KYTS 6.1 Praacheenavagm Sankaroti – Krishna Yajurveda Taittiriya Samhita Patha

kṛṣṇa yajurvēdīya taittirīya saṃhitāyāṃ ṣaṣṭhakāṇḍē prathamaḥ praśnaḥ – sōmamantrabrāhmaṇanirūpaṇaṃ

ō-nnamaḥ paramātmanē, śrī mahāgaṇapatayē namaḥ,
śrī gurubhyō namaḥ । ha̠ri̠ḥ ōm ॥

prā̠chīna̍vagṃśa-ṅkarōti dēvamanu̠ṣyā diśō̠ vya̍bhajanta̠ prāchī̎-ndē̠vā da̍kṣi̠ṇā pi̠tara̍ḥ pra̠tīchī̎-mmanu̠ṣyā̍ udī̍chīgṃ ru̠drā ya-tprā̠chīna̍vagṃśa-ṅka̠rōti̍ dēvalō̠kamē̠va ta-dyaja̍māna u̠pāva̍rtatē̠ pari̍ śrayatya̠ntar​hi̍tō̠hi dē̍valō̠kō ma̍nuṣyalō̠kā-nnāsmāllō̠kā-thsvē̍tavyami̠vētyā̍hu̠ḥ kō hi ta-dvēda̠ ya-dya̠muṣmi̍ँllō̠kē-‘sti̍ vā̠ na vēti̍ di̠kṣva̍tī kā̠śān ka̍rō- [di̠kṣva̍tī kā̠śān ka̍rōti, u̠bhayō̎] 1

-tyu̠bhayō̎-rlō̠kayō̍-ra̠bhiji̍tyai kēśaśma̠śru va̍patē na̠khāni̠ ni kṛ̍ntatē mṛ̠tā vā ē̠ṣā tvaga̍mē̠ddhyā ya-tkē̍śaśma̠śru mṛ̠tāmē̠va tvacha̍ma-mē̠ddhyāma̍pa̠hatya̍ ya̠jñiyō̍ bhū̠tvā mēdha̠mupai̠tyaṅgi̍rasa-ssuva̠rgaṃ lō̠kaṃ yantō̠-‘phsu dī̎kṣāta̠pasī̠ prāvē̍śayanna̠phsu snā̍ti sā̠kṣādē̠va dī̎kṣāta̠pasī̠ ava̍ rundhē tī̠rthē snā̍ti tī̠rthē hi tē tā-mprāvē̍śaya-ntī̠rthē snā̍ti [ ] 2

tī̠rthamē̠va sa̍mā̠nānā̎-mbhavatya̠pō̎-‘śñātyantara̠ta ē̠va mēddhyō̍ bhavati̠ vāsa̍sā dīkṣayati sau̠myaṃ vai kṣauma̍-ndē̠vata̍yā̠ sōma̍mē̠ṣa dē̠vatā̠mupai̍ti̠ yō dīkṣa̍tē̠ sōma̍sya ta̠nūra̍si ta̠nuva̍-mmē pā̠hītyā̍ha̠ svāmē̠va dē̠vatā̠mupai̠tyathō̍ ā̠śiṣa̍mē̠vaitāmā śā̎stē̠ ‘gnēstū̍ṣā̠dhāna̍ṃ vā̠yōrvā̍ta̠pāna̍-mpitṛ̠ṇā-nnī̠vi-rōṣa̍dhīnā-mpraghā̠ta [-rōṣa̍dhīnā-mpraghā̠taḥ, ā̠di̠tyānā̎-mprāchīnatā̠nō] 3

ā̍di̠tyānā̎-mprāchīnatā̠nō viśvē̍ṣā-ndē̠vānā̠mōtu̠ rnakṣa̍trāṇā-matīkā̠śāstadvā ē̠ta-thsa̍rva dēva̠tya̍ṃ ya-dvāsō̠ ya-dvāsa̍sā dī̠kṣaya̍ti̠ sarvā̍bhirē̠vaina̍-ndē̠vatā̍bhi-rdīkṣayati ba̠hiḥprā̍ṇō̠ vai ma̍nu̠ṣya̍sta-syāśa̍na-mprā̠ṇō̎-‘śñāti̠ saprā̍ṇa ē̠va dī̎kṣata̠ āśi̍tō bhavati̠ yāvā̍nē̠vāsya̍ prā̠ṇastēna̍ sa̠ha mēdha̠mupai̍ti ghṛ̠ta-ndē̠vānā̠-mmastu̍ pitṛ̠ṇā-nniṣpa̍kva-mmanu̠ṣyā̍ṇā̠-ntadvā [-mmanu̠ṣyā̍ṇā̠-ntadvai, ē̠ta-thsa̍rvadēva̠tya̍ṃ] 4

ē̠ta-thsa̍rvadēva̠tya̍ṃ yannava̍nīta̠ṃ yannava̍nītēnābhya̠ṅktē sarvā̍ ē̠va dē̠vatā̎ḥ prīṇāti̠ prachyu̍tō̠ vā ē̠ṣō̎-‘smāllō̠kādaga̍tō dēvalō̠kaṃ yō dī̎kṣi̠tō̎ ‘nta̠rēva̠ nava̍nīta̠-ntasmā̠-nnava̍nītēnā̠bhya̍ṅktē ‘nulō̠maṃ yaju̍ṣā̠ vyāvṛ̍ttyā̠ indrō̍ vṛ̠trama̍ha̠-ntasya̍ ka̠nīni̍kā̠ parā̍-‘pata̠-ttadāñja̍nama-bhava̠dyadā̠ṅktē chakṣu̍rē̠va bhrātṛ̍vyasya vṛṅktē̠ dakṣi̍ṇa̠-mpūrva̠mā-‘ṅktē̍ [dakṣi̍ṇa̠-mpūrva̠mā-‘ṅktē̎, sa̠vyagṃ hi] 5

sa̠vyagṃ hi pūrva̍-mmanu̠ṣyā̍ ā̠ñjatē̠ na ni dhā̍vatē̠ nīva̠ hi ma̍nu̠ṣyā̍ dhāva̍ntē̠ pañcha̠ kṛtva̠ ā-‘ṅktē̠ pañchā̎kṣarā pa̠ṅktiḥ pāṅktō̍ ya̠jñō ya̠jñamē̠vāva̍ rundhē̠ pari̍mita̠māṅktē ‘pa̍rimita̠gṃ̠ hi ma̍nu̠ṣyā̍ ā̠ñjatē̠ satū̍la̠yā-”ṅktē- ‘pa̍tūlayā̠ hi ma̍nu̠ṣyā̍ ā̠ñjatē̠ vyāvṛ̍ttyai̠ yadapa̍tūlayāñjī̠ta vajra̍ iva syā̠-thsatū̍la̠yā-”ṅktē̍ mitra̠tvāyē- [mitra̠tvāya̍, indrō̍] 6

-ndrō̍ vṛ̠trama̍ha̠n​thsō̎-‘(1̠)pō̎-‘(1̠)bhya̍-mriyata̠ tāsā̠ṃ yanmēddhya̍ṃ ya̠jñiya̠gṃ̠ sadē̍va̠māsī̠-ttada̠pōda̍krāma̠-ttē da̠rbhā a̍bhava̠n̠. yadda̍rbhapuñjī̠laiḥ pa̠vaya̍ti̠ yā ē̠va mēddhyā̍ ya̠jñiyā̠-ssadē̍vā̠ āpa̠stābhi̍rē̠vaina̍-mpavayati̠ dvābhyā̎-mpavayatya-hōrā̠trābhyā̍mē̠vaina̍-mpavayati tri̠bhiḥ pa̍vayati̠ traya̍ i̠mē lō̠kā ē̠bhirē̠vaina̍ṃ lō̠kaiḥ pa̍vayati pa̠ñchabhi̍ḥ [pa̠ñchabhi̍ḥ, pa̠va̠ya̠ti̠ pañchā̎kṣarā] 7

pavayati̠ pañchā̎kṣarā pa̠ṅktiḥ pāṅktō̍ ya̠jñō ya̠jñāyai̠vaina̍-mpavayati ṣa̠ḍbhiḥ pa̍vayati̠ ṣaḍvā ṛ̠tava̍ ṛ̠tubhi̍rē̠vaina̍-mpavayati sa̠ptabhi̍ḥ pavayati sa̠pta Chandāgṃ̍si̠ Chandō̍bhirē̠vaina̍-mpavayati na̠vabhi̍ḥ pavayati̠ nava̠ vai puru̍ṣē prā̠ṇā-ssaprā̍ṇamē̠vaina̍-mpavaya̠tyēka̍vigṃśatyā pavayati̠ daśa̠ hastyā̍ a̠ṅgula̍yō̠ daśa̠ padyā̍ ā̠tmaika̍vi̠gṃ̠śō yāvā̍nē̠va puru̍ṣa̠sta-mapa̍rivarga- [puru̍ṣa̠sta-mapa̍rivargam, pa̠va̠ya̠ti̠ chi̠tpati̍stvā] 8

-mpavayati chi̠tpati̍stvā punā̠tvityā̍ha̠ manō̠ vai chi̠tpati̠rmana̍sai̠vaina̍-mpavayati vā̠kpati̍stvā punā̠tvityā̍ha vā̠chaivaina̍-mpavayati dē̠vastvā̍ savi̠tā pu̍nā̠tvityā̍ha savi̠tṛpra̍sūta ē̠vaina̍-mpavayati̠ tasya̍ tē pavitrapatē pa̠vitrē̍ṇa̠ yasmai̠ ka-mpu̠nē tachCha̍kēya̠mityā̍-hā̠-”śiṣa̍mē̠vaitāmā śā̎stē ॥ 9 ॥
(a̠tī̠kā̠śān ka̍rō̠tya – vē̍śaya-nti̠rtha snā̍ti – praghā̠tō – ma̍nu̠ṣyā̍ṇā̠-ntadvā – ā-‘ṅktē̍ – mitra̠tvāya̍ – pa̠ñchabhi̠ – rapa̍rivarga – ma̠ṣṭācha̍tvārigṃśachcha) (a. 1)

yāva̍ntō̠ vai dē̠vā ya̠jñāyāpu̍nata̠ ta ē̠vābha̍va̠n̠. ya ē̠vaṃ vi̠dvān. ya̠jñāya̍ punī̠tē bhava̍tyē̠va ba̠hiḥ pa̍vayi̠tvā-‘ntaḥ pra pā̍dayati manuṣyalō̠ka ē̠vaina̍-mpavayi̠tvā pū̠ta-ndē̍valō̠ka-mpra ṇa̍ya̠tyadī̎kṣita̠ ēka̠yā-”hu̠tyētyā̍hu-ssru̠vēṇa̠ chata̍srō juhōti dīkṣita̠tvāya̍ sru̠chā pa̍ñcha̠mī-mpañchā̎kṣarā pa̠ṅktiḥ pāṅktō̍ ya̠jñō ya̠jñamē̠vāva̍ rundha̠ ākū̎tyai pra̠yujē̠-‘gnayē̠ [pra̠yujē̠-‘gnayē̎, svāhētyā̠hā] 10

svāhētyā̠hā-”kū̎tyā̠ hi puru̍ṣō ya̠jñama̠bhi pra̍yu̠ṅktē yajē̠yēti̍ mē̠dhāyai̠ mana̍sē̠-‘gnayē̠ svāhētyā̍ha mē̠dhayā̠ hi mana̍sā̠ puru̍ṣō ya̠jñama̍bhi̠gachCha̍ti̠ sara̍svatyai pū̠ṣṇē̎-‘gnayē̠ svāhētyā̍ha̠ vāgvai sara̍svatī pṛthi̠vī pū̠ṣā vā̠chaiva pṛ̍thi̠vyā ya̠jña-mprayu̍ṅkta̠ āpō̍ dēvī-rbṛhatī-rviśvaśambhuva̠ ityā̍ha̠ yā vai var​ṣyā̠stā [yā vai var​ṣyā̠stāḥ, āpō̍ dē̠vī-rbṛ̍ha̠tī-] 11

āpō̍ dē̠vī-rbṛ̍ha̠tī-rvi̠śvaśa̍bhuṃvō̠ yadē̠ta-dyaju̠rna brū̠yā-ddi̠vyā āpō-‘śā̎mtā i̠maṃ lō̠kamā ga̍chChēyu̠rāpō̍ dēvī-rbṛhatī-rviśvaśambhuva̠ ityā̍hā̠smā ē̠vainā̍ lō̠kāya̍ śamayati̠ tasmā̎chChā̠ntā i̠maṃ lō̠kamā ga̍chChanti̠ dyāvā̍pṛthi̠vī ityā̍ha̠ dyāvā̍pṛthi̠vyōr​hi ya̠jña u̠rva̍ntari̍kṣa̠-mityā̍hā̠ntari̍kṣē̠ hi ya̠jñō bṛha̠spati̍rnō ha̠viṣā̍ vṛdhā̠- [ha̠viṣā̍ vṛdhātu, ityā̍ha̠ brahma̠ vai] 12

-tvityā̍ha̠ brahma̠ vai dē̠vānā̠-mbṛha̠spati̠-rbrahma̍ṇai̠vāsmai̍ ya̠jñamava̍ rundhē̠ yad- brū̠yā-dvi̍dhē̠riti̍ yajñasthā̠ṇumṛ̍chChē-dvṛdhā̠tvityā̍ha yajñasthā̠ṇumē̠va pari̍ vṛṇakti pra̠jāpa̍ti-rya̠jñama̍sṛjata̠ sō̎-‘smā-thsṛ̠ṣṭaḥ parā̍ṃai̠-thsa pra yaju̠ravlī̍nā̠-tpra sāma̠ tamṛguda̍yachCha̠-dyadṛgu̠daya̍chCha̠-ttadau̎-dgraha̠ṇasyau̎-dgrahaṇa̠tva mṛ̠chā [mṛ̠chā, ju̠hō̠ti̠ ya̠jñasyōdya̍tyā] 13

ju̍hōti ya̠jñasyōdya̍tyā anu̠ṣṭup-Chanda̍sā̠-muda̍yachCha̠dityā̍-hu̠stasmā̍danu̠ṣṭubhā̍ juhōti ya̠jñasyōdya̍tyai̠ dvāda̍śa vāthsaba̠ndhānyuda̍yachCha̠-nnityā̍hu̠-stasmā̎d- dvāda̠śabhi̍-rvāthsabandha̠vidō̍ dīkṣayanti̠ sā vā ē̠ṣarga̍nu̠ṣṭug-vāga̍nu̠ṣṭug-yadē̠taya̠rchā dī̠kṣaya̍ti vā̠chaivaina̠gṃ̠ sarva̍yā dīkṣayati̠ viśvē̍ dē̠vasya̍ nē̠turityā̍ha sāvi̠tryē̍tēna̠ martō̍ vṛṇīta sa̠khya- [sa̠khyam, ityā̍ha] 14

-mityā̍ha pitṛdēva̠tyai̍tēna̠ viśvē̍ rā̠ya i̍ṣuddhya̠sītyā̍ha vaiśvadē̠vyē̍tēna̍ dyu̠mnaṃ vṛ̍ṇīta pu̠ṣyasa̠ ityā̍ha pau̠ṣṇyē̍tēna̠ sā vā ē̠ṣarkhsa̍rvadēva̠tyā̍ yadē̠taya̠rchā dī̠kṣaya̍ti̠ sarvā̍bhirē̠vaina̍-ndē̠vatā̍bhirdīkṣayati sa̠ptākṣa̍ra-mpratha̠ma-mpa̠dama̠ṣṭākṣa̍rāṇi̠ trīṇi̠ yāni̠ trīṇi̠ tānya̠ṣṭāvupa̍ yanti̠ yāni̍ cha̠tvāri̠ tānya̠ṣṭau yada̠ṣṭākṣa̍rā̠ tēna̍ [tēna̍, gā̠ya̠trī yadēkā̍daśākṣarā̠] 15

gāya̠trī yadēkā̍daśākṣarā̠ tēna̍ tri̠ṣṭugya-ddvāda̍śākṣarā̠ tēna̠ jaga̍tī̠ sā vā ē̠ṣarkhsarvā̍ṇi̠ Chandāgṃ̍si̠ yadē̠taya̠rchā dī̠kṣaya̍ti̠ sarvē̍bhirē̠vaina̠-ñChandō̍bhirdīkṣayati sa̠ptākṣa̍ra-mpratha̠ma-mpa̠dagṃ sa̠ptapa̍dā̠ śakva̍rī pa̠śava̠-śśakva̍rī pa̠śūnē̠vāva̍ rundha̠ ēka̍smāda̠kṣarā̠danā̎pta-mpratha̠ma-mpa̠da-ntasmā̠-dya-dvā̠chō-‘nā̎pta̠-ntanma̍nu̠ṣyā̍ upa̍ jīvanti pū̠rṇayā̍ juhōti pū̠rṇa i̍va̠ hi pra̠jāpa̍tiḥ pra̠jāpa̍tē̠rāptyai̠ nyū̍nayā juhōti̠ nyū̍nā̠ddhi pra̠jāpa̍tiḥ pra̠jā asṛ̍jata pra̠jānā̠gṃ̠ sṛṣṭyai̎ ॥ 16 ॥
(a̠gnayē̠ – tā – vṛ̍dhātvṛ̠ – chā – sa̠khyaṃ – tēna̍ – juhōti̠ – pañcha̍daśa cha) (a. 2)

ṛ̠-khsā̠mē vai dē̠vēbhyō̍ ya̠jñāyā-‘ti̍ṣṭhamānē̠ kṛṣṇō̍ rū̠pa-ṅkṛ̠tvā- ‘pa̠kramyā̍tiṣṭhatā̠-ntē̍-‘manyanta̠ yaṃ vā i̠mē u̍pāva̠rthsyata̠-ssa i̠da-mbha̍viṣya̠tīti̠ tē upā̍mantrayanta̠ tē a̍hōrā̠trayō̎-rmahi̠māna̍-mapani̠dhāya̍ dē̠vānu̠pāva̍rtētāmē̠ṣa vā ṛ̠chō varṇō̠ yachChu̠kla-ṅkṛ̍ṣṇāji̠nasyai̠ṣa sāmnō̠ ya-tkṛ̠ṣṇamṛ̍khsā̠mayō̠-śśilpē̎ stha̠ ityā̍harkhsā̠mē ē̠vā-‘va̍ rundha ē̠ṣa [ē̠vā-‘va̍ rundha ē̠ṣaḥ, vā ahnō̠] 17

vā ahnō̠ varṇō̠ yachChu̠kla-ṅkṛ̍ṣṇāji̠nasyai̠ṣa rātri̍yā̠ ya-tkṛ̠ṣṇaṃ yadē̠vaina̍yō̠statra̠ nya̍kta̠-ntadē̠vāva̍ rundhē kṛṣṇāji̠nēna̍ dīkṣayati̠ brahma̍ṇō̠ vā ē̠ta-drū̠paṃ ya-tkṛ̍ṣṇāji̠na-mbrahma̍ṇai̠vaina̍-ndīkṣayatī̠mā-ndhiya̠gṃ̠ śikṣa̍māṇasya dē̠vētyā̍ha yathāya̠jurē̠vaita-dgarbhō̠ vā ē̠ṣa ya-ddī̎kṣi̠ta ulba̠ṃ vāsa̠ḥ prōrṇu̍tē̠ tasmā̠- [tasmā̎t, garbhā̠ḥ prāvṛ̍tā] 18

-dgarbhā̠ḥ prāvṛ̍tā jāyantē̠ na pu̠rā sōma̍sya kra̠yādapō̎rṇvīta̠ ya-tpu̠rā sōma̍sya kra̠yāda̍pōrṇvī̠ta garbhā̎ḥ pra̠jānā̎-mparā̠pātu̍kā-ssyuḥ krī̠tē sōmē-‘pō̎rṇutē̠ jāya̍ta ē̠va tadathō̠ yathā̠ vasī̍yāgṃ sa-mpratyapōrṇu̠tē tā̠dṛgē̠va tadaṅgi̍rasa-ssuva̠rgaṃ lō̠kaṃ yanta̠ ūrja̠ṃ vya̍bhajanta̠ tatō̠ yada̠tyaśi̍ṣyata̠ tē śa̠rā a̍bhava̠nnūrgvai śa̠rā yachCha̍ra̠mayī̠ [yachCha̍ra̠mayī̎, mēkha̍lā̠] 19

mēkha̍lā̠ bhava̠tyūrja̍mē̠vāva̍ rundhē maddhya̠ta-ssanna̍hyati maddhya̠ta ē̠vāsmā̠ ūrja̍-ndadhāti̠ tasmā̎nmaddhya̠ta ū̠rjā bhu̍ñjata ū̠rdhvaṃ vai puru̍ṣasya̠ nābhyai̠ mēddhya̍-mavā̠chīna̍-mamē̠ddhyaṃ yanma̍ddhya̠ta-ssa̠naṃhya̍ti̠ mēddhya̍-ñchai̠vāsyā̍mē̠ddhya-ñcha̠ vyāva̍rtaya̠tīndrō̍ vṛ̠trāya̠ vajra̠-mprāha̍ra̠-thsa trē̠dhā vya̍bhava̠-thsphyastṛtī̍ya̠gṃ̠ ratha̠stṛtī̍ya̠ṃ yūpa̠stṛtī̍ya̠ṃ- [-yūpa̠stṛtī̍ya̠m, yē̎-‘nta-śśa̠rā] 20

-ँyē̎-‘nta-śśa̠rā aśī̎ryanta̠ tē śa̠rā a̍bhava̠-ntachCha̠rāṇāgṃ̍ śara̠tvaṃ vajrō̠ vai śa̠rāḥ, kṣu-tkhalu̠ vai ma̍nu̠ṣya̍sya̠ bhrātṛ̍vyō̠ yachCha̍ra̠mayī̠ mēkha̍lā̠ bhava̍ti̠ vajrē̍ṇai̠va sā̠kṣā-tkṣudha̠-mbhrātṛ̍vya-mmaddhya̠tō-‘pa̍ hatē tri̠vṛ-dbha̍vati tri̠vṛdvai prā̠ṇastri̠vṛta̍mē̠va prā̠ṇa-mma̍ddhya̠tō yaja̍mānē dadhāti pṛ̠thvī bha̍vati̠ rajjū̍nā̠ṃ vyāvṛ̍tyai̠ mēkha̍layā̠ yaja̍māna-ndīkṣayati̠ yōktrē̍ṇa̠ patnī̎-mmithuna̠tvāya̍ [ ] 21

ya̠jñō dakṣi̍ṇāma̠bhya̍ddhyāya̠-ttāgṃ sama̍bhava̠-ttadindrō̍-‘chāya̠-thsō̍-‘manyata̠ yō vā i̠tō ja̍ni̠ṣyatē̠ sa i̠da-mbha̍viṣya̠tīti̠ tā-mprāvi̍śa̠-ttasyā̠ indra̍ ē̠vājā̍yata̠ sō̍-‘manyata̠ yō vai madi̠tō ‘pa̍rō jani̠ṣyatē̠ sa i̠da-mbha̍viṣya̠tīti̠ tasyā̍ anu̠mṛśya̠ yōni̠mā-‘chChi̍na̠-thsā sū̠tava̍śā-‘bhava̠-tta-thsū̠tava̍śāyai̠ janma̠ [janma̍, tāgṃ hastē̠ nya̍vēṣṭayata̠] 22

tāgṃ hastē̠ nya̍vēṣṭayata̠ tā-mmṛ̠gēṣu̠ nya̍dadhā̠-thsā kṛ̍ṣṇaviṣā̠ṇā- ‘bha̍va̠dindra̍sya̠ yōni̍rasi̠ mā mā̍ higṃsī̠riti̍ kṛṣṇaviṣā̠ṇā-mpra ya̍chChati̠ sayō̍nimē̠va ya̠jña-ṅka̍rōti̠ sayō̍ni̠-ndakṣi̍ṇā̠gṃ̠ sayō̍ni̠mindragṃ̍ sayōni̠tvāya̍ kṛ̠ṣyai tvā̍ susa̠syāyā̠ ityā̍ha̠ tasmā̍dakṛṣṭapa̠chyā ōṣa̍dhayaḥ pachyantē supippa̠lābhya̠-stvauṣa̍dhībhya̠ ityā̍ha̠ tasmā̠dōṣa̍dhaya̠ḥ phala̍-ṅgṛhṇanti̠ yaddhastē̍na [yaddhastē̍na, ka̠ṇḍū̠yēta̍] 23

kaṇḍū̠yēta̍ pāmana̠-mbhāvu̍kāḥ pra̠jā-ssyu̠rya-thsmayē̍ta nagna̠-mbhāvu̍kāḥ kṛṣṇaviṣā̠ṇayā̍ kaṇḍūyatē-‘pi̠gṛhya̍ smayatē pra̠jānā̎-ṅgōpī̠thāya̠ na pu̠rā dakṣi̍ṇābhyō̠ nētō̎ḥ kṛṣṇaviṣā̠ṇāmava̍ chṛtē̠dya-tpu̠rā dakṣi̍ṇābhyō̠ nētō̎ḥ kṛṣṇaviṣā̠ṇā-ma̍vachṛ̠tē-dyōni̍ḥ pra̠jānā̎-mparā̠pātu̍kā syānnī̠tāsu̠ dakṣi̍ṇāsu̠ chātvā̍lē kṛṣṇaviṣā̠ṇā-mprāsya̍ti̠ yōni̠rvai ya̠jñasya̠ chātvā̍la̠ṃ yōni̍ḥ kṛṣṇaviṣā̠ṇā yōnā̍vē̠va yōni̍-ndadhāti ya̠jñasya̍ sayōni̠tvāya̍ ॥ 24 ॥
(ru̠ndha̠ ē̠ṣa – tasmā̎ – chChara̠mayī̠ – yūpa̠stṛtī̍yaṃ – mithuna̠tvāya̠ – janma̠ – hastē̍nā̠ – ‘ṣṭācha̍tvārigṃśachcha) (a. 3)

vāgvai dē̠vēbhyō ‘pā̎krāma-dya̠jñāyāti̍ṣṭhamānā̠ sā vana̠spatī̠-nprāvi̍śa̠-thsaiṣā vāgvana̠spati̍ṣu vadati̠ yā du̍ndu̠bhau yā tūṇa̍vē̠ yā vīṇā̍yā̠ṃ ya-ddī̎kṣitada̠ṇḍa-mpra̠yachCha̍ti̠ vācha̍mē̠vāva̍ rundha̠ audu̍baṃrō bhava̠tyūrgvā u̍du̠baṃra̠ ūrja̍mē̠vāva̍ rundhē̠ mukhē̍na̠ sammi̍tō bhavati mukha̠ta ē̠vāsmā̠ ūrja̍-ndadhāti̠ tasmā̎-nmukha̠ta ū̠rjā bhu̍ñjatē [ ] 25

krī̠tē sōmē̍ maitrāvaru̠ṇāya̍ da̠ṇḍa-mpra ya̍chChati maitrāvaru̠ṇō hi pu̠rastā̍-dṛ̠tvigbhyō̠ vācha̍ṃ vi̠bhaja̍ti̠ tāmṛ̠tvijō̠ yaja̍mānē̠ prati̍ ṣṭhāpayanti̠ svāhā̍ ya̠jña-mmana̠sētyā̍ha̠ mana̍sā̠ hi puru̍ṣō ya̠jñama̍bhi̠gachCha̍ti̠ svāhā̠ dyāvā̍pṛthi̠vībhyā̠ -mityā̍ha̠ dyāvā̍pṛthi̠vyōr​hi ya̠jña-ssvāhō̠rōra̠-ntari̍kṣā̠ -dityā̍hā̠ntari̍kṣē̠ hi ya̠jña-ssvāhā̍ ya̠jñaṃ vātā̠dā ra̍bha̠ ityā̍hā̠-‘yaṃ- [ityā̍hā̠-‘yam, vāva yaḥ pava̍tē̠] 26

-ँvāva yaḥ pava̍tē̠ sa ya̠jñastamē̠va sā̠kṣādā ra̍bhatē mu̠ṣṭī ka̍rōti̠ vācha̍ṃ yachChati ya̠jñasya̠ dhṛtyā̠ adī̎kṣiṣṭā̠ya-mbrā̎hma̠ṇa iti̠ triru̍pā̠g̠śvā̍ha dē̠vēbhya̍ ē̠vaina̠-mprā-”ha̠ triru̠chchairu̠bhayē̎bhya ē̠vaina̍-ndēvamanu̠ṣyēbhya̠ḥ prā-”ha̠ na pu̠rā nakṣa̍trēbhyō̠ vācha̠ṃ vi sṛ̍jē̠-dyatpu̠rā nakṣa̍trēbhyō̠ vācha̍ṃ visṛ̠jē-dya̠jñaṃ vichChi̍ndyā̠- [-ँvichChi̍ndyāt, udi̍tēṣu̠] 27

-dudi̍tēṣu̠ nakṣa̍trēṣu vra̠ta-ṅkṛ̍ṇu̠tēti̠ vācha̠ṃ vi sṛ̍jati ya̠jñavra̍tō̠ vai dī̎kṣi̠tō ya̠jñamē̠vābhi vācha̠ṃ vi sṛ̍jati̠ yadi̍ visṛ̠jē-dvai̎ṣṇa̠vīmṛcha̠manu̍ brūyā-dya̠jñō vai viṣṇu̍rya̠jñēnai̠va ya̠jñagṃ sa-nta̍nōti̠ daivī̠-ndhiya̍-mmanāmaha̠ ityā̍ha ya̠jñamē̠va tanmra̍dayati supā̠rā nō̍ asa̠dvaśa̠ ityā̍ha̠ vyu̍ṣṭimē̠vāva̍ rundhē [rundhē, bra̠hma̠vā̠dinō̍ vadanti] 28

brahmavā̠dinō̍ vadanti hōta̠vya̍-ndīkṣi̠tasya̍ gṛ̠hā(3) i na hō̍ta̠vyā(3)miti̍ ha̠virvai dī̎kṣi̠tō yajju̍hu̠yā-dyaja̍mānasyāva̠dāya̍ juhuyā̠-dyanna ju̍hu̠yā-dya̍jñapa̠rura̠ntari̍yā̠dyē dē̠vā manō̍jātā manō̠yuja̠ ityā̍ha prā̠ṇā vai dē̠vā manō̍jātā manō̠yuja̠stēṣvē̠va pa̠rōkṣa̍-ñjuhōti̠ tannēva̍ hu̠ta-nnēvāhu̍tagg​ sva̠panta̠ṃ vai dī̎kṣi̠tagṃ rakṣāgṃ̍si jighāgṃsantya̠gniḥ – [jighāgṃsantya̠gniḥ, khalu̠ vai] 29

khalu̠ vai ra̍kṣō̠hā-‘gnē̠ tvagṃ su jā̍gṛhi va̠yagṃ su ma̍ndiṣīma̠hītyā̍hā̠gni-mē̠vādhi̠pā-ṅkṛ̠tvā sva̍piti̠ rakṣa̍sā̠mapa̍hatyā avra̠tyami̍va̠ vā ē̠ṣa ka̍rōti̠ yō dī̎kṣi̠ta-ssvapi̍ti̠ tvama̍gnē vrata̠pā a̠sītyā̍hā̠gnirvai dē̠vānā̎ṃ vra̠tapa̍ti̠-ssa ē̠vaina̍ṃ vra̠tamā la̍bhaṃyati dē̠va ā martyē̠ṣvētyā̍ha dē̠vō [dē̠vaḥ, hyē̍ṣa sa-nmartyē̍ṣu̠] 30

hyē̍ṣa sa-nmartyē̍ṣu̠ tvaṃ ya̠jñēṣvīḍya̠ ityā̍hai̠tagṃ hi ya̠jñēṣvīḍa̠tē-‘pa̠ vai dī̎kṣi̠tā-thsu̍ṣu̠puṣa̍ indri̠ya-ndē̠vatā̎ḥ krāmanti̠ viśvē̍ dē̠vā a̠bhi māmā-‘va̍vṛtra̠-nnityā̍-hēndri̠yēṇai̠vaina̍-ndē̠vatā̍bhi̠-ssa-nna̍yati̠ yadē̠ta-dyaju̠rna brū̠yā-dyāva̍ta ē̠va pa̠śūna̠bhi dīkṣē̍ta̠ tāva̍ntō-‘sya pa̠śava̍-ssyū̠ rāsvēya̍- [pa̠śava̍-ssyū̠ rāsvēya̍t, sō̠mā-” bhūyō̍] 31

-thsō̠mā-” bhūyō̍ bha̠rētyā̠hā-pa̍rimitānē̠va pa̠śūnava̍ rundhē cha̠ndrama̍si̠ mama̠ bhōgā̍ya bha̠vētyā̍ha yathādēva̠tamē̠vainā̠ḥ prati̍ gṛhṇāti vā̠yavē̎ tvā̠ varu̍ṇāya̠ tvēti̠ yadē̠vamē̠tā nānu̍di̠śēdaya̍thādēvata̠-ndakṣi̍ṇā gamayē̠dā dē̠vatā̎bhyō vṛśchyēta̠ yadē̠vamē̠tā a̍nudi̠śati̍ yathādēva̠tamē̠va dakṣi̍ṇā gamayati̠ na dē̠vatā̎bhya̠ ā [na dē̠vatā̎bhya̠ ā, vṛ̠śchya̠tē̠ dēvī̍rāpō] 32

vṛ̍śchyatē̠ dēvī̍rāpō apā-nnapā̠dityā̍ha̠ yadvō̠ mēddhya̍ṃ ya̠jñiya̠gṃ̠ sadē̍va̠-ntadvō̠ mā-‘va̍ kramiṣa̠miti̠ vāvaitadā̠hāchChi̍nna̠-ntantu̍-mpṛthi̠vyā anu̍ gēṣa̠mityā̍ha̠ sētu̍mē̠va kṛ̠tvā-‘tyē̍ti ॥ 33 ॥
(bhu̠ñja̠tē̠ – ‘yaṃ – Chi̍ndyā-d- rundhē̠ – ‘gni – rā̍ha dē̠va – iya̍-d- dē̠vatā̎bhya̠ ā – traya̍strigṃśachcha) (a. 4)

dē̠vā vai dē̍va̠yaja̍na-maddhyava̠sāya̠ diśō̠ na prājā̍na̠-ntē̎(1̠)-‘nyō̎-‘nyamupā̍dhāva̠-ntvayā̠ pra jā̍nāma̠ tvayēti̠ tē-‘di̍tyā̠gṃ̠ sama̍ddhrayanta tvayā̠ pra jā̍nā̠mēti̠ sā-‘bra̍vī̠-dvara̍ṃ vṛṇai̠ matprā̍yaṇā ē̠va vō̍ ya̠jñā madu̍dayanā asa̠nniti̠ tasmā̍dādi̠tyaḥ prā̍ya̠ṇīyō̍ ya̠jñānā̍mādi̠tya u̍daya̠nīya̠ḥ pañcha̍ dē̠vatā̍ yajati̠ pañcha̠ diśō̍ di̠śā-mprajñā̎tyā̠ [di̠śā-mprajñā̎tyai, athō̠ pañchā̎kṣarā] 34

athō̠ pañchā̎kṣarā pa̠ṅktiḥ pāṅktō̍ ya̠jñō ya̠jñamē̠vāva̍ rundhē̠ pathyāg̍ sva̠stima̍yaja̠-nprāchī̍mē̠va tayā̠ diśa̠-mprājā̍nanna̠gninā̍ dakṣi̠ṇā sōmē̍na pra̠tīchīgṃ̍ savi̠trōdī̍chī̠-madi̍tyō̠rdhvā-mpathyāg̍ sva̠stiṃ ँya̍jati̠ prāchī̍mē̠va tayā̠ diśa̠-mpra jā̍nāti̠ pathyāg̍ sva̠stimi̠ṣṭvā-‘gnīṣōmau̍ yajati̠ chakṣu̍ṣī̠ vā ē̠tē ya̠jñasya̠ yada̠gnīṣōmau̠ tābhyā̍mē̠vānu̍ paśya- [paśyati, a̠gnīṣōmā̍-vi̠ṣṭvā] 35

-tya̠gnīṣōmā̍-vi̠ṣṭvā sa̍vi̠tāra̍ṃ yajati savi̠tṛpra̍sūta ē̠vānu̍ paśyati savi̠tāra̍mi̠ṣṭvā-‘di̍tiṃ yajatī̠yaṃ vā adi̍tira̠syāmē̠va pra̍ti̠ṣṭhāyānu̍ paśya̠tyadi̍timi̠ṣṭvā mā̍ru̠tīmṛcha̠manvā̍ha ma̠rutō̠ vai dē̠vānā̠ṃ viśō̍ dēvavi̠śa-ṅkhalu̠ vai kalpa̍māna-mmanuṣyavi̠śamanu̍ kalpatē̠ ya-nmā̍ru̠tīmṛcha̍ma̠nvāha̍ vi̠śā-ṅkL​iptyai̎ brahmavā̠dinō̍ vadanti prayā̠java̍dananūyā̠ja-mprā̍ya̠ṇīya̍-ṅkā̠rya̍-manūyā̠java̍- [-manūyā̠java̍t, a̠pra̠yā̠ja-mu̍daya̠nīya̠] 36

-daprayā̠ja-mu̍daya̠nīya̠-mitī̠mē vai pra̍yā̠jā a̠mī a̍nūyā̠jā-ssaiva sā ya̠jñasya̠ santa̍ti̠sta-ttathā̠ na kā̠rya̍mā̠tmā vai pra̍yā̠jāḥ pra̠jā-‘nū̍yā̠jā ya-tpra̍yā̠jā-na̍ntari̠yādā̠tmāna̍ma̠-ntari̍yā̠-dyada̍nūyā̠jā-na̍ntari̠yā-tpra̠jāma̠ntari̍yā̠dyata̠ḥ khalu̠ vai ya̠jñasya̠ vita̍tasya̠ na kri̠yatē̠ tadanu̍ ya̠jñaḥ parā̍ bhavati ya̠jña-mpa̍rā̠bhava̍nta̠ṃ yaja̍mā̠nō-‘nu̠ [-ँyaja̍mā̠nō-‘nu̍, parā̍ bhavati] 37

parā̍ bhavati prayā̠java̍dē̠vā-nū̍yā̠java̍-tprāya̠ṇīya̍-ṅkā̠rya̍-mprayā̠java̍danūyā̠java̍-dudaya̠nīya̠-nnā-”tmāna̍manta̠rēti̠ na pra̠jā-nna ya̠jñaḥ pa̍rā̠bhava̍ti̠ na yaja̍mānaḥ prāya̠ṇīya̍sya niṣkā̠sa u̍daya̠nīya̍ma̠bhi nirva̍pati̠ saiva sā ya̠jñasya̠ santa̍ti̠ryāḥ prā̍ya̠ṇīya̍sya yā̠jyā̍ ya-ttā u̍daya̠nīya̍sya yā̠jyā̎ḥ ku̠ryā-tparā̍ṃa̠muṃ lō̠kamā rō̍hē-tpra̠māyu̍ka-ssyā̠dyāḥ prā̍ya̠ṇīya̍sya purō-‘nuvā̠kyā̎stā u̍daya̠nīya̍sya yā̠jyā̎ḥ karōtya̠sminnē̠va lō̠kē prati̍ tiṣṭhati ॥ 38 ॥
(prajñā̎tyai – paśyatya – nūyā̠java̠ – dyaja̍mā̠nō-‘nu̍ – purōnuvā̠kyā̎stā – a̠ṣṭau cha̍) (a. 5)

ka̠drūścha̠ vai su̍pa̠rṇī chā̎-”tmarū̠payō̍raspardhētā̠gṃ̠ sā ka̠drū-ssu̍pa̠rṇīma̍jaya̠-thsā-‘bra̍vī-ttṛ̠tīya̍syāmi̠tō di̠vi sōma̠stamā ha̍ra̠ tēnā̠-”tmāna̠-nniṣkrī̍ṇī̠ṣvētī̠yaṃ vai ka̠drūra̠sau su̍pa̠rṇī Chandāgṃ̍si sauparṇē̠yā-ssābra̍vīda̠smai vai pi̠tarau̍ pu̠trā-nbi̍bhṛta-stṛ̠tīya̍syāmi̠tō di̠vi sōma̠stamā ha̍ra̠ tēnā̠-”tmāna̠-nniṣkrī̍ṇī̠ṣvē- [niṣkrī̍ṇī̠ṣva, iti̍ mā] 39

-ti̍ mā ka̠drūra̍vōcha̠diti̠ jaga̠tyuda̍pata̠-chchatu̍rdaśākṣarā sa̠tī sā ‘prā̎pya̠ nya̍vartata̠ tasyai̠ dvē a̠kṣarē̍ amīyētā̠gṃ̠ sā pa̠śubhi̍ścha dī̠kṣayā̠ chā-‘ga̍chCha̠-ttasmā̠jjaga̍tī̠ Chanda̍sā-mpaśa̠vya̍tamā̠ tasmā̎-tpaśu̠manta̍-ndī̠kṣōpa̍ namati tri̠ṣṭuguda̍pata̠-ttrayō̍daśākṣarā sa̠tī sā ‘prā̎pya̠ nya̍vartata̠ tasyai̠ dvē a̠kṣarē̍ amīyētā̠gṃ̠ sā dakṣi̍ṇābhiścha̠ [dakṣi̍ṇābhiścha, tapa̍sā̠] 40

tapa̍sā̠ chā-‘ga̍chCha̠-ttasmā̎-ttri̠ṣṭubhō̍ lō̠kē māddhya̍ndinē̠ sava̍nē̠ dakṣi̍ṇā nīyanta ē̠ta-tkhalu̠ vāva tapa̠ ityā̍hu̠rya-ssva-ndadā̠tīti̍ gāya̠tryuda̍pata̠chchatu̍rakṣarā sa̠tya̍jayā̠ jyōti̍ṣā̠ tama̍syā a̠jā-‘bhya̍rundha̠ tada̠jāyā̍ aja̠tvagṃ sā sōma̠-ñchā-”ha̍rachcha̠tvāri̍ chā̠kṣarā̍ṇi̠ sā-‘ṣṭākṣa̍rā̠ sama̍padyata brahmavā̠dinō̍ vadanti̠ [brahmavā̠dinō̍ vadanti, kasmā̎-thsa̠tyā-] 41

kasmā̎-thsa̠tyā-dgā̍ya̠trī kani̍ṣṭhā̠ Chanda̍sāgṃ sa̠tī ya̍jñamu̠kha-mparī̍yā̠yēti̠ yadē̠vāda-ssōma̠mā-‘ha̍ra̠-ttasmā̎-dyajñamu̠kha-mparyai̠-ttasmā̎-ttēja̠svinī̍tamā pa̠dbhyā-ndvē sava̍nē sa̠magṛ̍hṇā̠-nmukhē̠naika̠ṃ yanmukhē̍na sa̠magṛ̍hṇā̠-ttada̍dhaya̠-ttasmā̠-ddvē sava̍nē śu̠krava̍tī prātassava̠na-ñcha̠ māddhya̍ndina-ñcha̠ tasmā̎-ttṛtīya sava̠na ṛ̍jī̠ṣama̠bhi ṣu̍ṇvanti dhī̠tami̍va̠ hi manya̍nta [hi manya̍ntē, ā̠śira̠mava̍ nayati] 42

ā̠śira̠mava̍ nayati saśukra̠tvāyāthō̠ sa-mbha̍ratyē̠vaina̠-ttagṃ sōma̍-māhri̠yamā̍ṇa-ṅgandha̠rvō vi̠śvāva̍sa̠ḥ parya̍muṣṇā̠-thsa ti̠srō rātrī̠ḥ pari̍muṣitō-‘vasa̠-ttasmā̎-tti̠srō rātrī̎ḥ krī̠ta-ssōmō̍ vasati̠ tē dē̠vā a̍bruva̠n-thstrīkā̍mā̠ vai ga̍ndha̠rvā sstri̠yā niṣkrī̍ṇā̠mēti̠ tē vācha̠gg̠ striya̠mēka̍hāyanī-ṅkṛ̠tvā tayā̠ nira̍krīṇa̠n-thsā rō̠hi-drū̠pa-ṅkṛ̠tvā ga̍ndha̠rvēbhyō̍- [ga̍ndha̠rvēbhya̍ḥ, a̠pa̠kramyā̍tiṣṭha̠-tta-drō̠hitō̠] 43

-‘pa̠kramyā̍tiṣṭha̠-tta-drō̠hitō̠ janma̠ tē dē̠vā a̍bruva̠nnapa̍ yu̠ṣmadakra̍mī̠-nnāsmānu̠-pāva̍rtatē̠ vi hva̍yāmahā̠ iti̠ brahma̍ gandha̠rvā ava̍da̠nnagā̍ya-ndē̠vā-ssā dē̠vā-ngāya̍ta u̠pāva̍rtata̠ tasmā̠-dgāya̍nta̠gg̠ striya̍ḥ kāmayantē̠ kāmu̍kā ēna̠gg̠ striyō̍ bhavanti̠ ya ē̠vaṃ vēdāthō̠ ya ē̠vaṃ vi̠dvānapi̠ janyē̍ṣu̠ bhava̍ti̠ tēbhya̍ ē̠va da̍datyu̠ta ya-dba̠huta̍yā̠ [ya-dba̠huta̍yāḥ, bhava̠ntyēka̍hāyanyā] 44

bhava̠ntyēka̍hāyanyā krīṇāti vā̠chaivaina̠gṃ̠ sarva̍yā krīṇāti̠ tasmā̠dēka̍hāyanā manu̠ṣyā̍ vācha̍ṃ vada̠ntyakū̍ṭa̠yā ‘ka̍rṇa̠yā-‘ kā̍ṇa̠yāślō̍ṇa̠yā ‘sa̍ptaśaphayā krīṇāti̠ sarva̍yai̠vaina̍-ṅkrīṇāti̠ yachChvē̠tayā̎ krīṇī̠yā-ddu̠ścharmā̠ yaja̍māna-ssyā̠dya-tkṛ̠ṣṇayā̍-‘nu̠stara̍ṇī syā-tpra̠māyu̍kō̠ yaja̍māna-ssyā̠dya-ddvi̍rū̠payā̠ vārtra̍ghnī syā̠-thsa vā̠-‘nya-ñji̍nī̠yā-ttaṃ vā̠-‘nyō ji̍nīyādaru̠ṇayā̍ piṅgā̠kṣyā krī̍ṇātyē̠tadvai sōma̍sya rū̠pagg​ svayai̠vaina̍-ndē̠vata̍yā krīṇāti ॥ 45 ॥
(niṣkrī̍ṇīṣva̠ – dakṣi̍ṇābhiścha – vadanti̠ – manya̍ntē-gandha̠rvēbhyō̍-ba̠huta̍yāḥ-piṅgā̠kṣyā-daśa̍ cha ) (a. 6)

taddhira̍ṇyamabhava̠-ttasmā̍da̠dbhyō hira̍ṇya-mpunanti brahmavā̠dinō̍ vadanti̠ kasmā̎-thsa̠tyāda̍na̠sthikē̍na pra̠jāḥ pra̠vīya̍ntē ‘stha̠nvatī̎rjāyanta̠ iti̠ yaddhira̍ṇya-ṅghṛ̠tē̍-‘va̠dhāya̍ ju̠hōti̠ tasmā̍dana̠sthikē̍na pra̠jāḥ pra vī̍yantē ‘stha̠nvatī̎rjāyanta ē̠tadvā a̠gnēḥ pri̠ya-ndhāma̠ ya-dghṛ̠ta-ntējō̠ hira̍ṇyami̠yantē̍ śukra ta̠nūri̠daṃ varcha̠ ityā̍ha̠ satē̍jasamē̠vaina̠gṃ̠ sata̍nu- [sata̍num, ka̠rō̠tyathō̠] 46

-ṅkarō̠tyathō̠ sa-mbha̍ratyē̠vaina̠ṃ yadaba̍ddhama-vada̠ddhyā-dgarbhā̎ḥ pra̠jānā̎-mparā̠pātu̍kā-ssyurba̠ddhamava̍ dadhāti̠ garbhā̍ṇā̠-ndhṛtyai̍ niṣṭa̠rkya̍-mbaddhnāti pra̠jānā̎-mpra̠jana̍nāya̠ vāgvā ē̠ṣā ya-thsō̍ma̠kraya̍ṇī̠ jūra̠sītyā̍ha̠ yaddhi mana̍sā̠ java̍tē̠ ta-dvā̠chā vada̍ti dhṛ̠tā mana̠sētyā̍ha̠ mana̍sā̠ hi vāgdhṛ̠tā juṣṭā̠ viṣṇa̍va̠ ityā̍ha [ ] 47

ya̠jñō vai viṣṇu̍ rya̠jñāyai̠vainā̠-ñjuṣṭā̎-ṅkarōti̠ tasyā̎stē sa̠tyasa̍vasaḥ prasa̠va ityā̍ha savi̠tṛ-pra̍sūtāmē̠va vācha̠mava̍ rundhē̠ kāṇḍē̍kāṇḍē̠ vai kri̠yamā̍ṇē ya̠jñagṃ rakṣāgṃ̍si jighāgṃsantyē̠ṣa khalu̠ vā ara̍kṣōhata̠ḥ panthā̠ yō̎-‘gnēścha̠ sūrya̍sya cha̠ sūrya̍sya̠ chakṣu̠rā-‘ru̍hama̠gnēra̠kṣṇaḥ ka̠nīni̍kā̠mityā̍ha̠ ya ē̠vāra̍kṣōhata̠ḥ panthā̠stagṃ sa̠mārō̍hati̠ [sa̠mārō̍hati, vāgvā ē̠ṣā] 48

vāgvā ē̠ṣā ya-thsō̍ma̠kraya̍ṇī̠ chida̍si ma̠nā-‘sītyā̍ha̠ śāstyē̠vainā̍mē̠ta-ttasmā̎chChi̠ṣṭāḥ pra̠jā jā̍yantē̠ chida̠sītyā̍ha̠ yaddhi mana̍sā chē̠taya̍tē̠ ta-dvā̠chā vada̍ti ma̠nā-‘sītyā̍ha̠ yaddhi mana̍sā-‘bhi̠gachCha̍ti̠ ta-tka̠rōti̠ dhīra̠sītyā̍ha̠ yaddhi mana̍sā̠ dhyāya̍ti̠ ta-dvā̠chā [ ] 49

vada̍ti̠ dakṣi̍ṇā̠-‘sītyā̍ha̠ dakṣi̍ṇā̠ hyē̍ṣā ya̠jñiyā̠-‘sītyā̍ha ya̠jñiyā̍mē̠vainā̎-ṅkarōti kṣa̠triyā̠sītyā̍ha kṣa̠triyā̠ hyē̍ṣā ‘di̍tirasyubha̠yata̍śśī̠r​ṣṇītyā̍ha̠ yadē̠vā-”di̠tyaḥ prā̍ya̠ṇīyō̍ ya̠jñānā̍mādi̠tya u̍daya̠nīya̠-stasmā̍dē̠vamā̍ha̠ yadaba̍ddhā̠ syādaya̍tā syā̠dya-tpa̍diba̠ddhā-‘nu̠stara̍ṇī syā-tpra̠māyu̍kō̠ yaja̍māna-ssyā̠- [yaja̍māna-ssyāt, ya-tka̍rṇagṛhī̠tā] 50

-dya-tka̍rṇagṛhī̠tā vārtra̍ghnī syā̠-thsa vā̠-‘nya-ñji̍nī̠yā-ttaṃ vā̠-‘nyō ji̍nīyānmi̠trastvā̍ pa̠di ba̍ddhnā̠tvityā̍ha mi̠trō vai śi̠vō dē̠vānā̠-ntēnai̠vainā̎-mpa̠di ba̍ddhnāti pū̠ṣā-‘ddhva̍naḥ pā̠tvityā̍hē̠yaṃ vai pū̠ṣēmāmē̠vāsyā̍ adhi̠pāma̍ka̠-ssama̍ṣṭyā̠ indrā̠yā-ddhya̍kṣā̠yētyā̠hēndra̍mē̠vāsyā̠ addhya̍kṣa-ṅkarō̠- [addhya̍kṣa-ṅkarōti, anu̍ tvā mā̠tā] 51

-tyanu̍ tvā mā̠tā ma̍nyatā̠manu̍ pi̠tētyā̠hā-nu̍matayai̠vaina̍yā krīṇāti̠ sā dē̍vi dē̠vamachChē̠hītyā̍ha dē̠vī hyē̍ṣā dē̠va-ssōma̠ indrā̍ya̠ sōma̠mityā̠hēndrā̍ya̠ hi sōma̍ āhri̠yatē̠ yadē̠ta-dyaju̠rna brū̠yā-tparā̎chyē̠va sō̍ma̠kraya̍ṇīyā-dru̠drastvā-” va̍rtaya̠tvityā̍ha ru̠drō vai krū̠rō [ru̠drō vai krū̠raḥ, dē̠vānā̠-ntamē̠vāsyai̍] 52

dē̠vānā̠-ntamē̠vāsyai̍ pa̠rastā̎-ddadhā̠tyāvṛ̍ttyai krū̠rami̍va̠ vā ē̠ta-tka̍rōti̠ ya-dru̠drasya̍ kī̠rtaya̍ti mi̠trasya̍ pa̠thētyā̍ha̠ śāntyai̍ vā̠chā vā ē̠ṣa vi krī̍ṇītē̠ ya-ssō̍ma̠kraya̍ṇyā sva̠sti sōma̍sakhā̠ puna̠rēhi̍ sa̠ha ra̠yyētyā̍ha vā̠chaiva vi̠krīya̠ puna̍rā̠tman vācha̍-ndha̠ttē-‘nu̍padāsukā-‘sya̠ vāgbha̍vati̠ ya ē̠vaṃ vēda̍ ॥ 53 ॥
(sata̍nu̠ṃ – ँviṣṇa̍va̠ ityā̍ha – sa̠mārō̍hati̠ – dhyāya̍ti̠ ta-dvā̠chā – yaja̍māna-ssyāt – karōti – krū̠rō – vēda̍) (a. 7)

ṣaṭ pa̠dānyanu̠ ni krā̍mati ṣaḍa̠haṃ vānnāti̍ vadatyu̠ta sa̍ṃvathsa̠rasyāya̍nē̠ yāva̍tyē̠va vāktāmava̍ rundhē sapta̠mē pa̠dē ju̍hōti sa̠ptapa̍dā̠ śakva̍rī pa̠śava̠-śśakva̍rī pa̠śūnē̠vāva̍ rundhē sa̠pta grā̠myāḥ pa̠śava̍-ssa̠ptā-”ra̠ṇyā-ssa̠pta Chandāg̍-syu̠bhaya̠syā-va̍ruddhyai̠ vasvya̍si ru̠drā-‘sītyā̍ha rū̠pamē̠vāsyā̍ ē̠ta-nma̍hi̠māna̠ṃ- [ē̠ta-nma̍hi̠māna̎m, vyācha̍ṣṭē̠ bṛha̠spati̍stvā] 54

-ँvyācha̍ṣṭē̠ bṛha̠spati̍stvā su̠mnē ra̍ṇva̠tvityā̍ha̠ brahma̠ vai dē̠vānā̠-mbṛha̠spati̠-rbrahma̍ṇai̠vāsmai̍ pa̠śūnava̍ rundhē ru̠drō vasu̍bhi̠rā chi̍kē̠tvityā̠hā-”vṛ̍ttyai pṛthi̠vyāstvā̍ mū̠rdhannā ji̍gharmi dēva̠yaja̍na̠ ityā̍ha pṛthi̠vyā hyē̍ṣa mū̠rdhā ya-ddē̍va̠yaja̍na̠miḍā̍yāḥ pa̠da ityā̠hēḍā̍yai̠ hyē̍ta-tpa̠daṃ ya-thsō̍ma̠kraya̍ṇyai ghṛ̠tava̍ti̠ svāhē- [svāhā̎, ityā̍ha̠] 55

-tyā̍ha̠ yadē̠vāsyai̍ pa̠dā-dghṛ̠tamapī̎ḍyata̠ tasmā̍dē̠vamā̍ha̠ yada̍ddhva̠ryura̍na̠gnāvāhu̍ti-ñjuhu̠yāda̠ndhō̎-‘ddhva̠ryu-ssyā̠-drakṣāgṃ̍si ya̠jñagṃ ha̍nyu̠r̠hira̍ṇyamu̠pāsya̍ juhōtyagni̠vatyē̠va ju̍hōti̠ nāndhō̎-‘ddhva̠ryu rbhava̍ti̠ na ya̠jñagṃ rakṣāgṃ̍si ghnanti̠ kāṇḍē̍kāṇḍē̠ vai kri̠yamā̍ṇē ya̠jñagṃ rakṣāgṃ̍si jighāgṃsanti̠ pari̍likhita̠gṃ̠ rakṣa̠ḥ pari̍likhitā̠ arā̍taya̠ ityā̍ha̠ rakṣa̍sā̠-mapa̍hatyā [rakṣa̍sā̠-mapa̍hatyai, i̠dama̠hagṃ] 56

i̠dama̠hagṃ rakṣa̍sō grī̠vā api̍ kṛntāmi̠ yō̎-‘smā-ndvēṣṭi̠ ya-ñcha̍ va̠ya-ndvi̠ṣma ityā̍ha̠ dvau vāva puru̍ṣau̠ ya-ñchai̠va dvēṣṭi̠ yaśchai̍na̠-ndvēṣṭi̠ tayō̍-rē̠vā-‘na̍ntarāya-ṅgrī̠vāḥ kṛ̍ntati pa̠śavō̠ vai sō̍ma̠kraya̍ṇyai pa̠daṃ yā̍vattmū̠tagṃ saṃ va̍pati pa̠śūnē̠vāva̍ rundhē̠-‘smē rāya̠ iti̠ saṃ ँva̍patyā̠tmāna̍-mē̠vāddhva̠ryuḥ -[-mē̠vāddhva̠ryuḥ, pa̠śubhyō̠] 57

pa̠śubhyō̠ nāntarē̍ti̠ tvē rāya̠ iti̠ yaja̍mānāya̠ pra ya̍chChati̠ yaja̍māna ē̠va ra̠yi-nda̍dhāti̠ tōtē̠ rāya̠ iti̠ patni̍yā a̠rdhō vā ē̠ṣa ā̠tmanō̠ ya-tpatnī̠ yathā̍ gṛ̠hēṣu̍ nidha̠ttē tā̠dṛgē̠va ta-ttvaṣṭī̍matī tē sapē̠yētyā̍ha̠ tvaṣṭā̠ vai pa̍śū̠nā-mmi̍thu̠nānāgṃ̍ rūpa̠kṛ-drū̠pamē̠va pa̠śuṣu̍ dadhātya̠smai vai lō̠kāya̠ gār​ha̍patya̠ ā dhī̍yatē̠ ‘muṣmā̍ āhava̠nīyō̠ ya-dgār​ha̍patya upa̠vapē̍da̠smin ँlō̠kē pa̍śa̠mān-thsyā̠-dyadā̍hava̠nīyē̠ ‘muṣmi̍n ँlō̠kē pa̍śu̠mān-thsyā̍du̠bhayō̠rupa̍ vapatyu̠bhayō̍rē̠vaina̍ṃ lō̠kayō̎ḥ paśu̠manta̍-ṅkarōti ॥ 58 ॥
(ma̠hi̠māna̠gg̠ – svāhā – ‘pa̍hatyā – adhva̠ryu – dhī̍yatē̠ – chatu̍rvigṃśatiścha) (a. 8)

bra̠hma̠vā̠dinō̍ vadanti vi̠chitya̠-ssōmā(3) na vi̠chityā(3) iti̠ sōmō̠ vā ōṣa̍dhīnā̠gṃ̠ rājā̠ tasmi̠n̠. yadāpa̍nna-ṅgrasi̠tamē̠vāsya̠ ta-dya-dvi̍chinu̠yā-dyathā̠ ”syā̎dgrasi̠ta-nni̍ṣkhi̠dati̍ tā̠dṛgē̠va tadyanna vi̍chinu̠yā-dyathā̠ ‘kṣannāpa̍nnaṃ vi̠dhāva̍ti tā̠dṛgē̠va ta-tkṣōdhu̍kō ‘ddhva̠ryu-ssyā-tkṣōdhu̍kō̠ yaja̍māna̠-ssōma̍vikrayi̠n-thsōmagṃ̍ śōdha̠yētyē̠va brū̍yā̠-dyadīta̍ra̠ṃ- [brū̍yā̠-dyadīta̍ram, yadīta̍ra-] 59

-ँyadīta̍ra-mu̠bhayē̍nai̠va sō̍mavikra̠yiṇa̍-marpayati̠ tasmā̎-thsōmavikra̠yī kṣōdhu̍kō ‘ru̠ṇō ha̍ smā̠-”haupa̍vēśi-ssōma̠kraya̍ṇa ē̠vāha-ntṛ̍tīya sava̠namava̍ rundha̠ iti̍ paśū̠nā-ñcharma̍-nmimītē pa̠śūnē̠vāva̍ rundhē pa̠śavō̠ hi tṛ̠tīya̠gṃ̠ sava̍na̠ṃ ya-ṅkā̠mayē̍tāpa̠śu-ssyā̠-dityṛ̍kṣa̠ta-stasya̍ mimīta̠rkṣaṃ vā a̍paśa̠vya-ma̍pa̠śurē̠va bha̍vati̠ ya-ṅkā̠mayē̍ta paśu̠mān-thsyā̠ – [ ] 60

-diti̍ lōma̠tastasya̍ mimītai̠tadvai pa̍śū̠nāgṃ rū̠pagṃ rū̠pēṇai̠vā-‘smai̍ pa̠śūnava̍ rundhē paśu̠mānē̠va bha̍vatya̠pāmantē̎ krīṇāti̠ sara̍samē̠vaina̍-ṅkrīṇātya̠-mātyō̠-‘sītyā̍hā̠-‘maivaina̍-ṅkurutē śu̠krastē̠ graha̠ ityā̍ha śu̠krō hya̍sya̠ grahō ‘na̠sā-‘chCha̍ yāti mahi̠māna̍-mē̠vāsyāchCha̍ yā̠tyana̠sā- [yā̠tyana̠sā, achCha̍] 61

-‘chCha̍ yāti̠ tasmā̍-danōvā̠hyagṃ̍ sa̠mē jīva̍na̠ṃ yatra̠ khalu̠ vā ē̠tagṃ śī̠r​ṣṇā hara̍nti̠ tasmā̎chChīr​ṣahā̠rya̍-ṅgi̠rau jīva̍nama̠bhi tya-ndē̠vagṃ sa̍vi̠tāra̠mityati̍-chChandasa̠rchā mi̍mī̠tē ‘ti̍chChandā̠ vai sarvā̍ṇi̠ Chandāgṃ̍si̠ sarvē̍bhirē̠vaina̠-ñChandō̍bhirmimītē̠ var​ṣma̠ vā ē̠ṣā Chanda̍sā̠ṃ yadati̍chChandā̠ yadati̍chChandasa̠rchā mimī̍tē̠ var​ṣmai̠vainagṃ̍ samā̠nānā̎-ṅkarō̠tyēka̍yaikayō̠-thsarga̍- [-ṅkarō̠tyēka̍yaikayō̠-thsarga̎m, mi̠mī̠tē] 62

-mmimī̠tē ‘yā̍tayāmniyāyātayāmniyai̠vaina̍-mmimītē̠ tasmā̠nnānā̍vīryā a̠ṅgula̍ya̠-ssarvā̎svaṅgu̠ṣṭhamupa̠ ni gṛ̍hṇāti̠ tasmā̎-thsa̠māva̍dvīryō̠-‘nyābhi̍-ra̠ṅguli̍bhi̠stasmā̠-thsarvā̠ anu̠ sa-ñcha̍rati̠ ya-thsa̠ha sarvā̍bhi̠rmimī̍ta̠ sagg​śli̍ṣṭā a̠ṅgula̍yō jāyēra̠-nnēka̍yaikayō̠-thsarga̍-mmimītē̠ tasmā̠-dvibha̍ktā jāyantē̠ pañcha̠ kṛtvō̠ yaju̍ṣā mimītē̠ pañchā̎kṣarā pa̠ṅktiḥ pāṅktō̍ ya̠jñō ya̠jñamē̠vāva̍ rundhē̠ pañcha̠ kṛtva̍-stū̠ṣṇī- [kṛtva̍-stū̠ṣṇīm, daśa̠ sa-mpa̍dyantē̠] 63

-ndaśa̠ sa-mpa̍dyantē̠ daśā̎kṣarā vi̠rāḍanna̍ṃ vi̠rā-ḍvi̠rājai̠vānnādya̠mava̍ rundhē̠ ya-dyaju̍ṣā̠ mimī̍tē bhū̠tamē̠vāva̍ rundhē̠ ya-ttū̠ṣṇī-mbha̍vi̠ṣya-dya-dvai tāvā̍nē̠va sōma̠-ssyā-dyāva̍nta̠-mmimī̍tē̠ yaja̍mānasyai̠va syā̠nnāpi̍ sada̠syā̍nā-mpra̠jābhya̠stvētyupa̠ samū̍hati sada̠syā̍nē̠vānvā bha̍jati̠ vāsa̠sōpa̍ nahyati sarvadēva̠tya̍ṃ vai [ ] 64

vāsa̠-ssarvā̍bhirē̠vaina̍-ndē̠vatā̍bhi̠-ssama̍rdhayati pa̠śavō̠ vai sōma̍ḥ prā̠ṇāya̠ tvētyupa̍ nahyati prā̠ṇamē̠va pa̠śuṣu̍ dadhāti vyā̠nāya̠ tvētyanu̍ śṛnthati vyā̠namē̠va pa̠śuṣu̍ dadhāti̠ tasmā̎-thsva̠panta̍-mprā̠ṇā na ja̍hati ॥ 65 ॥
(ita̍raṃ – paśu̠mān-thsyā̎–dyā̠tyana̍sō̠ – thsarga̍ṃ – tū̠ṣṇīgṃ – sa̍rvadēva̠tya̍ṃ vai – traya̍strigṃśachcha) (a. 9)

ya-tka̠layā̍ tē śa̠phēna̍ tē krīṇā̠nīti̠ paṇē̠tāgō̍argha̠gṃ̠ sōma̍-ṅku̠ryādagō̍argha̠ṃ yaja̍māna̠-magō̍arghamaddhva̠ryu-ṅgōstu ma̍hi̠māna̠-nnāva̍ tirē̠-dgavā̍ tē krīṇā̠nītyē̠va brū̍yā-dgōa̠rghamē̠va sōma̍-ṅka̠rōti̍ gōa̠rghaṃ yaja̍māna-ṅgōa̠rghama̍ddhva̠ryu-nna gōrma̍hi̠māna̠mava̍ tiratya̠jayā̎ krīṇāti̠ sata̍pasamē̠vaina̍-ṅkrīṇāti̠ hira̍ṇyēna krīṇāti̠ saśu̍kramē̠vai- [saśu̍kramē̠va, ē̠na̠-ṅkrī̠ṇā̠ti̠ dhē̠nvā krī̍ṇāti̠] 66

-na̍-ṅkrīṇāti dhē̠nvā krī̍ṇāti̠ sāśi̍ramē̠vaina̍-ṅkrīṇātyṛṣa̠bhēṇa̍ krīṇāti̠ sēndra̍mē̠vaina̍-ṅkrīṇātyana̠ḍuhā̎ krīṇāti̠ vahni̠rvā a̍na̠ḍvān. vahni̍nai̠va vahni̍ ya̠jñasya̍ krīṇāti mithu̠nābhyā̎-ṅkrīṇāti mithu̠nasyāva̍-ruddhyai̠ vāsa̍sā krīṇāti sarvadēva̠tya̍ṃ vai vā̠sa-ssarvā̎bhya ē̠vaina̍-ndē̠vatā̎bhyaḥ krīṇāti̠ daśa̠ sa-mpa̍dyantē̠ daśā̎kṣarā vi̠rāḍanna̍ṃ vi̠rā-ḍvi̠rājai̠vānnādya̠mava̍ rundhē̠ [rundhē, tapa̍sa-sta̠nūra̍si] 67

tapa̍sa-sta̠nūra̍si pra̠jāpa̍tē̠-rvarṇa̠ ityā̍ha pa̠śubhya̍ ē̠va tada̍ddhva̠-ryurni hnu̍ta ā̠tmanō-‘nā̎vraskāya̠ gachCha̍ti̠ śriya̠-mpra pa̠śūnā̎pnōti̠ ya ē̠vaṃ vēda̍ śu̠kra-ntē̍ śu̠krēṇa̍ krīṇā̠mītyā̍ha yathā ya̠jurē̠vaita-ddē̠vā vai yēna̠ hira̍ṇyēna̠ sōma̠makrī̍ṇa̠-ntada̍bhī̠ṣahā̠ puna̠rā-‘da̍data̠ kō hi tēja̍sā vikrē̠ṣyata̠ iti̠ yēna̠ hira̍ṇyēna̠ [hira̍ṇyēna, sōma̍-] 68

sōma̍-ṅkrīṇī̠yā-ttada̍bhī̠ṣahā̠ puna̠rā da̍dīta̠ tēja̍ ē̠vā-”tma-ndha̍ttē̠-‘smē jyōti̍-ssōmavikra̠yiṇi̠ tama̠ ityā̍ha̠ jyōti̍rē̠va yaja̍mānē dadhāti̠ tama̍sā sōmavikra̠yiṇa̍marpayati̠ yadanu̍pagrathya ha̠nyā-dda̍nda̠śūkā̠stāgṃ samāgṃ̍ sa̠rpā-ssyu̍ri̠dama̠hagṃ sa̠rpāṇā̎-ndanda̠śūkā̍nā-ṅgrī̠vā upa̍ grathnā̠mītyā̠hā-da̍ndaśūkā̠stāgṃ samāgṃ̍ sa̠rpā bha̍vanti̠ tama̍sā sōmavikra̠yiṇa̍ṃ viddhyati̠ svāna̠ [svāna̍, bhrājētyā̍hai̠tē] 69

bhrājētyā̍hai̠tē vā a̠muṣmi̍n ँlō̠kē sōma̍marakṣa̠-ntēbhyō-‘dhi̠ sōma̠mā-‘ha̍ra̠n̠. yadē̠tēbhya̍-ssōma̠kraya̍ṇā̠-nnānu̍di̠śēdakrī̍tō-‘sya̠ sōma̍-ssyā̠nnāsyai̠tē̍ ‘muṣmi̍n ँlō̠kē sōmagṃ̍ rakṣēyu̠ryadē̠tēbhya̍-ssōma̠kraya̍ṇānanudi̠śati̍ krī̠tō̎-‘sya̠ sōmō̍ bhavatyē̠tē̎-‘syā̠muṣmi̍n ँlō̠kē sōmagṃ̍ rakṣanti ॥ 70 ॥
(saśu̍kramē̠va – ru̍ndha̠ – iti̠ yēna̠ hira̍ṇyēna̠ – svāna̠ – chatu̍śchatvārigṃśachcha) (a. 10)

vā̠ru̠ṇō vai krī̠ta-ssōma̠ upa̍naddhō mi̠trō na̠ ēhi̠ sumi̍tradhā̠ ityā̍ha̠ śāntyā̠ indra̍syō̠rumā vi̍śa̠ dakṣi̍ṇa̠mityā̍ha dē̠vā vai yagṃ sōma̠makrī̍ṇa-ntamindra̍syō̠rau dakṣi̍ṇa̠ ā ‘sā̍dayannē̠ṣa khalu̠ vā ē̠tar​hīndrō̠ yō yaja̍tē̠ tasmā̍dē̠vamā̠hōdāyu̍ṣā svā̠yuṣētyā̍ha dē̠vatā̍ ē̠vā-nvā̠rabhyō- [ē̠vā-nvā̠rabhyōt, ti̠ṣṭha̠tyu̠-rva̍ntari̍kṣa̠-] 71

-tti̍ṣṭhatyu̠-rva̍ntari̍kṣa̠-manvi̠hītyā̍hā-ntarikṣadēva̠tyō̎(1̠) hyē̍tar​hi̠ sōmō-‘di̍tyā̠-ssadō̠-‘syadi̍tyā̠-ssada̠ ā sī̠dētyā̍ha yathāya̠jurē̠vaita-dvi vā ē̍namē̠tada̍rdhayati̠ ya-dvā̍ru̠ṇagṃ santa̍-mmai̠tra-ṅka̠rōti̍ vāru̠ṇyarchā-” sā̍dayati̠ svayai̠vaina̍-ndē̠vata̍yā̠ sama̍rdhayati̠ vāsa̍sā pa̠ryāna̍hyati sarvadēva̠tya̍ṃ vai vāsa̠-ssarvā̍bhirē̠vai- [vāsa̠-ssarvā̍bhirē̠va, ē̠na̠-ndē̠vatā̍bhi̠-] 72

-na̍-ndē̠vatā̍bhi̠-ssama̍rdhaya̠tyathō̠ rakṣa̍sā̠mapa̍hatyai̠ vanē̍ṣu̠ vya̍ntari̍kṣa-ntatā̠nētyā̍ha̠ vanē̍ṣu̠ hi vya̍ntari̍kṣa-nta̠tāna̠ vāja̠marva̠thsvityā̍ha̠ vāja̠gg̠ hyarva̍thsu̠ payō̍ aghni̠yāsvityā̍ha̠ payō̠ hya̍ghni̠yāsu̍ hṛ̠thsu kratu̠mityā̍ha hṛ̠thsu hi kratu̠ṃ varu̍ṇō vi̠kṣva̍gnimityā̍ha̠ varu̍ṇō̠ hi vi̠kṣva̍gni-ndi̠vi sūrya̠- [sūrya̎m, ityā̍ha di̠vi hi] 73

-mityā̍ha di̠vi hi sūrya̠gṃ̠ sōma̠madrā̠vityā̍ha̠ grāvā̍ṇō̠ vā adra̍ya̠stēṣu̠ vā ē̠ṣa sōma̍-ndadhāti̠ yō yaja̍tē̠ tasmā̍dē̠vamā̠hōdu̠ tya-ñjā̠tavē̍dasa̠miti̍ sau̠ryarchā kṛ̍ṣṇāji̠na-mpra̠tyāna̍hyati̠ rakṣa̍sā̠mapa̍hatyā̠ usrā̠vēta̍-ndhūr​ṣāhā̠vityā̍ha yathāya̠jurē̠vaita-tpra chya̍vasva bhuvaspata̠ ityā̍ha bhū̠tānā̠g̠ hyē̍ [bhū̠tānā̠g̠ṃ hi, ē̠ṣa pati̠-rviśvā̎nya̠bhi] 74

-ṣa pati̠-rviśvā̎nya̠bhi dhāmā̠nītyā̍ha̠ viśvā̍ni̠ hyē̎(1̠) ṣō̍-‘bhi dhāmā̍ni pra̠chyava̍tē̠ mā tvā̍ paripa̠rī vi̍da̠dityā̍ha̠ yadē̠vāda-ssōma̍māhri̠yamā̍ṇa-ṅgandha̠rvō vi̠śvāva̍suḥ pa̠ryamu̍ṣṇā̠-ttasmā̍-dē̠vamā̠hāpa̍rimōṣāya̠ yaja̍mānasya sva̠styaya̍nya̠sītyā̍ha̠ yaja̍mānasyai̠vaiṣa ya̠jñasyā̎nvāra̠bhōṃ ‘na̍vachChittyai̠ varu̍ṇō̠ vā ē̠ṣa yaja̍mānama̠bhyaiti̠ ya- [yat, krī̠ta-ssōma̠ upa̍naddhō̠ namō̍] 75

-tkrī̠ta-ssōma̠ upa̍naddhō̠ namō̍ mi̠trasya̠ varu̍ṇasya̠ chakṣa̍sa̠ ityā̍ha̠ śāntyā̠ ā sōma̠ṃ vaha̍ntya̠gninā̠ prati̍ tiṣṭhatē̠ tau sa̠bhaṃva̍ntau̠ yaja̍mānama̠bhi sa-mbha̍vataḥ pu̠rā khalu̠ vāvaiṣa mēdhā̍yā̠-”tmāna̍mā̠rabhya̍ charati̠ yō dī̎kṣi̠tō yada̍gnīṣō̠mīya̍-mpa̠śumā̠labha̍ta ātmani̠ṣkraya̍ṇa ē̠vāsya̠ sa tasmā̠-ttasya̠ nā-”śya̍-mpuruṣani̠ṣkraya̍ṇa iva̠ hyathō̠ khalvā̍hu ra̠gnīṣōmā̎bhyā̠ṃ vā indrō̍ vṛ̠trama̍ha̠nniti̠ yada̍gnīṣō̠mīya̍-mpa̠śumā̠labha̍ta̠ vārtra̍ghna ē̠vāsya̠ sa tasmā̎-dvā̠śya̍ṃ vāru̠ṇyarchā pari̍ charati̠ svayai̠vaina̍-ndē̠vata̍yā̠ pari̍ charati ॥ 76 ॥
(a̠nvā̠rabhyōth – sarvā̍bhirē̠va – sūrya̍ṃ – bhū̠tānā̠g̠ hyē̍ – ti̠ ya – dā̍huḥ – sa̠ptavigṃ̍śatiścha) (a. 11)

(prā̠chīna̍vagṃśa̠ṃ -ँyāva̍nta – ṛkhsā̠mē – vāgvai dē̠vēbhyō̍ – dē̠vā vai dē̍va̠yaja̍naṃ – ka̠drūścha̠ – taddhira̍ṇya̠gṃ̠ – ṣaṭ pa̠dāni̍ – brahmavā̠dinō̍ vi̠chityō̠ – ya-tka̠layā̍ tē – vāru̠ṇō vai krī̠ta-ssōma̠ – ēkā̍daśa)

(prā̠chīna̍vagṃśa̠gg̠ – svāhētyā̍ha̠ – yē̎-‘nta-śśa̠rā – hyē̍ṣa saṃ – tapa̍sā cha̠ – yatka̍rṇagṛhī̠ – tēti̍ lōma̠tō – vā̍ru̠ṇaḥ – ṣaṭ-thsa̍ptatiḥ )

(prā̠chīna̍vagṃ śa̠, mpari̍ charati)

॥ hari̍ḥ ōm ॥

॥ kṛṣṇa yajurvēdīya taittirīya saṃhitāyāṃ ṣaṣṭhakāṇḍē prathamaḥ praśna-ssamāptaḥ ॥