KYTS 4.3 Apaan Tvemanthsaadayaami – Krishna Yajurveda Taittiriya Samhita Patha

kṛṣṇa yajurvēdīya taittirīya saṃhitāyā-ñchaturthakāṇḍē tṛtīyaḥ praśnaḥ – chitivarṇanaṃ

ō-nnamaḥ paramātmanē, śrī mahāgaṇapatayē namaḥ,
śrī gurubhyō namaḥ । ha̠ri̠ḥ ōm ॥

a̠pā-ntvēma̎m-thsādayāmya̠pā-ntvōdma̎m-thsādayāmya̠pā-ntvā̠ bhasma̎m-thsādayāmya̠pā-ntvā̠ jyōti̍ṣi sādayāmya̠pā-ntvā-‘ya̍nē sādayāmyarṇa̠vē sada̍nē sīda samu̠drē sada̍nē sīda sali̠lē sada̍nē sīdā̠pā-ṅkṣayē̍ sīdā̠pāgṃ sadhi̍ṣi sīdā̠pā-ntvā̠ sada̍nē sādayāmya̠pā-ntvā̍ sa̠dhasthē̍ sādayāmya̠pā-ntvā̠ purī̍ṣē sādayāmya̠pā-ntvā̠ yōnau̍ sādayāmya̠pā-ntvā̠ pātha̍si sādayāmi gāya̠trī Chanda̍-stri̠ṣṭu-pChandō̠ jaga̍tī̠ Chandō̍-‘nu̠ṣṭu-pChanda̍ḥ pa̠ṅktiśChanda̍ḥ ॥ 1 ॥
(yōnau̠ – pañcha̍daśa cha) (a. 1)

a̠ya-mpu̠rō bhuva̠stasya̍ prā̠ṇō bhau̍vāya̠nō va̍sa̠ntaḥ prā̍ṇāya̠nō gā̍ya̠trī vā̍sa̠ntī gā̍yatri̠yai gā̍ya̠tra-ṅgā̍ya̠trādu̍pā̠gṃ̠ śuru̍pā̠gṃ̠ śōstri̠vṛ-ttri̠vṛtō̍ rathanta̠ragṃ ra̍thanta̠rā-dvasi̍ṣṭha̠ ṛṣi̍ḥ pra̠jāpa̍ti gṛhītayā̠ tvayā̎ prā̠ṇa-ṅgṛ̍hṇāmi pra̠jābhyō̠-‘ya-nda̍kṣi̠ṇā vi̠śvaka̍rmā̠ tasya̠ manō̍ vaiśvakarma̠ṇa-ṅgrī̠ṣmō mā̍na̠sastri̠ṣṭuggrai̠ṣmī tri̠ṣṭubha̍ ai̠ḍamai̠ḍā-da̍ntaryā̠mō̎ ‘ntaryā̠mā-tpa̍ñchada̠śaḥ pa̍ñchada̠śā-dbṛ̠ha-dbṛ̍ha̠tō bha̠radvā̍ja̠ ṛṣi̍ḥ pra̠jāpa̍ti gṛhītayā̠ tvayā̠ manō̍ [tvayā̠ mana̍ḥ, gṛ̠hṇā̠mi̠ pra̠jābhyō̠-‘ya-] 2

gṛhṇāmi pra̠jābhyō̠-‘ya-mpa̠śchā-dvi̠śvavya̍chā̠stasya̠ chakṣu̍rvaiśvavyacha̠saṃ va̠r̠ṣāṇi̍ chākṣu̠ṣāṇi̠ jaga̍tī vā̠r̠ṣī jaga̍tyā̠ ṛkṣa̍ma̠mṛkṣa̍māchChu̠kra-śśu̠krā-thsa̍ptada̠śa-ssa̍ptada̠śā-dvai̍rū̠paṃ vai̍rū̠pā-dvi̠śvāmi̍tra̠ ṛṣi̍ḥ pra̠jāpa̍ti gṛhītayā̠ tvayā̠ chakṣu̍rgṛhṇāmi pra̠jābhya̍ i̠damu̍tta̠rā-thsuva̠stasya̠ śrōtragṃ̍ sau̠vagṃ śa̠rachChrau̠trya̍nu̠ṣṭup-Chā̍ra̠dya̍nu̠ṣṭubha̍-ssvā̠ragg​ svā̠rānma̠nthī ma̠nthina̍ ēkavi̠gṃ̠śa ē̍kavi̠gṃ̠śā-dvai̍rā̠jaṃ vai̍rā̠jājja̠mada̍gni̠r̠ ṛṣi̍ḥ pra̠jāpa̍ti gṛhītayā̠ [gṛhītayā, tvayā̠] 3

tvayā̠ śrōtra̍-ṅgṛhṇāmi pra̠jābhya̍ i̠yamu̠pari̍ ma̠tistasyai̠ vāmmā̠tī hē̍ma̠ntō vā̎chyāya̠naḥ pa̠ṅktir​hai̍ma̠ntī pa̠ktyai-nni̠dhana̍vanni̠dhana̍vata āgraya̠ṇa ā̎graya̠ṇā-ttri̍ṇavatrayastri̠gṃ̠śau tri̍ṇavatrayastri̠gṃ̠śābhyāgṃ̍ śākvararaiva̠tē śā̎kvararaiva̠tābhyā̎ṃ vi̠śvaka̠rmar​ṣi̍ḥ pra̠jāpa̍ti gṛhītayā̠ tvayā̠ vācha̍-ṅgṛhṇāmi pra̠jābhya̍ḥ ॥ 4 ॥
(tvayā̠ manō̍-ja̠mada̍gni̠r̠ṛṣi̍ḥ pra̠jāpa̍tigṛhītayā-tri̠gṃ̠śachcha̍) (a. 2)

prāchī̍ di̠śāṃ va̍sa̠nta ṛ̍tū̠nāma̠gnirdē̠vatā̠ brahma̠ dravi̍ṇa-ntri̠vṛ-thstōma̠-ssa u̍ pañchada̠śava̍rtani̠-stryavi̠rvaya̍ḥ kṛ̠tamayā̍nā-mpurōvā̠tō vāta̠-ssāna̍ga̠ ṛṣi̍rdakṣi̠ṇā di̠śā-ṅgrī̠ṣma ṛ̍tū̠nāmindrō̍ dē̠vatā̎ kṣa̠tra-ndravi̍ṇa-mpañchada̠śa-sstōma̠-ssa u̍ saptada̠śa va̍rtani-rdi̍tya̠vāḍ-vaya̠strētā-‘yā̍nā-ndakṣiṇādvā̠tō vāta̍-ssanā̠tana̠ ṛṣi̍ḥ pra̠tīchī̍ di̠śāṃ va̠r̠ṣā ṛ̍tū̠nāṃ viśvē̍ dē̠vā dē̠vatā̠ vi- [dē̠vatā̠ viṭ, dravi̍ṇagṃ] 5

-ḍdravi̍ṇagṃ saptada̠śa stōma̠-ssa u̍ vēkavi̠gṃ̠ śava̍rtani-striva̠thsō vayō̎ dvāpa̠rō-‘yā̍nā-mpaśchādvā̠tō vātō̍-‘ha̠bhūna̠ ṛṣi̠rudī̍chī di̠śāgṃ śa̠rad-ṛ̍tū̠nā-mmi̠trāvaru̍ṇau dē̠vatā̍ pu̠ṣṭa-ndravi̍ṇamēkavi̠gṃ̠śa-sstōma̠-ssa u̍ triṇa̠vava̍rtani-sturya̠vā-ḍvaya̍ āska̠ndō ‘yā̍nāmuttarā-dvā̠tō vāta̍ḥ pra̠tna ṛṣi̍rū̠rdhvā di̠śāgṃ hē̍mantaśiśi̠rāvṛ̍tū̠nā-mbṛha̠spati̍rdē̠vatā̠ varchō̠ dravi̍ṇa-ntriṇa̠va stōma̠-ssa u̍ trayastri̠gṃ̠śava̍rtaniḥ paṣṭha̠vādvayō̍ ‘bhi̠bhūrayā̍nāṃ viṣvagvā̠tō vāta̍-ssupa̠rṇa ṛṣi̍ḥ pi̠tara̍ḥ pitāma̠hāḥ parē-‘va̍rē̠ tē na̍ḥ pāntu̠ tē nō̍-‘vantva̠smi-nbrahma̍nna̠smin kṣa̠trē̎-‘syā-mā̠śiṣya̠syā-mpu̍rō̠dhāyā̍ma̠smin karma̍nna̠syā-ndē̠vahū̎tyām ॥ 6 ॥
(viṭ – pa̍ṣṭha̠vā-dvayō̠ – ‘ṣṭāvigṃ̍śatiścha) (a. 3)

dhru̠vakṣi̍ti -rdhru̠vayō̍ni-rdhru̠vā-‘si̍ dhru̠vāṃ yōni̠mā sī̍da sā̠ddhyā । ukhya̍sya kē̠tu-mpra̍tha̠ma-mpu̠rastā̍da̠śvinā̎-‘ddhva̠ryū sā̍dayatāmi̠ha tvā̎ ॥ svē dakṣē̠ dakṣa̍pitē̠ha sī̍da dēva̠trā pṛ̍thi̠vī bṛ̍ha̠tī rarā̍ṇā । svā̠sa̠sthā ta̠nuvā̠ saṃ vi̍śasva pi̠tēvai̍dhi sū̠nava̠ ā su̠śēvā̠-‘śvinā̎ddhva̠ryū sā̍dayatāmi̠ha tvā̎ ॥ ku̠lā̠yinī̠ vasu̍matī vayō̠dhā ra̠yi-nnō̍ vardha bahu̠lagṃ su̠vīra̎m । 7

apāma̍ti-ndurma̠ti-mbādha̍mānā rā̠yaspōṣē̍ ya̠jñapa̍timā̠bhaja̍ntī̠ suva̍rdhēhi̠ yaja̍mānāya̠ pōṣa̍ma̠śvinā̎-‘ddhva̠ryū sā̍dayatāmi̠ha tvā̎ ॥ a̠gnēḥ purī̍ṣamasi dēva̠yānī̠ tā-ntvā̠ viśvē̍ a̠bhi gṛ̍ṇantu dē̠vāḥ । stōma̍pṛṣṭhā ghṛ̠tava̍tī̠ha sī̍da pra̠jāva̍da̠smē dravi̠ṇā ”ya̍jasvā̠śvinā̎ ‘ddhva̠ryū sā̍dayatāmi̠ha tvā̎ ॥ di̠vō mū̠rdhā-‘si̍ pṛthi̠vyā nābhi̍rvi̠ṣṭambha̍nī di̠śāmadhi̍patnī̠ bhuva̍nānām । 8

ū̠rmirdra̠phsō a̠pāma̍si vi̠śvaka̍rmā ta̠ ṛṣi̍ra̠śvinā̎-‘ddhva̠ryū sā̍dayatāmi̠ha tvā̎ ॥ sa̠jūr-ṛ̠tubhi̍-ssa̠jūrvi̠dhābhi̍-ssa̠jūrvasu̍bhi-ssa̠jū ru̠drai-ssa̠jūrā̍di̠tyai-ssa̠jūrviśvai̎rdē̠vai-ssa̠jūrdē̠vai-ssa̠jūrdē̠vairva̍yō-nā̠dhaira̠gnayē̎ tvā vaiśvāna̠rāyā̠śvinā̎-‘ddhva̠ryū sā̍dayatāmi̠ha tvā̎ ॥ prā̠ṇa-mmē̍ pāhyapā̠na-mmē̍ pāhi vyā̠na-mmē̍ pāhi̠ chakṣu̍rma u̠rvyā vi bhā̍hi̠ śrōtra̍-mmē ślōkayā̠pa-spi̠nvauṣa̍dhīrjinva dvi̠pā-tpā̍hi̠ chatu̍ṣpādava di̠vō vṛṣṭi̠mēra̍ya ॥ 9 ॥
(su̠vīra̠ṃ – bhuva̍nānā – mu̠rvyā – sa̠ptada̍śa cha) (a. 4)

tryavi̠rvaya̍stri̠ṣṭu-pChandō̍ ditya̠vā-ḍvayō̍ vi̠rāṭ Chanda̠ḥ pañchā̍vi̠rvayō̍ gāya̠trī Chanda̍striva̠thsō vaya̍ u̠ṣṇihā̠ Chanda̍ sturya̠vā-ḍvayō̍-‘nu̠ṣṭu-pChanda̍ḥ paṣṭha̠vā-dvayō̍ bṛha̠tī Chanda̍ u̠kṣā vaya̍-ssa̠tōbṛ̍hatī̠ Chanda̍ ṛṣa̠bhō vaya̍ḥ ka̠kuchChandō̍ dhē̠nurvayō̠ jaga̍tī̠ Chandō̍-‘na̠ḍvān. vaya̍ḥ pa̠ṅkti śChandō̍ ba̠stō vayō̍ viva̠la-ñChandō̍ vṛ̠ṣṇirvayō̍ viśā̠la-ñChanda̠ḥ puru̍ṣō̠ vaya̍ sta̠ndra-ñChandō̎ vyā̠ghrō vayō-‘nā̍dhṛṣṭa̠-ñChanda̍-ssi̠gṃ̠hō vaya̍ śCha̠di śChandō̍ viṣṭa̠bhōṃ vayō-‘dhi̍pati̠ śChanda̍ḥ, kṣa̠traṃ vayō̠ maya̍nda̠-ñChandō̍ vi̠śvaka̍rmā̠ vaya̍ḥ paramē̠ṣṭhī Chandō̍ mū̠rdhā vaya̍ḥ pra̠jāpa̍ti̠ śChanda̍ḥ ॥ 10 ॥
(puru̍ṣō̠ vaya̠ḥ – ṣa-ḍvigṃ̍śatiścha) (a. 5)

indrā̎gnī̠ avya̍thamānā̠miṣṭa̍kā-ndṛgṃhataṃ yu̠vam । pṛ̠ṣṭhēna̠ dyāvā̍pṛthi̠vī a̠ntari̍kṣa-ñcha̠ vi bā̍dhatām ॥ vi̠śvaka̍rmā tvā sādayatva̠ntari̍kṣasya pṛ̠ṣṭhē vyacha̍svatī̠-mpratha̍svatī̠-mbhāsva̍tīgṃ sūri̠matī̠mā yā dyā-mbhāsyā pṛ̍thi̠vīmōrva̍ntari̍kṣa-ma̠ntari̍kṣaṃ yachChā̠ntari̍kṣa-ndṛgṃhā̠ntari̍kṣa̠-mmā higṃ̍sī̠ rviśva̍smai prā̠ṇāyā̍pā̠nāya̍ vyā̠nāyō̍dā̠nāya̍ prati̠ṣṭhāyai̍ cha̠ritrā̍ya vā̠yustvā̠-‘bhi pā̍tu ma̠hyā sva̠styā Cha̠rdiṣā̠ [Cha̠rdiṣā̎, śanta̍mēna̠ tayā̍] 11

śanta̍mēna̠ tayā̍ dē̠va̍tayā-‘ṅgira̠sva-ddhru̠vā sī̍da ॥ rājñya̍si̠ prāchī̠ dig-vi̠rāḍa̍si dakṣi̠ṇā di-khsa̠mrāḍa̍si pra̠tīchī̠ dikh-sva̠rāḍa̠syudī̍chī̠ digadhi̍patnyasi bṛha̠tī digāyu̍rmē pāhi prā̠ṇa-mmē̍ pāhyapā̠na-mmē̍ pāhi vyā̠na-mmē̍ pāhi̠ chakṣu̍rmē pāhi̠ śrōtra̍-mmē pāhi̠ manō̍ mē jinva̠ vācha̍-mmē pinvā̠ ”tmāna̍-mmē pāhi̠ jyōti̍rmē yachCha ॥ 12 ॥
(Cha̠rdiṣā̍ – pinva̠ – ṣaṭcha̍) (a. 6)

mā Chanda̍ḥ pra̠mā Chanda̍ḥ prati̠mā Chandō̎-‘srī̠vi śChanda̍ḥ pa̠ṅkti śChanda̍ u̠ṣṇihā̠ Chandō̍ bṛha̠tī Chandō̍-‘nu̠ṣṭu-pChandō̍ vi̠rāṭ Chandō̍ gāya̠trī Chanda̍-stri̠ṣṭu-pChandō̠ jaga̍tī̠ Chanda̍ḥ pṛthi̠vī Chandō̠ ‘ntari̍kṣa̠-ñChandō̠ dyau śChanda̠-ssamā̠ śChandō̠ nakṣa̍trāṇi̠ Chandō̠ mana̠ śChandō̠ vāk Chanda̍ḥ kṛ̠ṣi śChandō̠ hira̍ṇya̠-ñChandō̠ gau śChandō̠ ‘jā Chandō ‘śva̠ śChanda̍ḥ ॥ a̠gnirdē̠vatā̠ [a̠gnirdē̠vatā̎, vātō̍ dē̠vatā̠] 13

vātō̍ dē̠vatā̠ sūryō̍ dē̠vatā̍ cha̠ndramā̍ dē̠vatā̠ vasa̍vō dē̠vatā̍ ru̠drā dē̠vatā̍ ”di̠tyā dē̠vatā̠ viśvē̍ dē̠vā dē̠vatā̍ ma̠rutō̍ dē̠vatā̠ bṛha̠spati̍ rdē̠vatēndrō̍ dē̠vatā̠ varu̍ṇō dē̠vatā̍ mū̠rdhā-‘si̠ rā-ḍdhru̠vā-‘si̍ dha̠ruṇā̍ ya̠ntrya̍si̠ yami̍trī̠ṣē tvō̠rjē tvā̍ kṛ̠ṣyai tvā̠ kṣēmā̍ya tvā̠ yantrī̠ rā-ḍdhru̠vā-‘si̠ dhara̍ṇī dha̠rtrya̍si̠ dhari̠tryāyu̍ṣē tvā̠ varcha̍sē̠ tvauja̍sē tvā̠ balā̍ya tvā ॥ 14 ॥
(dē̠vatā – ”yu̍ṣē tvā̠ – ṣaṭ cha̍ ) (a. 7)

ā̠śustri̠vṛ-dbhā̠ntaḥ pa̍ñchada̠śō vyō̍ma saptada̠śaḥ pratū̎rtiraṣṭāda̠śa stapō̍ navada̠śō̍ ‘bhiva̠rta-ssa̍vi̠gṃ̠śō dha̠ruṇa̍ ēkavi̠gṃ̠śō varchō̎ dvāvi̠gṃ̠śa-ssa̠mbhara̍ṇastrayōvi̠gṃ̠śō yōni̍śchaturvi̠gṃ̠śō garbhā̎ḥ pañchavi̠gṃ̠śa ōja̍striṇa̠vaḥ kratu̍rēkatri̠gṃ̠śaḥ pra̍ti̠ṣṭhā tra̍yastri̠gṃ̠śō bra̠ddhnasya̍ vi̠ṣṭapa̍-ñchatustri̠gṃ̠śō nāka̍-ṣṣaṭtri̠gṃ̠śō vi̍va̠rtō̎-‘ṣṭāchatvāri̠gṃ̠śō dha̠rtraścha̍tuṣṭō̠maḥ ॥ 15 ॥
(ā̠śuḥ – sa̠ptatrigṃ̍śat) (a. 8)

a̠gnērbhā̠gō̍-‘si dī̠kṣāyā̠ ādhi̍patya̠-mbrahma̍ spṛ̠ta-ntri̠vṛ-thstōma̠ indra̍sya bhā̠gō̍-‘si̠ viṣṇō̠rādhi̍patya-ṅkṣa̠tragg​ spṛ̠ta-mpa̍ñchada̠śa-sstōmō̍ nṛ̠chakṣa̍sā-mbhā̠gō̍-‘si dhā̠turādhi̍patya-ñja̠nitragg̍ spṛ̠tagṃ sa̍ptada̠śa-sstōmō̍ mi̠trasya̍ bhā̠gō̍-‘si̠ varu̍ṇa̠syā-”dhi̍patya-ndi̠vō vṛ̠ṣṭirvātā̎-sspṛ̠tā ē̍kavi̠gṃ̠śa-sstōmō-‘di̍tyai bhā̠gō̍-‘si pū̠ṣṇa ādhi̍patya̠mōja̍-sspṛ̠ta-ntri̍ṇa̠va-sstōmō̠ vasū̍nā-mbhā̠gō̍-‘si [ ] 16

ru̠drāṇā̠mādhi̍patya̠-ñchatu̍ṣpā-thspṛ̠ta-ñcha̍turvi̠gṃ̠śa-sstōma̍ ādi̠tyānā̎-mbhā̠gō̍-‘si ma̠rutā̠mādhi̍patya̠-ṅgarbhā̎-sspṛ̠tāḥ pa̍ñchavi̠gṃ̠śa-sstōmō̍ dē̠vasya̍ savi̠turbhā̠gō̍-‘si̠ bṛha̠spatē̠rādhi̍patyagṃ sa̠mīchī̠rdiśa̍-sspṛ̠tāścha̍tuṣṭō̠ma-sstōmō̠ yāvā̍nā-mbhā̠gō̎-‘syayā̍vānā̠mādhi̍patya-mpra̠jā-sspṛ̠tā-ścha̍tu-śchatvāri̠gṃ̠śa-sstōma̍ ṛbhū̠ṇā-mbhā̠gō̍-‘si̠ viśvē̍ṣā-ndē̠vānā̠mādhi̍patya-mbhū̠ta-nniśā̎mtagg​ spṛ̠ta-ntra̍yastri̠gṃ̠śa-sstōma̍ḥ ॥ 17 ॥
(vasū̍nā-mbhā̠gō̍-‘si̠ – ṣaṭcha̍tvārigṃśachcha) (a. 9)

ēka̍yā-‘stuvata pra̠jā a̍dhīyanta pra̠jāpa̍ti̠radhi̍patirāsī-tti̠sṛbhi̍rastuvata̠ brahmā̍sṛjyata̠ brahma̍ṇa̠spati̠-radhi̍patirāsī-tpa̠ñchabhi̍rastuvata bhū̠tānya̍sṛjyanta bhū̠tānā̠-mpati̠radhi̍patirāsī-thsa̠ptabhi̍rastuvata sapta̠r̠ṣayō̍-‘sṛjyanta dhā̠tā-dhi̍patirāsī-nna̠vabhi̍rastuvata pi̠tarō̍-‘sṛjya̠ntā-‘di̍ti̠radhi̍patnyāsī-dēkāda̠śabhi̍-rastuvata̠rtavō̍-‘ sṛjyantā- ”rta̠vō-‘dhi̍pati-rāsī-ttrayōda̠śabhi̍-rastuvata̠ māsā̍ asṛjyanta saṃvathsa̠rō-‘dhi̍pati- [-‘dhi̍patiḥ, ā̠sī̠-tpa̠ñcha̠da̠śabhi̍rastuvata] 18

-rāsī-tpañchada̠śabhi̍rastuvata kṣa̠trama̍sṛjya̠tēndrō ‘dhi̍patirāsī-thsaptada̠śabhi̍rastuvata pa̠śavō̍-‘sṛjyanta̠ bṛha̠spati̠radhi̍pati-rāsīnnavada̠śabhi̍-rastuvata śūdrā̠ryāva̍sṛjyētāmahōrā̠trē adhi̍patnī āstā̠mēka̍vigṃ śatyā-‘stuva̠taika̍śaphāḥ pa̠śavō̍-‘sṛjyanta̠ varu̠ṇō ‘dhi̍patirāsī̠-ttrayō̍vigṃśatyā-‘stuvata kṣu̠drāḥ pa̠śavō̍-‘sṛjyanta pū̠ṣā ‘dhi̍patirāsī̠-tpañcha̍vigṃśatyā ‘stuvatā-”ra̠ṇyāḥ pa̠śavō̍-‘sṛjyanta vā̠yuradhi̍patirāsī-thsa̠ptavigṃ̍śatyā-‘stuvata̠ dyāvā̍pṛthi̠vī vyai̍- [dyāvā̍pṛthi̠vī vi, ī̠tā̠ṃ vasa̍vō ru̠drā] 19

-tā̠ṃ vasa̍vō ru̠drā ā̍di̠tyā anu̠ vyā̍ya̠-ntēṣā̠mādhi̍patyamāsī̠-nnava̍vigṃ śatyā-‘stuvata̠ vana̠spata̍yō-‘sṛjyanta̠ sōmō ‘dhi̍patirāsī̠-dēka̍trigṃśatā ‘stuvata pra̠jā a̍sṛjyanta̠ yāvā̍nā̠-ñchāyā̍vānā̠-ñchā-”dhi̍patyamāsī̠-ttraya̍strigṃśatā ‘stuvata bhū̠tānya̍śāmya-npra̠jāpa̍tiḥ paramē̠ṣṭhyadhi̍patirāsīt ॥ 20 ॥
(sa̠ṃva̠thsa̠rō-‘dhi̍pati̠- rvi – pañcha̍trigṃśachcha) (a. 10)

i̠yamē̠va sā yā pra̍tha̠mā vyauchCha̍da̠ntara̠syā-ñcha̍rati̠ pravi̍ṣṭā । va̠dhūrja̍jāna nava̠gajjani̍trī̠ traya̍ ēnā-mmahi̠māna̍-ssachantē ॥ Chanda̍svatī u̠ṣasā̠ pēpi̍śānē samā̠naṃ yōni̠manu̍ sa̠ñchara̍ntī । sūrya̍patnī̠ vi cha̍rataḥ prajāna̠tī kē̠tu-ṅkṛ̍ṇvā̠nē a̠jara̠ bhūri̍rētasā ॥ ṛ̠tasya̠ panthā̠manu̍ ti̠sra ā-‘gu̠strayō̍ gha̠rmāsō̠ anu̠ jyōti̠ṣā-”gu̍ḥ । pra̠jāmēkā̠ rakṣa̠tyūrja̠mēkā̎ [ ] 21

vra̠tamēkā̍ rakṣati dēvayū̠nām ॥ cha̠tu̠ṣṭō̠mō a̍bhava̠dyā tu̠rīyā̍ ya̠jñasya̍ pa̠kṣāvṛ̍ṣayō̠ bhava̍ntī । gā̠ya̠trī-ntri̠ṣṭubha̠-ñjaga̍tīmanu̠ṣṭubha̍-mbṛ̠hada̠rkaṃ yu̍ñjā̠nā-ssuva̠rā-‘bha̍ranni̠dam ॥ pa̠ñchabhi̍rdhā̠tā vi da̍dhāvi̠daṃ ya-ttāsā̠g̠ svasṝ̍rajanaya̠-tpañcha̍pañcha । tāsā̍mu yanti praya̠vēṇa̠ pañcha̠ nānā̍ rū̠pāṇi̠ krata̍vō̠ vasā̍nāḥ ॥ tri̠gṃ̠śa-thsvasā̍ra̠ upa̍yanti niṣkṛ̠tagṃ sa̍mā̠na-ṅkē̠tu-mpra̍timu̠ñchamā̍nāḥ । 22

ṛ̠tūg​sta̍nvatē ka̠vaya̍ḥ prajāna̠tīrmaddhyē̍Chandasa̠ḥ pari̍ yanti̠ bhāsva̍tīḥ ॥ jyōti̍ṣmatī̠ prati̍ muñchatē̠ nabhō̠ rātrī̍ dē̠vī sūrya̍sya vra̠tāni̍ । vi pa̍śyanti pa̠śavō̠ jāya̍mānā̠ nānā̍rūpā mā̠tura̠syā u̠pasthē̎ ॥ ē̠kā̠ṣṭa̠kā tapa̍sā̠ tapya̍mānā ja̠jāna̠ garbha̍-mmahi̠māna̠mindra̎m । tēna̠ dasyū̠n vya̍sahanta dē̠vā ha̠ntā-‘su̍rāṇā-mabhava̠chChachī̍bhiḥ ॥ anā̍nujāmanu̠jā-mmāma̍karta sa̠tyaṃ vada̠ntyanvi̍chCha ē̠tat । bhū̠yāsa̍- [bhū̠yāsa̎m, a̠sya̠ su̠ma̠tau yathā̍] 23

masya suma̠tau yathā̍ yū̠yama̠nyā vō̍ a̠nyāmati̠ mā pra yu̍kta ॥ abhū̠nmama̍ suma̠tau vi̠śvavē̍dā̠ āṣṭa̍ prati̠ṣṭhāmavi̍da̠ddhi gā̠dham । bhū̠yāsa̍masya suma̠tau yathā̍ yū̠yama̠nyā vō̍ a̠nyāmati̠ mā prayu̍kta ॥ pañcha̠ vyu̍ṣṭī̠ranu̠ pañcha̠ dōhā̠ gā-mpañcha̍nāmnīmṛ̠tavō-‘nu̠ pañcha̍ । pañcha̠ diśa̍ḥ pañchada̠śēna̍ kL​i̠ptā-ssa̍mā̠namū̎rdhnīra̠bhi lō̠kamēka̎m ॥ 24 ॥

ṛ̠tasya̠ garbha̍ḥ pratha̠mā vyū̠ṣuṣya̠pāmēkā̍ mahi̠māna̍-mbibharti । sūrya̠syaikā̠ chara̍ti niṣkṛ̠tēṣu̍ gha̠rmasyaikā̍ savi̠taikā̠-nni ya̍chChati ॥ yā pra̍tha̠mā vyauchCha̠-thsā dhē̠nura̍bhavadya̠mē । sā na̠ḥ paya̍svatī dhu̠kṣvōtta̍rāmuttarā̠gṃ̠ samā̎m ॥ śu̠krar​ṣa̍bhā̠ nabha̍sā̠ jyōti̠ṣā ”gā̎-dvi̠śvarū̍pā śaba̠līra̠gnikē̍tuḥ । sa̠mā̠namarthagg̍ svapa̠syamā̍nā̠ bibhra̍tī ja̠rāma̍jara uṣa̠ ā-‘gā̎ḥ ॥ ṛ̠tū̠nā-mpatnī̎ pratha̠mēyamā-‘gā̠dahnā̎-nnē̠trī ja̍ni̠trī pra̠jānā̎m । ēkā̍ sa̠tī ba̍hu̠dhōṣō̠ vyu̍chCha̠syajī̎rṇā̠ tva-ñja̍rayasi̠ sarva̍ma̠nyat ॥ 25 ॥
(ūrja̠mēkā̎ – pratimu̠ñchamā̍nā – bhū̠yāsa̠ – mēka̠ṃ – patnyē kā̠nna vigṃ̍śa̠tiścha̍) (a. 11)

agnē̍ jā̠tā-npraṇu̍dā na-ssa̠patnā̠-npratyajā̍tāñjātavēdō nudasva । a̠smē dī̍dihi su̠manā̠ ahē̍ḍa̠-ntava̍ syā̠gṃ̠ śarma̍-ntri̠varū̍tha u̠dbhit ॥ saha̍sā jā̠tā-npraṇu̍dāna-ssa̠patnā̠-npratyajā̍tāñjātavēdō nudasva । adhi̍ nō brūhi sumana̠syamā̍nō va̠yagg​ syā̍ma̠ praṇu̍dā na-ssa̠patnān̍ ॥ cha̠tu̠ścha̠tvā̠ri̠gṃ̠śa-sstōmō̠ varchō̠ dravi̍ṇagṃ ṣōḍa̠śa-sstōma̠ ōjō̠ dravi̍ṇa-mpṛthi̠vyāḥ purī̍ṣama̠- [purī̍ṣamasi, aphsō̠ nāma̍ ।] 26

-syaphsō̠ nāma̍ । ēva̠ śChandō̠ vari̍va̠ śChanda̍-śśa̠bhūṃ śChanda̍ḥ pari̠bhū śChanda̍ ā̠chChachChandō̠ mana̠ śChandō̠ vyacha̠ śChanda̠-ssindhu̠ śChanda̍-ssamu̠dra-ñChanda̍-ssali̠la-ñChanda̍-ssa̠ṃyachChandō̍ vi̠yachChandō̍ bṛ̠hachChandō̍ rathanta̠ra-ñChandō̍ nikā̠ya śChandō̍ viva̠dha śChandō̠ gira̠ śChandō̠ bhraja̠ śChanda̍-ssa̠ṣṭu-pChandō̍ ‘nu̠ṣṭu-pChanda̍ḥ ka̠kuchChanda̍ strika̠kuchChanda̍ḥ kā̠vya-ñChandō̎ -‘ṅku̠pa-ñChanda̍ḥ [-‘ṅku̠pa-ñChanda̍ḥ, pa̠dapa̍ṅkti̠ śChandō̠] 27

pa̠dapa̍ṅkti̠ śChandō̠ ‘kṣara̍paṅkti̠ śChandō̍ viṣṭā̠rapa̍ṅkti̠ śChanda̍ḥ, kṣu̠rō bhṛjvā̠ñChanda̍ḥ pra̠chChachChanda̍ḥ pa̠kṣa śChanda̠ ēva̠ śChandō̠ vari̍va̠ śChandō̠ vaya̠ śChandō̍ vaya̠skṛchChandō̍ viśā̠la-ñChandō̠ viṣpa̍rdhā̠ śChanda̍ śCha̠di śChandō̍ dūrōha̠ṇa-ñChanda̍sta̠ndra-ñChandō̎ ‘ṅkā̠ṅka-ñChanda̍ḥ ॥ 28 ॥
(a̠sya̠ – ṅku̠pañChanda̠ – straya̍strigṃśachcha) (a. 12)

a̠gnirvṛ̠trāṇi̍ jaṅghana-ddraviṇa̠syurvi̍pa̠nyayā̎ । sami̍ddha-śśu̠kra āhu̍taḥ ॥ tvagṃ sō̍māsi̠ satpa̍ti̠stvagṃ rājō̠ta vṛ̍tra̠hā । tva-mbha̠drō a̍si̠ kratu̍ḥ ॥ bha̠drā tē̍ agnē svanīka sa̠dṛṅgghō̠rasya̍ sa̠tō viṣu̍ṇasya̠ chāru̍ḥ । na ya-ttē̍ śō̠chistama̍sā̠ vara̍nta̠ na dhva̠smāna̍sta̠nuvi̠ rēpa̠ ā dhu̍ḥ ॥ bha̠dra-ntē̍ agnē sahasi̠nnanī̍kamupā̠ka ā rō̍chatē̠ sūrya̍sya । 29

ruśa̍-ddṛ̠śē da̍dṛśē nakta̠yā chi̠darū̎kṣita-ndṛ̠śa ā rū̠pē anna̎m ॥ sainā-‘nī̍kēna suvi̠datrō̍ a̠smē yaṣṭā̍ dē̠vāgṃ āya̍jiṣṭha-ssva̠sti । ada̍bdhō gō̠pā u̠ta na̍ḥ para̠spā agnē̎ dyu̠madu̠ta rē̠va-ddi̍dīhi ॥ sva̠sti nō̍ di̠vō a̍gnē pṛthi̠vyā vi̠śvāyu̍rdhēhi ya̠jathā̍ya dēva । ya-thsī̠mahi̍ divijāta̠ praśa̍sta̠-ntada̠smāsu̠ dravi̍ṇa-ndhēhi chi̠tram ॥ yathā̍ hōta̠rmanu̍ṣō [hōta̠rmanu̍ṣaḥ, dē̠vatā̍tā] 30

dē̠vatā̍tā ya̠jñēbhi̍-ssūnō sahasō̠ yajā̍si । ē̠vā nō̍ a̠dya sa̍ma̠nā sa̍mā̠nānu̠-śanna̍gna uśa̠tō ya̍kṣi dē̠vān ॥ a̠gnimī̍ḍē pu̠rōhi̍taṃ ya̠jñasya̍ dē̠vamṛ̠tvija̎m । hōtā̍ragṃ ratna̠dhāta̍mam ॥ vṛṣā̍ sōma dyu̠māgṃ a̍si̠ vṛṣā̍ dēva̠ vṛṣa̍vrataḥ । vṛṣā̠ dharmā̍ṇi dadhiṣē ॥ sānta̍panā i̠dagṃ ha̠virmaru̍ta̠stajju̍juṣṭana । yu̠ṣmākō̠tī ri̍śādasaḥ ॥ yō nō̠ martō̍ vasavō dur​hṛṇā̠yusti̠ra-ssa̠tyāni̍ marutō̠ [marutaḥ, jighāgṃ̍sāt ।] 31

jighāgṃ̍sāt । dru̠haḥ pāśa̠-mprati̠ sa mu̍chīṣṭa̠ tapi̍ṣṭhēna̠ tapa̍sā hantanā̠ tam ॥ sa̠ṃva̠thsa̠rīṇā̍ ma̠ruta̍-ssva̠rkā u̍ru̠kṣayā̠-ssaga̍ṇā̠ mānu̍ṣēṣu । tē̎-‘sma-tpāśā̠-npra mu̍ñcha̠ntvagṃha̍sa-ssāntapa̠nā ma̍di̠rā mā̍dayi̠ṣṇava̍ḥ ॥ pi̠prī̠hi dē̠vāgṃ u̍śa̠tō ya̍viṣṭha vi̠dvāgṃ ṛ̠tūgṃr-ṛ̍tupatē yajē̠ha । yē daivyā̍ ṛ̠tvija̠stēbhi̍ragnē̠ tvagṃ hōtṝ̍ṇāma̠syāya̍jiṣṭhaḥ ॥ agnē̠ yada̠dya vi̠śō a̍ddhvarasya hōta̠ḥ pāva̍ka [pāva̍ka, śō̠chē̠ vēṣṭvagṃ hi] 32

śōchē̠ vēṣṭvagṃ hi yajvā̎ । ṛ̠tā ya̍jāsi mahi̠nā vi yadbhūr​ha̠vyā va̍ha yaviṣṭha̠ yā tē̍ a̠dya ॥ a̠gninā̍ ra̠yi-ma̍śñava̠-tpōṣa̍mē̠va di̠vēdi̍vē । ya̠śasa̍ṃ vī̠rava̍ttamam ॥ ga̠ya̠sphānō̍ amīva̠hā va̍su̠vi-tpu̍ṣṭi̠vardha̍naḥ । su̠mi̠tra-ssō̍ma nō bhava ॥ gṛha̍mēdhāsa̠ ā ga̍ta̠ maru̍tō̠ mā-‘pa̍ bhūtana । pra̠mu̠ñchantō̍ nō̠ agṃha̍saḥ ॥ pū̠rvībhi̠r̠hi da̍dāśi̠ma śa̠radbhi̍rmarutō va̠yam । mahō̍bhi- [mahō̍bhiḥ, cha̠r̠ṣa̠ṇī̠nām ।] 33

-śchar​ṣaṇī̠nām ॥ prabu̠ddhniyā̍ īratē vō̠ mahāgṃ̍si̠ praṇāmā̍ni prayajyavastiraddhvam । sa̠ha̠sriya̠-ndamya̍-mbhā̠gamē̠ta-ṅgṛ̍hamē̠dhīya̍-mmarutō juṣaddhvam ॥ upa̠ yamēti̍ yuva̠ti-ssu̠dakṣa̍-ndō̠ṣā vastōr̍. ha̠viṣma̍tī ghṛ̠tāchī̎ । upa̠ svaina̍ma̠rama̍tirva-sū̠yuḥ ॥ i̠mō a̍gnē vī̠tata̍māni ha̠vyā ‘ja̍srō vakṣi dē̠vatā̍ti̠machCha̍ । prati̍ na īgṃ sura̠bhīṇi̍ viyantu ॥ krī̠ḍaṃ va̠-śśardhō̠ māru̍tamana̠rvāṇagṃ̍ rathē̠śubha̎m । 34

kaṇvā̍ a̠bhi pra gā̍yata ॥ atyā̍sō̠ na yē ma̠ruta̠-ssvañchō̍ yakṣa̠dṛśō̠ na śu̠bhaya̍nta̠ maryā̎ḥ । tē ha̍rmyē̠ṣṭhā-śśiśa̍vō̠ na śu̠bhrā va̠thsāsō̠ na pra̍krī̠ḍina̍ḥ payō̠dhāḥ ॥ praiṣā̠majmē̍ṣu vithu̠rēva̍ rējatē̠ bhūmi̠ryāmē̍ṣu̠ yaddha̍ yu̠ñjatē̍ śu̠bhē । tē krī̠ḍayō̠ dhuna̍yō̠ bhrāja̍dṛṣṭaya-ssva̠ya-mma̍hi̠tva-mpa̍nayanta̠ dhūta̍yaḥ ॥ u̠pa̠hva̠rēṣu̠ yadachi̍ddhvaṃ ya̠yiṃ vaya̍ iva maruta̠ḥ kēna̍ [kēna̍, chi̠-tpa̠thā ।] 35

chi-tpa̠thā । śchōta̍nti̠ kōśā̠ upa̍ vō̠ rathē̠ṣvā ghṛ̠tamu̍kṣatā̠ madhu̍varṇa̠marcha̍tē ॥ a̠gnima̍gni̠gṃ̠ havī̍mabhi̠-ssadā̍ havanta vi̠śpati̎m । ha̠vya̠vāha̍-mpurupri̠yam ॥ tagṃ hi śaśva̍nta̠ īḍa̍tē sru̠chā dē̠va-ṅghṛ̍ta̠śchutā̎ । a̠gnigṃ ha̠vyāya̠ vōḍha̍vē ॥ indrā̎gnī rōcha̠nā di̠va-śśñatha̍dvṛ̠tra mindra̍ṃ vō vi̠śvata̠sparīndra̠-nnarō̠ viśva̍karman. ha̠viṣā̍ vāvṛdhā̠nō viśva̍karman. ha̠viṣā̠ vardha̍nēna ॥ 36 ॥
(sūrya̍sya̠ – manu̍ṣō – maruta̠ḥ – pāva̍ka̠ – mahō̍bhī – rathē̠śubha̠ – ṅkēna̠ – ṣaḍcha̍tvārigṃśachcha) (a. 13)

(a̠pāntvēma̍ – nna̠ya-mpu̠rō bhuva̠ḥ – prāchī̎ – dhru̠vakṣi̍ti̠ – stryavi̠ – rindrā̎gnī̠ – mā Chanda̍ – ā̠śustri̠vṛ – da̠gnērbhā̠gō̎ – ‘syēka̍ – yē̠yamē̠va sā yā – ‘gnē̍ jā̠tā – na̠gnirvṛ̠trāṇi̠ – trayō̍daśa )

(a̠pāntvē – ndrā̎gnī – i̠yamē̠va – dē̠vatā̍tā̠ – ṣaṭtrigṃ̍śat )

(a̠pāntvēma̍n, ha̠viṣā̠ vardha̍nēna)

॥ hari̍ḥ ōm ॥

॥ kṛṣṇa yajurvēdīya taittirīya saṃhitāyā-ñchaturtha kāṇḍē tṛtīyaḥ praśna-ssamāptaḥ ॥