KYTB 3.7 Acchidra Kanda Prayaschitta – Krishna Yajurveda Taittiriya Brahmana Patha – Sarvan Va Eshognau

kṛṣṇa yajurvēdīya taittirīya brāhmaṇē tṛtīyāṣṭakē saptamaḥ prapāṭhakaḥ – achChidra-ṅkāṇḍa-mprāyaśchittam

ō-nnamaḥ paramātmanē, śrī mahāgaṇapatayē namaḥ,
śrī gurubhyō namaḥ । ha̠ri̠ḥ ōm ॥

achChidra-ṅkāṇḍa-mprāyaśchittēna mantraiścha yajñachChidrapūraṇādachChidramuchyatē

anuvākaṃ 1 – dar​śapūrṇamāsēṣṭiviṣayāṇi kāni chitprāyaśchittāni

sarvā̠n̠. vā ē̠ṣō̎-‘gnau kāmā̠-npravē̍śayati ।
yō̎-‘gnīna̍nvā̠dhāya̍ vra̠tamu̠paiti̍ ।
sa yadani̍ṣṭvā prayā̠yāt । akā̍maprītā ēna̠-ṅkāmā̠ nānu̠ prayā̍yuḥ । a̠tē̠jā a̍vī̠rya̍-ssyāt ।
sa ju̍huyāt । tubhya̠-ntā a̍ṅgirastama ।
viśvā̎-ssukṣi̠taya̠ḥ pṛtha̍k ।
agnē̠ kāmā̍ya yēmira̠ iti̍ ।
kāmā̍nē̠vāsmi̍-ndadhāti ॥ 1 ॥

kāma̍prītā ēna̠-ṅkāmā̠ anu̠prayā̎mti ।
tē̠ja̠svī vī̠ryā̍vā-nbhavati ॥
santa̍ti̠rvā ē̠ṣā ya̠jñasya̍ ।
yō̎-‘gnīna̍nvā̠dhāya̍ vra̠tamu̠paiti̍ ।
sa yadu̠dvāya̍ti । vichChi̍tti-rē̠vāsya̠ sā ॥
ta-mprāñcha̍mu̠ddhṛtya̍ ।
mana̠sōpa̍tiṣṭhēta । manō̠ vai pra̠jāpa̍tiḥ ।
prā̠jā̠pa̠tyō ya̠jñaḥ ॥ 2 ॥

mana̍sai̠va ya̠jñagṃ santa̍nōti । bhūrityā̍ha । bhū̠tō vai pra̠jāpa̍tiḥ । bhūti̍mē̠vōpai̍ti ॥
vi vā ē̠ṣa i̍ndri̠yēṇa̍ vī̠ryē̍ṇardhyatē ।
yasyā-hi̍tāgnē-ra̠gnira̍pa̠kṣāya̍ti । yāva̠chChamya̍yā pra̠viddhyē̎t ।
yadi̠ tāva̍dapa̠kṣāyē̎t । tagṃ sambha̍rēt ।
i̠da-nta̠ ēka̍-mpa̠ra u̍ta̠ ēka̎m ॥ 3 ॥

tṛ̠tīyē̍na̠ jyōti̍ṣā̠ saṃvi̍śasva । sa̠ṃvēśa̍nasta̠nuvai̠ chāru̍rēdhi ।
pri̠yē dē̠vānā̎-mpara̠mē ja̠nitra̠ iti̍ । brahma̍ṇai̠vaina̠gṃ̠ sambha̍rati ।
saiva tata̠ḥ prāya̍śchittiḥ । yadi̍ parasta̠-rāma̍pa̠kṣāyē̎t । a̠nu̠ pra̠yāyāva̍syēt ।
sō ē̠va tata̠ḥ prāya̍śchittiḥ ॥
ōṣa̍dhī̠rvā ē̠tasya̍ pa̠śū-npaya̠ḥ pravi̍śati ।
yasya̍ ha̠viṣē̍ va̠thsā a̠pākṛ̍tā̠ dhaya̍nti ॥ 4 ॥

tān. yaddu̠hyāt । yā̠tayā̎mnā ha̠viṣā̍ yajēta । yanna du̠hyāt । ya̠jña̠pa̠ru-ra̠ntari̍yāt । vā̠ya̠vyā̎ṃ yavā̠gū-nnirva̍pēt ।
vā̠yurvai paya̍saḥ pradāpayi̠tā । sa ē̠vāsmai̠ paya̠ḥ pradā̍payati । payō̠ vā ōṣa̍dhayaḥ ।
paya̠ḥ paya̍ḥ ।
paya̍sai̠vāsmai̠ payō-‘va̍rundhē ॥ 5 ॥

athōtta̍rasmai ha̠viṣē̍ va̠thsāna̠pā ku̍ryāt ।
saiva tata̠ḥ prāya̍śchittiḥ ॥ a̠nya̠ta̠rān. vā ē̠ṣa dē̠vā-nbhā̍ga̠dhēyē̍na̠ vya̍rdhayati ।
yē yaja̍mānasya sā̠ya-ṅgṛ̠hamā̠-gachCha̍nti ।
yasya̍ sāya-ndu̠gdhagṃ ha̠virārti̍-mā̠rchChati̍ ।
indrā̍ya vrī̠hīnni̠-rupyō-pa̍vasēt । payō̠ vā ōṣa̍dhayaḥ । paya̍ ē̠vārabhya̍ gṛhī̠tvō-pa̍vasati । yatprā̠ta-ssyāt । tachChṛ̠ta-ṅku̍ryāt ॥ 6 ॥

athēta̍ra ai̠ndraḥ pu̍rō̠ḍāśa̍-ssyāt ।
i̠ndri̠yē ē̠vāsmai̍ sa̠mīchī̍ dadhāti ।
payō̠ vā ōṣa̍dhayaḥ । paya̠ḥ paya̍ḥ । paya̍sai̠vāsmai̠ payō-‘va̍rundhē ।
athōtta̍rasmai ha̠viṣē̍ va̠thsāna̠pā ku̍ryāt ।
saiva tata̠ḥ prāya̍śchittiḥ ॥ u̠bhayā̠n̠. vā ē̠ṣa dē̠vā-nbhā̍ga̠dhēyē̍na̠ vya̍rdhayati ।
yē yaja̍mānasya sā̠ya-ñcha̍ prā̠taścha̍ gṛ̠hamā̠-gachCha̍nti । yasyō̠bhayagṃ̍ ha̠virārti̍-mā̠rchChati̍ ॥ 7 ॥

ai̠ndra-mpañcha̍śarāva-mōda̠na-nnirva̍pēt ।
a̠gni-ndē̠vatā̍nā-mpratha̠maṃ ya̍jēt ।
a̠gnimu̍khā ē̠va dē̠vatā̎ḥ prīṇāti ।
a̠gniṃ vā anva̠nyā dē̠vatā̎ḥ ।
indra̠manva̠nyāḥ । tā ē̠vōbhayī̎ḥ prīṇāti ।
payō̠ vā ōṣa̍dhayaḥ ।
paya̠ḥ paya̍ḥ । paya̍sai̠vāsmai̠ payō-‘va̍rundhē ।
athōtta̍rasmai ha̠viṣē̍ va̠thsāna̠pā ku̍ryāt ॥ 8 ॥

saiva tata̠ḥ prāya̍śchittiḥ ॥ a̠rdhō vā ē̠tasya̍ ya̠jñasya̍ mīyatē ।
yasya̠ vratyē-‘ha̠-npatnya̍nā-lambhu̠kā bhava̍ti । tāma̍pa̠ruddhya̍ yajēta ।
sarvē̍ṇai̠va ya̠jñēna̍ yajatē ।
tāmi̠ṣṭvō-pa̍hvayēta । amū̠hama̍smi ।
sā tvam । dyaura̠ham । pṛ̠thi̠vī tvam । sāmā̠ham । ṛktvam । tāvēhi̠ sambha̍vāva । sa̠ha rētō̍ dadhāvahai । pu̠gṃ̠sē pu̠trāya̠ vētta̍vai ।
rā̠yaspōṣā̍ya suprajā̠stvāya̍ su̠vīryā̠yēti̍ ।
a̠rdha ē̠vainā̠mu-pa̍hvayatē ।
saiva tata̠ḥ prāya̍śchittiḥ ॥ 9 ॥
(da̠dhā̠ti̠ – ya̠jña – u̍ta̠ ēka̠ṃ – dhaya̍nti – rundhē – kuryā – dā̠rCha – tya̠pāku̍ryāt – pṛthi̠vī tvama̠ṣṭau cha̍) (a. 1)

(sarvā̠n̠. vi vai yadi̍ parasta̠rāmōṣa̍dhīran yata̠rānu̠bhayā̍na̠rdhō vai )

anuvākaṃ 2 – agnihōtrasāmnāyyasādhāraṇāni prāyaśchittāni
3.7.2.1
yadvi-ṣṣa̍ṇṇēna juhu̠yāt ।
apra̍jā apa̠śuryaja̍māna-ssyāt ।
yadanā̍yatanē ni̠nayē̎t । a̠nā̠ya̠ta̠na-ssyā̎t ।
prā̠jā̠pa̠tyaya̠rchā va̍lmīka-va̠pāyā̠ma-va̍nayēt । prā̠jā̠pa̠tyō vai va̠lmīka̍ḥ । ya̠jñaḥ pra̠jāpa̍tiḥ । pra̠jāpa̍tāvē̠va ya̠jña-mprati̍ṣṭhāpayati ।
bhūrityā̍ha । bhū̠tō vai pra̠jāpa̍tiḥ ॥ 10 ॥

bhūti̍mē̠vōpai̍ti । ta-tkṛ̠tvā । a̠nyā-ndu̠gdhvā puna̍r-hōta̠vya̎m । saiva tata̠ḥ prāya̍śchittiḥ ॥ yatkī̠ṭā-va̍pannēna juhu̠yāt ।
apra̍jā apa̠śu-ryaja̍māna-ssyāt ।
yadanā̍yatanē ni̠nayē̎t । a̠nā̠ya̠ta̠na-ssyā̎t ।
ma̠ddhya̠mēna̍ pa̠rṇēna̍ dyāvā-pṛthi̠vya̍-ya̠rchā-‘nta̍ḥ pari̠dhi nina̍yēt ।
dyāvā̍pṛthi̠vyō-rē̠vaina̠t-prati̍ṣṭhāpayati ॥ 11 ॥

tatkṛ̠tvā । a̠nyā-ndu̠gdhvā puna̍r-hōta̠vya̎m । saiva tata̠ḥ prāya̍śchittiḥ ॥ yadava̍vṛṣṭēna juhu̠yāt । apa̍rūpa-masyā̠tma-ñjā̍yēta ।
ki̠lāsō̍ vā̠ syāda̍r​śa̠sō vā̎ । ya-tpratyē̠yāt । ya̠jñaṃ vichChi̍ndyāt । sa ju̍huyāt ।
mi̠trō janā̎n kalpayati prajā̠nann ॥ 12 ॥

mi̠trō dā̍dhāra pṛthi̠vīmu̠ta dyām । mi̠traḥ kṛ̠ṣṭīra-ni̍miṣā̠ ‘bhicha̍ṣṭē ।
sa̠tyāya̍ ha̠vya-ṅghṛ̠tava̍-jjuhō̠tēti̍ । mi̠trēṇai̠vaina̍-tkalpayati । tatkṛ̠tvā । a̠nyā-ndu̠gdhvā puna̍r​hōta̠vya̎m ।
saiva tata̠ḥ prāya̍śchittiḥ ॥
ya-tpūrva̍syā̠-māhu̍tyāgṃ hu̠tāyā̠-mutta̠rā-”hu̍ti̠-sskandē̎t ।
dvi̠pādbhi̍ḥ pa̠śubhi̠-ryaja̍mānō̠ vyṛ̍̍ddhyēta ।
yadutta̍rayā̠ ‘bhiju̍hu̠yāt ॥ 13 ॥

chatu̍ṣpādbhiḥ pa̠śubhi̠-ryaja̍mānō̠ vyṛ̍ddhyēta ।
yatra̠ vēttha̍ vanaspatē dē̠vānā̠-ṅguhyā̠ nāmā̍ni ।
tatra̍ ha̠vyāni̍ gāma̠yēti̍ vānaspa̠tya-ya̠rchā sa̠midha̍-mā̠dhāya̍ । tū̠ṣṇīmē̠va puna̍-rjuhuyāt ।
vana̠spati̍nai̠va ya̠jñasyārtā̠-ñchānā̎rtā̠-ñchāhu̍tī̠ vidā̍dhāra । tatkṛ̠tvā । a̠nyā-ndu̠gdhvā puna̍r-hōta̠vya̎m । saiva tata̠ḥ prāya̍śchittiḥ ॥
yatpu̠rā pra̍yā̠jēbhya̠ḥ prāṃaṅgā̍ra̠-sskandē̎t ।
a̠ddhva̠ryavē̍ cha̠ yaja̍mānāya̠ chākagg̍ syāt ॥ 14 ॥

ya-dda̍kṣi̠ṇā । bra̠hmaṇē̍ cha̠ yaja̍mānāya̠ chākagg̍ syāt । ya-tpra̠tyak ।
hōtrē̍ cha̠ patni̍yai cha̠ yaja̍mānāya̠ chākagg̍ syāt ।
yadudaṃ̍ । a̠gnīdhē̍ cha pa̠śubhya̍ścha̠ yaja̍mānāya̠ chākagg̍ syāt । yada̍bhijuhu̠yāt । ru̠drō̎-‘sya pa̠śū-nghātu̍ka-ssyāt ।
yannābhi̍ juhu̠yāt । aśā̎mta̠ḥ prahri̍yēta ॥ 15 ॥

sru̠vasya̠ buddhnē̍nābhi̠ nida̍ddhyāt ।
mā ta̍mō̠ mā ya̠jñasta̍ma̠nmā yaja̍māna-stamat ।
nama̍stē astvāya̠tē । namō̍ rudra parāya̠tē ।
namō̠ yatra̍ ni̠ṣīda̍si ।
a̠mu-mmā higṃ̍sīra̠mu-mmā higṃ̍sī̠riti̠ yēna̠ skandē̎t ॥ ta-mpraha̍rēt ।
sa̠hasra̍śṛṅgō vṛṣa̠bhō jā̠tavē̍dāḥ । stōma̍pṛṣṭhō ghṛ̠tavā̎n-thsu̠pratī̍kaḥ ।
mā nō̍ hāsīnmētthi̠tō (hāsīrmētthi̠tō) nēttvā̠ jahā̍ma ।
gō̠pō̠ṣa-nnō̍ vīrapō̠ṣa-ñcha̍ ya̠chChēti̍ ।
brahma̍ṇai̠vaina̠-mpraha̍rati । saiva tata̠ḥ prāya̍śchittiḥ ॥ 16 ॥
(vai pra̠jāpa̍tiḥ – sthāpayati – prajā̠nan – na̠bhiju̍hu̠yāth – syā̎-d- dhriyēta̠ – jahā̍ma̠ triṇi̍ cha) (a. 2)

(yadvisṣa̍ṇṇēna prājāpa̠tyayā̠ ya-tkī̠ṭā ma̍ddhya̠mēna̠ yadava̍vṛṣṭēna̠ ya-tpūrva̍syā̠ṃ ya-tpu̠rā pra̍yā̠jēbhya̠ praṃṅgā̍rō̠ ya-dda̍kṣi̠ṇā ya-tpra̠tyagyadudaṅṅ̍)

anuvākaṃ 3 – mukhyāgnyasambhavē-‘nukalpāḥ hōmādhārāḥ
vi vā ē̠ṣa i̍ndri̠yēṇa̍ vī̠ryē̍ṇardhyatē ।
yasyā-hi̍tāgnē-ra̠gni-rma̠thyamā̍nō̠ na jāya̍tē । yatrā̠nya-mpaśyē̎t । tata̍ ā̠hṛtya̍ hōta̠vya̎m ।
a̠gnā-vē̠vāsyā̎-gnihō̠tragṃ hu̠ta-mbha̍vati ॥
yadya̠nya-nna vi̠ndēt । a̠jāyāgṃ̍ hōta̠vya̎m । ā̠gnē̠yī vā ē̠ṣā । yada̠jā । a̠gnā-vē̠vāsyā̎-gnihō̠tragṃ hu̠ta-mbha̍vati ॥ 17 ॥

a̠jasya̠ tu nāśñī̍yāt । yada̠jasyā̎-śñī̠yāt ।
yāmē̠vāgnā-vāhu̍ti-ñjuhu̠yāt । tāma̍dyāt । tasmā̍da̠jasya̠ nāśya̎m ॥ yadya̠jā-nna vi̠ndēt । brā̠hma̠ṇasya̠ dakṣi̍ṇē̠ hastē̍ hōta̠vya̎m ।
ē̠ṣa vā a̠gni rvai̎śvāna̠raḥ । yadbrā̎hma̠ṇaḥ ।
a̠gnā-vē̠vāsyā̎-gnihō̠tragṃ hu̠ta-mbha̍vati ॥ 18 ॥

brā̠hma̠ṇa-ntu va̍sa̠tyai̍ nāpa̍rundhyāt । yadbrā̎hma̠ṇaṃ va̍sa̠tyā a̍paru̠ndhyāt ।
yasmi̍nnē̠-vāgnāvāhu̍ti-ñjuhu̠yāt । ta-mbhā̍ga̠dhēyē̍na̠ vya̍rdhayēt ।
tasmā̎-dbrāhma̠ṇō va̍sa̠tyai̍ nāpa̠ruddhya̍ḥ ॥ yadi̍ brāhma̠ṇa-nna vi̠ndēt ।
da̠rbha̠sta̠bēṃ hō̍ta̠vya̎m ।
a̠gni̠vān. vai da̍rbhasta̠baṃḥ ।
a̠gnāvē̠-vāsyā̎-gnihō̠tragṃ hu̠ta-mbha̍vati ।
da̠rbhāg​stu nāddhyā̍sīta ॥ 19 ॥

yadda̠rbhāna̠ddhyāsī̍ta । yāmē̠vāgnā-vāhu̍ti-ñjuhu̠yāt । tāmaddhyā̍sīta ।
tasmā̎-dda̠rbhā nāddhyā̍sita̠vyā̎ḥ ॥
yadi̍ da̠rbhānna vi̠ndēt । a̠phsu hō̍ta̠vya̎m ।
āpō̠ vai sarvā̍ dē̠vatā̎ḥ ।
dē̠vatā̎svē̠ vāsyā̎-gnihō̠tragṃ hu̠ta-mbha̍vati ।
āpa̠stu na pari̍chakṣīta । yadāpa̍ḥ pari̠chakṣī̍ta ॥ 20 ॥

yā mē̠vāphsvāhu̍ti-ñjuhu̠yāt । tā-mpari̍chakṣīta ।
tasmā̠dāpō̠ na pa̍ri̠chakṣyā̎ḥ ॥
mēddhyā̍ cha̠ vā ē̠tasyā̍mē̠ddhyā cha̍ ta̠nuvau̠ sagṃsṛ̍jyētē । yasyā-hi̍tāgnē-ra̠nyaira̠gnibhi̍-ra̠gnaya̍-ssagṃsṛ̠jyantē̎ । a̠gnayē̠ vivi̍chayē purō̠ḍāśa̍-ma̠ṣṭāka̍pāla̠-nnirva̍pēt ।
mēddhyā̎-ñchai̠vāsyā̍-mē̠ddhyā-ñcha̍ ta̠nuvau̠ vyāva̍rtayati ॥ a̠gnayē̎ vra̠tapa̍tayē purō̠ḍāśa̍-ma̠ṣṭāka̍pāla̠-nnirva̍pēt । a̠gnimē̠va vra̠tapa̍ti̠gg̠ svēna̍ bhāga̠dhēyē̠-nōpa̍dhāvati ।
sa ē̠vaina̍ṃ vra̠tamā-la̍bhaṃyati ॥ 21 ॥

garbha̠gg̠ srava̍ntamaga̠dama̍kaḥ । a̠gni-rindra̠-stvaṣṭā̠ bṛha̠spati̍ḥ । pṛ̠thi̠vyā-mava̍chuśchō-tai̠tat । nābhi-prāpnō̍ti̠ nir-ṛ̍ti-mparā̠chaiḥ ॥
rētō̠ vā ē̠tadvāji̍na̠-māhi̍tāgnēḥ । yada̍gnihō̠tram । tadyathsravē̎t ।
rētō̎-‘sya̠ vāji̍nagg​ sravēt । garbha̠gg̠ srava̍ntama-ga̠dama̍ka̠-rityā̍ha ।
rēta̍ ē̠vāsmi̠n vāji̍na-ndadhāti ॥ 22 ॥

a̠gnirityā̍ha । a̠gnirvai rē̍tō̠dhāḥ । rēta̍ ē̠va tadda̍dhāti । indra̠ ityā̍ha । i̠ndri̠ya-mē̠vāsmi̍n-dadhāti । tvaṣṭētyā̍ha । tvaṣṭā̠ vai pa̍śū̠nā-mmi̍thu̠nānāgṃ̍ rūpa̠kṛt । rū̠pama̠va pa̠śuṣu̍ dadhāti । bṛha̠spati̠rityā̍ha ।
brahma̠ vai dē̠vānā̠-mbṛha̠spati̍ḥ । brahma̍ṇai̠vāsmai̎ pra̠jāḥ praja̍nayati ॥
pṛ̠thi̠vyā-mava̍chuśchōtai̠ta-dityā̍ha ।
a̠syā-mē̠vaina̠-tprati̍ṣṭhāpayati ॥
nābhi prāpnō̍ti̠ nir-ṛ̍ti-mparā̠chairityā̍ha ।
rakṣa̍sā̠mapa̍hatyai ॥ 23 ॥
(a̠jā-‘gnāvē̠vāsyā̎gnihō̠tragṃ hu̠ta-mbha̍vati – bhava – tyāsīta – pari̠chakṣī̍ta – lambhayati – dadhāti – dē̠vānā̠-mbṛha̠spati̠ḥ pañcha̍ cha) (a. 3)

(vi vai ya-dya̠nyama̠jāyā̎-mbrāhma̠ṇasya̍ darbhasta̠mbē̎-‘phsu hō̍ta̠vya̎m)

anuvākaṃ 4 – aiṣṭikayājamānamantrāḥ
yāḥ pu̠rastā̎-tpra̠srava̍nti । u̠pari̍ṣṭā-thsa̠rvata̍ścha̠ yāḥ । tābhī̍ ra̠śmipa̍vitrābhiḥ । śra̠ddhāṃ ya̠jñamāra̍bhē ॥ dēvā̍ gātuvidaḥ ।
gā̠tuṃ ya̠jñāya̍ vindata । mana̍sa̠spati̍nā dē̠vēna̍ । vātā̎-dya̠jñaḥ prayu̍jyatām ॥ tṛ̠tīya̍syai di̠vaḥ । gā̠ya̠tri̠yā sōma̠ ābhṛ̍taḥ ॥ 24 ॥

sō̠ma̠pī̠thāya̠ sanna̍yitum । vaka̍la̠-manta̍ra̠māda̍dē ॥ āpō̍ dēvī-śśu̠ddhā-sstha̍ । i̠mā pātrā̍ṇi śundhata । u̠pā̠ta̠ṅkyā̍ya dē̠vānā̎m । pa̠rṇa̠va̠lkamu̠ta śu̍ndhata ॥
payō̍ gṛ̠hēṣu̠ payō̍ aghni̠yāsu̍ ।
payō̍ va̠thsēṣu̠ paya̠ indrā̍ya ha̠viṣē̎ dhriyasva । gā̠ya̠trī pa̍rṇava̠lkēna̍ । paya-ssōma̍-ṅkarōtvi̠mam ॥ 25 ॥
a̠gni-ṅgṛ̍hṇāmi su̠ratha̠ṃ yō ma̍yō̠ bhūḥ ।
ya u̠dyanta̍mā̠ rōha̍ti̠ sūrya̠mahnē̎ ।
ā̠di̠tya-ñjyōti̍ṣā̠-ñjyōti̍rutta̠mam ।
śvō ya̠jñāya̍ ramatā-ndē̠vatā̎bhyaḥ ॥
vasū̎-nru̠drānā̍di̠tyān । indrē̍ṇa sa̠ha dē̠vatā̎ḥ । tāḥ pūrva̠ḥ pari̍gṛhṇāmi । sva ā̠yata̍nē manī̠ṣayā̎ ॥ i̠māmūrja̍-mpañchada̠śīṃ yē pravi̍ṣṭāḥ । tāndē̠vā-npari̍gṛhṇāmi̠ pūrva̍ḥ ॥ 26 ॥

a̠gnir-ha̍vya̠vāḍi̠ha tānāva̍hatu । pau̠rṇa̠mā̠sagṃ ha̠viri̠damē̍ṣā̠-mmayi̍ ।
ā̠mā̠vā̠syagṃ̍ ha̠viri̠damē̍ṣā̠-mmayi̍ ॥ a̠nta̠rā-‘gnī pa̠śava̍ḥ । dē̠va̠sa̠gṃ̠ sada̠māga̍mann । tā-npūrva̠ḥ pari̍gṛhṇāmi ।
sva ā̠yata̍nē manī̠ṣayā̎ ॥ i̠ha pra̠jā vi̠śvarū̍pā ramantām । a̠gni-ṅgṛ̠hapa̍tima̠bhi sa̠ṃvasā̍nāḥ । tāḥ pūrva̠ḥ pari̍gṛhṇāmi ॥ 27 ॥

sva ā̠yata̍nē manī̠ṣayā̎ ॥
i̠ha pa̠śavō̍ vi̠śvarū̍pā ramantām ।
a̠gni-ṅgṛ̠hapa̍tima̠bhi sa̠ṃvasā̍nāḥ ।
tā-npūrva̠ḥ pari̍gṛhṇāmi । sva ā̠yata̍nē manī̠ṣayā̎ ॥ a̠ya-mpi̍tṛ̠ṇāma̠gniḥ ।
avā̎ḍḍha̠vyā pi̠tṛbhya̠ ā । ta-mpūrva̠ḥ pari̍gṛhṇāmi । avi̍ṣa-nnaḥ pi̠tu-ṅka̍rat ॥ aja̍sra̠-ntvāgṃ sa̍bhāpā̠lāḥ ॥ 28 ॥
vi̠ja̠yabhā̍ga̠gṃ̠ sami̍ndhatām । agnē̍ dī̠dāya̍ mē sabhya । viji̍tyai śa̠rada̍-śśa̠tam ॥ anna̍māvasa̠thīya̎m । a̠bhiha̍rāṇi śa̠rada̍-śśa̠tam । ā̠va̠sa̠thē śriya̠-mmantra̎m । ahi̍rbu̠ddhniyō̠ niya̍chChatu ॥ i̠dama̠ha-ma̠gni jyē̎ṣṭhēbhyaḥ । vasu̍bhyō ya̠jña-mprabra̍vīmi ।
i̠dama̠ha-mindra̍ jyēṣṭhēbhyaḥ ॥ 29 ॥

ru̠drēbhyō̍ ya̠jña-mprabra̍vīmi । i̠dama̠haṃ varu̍ṇa-jyēṣṭhēbhyaḥ । ā̠di̠tyēbhyō̍ ya̠jña-mprabra̍vīmi ॥ paya̍svatī̠-rōṣa̍dhayaḥ ।
paya̍svadvī̠rudhā̠-mpaya̍ḥ । a̠pā-mpaya̍sō̠ yatpaya̍ḥ । tēna̠ māmi̍ndra̠ sagṃsṛ̍ja ॥
agnē̎ vratapatē vra̠ta-ñcha̍riṣyāmi ।
tachCha̍kēya̠-ntanmē̍ rāddhyatām ।
vāyō̎ vratapata̠ ādi̍tya vratapatē ॥ 30 ॥

vra̠tānā̎ṃ vratapatē vra̠ta-ñcha̍riṣyāmi । tachCha̍kēya̠-ntanmē̍ rāddhyatām ॥
i̠mā-mprāchī̠mudī̍chīm । iṣa̠mūrja̍ma̠bhi sagg​skṛ̍tām । ba̠hu̠pa̠rṇāmaśu̍ṣkāgrām ।
harā̍mi paśu̠pāma̠ham ॥ yatkṛṣṇō̍ rū̠pa-ṅkṛ̠tvā । prāvi̍śa̠stvaṃ vana̠spatīn̍ ।
tata̠stvāmē̍kavigṃśati̠dhā । sambha̍rāmi susa̠mbhṛtā̎ ॥ 31 ॥

trī-npa̍ri̠dhīg​sti̠sra-ssa̠midha̍ḥ । ya̠jñāyu̍ranusañcha̠rān ।
u̠pa̠vē̠ṣa-mmēkṣa̍ṇa̠-ndhṛṣṭi̎m । sambha̍rāmi susa̠bhṛntā̎ ॥ yā jā̠tā ōṣa̍dhayaḥ । dē̠vēbhya̍ striyu̠ga-mpu̠rā । tāsā̠-mparva̍ rāddhyāsam । pa̠ri̠sta̠ra-mā̠harann̍ ॥
a̠pā-mmēddhya̍ṃ ya̠jñiya̎m ।
sadē̍vagṃ śi̠vama̍stu mē ॥ 32 ॥

ā̠chChē̠ttā vō̠ mā ri̍ṣam । jīvā̍ni śa̠rada̍-śśa̠tam ॥ apa̍rimitānā̠-mpari̍mitāḥ । sanna̍hyē sukṛ̠tāya̠kam । ēnō̠ mā nigā̎-ṅkata̠machcha̠ nāham । puna̍ru̠tthāya̍ bahu̠lā bha̍vantu ॥ sa̠kṛ̠dā̠chChi̠nna-mba̠r̠hirūrṇā̍mṛdu ।
syō̠na-mpi̠tṛbhya̍stvā bharāmya̠ham । a̠smi-nthsī̍dantu mē pi̠tara̍-ssō̠myāḥ ।
pi̠tā̠ma̠hāḥ prapi̍tāmahāśchānu̠gai-ssa̠ha ॥ 33 ॥

tri̠vṛ-tpa̍lā̠śē da̠rbhaḥ । iyā̎-nprādē̠śa sa̍mintaḥ । ya̠jñē pa̠vitra̠-mpōtṛ̍tamam । payō̍ ha̠vya-ṅka̍rōtu mē ॥ i̠mau prā̍ṇāpā̠nau ।
ya̠jñasyāṅgā̍ni sarva̠śaḥ । ā̠pyā̠yaya̍ntau̠ sañcha̍ratām । pa̠vitrē̍ havya̠śōdha̍nē ॥
pa̠vitrē̎ sthō vaiṣṇa̠vī । vā̠yurvā̠-mmana̍sā punātu ॥ 34 ॥

a̠ya-mprā̠ṇaśchā̍pā̠naścha̍ । yaja̍māna̠-mapi̍gachChatām । ya̠jñē hyabhū̍tā̠-mpōtā̍rau ।
pa̠vitrē̍ havya̠śōdha̍nē ॥ tvayā̠ vēdi̍ṃ vividuḥ pṛthi̠vīm । tvayā̍ ya̠jñō jā̍yatē viśva̠dāni̍ḥ । achChi̍draṃ ya̠jñamanvē̍ṣi vi̠dvān ।
tvayā̠ hōtā̠ santa̍nōtyardhamā̠sān ॥ tra̠ya̠stri̠gṃ̠śō̍-‘si̠ tantū̍nām ।
pa̠vitrē̍ṇa sa̠hāga̍hi ॥ 35 ॥

śi̠vēyagṃ rajju̍rabhi̠dhānī̎ । a̠ghni̠yā-mupa̍sēvatām ॥ apra̍sragṃsāya ya̠jñasya̍ ।
u̠khē upa̍dadhāmya̠ham । pa̠śubhi̠-ssannī̍ta-mbibhṛtām । indrā̍ya śṛ̠ta-ndadhi̍ ॥
u̠pa̠vē̠ṣō̍-‘si ya̠jñāya̍ । tvā-mpa̍rivē̠ṣa-ma̍dhārayann । indrā̍ya ha̠viḥ kṛ̠ṇvanta̍ḥ ।
śi̠va-śśa̠gmō bha̍vāsi naḥ ॥ 36 ॥

amṛ̍nmaya-ndēvapā̠tram । ya̠jñasyāyu̍ṣi̠ prayu̍jyatām । ti̠ra̠ḥ pa̠vi̠tramati̍nītāḥ ।
āpō̍ dhāraya̠ mā-‘ti̍guḥ ॥ dē̠vēna̍ savi̠trōtpū̍tāḥ । vasō̠-ssūrya̍sya ra̠śmibhi̍ḥ । gā-ndō̍hapavi̠trē rajju̎m । sarvā̠ pātrā̍ṇi śundhata ॥ ē̠tā ācha̍ranti̠ madhu̍ma̠dduhā̍nāḥ ।
pra̠jāva̍tī-rya̠śasō̍ vi̠śvarū̍pāḥ ॥ 37 ॥

ba̠hvī rbhava̍ntī̠rupa̠ jāya̍mānāḥ । i̠ha va̠ indrō̍ ramayatu gāvaḥ ॥ pū̠ṣā stha̍ ॥ a̠ya̠kṣmā va̍ḥ pra̠jayā̠ sagṃsṛ̍jāmi ।
rā̠yaspōṣē̍ṇa bahu̠lā bhava̍ntīḥ । ūrja̠-mpaya̠ḥ pinva̍mānā ghṛ̠ta-ñcha̍ ।
jī̠vō jīva̍ntī̠rupa̍ va-ssadēyam ॥ dyauśchē̠maṃ ya̠jña-mpṛ̍thi̠vī cha̠ sandu̍hātām ।
dhā̠tā sōmē̍na sa̠ha vātē̍na vā̠yuḥ । yaja̍mānāya̠ dravi̍ṇa-ndadhātu ॥ 38 ॥

uthsa̍-nduhanti ka̠laśa̠-ñchatu̍rbilam । iḍā̎-ndē̠vī-mmadhu̍matīgṃ suva̠rvida̎m ।
tadi̍ndrā̠gnī ji̍nvatagṃ sū̠nṛtā̍vat । ta-dyaja̍māna-mamṛta̠tvē da̍dhātu ॥
kāma̍dhukṣa̠ḥ praṇō̎ brūhi । indrā̍ya ha̠viri̍ndri̠yam ॥ a̠mūṃ yasyā̎-ndē̠vānā̎m ।
ma̠nu̠ṣyā̍ṇā̠-mpayō̍ hi̠tam ॥ ba̠hu du̠gdhīndrā̍ya dē̠vēbhya̍ḥ ।
ha̠vya-māpyā̍yatā̠-mpuna̍ḥ ॥ 39 ॥

va̠thsēbhyō̍ manu̠ṣyē̎bhyaḥ । pu̠na̠rdō̠hāya̍ kalpatām ॥ ya̠jñasya̠ santa̍tirasi ।
ya̠jñasya̍ tvā̠ santa̍ti̠manu̠santa̍nōmi ॥ ada̍stamasi̠ viṣṇa̍vē tvā ।
ya̠jñāyāpi̍ dadhāmya̠ham । a̠dbhirari̍ktēna̠ pātrē̍ṇa । yāḥ pū̠tāḥ pa̍ri̠śēra̍tē ॥
a̠ya-mpaya̠-ssōma̍-ṅkṛ̠tvā । svāṃ yōni̠-mapi̍gachChatu ॥ 40 ॥

pa̠rṇa̠va̠lkaḥ pa̠vitra̎m । sau̠mya-ssōmā̠ddhi nirmi̍taḥ ॥ i̠mau pa̠rṇa-ñcha̍ da̠rbha-ñcha̍ ।
dē̠vānāgṃ̍ havya̠śōdha̍nau । prā̠ta̠rvē̠ṣāya̍ gōpāya । viṣṇō̍ ha̠vyagṃ hi rakṣa̍si ॥
u̠bhāva̠gnī u̍pastṛṇa̠tē । dē̠vatā̠ upa̍vasantu mē । a̠ha-ṅgrā̠myā-nupa̍vasāmi ।
mahya̠-ṅgōpa̍tayē pa̠śūn ॥ 41 ॥
[ābhṛ̍ta – i̠maṃ – gṛ̍hṇāmi̠ pūrva̠ – stāḥ purva̠ḥ pari̍gṛhṇāmi – sabhāpā̠lā – indra̍jyēṣṭhēbhya̠-ādi̍tya vratapatē-susa̠bhruntā̍ – mē – sa̠ha – pu̍nātu – gahi – nō – vi̠śvarū̍pā – dadhātu̠ – puna̍–r gachChatu – pa̠śun ] (a. 4)

yāḥ pu̠rastā̍di̠māmūrja̍mi̠ha pra̠jā i̠ha pa̠śavō̠-‘ya-mpi̍tṛ̠ṇāma̠gniḥ

anuvākaṃ 5 – aiṣṭikayājamānamantrāḥ
dēvā̍ dē̠vēṣu̠ parā̎kramaddhvam । pratha̍mā dvi̠tīyē̍ṣu । dvitī̍yā-stṛ̠tīyē̍ṣu ।
trirē̍kādaśā i̠ha mā̍-‘vata । i̠dagṃ śa̍kēya̠ṃ yadi̠da-ṅka̠rōmi̍ ।
ā̠tmā ka̍rōtvā̠tmanē̎ । i̠da-ṅka̍riṣyē bhēṣa̠jam । i̠da-mmē̍ viśvabhēṣajā ।
aśvi̍nā̠ prāva̍taṃ yu̠vam ॥ i̠dama̠hagṃ sēnā̍yā a̠bhītva̍ryai ॥ 42 ॥

mukha̠mapō̍hāmi ॥ sūrya̍jyōti̠ rvibhā̍hi । ma̠ha̠ta i̍ndri̠yāya̍ ॥ āpyā̍yatā-ṅghṛ̠tayō̍niḥ । a̠gnir-ha̠vyā-‘nu̍manyatām ।
khama̍ṅkṣva̠ tvacha̍maṅkṣva । su̠rū̠pa-ntvā̍ vasu̠vida̎m । pa̠śū̠nā-ntēja̍sā ।
a̠gnayē̠ juṣṭa̍-ma̠bhighā̍rayāmi ॥ syō̠na-ntē̠ sada̍na-ṅkarōmi ॥ 43 ॥

ghṛ̠tasya̠ dhāra̍yā su̠śēva̍-ṅkalpayāmi ॥
tasmi̎n-thsīdā̠mṛtē̠ prati̍tiṣṭha ।
vrī̠hī̠ṇā-mmē̍dha sumana̠syamā̍naḥ ॥
ā̠rdraḥ pra̍thasnu̠-rbhuva̍nasya gō̠pāḥ ।
śṛ̠ta uthsnā̍ti jani̠tā ma̍tī̠nām ॥
yasta̍ ā̠tmā pa̠śuṣu̠ pravi̍ṣṭaḥ ।
dē̠vānā̎ṃ vi̠ṣṭhāmanu̠ yō vi̍ta̠sthē ।
ā̠tma̠nvā-nthsō̍ma ghṛ̠tavā̠n̠. hi bhū̠tvā ।
dē̠vā-nga̍chCha̠ suva̍rvinda̠ yaja̍mānāya̠ mahya̎m ॥ irā̠ bhūti̍ḥ pṛthi̠vyai rasō̠ mōtkra̍mīt ॥ 44 ॥

dēvā̎ḥ pitara̠ḥ pita̍rō dēvāḥ । yō̍-‘hama̍smi̠ sa san. ya̍jē । yasyā̎smi̠ na tama̠ntarē̍mi । sva-mma̍ i̠ṣṭagg​ sva-nda̠ttam । sva-mpū̠rtagg​ svagg​ śrā̠ntam । svagṃ hu̠tam । tasya̍ mē̠-‘gni-ru̍padra̠ṣṭā । vā̠yuru̍paśrō̠tā ।
ā̠di̠tyō̍-‘nukhyā̠tā । dyauḥ pi̠tā ॥ 45 ॥

pṛ̠thi̠vī mā̠tā । pra̠jāpa̍ti̠ rbandhu̍ḥ ।
ya ē̠vāsmi̠ sa san. ya̍jē ॥ mā bhērmā saṃvi̍kthā̠ mā tvā̍ higṃsiṣam । mā tē̠ tējō-‘pa̍kramīt ।
bha̠ra̠tamuddha̍rē̠ manu̍ṣiñcha । a̠va̠dānā̍ni tē pra̠tyava̍dāsyāmi ।
nama̍stē astu̠ mā mā̍ higṃsīḥ ॥ yada̍va̠dānā̍ni tē-‘va̠dyann । vilō̠mākā̍r​ṣamā̠tmana̍ḥ ॥ 46 ॥

ājyē̍na̠ pratya̍najmyēnat । tatta̠ āpyā̍yatā̠-mpuna̍ḥ ॥ ajyā̍yō yavamā̠trāt ।
ā̠vyā̠dhā-tkṛ̍tyatāmi̠dam । mā rū̍rupāma ya̠jñasya̍ । śu̠ddhagg​ svi̍ṣṭami̠dagṃ ha̠viḥ ॥ manu̍nā dṛ̠ṣṭā-ṅghṛ̠tapa̍dīm । mi̠trāvaru̍ṇasamīritām । da̠kṣi̠ṇā̠rdhādasa̍bhinndann । ava̍dyā-myēka̠tō mu̍khām ॥ 47 ॥

iḍē̍ bhā̠ga-ñju̍ṣasva naḥ । jinva̠ gā jinvārva̍taḥ । tasyā̎stē bhakṣi̠vāṇa̍-ssyāma । sa̠rvātmā̍na-ssa̠rvaga̍ṇāḥ ॥ braddhna̠ pinva̍sva ।
dada̍tō mē̠ mā kṣā̍yi । ku̠rva̠tō mē̠ mōpa̍dasat । di̠śā-ṅklṛpti̍rasi । diśō̍ mē kalpantām । kalpa̍ntā-mmē̠ diśa̍ḥ ॥ 48 ॥

daivī̎ścha̠ mānu̍ṣīścha । a̠hō̠rā̠trē mē̍ kalpētām । a̠rdha̠mā̠sā mē̍ kalpantām । māsā̍ mē kalpantām । ṛ̠tavō̍ mē kalpantām । sa̠ṃva̠thsa̠rō mē̍ kalpatām ।
klṛpti̍rasi̠ kalpa̍tā-mmē ॥
āśā̍nā-ntvā-”śāpā̠lēbhya̍ḥ ।
cha̠turbhyō̍ a̠mṛtē̎bhyaḥ ।
i̠da-mbhū̠tasyā-ddhya̍kṣēbhyaḥ ॥ 49 ॥

vi̠dhēma̍ ha̠viṣā̍ va̠yam । bhaja̍tā-mbhā̠gī bhā̠gam । mā-‘bhā̠gō-‘bha̍kta ।
nira̍bhā̠ga-mbha̍jāmaḥ । a̠paspi̍nva । ōṣa̍dhīrjinva । dvi̠pātpā̍hi । chatu̍ṣpādava । di̠vō vṛṣṭi̠mēra̍ya । brā̠hma̠ṇānā̍-mi̠dagṃ ha̠viḥ ॥ 50 ॥

sō̠myānāgṃ̍ sōmapī̠thinā̎m । nirbha̠ktō brā̎hmaṇaḥ । nēhā-brā̎hmaṇasyāsti ॥
sama̍ṅktā-mba̠ra̠.hir-ha̠viṣā̍ ghṛ̠tēna̍ । samā̍di̠tyai rvasu̍bhi̠-ssa-mma̠rudbhi̍ḥ ।
samindrē̍ṇa̠ viśvē̍bhi rdē̠vēbhi̍raṅktām ।
di̠vya-nnabhō̍ gachChatu̠ ya-thsvāhā̎ ॥
i̠ndrā̠ṇī vā̍ vidha̠vā bhū̍yāsam । adi̍tiriva supu̠trā ।
a̠sthū̠ri tvā̍ gār​hapatya ॥ 51 ॥

upa̠niṣa̍dē suprajā̠stvāya̍ ॥
sa-mpatnī̠ patyā̍ sukṛ̠tēna̍ gachChatām ।
ya̠jñasya̍ yu̠ktau dhuryā̍vabhūtām ।
sa̠jā̠nnā̠nau vija̍hatā̠-marā̍tīḥ ।
di̠vi jyōti̍ra̠ja-ra̠māra̍bhētām ॥
daśa̍ tē ta̠nuvō̍ yajña ya̠jñiyā̎ḥ ।
tāḥ prī̍ṇātu̠ yaja̍mānō ghṛ̠tēna̍ । nā̠ri̠ṣṭhayō̎ḥ pra̠śiṣa̠mīḍa̍mānaḥ ।
dē̠vānā̠-ndaivyē-‘pi̠ yaja̍mānō̠-‘mṛtō̍-‘bhūt ॥
yaṃ vā̎-ndē̠vā a̍kalpayann ॥ 52 ॥

ū̠rjō bhā̠gagṃ śa̍takratū । ē̠tadvā̠-ntēna̍ prīṇāni । tēna̍ tṛpyatamagṃhahau ॥ a̠ha-ndē̠vānāgṃ̍ su̠kṛtā̍masmi lō̠kē ।
mamē̠dami̠ṣṭa-nna mithu̍ rbhavāti । a̠ha-nnā̍ri̠ṣṭhā-vanu̍yajāmi vi̠dvān ।
yadā̎bhyā̠-mindrō̠ ada̍dhā-dbhāga̠dhēya̎m ॥ adā̍rasṛdbhavata dēva sōma ।
a̠smin. ya̠jñē ma̍rutō mṛḍatā naḥ ।
mā nō̍ vidada̠bhi bhā̠mō aśa̍stiḥ ॥ 53 ॥

mā nō̍ vida-dva̠janā̠ dvēṣyā̠ yā ॥
ṛ̠ṣa̠bhaṃ vā̠jina̍ṃ va̠yam ।
pū̠rṇamā̍saṃ yajāmahē । sa nō̍ dōhatāgṃ su̠vīrya̎m । rā̠yaspōṣagṃ̍ saha̠sriṇa̎m । prā̠ṇāya̍ su̠rādha̍sē । pū̠rṇamā̍sāya̠ svāhā̎ ॥
a̠mā̠vā̠syā̍ su̠bhagā̍ su̠śēvā̎ । dhē̠nuri̍va̠ bhūya̍ ā̠pyāya̍mānā । sā nō̍ dōhatāgṃ su̠vīrya̎m । rā̠yaspōṣagṃ̍ saha̠sriṇa̎m ।
a̠pā̠nāya̍ su̠rādha̍sē । a̠mā̠vā̠syā̍yai̠ svāhā̎ ॥ a̠bhistṛ̍ṇīhi̠ pari̍dhēhi̠ vēdi̎m ।
jā̠mi-mmā higṃ̍sīramu̠yā śayā̍nā ।
hō̠tṛ̠ṣada̍nā̠ hari̍tā-ssu̠varṇā̎ḥ । ni̠ṣkā i̠mē yaja̍mānasya bra̠ddhnē ॥ 54 ॥
(a̠bhītva̍ryai – karōmi – kramīt – pi̠tā – ”tmana̍ – ēka̠tōmu̍khāṃ – mē̠ diśō – ‘dhya̍kṣēbhyō – ha̠vi–r gā̍r​hapatyā – kalpaya̠ – nnaśa̍sti̠ḥ – sā nō̍ dōhatāgṃ su̠vīryagṃ̍ sa̠pta cha̍) (a. 5)

anuvākaṃ 6 – aiṣṭikayājamānamantrāḥ
pari̍stṛṇīta̠ pari̍dhattā̠gnim । pari̍hitō̠-‘gni ryaja̍māna-mbhunaktu । a̠pāgṃ rasa̠ ōṣa̍dhīnāgṃ su̠varṇa̍ḥ । ni̠ṣkā i̠mē yaja̍mānasya santu kāma̠dughā̎ḥ । a̠mutrā̠muṣmi̍n ँlō̠kē ॥
bhūpa̍tē̠ bhuva̍napatē । ma̠ha̠tō bhū̠tasya̍ patē । bra̠hmāṇa̍-ntvā vṛṇīmahē ॥
a̠ha-mbhūpa̍tira̠ha-mbhuva̍napatiḥ ।
a̠ha-mma̍ha̠tō bhū̠tasya̠ pati̍ḥ ॥ 55 ॥

dē̠vēna̍ savi̠trā prasū̍ta̠ ārtvi̍jya-ṅkariṣyāmi । dēva̍ savitarē̠ta-ntvā̍ vṛṇatē ।
bṛha̠spati̠-ndaivya̍-mbra̠hmāṇa̎m । tada̠ha-mmana̍sē̠ prabra̍vīmi । manō̍ gāyatri̠yai ।
gā̠ya̠trī tri̠ṣṭubhē̎ । tri̠ṣṭu-bjaga̍tyai । jaga̍tyanu̠ṣṭubhē̎ । a̠nu̠ṣṭu-kpa̠ṅktyai । pa̠ṅktiḥ pra̠jāpa̍tayē ॥ 56 ॥

pra̠jāpa̍ti̠ rviśvē̎bhyō dē̠vēbhya̍ḥ । viśvē̍ dē̠vā bṛha̠spata̍yē । bṛha̠spati̠-rbrahma̍ṇē ।
brahma̠ bhūrbhuva̠-ssuva̍ḥ । bṛha̠spati̍ rdē̠vānā̎-mbra̠hmā । a̠ha-mma̍nu̠ṣyā̍ṇām । bṛha̍spatē ya̠jña-ṅgō̍pāya ॥ i̠da-ntasmai̍ ha̠rmya-ṅka̍rōmi । yō vō̍ dēvā̠śchara̍ti brahma̠charya̎m । mē̠dhā̠vī di̠kṣu mana̍sā tapa̠svī ॥ 57 ॥

a̠ntardū̠taścha̍rati̠ mānu̍ṣīṣu ॥
chatu̍-śśikhaṇḍā yuva̠ti-ssu̠pēśā̎ḥ ।
ghṛ̠tapra̍tīkā̠ bhuva̍nasya̠ maddhyē̎ । ma̠rmṛ̠jyamā̍nā maha̠tē saubha̍gāya ।
mahya̍-ndhukṣva̠ yaja̍mānāya̠ kāmān̍ ॥
bhūmi̍ rbhū̠tvā ma̍hi̠māna̍-mpupōṣa ।
tatō̍ dē̠vī va̍rdhayatē̠ payāgṃ̍si ।
ya̠jñiyā̍ ya̠jñaṃ vicha̠yanti̠ śañcha̍ ।
ōṣa̍dhī̠rāpa̍ i̠ha śakva̍rīścha ॥
yō mā̍ hṛ̠dā mana̍sā̠ yaścha̍ vā̠chā ॥ 58 ॥

yō brahma̍ṇā̠ karma̍ṇā̠ dvēṣṭi̍ dēvāḥ ।
ya-śśru̠tēna̠ hṛda̍yēnēṣṇa̠tā cha̍ ।
tasyē̎mdra̠ vajrē̍ṇa̠ śira̍śChinadmi ॥
ūrṇā̍mṛdu̠ pratha̍mānagg​ syō̠nam ।
dē̠vēbhyō̠ juṣṭa̠gṃ̠ sada̍nāya ba̠r̠hiḥ । su̠va̠rgē lō̠kē yaja̍māna̠gṃ̠ hi dhē̠hi ।
mā-nnāka̍sya pṛ̠ṣṭhē pa̍ra̠mē vyō̍mann ॥ chatu̍-śśikhaṇḍā yuva̠ti-ssu̠pēśā̎ḥ ।
ghṛ̠tapra̍tīkā va̠yunā̍ni vastē ।
sā stī̠ryamā̍ṇā maha̠tē saubha̍gāya ॥ 59 ॥

sā mē̍ dhukṣva̠ yaja̍mānāya̠ kāmān̍ ।
śi̠vā cha̍ mē śa̠gmā chai̍dhi ।
syō̠nā cha̍ mē su̠ṣadā̍ chaidhi ।
ūrja̍svatī cha mē̠ paya̍svatī chaidhi ।
iṣa̠mūrja̍-mmē pinvasva । brahma̠ tējō̍ mē pinvasva । kṣa̠tramōjō̍ mē pinvasva ।
viśa̠-mpuṣṭi̍-mmē pinvasva ।
āyu̍ra̠nnādya̍-mmē pinvasva ।
pra̠jā-mpa̠śū-nmē̍ pinvasva ॥ 60 ॥

a̠smin. ya̠jña upa̠ bhūya̠ innu mē̎ ।
avi̍kṣōbhāya pari̠dhīnda̍dhāmi ।
dha̠rtā dha̠ruṇō̠ dharī̍yān ।
a̠gni rdvēṣāgṃ̍si̠ niri̠tō nu̍dātai ॥
vichChi̍nadmi̠ vidhṛ̍tībhyāgṃ sa̠patnān̍ ।
jā̠tā-nbhrātṛ̍vyā̠n̠. yē cha̍ jani̠ṣyamā̍ṇāḥ ।
vi̠śō ya̠ntrābhyā̠ṃ vidha̍māmyēnān । a̠hagg​svānā̍-mutta̠mō̍-‘sāni dēvāḥ ।
vi̠śō ya̠ntrē nu̠damā̍nē̠ arā̍tim । viśva̍-mpā̠pmāna̠mama̍ti-ndurmarā̠yum ॥ 61 ॥

sīda̍ntī dē̠vī su̍kṛ̠tasya̍ lō̠kē ।
dhṛtī̎ sthō̠ vidhṛ̍tī̠ svadhṛ̍tī ।
prā̠ṇānmayi̍ dhārayatam । pra̠jā-mmayi̍ dhārayatam । pa̠śūnmayi̍ dhārayatam ॥
a̠ya-mpra̍sta̠ra u̠bhaya̍sya dha̠rtā ।
dha̠rtā pra̍yā̠jānā̍-mu̠tānū̍yā̠jānā̎m ।
sa dā̍dhāra sa̠midhō̍ vi̠śvarū̍pāḥ ।
tasmi̠n-thsruchō̠ addhyāsā̍dayāmi ॥
ārō̍ha pa̠thō ju̍hu dēva̠yānān̍ ॥ 62 ॥

yatrar​ṣa̍yaḥ prathama̠jā yē pu̍rā̠ṇāḥ । hira̍ṇyapakṣā-‘ji̠rā sambhṛ̍tāṅgā ।
vahā̍si mā su̠kṛtā̠ṃ yatra̍ lō̠kāḥ ॥
avā̠ha-mbā̍dha upa̠bhṛtā̍ sa̠patnān̍ ।
jā̠tā-nbhrātṛ̍vyā̠n̠. yē cha̍ jani̠ṣyamā̍ṇāḥ । dōhai̍ ya̠jñagṃ su̠dughā̍miva dhē̠num ।
a̠hamutta̍rō bhūyāsam । adha̍rē̠ mathsa̠patnā̎ḥ ॥
yō mā̍ vā̠chā mana̍sā durmarā̠yuḥ ।
hṛ̠dā-‘rā̍tī̠yā-da̍bhi̠dāsa̍-dagnē ॥ 63 ॥

i̠dama̍sya chi̠ttamadha̍ra-ndhru̠vāyā̎ḥ । a̠hamutta̍rō bhūyāsam । adha̍rē̠ mathsa̠patnā̎ḥ ॥
ṛ̠ṣa̠bhō̍-‘si śākva̠raḥ । ghṛ̠tāchī̍nāgṃ sū̠nuḥ । pri̠yēṇa̠ nāmnā̎ pri̠yē sada̍si sīda ॥
syō̠nō mē̍ sīda su̠ṣada̍ḥ pṛthi̠vyām ।
pratha̍yi pra̠jayā̍ pa̠śubhi̍-ssuva̠rgē lō̠kē ।
di̠vi sī̍da pṛthi̠vyā-ma̠ntari̍kṣē ।
a̠hamutta̍rō bhūyāsam ॥ 64 ॥

adha̍rē̠ mathsa̠patnā̎ḥ ॥
i̠yagg​ sthā̠lī ghṛ̠tasya̍ pū̠rṇā ।
achChi̍nnapayā-śśa̠tadhā̍ra̠ uthsa̍ḥ ।
mā̠ru̠tēna̠ śarma̍ṇā̠ daivyē̍na ॥
ya̠jñō̍-‘si sa̠rvata̍-śśri̠taḥ । sa̠rvatō̠ mā-mbhū̠ta-mbha̍vi̠ṣya-chChra̍yatām । śa̠ta-mmē̍ santvā̠śiṣa̍ḥ । sa̠hasra̍-mmē santu sū̠nṛtā̎ḥ । irā̍vatīḥ paśu̠matī̎ḥ । pra̠jāpa̍tirasi sa̠rvata̍-śśri̠taḥ ॥ 65 ॥
sa̠rvatō̠ mā-mbhū̠ta-mbha̍vi̠ṣya-chChra̍yatām । śa̠ta-mmē̍ santvā̠śiṣa̍ḥ ।
sa̠hasra̍-mmē santu sū̠nṛtā̎ḥ । irā̍vatīḥ paśu̠matī̎ḥ ॥ i̠dami̍ndri̠ya-ma̠mṛta̍ṃ vī̠rya̎m । a̠nēnēndrā̍ya pa̠śavō̍-‘chikithsann ।
tēna̍ dēvā ava̠tōpa̠ mām । i̠hēṣa̠mūrja̠ṃ yaśa̠-ssaha̠ ōja̍-ssanēyam । śṛ̠ta-mmayi̍ śrayatām ॥ ya-tpṛ̍thi̠vī-macha̍ra̠ttat-pravi̍ṣṭam ॥ 66 ॥

yēnāsi̍ñcha̠-dbala̠mindrē̎ pra̠jāpa̍tiḥ ।
i̠da-ntachChu̠kra-mmadhu̍ vā̠jinī̍vat ।
yēnō̠-pari̍ṣṭā̠dadhi̍nō-nmahē̠ndram ।
dadhi̠ mā-ndhi̍nōtu ॥
a̠yaṃ vē̠daḥ pṛ̍thi̠vī-manva̍vindat ।
guhā̍ sa̠tī-ṅgaha̍nē̠ gahva̍rēṣu ।
sa vi̍ndatu̠ yaja̍mānāya lō̠kam ।
achChi̍draṃ ya̠jña-mbhūri̍karmā karōtu ॥
a̠yaṃ ya̠jña-ssama̍sadaddha̠viṣmān̍ ।
ṛ̠chā sāmnā̠ yaju̍ṣā dē̠vatā̍bhiḥ ॥ 67 ॥

tēna̍ lō̠kān-thsūrya̍vatō jayēma ।
indra̍sya sa̠khya-ma̍mṛta̠tva-ma̍śyām ॥
yō na̠ḥ kanī̍ya i̠ha kā̠mayā̍tai ।
a̠smin. ya̠jñē yaja̍mānāya̠ mahya̎m ।
apa̠ tami̍ndrā̠gnī bhuva̍nānnudētām ।
a̠ha-mpra̠jāṃ vī̠rava̍tīṃ vidēya ॥
agnē̍ vājajit । vāja̍-ntvā sari̠ṣyanta̎m ।
vāja̍-ñjē̠ṣyanta̎m । vā̠jina̍ṃ vāja̠jita̎m ॥ 68 ॥

vā̠ja̠ji̠tyāyai̠ sammā̎rjmi । a̠gnima̍nnā̠-dama̠nnādyā̍ya ॥ upa̍hūtō̠ dyauḥ pi̠tā ।
upa̠ mā-ndyauḥ pi̠tā hva̍yatām । a̠gni-rāgnī̎ddhrāt । āyu̍ṣē̠ varcha̍sē । jī̠vātvai puṇyā̍ya । upa̍hūtā pṛthi̠vī mā̠tā । upa̠ mā-mmā̠tā pṛ̍thi̠vī hva̍yatām । a̠gni-rāgnī̎ddhrāt ॥ 69 ॥

āyu̍ṣē̠ varcha̍sē । jī̠vātvai puṇyā̍ya ॥
manō̠ jyōti̍ rjuṣatā̠mājya̎m ।
vichChi̍nnaṃ ya̠jñagṃ sami̠ma-nda̍dhātu । bṛha̠spati̍-stanutāmi̠ma-nna̍ḥ ।
viśvē̍ dē̠vā i̠ha mā̍dayantām ॥
ya-ntē̍ agna āvṛ̠śchāmi̍ । a̠haṃ vā̎ kṣipi̠taścharann̍ । pra̠jā-ñcha̠ tasya̠ mūla̍-ñcha ।
nī̠chairdē̍vā̠ nivṛ̍śchata ॥ 70 ॥

agnē̠ yō nō̍-‘bhi̠dāsa̍ti । sa̠mā̠nō yaścha̠ niṣṭya̍ḥ । i̠ddhmasyē̍va pra̠kṣāya̍taḥ ।
mā tasyōchChē̍ṣi̠ kiñcha̠na । yō mā-ndvēṣṭi̍ jātavēdaḥ । ya-ñchā̠ha-ndvēṣmi̠ yaścha̠ mām । sarvā̠g̠stāna̍gnē̠ sanda̍ha ।
yāg​śchā̠ha-ndvēṣmi̠ yē cha̠ mām ॥ agnē̍ vājajit ।
vāja̍-ntvā sasṛ̠vāgṃsa̎m ॥ 71 ॥

vāja̍-ñjigi̠vāgṃsa̎m । vā̠jina̍ṃ vāja̠jita̎m । vā̠ja̠ji̠tyāyai̠ sammā̎rjmi । a̠gni-ma̍nnā̠da-ma̠nnādyā̍ya ॥ vēdi̍ rba̠ra̠.hi-śśṛ̠tagṃ ha̠viḥ ।
i̠ddhmaḥ pa̍ri̠dhaya̠-ssrucha̍ḥ । ājya̍ṃ ya̠jña ṛchō̠ yaju̍ḥ । yā̠jyā̎ścha vaṣaṭkā̠rāḥ । sa-mmē̠ sanna̍tayō namantām ।
i̠ddhma̠sa̠ṃ-naha̍nē hu̠tē ॥ 72 ॥

di̠vaḥ khīlō-‘va̍tataḥ । pṛ̠thi̠vyā addhyutthi̍taḥ । tēnā̍ sa̠hasra̍kāṇḍēna । dvi̠ṣantagṃ̍ śōchayāmasi । dvi̠ṣanmē̍ ba̠hu śō̍chatu ।
ōṣa̍dhē̠ mō a̠hagṃ śu̍cham ॥ yajña̠ nama̍stē yajña । namō̠ nama̍ścha tē yajña । śi̠vēna̍ mē̠ santi̍ṣṭhasva । syō̠nēna̍ mē̠ santi̍ṣṭhasva ॥ 73 ॥

su̠bhū̠tēna̍ mē̠ santi̍ṣṭhasva । bra̠hma̠va̠rcha̠sēna̍ mē̠ santi̍ṣṭhasva ।
ya̠jñasyardhi̠manu̠ santi̍ṣṭhasva । upa̍ tē yajña̠ nama̍ḥ । upa̍ tē̠ nama̍ḥ ।
upa̍ tē̠ nama̍ḥ ॥ triṣpha̠lī kri̠yamā̍ṇānām । yō nya̠ṅgō a̍va̠śiṣya̍tē ।
rakṣa̍sā-mbhāga̠dhēya̎m । āpa̠sta-tprava̍hatādi̠taḥ ॥ 74 ॥

u̠lūkha̍lē̠ musa̍lē̠ yachcha̠ śūrpē̎ ।
ā̠śi̠ślēṣa̍ dṛ̠ṣadi̠ yatka̠pālē̎ ।
a̠va̠pruṣō̍ vi̠pruṣa̠-ssaṃya̍jāmi ।
viśvē̍ dē̠vā ha̠viri̠da-ñju̍ṣantām ।
ya̠jñē yā vi̠pruṣa̠-ssanti̍ ba̠hvīḥ ।
a̠gnau tā-ssarvā̠-ssvi̍ṣṭā̠-ssuhu̍tā juhōmi ॥ u̠dyanna̠dya mi̍tramahaḥ ।
sa̠patnā̎nmē anīnaśaḥ । divai̍nān. vi̠dyutā̍ jahi ।
ni̠mrōcha̠nnadha̍rān kṛdhi ॥ 75 ॥

u̠dyanna̠dya vi nō̍ bhaja । pi̠tā pu̠trēbhyō̠ yathā̎ । dī̠rghā̠yu̠tvasya̍ hēśiṣē । tasya̍ nō dēhi sūrya ॥ u̠dyanna̠dya mi̍tramahaḥ । ā̠rōha̠nnutta̍rā̠-ndiva̎m । hṛ̠drō̠ga-mmama̍ sūrya । ha̠ri̠māṇa̍-ñcha nāśaya ॥ śukē̍ṣu mē hari̠māṇa̎m ।
rō̠pa̠ṇākā̍su daddhmasi ॥ 76 ॥

athō̍ hāridra̠vēṣu̍ mē । ha̠ri̠māṇa̠-nnida̍ddhmasi ॥ uda̍gāda̠ya-mā̍di̠tyaḥ ।
viśvē̍na̠ saha̍sā sa̠ha । dvi̠ṣanta̠-mmama̍ ra̠ndhayann̍ । mō a̠ha-ndvi̍ṣa̠tō ra̍dham ॥
yō na̠-śśapā̠daśa̍pataḥ । yaścha̍ na̠-śśapa̍ta̠-śśapā̎t । u̠ṣāścha̠ tasmai̍ ni̠mrukcha̍ । sarva̍-mpā̠pagṃ samū̍hatām ॥ 77 ॥

yō na̍-ssa̠patnō̠ yō raṇa̍ḥ । martō̍-‘bhi̠dāsa̍ti dēvāḥ। i̠ddhmasyē̍va pra̠kṣāya̍taḥ ।
mā tasyōchChē̍ṣi̠ kiñcha̠na ॥ ava̍sṛṣṭa̠ḥ parā̍pata । śa̠rō brahma̍sagṃśitaḥ ।
gachChā̠-‘mitrā̠-npravi̍śa । maiṣā̠-ṅkañcha̠nōchChi̍ṣaḥ ॥ 78 ॥
(pati̍ḥ – pra̠jāpa̍tayē – tapa̠svī – vā̠chā – saubha̍gāya – pa̠śūnmē̍ pinvasva – durmarā̠yuṃ – dē̍va̠yānā̍ – nagnē̠ – ‘ntari̍kṣē̠-‘hamutta̍rō bhūyāsaṃ -pra̠jāpa̍tirasi sa̠rvata̍-śśri̠taḥ – pravi̍ṣṭaṃ – dē̠vatā̍bhi–r vāja̠jita̍ṃ –
pṛthi̠vī hva̍yatāma̠gnirāgnī̎ddhrā-d- vṛśchata – sasṛ̠vāgṃsagṃ̍ – hu̠tē – syō̠nēna̍ mē̠ samti̍ṣṭhasvē̠ – taḥ – kṛ̍dhi- dadhma – syūhatā – +ma̠ṣṭau cha̍) (a. 6)

anuvākaṃ 7 – sōmāṅga.bhūtēṣu mantrēṣu-dīkṣāmārabhyāgnīṣōmayi paśuparyantē prayōgē śēṣabhūtā mantrāḥ
sakṣē̠da-mpa̍śya । vidha̍rtari̠da-mpa̍śya । nākē̠da-mpa̍śya । ra̠mati̠ḥ pani̍ṣṭhā ।
ṛ̠taṃ var​ṣi̍ṣṭham । a̠mṛtā̠ yānyā̠huḥ । sūryō̠ vari̍ṣṭhō a̠kṣabhi̠rvibhā̍ti ।
ana̠ dyāvā̍pṛthi̠vī dē̠vapu̍trē ॥ dī̠kṣā-‘si̠ tapa̍sō̠ yōni̍ḥ । tapō̍-‘si̠ brahma̍ṇō̠ yōni̍ḥ ॥ 79 ॥

brahmā̍si kṣa̠trasya̠ yōni̍ḥ । kṣa̠trama̍syṛ̠tasya̠ yōni̍ḥ ।
ṛ̠tama̍si̠ bhūrāra̍bhē । śra̠ddhā-mmana̍sā । dī̠kṣā-ntapa̍sā । viśva̍sya̠ bhuva̍na̠syādhi̍patnīm । sarvē̠ kāmā̠ yaja̍mānasya santu ॥
vāta̍-mprā̠ṇa-mmana̍sā̠-‘nvāra̍bhāmahē । pra̠jāpa̍ti̠ṃ yō bhuva̍nasya gō̠pāḥ ।
sa nō̍ mṛ̠tyōstrā̍yatā̠-mpātvagṃha̍saḥ ॥ 80 ॥

jyōgjī̠vā ja̠rāma̍śīmahi ॥ indra̍ śākvara gāya̠trī-mprapa̍dyē । tā-ntē̍ yunajmi । indra̍ śākvara tri̠ṣṭubha̠-mprapa̍dyē । tā-ntē̍ yunajmi ।
indra̍ śākvara̠ jaga̍tī̠-mprapa̍dyē । tā-ntē̍ yunajmi ।
indra̍ śākvarānu̠ṣṭubha̠-mprapa̍dyē । tā-ntē̍ yunajmi । indra̍ śākvara pa̠ṅkti-mprapa̍dyē ॥ 81 ॥

tā-ntē̍ yunajmi ॥ ā-‘ha-ndī̠kṣāma̍ruha-mṛ̠tasya̠ patnī̎m । gā̠ya̠trēṇa̠ Chanda̍sā̠ brahma̍ṇā cha । ṛ̠tagṃ sa̠tyē̍-‘dhāyi । sa̠tyamṛ̠tē̍-‘dhāyi ।
ṛ̠ta-ñcha̍ mē sa̠tya-ñchā̍bhūtām । jyōti̍rabhūva̠gṃ̠ suva̍ragamam ।
su̠va̠rgaṃ lō̠ka-nnāka̍sya pṛ̠ṣṭham । bra̠ddhnasya̍ vi̠ṣṭapa̍magamam ॥
pṛ̠thi̠vī dī̠kṣā ॥ 82 ॥

tayā̠-‘gni rdī̠kṣayā̍ dīkṣi̠taḥ । yayā̠-‘gni rdī̠kṣayā̍ dīkṣi̠taḥ । tayā̎ tvā dī̠kṣayā̍ dīkṣayāmi । a̠ntari̍kṣa-ndī̠kṣā ।
tayā̍ vā̠yu rdī̠kṣayā̍ dīkṣi̠taḥ ।
yayā̍ vā̠yu rdī̠kṣayā̍ dīkṣi̠taḥ ।
tayā̎ tvā dī̠kṣayā̍ dīkṣayāmi । dyau rdī̠kṣā ।
tayā̍-”di̠tyō dī̠kṣayā̍ dīkṣi̠taḥ ।
yayā̍-”di̠tyō dī̠kṣayā̍ dīkṣi̠taḥ ॥ 83 ॥

tayā̎ tvā dī̠kṣayā̍ dīkṣayāmi । diśō̍ dī̠kṣā ।
tayā̍ cha̠ndramā̍ dī̠kṣayā̍ dīkṣi̠taḥ ।
yayā̍ cha̠ndramā̍ dī̠kṣayā̍ dīkṣi̠taḥ ।
tayā̎ tvā dī̠kṣayā̍ dīkṣayāmi ।
āpō̍ dī̠kṣā । tayā̠ varu̍ṇō̠ rājā̍ dī̠kṣayā̍ dīkṣi̠taḥ । yayā̠ varu̍ṇō̠ rājā̍ dī̠kṣayā̍ dīkṣi̠taḥ । tayā̎ tvā dī̠kṣayā̍ dīkṣayāmi ।
ōṣa̍dhayō dī̠kṣā ॥ 84 ॥

tayā̠ sōmō̠ rājā̍ dī̠kṣayā̍ dīkṣi̠taḥ। yayā̠ sōmō̠ rājā̍ dī̠kṣayā̍ dīkṣi̠taḥ ।
tayā̎ tvā dī̠kṣayā̍ dīkṣayāmi । vāg dī̠kṣā ।
tayā̎ prā̠ṇō dī̠kṣayā̍ dīkṣi̠taḥ ।
yayā̎ prā̠ṇō dī̠kṣayā̍ dīkṣi̠taḥ ।
tayā̎ tvā dī̠kṣayā̍ dīkṣayāmi । pṛ̠thi̠vī tvā̠ dīkṣa̍māṇa̠manu̍ dīkṣatām ।
a̠ntari̍kṣa-ntvā̠ dīkṣa̍māṇa̠manu̍ dīkṣatām ।
dyaustvā̠ dīkṣa̍māṇa̠manu̍ dīkṣatām ॥ 85 ॥

diśa̍stvā̠ dīkṣa̍māṇa̠manu̍ dīkṣantām । āpa̍stvā̠ dīkṣa̍māṇa̠manu̍ dīkṣantām ।
ōṣa̍dhayastvā̠ dīkṣa̍māṇa̠manu̍ dīkṣantām । vāktvā̠ dīkṣa̍māṇa̠manu̍ dīkṣatām ।
ṛcha̍stvā̠ dīkṣa̍māṇa̠manu̍ dīkṣantām । sāmā̍ni tvā̠ dīkṣa̍māṇa̠manu̍ dīkṣantām ।
yajūgṃ̍ṣi tvā̠ dīkṣa̍māṇa̠manu̍ dīkṣantām । aha̍ścha̠ rātri̍ścha । kṛ̠ṣiścha̠ vṛṣṭi̍ścha । tviṣi̠śchā-pa̍chitiścha ॥ 86 ॥

āpa̠śchauṣa̍dhayaścha । ūrkcha̍ sū̠nṛtā̍ cha । tāstvā̠ dīkṣa̍māṇa̠manu̍ dīkṣantām ॥
svē dakṣē̠ dakṣa̍pitē̠ha sī̍da । dē̠vānāgṃ̍ su̠mnō ma̍ha̠tē raṇā̍ya । svā̠sa̠stha-sta̠nuvā̠ saṃvi̍śasva । pi̠tēvai̍dhi sū̠nava̠ ā su̠śēva̍ḥ ।
śi̠vō mā̍ śi̠vamāvi̍śa । sa̠tya-mma̍ ā̠tmā । śra̠ddhā mē ‘kṣi̍tiḥ ॥ 87 ॥

tapō̍ mē prati̠ṣṭhā । sa̠vi̠tṛ-pra̍sūtā mā̠ diśō̍ dīkṣayantu । sa̠tyama̍smi ॥ a̠ha-ntvada̍smi̠ mada̍si̠ tvamē̠tat । mamā̍si̠ yōni̠stava̠ yōni̍rasmi । mamai̠va sanvaha̍ ha̠vyānya̍gnē ।
pu̠traḥ pi̠trē lō̍ka̠kṛ-jjā̍tavēdaḥ ॥
ā̠juhvā̍na-ssu̠pratī̍kaḥ pu̠rastā̎t ।
agnē̠ svāṃ yōni̠māsī̍da sā̠ddhyā ।
a̠smin-thsa̠dhasthē̠ addhyutta̍rasminn ॥ 88 ॥

viśvē̍ dēvā̠ yaja̍mānaścha sīdata ॥
ēka̍mi̠ṣē viṣṇu̠stvā-‘nvē̍tu ।
dvē ū̠rjē viṣṇu̠stvā-‘nvē̍tu ।
trīṇi̍ vra̠tāya̠ viṣṇu̠stvā-‘nvē̍tu ।
cha̠tvāri̠ māyō̍ bhavāya̠ viṣṇu̠stvā-‘nvē̍tu ।
pañcha̍ pa̠śubhyō̠ viṣṇu̠stvā-‘nvē̍tu । ṣaḍrā̠yaspōṣā̍ya̠ viṣṇu̠stvā-‘nvē̍tu ।
sa̠pta sa̠ptabhyō̠ hōtrā̎bhyō̠ viṣṇu̠stvā-‘nvē̍tu ॥
sakhā̍ya-ssa̠ptapa̍dā abhūma । sa̠khya-ntē̍ gamēyam ॥ 89 ॥

sa̠khyāttē̠ mā yō̍ṣam । sa̠khyānmē̠ mā yō̎ṣṭhāḥ ॥ sā-‘si̍ subrahmaṇyē ।
tasyā̎stē pṛthi̠vī pāda̍ḥ । sā-‘si̍ subrahmaṇyē । tasyā̎stē̠-‘ntari̍kṣa̠-mpāda̍ḥ ।
sā-‘si̍ subrahmaṇyē । tasyā̎stē̠ dyauḥ pāda̍ḥ । sā-‘si̍ subrahmaṇyē । tasyā̎stē̠ diśa̠ḥ pāda̍ḥ ॥ 90 ॥

pa̠rō ra̍jāstē pañcha̠maḥ pāda̍ḥ । sā na̠ iṣa̠mūrja̍-ndhukṣva । tēja̍ indri̠yam । bra̠hma̠va̠rcha̠sa-ma̠nnādya̎m ॥ vimi̍mē tvā̠ paya̍svatīm । dē̠vānā̎-ndhē̠nugṃ su̠dughā̠-mana̍pa-sphurantīm । indra̠-ssōma̍-mpibatu ।
kṣēmō̍ astu naḥ ॥ i̠mā-nna̍rāḥ kṛṇuta̠ vēdi̠mētya̍ । vasu̍matīgṃ ru̠drava̍tī-mādi̠tyava̍tīm ॥ 91 ॥

var​ṣma̍ndi̠vaḥ । nābhā̍ pṛthi̠vyāḥ ।
yathā̠-‘yaṃ yaja̍mānō̠ na riṣyē̎t ।
dē̠vasya̍ savi̠tu-ssa̠vē ॥
chatu̍-śśikhaṇḍā yuva̠ti-ssu̠pēśā̎ḥ ।
ghṛ̠tapra̍tīkā̠ bhuva̍nasya̠ maddhyē̎ ।
tasyāgṃ̍ supa̠rṇāvadhi̠ yau nivi̍ṣṭau ।
tayō̎ rdē̠vānā̠madhi̍ bhāga̠dhēya̎m ॥
apa̠ janya̍-mbha̠ya-nnu̍da । apa cha̠krāṇi̍ vartaya । gṛ̠hagṃ sōma̍sya gachChatam ॥
na vā u̍vē̠tanmri̍yasē̠ na ri̍ṣyasi ।
dē̠vāgṃ idē̍ṣi pa̠thibhi̍-ssu̠gēbhi̍ḥ ।
yatra̠ yanti̍ su̠kṛtō̠ nāpi̍ du̠ṣkṛta̍ḥ ।
tatra̍ tvā dē̠va-ssa̍vi̠tā da̍dhātu ॥ 92 ॥
(brahma̍ṇō̠ yōni̠ – ragṃha̍saḥ – pa̠ṅkti-mprapa̍dyē – dī̠kṣā – yayō̍-”di̠tyō dī̠kṣayā̍ dīkṣi̠ta – stayā̎ tvā dī̠kṣayā̍ dīkṣayā̠myōṣa̍dhayō dī̠kṣā – dyaustvā̠ dīkṣa̍māṇa̠manu̍ dīkṣatā̠ – mapa̍chiti̠śchā – kṣi̍ti̠ – rutta̍rasmin – gamēya̠ṃ – diśa̠ḥ pāda̍ – ādi̠tyava̍tīṃ – ँvartaya̠ pañcha̍ cha) (a. 7)

anuvākaṃ 8 – paśuviṣayā achChidramantrāḥ
yada̠sya pā̠rē raja̍saḥ । śu̠kra-ñjyōti̠-rajā̍yata । tanna̍ḥ par​ṣa̠dati̠ dviṣa̍ḥ ।
agnē̍ vaiśvānara̠ svāhā̎ ॥ yasmā̎dbhī̠ṣā-‘vā̍śiṣṭhāḥ । tatō̍ nō̠ abha̍ya-ṅkṛdhi ।
pra̠jābhya̠-ssarvā̎bhyō mṛḍa । namō̍ ru̠drāya̍ mī̠ḍhuṣē̎ ॥ yasmā̎dbhī̠ṣā nyaṣa̍daḥ ।
tatō̍ nō̠ abha̍ya-ṅkṛdhi ॥ 93 ॥

pra̠jābhya̠-ssarvā̎bhyō mṛḍa । namō̍ ru̠drāya̍ mī̠ḍhuṣē̎ ॥ udu̍sra tiṣṭha̠ prati̍tiṣṭha̠ mā ri̍ṣaḥ । mēmaṃ ya̠jñaṃ yaja̍māna-ñcha rīriṣaḥ । su̠va̠rgē lō̠kē yaja̍māna̠gṃ̠ hi dhē̠hi । śa-nna̍ ēdhi dvi̠padē̠ śa-ñchatu̍ṣpadē ॥
yasmā̎dbhī̠ṣā-‘vē̍piṣṭhāḥ pa̠lāyi̍ṣṭhā-ssa̠majñā̎sthāḥ । tatō̍ nō̠ abha̍ya-ṅkṛdhi ।
pra̠jābhya̠-ssarvā̎bhyō mṛḍa । namō̍ ru̠drāya̍ mī̠ḍhuṣē̎ ॥ 94 ॥

ya i̠damaka̍ḥ । tasmai̠ nama̍ḥ । tasmai̠ svāhā̎ ॥
na vā u̍vē̠tanmri̍yasē̠ na ri̍ṣyasi dē̠vāgṃ idē̍ṣi pa̠thibhi̍-ssu̠gēbhi̍ḥ । harī̍ tē̠ yuñjā̠ pṛṣa̍tī abhūtā̠mupā̎sthā-dvā̠jī dhu̠ri rāsa̍bhasya ॥ । āśā̍nā-ntvā ”śāpā̠lēbhya̍ḥ । cha̠turbhyō̍ a̠mṛtē̎bhyaḥ । i̠da-mbhū̠tasyādhya̍kṣēbhyaḥ । vi̠dhēma̍ ha̠viṣā̍ va̠yam ॥
viśvā̠ āśā̠ madhu̍nā̠ sagṃsṛ̍jāmi । a̠na̠mī̠vā āpa̠ ōṣa̍dhayō bhavantu । a̠yaṃ yaja̍mānō̠ mṛdhō̠ vya̍syatām । agṛ̍bhītāḥ pa̠śava̍-ssantu̠ sarvē̎ ॥ ॥ ya̠jñasya̠ hi stha ṛ̠tviyau̎ ।
indrā̎gnī̠ chēta̍nasya cha । hu̠tā̠hu̠tasya̍ tṛpyatam । ahu̍tasya hu̠tasya̍ cha । hu̠tasya̠ chāhu̍tasya cha । ahu̍tasya hu̠tasya̍ cha । indrā̎gnī a̠sya sōma̍sya । vī̠ta-mpi̍bata-ñju̠ṣēthā̎m ॥
mā yaja̍māna̠-ntamō̍ vidat । martvijō̠ mō i̠māḥ pra̠jāḥ । mā ya-ssōma̍mi̠ma-mpibā̎t । sagṃsṛ̍ṣṭamu̠bhaya̍-ṅkṛ̠tam ॥ 95 ॥
(kṛ̠dhi̠ – mī̠ḍhuṣē – ‘hu̍tasya cha sa̠pta cha̍) (a. 8)

anuvākaṃ 9 – upāṃśvabhiṣavā mantrāḥ
a̠nā̠gasa̍stvā va̠yam । indrē̍ṇa̠ prēṣi̍tā̠ upa̍ । vā̠yuṣṭē̍ astvagṃśa̠bhūḥ । mi̠trastē̍ astvagṃśa̠bhūḥ । varu̍ṇastē astvagṃśa̠bhūḥ ॥
apā̎-ṅkṣayā̠ ṛta̍sya garbhāḥ । bhuva̍nasya gōpā̠-śśyēnā̍ atithayaḥ । parva̍tānā-ṅkakubhaḥ pra̠yutō̍ napātāraḥ । va̠gnunēndragg̍ hvayata ।
ghōṣē̠ṇāmī̍-vāg​śchātayata ॥ 96 ॥

yu̠ktā-sstha̠ vaha̍ta ॥ dē̠vā grāvā̍ṇa̠ indu̠rindra̠ itya̍vādiṣuḥ । ēndra̍machuchyavuḥ para̠masyā̎ḥ parā̠vata̍ḥ । ā-‘smā-thsa̠dhasthā̎t ।
ōrōra̠ntari̍kṣāt । ā su̍bhū̠tama̍suṣavuḥ । bra̠hma̠va̠rcha̠sa-mma̠ ā-‘su̍ṣavuḥ ।
sa̠ma̠rē rakṣāg̍syavadhiṣuḥ । apa̍hata-mbrahma̠jyasya̍ ॥ vākcha̍ tvā̠ mana̍ścha śriṇītām ॥ 97 ॥

prā̠ṇaścha̍ tvā-‘pā̠naścha̍ śrīṇītām ।
chakṣu̍ścha tvā̠ śrōtra̍-ñcha śrīṇītām ।
dakṣa̍ścha tvā̠ bala̍-ñcha śrīṇītām । ōja̍ścha tvā̠ saha̍ścha śrīṇītām । āyu̍ścha tvā ja̠rā cha̍ śrīṇītām । ā̠tmā cha̍ tvā ta̠nūścha̍ śrīṇītām । śṛ̠tō̍-‘si śṛ̠ta-ṅkṛ̍taḥ । śṛ̠tāya̍ tvā śṛ̠tēbhya̍stvā ॥
yamindra̍mā̠hu rvaru̍ṇa̠ṃ yamā̠huḥ । ya-mmi̠tramā̠hu-ryamu̍ sa̠tyamā̠huḥ ॥ 98 ॥

yō dē̠vānā̎-ndē̠vata̍mastapō̠jāḥ । tasmai̎ tvā̠ tēbhya̍stvā ॥ mayi̠ tyadi̍ndri̠ya-mma̠hat । mayi̠ dakṣō̠ mayi̠ kratu̍ḥ । mayi̍ dhāyi su̠vīrya̎m । triśu̍ggha̠rmō vibhā̍tu mē । ākū̎tyā̠ mana̍sā sa̠ha ।
vi̠rājā̠ jyōti̍ṣā sa̠ha । ya̠jñēna̠ paya̍sā sa̠ha ।
tasya̠ dōha̍maśīmahi ॥ 99 ॥

tasya̍ su̠mnama̍śīmahi । tasya̍ bha̠kṣama̍śīmahi ।
vāgju̍ṣā̠ṇā sōma̍sya tṛpyatu ॥ mi̠trō janān̍ yātayati prajā̠na-nmi̠trō dā̍dhāra pṛthi̠vīmu̠ta dyām । mi̠traḥ kṛ̠ṣṭīrani̍miṣā̠-‘bhi cha̍ṣṭē sa̠tyāya̍ ha̠vya-ṅghṛ̠tava̍-dvidhēma ॥ pra sa mi̍tra̠ martō̍ astu̠ praya̍svā̠n. yasta̍ āditya̠ śikṣa̍ti vra̠tēna̍ । na ha̍nyatē̠ na jī̍yatē̠ tvōtō̠ naina̠magṃhō̍ aśnō̠tyanti̍tō̠ na dū̠rāt ॥ ॥ yasmā̠nna jā̠taḥ parō̍ a̠nyō asti̍ । ya ā̍vi̠vēśa̠ bhuva̍nāni̠ viśvā̎ ।
pra̠jāpa̍tiḥ pra̠jayā̍ saṃvidā̠naḥ ।
trīṇi̠ jyōtīgṃ̍ṣi sachatē̠ sa ṣō̍ḍa̠śī ॥
ē̠ṣa bra̠hmā ya ṛ̠tviya̍ḥ ।
indrō̠ nāma̍ śru̠tō ga̠ṇē ॥ 100 ॥

pra tē̍ ma̠hē vi̠dathē̍ ‘śagṃsiṣa̠gṃ̠ harī̎ । ya ṛ̠tviya̠ḥ pra tē̍ vanvē ।
va̠nuṣō̍ harya̠ta-mmada̎m ॥ indrō̠ nāma̍ ghṛ̠ta-nna yaḥ । hari̍bhi̠śchāru̠ sēcha̍tē ।
śru̠tō ga̠ṇa ā tvā̍ viśantu । hari̍varpasa̠giṃra̍ḥ ॥
indrādhi̍pa̠tē-‘dhi̍pati̠stva-ndē̠vānā̍masi । adhi̍pati̠-mmām । āyu̍ṣmanta̠ṃ varcha̍svanta-mmanu̠ṣyē̍ṣu kuru ॥ 101 ॥

indra̍ścha sa̠mrā-ḍvaru̍ṇaścha̠ rājā̎ ।
tau tē̍ bha̠kṣa-ñcha̍kratu̠ragra̍ ē̠tam ।
tayō̠ranu̍ bha̠kṣa-mbha̍kṣayāmi ।
vāgju̍ṣā̠ṇā sōma̍sya tṛpyatu ॥
pra̠jāpa̍ti rvi̠śvaka̍rmā । tasya̠ manō̍ dē̠vaṃ ya̠jñēna̍ rāddhyāsam । a̠rthē̠ gā a̠sya ja̍hitaḥ । a̠va̠sāna̍patē-‘va̠sāna̍-mmē vinda ॥
namō̍ ru̠drāya̍ vāstō̠ṣpata̍yē ।
āya̍nē vi̠drava̍ṇē ॥ 102 ॥

u̠dyānē̠ yatpa̠rāya̍ṇē । ā̠varta̍nē vi̠varta̍nē ।
yō gō̍pā̠yati̠ tagṃ hu̍vē ॥
yānya̍pā̠mityā̠-nyapra̍tīttā̠-nyasmi̍ ।
ya̠masya̍ ba̠linā̠ charā̍mi ।
i̠haiva santa̠ḥ prati̠ tadyā̍tayāmaḥ ।
jī̠vā jī̠vēbhyō̠ niha̍rāma ēnat ॥
a̠nṛ̠ṇā a̠sminna̍-nṛ̠ṇāḥ para̍sminn ।
tṛ̠tīyē̍ lō̠kē a̍nṛ̠ṇā-ssyā̍ma ।
yē dē̍va̠yānā̍ u̠ta pi̍tṛ̠yāṇā̎ḥ ॥ 103 ॥

sarvā̎-npa̠thō a̍nṛ̠ṇā ākṣī̍yēma ॥
i̠damū̠ nu śrēyō̍-‘va̠sāna̠-māga̍nma ।
śi̠vē nō̠ dyāvā̍pṛthi̠vī u̠bhē i̠mē । gōma̠ddhana̍-va̠daśva̍va̠-dūrja̍svat ।
su̠vīrā̍ vī̠rairanu̠ sañcha̍rēma ॥ a̠rkaḥ pa̠vitra̠gṃ̠ raja̍sō vi̠māna̍ḥ ।
pu̠nāti̍ dē̠vānā̠-mbhuva̍nāni̠ viśvā̎ । dyāvā̍pṛthi̠vī paya̍sā saṃvidā̠nē ।
ghṛ̠ta-ndu̍hātē a̠mṛta̠-mprapī̍nē ॥ pa̠vitra̍ma̠rkō raja̍sō vi̠māna̍ḥ ।
pu̠nāti̍ dē̠vānā̠-mbhuva̍nāni̠ viśvā̎ ।
suva̠ rjyōti̠ ryaśō̍ ma̠hat ।
a̠śī̠mahi̍ gā̠dhamu̠ta pra̍ti̠ṣṭhām ॥ 104 ॥
(chā̠ta̠ya̠ta̠ – śrī̠ṇī̠tā̠gṃ̠ – sa̠tyamā̠hu – ra̍śīmahi – ga̠ṇē – ku̍ru – vi̠drava̍ṇē – pitṛ̠yāṇā̍ – a̠rkō raja̍sō vi̠māna̠strīṇi̍ cha) (a. 9)

anuvākaṃ 10 – saumikaprāyāśchittamantrāḥ
uda̍stāmphsī-thsavi̠tā mi̠trō a̍rya̠mā ।
sarvā̍-na̠mitrā̍-navadhīdyu̠gēna̍ ।
bṛ̠hanta̠-mmāma̍kara-dvī̠rava̍ntam । ra̠tha̠nta̠rē śra̍yasva̠ svāhā̍ pṛthi̠vyām ।
vā̠ma̠dē̠vyē śra̍yasva̠ svāhā̠-‘ntari̍kṣē । bṛ̠ha̠ti śra̍yasva̠ svāhā̍ di̠vi ।
bṛ̠ha̠tā tvōpa̍stabhnōmi ॥
ā tvā̍ dadē̠ yaśa̍sē vī̠ryā̍ya cha ।
a̠smāsva̍-ghniyā yū̠ya-nda̍dhāthēndri̠ya-mpaya̍ḥ ॥ yastē̎ dra̠phsō yasta̍ uda̠r̠ṣaḥ ॥ 105 ॥

daivya̍ḥ kē̠tu rviśva̠-mbhuva̍na-māvi̠vēśa̍ ।
sa na̍ḥ pā̠hyari̍ṣṭyai̠ svāhā̎ ॥
anu̍ mā̠ sarvō̍ ya̠jñō̍-‘yamē̍tu ।
viśvē̍ dē̠vā ma̠ruta̠-ssāmā̠rkaḥ ।
ā̠priya̠ ̍007ā;Chandāgṃ̍si ni̠vidō̠ yajūgṃ̍ṣi । a̠syai pṛ̍thi̠vyai yadya̠jñiya̎m ॥
pra̠jāpa̍tē rvarta̠nimanu̍ vartasva ।
anu̍ vī̠rairanu̍ rāddhyāma̠ gōbhi̍ḥ ।
anvaśvai̠ranu̠ sarvai̍ru pu̠ṣṭaiḥ ।
anu̍ pra̠jayā-‘nvi̍ndri̠yēṇa̍ ॥ 106 ॥

dē̠vā nō̍ ya̠jña-mṛ̍ju̠dhā na̍yantu ॥
prati̍ kṣa̠trē prati̍ tiṣṭhāmi rā̠ṣṭrē ।
pratyaśvē̍ṣu̠ prati̍tiṣṭhāmi̠ gōṣu̍ ।
prati̍ pra̠jāyā̠-mprati̍ tiṣṭhāmi̠ bhavyē̎ ।
viśva̍ma̠nyā-‘bhi̍ vāvṛ̠dhē । tada̠nyasyā̠-madhi̍śri̠tam । di̠vē cha̍ vi̠śvaka̍rmaṇē ।
pṛ̠thi̠vyai chā̍kara̠-nnama̍ḥ ॥ askā̠ndyauḥ pṛ̍thi̠vīm । askā̍nṛṣa̠bhō yuvā̠ gāḥ ॥ 107 ॥

ska̠nnēmā viśvā̠ bhuva̍nā । ska̠nnō ya̠jñaḥ praja̍nayatu । askā̠naja̍ni̠ prāja̍ni ।
ā ska̠nnājjā̍yatē̠ vṛṣā̎ । ska̠nnā-tpraja̍niṣīmahi ॥ yē dē̠vā yēṣā̍mi̠da-mbhā̍ga̠dhēya̍-mba̠bhūva̍ । yēṣā̎-mprayā̠jā u̠tānū̍yā̠jāḥ । indra̍jyēṣṭhēbhyō̠ varu̍ṇarājabhyaḥ । a̠gnihō̍tṛbhyō dē̠vēbhya̠-ssvāhā̎ ॥ u̠ta tyā nō̠ divā̍ ma̠tiḥ ॥ 108 ॥

adi̍tirū̠tyā-”ga̍mat । sā śantā̍chī̠ maya̍skarat । apa̠ sridha̍ḥ ॥ u̠ta tyā daivyā̍ bhi̠ṣajā̎ । śa-nna̍skaratō a̠śvinā̎ । yū̠yātā̍-ma̠smadrapa̍ḥ ।
apa̠ sridha̍ḥ ॥ śama̠gni-ra̠gnibhi̍skarat । śa-nna̍stapatu̠ sūrya̍ḥ । śaṃ vātō̍ vātvara̠pāḥ ॥ 109 ॥

apa̠ sridha̍ḥ ॥ taditpa̠da-nna vichi̍kēta vi̠dvān ।
yanmṛ̠taḥ puna̍ra̠pyēti̍ jī̠vān । tri̠vṛdya-dbhuva̍nasya ratha̠vṛt । jī̠vō garbhō̠ na mṛ̠ta-ssa jī̍vāt ॥ pratya̍smai̠ pipī̍ṣatē । vi̠śvā̍ni vi̠duṣē̍ bhara । a̠ra̠-ṅga̠māya̠ jagma̍vē ।
apa̍śchāddadhvanē̠ narē̎ (ō-rapa̍śchāddaghvanē̠ narē̎) ॥ indu̠rindu̠ma-vā̍gāt ।
indō̠rindrō̍-‘pāt । tasya̍ ta inda̠vindra̍-pītasya̠ madhu̍mataḥ । upa̍hūta̠syōpa̍hūtō bhakṣayāmi ॥ 110 ॥
(u̠da̠r̠ṣa – i̍ndri̠yēṇa̠ – gā – ma̠ti – ra̍ra̠pā – a̍gā̠trīṇi̍ cha) (a. 10)

anuvākaṃ 11 – dar​śapūrṇamāsaprāyaśchittamantrāḥ
brahma̍ prati̠ṣṭhā mana̍sō̠ brahma̍ vā̠chaḥ । brahma̍ ya̠jñānāgṃ̍ ha̠viṣā̠-mājya̍sya ।
ati̍rikta̠-ṅkarma̍ṇō̠ yachcha̍ hī̠nam । ya̠jñaḥ parvā̍ṇi prati̠rannē̍ti ka̠lpayann̍ ।
svāhā̍kṛ̠tā-”hu̍tirētu dē̠vān ॥ āśrā̍vitama̠tyāśrā̍vitam ।
vaṣa̍ṭkṛta-ma̠tyanū̎kta-ñcha ya̠jñē ।
ati̍rikta̠-ṅkarma̍ṇō̠ yachcha̍ hī̠nam ।
ya̠jñaḥ parvā̍ṇi prati̠rannē̍ti ka̠lpayann̍ ।
svāhā̍kṛ̠tā-”hu̍tirētu dē̠vān ॥ 111 ॥

yadvō̍ dēvā atipā̠dayā̍ni । vā̠chā chi̠tpraya̍ta-ndēva̠ hēḍa̍nam । a̠rā̠yō a̠smāgṃ a̠bhi-du̍chChunā̠yatē̎। a̠nyatrā̠sma-nma̍ruta̠sta-nnidhē̍tana ॥ ta̠ta-mma̠ āpa̠stadu̍ tāyata̠ puna̍ḥ । svādi̍ṣṭhā dhī̠tiru̠chathā̍ya śasyatē ।
a̠yagṃ sa̍mu̠dra u̠ta vi̠śvabhē̍ṣajaḥ ।
svāhā̍-kṛtasya̠ samu̍tṛpṇuta rbhuvaḥ ॥
udva̠ya-ntama̍sa̠spari̠ paśya̍ntō̠ jyōti̠rutta̍ram । dē̠va-ndē̍va̠trā sūrya̠maga̍nma̠ jyōti̍rutta̠mam ॥ ।
udu̠ tya-ñjā̠tavē̍dasa-ndē̠vaṃ va̍hanti kē̠tava̍ḥ । dṛ̠śē viśvā̍ya̠ sūrya̎m ॥ chi̠tra-ndē̠vānā̠-muda̍gā̠danī̍ka̠-ñchakṣu̍-rmi̠trasya̠ varu̍ṇasyā̠-‘gnēḥ । ā-‘ prā̠ dyāvā̍pṛthi̠vī a̠ntari̍kṣa̠gṃ̠ sūrya̍ ā̠tmā jaga̍tasta̠sthuṣa̍ścha ॥ ॥ 112 ॥

i̠ma-mmē̍ varuṇa śrudhī̠ hava̍ma̠dyā cha̍ mṛḍaya । tvāma̍va̠syurā cha̍kē ॥ tattvā̍ yāmi̠ brahma̍ṇā̠ vanda̍māna̠-stadā śā̎stē̠ yaja̍mānō ha̠virbhi̍ḥ । ahē̍ḍamānō varuṇē̠ha bō̠dhyuru̍śagṃsa̠ mā na̠ āyu̠ḥ pramō̍ṣīḥ ॥ ।
tva-nnō̍ agnē̠ varu̍ṇasya vi̠dvā-ndē̠vasya̠ hēḍō-‘va̍ yāsi sīṣṭhāḥ । yaji̍ṣṭhō̠ vahni̍ tama̠-śśōśu̍chānō̠ viśvā̠ dvēṣāgṃ̍si̠ pramu̍mugdhya̠smat ॥
sa tvannō̍ agnē-‘va̠mō bha̍vō̠tī nēdi̍ṣṭhō a̠syā u̠ṣasō̠ vyu̍ṣṭau । ava̍ yakṣva nō̠ varu̍ṇa̠gṃ̠ rarā̍ṇō vī̠hi mṛ̍ḍī̠kagṃ su̠havō̍ na ēdhi ॥ । tvama̍gnē a̠yā-‘si̍ । a̠yā sanmana̍sā hi̠taḥ । a̠yā san.ha̠vyamū̍hiṣē । a̠yā nō̍ dhēhi bhēṣa̠jam । i̠ṣṭō a̠gnirāhu̍taḥ । svāhā̍kṛtaḥ pipartu naḥ । sva̠gā dē̠vēbhya̍ i̠da-nnama̍ḥ ॥ prajā̍patē̠ na tvadē̠tānya̠nyō viśvā̍ jā̠tāni̠ pari̠ tā ba̍bhūva । yatkā̍māstē juhu̠mastannō̍ astu va̠yagg​ syā̍ma̠ pata̍yō rayī̠ṇām ॥ ॥ i̠ma-ñjī̠vēbhya̍ḥ pari̠dhi-nda̍dhāmi । maiṣā-nnu̍ gā̠dapa̍rō̠ ardha̍mē̠tam । śa̠ta-ñjī̍vantu śa̠rada̍ḥ purū̠chīḥ । ti̠rō mṛ̠tyu-nda̍dhatā̠-mparva̍tēna ॥
i̠ṣṭēbhya̠-ssvāhā̠ vaṣa̠ḍani̍ṣṭēbhya̠-ssvāhā̎ । bhē̠ṣa̠ja-nduri̍ṣṭyai̠ svāhā̠ niṣkṛ̍tyai̠ svāhā̎ । daurā̎rdhyai̠ svāhā̠ daivī̎bhya-sta̠nūbhya̠-ssvāhā̎ ॥ 113 ॥

ṛddhyai̠ svāhā̠ samṛ̍ddhyai̠ svāhā̎ ॥
yata̍ indra̠ bhayā̍mahē ।
tatō̍ nō̠ abha̍ya-ṅkṛdhi । magha̍vañCha̠gdhi tava̠ tanna̍ ū̠tayē̎ । vi dviṣō̠ vi mṛdhō̍ jahi ॥ sva̠sti̠dā vi̠śaspati̍ḥ । vṛ̠tra̠hā vimṛdhō̍ va̠śī । vṛṣēndra̍ḥ pu̠ra ē̍tu naḥ । sva̠sti̠dā a̍bhaya-ṅka̠raḥ ॥ ā̠bhi rgī̠rbhi ryadatō̍ na ū̠nam ॥ 114 ॥

āpyā̍yaya harivō̠ vardha̍mānaḥ ।
ya̠dā stō̠tṛbhyō̠ mahi̍ gō̠trā ru̠jāsi̍ ।
bhū̠yi̠ṣṭha̠bhājō̠ adha̍ tē syāma ॥ anā̎jñāta̠ṃ yadājñā̍tam । ya̠jñasya̍ kri̠yatē̠ mithu̍ । agnē̠ tada̍sya kalpaya । tvagṃ hi vēttha̍ yathāta̠tham ॥ puru̍ṣa sammitō ya̠jñaḥ । ya̠jñaḥ puru̍ṣa sammitaḥ । agnē̠ tada̍sya kalpaya ।
tvagṃ hi vēttha̍ yathāta̠tham ॥ ya-tpā̍ka̠trā mana̍sā dī̠nada̍kṣā̠ na । ya̠jñasya̍ ma̠nvatē̠ martā̍saḥ । a̠gniṣṭaddhōtā̎ kṛtu̠vidvi̍jā̠nann ।
yaji̍ṣṭhō dē̠vāgṃ ṛ̍tu̠śō ya̍jāti ॥ 115 ॥
(dē̠vāg​ – śchi̠traṃ – ta̠nūbhya̠-ssvāhō̠ – naṃ – puru̍ṣasammi̠tō-‘gnē̠ tada̍sya kalpaya̠ pañcha̍ cha) (a. 11)

anuvākaṃ 12 – agniṣṭōmādau yajamānajapyā mantraviśēṣāḥ
yaddē̍vā dēva̠hēḍa̍nam । dēvā̍saśchakṛ̠mā va̠yam । ādi̍tyā̠-stasmā̎nmā muñchata ।
ṛ̠tasya̠rtēna̠ māmu̠ta ॥ dēvā̍ jīvanakā̠myā yat । vā̠chā-‘nṛ̍tamūdi̠ma । a̠gnirmā̠ tasmā̠dēna̍saḥ । gār​ha̍patya̠ḥ pramu̍ñchatu । du̠ri̠tā yāni̍ chakṛ̠ma । ka̠rōtu̠ māma̍nē̠ nasa̎m ॥ 116 ॥
ṛ̠tēna̍ dyāvāpṛthivī । ṛ̠tēna̠ tvagṃ sa̍rasvati । ṛ̠tānmā̍ muñcha̠tāgṃha̍saḥ । yada̠nya kṛ̍tamāri̠ma ॥ sa̠jā̠ta̠śa̠gṃ̠sādu̠ta vā̍ jāmiśa̠gṃ̠sāt । jyāya̍sa̠-śśagṃsā̍du̠ta vā̠ kanī̍yasaḥ । anā̎jñāta-ndē̠vakṛ̍ta̠ṃ yadēna̍ḥ । tasmā̠ttvama̠smā-ñjā̍tavēdō mumugdhi ॥ yadvā̠chā yanmana̍sā । bā̠hubhyā̍-mū̠rubhyā̍-maṣṭhī̠vadbhyā̎m ॥ 117 ॥

śi̠śñai ryadanṛ̍ta-ñchakṛ̠mā va̠yam । a̠gnirmā̠ tasmā̠dēna̍saḥ ॥ yaddhastā̎bhyā-ñcha̠kara̠ kilbi̍ṣāṇi । a̠kṣāṇā̎ṃ va̠gnumu̍pa̠ jighna̍mānaḥ । dū̠rē̠pa̠śyā cha̍ rāṣṭra̠bhṛchcha̍ । tānya̍phsa̠rasā̠-vanu̍dattā-mṛ̠ṇāni̍ ॥
adī̎vyannṛ̠ṇaṃ yada̠ha-ñcha̠kāra̍ । yadvā-‘dā̎syan-thsañja̠gārā̠ janē̎bhyaḥ ।
a̠gnirmā̠ tasmā̠dēna̍saḥ ॥ yanmayi̍ mā̠tā garbhē̍ sa̠ti ॥ 118 ॥

ēna̍ścha̠kāra̠ yatpi̠tā । a̠gnirmā̠ tasmā̠dēna̍saḥ ॥ yadā̍ pi̠pēṣa̍ mā̠tara̍-mpi̠tara̎m ।
pu̠traḥ pramu̍ditō̠ dhayann̍ । ahigṃ̍sitau pi̠tarau̠ mayā̠ tat । tada̍gnē anṛ̠ṇō bha̍vāmi ॥ yada̠ntari̍kṣa-mpṛthi̠vīmu̠ta dyām ।
yanmā̠tara̍-mpi̠tara̍ṃ vā jihigṃsi̠ma ।
a̠gnirmā̠ tasmā̠dēna̍saḥ ॥ yadā̠śasā̍ ni̠śasā̠ yatpa̍rā̠śasā̎ ॥ 119 ॥

yadēna̍ścha kṛ̠mā nūta̍na̠ṃ yatpu̍rā̠ṇam । a̠gnirmā̠ tasmā̠dēna̍saḥ ॥ ati̍krāmāmi duri̠taṃ yadēna̍ḥ । jahā̍mi ri̠pra-mpa̍ra̠mē sa̠dhasthē̎ ।
yatra̠ yanti̍ su̠kṛtō̠ nāpi̍ du̠ṣkṛta̍ḥ । tamārō̍hāmi su̠kṛtā̠-nnu lō̠kam ॥
tri̠tē dē̠vā a̍mṛjatai̠-tadēna̍ḥ ।
tri̠ta ē̠tanma̍nu̠ṣyē̍ṣu māmṛjē ।
tatō̍ mā̠ yadi̠ kiñchi̍dāna̠śē ।
a̠gnirmā̠ tasmā̠dēna̍saḥ ॥ 120 ॥

gār​ha̍patya̠ḥ pramu̍ñchatu । du̠ri̠tā yāni̍ chakṛ̠ma । ka̠rōtu̠ māma̍nē̠nasa̎m ॥ di̠vi jā̠tā a̠phsu jā̠tāḥ । yā jā̠tā ōṣa̍dhībhyaḥ । athō̠ yā a̍gni̠jā āpa̍ḥ । tā na̍-śśundhantu̠ śundha̍nīḥ ॥
yadāpō̠ nakta̍-nduri̠ta-ñcharā̍ma ।
yadvā̠ divā̠ nūta̍na̠ṃ yatpu̍rā̠ṇam ।
hira̍ṇya-varṇā̠stata̠ utpu̍nīta naḥ ॥
i̠ma-mmē̍ varuṇa śrudhī̠ hava̍ma̠dyā cha̍ mṛḍaya । tvāma̍va̠syurā cha̍kē ॥
tattvā̍ yāmi̠ brahma̍ṇā̠ vanda̍māna̠-stadā śā̎stē̠ yaja̍mānō ha̠virbhi̍ḥ । ahē̍ḍamānō varuṇē̠ha bō̠dhyuru̍śagṃsa̠ mā na̠ āyu̠ḥ pramō̍ṣīḥ ॥ । tva-nnō̍ agnē̠ varu̍ṇasya vi̠dvā-ndē̠vasya̠ hēḍō-‘va̍ yāsi sīṣṭhāḥ । yaji̍ṣṭhō̠ vahni̍ tama̠-śśōśu̍chānō̠ viśvā̠ dvēṣāgṃ̍si̠ pramu̍mugdhya̠smat ॥ sa tvannō̍ agnē-‘va̠mō bha̍vō̠tī nēdi̍ṣṭhō a̠syā u̠ṣasō̠ vyu̍ṣṭau । ava̍ yakṣva nō̠ varu̍ṇa̠gṃ̠ rarā̍ṇō vī̠hi mṛ̍ḍī̠kagṃ su̠havō̍ na ēdhi ॥ । tvama̍gnē a̠yā-‘si̍ । a̠yā sanmana̍sā hi̠taḥ । a̠yā san.ha̠vyamū̍hiṣē । a̠yā nō̍ dhēhi bhēṣa̠jam । i̠ṣṭō a̠gnirāhu̍taḥ । svāhā̍kṛtaḥ pipartu naḥ । sva̠gā dē̠vēbhya̍ i̠da-nnama̍ḥ ॥ ॥ 121 ॥
(a̠nē̠nasa̍ – maṣṭhī̠vadbhyāgṃ̍ – sa̠ti – pa̍rā̠śasā̍-”na̠śē̎ – ‘gnirmā̠ tasmā̠dēna̍saḥ – punīta na̠strīṇi̍ cha) (a. 12)

(ya-ddē̍vā̠ gār​ha̍patyō̠ yaddhastā̎bhyā̠ṃ yanmayi̍ mā̠tā yadā̍pi̠pēṣa̠
ँyada̠ntari̍kṣa̠ṃ yadā̠śasā-‘ti̍krāmāmi tri̠tē dē̠vā di̠vi jā̠tā a̠phsu jā̠tā yadāpa̍ i̠ma-mmē̍ varuṇā̠ tattvā̍ yāmi̠ tva-nnō̍ agnē̠ sa tva-nnō̍ agnē̠ tvama̍gnē a̠yā-‘si̍)

anuvākaṃ 13 – avabhṛthē karmaṇi ṛjīṣaprōkṣaṇamantrāḥ
yattē̠ grāv.ṇṇā̍ chichChi̠du-ssō̍ma rājann ।
pri̠yāṇyaṅgā̍ni̠ svadhi̍tā̠ parūgṃ̍ṣi । tathsandha̠-thsvājyē̍nō̠ta va̍rdhayasva ।
a̠nā̠gasō̠ adha̠mithsa̠kṣaṃyē̍ma ॥ yattē̠ grāvā̍ bā̠huchyu̍tō̠ achu̍chyavuḥ ।
narō̠ yattē̍ dudu̠hu rdakṣi̍ṇēna ।
tatta̠ āpyā̍yatā̠-ntattē̎ । niṣṭyā̍yatā-ndēva
sōma ॥ yattē̠ tvacha̍-mbibhi̠duryachcha̠ yōni̎m ।
yadā̠sthānā̠-tprachyu̍tō̠ vēna̍si̠ tmanā̎ ॥ 122 ॥

tvayā̠ tathsō̍ma gu̠ptama̍stu naḥ ।
sā na̍-ssa̠dhāṃ-‘sa̍tpara̠mē vyō̍mann ॥
ahā̠chCharī̍ra̠-mpaya̍sā sa̠mētya̍ । a̠nyō̎-‘nyō bhavati̠ varṇō̍ asya । tasmi̍n va̠yamupa̍hūtā̠stava̍ smaḥ । ā nō̍ bhaja̠ sada̍si vi̠śvarū̍pē ॥
nṛ̠chakṣā̠-ssōma̍ u̠ta śu̠śruga̍stu ।
mā nō̠ vihā̍sī̠dgira̍ āvṛṇā̠naḥ ।
anā̍gā-sta̠nuvō̍ vāvṛdhā̠naḥ ।
ā nō̍ rū̠paṃ va̍hatu̠ jāya̍mānaḥ ॥ 123 ॥

upa̍kṣaranti ju̠hvō̍ ghṛ̠tēna̍ । pri̠yāṇyaṅgā̍ni̠ tava̍ va̠rdhaya̍ntīḥ । tasmai̍ tē sōma̠ nama̠ idvaṣa̍ṭcha । upa̍ mā rājan-thsukṛ̠tē hva̍yasva ॥
sa-mprā̍ṇāpā̠nābhyā̠gṃ̠ samu̠ chakṣu̍ṣā̠ tvam । sagg​ śrōtrē̍ṇa gachChasva sōma rājann ।
yatta̠ āsthi̍ta̠gṃ̠ śamu̠ tattē̍ astu । jā̠nī̠tānna̍-ssa̠gamma̍nē pathī̠nām ॥ ē̠ta-ñjā̍nītātpara̠mē vyō̍mann । vṛkā̎-ssadhasthā vi̠da rū̠pama̍sya ॥ 124 ॥

yadā̠gachChā̎-tpa̠thibhi̍ rdēva̠yānai̎ḥ । i̠ṣṭā̠pū̠rtē kṛ̍ṇutā-dā̠vira̍smai ॥
ari̍ṣṭō rājannaga̠daḥ parē̍hi । nama̍stē astu̠ chakṣa̍sē raghūya̠tē । nāka̠mārō̍ha sa̠ha yaja̍mānēna । sūrya̍-ṅgachChatātpara̠mē vyō̍mann ॥
abhū̎ddē̠va-ssa̍vi̠tā vandyō̠ nu na̍ḥ । i̠dānī̠mahna̍ upa̠vāchyō̠ nṛbhi̍ḥ ।
vi yō ratnā̠ bhaja̍ti māna̠vēbhya̍ḥ । śrēṣṭha̍-nnō̠ atra̠ dravi̍ṇa̠ṃ yathā̠ dadha̍t ॥
upa̍ nō mitrāvaruṇā-vi̠hāva̍tam । a̠nvādī̎ddhyā-thāmi̠ha na̍-ssakhāyā । ā̠di̠tyānā̠-mprasi̍tir-hē̠tiḥ । u̠grā śa̠tāpā̎ṣṭhā gha̠viṣā̠ pari̍ṇō vṛṇaktu ॥
ā pyā̍yasva̠ same̍tu tē vi̠śvata̍-ssōma̠ vṛṣṇi̍yam । bhavā̠ vāja̍sya saṅga̠thē ॥ sa-ntē̠ payāgṃ̍si̠ samu̍ yantu̠ vājā̠-ssaṃ vṛṣṇi̍yā-nyabhimāti̠ṣāha̍ḥ । ā̠pyāya̍mānō a̠mṛtā̍ya sōma di̠vi śravāg̍syutta̠māni̍ dhiṣva ॥ ॥ 125 ॥
(tmanā̠ – jāya̍mānō – ‘sya̠ – dadha̠-tpañcha̍ cha) (a. 13)

anuvākaṃ 14 – avabhṛthē karmaṇi sēchanādimantrāḥ
yaddi̍dī̠kṣē mana̍sā̠ yachcha̍ vā̠chā । yadvā̎ prā̠ṇaiśchakṣu̍ṣā̠ yachcha̠ śrōtrē̍ṇa ।
yadrēta̍sā mithu̠nēnā-pyā̠tmanā̎ ।
a̠dbhyō lō̠kā da̍dhi̠rē tēja̍ indri̠yam ।
śu̠krā dī̠kṣāyai̠ tapa̍sō vi̠mōcha̍nīḥ ।
āpō̍ vimō̠ktrī rmayi̠ tēja̍ indri̠yam ॥
yadṛ̠chā sāmnā̠ yaju̍ṣā । pa̠śū̠nā-ñcharma̍n. ha̠viṣā̍ didī̠kṣē ।
yachChandō̍bhi̠-rōṣa̍dhībhi̠-rvana̠spatau̎ ।
a̠dbhyō lō̠kā da̍dhi̠rē (da̍dhirē̠) tēja̍ indri̠yam ॥ 126 ॥

śu̠krā dī̠kṣāyai̠ tapa̍sō vi̠mōcha̍nīḥ ।
āpō̍ vimō̠ktrī rmayi̠ tēja̍ indri̠yam ॥
yēna̠ brahma̠ yēna̍ kṣa̠tram । yēnē̎mdrā̠gnī pra̠jāpa̍ti̠-ssōmō̠ varu̍ṇō̠ yēna̠ rājā̎ ।
viśvē̍ dē̠vā ṛṣa̍yō̠ yēna̍ prā̠ṇāḥ ।
a̠dbhyō lō̠kā da̍dhirē̠ tēja̍ indri̠yam ।
śu̠krā dī̠kṣāyai̠ tapa̍sō vi̠mōcha̍nīḥ ।
āpō̍ vimō̠ktrī rmayi̠ tēja̍ indri̠yam ॥
a̠pā-mpuṣpa̍ma̠syō-ṣa̍dhīnā̠gṃ̠ rasa̍ḥ । sōma̍sya pri̠ya-ndhāma̍ ॥ 127 ॥

a̠gnēḥ pri̠yata̍magṃ ha̠vi-ssvāhā̎ ॥ a̠pā-mpuṣpa̍-ma̠syōṣa̍dhīnā̠gṃ̠ rasa̍ḥ ।
sōma̍sya pri̠ya-ndhāma̍ । indra̍sya pri̠yata̍magṃ ha̠vi-ssvāhā̎ । a̠pā-mpuṣpa̍ma̠syō-ṣa̍dhīnā̠gṃ̠ rasa̍ḥ । sōma̍sya pri̠ya-ndhāma̍ ।
viśvē̍ṣā-ndē̠vānā̎-mpri̠yata̍magṃ ha̠vi-ssvāhā̎ ॥ va̠yagṃ sō̍ma vra̠tē tava̍ ।
mana̍sta̠nūṣu̠ pipra̍taḥ । pra̠jāva̍ntō aśīmahi ॥ 128 ॥

dē̠vēbhya̍ḥ pi̠tṛbhya̠-ssvāhā̎ । sō̠myēbhya̍ḥ pi̠tṛbhya̠-ssvāhā̎ । ka̠vyēbhya̍ḥ pi̠tṛbhya̠-ssvāhā̎ ॥ dēvā̍sa i̠ha mā̍dayaddhvam ।
sōmyā̍sa i̠ha mā̍dayaddhvam । kavyā̍sa i̠ha mā̍dayaddhvam ॥ ana̍ntaritāḥ pi̠tara̍-ssō̠myā-ssō̍mapī̠thāt ॥ apai̍tu mṛ̠tyura̠mṛta̍-nna̠ āgann̍ । vai̠va̠sva̠tō nō̠ abha̍ya-ṅkṛṇōtu ।
pa̠rṇaṃ vana̠spatē̍riva ॥ 129 ॥

a̠bhi na̍-śśīyatāgṃ ra̠yiḥ । sacha̍tā-nna̠-śśachī̠pati̍ḥ ॥ para̍-mmṛtyō̠ anu̠parē̍hi̠ panthā̎m । yastē̠ sva ita̍rō dēva̠yānā̎t । chakṣu̍ṣmatē śṛṇva̠tē tē̎ bravīmi । mā na̍ḥ pra̠jāgṃ rī̍riṣō̠ mōta vī̠rān ॥ i̠damū̠ nu śrēyō̍-‘va̠sāna̠-māga̍nma । yadgō̠ji-ddha̍na̠ji-da̍śva̠jidyat ।
pa̠rṇaṃ vana̠spatē̍riva । a̠bhi na̍-śśīyatāgṃ ra̠yiḥ । sacha̍tā-nna̠-śśachī̠pati̍ḥ ॥ 130 ॥
(vana̠spatā̍va̠dbhyō lō̠kā da̍dhirē̠ tēja̍ indri̠ya-ndhāmā̍ – śīmahī – vā̠ – bhi na̍-śśīyatāgṃ ra̠yirēka̍-ñcha) (a. 14)

(sarvā̠n̠. – ya-dviṣṣa̍ṇṇēna̠ – vi vai – yāḥ pu̠rastā̠-d- dēvā̍ dē̠vēṣu̠ – pari̍staṇita̠ – sakṣē̠daṃ – ँyada̠sya pā̠rē̍ – ‘nā̠gasa̠ – uda̍stā-mphsī̠-d- brahma̍ prati̠ṣṭhā – ya-ddē̍va̠ – yattē̠ grāva.ṇṇā̠ – ya-ddi̍dī̠kṣē chatu̍rdaśa)

(sarvā̠n – bhūti̍mē̠va – yāmē̠vāphsvāhu̍tim – ँvra̠tānā̎m – parṇava̠lkaḥ – sō̠myānā̍ – ma̠smin. ya̠jñē – ‘gnē̠ yō nō̠ – jyōgjī̠vāḥ – pa̠rōra̍jāstē̠ – pra tē̍ ma̠hē – brahma̍ prati̠ṣṭhā – gār​ha̍patyā stri̠gṃ̠śadu̍ttaraśa̠taṃ)

(sarvā̠n̠. vai – śachī̠pati̍ḥ)

॥ hari̍ḥ ōm ॥
॥ kṛṣṇa yajurvēdīya taittirīya brāhmaṇē tṛtīyāṣṭakē saptamaḥ prapāṭhaka-ssamāptaḥ ॥