KYTS 4.2 Vishnoh Kramosyabhimaatihaa – Krishna Yajurveda Taittiriya Samhita Patha

kṛṣṇa yajurvēdīya taittirīya saṃhitāyā-ñchaturthakāṇḍē dvītīyaḥ praśnaḥ – dēvayajanagrahābhidhānaṃ

ō-nnamaḥ paramātmanē, śrī mahāgaṇapatayē namaḥ,
śrī gurubhyō namaḥ । ha̠ri̠ḥ ōm ॥

viṣṇō̠ḥ kramō̎-‘syabhimāti̠hā gā̍ya̠tra-ñChanda̠ ā rō̍ha pṛthi̠vīmanu̠ vikra̍masva̠ nirbha̍kta̠-ssa ya-ndvi̠ṣmō viṣṇō̠ḥ kramō̎-‘syabhiśasti̠hā traiṣṭu̍bha̠-ñChanda̠ ā rō̍hā̠ntari̍kṣa̠manu̠ vikra̍masva̠ nirbha̍kta̠-ssa ya-ndvi̠ṣmō viṣṇō̠ḥ kramō̎-‘syarātīya̠tō ha̠ntā jāga̍ta̠-ñChanda̠ ā rō̍ha̠ diva̠manu̠ vikra̍masva̠ nirbha̍kta̠-ssa ya-ndvi̠ṣmō viṣṇō̠ḥ [viṣṇō̎ḥ, kramō̍-‘si śatrūya̠tō] 1

kramō̍-‘si śatrūya̠tō ha̠ntā-‘nu̍ṣṭubha̠-ñChanda̠ ā rō̍ha̠ diśō-‘nu̠ vikra̍masva̠ nirbha̍kta̠-ssa ya-ndvi̠ṣmaḥ ॥ akra̍ndada̠gni-ssta̠naya̍nniva̠ dyauḥ, kṣāmā̠ rēri̍ha-dvī̠rudha̍-ssama̠ñjann । sa̠dyō ja̍jñā̠nō vi hīmi̠ddhō akhya̠dā rōda̍sī bhā̠nunā̍ bhātya̠ntaḥ ॥ agnē̎-‘bhyāvartinna̠bhi na̠ ā va̍rta̠svā-”yu̍ṣā̠ varcha̍sā sa̠nyā mē̠dhayā̎ pra̠jayā̠ dhanē̍na ॥ agnē̍ [agnē̎, a̠ṅgi̠ra̠-śśa̠ta-ntē̍] 2

aṅgira-śśa̠ta-ntē̍ santvā̠vṛta̍-ssa̠hasra̍-nta upā̠vṛta̍ḥ । tāsā̠-mpōṣa̍sya̠ pōṣē̍ṇa̠ puna̍rnō na̠ṣṭamā kṛ̍dhi̠ puna̍rnō ra̠yimā kṛ̍dhi ॥ puna̍rū̠rjā niva̍rtasva̠ puna̍ragna i̠ṣā-”yu̍ṣā । puna̍rnaḥ pāhi vi̠śvata̍ḥ ॥ sa̠ha ra̠yyā ni va̍rta̠svāgnē̠ pinva̍sva̠ dhāra̍yā । vi̠śvaphsni̍yā vi̠śva ta̠spari̍ ॥ udu̍tta̠maṃ va̍ruṇa̠ pāśa̍ ma̠smadavā̍-‘dha̠maṃ- [-‘dha̠mam, vi ma̍ddhya̠magg​ śra̍thāya ।] 3

-ँvi ma̍ddhya̠magg​ śra̍thāya । athā̍ va̠yamā̍ditya vra̠tē tavānā̍gasō̠ adi̍tayē syāma ॥ ā tvā̍-‘hār​ṣa-ma̠ntara̍bhūrdhru̠vasti̠ṣṭhā ‘vi̍chāchaliḥ । viśa̍stvā̠ sarvā̍ vāñChantva̠smi-nrā̠ṣṭramadhi̍ śraya ॥agrē̍ bṛ̠hannu̠ṣasā̍mū̠rdhvō a̍sthānnirjagmi̠vān-tama̍sō̠ jyōti̠ṣā-”gā̎t । a̠gnirbhā̠nunā̠ ruśa̍tā̠ svaṅga̠ ā jā̠tō viśvā̠ sadmā̎nyaprāḥ ॥ sīda̠ tva-mmā̠tura̠syā [sīda̠ tva-mmā̠tura̠syā̎ḥ, u̠pasthē̠ viśvā̎nyagnē] 4

u̠pasthē̠ viśvā̎nyagnē va̠yunā̍ni vi̠dvān । mainā̍ma̠rchiṣā̠ mā tapa̍sā̠-‘bhi śū̍śuchō̠-‘ntara̍syāgṃ śu̠krajyō̍ti̠rvi bhā̍hi ॥ a̠ntara̍gnē ru̠chā tvamu̠khāyai̠ sada̍nē̠ svē । tasyā̠stvagṃ hara̍sā̠ tapa̠ñjāta̍vēda-śśi̠vō bha̍va ॥ śi̠vō bhū̠tvā mahya̍ma̠gnē-‘thō̍ sīda śi̠vastvam । śi̠vāḥ kṛ̠tvā diśa̠-ssarvā̠-ssvāṃ yōni̍mi̠hā-” sa̍daḥ ॥ ha̠gṃ̠sa-śśu̍chi̠ṣa dvasu̍rantarikṣa̠-saddhōtā̍ vēdi̠ṣadati̍thi rdurōṇa̠sat । nṛ̠ṣadva̍ra̠sa-dṛ̍ta̠sa-dvyō̍ma̠sa-da̠bjā gō̠jā ṛ̍ta̠jā a̍dri̠jā ṛ̠ta-mbṛ̠hat ॥ 5 ॥
(diva̠manu̠ vi kra̍masva̠ nirbha̍kta̠-ssa ya-ndvi̠ṣmō viṣṇō̠ – rdhanē̠nāgnē̍ – ‘dha̠ma – ma̠syāḥ – śu̍chi̠ṣath – ṣōḍa̍śa cha) (a. 1)

di̠vaspari̍ pratha̠ma-ñja̍jñē a̠gnira̠sma-ddvi̠tīya̠-mpari̍ jā̠tavē̍dāḥ । tṛ̠tīya̍ma̠phsu nṛ̠maṇā̠ aja̍sra̠mindhā̍na ēna-ñjaratē svā̠dhīḥ ॥ vi̠dmā tē̍ agnē trē̠dhā tra̠yāṇi̍ vi̠dmā tē̠ sadma̠ vibhṛ̍ta-mpuru̠trā । vi̠dmā tē̠ nāma̍ para̠ma-ṅguhā̠ yadvi̠dmā tamuthsa̠ṃ yata̍ āja̠gantha̍ ॥ sa̠mu̠drē tvā̍ nṛ̠maṇā̍ a̠phsva̍ntarnṛ̠chakṣā̍ īdhē di̠vō a̍gna̠ ūdhann̍ । tṛ̠tīyē̎ tvā̠ [tṛ̠tīyē̎ tvā, raja̍si tasthi̠vāgṃ sa̍mṛ̠tasya̠] 6

raja̍si tasthi̠vāgṃ sa̍mṛ̠tasya̠ yōnau̍ mahi̠ṣā a̍hinvann ॥ akra̍ndada̠gni-ssta̠naya̍nniva̠ dyauḥ, kṣāmā̠ rēri̍ha-dvī̠rudha̍-ssama̠ñjann । sa̠dyō ja̍jñā̠nō vi hīmi̠ddhō akhya̠dā rōda̍sī bhā̠nunā̍ bhātya̠ntaḥ ॥ u̠śi-kpā̍va̠kō a̍ra̠ti-ssu̍mē̠dhā martē̎ṣva̠gnira̠mṛtō̠ nidhā̍yi । iya̍rti dhū̠mama̍ru̠ṣa-mbhari̍bhra̠duchChu̠krēṇa̍ śō̠chiṣā̠ dyāmina̍kṣat ॥ viśva̍sya kē̠turbhuva̍nasya̠ garbha̠ ā [ ] 7

rōda̍sī apṛṇā̠jjāya̍mānaḥ । vī̠ḍu-ñchi̠dadri̍mabhina-tparā̠yan janā̠ yada̠gnimaya̍janta̠ pañcha̍ ॥ śrī̠ṇāmu̍dā̠rō dha̠ruṇō̍ rayī̠ṇā-mma̍nī̠ṣāṇā̠-mprārpa̍ṇa̠-ssōma̍gōpāḥ । vasō̎-ssū̠nu-ssaha̍sō a̠phsu rājā̠ vi bhā̠tyagra̍ u̠ṣasā̍midhā̠naḥ ॥ yastē̍ a̠dya kṛ̠ṇava̍-dbhadraśōchē-‘pū̠pa-ndē̍va ghṛ̠tava̍ntamagnē । prata-nna̍ya prata̠rāṃ vasyō̠ achChā̠bhi dyu̠mna-ndē̠vabha̍ktaṃ yaviṣṭha ॥ ā [ ] 8

ta-mbha̍ja sauśrava̠sēṣva̍gna u̠ktha-u̍ktha̠ ā bha̍ja śa̠syamā̍nē । pri̠ya-ssūryē̎ pri̠yō a̠gnā bha̍vā̠tyujjā̠tēna̍ bhi̠nada̠dujjani̍tvaiḥ ॥ tvāma̍gnē̠ yaja̍mānā̠ anu̠ dyūn. viśvā̠ vasū̍ni dadhirē̠ vāryā̍ṇi । tvayā̍ sa̠ha dravi̍ṇami̠chChamā̍nā vra̠ja-ṅgōma̍ntamu̠śijō̠ vi va̍vruḥ ॥ dṛ̠śā̠nō ru̠kma u̠rvyā vya̍dyau-ddu̠rmar​ṣa̠māyu̍-śśri̠yē ru̍chā̠naḥ । a̠gnira̠mṛtō̍ abhava̠-dvayō̍bhi̠ryadē̍- -na̠-ndyauraja̍naya-thsu̠rētā̎ḥ ॥ 9 ॥
(tṛtiyē̎ tvā̠ – garbha̠ ā – ya̍vi̠ṣṭhā-” – ya – chcha̠tvāri̍ cha) (a. 2)

anna̍pa̠tē-‘nna̍sya nō dēhyanamī̠vasya̍ śu̠ṣmiṇa̍ḥ । pra pra̍dā̠tāra̍-ntāriṣa̠ ūrja̍-nnō dhēhi dvi̠padē̠ chatu̍ṣpadē ॥ udu̍ tvā̠ viśvē̍ dē̠vā agnē̠ bhara̍ntu̠ chitti̍bhiḥ । sa nō̍ bhava śi̠vata̍ma-ssu̠pratī̍kō vi̠bhāva̍suḥ ॥ prēda̍gnē̠ jyōti̍ṣmān. yāhi śi̠vēbhi̍ra̠rchibhi̠stvam । bṛ̠hadbhi̍-rbhā̠nubhi̠-rbhāsa̠-nmā higṃ̍sī sta̠nuvā̎ pra̠jāḥ ॥ sa̠midhā̠-‘gni-ndu̍vasyata ghṛ̠tairbō̍dhaya̠tāti̍thim । ā- [ā, a̠smi̠n̠. ha̠vyā ju̍hōtana ।] 10

-‘smi̍n. ha̠vyā ju̍hōtana ॥ praprā̠yama̠gnirbha̍ra̠tasya̍ śṛṇvē̠ vi ya-thsūryō̠ na rōcha̍tē bṛ̠hadbhāḥ । a̠bhi yaḥ pū̠ru-mpṛta̍nāsu ta̠sthau dī̠dāya̠ daivyō̠ ati̍thi-śśi̠vō na̍ḥ ॥ āpō̍ dēvī̠ḥ prati̍ gṛhṇīta̠ bhasmai̠ta-thsyō̠nē kṛ̍ṇuddhvagṃ sura̠bhāvu̍ lō̠kē । tasmai̍ namantā̠-ñjana̍ya-ssu̠patnī̎rmā̠tēva̍ pu̠tra-mbi̍bhṛ̠tā svē̍nam ॥ a̠phsva̍gnē̠ sadhi̠ṣṭava̠- [a̠phsva̍gnē̠ sadhi̠ṣṭava̍, sauṣa̍dhī̠ranu̍ ruddhyasē ।] 11

sauṣa̍dhī̠ranu̍ ruddhyasē । garbhē̠ sañjā̍yasē̠ puna̍ḥ ॥ garbhō̍ a̠syōṣa̍dhīnā̠-ṅgarbhō̠ vana̠spatī̍nām । garbhō̠ viśva̍sya bhū̠tasyāgnē̠ garbhō̍ a̠pāma̍si ॥ pra̠sadya̠ bhasma̍nā̠ yōni̍ma̠paścha̍ pṛthi̠vīma̍gnē । sa̠gṃ̠sṛjya̍ mā̠tṛbhi̠stva-ñjyōti̍ṣmā̠-npuna̠rā-‘sa̍daḥ ॥ puna̍rā̠sadya̠ sada̍nama̠paścha̍ pṛthi̠vīma̍gnē । śēṣē̍ mā̠turyathō̠pasthē̠ ‘ntara̠syāgṃ śi̠vata̍maḥ ॥ puna̍rū̠rjā [ ] 12

-ni va̍rtasva̠ puna̍ragna i̠ṣā ”yu̍ṣā । puna̍rnaḥ pāhi vi̠śvata̍ḥ ॥ sa̠ha ra̠yyā ni va̍rta̠svāgnē̠ pinva̍sva̠ dhāra̍yā । vi̠śvaphsni̍yā vi̠śvata̠spari̍ ॥ puna̍stvā ”di̠tyā ru̠drā vasa̍va̠-ssami̍ndhatā̠-mpuna̍rbra̠hmāṇō̍ vasunītha ya̠jñaiḥ । ghṛ̠tēna̠ tva-nta̠nuvō̍ vardhayasva sa̠tyā-ssa̍ntu̠ yaja̍mānasya̠ kāmā̎ḥ ॥ bōdhā̍ nō a̠sya vacha̍sō yaviṣṭha̠ magṃhi̍ṣṭhasya̠ prabhṛ̍tasya svadhāvaḥ । pīya̍ti tvō̠ anu̍ tvō gṛṇāti va̠ndāru̍stē ta̠nuva̍ṃ vandē agnē ॥ sa bō̍dhi sū̠rirma̠ghavā̍ vasu̠dāvā̠ vasu̍patiḥ । yu̠yō̠ddhya̍sma-ddvēṣāgṃ̍si ॥ 13 ॥
(ā – tavō̠ – rjā-‘ – nu̠ – ṣōḍa̍śa cha) (a. 3)

apē̍ta̠ vīta̠ vi cha̍ sarpa̠tātō̠ yē-‘tra̠ stha pu̍rā̠ṇā yē cha̠ nūta̍nāḥ । adā̍di̠daṃ ya̠mō̍-‘va̠sāna̍-mpṛthi̠vyā akra̍nni̠ma-mpi̠tarō̍ lō̠kama̍smai ॥ a̠gnērbhasmā̎sya̠gnēḥ purī̍ṣamasi sa̠jñānna̍masi kāma̠dhara̍ṇa̠-mmayi̍ tē kāma̠dhara̍ṇa-mbhūyāt ॥ saṃ yā va̍ḥ pri̠yāsta̠nuva̠-ssa-mpri̠yā hṛda̍yāni vaḥ । ā̠tmā vō̍ astu̠ [astu, sampri̍ya̠] 14

sampri̍ya̠-ssampri̍yāsta̠nuvō̠ mama̍ ॥ a̠yagṃ sō a̠gniryasmi̠n-thsōma̠mindra̍-ssu̠ta-nda̠dhē ja̠ṭharē̍ vāvaśā̠naḥ । sa̠ha̠sriya̠ṃ vāja̠matya̠-nna saptigṃ̍ sasa̠vān-thsan-thstū̍yasē jātavēdaḥ ॥ agnē̍ di̠vō arṇa̠machChā̍ jigā̠syachChā̍ dē̠vāgṃ ū̍chiṣē̠ dhiṣṇi̍yā̠ yē । yāḥ pa̠rastā̎-drōcha̠nē sūrya̍sya̠ yāśchā̠ vastā̍-dupa̠tiṣṭha̍nta̠ āpa̍ḥ ॥ agnē̠ ya-ttē̍ di̠vi varcha̍ḥ pṛthi̠vyāṃ yadōṣa̍dhī- [pṛthi̠vyāṃ yadōṣa̍dhīṣu, a̠phsu vā̍ yajatra ।] 15

-ṣva̠phsu vā̍ yajatra । yēnā̠ntari̍kṣa-mu̠rvā̍ta̠tantha̍ tvē̠ṣa-ssa bhā̠nura̍rṇa̠vō nṛ̠chakṣā̎ḥ ॥ pu̠rī̠ṣyā̍sō a̠gnaya̍ḥ prāva̠ṇēbhi̍-ssa̠jōṣa̍saḥ । ju̠ṣantāgṃ̍ ha̠vyamāhu̍tamanamī̠vā iṣō̍ ma̠hīḥ ॥ iḍā̍magnē puru̠dagṃ sagṃ̍ sa̠ni-ṅgō-śśa̍śvatta̠magṃ hava̍mānāya sādha । syānna̍-ssū̠nustana̍yō vi̠jāvā-‘gnē̠ sā tē̍ suma̠tirbhū̎tva̠smē ॥ a̠ya-ntē̠ yōni̍r-ṛ̠tviyō̠ yatō̍ jā̠tō arō̍chathāḥ । ta-ñjā̠na- [ta-ñjā̠nann, a̠gna̠ ā rō̠hāthā̍ nō] 16

-nna̍gna̠ ā rō̠hāthā̍ nō vardhayā ra̠yim ॥ chida̍si̠ tayā̍ dē̠vata̍yā-‘ṅgira̠sva-ddhru̠vā sī̍da pari̠chida̍si̠ tayā̍ dē̠vata̍yā-‘ṅgira̠sva-ddhru̠vā sī̍da lō̠ka-mpṛ̍ṇa Chi̠dra-mpṛ̠ṇāthō̍ sīda śi̠vā tvam । i̠ndrā̠gnī tvā̠ bṛha̠spati̍ra̠smin. yōnā̍vasīṣadann ॥ tā a̍sya̠ sūda̍dōhasa̠-ssōmagg̍ śrīṇanti̠ pṛśña̍yaḥ । janma̍-ndē̠vānā̠ṃ viśa̍stri̠ṣvā rō̍cha̠nē di̠vaḥ ॥ 17 ॥
(a̠stvō – ṣa̍dhīṣu – jā̠na – nna̠ṣṭācha̍tvārigṃśachcha) (a. 4)

sami̍ta̠gṃ̠ saṅka̍lpēthā̠gṃ̠ sampri̍yau rōchi̠ṣṇū su̍mana̠syamā̍nau । iṣa̠mūrja̍ma̠bhi sa̠ṃvasā̍nau̠ saṃ vā̠-mmanāgṃ̍si̠ saṃ vra̠tā samu̍ chi̠ttānyā-‘ka̍ram ॥ agnē̍ purīṣyādhi̠pā bha̍vā̠ tva-nna̍ḥ । iṣa̠mūrja̠ṃ yaja̍mānāya dhēhi ॥ pu̠rī̠ṣya̍stvama̍gnē rayi̠mā-npu̍ṣṭi̠māgṃ a̍si । śi̠vāḥ kṛ̠tvā diśa̠-ssarvā̠-ssvāṃ yōni̍mi̠hā-‘sa̍daḥ ॥ bhava̍ta-nna̠-ssama̍nasau̠ samō̍kasā [samō̍kasau, a̠rē̠pasau̎ ।] 18

-varē̠pasau̎ । mā ya̠jñagṃ higṃ̍siṣṭa̠-mmā ya̠jñapa̍ti-ñjātavēdasau śi̠vau bha̍vatama̠dya na̍ḥ ॥ mā̠tēva̍ pu̠tra-mpṛ̍thi̠vī pu̍rī̠ṣya̍ma̠gnigg​ svē yōnā̍vabhāru̠khā । tāṃ viśvai̎rdē̠vair-ṛ̠tubhi̍-ssaṃvidā̠naḥ pra̠jāpa̍tirvi̠śvaka̍rmā̠ vi mu̍ñchatu ॥ yada̠sya pā̠rē raja̍sa-śśu̠kra-ñjyōti̠rajā̍yata । ta-nna̍ḥ par​ṣa̠dati̠ dviṣō-‘gnē̍ vaiśvānara̠ svāhā̎ ॥ nama̠-ssu tē̍ nir-ṛtē viśvarūpē- [viśvarūpē, a̠ya̠smaya̠ṃ vi chṛ̍tā] 19

-‘ya̠smaya̠ṃ vi chṛ̍tā ba̠ndhamē̠tam । ya̠mēna̠ tvaṃ ya̠myā̍ saṃ vidā̠nōtta̠ma-nnāka̠madhi̍ rōhayē̠mam ॥ yattē̍ dē̠vī nir-ṛ̍tirāba̠bandha̠ dāma̍ grī̠vāsva̍ vicha̠rtyam । i̠da-ntē̠ ta-dviṣyā̠ṃ yāyu̍ṣō̠ na maddhyā̠dathā̍ jī̠vaḥ pi̠tuma̍ddhi̠ pramu̍ktaḥ ॥ yasyā̎stē a̠syāḥ krū̠ra ā̠sañju̠hōmyē̠ṣā-mba̠ndhānā̍mava̠sarja̍nāya । bhūmi̠riti̍ tvā̠ janā̍ vi̠durnir-ṛ̍ti̠- [vi̠durnir-ṛ̍tiḥ, iti̍ tvā̠ ‘ha-mpari̍] 20

-riti̍ tvā̠ ‘ha-mpari̍ vēda vi̠śvata̍ḥ ॥ asu̍nvanta̠ma ya̍jamānamichCha stē̠nasyē̠tyān-taska̍ra̠syān vē̍ṣi । a̠nya ma̠sma-di̍chCha̠ sā ta̍ i̠tyā namō̍ dēvi nir-ṛtē̠ tubhya̍mastu ॥ dē̠vīma̠ha-nnir-ṛ̍ti̠ṃ vanda̍mānaḥ pi̠tēva̍ pu̠tra-nda̍sayē̠ vachō̍bhiḥ । viśva̍sya̠ yā jāya̍mānasya̠ vēda̠ śira̍-śśira̠ḥ prati̍ sū̠rī vi cha̍ṣṭē ॥ ni̠vēśa̍na-ssa̠ṅgama̍nō̠ vasū̍nā̠ṃ viśvā̍ rū̠pā-‘bhi cha̍ṣṭē̠ [rū̠pā-‘bhi cha̍ṣṭē, śachī̍bhiḥ ।] 21

śachī̍bhiḥ । dē̠va i̍va savi̠tā sa̠tyadha̠rmēndrō̠ na ta̍sthau sama̠rē pa̍thī̠nām ॥ saṃ va̍ra̠trā da̍dhātana̠ nirā̍hā̠vān kṛ̍ṇōtana । si̠ñchāma̍hā ava̠ṭamu̠driṇa̍ṃ va̠yaṃ viśvā-‘hā-‘da̍sta̠makṣi̍tam ॥ niṣkṛ̍tāhā-vamava̠ṭagṃ su̍vara̠tragṃ su̍ṣēcha̠nam । u̠driṇagṃ̍ siñchē̠ akṣi̍tam ॥ sīrā̍ yuñjanti ka̠vayō̍ yu̠gā vi ta̍nvatē̠ pṛtha̍k । dhīrā̍ dē̠vēṣu̍ sumna̠yā ॥ yu̠nakta̠ sīrā̠ vi yu̠gā ta̍nōta kṛ̠tē yōnau̍ vapatē̠ha [ ] 22

bīja̎m । gi̠rā cha̍ śru̠ṣṭi-ssabha̍rā̠ asa̍nnō̠ nēdī̍ya̠ i-thsṛ̠ṇyā̍ pa̠kvamā ‘ya̍t ॥ lāṅga̍la̠-mpavī̍ravagṃ su̠śēvagṃ̍ suma̠tithsa̍ru । udi-tkṛ̍ṣati̠ gāmavi̍-mprapha̠rvya̍-ñcha̠ pīva̍rīm । pra̠sthāva̍-dratha̠vāha̍nam ॥ śu̠na-nna̠ḥ phālā̠ vi tu̍dantu̠ bhūmigṃ̍ śu̠na-ṅkī̠nāśā̍ a̠bhi ya̍ntu vā̠hān । śu̠na-mpa̠rjanyō̠ madhu̍nā̠ payō̍bhi̠-śśunā̍sīrā śu̠nama̠smāsu̍ dhattam ॥ kāma̍-ṅkāmadughē dhukṣva mi̠trāya̠ varu̍ṇāya cha । indrā̍yā̠gnayē̍ pū̠ṣṇa ōṣa̍dhībhyaḥ pra̠jābhya̍ḥ ॥ghṛ̠tēna̠ sītā̠ madhu̍nā̠ sama̍ktā̠ viśvai̎rdē̠vairanu̍matā ma̠rudbhi̍ḥ । ūrja̍svatī̠ paya̍sā̠ pinva̍mānā̠-‘smān-thsī̍tē̠ paya̍sā̠-‘bhyā-va̍vṛthsva ॥ 23 ॥
(samō̍kasau-viśvarūpē-vi̠durnir-ṛ̍ti-ra̠bhi cha̍ṣṭa-i̠ha-mi̠trāya̠-dvāvigṃ̍śatiścha) (a. 5)

yā jā̠tā ōṣa̍dhayō dē̠vēbhya̍striyu̠ga-mpu̠rā । mandā̍mi ba̠bhrūṇā̍ma̠hagṃ śa̠ta-ndhāmā̍ni sa̠pta cha̍ ॥ śa̠taṃ vō̍ aba̠-ndhāmā̍ni sa̠hasra̍mu̠ta vō̠ ruha̍ḥ । athā̍ śatakratvō yū̠yami̠ma-mmē̍ aga̠da-ṅkṛ̍ta ॥ puṣpā̍vatīḥ pra̠sūva̍tīḥ pha̠linī̍rapha̠lā u̠ta । aśvā̍ iva sa̠jitva̍rī-rvī̠rudha̍ḥ pārayi̠ṣṇava̍ḥ ॥ ōṣa̍dhī̠riti̍ mātara̠-stadvō̍ dēvī̠-rupa̍ bruvē । rapāgṃ̍si vighna̠tīri̍ta̠ rapa̍- [vighna̠tīri̍ta̠ rapa̍ḥ, chā̠taya̍mānāḥ ।] 24

-śchā̠taya̍mānāḥ ॥ a̠śva̠tthē vō̍ ni̠ṣada̍na-mpa̠rṇē vō̍ vasa̠tiḥ kṛ̠tā । gō̠bhāja̠ i-tkilā̍satha̠ ya-thsa̠nava̍tha̠ pūru̍ṣam ॥ yada̠haṃ vā̠jaya̍-nni̠mā ōṣa̍dhī̠r̠hasta̍ āda̠dhē । ā̠tmā yakṣma̍sya naśyati pu̠rā jī̍va̠gṛbhō̍ yathā ॥ yadōṣa̍dhaya-ssa̠ṅgachCha̍ntē̠ rājā̍na̠-ssami̍tā viva । vipra̠-ssa u̍chyatē bhi̠ṣag-ra̍kṣō̠hā ‘mī̍va̠ chāta̍naḥ ॥ niṣkṛ̍ti̠-rnāma̍vō mā̠tā-‘thā̍ yū̠yagg​stha̠ saṅkṛ̍tīḥ । sa̠rāḥ pa̍ta̠triṇī̎- [sa̠rāḥ pa̍ta̠triṇī̎ḥ, stha̠na̠ yadā̠ maya̍ti̠] 25

-sthana̠ yadā̠ maya̍ti̠ niṣkṛ̍ta ॥ a̠nyā vō̍ a̠nyāma̍va-tva̠nyā-‘nyasyā̠ upā̍vata । tā-ssarvā̠ ōṣa̍dhaya-ssaṃvidā̠nā i̠da-mmē̠ prāva̍tā̠ vacha̍ḥ ॥ uchChuṣmā̠ ōṣa̍dhīnā̠-ṅgāvō̍ gō̠ṣṭhā di̍vēratē । dhanagṃ̍ sani̠ṣyantī̍ nāmā̠tmāna̠-ntava̍ pūruṣa ॥ ati̠ viśvā̎ḥ pari̠ṣṭhā̍-sstē̠na i̍va vra̠jama̍kramuḥ । ōṣa̍dhaya̠ḥ prāchu̍chyavu̠ rya-tki-ñcha̍ ta̠nuvā̠gṃ̠ rapa̍ḥ ॥ yā- [yāḥ, ta̠ ā̠ta̠sthu-rā̠tmāna̠ṃ yā] 26

-sta̍ āta̠sthu-rā̠tmāna̠ṃ yā ā̍vivi̠śuḥ paru̍ḥ paruḥ । tāstē̠ yakṣma̠ṃ vibā̍dhantā mu̠grō ma̍ddhyama̠śīri̍va ॥ sā̠kaṃ ya̍kṣma̠ pra pa̍ta śyē̠nēna̍ kikidī̠vinā̎ । sā̠kaṃ vāta̍sya̠-dhrājyā̍ sā̠ka-nna̍śya ni̠hāka̍yā ॥ a̠śvā̠va̠tīgṃ sō̍mava̠tī mū̠rjaya̍ntī̠ mudō̍jasam । ā vi̍thsi̠ sarvā̠ ōṣa̍dhīra̠smā a̍ri̠ṣṭatā̍tayē ॥ yāḥ pha̠linī̠ryā a̍pha̠lā a̍pu̠ṣpā yāścha̍ pu̠ṣpiṇī̎ḥ । bṛha̠spati̍ prasūtā̠ stānō̍ muñcha̠ntvagṃ ha̍saḥ ॥ yā [yāḥ, ōṣa̍dhaya̠-ssōma̍rājñī̠ḥ] 27

ōṣa̍dhaya̠-ssōma̍rājñī̠ḥ pravi̍ṣṭāḥ pṛthi̠vīmanu̍ । tāsā̠-ntvama̍syutta̠mā praṇō̍ jī̠vāta̍vē-suva ॥ a̠va̠pata̍ntīravada-ndi̠va ōṣa̍dhaya̠ḥ pari̍ । ya-ñjī̠va ma̠śñavā̍ mahai̠ na sa ri̍ṣyāti̠ pūru̍ṣaḥ ॥ yāśchē̠da mu̍pa-śṛ̠ṇvanti̠ yāścha̍ dū̠ra-mparā̍gatāḥ । i̠ha sa̠ṅgatya̠ tā-ssarvā̍ a̠smai sa-nda̍tta bhēṣa̠jam ॥ mā vō̍ riṣa-tkhani̠tā yasmai̍ chā̠ha-ṅkhanā̍mi vaḥ । dvi̠pa-chchatu̍ṣpa-da̠smāka̠gṃ̠ sarva̍-ma̠stvanā̍turam ॥ ōṣa̍dhaya̠-ssaṃ va̍dantē̠ sōmē̍na sa̠ha rājñā̎ । yasmai̍ ka̠rōti̍ brāhma̠ṇastagṃ rā̍ja-npārayāmasi ॥ 28 ॥
(rapa̍ḥ – pata̠triṇī̠- ryā – agṃha̍sō̠ yāḥ – khanā̍mi vō̠ – ‘ṣṭāda̍śa cha) (a. 6)

mā nō̍ higṃsījjani̠tā yaḥ pṛ̍thi̠vyā yō vā̠ divagṃ̍ sa̠tyadha̍rmā ja̠jāna̍ । yaśchā̠paścha̠ndrā bṛ̍ha̠tīrja̠jāna̠ kasmai̍ dē̠vāya̍ ha̠viṣā̍ vidhēma ॥ a̠bhyāva̍rtasva pṛthivi ya̠jñēna̠ paya̍sā sa̠ha । va̠pā-ntē̍ a̠gniri̍ṣi̠tō-‘va̍ sarpatu ॥ agnē̠ ya-ttē̍ śu̠kraṃ yachcha̠ndraṃ ya-tpū̠taṃ ya-dya̠jñiya̎m । ta-ddē̠vēbhyō̍ bharāmasi ॥ iṣa̠mūrja̍ma̠hami̠ta ā [ā, da̠da̠ ṛ̠tasya̠ dhāmnō̍] 29

da̍da ṛ̠tasya̠ dhāmnō̍ a̠mṛta̍sya̠ yōnē̎ḥ । ā nō̠ gōṣu̍ viśa̠tvauṣa̍dhīṣu̠ jahā̍mi sē̠dimani̍rā̠mamī̍vām ॥ agnē̠ tava̠ śravō̠ vayō̠ mahi̍ bhrājantya̠rchayō̍ vibhāvasō । bṛha̍-dbhānō̠ śava̍sā̠ vāja̍mu̠kthya̍-ndadhā̍si dā̠śuṣē̍ kavē ॥ i̠ra̠jyanna̍gnē prathayasva ja̠ntubhi̍ra̠smē rāyō̍ amartya । sa da̍r​śa̠tasya̠ vapu̍ṣō̠ vi rā̍jasi pṛ̠ṇakṣi̍ sāna̠sigṃ ra̠yim ॥ ūrjō̍ napā̠jjāta̍vēda-ssuśa̠stibhi̠-rmanda̍sva [ ] 30

dhī̠tibhi̍r​hi̠taḥ । tvē iṣa̠-ssa-nda̍dhu̠-rbhūri̍rētasa-śchi̠trō ta̍yō vā̠majā̍tāḥ ॥ pā̠va̠kava̍rchā-śśu̠krava̍rchā̠ anū̍navarchā̠ udi̍yar​ṣi bhā̠nunā̎ । pu̠traḥ pi̠tarā̍ vi̠chara̠nnupā̍vasyu̠bhē pṛ̍ṇakṣi̠ rōda̍sī ॥ ṛ̠tāvā̍na-mmahi̠ṣaṃ vi̠śvacha̍r​ṣaṇima̠gnigṃ su̠mnāya̍ dadhirē pu̠rō janā̎ḥ । śrutka̍rṇagṃ sa̠pratha̍stama-ntvā gi̠rā daivya̠-mmānu̍ṣā yu̠gā ॥ ni̠ṣka̠rtāra̍-maddhva̠rasya̠ prachē̍tasa̠-ṅkṣaya̍nta̠gṃ̠ rādha̍sē ma̠hē । rā̠ti-mbhṛgū̍ṇāmu̠śija̍-ṅka̠vikra̍tu-mpṛ̠ṇakṣi̍ sāna̠sigṃ – [sāna̠sim, ra̠yim ।] 31

ra̠yim ॥ chita̍-sstha pari̠chita̍ ūrdhva̠chita̍-śśrayaddhva̠-ntayā̍ dē̠vata̍yā-‘ṅgira̠sva-ddhru̠vā-ssī̍data ॥ ā pyā̍yasva̠ samē̍tu tē vi̠śvata̍-ssōma̠ vṛṣṇi̍yam । bhavā̠ vāja̍sya saṅga̠thē ॥ sa-ntē̠ payāgṃ̍si̠ samu̍ yantu̠ vājā̠-ssaṃ vṛṣṇi̍yā-nyabhimāti̠ṣāha̍ḥ । ā̠pyāya̍mānō a̠mṛtā̍ya sōma di̠vi śravāg̍syutta̠māni̍ dhiṣva ॥ 32 ॥
(ā – manda̍sva – sāna̠si – mēkā̠nnacha̍tvāri̠gṃ̠śachcha̍) (a. 7)

a̠bhya̍sthā̠-dviśvā̠ḥ pṛta̍nā̠ arā̍tī̠stada̠gnirā̍ha̠ tadu̠ sōma̍ āha । bṛha̠spati̍-ssavi̠tā tanma̍ āha pū̠ṣā mā̍-‘dhā-thsukṛ̠tasya̍ lō̠kē ॥ yadakra̍ndaḥ pratha̠ma-ñjāya̍māna u̠dyan-thsa̍mu̠drādu̠ta vā̠ purī̍ṣāt । śyē̠nasya̍ pa̠kṣā ha̍ri̠ṇasya̍ bā̠hū upa̍stuta̠-ñjani̍ma̠ ta-ttē̍ arvann ॥ a̠pā-mpṛ̠ṣṭhama̍si̠ yōni̍ra̠gnē-ssa̍mu̠drama̠bhita̠ḥ pinva̍mānam । vardha̍māna-mma̠ha [vardha̍māna-mma̠haḥ, ā cha̠ puṣka̍ra-ndi̠vō] 33

ā cha̠ puṣka̍ra-ndi̠vō mātra̍yā vari̠ṇā pra̍thasva ॥ brahma̍ jajñā̠na-mpra̍tha̠ma-mpu̠rastā̠dvi sī̍ma̠ta-ssu̠ruchō̍ vē̠na ā̍vaḥ । sa bu̠ddhniyā̍ upa̠mā a̍sya vi̠ṣṭhā-ssa̠taścha̠ yōni̠masa̍taścha̠ viva̍ḥ ॥ hi̠ra̠ṇya̠ga̠rbha-ssama̍varta̠tāgrē̍ bhū̠tasya̍ jā̠taḥ pati̠rēka̍ āsīt । sa dā̍dhāra pṛthi̠vī-ndyāmu̠tēmā-ṅkasmai̍ dē̠vāya̍ ha̠viṣā̍ vidhēma ॥ dra̠phsaścha̍skanda pṛthi̠vīmanu̠- [pṛthi̠vīmanu̍, dyāmi̠ma-ñcha̠] 34

-dyāmi̠ma-ñcha̠ yōni̠manu̠ yaścha̠ pūrva̍ḥ । tṛ̠tīya̠ṃ yōni̠manu̍ sa̠ñchara̍nta-ndra̠phsa-ñju̍hō̠myanu̍ sa̠pta hōtrā̎ḥ ॥ namō̍ astu sa̠rpēbhyō̠ yē kē cha̍ pṛthi̠vīmanu̍ । yē a̠ntari̍kṣē̠ yē di̠vi tēbhya̍-ssa̠rpēbhyō̠ nama̍ḥ ॥ yē̍-‘dō rō̍cha̠nē di̠vō yē vā̠ sūrya̍sya ra̠śmiṣu̍ । yēṣā̍ma̠phsu sada̍ḥ kṛ̠ta-ntēbhya̍-ssa̠rpēbhyō̠ nama̍ḥ ॥ yā iṣa̍vō yātu̠ dhānā̍nā̠ṃ ँyē vā̠ vana̠spatī̠gṃ̠ranu̍ । yē vā̍-‘va̠ṭēṣu̠ śēra̍tē̠ tēbhya̍-ssa̠rpēbhyō̠ nama̍ḥ ॥ 35 ॥
(ma̠hō – ‘nu̍ – yātu̠dhānā̍nā̠ – mēkā̍daśa cha) (a. 8)

dhru̠vā-‘si̍ dha̠ruṇā-‘stṛ̍tā vi̠śvaka̍rmaṇā̠ sukṛ̍tā । mā tvā̍ samu̠dra udva̍dhī̠nmā su̍pa̠rṇō vya̍thamānā pṛthi̠vī-ndṛgṃ̍ha ॥ pra̠jāpa̍tistvā sādayatu pṛthi̠vyāḥ pṛ̠ṣṭhē vyacha̍svatī̠-mpratha̍svatī̠-mprathō̍-‘si pṛthi̠vya̍si̠ bhūra̍si̠ bhūmi̍ra̠syadi̍tirasi vi̠śvadhā̍yā̠ viśva̍sya̠ bhuva̍nasya dha̠rtrī pṛ̍thi̠vīṃ ya̍chCha pṛthi̠vī-ndṛgṃ̍ha pṛthi̠vī-mmā higṃ̍sī̠rviśva̍smai prā̠ṇāyā̍pā̠nāya̍ vyā̠nāyō̍dā̠nāya̍ prati̠ṣṭhāyai̍ [prati̠ṣṭhāyai̎, cha̠ritrā̍yā̠-] 36

cha̠ritrā̍yā̠-‘gnistvā̠-‘bhi pā̍tu ma̠hyā sva̠styā Cha̠rdiṣā̠ śanta̍mēna̠ tayā̍ dē̠vata̍yā-‘ṅgira̠sva-ddhru̠vā sī̍da ॥ kāṇḍā̎-tkāṇḍā-tpra̠rōha̍ntī̠ paru̍ṣaḥparuṣa̠ḥ pari̍ । ē̠vā nō̍ dūrvē̠ pra ta̍nu sa̠hasrē̍ṇa śa̠tēna̍ cha ॥ yā śa̠tēna̍ prata̠nōṣi̍ sa̠hasrē̍ṇa vi̠rōha̍si । tasyā̎stē dēvīṣṭakē vi̠dhēma̍ ha̠viṣā̍ va̠yam ॥ aṣā̍ḍhā-‘si̠ saha̍mānā̠ saha̠svārā̍tī̠-ssaha̍svārātīya̠ta-ssaha̍sva̠ pṛta̍nā̠-ssaha̍sva pṛtanya̠taḥ । sa̠hasra̍vīryā- [sa̠hasra̍vīryā, a̠si̠ sā mā̍ jinva ।] 37

-‘si̠ sā mā̍ jinva ॥ madhu̠ vātā̍ ṛtāya̠tē madhu̍ kṣaranti̠ sindha̍vaḥ । māddhvī̎rna-ssa̠ntvōṣa̍dhīḥ ॥ madhu̠ nakta̍mu̠tōṣasi̠ madhu̍ma̠-tpārthi̍va̠gṃ̠ raja̍ḥ । madhu̠ dyaura̍stu naḥ pi̠tā ॥ madhu̍mā-nnō̠ vana̠spati̠-rmadhu̍māgṃ astu̠ sūrya̍ḥ । māddhvī̠rgāvō̍ bhavantu naḥ ॥ ma̠hī dyauḥ pṛ̍thi̠vī cha̍ na i̠maṃ ya̠jña-mmi̍mikṣatām । pi̠pṛ̠tā-nnō̠ bharī̍mabhiḥ ॥ ta-dviṣṇō̎ḥ para̠ma- [para̠mam, pa̠dagṃ sadā̍ paśyanti] 38

-mpa̠dagṃ sadā̍ paśyanti sū̠raya̍ḥ । di̠vīva̠ chakṣu̠rāta̍tam ॥ dhru̠vā-‘si̍ pṛthivi̠ saha̍sva pṛtanya̠taḥ । syū̠tā dē̠vēbhi̍ra̠mṛtē̠nā ”gā̎ḥ ॥ yāstē̍ agnē̠ sūryē̠ rucha̍ udya̠tō diva̍māta̠nvanti̍ ra̠śmibhi̍ḥ । tābhi̠-ssarvā̍bhī ru̠chē janā̍ya naskṛdhi ॥ yā vō̍ dēvā̠-ssūryē̠ ruchō̠ gōṣvaśvē̍ṣu̠ yā rucha̍ḥ । indrā̎gnī̠ tābhi̠-ssarvā̍bhī̠ rucha̍-nnō dhatta bṛhaspatē ॥ vi̠rā- [vi̠rāṭ, jyōti̍radhāraya-] 39

-ḍjyōti̍radhāraya-thsa̠mrā-ḍjyōti̍radhāraya-thsva̠rā-ḍjyōti̍radhārayat ॥ agnē̍ yu̠kṣvā hi yē tavāśvā̍sō dēva sā̠dhava̍ḥ । ara̠ṃ vaha̍ntyā̠śava̍ḥ ॥ yu̠kṣvā hi dē̍va̠hūta̍mā̠gṃ̠ aśvāgṃ̍ agnē ra̠thīri̍va । ni hōtā̍ pū̠rvya-ssa̍daḥ ॥ dra̠phsaścha̍skanda pṛthi̠vīmanu̠ dyāmi̠ma-ñcha̠ yōni̠manu̠ yaścha̠ pūrva̍ḥ । tṛ̠tīya̠ṃ yōni̠manu̍ sa̠ñchara̍nta-ndra̠phsa-ñju̍hō̠myanu̍ sa̠pta [ ] 40

hōtrā̎ḥ ॥ abhū̍di̠daṃ viśva̍sya̠ bhuva̍nasya̠ vāji̍nama̠gnē-rvai̎śvāna̠rasya̍ cha । a̠gnirjyōti̍ṣā̠ jyōti̍ṣmā-nru̠kmō varcha̍sā̠ varcha̍svān ॥ ṛ̠chē tvā̍ ru̠chē tvā̠ sami-thsra̍vanti sa̠ritō̠ na dhēnā̎ḥ । a̠ntar​hṛ̠dā mana̍sā pū̠yamā̍nāḥ ॥ ghṛ̠tasya̠ dhārā̍ a̠bhi chā̍kaśīmi । hi̠ra̠ṇyayō̍ vēta̠sō maddhya̍ āsām ॥ tasmin̎thsupa̠rṇō ma̍dhu̠kṛ-tku̍lā̠yī bhaja̍nnāstē̠ madhu̍ dē̠vatā̎bhyaḥ । tasyā̍ sa tē̠ hara̍ya-ssa̠pta tīrē̎ sva̠dhā-nduhā̍nā a̠mṛta̍sya̠ dhārā̎m ॥ 41 ॥
(pra̠ti̠ṣṭhāyai̍ – sa̠hasra̍vīryā – para̠maṃ – ँvi̠rāṭth – sa̠pta – tīrē̍ – cha̠tvāri̍ cha) (a. 9)

ā̠di̠tya-ṅgarbha̠-mpaya̍sā sama̠ñjan-thsa̠hasra̍sya prati̠māṃ vi̠śvarū̍pam । pari̍ vṛṅgdhi̠ hara̍sā̠ mā-‘bhi mṛ̍kṣa-śśa̠tāyu̍ṣa-ṅkṛṇuhi chī̠yamā̍naḥ ॥ i̠ma-mmā higṃ̍sīrdvi̠pāda̍-mpaśū̠nāgṃ saha̍srākṣa̠ mēdha̠ ā chī̠yamā̍naḥ । ma̠yumā̍ra̠ṇyamanu̍ tē diśāmi̠ tēna̍ chinvā̠nasta̠nuvō̠ ni ṣī̍da ॥ vāta̍sya̠ dhrāji̠ṃ varu̍ṇasya̠ nābhi̠maśva̍-ñjajñā̠nagṃ sa̍ri̠rasya̠ maddhyē̎ । śiśu̍-nna̠dīnā̠gṃ̠ hari̠madri̍buddha̠magnē̠ mā higṃ̍sīḥ [mā higṃ̍sīḥ, pa̠ra̠mē vyō̍mann ।] 42

para̠mē vyō̍mann ॥ i̠ma-mmā higṃ̍sī̠rēka̍śapha-mpaśū̠nā-ṅka̍nikra̠daṃ vā̠jina̠ṃ vāji̍nēṣu । gau̠ramā̍ra̠ṇyamanu̍ tē diśāmi̠ tēna̍ chinvā̠nasta̠nuvō̠ ni ṣī̍da ॥ aja̍sra̠mindu̍maru̠ṣa-mbhu̍ra̠ṇyuma̠gnimī̍ḍē pū̠rvachi̍ttau̠ namō̍bhiḥ । sa parva̍bhir-ṛtu̠śaḥ kalpa̍mānō̠ gā-mmā higṃ̍sī̠radi̍tiṃ vi̠rāja̎m ॥ i̠magṃ sa̍mu̠dragṃ śa̠tadhā̍ra̠mu-thsa̍ṃ vya̠chyamā̍na̠-mbhuva̍nasya̠ maddhyē̎ । ghṛ̠ta-nduhā̍nā̠-madi̍ti̠-ñjanā̠yāgnē̠ mā [-madi̍ti̠-ñjanā̠yāgnē̠ mā, hi̠gṃ̠sī̠ḥ pa̠ra̠mē vyō̍mann ।] 43

higṃ̍sīḥ para̠mē vyō̍mann । ga̠va̠yamā̍ra̠ṇyamanu̍ tē diśāmi̠ tēna̍ chinvā̠nasta̠nuvō̠ ni ṣī̍da ॥ varū̎tri̠-ntvaṣṭu̠rvaru̍ṇasya̠ nābhi̠mavi̍-ñjajñā̠nāgṃ raja̍sa̠ḥ para̍smāt । ma̠hīgṃ sā̍ha̠srīmasu̍rasya mā̠yāmagnē̠ mā higṃ̍sīḥ para̠mē vyō̍mann ॥ i̠māmū̎rṇā̠yuṃ varu̍ṇasya mā̠yā-ntvacha̍-mpaśū̠nā-ndvi̠padā̠-ñchatu̍ṣpadām । tvaṣṭu̍ḥ pra̠jānā̎-mpratha̠ma-ñja̠nitra̠magnē̠ mā higṃ̍sīḥ para̠mē vyō̍mann । uṣṭra̍māra̠ṇyamanu̍ [uṣṭra̍māra̠ṇyamanu̍, tē̠ di̠śā̠mi̠ tēna̍] 44

tē diśāmi̠ tēna̍ chinvā̠nasta̠nuvō̠ ni ṣī̍da ॥ yō a̠gnira̠gnēsta-pa̠sō-‘dhi̍ jā̠ta-śśōchā̎-tpṛthi̠vyā u̠ta vā̍ di̠vaspari̍ । yēna̍ pra̠jā vi̠śvaka̍rmā̠ vyāna̠-ṭtama̍gnē̠ hēḍa̠ḥ pari̍ tē vṛṇaktu ॥ a̠jā hya̍gnēraja̍niṣṭa̠ garbhā̠-thsā vā a̍paśyajjani̠tāra̠magrē̎ । tayā̠ rōha̍māya̠nnupa̠ mēddhyā̍sa̠stayā̍ dē̠vā dē̠vatā̠magra̍ āyann । śa̠ra̠bha-( )-mā̍ra̠ṇyamanu̍ tē diśāmi̠ tēna̍ chinvā̠nasta̠nuvō̠ niṣī̍da ॥ 45 ॥
(agnē̠ mā higṃ̍sī̠ – ragnē̠ mōṣṭra̍mā – ra̠ṇyamanu̍ – śara̠bhan – nava̍ cha) (a. 10)

(ā̠di̠tya mi̠mandvi̠pādē̍ ma̠yuṃ vāta̠syā ‘śva̍ mi̠ma mēka̍śapha ṅgau̠rama ja̍sraṅgava̠yaṃ varū̎tri̠ mavi̍ mi̠māmū̎rṇā̠ryu muṣṭra̠ṃ yō a̠gni-śśa̍ra̠bhaṃ )

indrā̎gnī rōcha̠nā di̠vaḥ pari̠ vājē̍ṣu bhūṣathaḥ । tadvā̎-ñchēti̠ pravī̠rya̎m ॥ śñatha̍-dvṛ̠tramu̠ta sa̍nōti̠ vāja̠mindrā̠ yō a̠gnī sahu̍rī sapa̠ryāt । i̠ra̠jyantā̍ vasa̠vya̍sya̠ bhūrē̠-ssaha̍stamā̠ saha̍sā vāja̠yantā̎ ॥ pra cha̍r​ṣa̠ṇibhya̍ḥ pṛtanā̠ havē̍ṣu̠ pra pṛ̍thi̠vyā ri̍richāthē di̠vaścha̍ । pra sindhu̍bhya̠ḥ pragi̠ribhyō̍ mahi̠tvā prēndrā̎gnī̠ viśvā̠ bhuva̠nā-‘tya̠nyā ॥ maru̍tō̠ yasya̠ hi [ ] 46

kṣayē̍ pā̠thā di̠vō vi̍mahasaḥ । sa su̍gō̠pāta̍mō̠ jana̍ḥ ॥ ya̠jñairvā̍ yajñavāhasō̠ vipra̍sya vā matī̠nām । maru̍ta-śśṛṇu̠tā hava̎m ॥ śri̠yasē̠ ka-mbhā̠nubhi̠-ssa-mmi̍mikṣirē̠ tē ra̠śmibhi̠sta ṛkva̍bhi-ssukhā̠daya̍ḥ । tē vāśī̍manta i̠ṣmiṇō̠ abhī̍ravō vi̠drē pri̠yasya̠ māru̍tasya̠ dhāmna̍ḥ ॥ ava̍ tē̠ hēḍa̠, udu̍tta̠mam ॥ kayā̍ naśchi̠tra ā bhu̍vadū̠tī sa̠dā vṛ̍dha̠-ssakhā̎ । kayā̠ śachi̍ṣṭhayā vṛ̠tā ॥ 47 ॥

kō a̠dya yu̍ṅktē dhu̠ri gā ṛ̠tasya̠ śimī̍vatō bhā̠minō̍ dur​hṛṇā̠yūn । ā̠sanni̍ṣūn. hṛ̠thsvasō̍ mayō̠bhūn. ya ē̍ṣā-mbhṛ̠tyāmṛ̠ṇadha̠-thsa jī̍vāt ॥ agnē̠ nayā, ”dē̠vānā̠gṃ̠ śannō̍ bhavantu̠, vājē̍vājē। a̠phsva̍gnē̠ sadhi̠ṣṭava̠ sauṣa̍dhī̠ranu̍ ruddhyasē । garbhē̠ sañjā̍yasē̠ puna̍ḥ ॥ vṛṣā̍ sōma dyu̠māgṃ a̍si̠ vṛṣā̍ dēva̠ vṛṣa̍vrataḥ । vṛṣā̠ dharmā̍ṇi dadhiṣē ॥ i̠ma-mmē̍ varuṇa̠ , tattvā̍ yāmi̠tva-nnō̍ agnē̠sa tva-nnō̍ agnē ॥ 48 ॥
(hi – vṛ̠tā – ma̠ – ēkā̍daśa cha ) (a. 11)

(viṣṇō̠ḥ kramō̍-‘si – di̠vaspa – ryanna̍pa̠tē – ‘pē̍ta̠ – sami̍ta̠ṃ – ँyā jā̠tā – mā nō̍ higṃsī – da̠bhya̍sthā-d- dhru̠vā – ‘syā̍di̠tyaṅgarbha̠ – mindrā̎gnī rōcha̠ – naikā̍daśa )

(viṣṇō̍ – rasmin. ha̠vyē – ti̍ tvā̠-‘haṃ – dhī̠tibhi̠ – r​hōtrā̍ – a̠ṣṭācha̍tvārigṃśat)

(viṣṇō̠ḥ kramō̍-‘si̠, tvannō̍ agnē̠ sa tvannō̍ agnē)

॥ hari̍ḥ ōm ॥

॥ kṛṣṇa yajurvēdīya taittirīya saṃhitāyā-ñchaturtha kāṇḍē dvitīyaḥ praśna-ssamāptaḥ ॥