KYTS 4.1 Yunjanah Prathamam Manah – Krishna Yajurveda Taittiriya Samhita Patha

kṛṣṇa yajurvēdīya taittirīya saṃhitāyā-ñchaturthakāṇḍē prathamaḥ praśnaḥ- agnichityaṅga mantrapāṭhābhidhānaṃ

ō-nnamaḥ paramātmanē, śrī mahāgaṇapatayē namaḥ,
śrī gurubhyō namaḥ । ha̠ri̠ḥ ōm ॥

yu̠ñjā̠naḥ pra̍tha̠ma-mmana̍sta̠tvāya̍ savi̠tā dhiya̍ḥ । a̠gni-ñjyōti̍rni̠chāyya̍ pṛthi̠vyā addhyā ‘bha̍rat ॥ yu̠ktvāya̠ mana̍sā dē̠vān-thsuva̍rya̠tō dhi̠yā diva̎m । bṛ̠hajjyōti̍ḥ kariṣya̠ta-ssa̍vi̠tā prasu̍vāti̠ tān ॥ yu̠ktēna̠ mana̍sā va̠ya-ndē̠vasya̍ savi̠tu-ssa̠vē । su̠va̠rgēyā̍ya̠ śaktyai̎ ॥ yu̠ñjatē̠ mana̍ u̠ta yu̍ñjatē̠ dhiyō̠ viprā̠ vipra̍sya bṛha̠tō vi̍pa̠śchita̍ḥ । vi hōtrā̍ dadhē vayunā̠ vidēka̠ i- [vayunā̠ vidēka̠ it, ma̠hī dē̠vasya̍] 1

-nma̠hī dē̠vasya̍ savi̠tuḥ pari̍ṣṭutiḥ ॥ yu̠jē vā̠-mbrahma̍ pū̠rvya-nnamō̍bhi̠rvi ślōkā̍ yanti pa̠thyē̍va̠ sūrā̎ḥ । śṛ̠ṇvanti̠ viśvē̍ a̠mṛta̍sya pu̠trā ā yē dhāmā̍ni di̠vyāni̍ ta̠sthuḥ ॥ yasya̍ pra̠yāṇa̠manva̠nya idya̠yurdē̠vā dē̠vasya̍ mahi̠māna̠marcha̍taḥ । yaḥ pārthi̍vāni vima̠mē sa ēta̍śō̠ rajāgṃ̍si dē̠va-ssa̍vi̠tā ma̍hitva̠nā ॥ dēva̍ savita̠ḥ prasu̍va ya̠jña-mprasa̍va [ ] 2

ya̠jñapa̍ti̠-mbhagā̍ya di̠vyō ga̍ndha̠rvaḥ । kē̠ta̠pūḥ kēta̍nnaḥ punātu vā̠chaspati̠rvācha̍ma̠dya sva̍dāti naḥ ॥ i̠ma-nnō̍ dēva savitarya̠jña-mprasu̍va dēvā̠yuvagṃ̍ sakhi̠vidagṃ̍ satrā̠jita̍-ndhana̠jitagṃ̍ suva̠rjita̎m ॥ ṛ̠chā stōma̠gṃ̠ sama̍rdhaya gāya̠trēṇa̍ rathanta̠ram । bṛ̠ha-dgā̍ya̠trava̍rtani ॥ dē̠vasya̍ tvā savi̠tuḥ pra̍sa̠vē̎ ‘śvinō̎rbā̠hubhyā̎-mpū̠ṣṇō hastā̎bhyā-ṅgāya̠trēṇa̠ Chanda̠sā ”da̍dē-‘ṅgira̠svadabhri̍rasi̠ nāri̍- [nāri̍ḥ, a̠si̠ pṛ̠thi̠vyā-ssa̠dhasthā̍-] 3

-rasi pṛthi̠vyā-ssa̠dhasthā̍-da̠gni-mpu̍rī̠ṣya̍maṅgira̠svadā bha̍ra̠ traiṣṭu̍bhēna tvā̠ Chanda̠sā ”da̍dē-‘ṅgira̠sva-dbabhri̍rasi̠ nāri̍rasi̠ tvayā̍ va̠yagṃ sa̠dhastha̠ āgnigṃ śa̍kēma̠ khani̍tu-mpurī̠ṣya̍-ñjāga̍tēna tvā̠ Chanda̠sā ”da̍dē-‘ṅgira̠svaddhasta̍ ā̠dhāya̍ savi̠tā bibhra̠dabhrigṃ̍ hira̠ṇyayī̎m । tayā̠ jyōti̠raja̍sra̠-mida̠gni-ṅkhā̠tvī na̠ ā bha̠rānu̍ṣṭubhēna tvā̠ Chanda̠sā ”da̍dē-‘ṅgira̠svat ॥ 4 ॥
(i–dya̠jña-mprasu̍va̠ – nāri̠ – rānu̍ṣṭubhēna tvā̠ Chanda̍sā̠ – trīṇi̍ cha) (a. 1)

i̠māma̍gṛbhṇa-nraśa̠nāmṛ̠tasya̠ pūrva̠ āyu̍ṣi vi̠dathē̍ṣu ka̠vyā । tayā̍ dē̠vā-ssu̠tamā ba̍bhūvur-ṛ̠tasya̠ sāma̎m-thsa̠ramā̠rapa̍ntī ॥ pratū̎rtaṃ vāji̠nnā dra̍va̠ vari̍ṣṭhā̠manu̍ sa̠ṃvata̎m । di̠vi tē̠ janma̍ para̠mama̠ntari̍kṣē̠ nābhi̍ḥ pṛthi̠vyāmadhi̠ yōni̍ḥ ॥ yu̠ñjāthā̠gṃ̠ rāsa̍bhaṃ yu̠vama̠smin. yāmē̍ vṛṣaṇvasū । a̠gni-mbhara̍ntamasma̠yum ॥ yōgē̍yōgē ta̠vasta̍ra̠ṃ vājē̍vājē havāmahē । sakhā̍ya̠ indra̍ma̠tayē̎ ॥ pra̠tūrva̠- [pra̠tūrvann̍, ēhya̍va̠krāma̠nnaśa̍stī] 5

-nnēhya̍va̠krāma̠nnaśa̍stī ru̠drasya̠ gāṇa̍patyā-nmayō̠bhūrēhi̍ । u̠rva̍ntari̍kṣa̠manvi̍hi sva̠sti ga̍vyūti̠rabha̍yāni kṛ̠ṇvann ॥ pū̠ṣṇā sa̠yujā̍ sa̠ha । pṛ̠thi̠vyā-ssa̠dhasthā̍da̠gni-mpu̍rī̠ṣya̍-maṅgira̠sva-dachChē̎hya̠gni-mpu̍rī̠ṣya̍ -maṅgira̠svada-chChē̍mō̠-‘gni-mpu̍rī̠ṣya̍-maṅgira̠sva-dbha̍riṣyāmō̠-‘gni-mpu̍rī̠ṣya̍-maṅgira̠sva-dbha̍rāmaḥ ॥ anva̠gniru̠ṣasā̠-magra̍makhya̠-danvahā̍ni pratha̠mō jā̠tavē̍dāḥ । anu̠ sūrya̍sya [sūrya̍sya, pu̠ru̠trā cha̍] 6

puru̠trā cha̍ ra̠śmīnanu̠ dyāvā̍pṛthi̠vī ā ta̍tāna ॥ ā̠gatya̍ vā̠jyaddhva̍na̠-ssarvā̠ mṛdhō̠ vidhū̍nutē । a̠gnigṃ sa̠dhasthē̍ maha̠ti chakṣu̍ṣā̠ ni chi̍kīṣatē ॥ ā̠kramya̍ vāji-npṛthi̠vīma̠gnimi̍chCha ru̠chā tvam । bhūmyā̍ vṛ̠tvāya̍ nō brūhi̠ yata̠ḥ khanā̍ma̠ taṃ va̠yam ॥ dyaustē̍ pṛ̠ṣṭha-mpṛ̍thi̠vī sa̠dhastha̍mā̠tmā ‘ntari̍kṣagṃ samu̠drastē̠ yōni̍ḥ । vi̠khyāya̠ chakṣu̍ṣā̠ tvama̠bhi ti̍ṣṭha [tvama̠bhi ti̍ṣṭha, pṛ̠ta̠nya̠taḥ ।] 7

pṛtanya̠taḥ ॥ utkrā̍ma maha̠tē saubha̍gāyā̠-smādā̠sthānā̎-ddraviṇō̠dā vā̍jinn । va̠yagg​ syā̍ma suma̠tau pṛ̍thi̠vyā a̠gni-ṅkha̍ni̠ṣyanta̍ u̠pasthē̍ asyāḥ ॥ uda̍kramī-ddraviṇō̠dā vā̠jyarvā-‘ka̠-ssa lō̠kagṃ sukṛ̍ta-mpṛthi̠vyāḥ । tata̍ḥ khanēma su̠pratī̍kama̠gnigṃ suvō̠ ruhā̍ṇā̠ adhi̠ nāka̍ utta̠mē ॥ a̠pō dē̠vīrupa̍ sṛja̠ madhu̍matīraya̠kṣmāya̍ pra̠jābhya̍ḥ । tāsā̠g̠ sthānā̠dujji̍hatā̠-mōṣa̍dhaya-ssupippa̠lāḥ ॥ jigha̍- [jigha̍rmi, a̠gni-mmana̍sā] 8

-rmya̠gni-mmana̍sā ghṛ̠tēna̍ prati̠kṣyanta̠-mbhuva̍nāni̠ viśvā̎ । pṛ̠thu-nti̍ra̠śchā vaya̍sā bṛ̠hanta̠ṃ vyachi̍ṣṭha̠mannagṃ̍ rabha̠saṃ vidā̍nam ॥ ā tvā̍ jigharmi̠ vacha̍sā ghṛ̠tēnā̍-‘ra̠kṣasā̠ mana̍sā̠ tajju̍ṣasva । marya̍śrī-sspṛha̠ya-dva̍rṇō a̠gnirnā-‘bhi̠mṛśē̍ ta̠nuvā̠ jar​hṛ̍ṣāṇaḥ ॥ pari̠ vāja̍patiḥ ka̠vira̠gnir-ha̠vyānya̍kramīt । dadha̠-dratnā̍ni dā̠śuṣē̎ ॥ pari̍ tvā-‘gnē̠ pura̍ṃ va̠yaṃ vipragṃ̍ sahasya dhīmahi । dhṛ̠ṣa-dva̍rṇa-ndi̠vēdi̍vē bhē̠ttāra̍-mbhaṅgu̠rāva̍taḥ ॥ tvama̍gnē̠ dyubhi̠stva-mā̍śuśu̠kṣaṇi̠stva-ma̠dbhyastva-maśma̍na̠spari̍ । tvaṃ vanē̎bhya̠ stvamōṣa̍dhībhya̠ stva-nnṛ̠ṇā-nnṛ̍patē jāyasē̠ śuchi̍ḥ ॥ 9 ॥
(pra̠tūrva̠nth – sūrya̍sya – tiṣṭha̠ – jigha̍rmi – bhē̠ttāra̍ṃ – ँvigṃśa̠tiścha̍) (a. 2)

dē̠vasya̍ tvā savi̠tuḥ pra̍sa̠vē̎-‘śvinō̎ rbā̠hubhyā̎-mpū̠ṣṇō hastā̎bhyā-mpṛthi̠vyā-ssa̠dhasthē̠-‘gni-mpu̍rī̠ṣya̍-maṅgira̠sva-tkha̍nāmi ॥ jyōti̍ṣmanta-ntvā-‘gnē su̠pratī̍ka̠maja̍srēṇa bhā̠nunā̠ dīdyā̍nam । śi̠va-mpra̠jābhyō-‘higṃ̍ santa-mpṛthi̠vyā-ssa̠dhasthē̠-‘gni-mpu̍rī̠ṣya̍ -maṅgira̠sva-tkha̍nāmi ॥ a̠pā-mpṛ̠ṣṭhama̍si sa̠prathā̍ u̠rva̍gni-mbha̍ri̠ṣyadapa̍rāvapiṣṭham । vardha̍māna-mma̠ha ā cha̠ puṣka̍ra-ndi̠vō mātra̍yā vari̠ṇā pra̍thasva ॥ śarma̍ cha sthō̠ [śarma̍ cha sthaḥ, varma̍ cha] 10

varma̍ cha sthō̠ achChi̍drē bahu̠lē u̠bhē । vyacha̍svatī̠ saṃ va̍sāthā-mbha̠rtama̠gni-mpu̍rī̠ṣya̎m ॥ saṃva̍sāthāgṃ suva̠rvidā̍ sa̠mīchī̠ ura̍sā̠ tmanā̎ । a̠gnima̠nta rbha̍ri̠ṣyantī̠ jyōti̍ṣmanta̠ maja̍sra̠mit ॥ pu̠rī̠ṣyō̍-‘si vi̠śvabha̍rāḥ । atha̍rvā tvā pratha̠mō nira̍manthadagnē ॥ tvāma̍gnē̠ puṣka̍rā̠daddhyatha̍rvā̠ nira̍manthata । mū̠rdhnō viśva̍sya vā̠ghata̍ḥ ॥ tamu̍ tvā da̠ddhyaṅṅṛṣi̍ḥ pu̠tra ī̍dhē̠ [pu̠tra ī̍dhē, atha̍rvaṇaḥ ।] 11

atha̍rvaṇaḥ । vṛ̠tra̠haṇa̍-mpuranda̠ram ॥ tamu̍ tvā pā̠thyō vṛṣā̠ samī̍dhē dasyu̠hanta̍mam । dha̠na̠ñja̠yagṃ raṇē̍raṇē ॥ sīda̍ hōta̠-ssva u̍ lō̠kē chi̍ki̠tvān-thsā̠dayā̍ ya̠jñagṃ su̍kṛ̠tasya̠ yōnau̎ । dē̠vā̠vīrdē̠vān. ha̠viṣā̍ yajā̠syagnē̍ bṛ̠ha-dyaja̍mānē̠ vayō̍ dhāḥ ॥ ni hōtā̍ hōtṛ̠ṣada̍nē̠ vidā̍nastvē̠ṣō dī̍di̠vāgṃ a̍sada-thsu̠dakṣa̍ḥ । ada̍bdhavrata pramati̠rvasi̍ṣṭha-ssahasra-mbha̠ra-śśuchi̍jihvō a̠gniḥ ॥ sagṃ sī̍dasva ma̠hāgṃ a̍si̠ śōcha̍sva [śōcha̍sva, dē̠va̠vīta̍maḥ ।] 12

dēva̠vīta̍maḥ । vi dhū̠mama̍gnē aru̠ṣa-mmi̍yēddhya sṛ̠ja pra̍śasta dar​śa̠tam ॥ jani̍ṣvā̠ hi jēnyō̠ agrē̠ ahnāgṃ̍ hi̠tō hi̠tēṣva̍ru̠ṣō vanē̍ṣu । damē̍damē sa̠pta ratnā̠ dadhā̍nō̠-‘gnir​hōtā̠ ni ṣa̍sādā̠ yajī̍yān ॥ 13 ॥
(stha̠ – ī̠dhē̠ – śōcha̍sva – sa̠ptavigṃ̍śatiścha) – (a. 3)

sa-ntē̍ vā̠yurmā̍ta̠riśvā̍ dadhātūttā̠nāyai̠ hṛda̍ya̠ṃ yadvili̍ṣṭam । dē̠vānā̠ṃ yaśchara̍ti prā̠ṇathē̍na̠ tasmai̍ cha dēvi̠ vaṣa̍ḍastu̠ tubhya̎m ॥ sujā̍tō̠ jyōti̍ṣā sa̠ha śarma̠ varū̍tha̠mā-‘sa̍da̠-ssuva̍ḥ । vāsō̍ agnē vi̠śvarū̍pa̠gṃ̠ saṃvya̍yasva vibhāvasō ॥ udu̍ tiṣṭha svaddhva̠rāvā̍ nō dē̠vyā kṛ̠pā । dṛ̠śē cha̍ bhā̠sā bṛ̍ha̠tā su̍śu̠kvani̠rā-‘gnē̍ yāhi suśa̠stibhi̍ḥ ॥ 14 ॥

ū̠rdhva ū̠ ṣu ṇa̍ ū̠tayē̠ tiṣṭhā̍ dē̠vō na sa̍vi̠tā । ū̠rdhvō vāja̍sya̠ sani̍tā̠ yada̠ñjibhi̍-rvā̠ghadbhi̍-rvi̠hvayā̍mahē ॥ sa jā̠tō garbhō̍ asi̠ rōda̍syō̠ragnē̠ chāru̠rvibhṛ̍ta̠ ōṣa̍dhīṣu । chi̠tra-śśiśu̠ḥ pari̠ tamāg̍sya̠ktaḥ pra mā̠tṛbhyō̠ adhi̠ kani̍kradadgāḥ ॥ sthi̠rō bha̍va vī̠ḍva̍ṅga ā̠śurbha̍va vā̠jya̍rvann । pṛ̠thurbha̍va su̠ṣada̠stvama̠gnēḥ pu̍rīṣa̠vāha̍naḥ ॥ śi̠vō bha̍va [ ] 15

pra̠jābhyō̠ mānu̍ṣībhya̠stvama̍ṅgiraḥ । mā dyāvā̍pṛthi̠vī a̠bhi śū̍śuchō̠ mā-‘ntari̍kṣa̠-mmā vana̠spatīn̍ ॥ praitu̍ vā̠jī kani̍krada̠-nnāna̍da̠-drāsa̍bha̠ḥ patvā̎ । bhara̍nna̠gni-mpu̍rī̠ṣya̍-mmā pā̠dyāyu̍ṣaḥ pu̠rā ॥ rāsa̍bhō vā̠-ṅkani̍krada̠-thsuyu̍ktō vṛṣaṇā̠ rathē̎ । sa vā̍ma̠gni-mpu̍rī̠ṣya̍mā̠śurdū̠tō va̍hādi̠taḥ ॥ vṛṣā̠-‘gniṃ vṛṣa̍ṇa̠-mbhara̍nna̠pā-ṅgarbhagṃ̍ samu̠driya̎m । agna̠ ā yā̍hi [ ] 16

vī̠taya̍ ṛ̠tagṃ sa̠tyam ॥ ōṣa̍dhaya̠ḥ prati̍ gṛhṇītā̠-‘gnimē̠tagṃ śi̠vamā̠yanta̍ma̠bhyatra̍ yu̠ṣmān । vyasya̠n viśvā̠ ama̍tī̠rarā̍tī-rni̠ṣīda̍nnō̠ apa̍ durma̠tigṃ ha̍nat ॥ ōṣa̍dhaya̠ḥ prati̍ mōdaddhvamēna̠-mpuṣpā̍vatī-ssupippa̠lāḥ । a̠yaṃ vō̠ garbha̍ ṛ̠tviya̍ḥ pra̠tnagṃ sa̠dhastha̠mā ‘sa̍dat ॥ 17 ॥
(su̠śa̠stibhi̍ḥ – śi̠vō bha̍va – yāhi̠ – ṣaṭtrigṃ̍śachcha) (a. 4)

vi pāja̍sā pṛ̠thunā̠ śōśu̍chānō̠ bādha̍sva dvi̠ṣō ra̠kṣasō̠ amī̍vāḥ । su̠śarma̍ṇō bṛha̠ta-śśarma̍ṇi syāma̠gnēra̠hagṃ su̠hava̍sya̠ praṇī̍tau ॥ āpō̠ hi ṣṭhā ma̍yō̠bhuva̠stā na̍ ū̠rjē da̍dhātana । ma̠hē raṇā̍ya̠ chakṣa̍sē ॥ yō va̍-śśi̠vata̍mō̠ rasa̠stasya̍ bhājayatē̠ha na̍ḥ । u̠śa̠tīri̍va mā̠tara̍ḥ ॥ tasmā̠ ara̍-ṅgamāma vō̠ yasya̠ kṣayā̍ya̠ jinva̍tha । āpō̍ ja̠naya̍thā cha naḥ ॥ mi̠tra- [mi̠traḥ, sa̠gṃ̠sṛjya̍] 18

-ssa̠gṃ̠sṛjya̍ pṛthi̠vī-mbhūmi̍-ñcha̠ jyōti̍ṣā sa̠ha । sujā̍ta-ñjā̠tavē̍dasama̠gniṃ vai̎śvāna̠raṃ vi̠bhum ॥ a̠ya̠kṣmāya̍ tvā̠ sagṃ sṛ̍jāmi pra̠jābhya̍ḥ । viśvē̎ tvā dē̠vā vai̎śvāna̠rā-ssagṃ sṛ̍ja̠ntvā-nu̍ṣṭubhēna̠ Chanda̍sā-‘ṅgira̠svat ॥ ru̠drā-ssa̠bhṛntya̍ pṛthi̠vī-mbṛ̠hajjyōti̠-ssamī̍dhirē । tēṣā̎-mbhā̠nuraja̍sra̠ ichChu̠krō dē̠vēṣu̍ rōchatē ॥ sagṃ sṛ̍ṣṭā̠ṃ vasu̍bhī ru̠drairdhīrai̎ḥ karma̠ṇyā̎-mmṛda̎m । hastā̎bhyā-mmṛ̠dvī-ṅkṛ̠tvā si̍nīvā̠lī ka̍rōtu̠ [si̍nīvā̠lī ka̍rōtu, tām ।] 19

tām ॥ si̠nī̠vā̠lī su̍kapa̠rdā su̍kurī̠rā svau̍pa̠śā । sā tubhya̍maditē maha̠ ōkhā-nda̍dhātu̠ hasta̍yōḥ ॥ u̠khā-ṅka̍rōtu̠ śaktyā̍ bā̠hubhyā̠-madi̍tirdhi̠yā । mā̠tā pu̠traṃ yathō̠pasthē̠ sā-‘gni-mbi̍bhartu̠ garbha̠ ā ॥ ma̠khasya̠ śirō̍-‘si ya̠jñasya̍ pa̠dē stha̍ḥ । vasa̍vastvā kṛṇvantu gāya̠trēṇa̠ Chanda̍sā ‘ṅgira̠sva-tpṛ̍thi̠vya̍si ru̠drāstvā̍ kṛṇvantu̠ traiṣṭu̍bhēna̠ Chanda̍sā ‘ṅgira̠svada̠ntari̍kṣama- [-‘ṅgira̠svada̠ntari̍kṣamasi, ā̠di̠tyāstvā̍] 20

-syādi̠tyāstvā̍ kṛṇvantu̠ jāga̍tēna̠ Chanda̍sā-‘ṅgira̠sva-ddyaura̍si̠ viśvē̎ tvā dē̠vā vai̎śvāna̠rāḥ kṛ̍ṇva̠ntvānu̍ṣṭubhēna̠ Chanda̍sā-‘ṅgira̠sva-ddiśō̍-‘si dhru̠vā-‘si̍ dhā̠rayā̠ mayi̍ pra̠jāgṃ rā̠yaspōṣa̍-ṅgaupa̠tyagṃ su̠vīryagṃ̍ sajā̠tān. yaja̍mānā̠yā-‘di̍tyai̠ rāsnā̠-‘sya di̍tistē̠ bila̍-ṅgṛhṇātu̠ pāṅktē̍na̠ Chanda̍sā ‘ṅgira̠svat ॥ kṛ̠tvāya̠ sā ma̠hīmu̠khā-mmṛ̠nmayī̠ṃ yōni̍ma̠gnayē̎ । tā-mpu̠trēbhya̠-ssa-mprā ya̍chCha̠dadi̍ti-śśra̠payā̠niti̍ ॥ 21 ॥
(mi̠traḥ – ka̍rō – tva̠ntari̍kṣamasi̠ – pra – cha̠tvāri̍ cha) (a. 5)

vasa̍vastvā dhūpayantu gāya̠trēṇa̠ Chanda̍sā-‘ṅgira̠sva-dru̠drāstvā̍ dhūpayantu̠ traiṣṭu̍bhēna̠ Chanda̍sā-‘ṅgira̠sva-dā̍di̠tyāstvā̍ dhūpayantu̠ jāga̍tēna̠ Chanda̍sā-‘ṅgira̠svad- viśvē̎ tvā dē̠vā vai̎śvāna̠rā dhū̍paya̠ntvānu̍ṣṭubhēna̠ Chanda̍sā-‘ṅgira̠sva-dindra̍stvā dhūpayatvaṅgira̠sva–dviṣṇu̍stvā dhūpayatvaṅgira̠sva-dvaru̍ṇastvā dhūpayatvaṅgira̠sva-dadi̍tistvā dē̠vī vi̠śvadē̎vyāvatī pṛthi̠vyā-ssa̠dhasthē̎-‘ṅgira̠sva-tkha̍natvavaṭa dē̠vānā̎-ntvā̠ patnī̎- [patnī̎ḥ, dē̠vī-rvi̠śvadē̎vyāvatīḥ] 22

-rdē̠vī-rvi̠śvadē̎vyāvatīḥ pṛthi̠vyā-ssa̠dhasthē̎-‘ṅgira̠sva-dda̍dhatūkhē dhi̠ṣaṇā̎stvā dē̠vīrvi̠śvadē̎vyāvatīḥ pṛthi̠vyā-ssa̠dhasthē̎-‘ṅgira̠sva-da̠bhīndha̍tāmukhē̠ gnāstvā̍ dē̠vīrvi̠śvadē̎vyāvatīḥ pṛthi̠vyā-ssa̠dhasthē̎-‘ṅgira̠sva-chChra̍payantūkhē̠ varū̎trayō̠ jana̍yastvā dē̠vīrvi̠śvadē̎vyāvatīḥ pṛthi̠vyā-ssa̠dhasthē̎-‘ṅgira̠sva-tpa̍chantūkhē । mitrai̠tāmu̠khā-mpa̍chai̠ṣā mā bhē̍di । ē̠tā-ntē̠ pari̍ dadā̠myabhi̍ttyai ॥ a̠bhīmā- [a̠bhīmām, ma̠hi̠nā diva̍-mmi̠trō] 23

-mma̍hi̠nā diva̍-mmi̠trō ba̍bhūva sa̠prathā̎ḥ । u̠ta śrava̍sā pṛthi̠vīm ॥ mi̠trasya̍ char​ṣaṇī̠dhṛta̠-śśravō̍ dē̠vasya̍ sāna̠sim । dyu̠mna-ñchi̠traśra̍vastamam ॥ dē̠vastvā̍ savi̠tōdva̍patu supā̠ṇi-ssva̍ṅgu̠riḥ । su̠bā̠huru̠ta śaktyā̎ ॥ apa̍dyamānā pṛthi̠vyāśā̠ diśa̠ ā pṛ̍ṇa । utti̍ṣṭha bṛha̠tī bha̍vō̠rdhvā ti̍ṣṭha dhru̠vā tvam ॥ vasa̍va̠stvā ”chChṛ̍ndantu gāya̠trēṇa̠ Chanda̍sā-‘ṅgira̠sva-dru̠drāstvā-” chChṛ̍ndantu̠ traiṣṭu̍bhēna̠ Chanda̍sā-‘ṅgira̠sva-dā̍di̠tyāstvā ”chChṛ̍ndantu̠ jāga̍tēna̠ Chanda̍sā-‘ṅgira̠sva-dviśvē̎ tvā dē̠vā vai̎śvāna̠rā ā chChṛ̍nda̠ntvānu̍ṣṭubhēna̠ Chanda̍sā-‘ṅgira̠svat ॥ 24 ॥
(patnī̍ – ri̠māgṃ – ru̠drāstvā-” chChṛ̍nda̠ntvē – kā̠nna vigṃ̍śa̠tiścha̍) (a. 6)

samā̎stvā-‘gna ṛ̠tavō̍ vardhayantu saṃvathsa̠rā ṛṣa̍yō̠ yāni̍ sa̠tyā । sa-ndi̠vyēna̍ dīdihi rōcha̠nēna̠ viśvā̠ ā bhā̍hi pra̠diśa̍ḥ pṛthi̠vyāḥ ॥ sa-ñchē̠ddhyasvā̎-‘gnē̠ pra cha̍ bōdhayaina̠muchcha̍ tiṣṭha maha̠tē saubha̍gāya । mā cha̍ riṣadupasa̠ttā tē̍ agnē bra̠hmāṇa̍stē ya̠śasa̍-ssantu̠ mā-‘nyē ॥ tvāma̍gnē vṛṇatē brāhma̠ṇā i̠mē śi̠vō a̍gnē [ ] 25

sa̠ṃ vara̍ṇē bhavā naḥ । sa̠pa̠tna̠hā nō̍ abhimāti̠jichcha̠ svē gayē̍ jāgṛ̠hya pra̍yuchChann ॥ i̠haivāgnē̠ adhi̍ dhārayā ra̠yi-mmā tvā̠ nikra̍-npūrva̠chitō̍ nikā̠riṇa̍ḥ । kṣa̠trama̍gnē su̠yama̍mastu̠ tubhya̍mupasa̠ttā va̍rdhatā-ntē̠ ani̍ṣṭṛtaḥ ॥ kṣa̠trēṇā̎-‘gnē̠ svāyu̠-ssagṃ ra̍bhasva mi̠trēṇā̎-‘gnē mitra̠dhēyē̍ yatasva । sa̠jā̠tānā̎-mmaddhyama̠sthā ē̍dhi̠ rājñā̍magnē viha̠vyō̍ dīdihī̠ha ॥ ati̠ [ati̍, nihō̠ ati̠ sridhō] 26

nihō̠ ati̠ sridhō ‘tyachi̍tti̠-matyarā̍timagnē । viśvā̠ hya̍gnē duri̠tā saha̠svāthā̠smabhyagṃ̍ sa̠havī̍rāgṃ ra̠yindā̎ḥ ॥ a̠nā̠dhṛ̠ṣyō jā̠tava̍dā̠ ani̍ṣṭṛtō vi̠rāḍa̍gnē kṣatra̠bhṛ-ddī̍dihī̠ha । viśvā̠ āśā̎ḥ pramu̠ñcha-nmānu̍ṣīrbhi̠ya-śśi̠vābhi̍ra̠dya pari̍ pāhi nō vṛ̠dhē ॥ bṛha̍spatē savitarbō̠dhayai̍na̠gṃ̠ sagṃśi̍ta-ñchithsa-nta̠rāgṃ sagṃ śi̍śādhi । va̠rdhayai̍na-mmaha̠tē saubha̍gāya̠ [saubha̍gāya, viśva̍ ēna̠manu̍ madantu dē̠vāḥ ।] 27

viśva̍ ēna̠manu̍ madantu dē̠vāḥ ॥ a̠mu̠tra̠bhūyā̠dadha̠ yadya̠masya̠ bṛha̍spatē a̠bhiśa̍stē̠ra mu̍ñchaḥ । pratyau̍hatā-ma̠śvinā̍ mṛ̠tyuma̍smā-ddē̠vānā̍-magnē bhi̠ṣajā̠ śachī̍bhiḥ ॥ udva̠ya-ntama̍sa̠spari̠ paśya̍ntō̠ jyōti̠rutta̍ram । dē̠va-ndē̍va̠trā sūrya̠maga̍nma̠ jyōti̍rutta̠mam ॥ 28 ॥
(i̠mē śi̠vō a̠gnē – ‘ti̠ – saubha̍gāya̠ – chatu̍strigṃśachcha) (a. 7)

ū̠rdhvā a̍sya sa̠midhō̍ bhavantyū̠rdhvā śu̠krā śō̠chīg​ṣya̠gnēḥ । dyu̠matta̍mā su̠pratī̍kasya sū̠nōḥ ॥ tanū̠napā̠dasu̍rō vi̠śvavē̍dā dē̠vō dē̠vēṣu̍ dē̠vaḥ । pa̠tha ā-‘na̍kti̠ maddhvā̍ ghṛ̠tēna̍ ॥ maddhvā̍ ya̠jña-nna̍kṣasē prīṇā̠nō narā̠śagṃsō̍ agnē । su̠kṛddē̠va-ssa̍vi̠tā vi̠śvavā̍raḥ ॥ achChā̠yamē̍ti̠ śava̍sā ghṛ̠tēnē̍ḍā̠nō vahni̠rnama̍sā । a̠gnigg​ sruchō̍ addhva̠rēṣu̍ pra̠yathsu̍ ॥ sa ya̍kṣadasya mahi̠māna̍ma̠gnē-ssa [mahi̠māna̍ma̠gnē-ssaḥ, ī̠ ma̠ndrāsu̍ pra̠yasa̍ḥ ।] 29

ī̍ ma̠ndrāsu̍ pra̠yasa̍ḥ । vasu̠śchēti̍ṣṭhō vasu̠dhāta̍maścha ॥ dvārō̍ dē̠vīranva̍sya̠ viśvē̎ vra̠tā da̍dantē a̠gnēḥ । u̠ru̠vyacha̍sō̠ dhāmnā̠ patya̍mānāḥ ॥ tē a̍sya̠ yōṣa̍ṇē di̠vyē na yōnā̍vu̠ṣāsā̠naktā̎ । i̠maṃ ya̠jñama̍vatā maddhva̠ra-nna̍ḥ ॥ daivyā̍ hōtārāvū̠rdhva-ma̍ddhva̠ra-nnō̠-‘gnērji̠hvāma̠bhi gṛ̍ṇītam । kṛ̠ṇu̠ta-nna̠-ssvi̍ṣṭim ॥ ti̠srō dē̠vīrba̠r̠hirēdagṃ sa̍da̠ntviḍā̠ sara̍svatī̠ [sara̍svatī, bhāra̍tī ।] 30

bhāra̍tī । ma̠hī gṛ̍ṇā̠nā ॥ tanna̍stu̠rīpa̠madbhu̍ta-mpuru̠kṣu tvaṣṭā̍ su̠vīra̎m । rā̠yaspōṣa̠ṃ vi ṣya̍tu̠ nābhi̍ma̠smē ॥ vana̍spa̠tē-‘va̍ sṛjā̠ rarā̍ṇa̠stmanā̍ dē̠vēṣu̍ । a̠gnir​ha̠vyagṃ śa̍mi̠tā sū̍dayāti ॥ agnē̠ svāhā̍ kṛṇuhi jātavēda̠ indrā̍ya ha̠vyam । viśvē̍ dē̠vā ha̠viri̠da-ñju̍ṣantām ॥ hi̠ra̠ṇya̠ga̠rbha-ssama̍varta̠tāgrē̍ bhū̠tasya̍ jā̠taḥ pati̠rēka̍ āsīt । sa dā̍dhāra pṛthi̠vī-ndyā- [pṛthi̠vī-ndyām, u̠tēmā-ṅkasmai̍] 31

-mu̠tēmā-ṅkasmai̍ dē̠vāya̍ ha̠viṣā̍ vidhēma ॥ yaḥ prā̍ṇa̠tō ni̍miṣa̠tō ma̍hi̠tvaika̠ idrājā̠ jaga̍tō ba̠bhūva̍ । ya īśē̍ a̠sya dvi̠pada̠śchatu̍ṣpada̠ḥ kasmai̍ dē̠vāya̍ ha̠viṣā̍ vidhēma ॥ ya ā̎tma̠dā ba̍la̠dā yasya̠ viśva̍ u̠pāsa̍tē pra̠śiṣa̠ṃ yasya̍ dē̠vāḥ । yasya̍ Chā̠yā-‘mṛta̠ṃ yasya̍ mṛ̠tyuḥ kasmai̍ dē̠vāya̍ ha̠viṣā̍ vidhēma ॥ yasyē̠mē hi̠mava̍ntō mahi̠tvā yasya̍ samu̠dragṃ ra̠sayā̍ sa̠hā- [sa̠ha, ā̠huḥ ।] 32

-”huḥ । yasyē̠māḥ pra̠diśō̠ yasya̍ bā̠hū kasmai̍ dē̠vāya̍ ha̠viṣā̍ vidhēma ॥ ya-ṅkranda̍sī̠ ava̍sā tastabhā̠nē a̠bhyaikṣē̍tā̠-mmana̍sā̠ rēja̍mānē । yatrādhi̠ sūra̠ udi̍tau̠ vyēti̠ kasmai̍ dē̠vāya̍ ha̠viṣā̍ vidhēma ॥ yēna̠ dyauru̠grā pṛ̍thi̠vī cha̍ dṛ̠ḍhē yēna̠ su̠va̍-sstabhi̠taṃ yēna̠ nāka̍ḥ । yō a̠ntari̍kṣē̠ raja̍sō vi̠mānaQḥkasmai̍ dē̠vāya̍ ha̠viṣā̍ vidhēma ॥ āpō̍ ha̠ yanma̍ha̠tī rviśva̠- [yanma̍ha̠tī rviśva̎m, aya̠-ndakṣa̠-ndadhā̍nā] 33

-māya̠-ndakṣa̠-ndadhā̍nā ja̠naya̍ntīra̠gnim । tatō̍ dē̠vānā̠-nnira̍varta̠tāsu̠rēka̠ḥ kasmai̍ dē̠vāya̍ ha̠viṣā̍ vidhēma ॥ yaśchi̠dāpō̍ mahi̠nā pa̠ryapa̍śya̠-ddakṣa̠-ndadhā̍nā ja̠naya̍ntīra̠gnim । yō dē̠vēṣvadhi̍ dē̠va ēka̠ āsī̠-tkasmai̍ dē̠vāya̍ ha̠viṣā̍ vidhēma ॥ 34 ॥
(a̠gnē-ssa – sara̍svatī̠ – dyāgṃ – sa̠ha – viśva̠ṃ – chatu̍strigṃśachcha) (a. 8)

(ū̠rdhvā – yaḥ prā̍ṇa̠tō – ya ā̎tma̠dā – yasyē̠mē – yaṅkranda̍sī̠ – yēna̠ dyau- rāpō̍ ha̠ yat – tatō̍ dē̠vānā̠ṃ – ँyaśchi̠dāpō̠ – yō dē̠vēṣu̠ – nava̍ )

ākū̍tima̠gni-mpra̠yuja̠gg̠ svāhā̠ manō̍ mē̠dhāma̠gni-mpra̠yuja̠gg̠ svāhā̍ chi̠ttaṃ vijñā̍tama̠gni-mpra̠yuja̠gg̠ svāhā̍ vā̠chō vidhṛ̍tima̠gni-mpra̠yuja̠gg̠ svāhā̎ pra̠jāpa̍tayē̠ mana̍vē̠ svāhā̠-‘gnayē̍ vaiśvāna̠rāya̠ svāhā̠ viśvē̍ dē̠vasya̍ nē̠turmartō̍ vṛṇīta sa̠khyaṃ viśvē̍ rā̠ya i̍ṣuddhyasi dyu̠mnaṃ vṛ̍ṇīta pu̠ṣyasē̠ svāhā̠ mā su bhi̍tthā̠ mā su ri̍ṣō̠ dṛgṃha̍sva vī̠ḍaya̍sva̠ su । amba̍ dhṛṣṇu vī̠raya̍svā̠- [vī̠raya̍sva, a̠gniśchē̠da-ṅka̍riṣyathaḥ ।] 35

-‘gniśchē̠da-ṅka̍riṣyathaḥ ॥ dṛgṃha̍sva dēvi pṛthivi sva̠staya̍ āsu̠rī mā̠yā sva̠dhayā̍ kṛ̠tā-‘si̍ । juṣṭa̍-ndē̠vānā̍mi̠dama̍stu ha̠vyamari̍ṣṭā̠ tvamudi̍hi ya̠jñē a̠sminn ॥ mitrai̠tāmu̠khā-nta̍pai̠ṣā mā bhē̍di । ē̠tā-ntē̠ pari̍ dadā̠myabhi̍ttyai ॥ druva̍nna-ssa̠rpirā̍sutiḥ pra̠tnō hōtā̠ varē̎ṇyaḥ । saha̍saspu̠trō adbhu̍taḥ ॥ para̍syā̠ adhi̍ sa̠ṃvatō-‘va̍rāgṃ a̠bhyā [a̠bhyā, ta̠ra̠ ।] 36

ta̍ra । yatrā̠hamasmi̠ tāgṃ a̍va ॥ pa̠ra̠masyā̎ḥ parā̠vatō̍ rō̠hida̍śva i̠hā-‘ga̍hi । pu̠rī̠ṣya̍ḥ purupri̠yō-‘gnē̠ tva-nta̍rā̠ mṛdha̍ḥ ॥ sīda̠ tva-mmā̠tura̠syā u̠pasthē̠ viśvā̎nyagnē va̠yunā̍ni vi̠dvān । mainā̍ma̠rchiṣā̠ mā tapa̍sā̠-‘bhi śū̍śuchō̠-‘ntara̍syāgṃ śu̠kra jyō̍ti̠rvi bhā̍hi ॥ a̠ntara̍gnē ru̠chā tvamu̠khāyai̠ sada̍nē̠ svē । tasyā̠stvagṃ hara̍sā̠ tapa̠n jāta̍vēda-śśi̠vō bha̍va ॥ śi̠vō bhū̠tvā mahya̍ma̠gnē-‘thō̍ sīda śi̠vastvam । śi̠vāḥ kṛ̠tvā diśa̠-ssarvā̠-ssvāṃ yōni̍mi̠hā-”sa̍daḥ ॥ 37 ॥
(vī̠raya̠svā – ” – tapa̍n – vigṃśa̠tiścha̍) (a. 9)

yada̍gnē̠ yāni̠ kāni̠ chā-”tē̠ dārū̍ṇi da̠ddhmasi̍ । tada̍stu̠ tubhya̠mi-dghṛ̠ta-ntajju̍ṣasva yaviṣṭhya ॥ yadattyu̍pa̠jihvi̍kā̠ yadva̠mrō a̍ti̠sarpa̍ti । sarva̠-ntada̍stu tē ghṛ̠ta-ntajju̍ṣasva yaviṣṭhya ॥ rātrigṃ̍ rātri̠mapra̍yāva̠-mbhara̠ntō-‘śvā̍yēva̠ tiṣṭha̍tē ghā̠sama̍smai । rā̠yaspōṣē̍ṇa̠ sami̠ṣā mada̠ntō-‘gnē̠ mā tē̠ prati̍vēśā riṣāma ॥ nābhā̍ [nābhā̎, pṛ̠thi̠vyā-ssa̍midhā̠na-] 38

pṛthi̠vyā-ssa̍midhā̠na-ma̠gnigṃ rā̠yaspōṣā̍ya bṛha̠tē ha̍vāmahē । i̠ra̠mma̠da-mbṛ̠hadu̍ktha̠ṃ yaja̍tra̠-ñjētā̍rama̠gni-mpṛta̍nāsu sāsa̠him ॥ yā-ssēnā̍ a̠bhītva̍rīrā-vyā̠dhinī̠-ruga̍ṇā u̠ta । yē stē̠nā yē cha̠ taska̍rā̠stāg​stē̍ a̠gnē-‘pi̍ dadhāmyā̠syē̎ ॥ dagg​ṣṭrā̎bhyā-mma̠limlū̠n jambhyai̠-staska̍rāgṃ u̠ta । hanū̎bhyāg​ stē̠nān-bha̍gava̠stāg​-stva-ṅkhā̍da̠ sukhā̍ditān ॥ yē janē̍ṣu ma̠limla̍va-sstē̠nāsa̠-staska̍rā̠ vanē̎ । yē [ ] 39

kakṣē̎ṣvaghā̠ yava̠stāg​stē̍ dadhāmi̠ jambha̍yōḥ ॥ yō a̠smabhya̍marātī̠yā-dyaścha̍ nō̠ dvēṣa̍tē̠ jana̍ḥ । nindā̠dyō a̠smā-ndiphsā̎chcha̠ sarva̠-nta-mma̍sma̠sā ku̍ru ॥ sagṃśi̍ta-mmē̠ brahma̠ sagṃśi̍taṃ vī̠rya̍-mbala̎m । sagṃśi̍ta-ṅkṣa̠tra-ñji̠ṣṇu yasyā̠-‘hamasmi̍ pu̠rōhi̍taḥ ॥ udē̍ṣā-mbā̠hū a̍tira̠mudvarcha̠ udū̠ bala̎m । kṣi̠ṇōmi̠ brahma̍ṇā̠-‘mitrā̠nunna̍yāmi̠ [-‘mitrā̠-nunna̍yāmi, svāgṃ a̠ham ।] 40

svāgṃ a̠ham ॥ dṛ̠śā̠nō ru̠kma u̠rvyā vya̍dyauddu̠rmar​ṣa̠māyu̍-śśri̠yē ru̍chā̠naḥ । a̠gnira̠mṛtō̍ abhava̠dvayō̍-bhi̠ryadē̍na̠-ndyauraja̍naya-thsu̠rētā̎ḥ ॥ viśvā̍ rū̠pāṇi̠ prati̍ muñchatē ka̠viḥ prā-‘sā̍vīdbha̠dra-ndvi̠padē̠ chatu̍ṣpadē । vi nāka̍makhya-thsavi̠tā varē̠ṇyō-‘nu̍ pra̠yāṇa̍mu̠ṣasō̠ vi rā̍jati ॥ naktō̠ṣāsā̠ sama̍nasā̠ virū̍pē dhā̠payē̍tē̠ śiśu̠mēkagṃ̍ samī̠chī । dyāvā̠ kṣāmā̍ ru̠kmō [ru̠kmaḥ, a̠ntarvi bhā̍ti] 41

a̠ntarvi bhā̍ti dē̠vā a̠gni-ndhā̍raya-ndraviṇō̠dāḥ ॥ su̠pa̠rṇō̍-‘si ga̠rutmā̎-ntri̠vṛttē̠ śirō̍ gāya̠tra-ñchakṣu̠-sstōma̍ ā̠tmā sāma̍ tē ta̠nūrvā̍madē̠vya-mbṛ̍ha-drathanta̠rē pa̠kṣau ya̍jñāya̠jñiya̠-mpuchCha̠-ñChandā̠g̠syaṅgā̍ni̠ dhiṣṇi̍yā-śśa̠phā yajūgṃ̍ṣi̠ nāma̍ ॥ su̠pa̠rṇō̍-‘si ga̠rutmā̠-ndiva̍-ṅgachCha̠ suva̍ḥ pata ॥ 42 ॥
(nābhā̠ – vanē̠ yē – na̍yāmi̠ – kṣāmā̍ ru̠kmō̎ – ‘ṣṭātrigṃ̍śachcha) (a. 10)

agnē̠ yaṃ ya̠jñama̍ddhva̠raṃ vi̠śvata̍ḥ pari̠bhūrasi̍ । sa iddē̠vēṣu̍ gachChati ॥ sōma̠ yāstē̍ mayō̠bhuva̍ ū̠taya̠-ssanti̍ dā̠śuṣē̎ । tābhi̍rnō-‘vi̠tā bha̍va ॥ a̠gnirmū̠rdhā bhuva̍ḥ ॥ tvanna̍-ssōma̠ , yā tē̠ dhāmā̍ni ॥ ta-thsa̍vi̠turvarē̎ṇya̠-mbhargō̍ dē̠vasya̍ dhīmahi । dhiyō̠ yō na̍ḥ prachō̠dayā̎t ॥ achi̍ttī̠ yachcha̍kṛ̠mā daivyē̠ janē̍ dī̠nairdakṣai̠ḥ prabhū̍tī pūruṣa̠tvatā̎ । 43

dē̠vēṣu̍ cha savita̠rmānu̍ṣēṣu cha̠ tvannō̠ atra̍ suvatā̠danā̍gasaḥ ॥ chō̠da̠yi̠trī sū̠nṛtā̍nā̠-ñchēta̍ntī sumatī̠nām । ya̠jña-nda̍dhē̠ sara̍svatī ॥ pāvī̍ravī ka̠nyā̍ chi̠trāyu̠-ssara̍svatī vī̠rapa̍tnī̠ dhiya̍-ndhāt । gnābhi̠rachChi̍dragṃ śara̠ṇagṃ sa̠jōṣā̍ durā̠dhar​ṣa̍-ṅgṛṇa̠tē śarma̍ yagṃsat ॥ pū̠ṣā gā anvē̍tu naḥ pū̠ṣā ra̍kṣa̠tvarva̍taḥ । pū̠ṣā vājagṃ̍ sanōtu naḥ ॥ śu̠kra-ntē̍ a̠nyadya̍ja̠ta-ntē̍ a̠nya- [a̠nyat, viṣu̍rūpē̠ aha̍nī̠ dyauri̍vāsi ।] 44

-dviṣu̍rūpē̠ aha̍nī̠ dyauri̍vāsi । viśvā̠ hi mā̠yā ava̍si svadhāvō bha̠drā tē̍ pūṣanni̠ha rā̠tira̍stu ॥ tē̍-‘vardhanta̠ svata̍vasō mahitva̠nā ”nāka̍-nta̠sthuru̠ru cha̍krirē̠ sada̍ḥ । viṣṇu̠ ryaddhā-”va̠-dvṛṣa̍ṇa-mmada̠chyuta̠ṃ vayō̠ na sī̍da̠nnadhi̍ ba̠r̠hiṣi̍ pri̠yē ॥ prachi̠trama̠rka-ṅgṛ̍ṇa̠tē tu̠rāya̠ māru̍tāya̠ svata̍vasē bharaddhvam । yē sahāgṃ̍si̠ saha̍sā̠ saha̍ntē̠ [saha̍ntē, rēja̍tē agnē pṛthi̠vī ma̠khēbhya̍ḥ ।] 45

rēja̍tē agnē pṛthi̠vī ma̠khēbhya̍ḥ ॥ viśvē̍ dē̠vā viśvē̍ dēvāḥ ॥ dyāvā̍ naḥ pṛthi̠vī i̠magṃ si̠ddhrama̠dya di̍vi̠spṛśa̎m । ya̠jña-ndē̠vēṣu̍ yachChatām ॥ pra pū̎rva̠jē pi̠tarā̠ navya̍sībhirgī̠rbhiḥ kṛ̍ṇuddhva̠gṃ̠ sada̍nē ṛ̠tasya̍ । ā nō̎ dyāvāpṛthivī̠ daivyē̍na̠ janē̍na yāta̠-mmahi̍ vā̠ṃ varū̍tham ॥ a̠gnigg​ stōmē̍na bōdhaya samidhā̠nō ama̍rtyam । ha̠vyā dē̠vēṣu̍ nō dadhat ॥ sa ha̍vya̠vāḍama̍rtya u̠śigdū̠taśchanō̍hitaḥ । a̠gnirdhi̠yā samṛ̍ṇvati ॥ śannō̍ bhavantu̠, vājē̍vājē ॥ 46 ॥
(pu̠ru̠ṣa̠tvatā̍ – yaja̠tantē̍ a̠nyath – saha̍ntē̠ – chanō̍hitō̠ – ‘ṣṭau cha̍ ) (a. 11)

(yu̠ñjā̠na – i̠māma̍gṛbhṇan – dē̠vasya̠ – santē̠ – vi pāja̍sā̠ – vasa̍vastvā̠ – samā̎stvō̠ – rdhvā – a̠syākū̍ti̠ṃ – ँyada̍gnē̠ yān – yagnē̠ yaṃ ya̠jña – mēkā̍daśa)

(yu̠ñjā̠nō – varma̍ cha stha – ādi̠tyastvā̠ – bhāra̍tī̠ – svāgṃ a̠hagṃ – ṣaṭcha̍tvārigṃśat )

(yu̠ñjā̠nō, vājē̍vājē)

॥ hari̍ḥ ōm ॥

॥ kṛṣṇa yajurvēdīya taittirīya saṃhitāyā-ñchaturtha kāṇḍē prathamaḥ praśna-ssamāptaḥ ॥