KYTS 3.5 Purna Paschaaduta Purna – Krishna Yajurveda Taittiriya Samhita Patha

kṛṣṇa yajurvēdīya taittirīya saṃhitāyā-ntṛtīyakāṇḍē pañchamaḥ praśnaḥ – iṣṭiśēṣābhidhānaṃ

ō-nnamaḥ paramātmanē, śrī mahāgaṇapatayē namaḥ,
śrī gurubhyō namaḥ । ha̠ri̠ḥ ōm ॥

pū̠rṇā pa̠śchādu̠ta pū̠rṇā pu̠rastā̠du-nma̍ddhya̠taḥ pau̎rṇamā̠sī ji̍gāya । tasyā̎-ndē̠vā adhi̍ sa̠ṃvasa̍nta utta̠mē nāka̍ i̠ha mā̍dayantām ॥ yattē̍ dē̠vā ada̍dhu rbhāga̠dhēya̠mamā̍vāsyē sa̠ṃvasa̍ntō mahi̠tvā । sānō̍ ya̠jña-mpi̍pṛhi viśvavārē ra̠yi-nnō̍ dhēhi subhagē su̠vīra̎m ॥ni̠vēśa̍nī sa̠ṅgama̍nī̠ vasū̍nā̠ṃ viśvā̍ rū̠pāṇi̠ vasū̎nyāvē̠śaya̍ntī । sa̠ha̠sra̠pō̠ṣagṃ su̠bhagā̠ rarā̍ṇā̠ sā na̠ āga̠n. varcha̍sā [āga̠n. varcha̍sā, sa̠ṃvi̠dā̠nā ।] 1

saṃvidā̠nā ॥ agnī̍ṣōmau pratha̠mau vī̠ryē̍ṇa̠ vasū̎-nru̠drānā̍di̠tyāni̠ha ji̍nvatam । mā̠ddhyagṃ hi pau̎rṇamā̠sa-ñju̠ṣēthā̠-mbrahma̍ṇā vṛ̠ddhau su̍kṛ̠tēna̍ sā̠tāvathā̠-‘smabhyagṃ̍ sa̠havī̍rāgṃ ra̠yi-nni ya̍chChatam ॥ ā̠di̠tyāśchā-‘ṅgi̍rasaśchā̠gnīnā-‘da̍dhata̠ tē da̍r​śapūrṇamā̠sau praiphsa̠-ntēṣā̠maṅgi̍rasā̠-nniru̍ptagṃ ha̠virāsī̠dathā̍-”di̠tyā ē̠tau hōmā̍vapaśya̠-ntāva̍juhavu̠statō̠ vai tē da̍r​śapūrṇamā̠sau [ ] 2

pūrva̠ ā ‘la̍bhanta dar​śapūrṇamā̠sā-vā̠labha̍māna ē̠tau hōmau̍ pu̠rastā̎jjuhuyā-thsā̠kṣādē̠va da̍r​śapūrṇamā̠sāvā la̍bhatē brahmavā̠dinō̍ vadanti̠ sa tvai da̍r​śapūrṇamā̠sāvā la̍bhēta̠ ya ē̍nayōranu-lō̠mañcha̍ pratilō̠mañcha̍ vi̠dyāditya̍māvā̠syā̍yā ū̠rdhva-ntada̍nulō̠ma-mpau̎rṇamā̠syai pra̍tī̠chīna̠-nta-tpra̍tilō̠maṃ ya-tpau̎rṇamā̠sī-mpūrvā̍mā̠labhē̍ta pratilō̠mamē̍nā̠vā la̍bhētā̠-muma̍pa̠kṣīya̍māṇa̠-manvapa̍- [-manvapa̍, kṣī̠yē̠ta̠ sā̠ra̠sva̠tau hōmau̍] 3

-kṣīyēta sārasva̠tau hōmau̍ pu̠rastā̎jjuhuyādamāvā̠syā̍ vai sara̍svatyanulō̠ma-mē̠vainā̠vā la̍bhatē̠ ‘mumā̠pyāya̍māna̠manvā pyā̍yata āgnāvaiṣṇa̠va-mēkā̍daśakapāla-mpu̠rastā̠nnirva̍pē̠-thsara̍svatyai cha̠rugṃ sara̍svatē̠ dvāda̍śakapāla̠ṃ yadā̎gnē̠yō bhava̍tya̠gnirvai ya̍jñamu̠khaṃ ya̍jñamu̠khamē̠vardhi̍-mpu̠rastā̎-ddhattē̠ ya-dvai̎ṣṇa̠vō bhava̍ti ya̠jñō vai viṣṇu̍rya̠jñamē̠vā-”rabhya̠ prata̍nutē̠ sara̍svatyai cha̠rurbha̍vati̠ sara̍svatē̠ dvāda̍śakapālō-‘māvā̠syā̍ vai sara̍svatī pū̠rṇamā̍sa̠-ssara̍svā̠-ntāvē̠va sā̠kṣādā ra̍bhata ṛ̠ddhnōtyā̎bhyā̠-ndvāda̍śakapāla̠-ssara̍svatē bhavati mithuna̠tvāya̠ prajā̎tyai mithu̠nau gāvau̠ dakṣi̍ṇā̠ samṛ̍ddhyai ॥ 4 ॥
(varcha̍sā̠ – vai tē da̍r​śapūrṇamā̠sā – vapa̍ – tanutē̠ sara̍svatyai̠ – pañcha̍vigṃśatiścha) (a. 1)

ṛṣa̍yō̠ vā indra̍-mpra̠tyakṣa̠-nnāpa̍śya̠-ntaṃ vasi̍ṣṭhaḥ pra̠tyakṣa̍mapaśya̠-thsō̎-‘bravī̠-dbrāhma̍ṇa-ntē vakṣyāmi̠ yathā̠ tvatpu̍rōhitāḥ pra̠jāḥ pra̍jani̠ṣyantē-‘tha̠ mēta̍rēbhya̠ ṛṣi̍bhyō̠ mā pravō̍cha̠ iti̠ tasmā̍ ē̠tān​thstōma̍-bhāgānabravī̠-ttatō̠ vasi̍ṣṭhapurōhitāḥ pra̠jāḥ prājā̍yanta̠ tasmā̎-dvāsi̠ṣṭhō bra̠hmā kā̠rya̍ḥ praiva jā̍yatē ra̠śmira̍si̠ kṣayā̍ya tvā̠ kṣaya̍-ñji̠nvē- [kṣaya̍-ñji̠nvēti̍, ā̠ha̠ dē̠vā vai] 5

-tyā̍ha dē̠vā vai kṣayō̍ dē̠vēbhya̍ ē̠va ya̠jña-mprā-”ha̠ prēti̍rasi̠ dharmā̍ya tvā̠ dharma̍-ñji̠nvētyā̍ha manu̠ṣyā̍ vai dharmō̍ manu̠ṣyē̎bhya ē̠va ya̠jña-mprā-”hānvi̍tirasi di̠vē tvā̠ diva̍-ñji̠nvētyā̍hai̠bhya ē̠va lō̠kēbhyō̍ ya̠jña-mprā-”ha̍viṣṭa̠mbhō̍-‘si̠ vṛṣṭyai̎ tvā̠ vṛṣṭi̍-ñji̠nvētyā̍ha̠ vṛṣṭi̍mē̠vā-‘va̍- [vṛṣṭi̍mē̠vā-‘va̍, ru̠ndhē̠ pra̠vā-] 6

-rundhē pra̠vā-‘sya̍nu̠vā-‘sītyā̍ha mithuna̠tvāyō̠śiga̍si̠ vasu̍bhyastvā̠ vasū̎mji̠nvētyā̍hā̠ṣṭau vasa̍va̠ ēkā̍daśa ru̠drā dvāda̍śā-”di̠tyā ē̠tāva̍ntō̠ vai dē̠vāstēbhya̍ ē̠va ya̠jña-mprā-”haujō̍-‘si pi̠tṛbhya̍stvā pi̠tṝn ji̠nvētyā̍ha dē̠vānē̠va pi̠tṝnanu̠ santa̍nōti̠ tantu̍rasi pra̠jābhya̍stvā pra̠jā ji̠nvē- [pra̠jā ji̍nva, ityā̍ha pi̠tṝnē̠va] 7

-tyā̍ha pi̠tṝnē̠va pra̠jā anu̠ santa̍nōti pṛtanā̠ṣāḍa̍si pa̠śubhya̍stvā pa̠śūñji̠nvētyā̍ha pra̠jā ē̠va pa̠śūnanu̠ santa̍nōtirē̠vada̠syō-ṣa̍dhībhya̠ stvauṣa̍dhī-rji̠nvētyā̠hauṣa̍dhīṣvē̠va pa̠śū-nprati̍ṣṭhāpayatyabhi̠jida̍si yu̠ktagrā̠vēndrā̍ya̠ tvēndra̍-ñji̠nvētyā̍hā̠bhiji̍tyā̠ adhi̍patirasi prā̠ṇāya̍ tvā prā̠ṇa- [prā̠ṇam, ji̠nvētyā̍ha] 8

-ñji̠nvētyā̍ha pra̠jāsvē̠va prā̠ṇā-nda̍dhāti tri̠vṛda̍si pra̠vṛda̠sītyā̍ha mithuna̠tvāya̍ sagṃrō̠hō̍-‘si nīrō̠hō̍-‘sītyā̍ha̠ prajā̎tyai vasu̠kō̍-‘si̠ vēṣa̍śrirasi̠ vasya̍ṣṭira̠sītyā̍ha̠ prati̍ṣṭhityai ॥ 9 ॥
(ji̠nvētya – va̍ – pra̠jā ji̍nva – prā̠ṇan – tri̠gṃ̠śachcha̍) (a. 2)

a̠gninā̍ dē̠vēna̠ pṛta̍nā jayāmi gāya̠trēṇa̠ Chanda̍sā tri̠vṛtā̠ stōmē̍na rathanta̠rēṇa̠ sāmnā̍ vaṣaṭkā̠rēṇa̠ vajrē̍ṇa pūrva̠jā-nbhrātṛ̍vyā̠nadha̍rā-npādayā̠myavai̍nā-nbādhē̠ pratyē̍nānnudē̠-‘smin kṣayē̠-‘smi-nbhū̍milō̠kē yō̎-‘smā-ndvēṣṭi̠ yañcha̍ va̠ya-ndvi̠ṣmō viṣṇō̠ḥ kramē̠ṇā-‘tyē̍nān krāmā̠mīndrē̍ṇa dē̠vēna̠ pṛta̍nā jayāmi̠ traiṣṭu̍bhēna̠ Chanda̍sā pañchada̠śēna̠ stōmē̍na bṛha̠tā sāmnā̍ vaṣaṭkā̠rēṇa̠ vajrē̍ṇa [vajrē̍ṇa, sa̠ha̠jān. viśvē̍bhirdē̠vēbhi̠ḥ pṛta̍nā] 10

saha̠jān. viśvē̍bhirdē̠vēbhi̠ḥ pṛta̍nā jayāmi̠ jāga̍tēna̠ Chanda̍sā saptada̠śēna̠ stōmē̍na vāmadē̠vyēna̠ sāmnā̍ vaṣaṭkā̠rēṇa̠ vajrē̍ṇā para̠jānindrē̍ṇa sa̠yujō̍ va̠yagṃ sā̍sa̠hyāma̍ pṛtanya̠taḥ । ghnantō̍ vṛ̠trāṇya̍pra̠ti । yattē̍ agnē̠ tēja̠stēnā̠ha-ntē̍ja̠svī bhū̍yāsa̠ṃ yattē̍ agnē̠ varcha̠stēnā̠haṃ va̍rcha̠svī bhū̍yāsa̠ṃ yattē̍ agnē̠ hara̠stēnā̠hagṃ ha̍ra̠svī bhū̍yāsam ॥ 11 ॥
(bṛ̠ha̠tā sāmnā̍ vaṣaṭkā̠rēṇa̠ vajrē̍ṇa̠ – ṣaṭcha̍tvārigṃśachcha) (a. 3)

yē dē̠vā ya̍jña̠hanō̍ yajña̠muṣa̍ḥ pṛthi̠vyāmaddhyāsa̍tē । a̠gnirmā̠ tēbhyō̍ rakṣatu̠ gachChē̍ma su̠kṛtō̍ va̠yam ॥ ā-‘ga̍nma mitrāvaruṇā varēṇyā̠ rātrī̍ṇā-mbhā̠gō yu̠vayō̠ryō asti̍ । nāka̍-ṅgṛhṇā̠nā-ssu̍kṛ̠tasya̍ lō̠kē tṛ̠tīyē̍ pṛ̠ṣṭhē adhi̍ rōcha̠nē di̠vaḥ ॥ yē dē̠vā ya̍jña̠hanō̍ yajña̠muṣō̠-‘ntari̠kṣē-‘ddhyāsa̍tē । vā̠yurmā̠ tēbhyō̍ rakṣatu̠ gachChē̍ma su̠kṛtō̍ va̠yam ॥ yāstē̠ rātrī̎-ssavita- [rātrī̎-ssavitaḥ, dē̠va̠yānī̍ranta̠rā] 12

-rdēva̠yānī̍ranta̠rā dyāvā̍pṛthi̠vī vi̠yanti̍ । gṛ̠haiścha̠ sarvai̎ḥ pra̠jayā̠ nvagrē̠ suvō̠ ruhā̍ṇāstaratā̠ rajāgṃ̍si ॥ yē dē̠vā ya̍jña̠hanō̍ yajña̠muṣō̍ di̠vyaddhyāsa̍tē । sūryō̍ mā̠ tēbhyō̍ rakṣatu̠ gachChē̍ma su̠kṛtō̍ va̠yam ॥ yēnēndrā̍ya sa̠mabha̍ra̠ḥ payāg̍syutta̠mēna̍ ha̠viṣā̍ jātavēdaḥ । tēnā̎-‘gnē̠ tvamu̠ta va̍rdhayē̠magṃ sa̍jā̠tānā̠g̠ śraiṣṭhya̠ ā dhē̎hyēnam ॥ ya̠jña̠hanō̠ vai dē̠vā ya̍jña̠muṣa̍- [dē̠vā ya̍jña̠muṣa̍ḥ, sa̠nti̠ ta ē̠ṣu] 13

-ssanti̠ ta ē̠ṣu lō̠kēṣvā̍sata ā̠dadā̍nā vimathnā̠nā yō dadā̍ti̠ yō yaja̍tē̠ tasya̍ । yē dē̠vā ya̍jña̠hana̍ḥ pṛthi̠vyāmaddhyāsa̍tē̠ yē a̠ntari̍kṣē̠ yē di̠vītyā̍hē̠mānē̠va lō̠kāg​stī̠rtvā sagṛ̍ha̠-ssapa̍śu-ssuva̠rgaṃ lō̠kamē̠tyapa̠ vai sōmē̍nējā̠nāddē̠vatā̎ścha ya̠jñaścha̍ krāmantyāgnē̠ya-mpañcha̍kapālamudavasā̠nīya̠-nnirva̍pēda̠gni-ssarvā̍ dē̠vatā̠ḥ [dē̠vatā̎ḥ, pāṅktō̍ ya̠jñō] 14

pāṅktō̍ ya̠jñō dē̠vatā̎śchai̠va ya̠jñañchāva̍ rundhēgāya̠trō vā a̠gnirgā̍ya̠tra Cha̍ndā̠sta-ñChanda̍sā̠ vya̍rdhayati̠ ya-tpañcha̍kapāla-ṅka̠rōtya̠ṣṭāka̍pālaḥ kā̠ryō̎-‘ṣṭākṣa̍rā gāya̠trī gā̍ya̠trō̎-‘gni-rgā̍ya̠tra Cha̍ndā̠-ssvēnai̠vaina̠-ñChanda̍sā̠ sama̍rdhayati pa̠ṅktyau̍ yājyānuvā̠kyē̍ bhavata̠ḥ pāṅktō̍ ya̠jñastēnai̠va ya̠jñānnaiti̍ ॥ 15 ॥
(sa̠vi̠ta̠-rdē̠vā ya̍jña̠muṣa̠ḥ – sarvā̍ dē̠vatā̠ – stricha̍tvārigṃśachcha) (a. 4)

sūryō̍ mā dē̠vō dē̠vēbhya̍ḥ pātu vā̠yura̠ntari̍kṣā̠-dyaja̍mānō̠-‘gnirmā̍ pātu̠ chakṣu̍ṣaḥ । sakṣa̠ śūṣa̠ savi̍ta̠rviśva̍char​ṣaṇa ē̠tēbhi̍-ssōma̠ nāma̍bhirvidhēma tē̠ tēbhi̍-ssōma̠ nāma̍bhirvidhēma tē ॥ a̠ha-mpa̠rastā̍da̠-hama̠vastā̍da̠ha-ñjyōti̍ṣā̠ vi tamō̍ vavāra । yada̠ntari̍kṣa̠-ntadu̍ mē pi̠tā-‘bhū̍da̠hagṃ sūrya̍mubha̠yatō̍ dadar​śā̠ha-mbhū̍yā samutta̠ma-ssa̍mā̠nānā̠- [samutta̠ma-ssa̍mā̠nānā̎m, ā sa̍mu̠drā-] 16

-mā sa̍mu̠drā-dā-‘ntari̍kṣāt-pra̠jāpa̍tiruda̠dhi-ñchyā̍vayā̠tīndra̠ḥ prasnau̍tu ma̠rutō̍ var​ṣaya̠ntūnna̍mbhaya pṛthi̠vī-mbhi̠ndhīda-ndi̠vya-nnabha̍ḥ । u̠dnō di̠vyasya̍ nō dē̠hīśā̍nō̠ visṛ̍jā̠ dṛti̎m ॥ pa̠śavō̠ vā ē̠tē yadā̍di̠tya ē̠ṣa ru̠drō yada̠gnirōṣa̍dhī̠ḥ prāsyā̠gnāvā̍di̠tya-ñju̍hōti ru̠drādē̠va pa̠śūna̠ntarda̍dhā̠tyathō̠ ōṣa̍dhīṣvē̠va pa̠śū- [pa̠śūn, prati̍ṣṭhāpayati] 17

-nprati̍ṣṭhāpayati ka̠virya̠jñasya̠ vita̍nōti̠ panthā̠-nnāka̍sya pṛ̠ṣṭhē adhi̍ rōcha̠nē di̠vaḥ । yēna̍ ha̠vyaṃ vaha̍si̠ yāsi̍ dū̠ta i̠taḥ prachē̍tā a̠muta̠-ssanī̍yān ॥ yāstē̠ viśvā̎-ssa̠midha̠-ssantya̍gnē̠yāḥ pṛ̍thi̠vyā-mba̠r̠hiṣi̠ sūryē̠ yāḥ । tāstē̍ gachCha̠ntvāhu̍ti-ṅghṛ̠tasya̍ dēvāya̠tē yaja̍mānāya̠ śarma̍ ॥ ā̠śāsā̍na-ssu̠vīryagṃ̍ rā̠yaspōṣa̠gg̠ svaśvi̍yam । bṛha̠spati̍nā rā̠yā sva̠gākṛ̍tō̠ mahya̠ṃ yaja̍mānāya tiṣṭha ॥ 18 ॥
(sa̠mā̠nānā̠-mōṣa̍dhīṣvē̠va pa̠śūn – mahya̠ṃ yaja̍mānā̠ – yaika̍ñcha) (a. 5)

sa-ntvā̍ nahyāmi̠ paya̍sā ghṛ̠tēna̠ sa-ntvā̍ nahyāmya̠pa ōṣa̍dhībhiḥ । sa-ntvā̍ nahyāmi pra̠jayā̠-‘hama̠dya sā dī̎kṣi̠tā sa̍navō̠ vāja̍ma̠smē ॥ praitu̠ brahma̍ṇa̠spatnī̠ vēdi̠ṃ varṇē̍na sīdatu । athā̠hama̍nukā̠minī̠ svē lō̠kē vi̠śā i̠ha ॥ su̠pra̠jasa̍stvā va̠yagṃ su̠patnī̠rupa̍ sēdima । agnē̍ sapatna̠dambha̍na̠mada̍bdhāsō̠ adā̎bhyam ॥ i̠maṃ viṣyā̍mi̠ varu̍ṇasya̠ pāśa̠ṃ- [pāśa̎m, yamaba̍ddhnīta] 19

-ँyamaba̍ddhnīta savi̠tā su̠kēta̍ḥ । dhā̠tuścha̠ yōnau̍ sukṛ̠tasya̍ lō̠kē syō̠na-mmē̍ sa̠ha patyā̍ karōmi ॥ prēhyu̠dēhyṛ̠tasya̍ vā̠mīranva̠gnistē-‘gra̍-nnaya̠tvadi̍ti̠rmaddhya̍-ndadatāgṃ ru̠drāva̍sṛṣṭā-‘si yu̠vā nāma̠ mā mā̍ higṃsī̠rvasu̍bhyō ru̠drēbhya̍ ādi̠tyēbhyō̠ viśvē̎bhyō vō dē̠vēbhya̍ḥ pa̠nnēja̍nīrgṛhṇāmi ya̠jñāya̍ vaḥ pa̠nnēja̍nī-ssādayāmi̠ viśva̍sya tē̠ viśvā̍vatō̠ vṛṣṇi̍yāvata̠- [vṛṣṇi̍yāvataḥ, tavā̎gnē vā̠mīranu̍] 20

-stavā̎gnē vā̠mīranu̍ sa̠dṛṃśi̠ viśvā̠ rētāgṃ̍si dhiṣī̠yā-‘ga̍-ndē̠vān. ya̠jñō ni dē̠vīrdē̠vēbhyō̍ ya̠jñama̍śiṣanna̠smin-thsu̍nva̠ti yaja̍māna ā̠śiṣa̠-ssvāhā̍kṛtā-ssamudrē̠ṣṭhā ga̍ndha̠rvamāti̍ṣṭha̠tānu̍ । vāta̍sya̠ patma̍nni̠ḍa ī̍ḍi̠tāḥ ॥ 21 ॥
(pāśa̠ṃ – ँvṛṣṇi̍yāvata – stri̠gṃ̠śachcha̍) (a. 6)

va̠ṣa̠ṭkā̠rō vai gā̍yatri̠yai śirō̎-‘China̠-ttasyai̠ rasa̠ḥ parā̍-‘pata̠-thsa pṛ̍thi̠vī-mprāvi̍śa̠thsa kha̍di̠rō̍-‘bhava̠dyasya̍ khādi̠ra-ssru̠vō bhava̍ti̠ Chanda̍sāmē̠va rasē̠nāva̍ dyati̠ sara̍sā a̠syā-”hu̍tayō bhavanti tṛ̠tīya̍syāmi̠tō di̠vi sōma̍ āsī̠-tta-ṅgā̍yatryā-‘ ha̍ra̠-ttasya̍ pa̠rṇama̍chChidyata̠ ta-tpa̠rṇō̍-‘bhava̠-tta-tpa̠rṇasya̍ parṇa̠tvaṃ yasya̍ parṇa̠mayī̍ ju̠hū- [ju̠hūḥ, bhava̍ti sau̠myā] 22

-rbhava̍ti sau̠myā a̠syā-”hu̍tayō bhavanti ju̠ṣantē̎-‘sya dē̠vā āhu̍tīrdē̠vā vai brahma̍nnavadanta̠ ta-tpa̠rṇa upā̍-‘śṛṇō-thsu̠śravā̠ vai nāma̠ yasya̍ parṇa̠mayī̍ ju̠hūrbhava̍ti̠ na pā̠pagg​ ślōkagṃ̍ śṛṇōti̠ brahma̠ vai pa̠rṇō viṇma̠rutō-‘nna̠ṃ viṇmā̍ru̠tō̎-‘śva̠tthō yasya̍ parṇa̠mayī̍ ju̠hūrbhava̠tyā-śva̍t-thyupa̠bhṛd- brahma̍ṇai̠vānna̠mava̍ ru̠ndhē-‘thō̠ brahmai̠- [ru̠ndhē-‘thō̠ brahma̍, ē̠va vi̠śyaddhyū̍hati] 23

-va vi̠śyaddhyū̍hati rā̠ṣṭraṃ vai pa̠rṇō viḍa̍śva̠tthō ya-tpa̍rṇa̠mayī̍ ju̠hūrbhava̠tyā-śva̍tthyupa̠bhṛ-drā̠ṣṭramē̠va vi̠śyaddhyū̍hati pra̠jāpa̍ti̠rvā a̍juhō̠-thsā yatrā-”hu̍tiḥ pra̠tyati̍ṣṭha̠-ttatō̠ vika̍ṅkata̠ uda̍tiṣṭha̠-ttata̍ḥ pra̠jā a̍sṛjata̠ yasya̠ vaika̍ṅkatī dhru̠vā bhava̍ti̠ pratya̠vāsyā ”hu̍tayastiṣṭha̠ntyathō̠ praiva jā̍yata ē̠tadvai sru̠chāgṃ rū̠paṃ yasyai̠vagṃ rū̍pā̠-ssruchō̠ bhava̍nti̠ sarvā̎ṇyē̠vainagṃ̍ rū̠pāṇi̍ paśū̠nāmupa̍tiṣṭhantē̠ nāsyāpa̍-rūpamā̠tmañjā̍yatē ॥ 24 ॥
(ju̠hū – rathō̠ brahma̍ – sru̠chāgṃ – sa̠ptada̍śa cha) (a. 7)

u̠pa̠yā̠magṛ̍hītō-‘si pra̠jāpa̍tayē tvā̠ jyōti̍ṣmatē̠ jyōti̍ṣmanta-ṅgṛhṇāmi̠ dakṣā̍ya dakṣa̠vṛdhē̍ rā̠ta-ndē̠vēbhyō̎-‘gni ji̠hvēbhya̍stvartā̠yubhya̠ indra̍jyēṣṭhēbhyō̠ varu̍ṇarājabhyō̠ vātā̍pibhyaḥ pa̠rjanyā̎tmabhyō di̠vē tvā̠-‘ntari̍kṣāya tvā pṛthi̠vyai tvā-‘pē̎mdra dviṣa̠tō manō-‘pa̠ jijyā̍satō ja̠hyapa̠ yō nō̍-‘rātī̠yati̠ ta-ñja̍hi prā̠ṇāya̍ tvā-‘pā̠nāya̍ tvā vyā̠nāya̍ tvā sa̠tē tvā-‘sa̍tē tvā̠-‘dbhyastvauṣa̍dhībhyō̠ viśvē̎bhyastvā bhū̠tēbhyō̠ yata̍ḥ pra̠jā akkhi̍drā̠ ajā̍yanta̠ tasmai̎ tvā pra̠jāpa̍tayē vibhū̠dāv.nnē̠ jyōti̍ṣmatē̠ jyōti̍ṣmanta-ñjuhōmi ॥ 25 ॥
(ōṣa̍dhībhya̠ – śchatu̍rdaśa cha) (a. 8)

yāṃ vā a̍ddhva̠ryuścha̠ yaja̍mānaścha dē̠vatā̍mantari̠tastasyā̠ ā vṛ̍śchyētē prājāpa̠tya-nda̍dhigra̠ha-ṅgṛ̍hṇīyā-tpra̠jāpa̍ti̠-ssarvā̍ dē̠vatā̍ dē̠vatā̎bhya ē̠va nihnu̍vātē jyē̠ṣṭhō vā ē̠ṣa grahā̍ṇā̠ṃ yasyai̠ṣa gṛ̠hyatē̠ jyaiṣṭhya̍mē̠va ga̍chChati̠ sarvā̍sā̠ṃ vā ē̠taddē̠vatā̍nāgṃ rū̠paṃ yadē̠ṣa grahō̠ yasyai̠ṣa gṛ̠hyatē̠ sarvā̎ṇyē̠vainagṃ̍ rū̠pāṇi̍ paśū̠nāmupa̍tiṣṭhanta upayā̠magṛ̍hītō- [upayā̠magṛ̍hītaḥ, a̠si̠ pra̠jāpa̍tayē] 26

-‘si pra̠jāpa̍tayē tvā̠ jyōti̍ṣmatē̠ jyōti̍ṣmanta-ṅgṛhṇā̠mītyā̍ha̠ jyōti̍rē̠vainagṃ̍ samā̠nānā̎-ṅkarōtyagni-ji̠hvēbhya̍stvartā̠yubhya̠ ityā̍hai̠tāva̍tī̠rvai dē̠vatā̠stābhya̍ ē̠vaina̠gṃ̠ sarvā̎bhyō gṛhṇā̠tyapē̎mdra dviṣa̠tō mana̠ ityā̍ha̠ bhrātṛ̍vyāpanuttyai prā̠ṇāya̍ tvā-‘pā̠nāya̠ tvētyā̍ha prā̠ṇānē̠va yaja̍mānē dadhāti̠ tasmai̎ tvā pra̠jāpa̍tayē vibhū̠dāv.nnē̠ jyōti̍ṣmatē̠ jyōti̍ṣmanta-ñjuhō̠mī- [jyōti̍ṣmanta-ñjuhō̠mi, ityā̍ha pra̠jāpa̍ti-] 27

-tyā̍ha pra̠jāpa̍ti̠-ssarvā̍ dē̠vatā̠-ssarvā̎bhya ē̠vaina̍-ndē̠vatā̎bhyō juhōtyājyagra̠ha-ṅgṛ̍hṇīyā̠-ttēja̍skāmasya̠ tējō̠ vā ājya̍-ntēja̠svyē̍va bha̍vati sōmagra̠ha-ṅgṛ̍hṇīyā-dbrahmavarcha̠sakā̍masya brahmavarcha̠saṃ vai sōmō̎ brahmavarcha̠syē̍va bha̍vati dadhigra̠ha-ṅgṛ̍hṇīyā-tpa̠śukā̍ma̠syōrgvai daddhyūr-kpa̠śava̍ ū̠rjaivāsmā̠ ūrja̍-mpa̠śūnava̍ rundhē ॥ 28 ॥
(u̠pa̠yā̠magṛ̍hītō – juhōmi̠ – tricha̍tvārigṃśachcha) (a. 9)

tvē kratu̠mapi̍ vṛñjanti̠ viśvē̠ dviryadē̠tē tri-rbhava̠ntyūmā̎ḥ । svā̠dō-ssvādī̍ya-ssvā̠dunā̍ sṛjā̠ samata̍ ū̠ ṣu madhu̠ madhu̍nā̠-‘bhi yō̍dhi । u̠pa̠yā̠magṛ̍hītō-‘si pra̠jāpa̍tayē tvā̠ juṣṭa̍-ṅgṛhṇāmyē̠ṣa tē̠ yōni̍ḥ pra̠jāpa̍tayē tvā ॥ prā̠ṇa̠gra̠hā-ngṛ̍hṇātyē̠tāva̠dvā a̍sti̠ yāva̍dē̠tē grahā̠-sstōmā̠śChandāgṃ̍si pṛ̠ṣṭhāni̠ diśō̠ yāva̍dē̠vāsti̠ ta- [yāva̍dē̠vāsti̠ tat, ava̍ rundhē] 29

-dava̍ rundhē jyē̠ṣṭhā vā ē̠tā-nbrā̎hma̠ṇāḥ pu̠rā vidāma̍kra̠-ntasmā̠-ttēṣā̠gṃ̠ sarvā̠ diśō̠-‘bhiji̍tā abhūva̠n̠. yasyai̠ tē gṛ̠hyantē̠ jyaiṣṭhya̍mē̠va ga̍chChatya̠bhi diśō̍ jayati̠ pañcha̍ gṛhyantē̠ pañcha̠ diśa̠-ssarvā̎svē̠va di̠kṣ-vṛ̍ddhnuvanti̠ nava̍nava gṛhyantē̠ nava̠ vai puru̍ṣē prā̠ṇāḥ prā̠ṇānē̠va yaja̍mānēṣu dadhati prāya̠ṇīyē̍ chōdaya̠nīyē̍ cha gṛhyantē prā̠ṇā vai prā̍ṇagra̠hāḥ [prā̠ṇā vai prā̍ṇagra̠hāḥ, prā̠ṇairē̠va] 30

prā̠ṇairē̠va pra̠yanti̍ prā̠ṇairudya̍nti daśa̠mē-‘ha̍-ngṛhyantē prā̠ṇā vai prā̍ṇagra̠hāḥ prā̠ṇēbhya̠ḥ khalu̠ vā ē̠ta-tpra̠jā ya̍nti̠ yadvā̍madē̠vyaṃ yōnē̠śchyava̍tē daśa̠mē-‘ha̍n. vāmadē̠vyaṃ yōnē̎śchyavatē̠ ya-dda̍śa̠mē-‘ha̍-ngṛ̠hyantē̎ prā̠ṇēbhya̍ ē̠va ta-tpra̠jā naya̍nti । 31
(tat – prā̍ṇagra̠hāḥ – sa̠ptavigṃ̍śachcha) (a. 10)

pra dē̠vandē̠vyā dhi̠yā bhara̍tā jā̠tavē̍dasam । ha̠vyā nō̍ vakṣadānu̠ṣak ॥ a̠yamu̠ ṣya pradē̍va̠yur​hōtā̍ ya̠jñāya̍ nīyatē । rathō̠ na yōra̠bhīvṛ̍tō̠ ghṛṇī̍vān chētati̠ tmanā̎ ॥ a̠yama̠gniru̍ruṣyatya̠mṛtā̍diva̠ janma̍naḥ । saha̍saśchi̠-thsahī̍yā-ndē̠vō jī̠vāta̍vē kṛ̠taḥ ॥ iḍā̍yāstvā pa̠dē va̠ya-nnābhā̍ pṛthi̠vyā adhi̍ । jāta̍vēdō̠ ni dhī̍ma̠hyagnē̍ ha̠vyāya̠ vōḍha̍vē । 32

agnē̠ viśvē̍bhi-ssvanīka dē̠vairūrṇā̍vanta-mpratha̠ma-ssī̍da̠ yōni̎m । ku̠lā̠yina̍-ṅghṛ̠tava̍ntagṃ savi̠trē ya̠jña-nna̍ya̠ yaja̍mānāya sā̠dhu ॥ sīda̍ hōta̠-ssva u̍ lō̠kē chi̍ki̠tvān​thsā̠dayā̍ ya̠jñagṃ su̍kṛ̠tasya̠ yōnau̎ । dē̠vā̠vīrdē̠vān. ha̠viṣā̍ yajā̠syagnē̍ bṛ̠ha-dyaja̍mānē̠ vayō̍ dhāḥ ॥ ni hōtā̍ hōtṛ̠ṣada̍nē̠ vidā̍nastvē̠ṣō dī̍di̠vāgṃ a̍sada-thsu̠dakṣa̍ḥ । ada̍bdhavrata-pramati̠rvasi̍ṣṭha-ssahasra-mbha̠ra-śśuchi̍jihvō a̠gniḥ ॥ tva-ndū̠tastva- [tva-ndū̠tastvam, u̠ na̠ḥ pa̠ra̠spāstvaṃ vasya̠ ā] 33

-mu̍ naḥ para̠spāstvaṃ vasya̠ ā vṛ̍ṣabha praṇē̠tā । agnē̍ tō̠kasya̍ na̠stanē̍ ta̠nūnā̠mapra̍yuchCha̠-ndīdya̍dbōdhi gō̠pāḥ ॥ a̠bhi tvā̍ dēva savita̠rīśā̍na̠ṃ vāryā̍ṇām । sadā̍-‘va-nbhā̠gamī̍mahē ॥ ma̠hī dyauḥ pṛ̍thi̠vī cha̍na i̠maṃ ya̠jña-mmi̍mikṣatām । pi̠pṛ̠tā-nnō̠ bharī̍mabhiḥ ॥ tvāma̍gnē̠ puṣka̍rā̠daddhyatha̍rvā̠ nira̍manthata । mū̠rdhnō viśva̍sya vā̠ghata̍ḥ ॥ tamu̍- [tamu̍, tvā̠ da̠ddhyaṅṅṛṣi̍ḥ] 34

-tvā da̠ddhyaṅṅṛṣi̍ḥ pu̠tra ī̍dhē̠ atha̍rvaṇaḥ । vṛ̠tra̠haṇa̍-mpuranda̠ram ॥ tamu̍ tvā pā̠thyō vṛṣā̠ samī̍dhē dasyu̠hanta̍mam । dha̠na̠-ñja̠yagṃ raṇē̍raṇē ॥ u̠ta bru̍vantu ja̠ntava̠ uda̠gnirvṛ̍tra̠hā-‘ja̍ni । dha̠na̠-ñja̠yō raṇē̍raṇē ॥ ā yagṃ hastē̠ na khā̠dina̠gṃ̠ śiśu̍-ñjā̠ta-nna bibhra̍ti । vi̠śāma̠gnigg​ sva̍ddhva̠ram ॥ pradē̠va-ndē̠vavī̍tayē̠ bhara̍tā vasu̠vitta̍mam । āsvē yōnau̠ ni ṣī̍datu ॥ ā [ ] 35

jā̠ta-ñjā̠tavē̍dasi pri̠yagṃ śi̍śī̠tā-‘ti̍thim । syō̠na ā gṛ̠hapa̍tim ॥ a̠gninā̠-‘gni-ssami̍ddhyatē ka̠virgṛ̠hapa̍ti̠ryuvā̎ । ha̠vya̠vā-ḍju̠hvā̎syaḥ ॥ tvagg​ hya̍gnē a̠gninā̠ viprō̠ viprē̍ṇa̠ san​thsa̠tā । sakhā̠ sakhyā̍ sami̠ddhyasē̎ ॥ ta-mma̍rjayanta su̠kratu̍-mpurō̠yāvā̍namā̠jiṣu̍ । svēṣu̠ kṣayē̍ṣu vā̠jina̎m ॥ ya̠jñēna̍ ya̠jñama̍yajanta dē̠vāstāni̠ dharmā̍ṇi pratha̠mānyā̍sann । tē ha̠ nāka̍-mmahi̠māna̍-ssachantē̠ yatra̠ pūrvē̍ sā̠ddhyā-ssanti̍ dē̠vāḥ ॥ 36 ॥
(vōḍha̍vē- dū̠tastvaṃ – tamu̍ – sīda̠tvā – yatra̍ – cha̠tvāri̍ cha) (a. 11)

(pū̠rṇa – r​ṣa̍yō̠ – ‘gninā̠ – yē dē̠vāḥ – sūryō̍ mā̠ – santvā̍ nahyāmi – vaṣaṭkā̠ra-ssa kha̍di̠ra – u̍payā̠magṛ̍hītō-‘si̠ – yāṃ vai – tvē kratu̠ṃ – pradē̠va – mēkā̍daśa )

(pū̠rṇā – sa̍ha̠jān – tavā̎-‘gnē – prā̠ṇairē̠va – ṣaṭtrigṃ̍śat)

(pū̠rṇā, santi̍ dē̠vāḥ)

॥ hari̍ḥ ōm ॥

(pra̠jāpa̍ti̠ – yō̍ vā – agnē̠ – vi vai – pū̠rṇā – pañcha̍) (5)

॥ kṛṣṇa yajurvēdīya taittirīya saṃhitāyā-ntṛtīyakāṇḍē pañchamaḥ praśna-ssamāptaḥ ॥