tpṛ̍ṣadā̠jyēnā̍ nūyā̠jān. yaja̍ti prāṇāpā̠nāvē̠va pa̠śuṣu̍ dadhāti ॥ 62 ॥
(ghnanti̠ – yanta̠ṃ – khalu̍ – cha̠turupa̍ hvayata̠ – ājya̠ṃ – ँya-tpṛ̍ṣadā̠jyēna̠ – ṣaṭ cha̍) (a. 11)

(chātvā̍lāth – suva̠rgāya̠ ya-dvai̍sarja̠nāni̍ – vaiṣṇa̠vyarchā – pṛ̍thi̠vyai – sā̠dhyā – i̠ṣē tvē – tya̠gninā̠ – parya̍gni – pa̠śōḥ – pa̠śumā̠labhya̠ – mēda̍sā̠ sruchā̠ – vēkā̍daśa)

(chātvā̍lā-d- dē̠vānu̠paiti̍ – muñchati – prahri̠yamā̍ṇāya̠ – parya̍gni – pa̠śumā̠labhya̠ – chatu̍ṣpādō̠ – dviṣa̍ṣṭiḥ)

(chātvā̍lā, tpa̠śuṣu̍ dadhāti)

॥ hari̍ḥ ōm ॥

॥ kṛṣṇa yajurvēdīya taittirīya saṃhitāyāṃ ṣaṣṭhakāṇḍē tṛtīyaḥ praśna-ssamāptaḥ ॥