KYTB 3.2 Darsha Purnamasa Ishti Brahmanam – Krishna Yajurveda Taittiriya Brahmana Patha – Trutiyasyamito Divi

kṛṣṇa yajurvēdīya taittirīya brāhmaṇē tṛtīyāṣṭakē dvitīyaḥ prapāṭhakaḥ – daśapūrṇamāsēṣṭibrāhmaṇam

ō-nnamaḥ paramātmanē, śrī mahāgaṇapatayē namaḥ,
śrī gurubhyō namaḥ । ha̠ri̠ḥ ōm ॥

anuvākaṃ 1 – vathsāpākaraṇam

tṛ̠tīya̍syāmi̠tō di̠vi sōma̍ āsīt । ta-ṅgā̍ya̠tryāha̍rat ।
tasya̍ pa̠rṇama̍chChidyata । ta-tpa̠rṇō̍-‘bhavat । ta-tpa̠rṇasya̍ parṇa̠tvam । brahma̠ vai pa̠rṇaḥ । ya-tpa̍rṇaśā̠khayā̍ va̠thsāna̍pāka̠rōti̍ ।
brahma̍ṇai̠vainā̍na̠pāka̍rōti ॥ gā̠ya̠trō vai pa̠rṇaḥ । gā̠ya̠trāḥ pa̠śava̍ḥ ॥ 1 ॥

tasmā̠-ttrīṇi̍trīṇi pa̠rṇasya̍ palā̠śāni̍ । tri̠padā̍ gāya̠trī । ya-tpa̍rṇaśā̠khayā̠ gāḥ prā̠rpaya̍ti । svayai̠vainā̍ dē̠vata̍yā̠ prārpa̍yati । ya-ṅkā̠mayē̍tā pa̠śu-ssyā̠diti̍ । a̠pa̠rṇā-ntasmai̠ śuṣkā̎grā̠māha̍rēt ।
a̠pa̠śurē̠va bha̍vati । ya-ṅkā̠mayē̍ta paśu̠mān-thsyā̠diti̍ । ba̠hu̠pa̠rṇā-ntasmai̍ bahuśā̠khāmāha̍rēt । pa̠śu̠manta̍-mē̠vaina̍-ṅkarōti ॥ 2 ॥

ya-tprāchī̍mā̠harē̎t । dē̠va̠lō̠ka-ma̠bhija̍yēt । yadudī̍chī-mmanuṣyalō̠kam । prāchī̠mudī̍chī̠māha̍rati । u̠bhayō̎-rlō̠kayō̍-ra̠bhiji̍tyai ॥ i̠ṣē tvō̠rjē tvētyā̍ha । iṣa̍mē̠vōrja̠ṃ yaja̍mānē dadhāti ॥
vā̠yava̠-ssthētyā̍ha । vā̠yurvā a̠ntari̍kṣa̠-syāddhya̍kṣāḥ ।
a̠nta̠ri̠kṣa̠dē̠va̠tyā̎ḥ khalu̠ vai pa̠śava̍ḥ ॥ 3 ॥

vā̠yava̍ ē̠vainā̠-npari̍ dadāti । pra vā ē̍nānē̠tadā-ka̍rōti । yadāha̍ । vā̠yava̠-ssthētyu̍pā̠yava̠ḥ
sthētyā̍ha । yaja̍mānāyai̠va pa̠śūnupa̍hvayatē ॥
dē̠vō va̍-ssavi̠tā prārpa̍ya̠tvityā̍ha̠ prasū̎tyai ॥ śrēṣṭha̍tamāya̠ karma̍ṇa̠ ityā̍ha ।
ya̠jñō hi śrēṣṭha̍tama̠-ṅkarma̍ । tasmā̍dē̠vamā̍ha ॥
āpyā̍yaddhvamaghniyā dēvabhā̠gamityā̍ha ॥ 4 ॥

va̠thsēbhya̍ścha̠ vā ē̠tāḥ pu̠rā ma̍nu̠ṣyē̎bhya̠-śchāpyā̍yanta । dē̠vēbhya̍ ē̠vainā̠ indrā̠yāpyā̍yayati ॥ ūrja̍svatī̠ḥ paya̍svatī̠rityā̍ha । ūrja̠gṃ ̠hi paya̍-ssa̠mbhara̍nti ॥ pra̠jāva̍tī-ranamī̠vā a̍ya̠kṣmā ityā̍ha̠ prajā̎tyai । māva̍-sstē̠na ī̍śata̠ mā-‘ghaśagṃ̍sa̠ ityā̍ha̠ guptyai̎ ॥ ru̠drasya̍ hē̠tiḥ pari̍ vō vṛṇa̠ktvityā̍ha । ru̠drā dē̠vainā̎-strāyatē ॥
dhru̠vā a̠smi-ngōpa̍tau syāta ba̠hvīrityā̍ha ।
dhru̠vā ē̠vāsmi̍-nba̠hvīḥ ka̍rōti ॥ 5 ॥

yaja̍mānasya pa̠śū-npā̠hītyā̍ha । pa̠śū̠nā-ṅgō̍pī̠thāya̍ । tasmā̎thsā̠ya-mpa̠śava̠ upa̍ sa̠māva̍rtantē ॥ ana̍dha-ssādayati । garbhā̍ṇā̠-ndhṛtyā̠ apra̍pādāya । tasmā̠dgarbhā̎ḥ pra̠jānā̠mapra̍pādukāḥ ।
u̠parī̍va̠ nida̍dhāti । u̠parī̍va̠ hi su̍va̠rgō lō̠kaḥ ।
su̠va̠rgasya̍ lō̠kasya̠ sama̍ṣṭyai ॥ 6 ॥
(pa̠śava̍ḥ – karōti – pa̠śavō̍ – dēvabhā̠gamityā̍ha – karōti̠ – +nava̍ cha) (a. 1)

anuvākaṃ 2 – bar​hirāharaṇam
dē̠vasya̍ tvā savi̠tuḥ pra̍sa̠va itya̍śvapa̠r̠śumāda̍ttē̠ prasū̎tyai ।
a̠śvinō̎-rbā̠hubhyā̠mityā̍ha ।
a̠śvinau̠ hi dē̠vānā̍maddhva̠ryū āstā̎m ।
pū̠ṣṇō hastā̎bhyā̠mityā̍ha̠ yatyai̎ ॥ yō vā ōṣa̍dhīḥ parva̠śō vēda̍ । nainā̠-ssa hi̍nasti । pra̠jāpa̍ti̠rvā ōṣa̍dhīḥ parva̠śō vē̍da । sa ē̍nā̠ na hi̍nasti । a̠śva̠pa̠r​śvā ba̠r̠hirachChai̍ti ।
prā̠jā̠pa̠tyō vā aśva̍-ssayōni̠tvāya̍ ॥ 7 ॥

ōṣa̍dhīnā̠mahigṃ̍sāyai ॥
ya̠jñasya̍ ghō̠ṣada̠sītyā̍ha ।
yaja̍māna ē̠va ra̠yi-nda̍dhāti । pratyu̍ṣṭa̠gṃ̠ rakṣa̠ḥ pratyu̍ṣṭā̠ arā̍taya̠ ityā̍ha ।
rakṣa̍sā̠-mapa̍hatyai ॥ prēyama̍gāddhi̠ṣaṇā̍ ba̠r̠hirachChētyā̍ha । vi̠dyā vai dhi̠ṣaṇā̎ । vi̠dyayai̠vaina̠dachChai̍ti ॥ manu̍nā kṛ̠tā sva̠dhayā̠ vita̠ṣṭētyā̍ha । mā̠na̠vī hi par​śu̍-ssva̠dhākṛ̍tā ॥ 8 ॥

ta āva̍hanti ka̠vaya̍ḥ pu̠rastā̠dityā̍ha । śu̠śru̠vāgṃsō̠ vai ka̠vaya̍ḥ । ya̠jñaḥ pu̠rastā̎t । mu̠kha̠ta ē̠va ya̠jñamāra̍bhatē । athō̠ yadē̠tadu̠ktvā yata̠ḥ kuta̍śchā̠hara̍ti । ta-tprāchyā̍ ē̠va di̠śō bha̍vati ॥
dē̠vēbhyō̠ juṣṭa̍mi̠ha ba̠r̠hirā̠sada̠ ityā̍ha । ba̠r̠hiṣa̠-ssamṛ̍ddhyai । karma̠ṇō-‘na̍parādhāya ॥ dē̠vānā̎-mpariṣū̠tama̠sītyā̍ha ॥ 9 ॥

yadvā i̠da-ṅki-ñcha̍ । ta-ddē̠vānā̎-mpariṣū̠tam ।
athō̠ yathā̠ vasya̍sē prati̠ prōchyāhē̠da-ṅka̍riṣyā̠mīti̍ । ē̠vamē̠va tada̍ddhva̠ryu-rdē̠vēbhya̍ḥ prati̠ prōchya̍ ba̠r̠hirdā̍ti । ā̠tmanō-‘higṃ̍sāyai ॥ yāva̍ta-ssta̠mbā-npa̍ri di̠śēt । yattēṣā̍-muchChi̠gg̠ṣyāt । ati̠ ta-dya̠jñasya̍ rēchayēt । ēkagg̍ sta̠mba-mpari̍diśēt ।
tagṃ sarva̍-ndāyāt ॥ 10 ॥

ya̠jñasyāna̍tirēkāya ॥ va̠r̠ṣavṛ̍ddha-ma̠sītyā̍ha ।
va̠r̠ṣa vṛ̍ddhā̠ vā ōṣa̍dhayaḥ ॥
dēva̍ bar​hi̠rityā̍ha । dē̠vēbhya̍ ē̠vaina̍-tkarōti ।
mā tvā̠-‘nvammā ti̠ryagityā̠hā higṃ̍sāyai ।
parva̍ tē rāddhyāsa̠mityā̠-hardhyai̎ ॥
ā̠chChē̠ttā tē̠ mā ri̍ṣa̠mityā̍ha । nāsyā̠tmanō̍ mīyatē ।
ya ē̠vaṃ vēda̍ ॥ 11 ॥

dēva̍bar​hi-śśa̠tava̍l​śa̠ṃ virō̠hētyā̍ha । pra̠jā vai ba̠r̠hiḥ । pra̠jānā̎-mpra̠jana̍nāya ॥ sa̠hasra̍val​śā̠ vi va̠yagṃ ru̍hē̠mētyā̍ha । ā̠śiṣa̍mē̠vaitāmāśā̎stē ॥ pṛ̠thi̠vyā-ssa̠pṛñcha̍ḥ pā̠hītyā̍ha̠ prati̍ṣṭhityai ॥
ayu̍ṅgāyuṅgā-nmu̠ṣṭīn ँlu̍nōti । mi̠thu̠na̠tvāya̠ prajā̎tyai ॥ su̠sa̠bhṛntā̎ tvā̠ sambha̍rā̠mītyā̍ha । brahma̍ṇai̠vaina̠th- sambha̍rati ॥ 12 ॥

adi̍tyai̠ rāsnā̠-‘sītyā̍ha । i̠yaṃ vā adi̍tiḥ ।
a̠syā ē̠vaina̠-drāsnā̎-ṅkarōti ॥ i̠ndrā̠ṇyai sa̠naṃha̍na̠mityā̍ha । i̠ndrā̠ṇī vā agrē̍ dē̠vatā̍nā̠gṃ̠ sama̍nahyata । sā ”rdhnō̎t ।
ṛddhyai̠ sanna̍hyati । pra̠jā vai ba̠r̠hiḥ ।
pra̠jānā̠mapa̍rāvāpāya ।
tasmā̠-thsnāva̍santatāḥ pra̠jā jā̍yantē ॥ 13 ॥

pū̠ṣā tē̎ gra̠nthi-ṅgra̍thnā̠tvityā̍ha ।
puṣṭi̍mē̠va yaja̍mānē dadhāti ॥ sa tē̠ mā-” sthā̠dityā̠hāhigṃ̍sāyai ॥ pa̠śchā-tprāñcha̠mupa̍gūhati ।
pa̠śchā-dvai prā̠chīna̠gṃ̠ rētō̍ dhīyatē ।
pa̠śchādē̠vāsmai̎ prā̠chīna̠gṃ̠ rētō̍ dadhāti ॥
indra̍sya tvā bā̠hubhyā̠-mudya̍chCha̠ ityā̍ha । i̠ndri̠yamē̠va yaja̍mānē dadhāti ॥
bṛha̠spatē̎rmū̠rdhnā ha̍rā̠mītyā̍ha ।
brahma̠ vai dē̠vānā̠-mbṛha̠spati̍ḥ ॥ 14 ॥

brahma̍ṇai̠vaina̍ddharati ॥ u̠rva̍ntari̍kṣa̠-manvi̠hītyā̍ha̠ gatyai̎ ॥ dē̠va̠ga̠mmama̠sītyā̍ha । dē̠vānē̠vaina̍dgamayati ॥ ana̍dha-ssādayati ।
garbhā̍ṇā̠-ndhṛtyā̠ apra̍pādāya । tasmā̠-dgarbhā̎ḥ pra̠jānā̠mapra̍pādukāḥ । u̠parī̍va̠ nida̍dhāti । u̠parī̍va̠ hi su̍va̠rgō lō̠kaḥ ।
su̠va̠rgasya̍ lō̠kasya̠ sama̍ṣṭyai ॥ 15 ॥
(sa̠yō̠ni̠tvāya̍ – sva̠dhākṛ̍tā̠ – ‘sītyā̍ha – dāyā̠-d- vēda̍ – bharati – jāyantē̠ – bṛha̠spati̠ḥ – sama̍ṣṭyai) (a. 2)

anuvākaṃ 3 – dōhanam
pū̠rvē̠dyuri̠ddhmā ba̠r̠hiḥ ka̍rōti । ya̠jñamē̠vārabhya̍ gṛhī̠tvōpa̍vasati ॥ pra̠jāpa̍ti-rya̠jñama̍sṛjata । tasyō̠khē a̍sragṃsētām । ya̠jñō vai pra̠jāpa̍tiḥ ।
ya-thsā̎nnāyyō̠khē bhava̍taḥ ।
ya̠jñasyai̠va tadu̠khē upa̍dadhā̠tya-pra̍sragṃsāya ॥
śundha̍ddhva̠-ndaivyā̍ya̠ karma̍ṇē dēvaya̠jyāyā̠ ityā̍ha । dē̠va̠ya̠jyāyā̍ ē̠vainā̍ni śundhati ॥ mā̠ta̠riśva̍nō gha̠rmō̍-‘sītyā̍ha ॥ 16 ॥

a̠ntari̍kṣa̠ṃ vai mā̍ta̠riśva̍nō gha̠rmaḥ ।
ē̠ṣāṃ lō̠kānā̠ṃ vidhṛ̍tyai ॥
dyaura̍si pṛthi̠vya̍sītyā̍ha । di̠vaścha̠ hyē̍ṣā pṛ̍thi̠vyāścha̠ sambhṛ̍tā । yadu̠khā ।
tasmā̍dē̠vamā̍ha ॥ vi̠śvadhā̍yā asi para̠mēṇa̠ dhāmnētyā̍ha । vṛṣṭi̠rvai vi̠śvadhā̍yāḥ । vṛṣṭi̍mē̠vāva̍rundhē । dṛgṃha̍sva̠ mā hvā̠rityā̍ha̠ dhṛtyai̎ ॥ 17 ॥

vasū̍nā-mpa̠vitra̍ma̠sītyā̍ha । prā̠ṇā vai vasa̍vaḥ ।
tēṣā̠ṃ vā ē̠ta-dbhā̍ga̠dhēya̎m । ya-tpa̠vitra̎m । tēbhya̍ ē̠vaina̍-tkarōti ॥ śa̠tadhā̍ragṃ sa̠hasra̍dhāra̠mityā̍ha । prā̠ṇēṣvē̠vāyu̍-rdadhāti sarva̠tvāya̍ ॥ tri̠vṛ-tpa̍lāśaśā̠khāyā̎-ndarbha̠maya̍-mbhavati । tri̠vṛdvai prā̠ṇaḥ । tri̠vṛta̍mē̠va prā̠ṇa-mma̍ddhya̠tō yaja̍mānē dadhāti ॥ 18 ॥

sau̠myaḥ pa̠rṇa-ssa̍yōni̠tvāya̍ । sā̠kṣā-tpa̠vitra̍-nda̠rbhāḥ । prākhsā̠yamadhi̠ nida̍dhāti । ta-tprā̍ṇāpā̠nayō̍ rū̠pam । ti̠ryakprā̠taḥ । ta-ddar​śa̍sya rū̠pam । dā̠r​śyagg​ hyē̍tadaha̍ḥ । anna̠ṃ vai cha̠ndramā̎ḥ ।
anna̍-mprā̠ṇāḥ । u̠bhaya̍mē̠vōpai̠tyajā̍mitvāya ॥ 19 ॥

tasmā̍da̠yagṃ sa̠rvata̍ḥ pavatē ॥ hu̠ta-sstō̠kō hu̠tō dra̠phsa ityā̍ha̠ prati̍ṣṭhityai । ha̠viṣō-‘ska̍ndāya ।
na hi hu̠tagg​ svāhā̍kṛta̠gg̠ skanda̍ti ।
di̠vi nākō̠ nāmā̠gniḥ । tasya̍ vi̠pruṣō̍ bhāga̠dhēya̎m ।
a̠gnayē̍ bṛha̠tē nākā̠yētyā̍ha ।
nāka̍mē̠vāgni-mbhā̍ga̠dhēyē̍na̠ sama̍rdhayati ।
svāhā̠ dyāvā̍pṛthi̠vībhyā̠mityā̍ha ।
dyāvā̍pṛthi̠vyōrē̠vaina̠t-prati̍ṣṭhāpayati ॥ 20 ॥

pa̠vitra̍va̠tyāna̍yati । a̠pā-ñchai̠vauṣa̍dhīnā-ñcha̠ rasa̠gṃ̠ sagṃsṛ̍jati । athō̠ ōṣa̍dhīṣvē̠va pa̠śū-nprati̍ṣṭhāpayati ॥ a̠nvā̠rabhya̠ vācha̍ṃ yachChati ।
ya̠jñasya̠ dhṛtyai̎ । dhā̠raya̍nnāstē । dhā̠raya̍nta iva̠ hi du̠hanti̍ । kāma̍dhukṣa̠ ityā̠hātṛ̠tīya̍syai । traya̍ i̠mē lō̠kāḥ । i̠mānē̠va lō̠kān. yaja̍mānō duhē ॥ 21 ॥

a̠mūmiti̠ nāma̍ gṛhṇāti । bha̠dramē̠vāsā̠-ṅkarmā̠viṣka̍rōti ॥ sā vi̠śvāyu̠-ssā vi̠śvavya̍chā̠-ssā vi̠śvaka̠rmētyā̍ha । i̠yaṃ vai vi̠śvāyu̍ḥ ।
a̠ntari̍kṣaṃ vi̠śvavya̍chāḥ । a̠sau vi̠śvaka̍rmā ।
i̠mānē̠vaitābhi̍rlō̠kān. ya̍thāpū̠rva-ndu̍hē ।
athō̠ yathā̎ pradā̠trē puṇya̍mā̠śāstē̎ । ē̠vamē̠vainā̍ ē̠tadupa̍stauti । tasmā̠t-prādā̠dityu̠nnīya̠ vanda̍mānā upastu̠vanta̍ḥ pa̠śū-ndu̍hanti ॥ 22 ॥

ba̠hu du̠gdhīndrā̍ya dē̠vēbhyō̍ ha̠viriti̠ vācha̠ṃ visṛ̍jatē । ya̠thā̠ dē̠va̠tamē̠va prasau̍ti ।
daivya̍sya cha mānu̠ṣasya̍ cha̠ vyāvṛ̍ttyai ।
trirā̍ha । triṣa̍tyā̠ hi dē̠vāḥ । avā̍chaṃ ya̠mō-‘na̍nvā-ra̠bhyōtta̍rāḥ । apa̍rimitamē̠vāva̍rundhē ॥
na dā̍rupā̠trēṇa̍ duhyāt । a̠gni̠vadvai dā̍rupā̠tram ।
ya-ddā̍rupā̠trēṇa̍ du̠hyāt ॥ 23 ॥

yā̠tayā̎mnā ha̠viṣā̍ yajēta । athō̠ khalvā̍huḥ ।
pu̠rō̠ḍāśa̍mukhāni̠ vai ha̠vīgṃṣi̍ । nēta i̍taḥ purō̠ḍāśagṃ̍ ha̠viṣō̠ yāmō̠-‘stīti̍ ।
kāma̍mē̠va dā̍rupā̠trēṇa̍ duhyāt ॥ śū̠dra ē̠va na du̍hyāt । asa̍tō̠ vā ē̠ṣa sambhū̍taḥ । yachChū̠draḥ । aha̍virē̠va tadityā̍huḥ । yachChū̠drō dōgdhīti̍ ॥ 24 ॥

a̠gni̠hō̠tramē̠vana du̍hyāchChū̠draḥ । taddhi nōt-pu̠nanti̍ । ya̠dā khalu̠ vai pa̠vitra̍ma̠tyēti̍ । atha̠ taddha̠viriti̍ ॥
sampṛ̍chyaddhva-mṛtāvarī̠rityā̍ha । a̠pā-ñchai̠vauṣa̍dhīnā-ñcha̠ rasa̠gṃ̠ sagṃsṛ̍jati ।
tasmā̍da̠pā-ñchauṣa̍dhīnā-ñcha̠ rasa̠mupa̍ jīvāmaḥ ।
ma̠ndrā dhana̍sya sā̠taya̠ ityā̍ha । puṣṭi̍mē̠va yaja̍mānē dadhāti ॥ sōmē̍na̠ tvā-”ta̍na̠chmīndrā̍ya̠ dadhītyā̍ha ॥ 25 ॥

sōma̍mē̠vaina̍-tkarōti । yō vai sōma̍-mbhakṣayi̠tvā ।
sa̠ṃva̠thsa̠ragṃ sōma̠-nna piba̍ti । pu̠na̠rbhakṣyō̎-‘sya sōmapī̠thō bha̍vati ॥
sōma̠ḥ khalu̠ vai sā̎nāṃ̠yyam । ya ē̠vaṃ vi̠dvān-thsā̎nāṃ̠yya-mpiba̍ti । a̠pu̠na̠rbhakṣyō̎-‘sya sōmapī̠thō bha̍vati । na mṛ̠nmayē̠nāpi̍daddhyāt ।
ya-nmṛ̠nmayē̍nāpida̠ddhyāt ।
pi̠tṛ̠dē̠va̠tyagg̍ syāt ॥ 26 ॥
a̠ya̠spā̠trēṇa̍ vā dārupā̠trēṇa̠ vā-‘pi̍dadhāti ।
taddhi sadē̍vam ॥ u̠da̠nvad- bha̍vati । āpō̠ vai ra̍kṣō̠ghnīḥ । rakṣa̍sā̠-mapa̍hatyai ॥
ada̍stamasi̠ viṣṇa̍vē̠ tvētyā̍ha । ya̠jñō vai viṣṇu̍ḥ ।
ya̠jñāyai̠vaina̠dada̍sta-ṅkarōti । viṣṇō̍ ha̠vyagṃ ra̍kṣa̠svētyā̍ha̠ guptyai̎ ॥ ana̍dha-ssādayati । garbhā̍ṇā̠-ndhṛtyā̠ apra̍pādāya ।
tasmā̠-dgarbhā̎ḥ pra̠jānā̠ma pra̍pādukāḥ । u̠parī̍va̠ nida̍dhāti । u̠parī̍va̠ hi su̍va̠rgō lō̠kaḥ । su̠va̠rgasya̍ lō̠kasya̠ sama̍ṣṭyai ॥ 27 ॥
(a̠sītyā̍ha̠ – dhṛtyai̠ – yaja̍mānē dadhā̠ – tyajā̍mitvāya – sthāpayati – duhē – duhanti – du̠hyā-d- dōgdhīti̠ – dadhītyā̍ha – syāth – sādayati̠ pañcha̍ cha) (a. 3)

anuvākaṃ 4 – havirnirvāpaḥ
karma̍ṇē vā-ndē̠vēbhya̍-śśakēya̠mityā̍ha̠ śaktyai̎ ।
ya̠jñasya̠ vai santa̍ti̠manu̍ pra̠jāḥ pa̠śavō̠ yaja̍mānasya̠ santā̍yantē । ya̠jñasya̠ vichChi̍tti̠manu̍ pra̠jāḥ pa̠śavō̠ yaja̍mānasya̠ vichChi̍dyantē ।
ya̠jñasya̠ santa̍tirasi ya̠jñasya̍ tvā̠ santa̍tyai stṛṇāmi̠ santa̍tyai tvā ya̠jñasyētyāha̍va̠nīyā̠-thsanta̍nōti । yaja̍mānasya pra̠jāyai̍ paśū̠nāgṃ santa̍tyai ॥ a̠paḥ praṇa̍yati । śra̠ddhā vā āpa̍ḥ । śra̠ddhāmē̠vārabhya̍ pra̠ṇīya̠ pracha̍rati । a̠paḥ praṇa̍yati । ya̠jñō vā āpa̍ḥ ॥ 28 ॥

ya̠jñamē̠vārabhya̍ pra̠ṇīya̠ pracha̍rati । a̠paḥ praṇa̍yati । vajrō̠ vā āpa̍ḥ । vajra̍mē̠va bhrātṛ̍vyēbhyaḥ pra̠hṛtya̍ pra̠ṇīya̠ pracha̍rati । a̠paḥ praṇa̍yati ।
āpō̠ vai ra̍kṣō̠ghnīḥ । rakṣa̍sā̠-mapa̍hatyai । a̠paḥ praṇa̍yati । āpō̠ vai dē̠vānā̎-mpri̠ya-ndhāma̍ ।
dē̠vānā̍mē̠va pri̠ya-ndhāma̍ pra̠ṇīya̠ pracha̍rati ॥ 29 ॥

a̠paḥ praṇa̍yati । āpō̠ vai sarvā̍ dē̠vatā̎ḥ ।
dē̠vatā̍ ē̠vārabhya̍ pra̠ṇīya̠ pracha̍rati ॥ vēṣā̍ya̠ tvētyā̍ha । vēṣā̍ya̠ hyē̍nadāda̠ttē ॥ pratyu̍ṣṭa̠gṃ̠ rakṣa̠ḥ pratyu̍ṣṭā̠ arā̍taya̠ ityā̍ha ।
rakṣa̍sā̠-mapa̍hatyai ॥ dhūra̠sītyā̍ha । ē̠ṣa vai dhuryō̠-‘gniḥ । taṃ yadanu̍paspṛśyātī̠yāt ॥ 30 ॥

a̠ddhva̠ryu-ñcha̠ yaja̍māna-ñcha̠ prada̍hēt । u̠pa̠spṛśyātyē̍ti । a̠ddhva̠ryōścha̠ yaja̍mānasya̠ chāpra̍dāhāya ॥ dhūrva̠ taṃyō̎-‘smā-ndhūrva̍ti̠ ta-ndhū̎rva̠ yaṃ va̠ya-ndhūrvā̍ma̠ ityā̍ha ।
dvau vāva puru̍ṣau । ya-ñchai̠va dhūrva̍ti । yaśchai̍na̠-ndhūrva̍ti । tāvu̠bhau śu̠chā-‘rpa̍yati ॥ tva-ndē̠vānā̍masi̠ sasni̍tama̠-mpapri̍tama̠-ñjuṣṭa̍tama̠ṃ vahni̍tama-ndēva̠hūta̍ma̠mityā̍ha । ya̠thā̠ ya̠jurē̠vai tat ॥ 31 ॥

ahru̍tamasi havi̠rdhāna̠-mityā̠hānā̎rtyai ।
dṛgṃha̍sva̠ mā hvā̠rityā̍ha̠ dhṛtyai̎ ॥
mi̠trasya̍ tvā̠ chakṣu̍ṣā̠ prēkṣa̠ ityā̍ha mitra̠tvāya̍ ।
mā bhērmā saṃvi̍kthā̠ mā tvā̍ higṃsiṣa̠-mityā̠hāhigṃ̍sāyai । yadvai ki-ñcha̠ vātō̠ nābhi̠vāti̍ ।
ta-thsarva̍ṃ varuṇadēva̠tya̎m ॥ u̠ru vātā̠yētyā̍ha । avā̍ruṇamē̠vaina̍-tkarōti ॥ dē̠vasya̍ tvā savi̠tuḥ

pra̍sa̠va ityā̍ha̠ prasū̎tyai ।
a̠śvinō̎-rbā̠hubhyā̠mityā̍ha ॥ 32 ॥

a̠śvinau̠ hi dē̠vānā̍maddhva̠ryū āstā̎m ।
pū̠ṣṇō hastā̎bhyā̠mityā̍ha̠ yatyai̎ । a̠gnayē̠ juṣṭa̠-nnirva̍pā̠mītyā̍ha । a̠gnaya̍ ē̠vainā̠ñjuṣṭa̠ṃ
nirva̍pati । triryaju̍ṣā । traya̍ i̠mē lō̠kāḥ ।
ē̠ṣāṃ lō̠kānā̠māptyai̎ । tū̠ṣṇī-ñcha̍tu̠rtham ।
apa̍rimitamē̠vāva̍rundhē । sa ē̠vamē̠vānu̍pū̠rvagṃ ha̠vīgṃṣi̠ nirva̍pati ॥ 33 ॥

i̠da-ndē̠vānā̍mi̠damu̍ na-ssa̠hētyā̍ha̠ vyāvṛ̍ttyai ॥
sphā̠tyai tvā̠ nārā̎tyā̠ ityā̍ha̠ guptyai̎ । tama̍sīva̠ vā ē̠ṣō̎-‘ntaścha̍rati । yaḥ pa̍rī̠ṇahi̍ ॥ suva̍ra̠bhi vikhyē̍ṣaṃ vaiśvāna̠ra-ñjyōti̠rityā̍ha ।
suva̍rē̠vābhi vi pa̍śyati vaiśvāna̠ra-ñjyōti̍ḥ ।
dyāvā̍pṛthi̠vī ha̠viṣi̍ gṛhī̠ta uda̍vēpētām ॥
dṛgṃha̍ntā̠-nduryā̠ dyāvā̍pṛthi̠vyōrityā̍ha ।
gṛ̠hāṇā̠-ndyāvā̍pṛthi̠vyō-rdhṛtyai̎ ॥
u̠rva̍ntari̍kṣa̠-manvi̠hītyā̍ha̠ gatyai̎ ॥
adi̍tyāstvō̠pasthē̍ sādayā̠mītyā̍ha । i̠yaṃ vā adi̍tiḥ । a̠syā ē̠vaina̍du̠pasthē̍ sādayati ॥
agnē̍ ha̠vyagṃ ra̍kṣa̠svētyā̍ha̠ guptyai̎ ॥ 34 ॥
(ya̠jñō vā āpō̠ – dhāma̍ pra̠ṇīya̠ pracha̍ra – tyatī̠yā – dē̠ta-d- bā̠hubhyā̠mityā̍ha – ha̠vigṃṣi̠ nirva̍pati̠ – gatyai̍ cha̠tvāri̍ cha) (a. 4)

anuvākaṃ 5 – vrīhyavaghātaḥ
indrō̍ vṛ̠trama̍hann । sō̍-‘paḥ । a̠bhya̍mriyata ।
tāsā̠ṃ yanmēddhya̍ṃ ya̠jñiya̠gṃ̠ sadē̍va̠māsī̎t । tadapōda̍krāmat । tē da̠rbhā a̍bhavann । ya-dda̠rbhaira̠pa u̍tpu̠nāti̍ । yā ē̠va mēddhyā̍ ya̠jñiyā̠-ssadē̍vā̠ āpa̍ḥ । tābhi̍rē̠vainā̠ utpu̍nāti । dvābhyā̠mutpu̍nāti ॥ 35 ॥

dvi̠pā-dyaja̍māna̠ḥ prati̍ṣṭhityai ॥ dē̠vō va̍-ssavi̠tōt-pu̍nā̠tvityā̍ha । sa̠vi̠tṛpra̍sūta ē̠vainā̠ utpu̍nāti । achChi̍drēṇa pa̠vitrē̠ṇētyā̍ha । a̠sau vā ā̍di̠tyō-‘chChi̍dra-mpa̠vitra̎m । tēnai̠vainā̠ utpu̍nāti । vasō̠-ssūrya̍sya ra̠śmibhi̠rityā̍ha । prā̠ṇā vā āpa̍ḥ । prā̠ṇā vasa̍vaḥ । prā̠ṇā ra̠śmaya̍ḥ ॥ 36 ॥

prā̠ṇairē̠va prā̠ṇān-thsampṛ̍ṇakti । sā̠vi̠tri̠yarchā ।
sa̠vi̠tṛpra̍sūta-mmē̠ karmā̍sa̠diti̍ ।
sa̠vi̠tṛpra̍sūtamē̠vāsya̠ karma̍ bhavati ।
pa̠chChō gā̍yatri̠yā tri̍ṣṣamṛddha̠tvāya̍ ॥
āpō̍ dēvīragrēpuvō agrēguva̠ ityā̍ha ।
rū̠pa-mē̠vāsā̍mē̠ta-nma̍hi̠māna̠ṃ vyācha̍ṣṭē ।
agra̍ i̠maṃ ya̠jña-nna̍ya̠tāgrē̍
ya̠jñapa̍ti̠mityā̍ha । agra̍ ē̠va ya̠jña-nna̍yanti ।
agrē̍ ya̠jñapa̍tim ॥ 37 ॥

yu̠ṣmānindrō̍ ‘vṛṇīta vṛtra̠tūyē̍ yū̠yamindra̍mavṛṇīddhvaṃ vṛtra̠tūrya̠ ityā̍ha ।
vṛ̠tragṃ ha̍ hani̠ṣyannindra̠ āpō̍ vavrē ।
āpō̠ hēndra̍ṃ vavrirē । sa̠jñāṃ-mē̠vāsā̍mē̠ta-thsāmā̍na̠ṃ vyācha̍ṣṭē ॥ prōkṣi̍tā̠-ssthētyā̍ha । tēnāpa̠ḥ prōkṣi̍tāḥ ॥ a̠gnayē̍ vō̠ juṣṭa̠-mprōkṣā̎-mya̠gnīṣōmā̎bhyā̠-mityā̍ha ।
ya̠thā̠ dē̠va̠tamē̠vainā̠-nprōkṣa̍ti । triḥ prōkṣa̍ti । tryā̍vṛ̠ddhi ya̠jñaḥ ॥ 38 ॥

athō̠ rakṣa̍sā̠mapa̍hatyai । śundha̍ddhva̠ṃ
daivyā̍ya̠ karma̍ṇē dēvaya̠jyāyā̠ ityā̍ha ।
dē̠va̠ya̠jyāyā̍ ē̠vainā̍ni śundhati । triḥ prōkṣa̍ti । tryā̍vṛ̠ddhi ya̠jñaḥ । athō̍ mēddhya̠tvāya̍ । ava̍dhūta̠gṃ̠ rakṣō-‘va̍dhūtā̠ arā̍taya̠ ityā̍ha ।
rakṣa̍sā̠-mapa̍hatyai । adi̍tyā̠stvaga̠sītyā̍ha । i̠yaṃ vā adi̍tiḥ ॥ 39 ॥

a̠syā ē̠vaina̠-ttvacha̍-ṅkarōti । prati̍ tvā pṛthi̠vī vē̠ttvityā̍ha̠ prati̍ṣṭhityai ॥ pu̠rastā̎-tpratī̠chīna̍grīva̠-mutta̍ralō̠mōpa̍stṛṇāti mēddhya̠tvāya̍ ।
tasmā̎-tpu̠rastā̎-tpra̠tyañcha̍ḥ pa̠śavō̠ mēdha̠mupa̍tiṣṭhantē । tasmā̎-tpra̠jā mṛ̠ga-ṅgrāhu̍kāḥ । ya̠jñō dē̠vēbhyō̠ nilā̍yata ।
kṛṣṇō̍ rū̠pa-ṅkṛ̠tvā । ya-tkṛ̍ṣṇāji̠nē ha̠vira̍ddhyava̠hanti̍ । ya̠jñādē̠va-ta-dya̠jña-mprayu̍ṅktē । ha̠viṣō-‘ska̍ndāya ॥ 40 ॥

a̠dhi̠ṣava̍ṇamasi vānaspa̠tyamityā̍ha । a̠dhi̠ṣava̍ṇa-mē̠vaina̍-tkarōti । prati̠ tvā-‘di̍tyā̠stvagvē̠ttvityā̍ha saya̠tvāya̍ ॥
a̠gnēsta̠nū-ra̠sītyā̍ha । a̠gnērvā ē̠ṣā ta̠nūḥ ।
yadōṣa̍dhayaḥ । vā̠chō vi̠sarja̍na̠mityā̍ha ।
ya̠dā hi pra̠jā ōṣa̍dhīnā-ma̠śnanti̍ । atha̠ vācha̠ṃ visṛ̍jantē । dē̠vavī̍tayē tvā gṛhṇā̠mītyā̍ha ॥ 41 ॥

dē̠vatā̍bhirē̠vaina̠-thsama̍rdhayati ॥
adri̍rasi vānaspa̠tya ityā̍ha । grāvā̍ṇa-mē̠vaina̍-tkarōti ।
sa i̠da-ndē̠vēbhyō̍ ha̠vyagṃ su̠śami̍ śami̠ṣvētyā̍ha̠ śāntyai̎ ॥ havi̍ṣkṛ̠dēhītyā̍ha ।
ya ē̠va dē̠vānāgṃ̍ havi̠ṣkṛta̍ḥ । tān. hva̍yati ।
trir​hva̍yati । triṣa̍tyā̠ hi dē̠vāḥ ॥ iṣa̠mā va̠dōrja̠mā va̠dētyā̍ha ॥ 42 ॥

iṣa̍mē̠vōrja̠ṃ yaja̍mānē dadhāti ।
dyu̠madva̍data va̠yagṃ sa̍ghā̠nta-ñjē̠ṣmētyā̍ha̠ bhrātṛ̍vyābhibhūtyai ॥ manō̎-śśra̠ddhādē̍vasya̠ yaja̍mānasyāsura̠ghnī vāk । ya̠jñā̠yu̠dhēṣu̠ pravi̍ṣṭā-”sīt । tē-‘su̍rā̠ yāva̍ntō yajñāyu̠dhānā̍mu̠dvada̍tā-mu̠pāśṛ̍ṇvann ।
tē parā̍-‘bhavann । tasmā̠-thsvānā̠-mmaddhyē̍-‘va̠sāya̍ yajēta । yāva̍ntō-‘sya̠ bhrātṛ̍vyā yajñāyu̠dhānā̍-mu̠dvada̍tā-mupaśṛ̠ṇvanti̍ । tē parā̍ bhavanti ।
u̠chchai-ssa̠māha̍nta̠vā ā̍ha̠ viji̍tyai ॥ 43 ॥

vṛ̠ṅkta ē̍ṣāmindri̠yaṃ vī̠rya̎m । śrēṣṭha̍ ēṣā-mbhavati ॥ va̠r̠ṣa vṛ̍ddhamasi̠ prati̍ tvā va̠r̠ṣavṛ̍ddhaṃ vē̠ttvityā̍ha ।
va̠r̠ṣavṛ̍ddhā̠ vā ōṣa̍dhayaḥ ।
va̠r̠ṣavṛ̍ddhā i̠ṣīkā̠-ssamṛ̍ddhyai ।
ya̠jñagṃ rakṣā̠g̠syanu̠ prāvi̍śann ।
tānya̠snā pa̠śubhyō̍ ni̠ravā̍dayanta ।
tuṣai̠rōṣa̍dhībhyaḥ ॥ parā̍pūta̠gṃ̠ rakṣa̠ḥ parā̍pūtā̠ arā̍taya̠ ityā̍ha ।
rakṣa̍sā̠mapa̍hatyai ॥ 44 ॥

rakṣa̍sā-mbhā̠gō̍-‘sītyā̍ha । tuṣai̍rē̠va rakṣāgṃ̍si ni̠rava̍dayatē । a̠pa upa̍spṛśati mēddhya̠tvāya̍ । vā̠yurvō̠ vi vi̍na̠ktvityā̍ha । pa̠vitra̠ṃ vai vā̠yuḥ । pu̠nātyē̠vainān̍ । a̠ntari̍kṣādiva̠ vā ē̠tē praska̍ndanti । yē śūrpā̎t । dē̠vō va̍-ssavi̠tā hira̍ṇyapāṇi̠ḥ prati̍gṛhṇā̠tvityā̍ha̠ prati̍ṣṭhityai ।
ha̠viṣō-‘ska̍ndāya । triṣpha̠līka̍rta̠vā ā̍ha । tryā̍vṛ̠ddhi ya̠jñaḥ । athō̍ mēddhya̠tvāya̍ ॥ 45 ॥
(dvābhyā̠mu-tpu̍nāti – ra̠śmayō̍ – naya̠ntyagrē̍ ya̠jñapa̍tiṃ – ँya̠jñō – ‘di̍ti̠ – raska̍ndāya – gṛhṇā̠mītyā̍ha – va̠dētyā̍ha̠ – viji̍tyā̠ – apa̍hatyā̠ – aska̍ndāya̠ trīṇi̍ cha) (a. 5)

anuvākaṃ 6 – taṇḍulapēṣaṇam
ava̍dhūta̠gṃ̠ rakṣō-‘va̍dhūtā̠ arā̍taya̠ ityā̍ha । rakṣa̍sā̠mapa̍hatyai । adi̍tyā̠stvaga̠sītyā̍ha । i̠yaṃ vā adi̍tiḥ । a̠syā ē̠vaina̠-ttvacha̍-ṅkarōti । prati̍ tvā pṛthi̠vī vē̠ttvityā̍ha̠ prati̍ṣṭhityai ।
pu̠rastā̎-tpratī̠chīna̍grīva̠-mutta̍ralō̠mōpa̍stṛṇāti mēddhya̠tvāya̍ । tasmā̎-tpu̠rastā̎-tpra̠tyañcha̍ḥ pa̠śavō̠ mēdha̠mupa̍tiṣṭhantē । tasmā̎-tpra̠jā mṛ̠ga-ṅgrāhu̍kāḥ । ya̠jñō dē̠vēbhyō̠ nilā̍yata ॥ 46 ॥

kṛṣṇō̍ rū̠pa-ṅkṛ̠tvā । ya-tkṛ̍ṣṇāji̠nē ha̠vira̍dhipi̠naṣṭi̍ । ya̠jñādē̠va ta-dya̠jña-mprayu̍ṅktē । ha̠viṣō-‘ska̍ndāya ॥ dyāvā̍pṛthi̠vī sa̠hāstā̎m । tē śa̍myāmā̠tramēka̠maha̠rvyaitāgṃ̍ śamyāmā̠tramēka̠maha̍ḥ ॥ di̠va-sska̍mbha̠nira̍si̠ prati̠ tvā ‘di̍tyā̠stvagvē̠ttvityā̍ha ।
dyāvā̍pṛthi̠vyō-rvītyai̎ । dhi̠ṣaṇā̍-‘si parva̠tyā
prati̍ tvā di̠va-sska̍mbha̠nirvē̠ttvityā̍ha ।
dyāvā̍pṛthi̠vyō-rvidhṛ̍tyai ॥ 47 ॥

dhi̠ṣaṇā̍-‘si pārvatē̠yī prati̍ tvā parva̠tirvē̠ttvityā̍ha । dyāvā̍pṛthi̠vyōrdhṛtyai̎ ॥ dē̠vasya̍ tvā savi̠tuḥ pra̍sa̠va ityā̍ha̠ prasū̎tyai । a̠śvinō̎-rbā̠hubhyā̠mityā̍ha । a̠śvinau̠ hi dē̠vānā̍maddhva̠ryū āstā̎m । pū̠ṣṇō hastā̎bhyā̠mityā̍ha̠ yatyai̎ ।
adhi̍vapā̠mītyā̍ha । ya̠thā̠dē̠va̠ta-mē̠vainā̠nadhi̍ vapati ॥ dhā̠nya̍masi dhinu̠hi dē̠vānityā̍ha । ē̠tasya̠ yaju̍ṣō vī̠ryē̍ṇa ॥ 48 ॥

yāva̠dēkā̍ dē̠vatā̍ kā̠maya̍tē̠ yāva̠dēkā̎ । tāva̠dāhu̍tiḥ prathatē । na hi tadasti̍ । yattāva̍dē̠va syāt । yāva̍jju̠hōti̍ ॥ prā̠ṇāya̍ tvā-‘pā̠nāya̠ tvētyā̍ha । prā̠ṇānē̠va yaja̍mānē dadhāti । dī̠rghāmanu̠ prasi̍ti̠māyu̍ṣē dhā̠mityā̍ha । āyu̍rē̠vāsmi̍-ndadhāti ।
a̠ntari̍kṣādiva̠ vā ē̠tāni̠ praska̍ndanti । yāni̍ dṛ̠ṣada̍ḥ । dē̠vō va̍-ssavi̠tā hira̍ṇyapāṇi̠ḥ prati̍ gṛhṇā̠tvityā̍ha̠ prati̍ṣṭhityai । ha̠viṣō-‘ska̍ndāya ॥
asa̍ṃvapantī pigṃṣā̠ṇūni̍ kurutā̠dityā̍ha mēddhya̠tvāya̍ ॥ 49 ॥
(nilā̍yata̠ – vidhṛ̍tyai – vī̠ryē̍ṇa – skandanti cha̠tvāri̍ cha ) (a. 6)

anuvākaṃ 7 – kapālōpadhānam
dhṛṣṭi̍rasi̠ brahma̍ ya̠chChētyā̍ha̠ dhṛtyai̎ ॥
apā̎gnē̠ ‘gnimā̠māda̍-ñjahi̠ niṣkra̠vyādagṃ̍
sē̠dhā dē̍va̠yaja̍ṃ va̠hētyā̍ha ।
ya ē̠vāmātkra̠vyāt । tama̍pa̠hatya̍ । mēddhyē̠-‘gnau ka̠pāla̠mupa̍dadhāti ॥ nirda̍gdha̠gṃ̠ rakṣō̠ nirda̍gdhā̠ arā̍taya̠ ityā̍ha । rakṣāg̍syē̠va
nirda̍hati । a̠gni̠vatyupa̍dadhāti । a̠sminnē̠va lō̠kē jyōti̍rdhattē । aṅgā̍ra̠madhi̍-vartayati ॥ 50 ॥

a̠ntari̍kṣa ē̠va jyōti̍rdhattē ।
ā̠di̠tyamē̠vāmuṣmi̍n ँlō̠kē jyōti̍rdhattē ।
jyōti̍ṣmantō-‘smā i̠mē lō̠kā bha̍vanti ।
ya ē̠vaṃ vēda̍ ॥ dhru̠vama̍si pṛthi̠vī-ndṛ̠gṃ̠hētyā̍ha । pṛ̠thi̠vīmē̠vaitēna̍ dṛgṃhati ।
dha̠rtrama̍sya̠ntari̍kṣa-ndṛ̠gṃ̠hētyā̍ha । a̠ntari̍kṣamē̠vaitēna̍ dṛgṃhati ।
dha̠ruṇa̍masi̠ diva̍-ndṛ̠gṃ̠hētyā̍ha । diva̍mē̠vaitēna̍ dṛgṃhati ॥ 51 ॥

dharmā̍si̠ diśō̍ dṛ̠gṃ̠hētyā̍ha ।
diśa̍ ē̠vaitēna̍ dṛgṃhati । i̠mānē̠vaitai-rlō̠kā-ndṛgṃ̍hati । dṛgṃ ha̍ntē-‘smā i̠mē lō̠kāḥ pra̠jayā̍ pa̠śubhi̍ḥ । ya ē̠vaṃ vēda̍ ॥ trīṇyagrē̍ ka̠pālā̠nyupa̍dadhāti । traya̍ i̠mē lō̠kāḥ ।
ē̠ṣāṃ lō̠kānā̠māptyai̎ ।
ēka̠magrē̍ ka̠pāla̠mupa̍dadhāti ।
ēka̠ṃ vā agrē̍ ka̠pāla̠-mpuru̍ṣasya sa̠bhaṃva̍ti ॥ 52 ॥

atha̠ dvē । atha̠ trīṇi̍ । atha̍ cha̠tvāri̍ । athā̠ṣṭau ।
tasmā̍da̠ṣṭāka̍pāla̠-mpuru̍ṣasya̠ śira̍ḥ ।
yadē̠va-ṅka̠pālā̎nyupa̠ dadhā̍ti । ya̠jñō vai pra̠jāpa̍tiḥ । ya̠jñamē̠va pra̠jāpa̍ti̠gṃ̠ sagg​ska̍rōti ।
ā̠tmāna̍mē̠va ta-thsagg​ska̍rōti । tagṃ sagg​skṛ̍tamā̠tmāna̎m ॥ 53 ॥

a̠muṣmi̍n ँlō̠kē-‘nu̠parai̍ti ॥ yada̠ṣṭāvu̍pa̠ dadhā̍ti । gā̠ya̠tri̠yā ta-thsammi̍tam । yannava̍ । tri̠vṛtā̠ tat । ya-ddaśa̍ । vi̠rājā̠ tat । yadēkā̍daśa । tri̠ṣṭubhā̠ tat । yaddvāda̍śa ॥ 54 ॥

jaga̍tyā̠ tat । Chanda̍-ssammitāni̠ sa u̍pa̠dadha̍-tka̠pālā̍ni । i̠mān ँlō̠kāna̍nupū̠rva-ndiśō̠ vidhṛ̍tyai dṛgṃhati । athāyu̍ḥ prā̠ṇā-npra̠jā-mpa̠śūn. yaja̍mānē dadhāti । sa̠jā̠tāna̍smā a̠bhitō̍ bahu̠lān ka̍rōti ॥
chita̠-ssthētyā̍ha । ya̠thā̠ ya̠jurē̠vaitat ॥
bhṛgū̍ṇā̠maṅgi̍rasā̠-ntapa̍sā tapyaddhva̠mityā̍ha ।
dē̠vatā̍nā-mē̠vainā̍ni̠ tapa̍sā tapati । tāni̠ tata̠-ssagg​sthi̍tē । yāni̍ gha̠rmē ka̠pālā̎n yupachi̠nvanti̍ vē̠dhasa̠ iti̠ chatu̍ṣpadaya̠rchā vimu̍ñchati । chatu̍ṣpādaḥ pa̠śava̍ḥ । pa̠śuṣvē̠vōpari̍ṣṭā̠-tprati̍tiṣṭhati ॥ 55 ॥
(va̠rta̠ya̠ti̠ – diva̍mē̠vaitēna̍ dṛgṃhati – sa̠mbhava̍ti̠ – tagṃ sagg​skṛ̍tamā̠tmānaṃ̠ – dvāda̍śa̠ – sagg​sthi̍tē̠ trīṇi̍ cha) (a. 7)

anuvākaṃ 8 – purōḍāśāniṣpādanam
dē̠vasya̍ tvā savi̠tuḥ pra̍sa̠va ityā̍ha̠ prasū̎tyai । a̠śvinō̎-rbā̠hubhyā̠mityā̍ha ।
a̠śvinau̠ hi dē̠vānā̍maddhva̠ryū āstā̎m ।
pū̠ṣṇō hastā̎bhyā̠mityā̍ha̠ yatyai̎ ।
saṃva̍pā̠mītyā̍ha । ya̠thā̠ dē̠va̠tamē̠vainā̍ni̠ saṃva̍pati ॥ samāpō̍ a̠dbhira̍gmata̠ samōṣa̍dhayō̠ rasē̠nētyā̍ha । āpō̠ vā ōṣa̍dhī-rjinvanti । ōṣa̍dhayō̠-‘pō ji̍nvanti ।
a̠nyā vā ē̠tāsā̍ma̠nyā ji̍nvanti ॥ 56 ॥

tasmā̍dē̠vamā̍ha । sagṃ rē̠vatī̠-rjaga̍tībhi̠-rmadhu̍matī̠-rmadhu̍matībhi-ssṛjyaddhva̠mityā̍ha ।
āpō̠ vai rē̠vatī̎ḥ । pa̠śavō̠ jaga̍tīḥ । ōṣa̍dhayō̠ madhu̍matīḥ । āpa̠ ōṣa̍dhīḥ pa̠śūn । tānē̠vāsmā̍ ēka̠dhā sa̠gṃ̠sṛjya̍ । madhu̍mataḥ karōti ।
a̠dbhyaḥ pari̠ prajā̍tā-sstha̠ sama̠dbhiḥ pṛ̍chyaddhva̠miti̍ pa̠ryāplā̍vayati ।
yathā̠ suvṛ̍ṣṭa i̠māma̍nu vi̠sṛtya̍ ॥ 57 ॥

āpa̠ ōṣa̍dhīrma̠haya̍nti । tā̠dṛgē̠va tat ॥
jana̍yatyai tvā̠ saṃyau̠mītyā̍ha । pra̠jā ē̠vaitēna̍ dādhāra । a̠gnayē̎ tvā̠-‘gnīṣōmā̎bhyā̠mityā̍ha̠ vyāvṛ̍ttyai । ma̠khasya̠ śirō̠-‘sītyā̍ha ।
ya̠jñō vai ma̠khaḥ । tasyai̠tachChira̍ḥ । ya-tpu̍rō̠ḍāśa̍ḥ । tasmā̍dē̠vamā̍ha ॥ 58 ॥

gha̠rmō̍-‘si vi̠śvāyu̠rityā̍ha । viśva̍mē̠vāyu̠-ryaja̍mānē dadhāti । u̠ru pra̍thasvō̠ru tē̍ ya̠jñapa̍tiḥ prathatā̠mityā̍ha । yaja̍mānamē̠va pra̠jayā̍ pa̠śubhi̍ḥ prathayati । tvacha̍-ṅgṛhṇī̠ṣvētyā̍ha ।
sarva̍mē̠vaina̠gṃ̠ sata̍nu-ṅkarōti । athā̠pa ā̠nīya̠ pari̍ mār​ṣṭi । mā̠gṃ̠sa ē̠va ta-ttvacha̍-ndadhāti । tasmā̎-ttva̠chā mā̠gṃ̠sa-ñCha̠nnam ॥
gha̠rmō vā ē̠ṣō-‘śā̎mtaḥ ॥ 59 ॥

a̠rdha̠mā̠sē̎-‘rdhamāsē̠ pravṛ̍jyatē । ya-tpu̍rō̠ḍāśa̍ḥ । sa ī̎śva̠rō yaja̍mānagṃ śu̠chā pra̠daha̍ḥ । parya̍gni karōti । pa̠śumē̠vaina̍makaḥ । śāntyā̠ apra̍dāhāya । triḥ parya̍gni karōti ।
tryā̍vṛ̠ddhi ya̠jñaḥ । athō̠ rakṣa̍sā̠mapa̍hatyai ॥
a̠ntari̍ta̠gṃ̠ rakṣō̠-‘ntari̍tā̠ arā̍taya̠ ityā̍ha ॥ 60 ॥

rakṣa̍sā-ma̠ntar​hi̍tyai । pu̠rō̠ḍāśa̠ṃ vā adhi̍śrita̠gṃ̠ rakṣāg̍syajighāgṃsann ।
di̠vi nākō̠ nāmā̠gnī ra̍kṣō̠hā । sa ē̠vāsmā̠-drakṣā̠g̠syapā̍hann । dē̠vastvā̍ savi̠tā śra̍paya̠tvityā̍ha । sa̠vi̠tṛpra̍sūta ē̠vainagg̍ śrapayati । var​ṣi̍ṣṭhē̠ adhi̠ nāka̠ ityā̍ha । rakṣa̍sā̠mapa̍hatyai । a̠gnistē̍ ta̠nuva̠-mmā-‘ti̍ dhā̠gityā̠hāna̍tidāhāya । agnē̍ ha̠vyagṃ ra̍kṣa̠svētyā̍ha̠ guptyai̎ ॥ 61 ॥
avi̍dahanta-śśrapaya̠tēti̠ vācha̠ṃ visṛ̍jatē ।
ya̠jñamē̠va ha̠vīg​ṣya̍bhi-vyā̠hṛtya̠ prata̍nutē ।
pu̠rō̠rucha̠mavi̍dāhāya̠ śṛtyai̍ karōti ॥ ma̠stiṣkō̠ vai pu̍rō̠ḍāśa̍ḥ । taṃ yannābhi̍vā̠sayē̎t । ā̠virma̠stiṣka̍-ssyāt । a̠bhivā̍sayati ।
tasmā̠-dguhā̍ ma̠stiṣka̍ḥ । bhasma̍nā̠-‘bhi vā̍sayati ।
tasmā̎-nmā̠gṃ̠sēnāsthi̍ Cha̠nnam ॥ 62 ॥

vē̠dēnā̠bhi vā̍sayati । tasmā̠-tkēśai̠-śśira̍-śCha̠nnam ।
akha̍latibhāvukō bhavati । ya ē̠vaṃ vēda̍ ॥ pa̠śōrvai pra̍ti̠mā pu̍rō̠ḍāśa̍ḥ । sa nāya̠juṣka̍-mabhi̠vāsya̍ḥ । vṛthē̍va syāt । ī̠śva̠rā yaja̍mānasya pa̠śava̠ḥ pramē̍tōḥ ॥ sa-mbrahma̍ṇā pṛchya̠svētyā̍ha । prā̠ṇā vai brahma̍ ॥ 63 ॥

prā̠ṇāḥ pa̠śava̍ḥ । prā̠ṇairē̠va pa̠śūnth
sampṛ̍ṇakti । na pra̠māyu̍kā bhavanti । yaja̍mānō̠ vai pu̍rō̠ḍāśa̍ḥ । pra̠jā pa̠śava̠ḥ purī̍ṣam ।
yadē̠vama̍bhi vā̠saya̍ti । yaja̍mānamē̠va pra̠jayā̍ pa̠śubhi̠-ssama̍rdhayati ॥ dē̠vā vai ha̠vi-rbhṛ̠tvā-‘bru̍vann । kasmi̍nni̠da-mmra̍kṣyāmaha̠ iti̍ ।
sō̎-‘gnira̍bravīt ॥ 64 ॥

mayi̍ ta̠nū-ssannidha̍ddhvam । a̠haṃ va̠sta-ñja̍nayiṣyāmi । yasmi̍-nmra̠kṣyaddhva̠ iti̍ । tē dē̠vā a̠gnau ta̠nū-ssa-nnya̍dadhata । tasmā̍dāhuḥ ।
a̠gni-ssarvā̍ dē̠vatā̠ iti̍ । sō-‘ṅgā̍rēṇā̠paḥ ।
a̠bhya̍pātayat । tata̍ ēka̠tō̍-‘jāyata ।
sa dvi̠tīya̍ma̠bhya̍pātayat ॥ 65 ॥

tatō̎ dvi̠tō̍-‘jāyata । sa tṛ̠tīya̍-ma̠bhya̍pātayat ।
tata̍-stri̠tō̍-‘jāyata । yada̠dbhyō-‘jā̍yanta । tadā̠pyānā̍māpya̠tvam । yadā̠tmabhyō ‘jā̍yanta ।
tadā̠tmyānā̍-mātmya̠tvam ॥ tē dē̠vā ā̠pyēṣva̍mṛjata । ā̠pyā a̍mṛjata̠ sūryā̎bhyuditē । sūryā̎bhyudita̠-ssūryā̍bhinimruktē ॥ 66 ॥

sūryā̍bhinimruktaḥ kuna̠khini̍ । ku̠na̠khī śyā̠vada̍ti । śyā̠vada̍nnagradidhi̠ṣau । a̠gra̠di̠dhi̠ṣuḥ pa̍rivi̠ttē । pa̠ri̠vi̠ttō vī̍ra̠haṇi̍ । vī̠ra̠hā bra̍hma̠haṇi̍ ।
tadbra̍hma̠haṇa̠-nnātya̍chyavata । a̠nta̠rvē̠di nina̍ya̠tyava̍ruddhyai । ulmu̍kēnā̠bhi gṛ̍hṇāti śṛta̠tvāya̍ । śṛ̠takā̍mā iva̠ hi dē̠vāḥ ॥ 67 ॥
(a̠nyā ji̍nvan-tyanuvi̠sṛtyai̠-vamā̠-hāśā̎mta-āha̠-guptyai̍-Cha̠nnaṃ – brahmā̎-bravī-ddvi̠tīya̍ma̠bhya̍pātaya̠-thsūryā̍bhinimruktē-dē̠vāḥ) (a. 8)

anuvākaṃ 9 – vēdikaraṇam
dē̠vasya̍ tvā savi̠tuḥ pra̍sa̠va iti̠ sphyamāda̍ttē̠ prasū̎tyai । a̠śvinō̎-rbā̠hubhyā̠mityā̍ha । a̠śvinau̠ hi dē̠vānā̍maddhva̠ryū āstā̎m । pū̠ṣṇō hastā̎bhyā̠mityā̍ha̠ yatyai̎ ॥ āda̍da̠ indra̍sya bā̠hura̍si̠ dakṣi̍ṇa̠ ityā̍ha । i̠ndri̠yamē̠va yaja̍mānē dadhāti । sa̠hasra̍bhṛṣṭi-śśa̠tatē̍jā̠ ityā̍ha ।
rū̠pamē̠vāsyai̠ta-nma̍hi̠māna̠ṃ vyācha̍ṣṭē ॥
vā̠yura̍si ti̠gmatē̍jā̠ ityā̍ha । tējō̠ vai vā̠yuḥ ॥ 68 ॥

tēja̍ ē̠vāsmi̍-ndadhāti ॥ vi̠ṣādvai nāmā̍su̠ra ā̍sīt । sō̍-‘bibhēt । ya̠jñēna̍ mā dē̠vā a̠bhibha̍viṣya̠ntīti̍ । sa pṛ̍thi̠vīma̠bhya̍vamīt । sā ‘mē̠ddhyā ‘bha̍vat । athō̠ yadindrō̍ vṛ̠tramahann̍ । tasya̠ lōhi̍ta-mpṛthi̠vīmanu̠ vya̍dhāvat । sā ‘mē̠ddhyā ‘bha̍vat ।
pṛthi̍vi dēvayaja̠nītyā̍ha ॥ 69 ॥

mēddhyā̍mē̠vainā̎-ndēva̠yaja̍nī-ṅkarōti ।
ōṣa̍ddhyāstē̠ mūla̠-mmā higṃ̍siṣa̠mityā̍ha । ōṣa̍dhīnā̠-mahigṃ̍sāyai ॥ vra̠ja-ṅga̍chCha gō̠sthāna̠mityā̍ha । Chandāgṃ̍si̠ vai vra̠jō gō̠sthāna̍ḥ । Chandāg̍syē̠vāsmai̎ vra̠ja-ṅgō̠sthāna̍-ṅkarōti ॥ var​ṣa̍tu tē̠ dyaurityā̍ha ।
vṛṣṭi̠rvai dyauḥ । vṛṣṭi̍mē̠vāva̍rundhē ॥
ba̠dhā̠na dē̍va savitaḥ para̠masyā̎-mparā̠vatītyā̍ha ॥ 70 ॥

dvau vāva puru̍ṣau । ya-ñchai̠va dvēṣṭi̍ । yaśchai̍na̠-ndvēṣṭi̍ । tāvu̠bhau ba̍ddhnāti para̠masyā̎-mparā̠vati̍ śa̠tēna̠ pāśai̎ḥ । yō̎-‘smā-ndvēṣṭi̠ ya-ñcha̍ va̠ya-ndvi̠ṣmastamatō̠ mā mau̠gityā̠hāni̍mruktyai ॥
a̠raru̠rvai nāmā̍su̠ra ā̍sīt ।
sa pṛ̍thi̠vyāmupa̍mluptō-‘śayat ।
ta-ndē̠vā apa̍hatō̠-‘raru̍ḥ pṛthi̠vyā iti̍ pṛthi̠vyā apā̎ghnann । bhrātṛ̍vyō̠ vā a̠raru̍ḥ । apa̍hatō̠-‘raru̍ḥ pṛthi̠vyā iti̠ yadāha̍ ॥ 71 ॥
bhrātṛ̍vyamē̠va pṛ̍thi̠vyā apa̍hanti । tē̍-‘manyanta ।
diva̠ṃ vā a̠yami̠taḥ pa̍tiṣya̠tīti̍ ।
tama̠raru̍stē̠ diva̠-mmā skā̠niti̍ di̠vaḥ parya̍bādhanta । bhrātṛ̍vyō̠ vā a̠raru̍ḥ । a̠raru̍stē̠ diva̠-mmā skā̠niti̠ yadāha̍ । bhrātṛ̍vyamē̠va di̠vaḥ pari̍bādhatē ।
sta̠mba̠ ya̠jur-ha̍rati । pṛ̠thi̠vyā ē̠va bhrātṛ̍vya̠-mapa̍hanti । dvi̠tīyagṃ̍ harati ॥ 72 ॥

a̠ntari̍kṣādē̠vaina̠-mapa̍hanti । tṛ̠tīyagṃ̍ harati । di̠va ē̠vaina̠-mapa̍hanti । tū̠ṣṇī-ñcha̍tu̠rthagṃ ha̍rati । apa̍rimitādē̠vaina̠-mapa̍hanti ॥ asu̍rāṇā̠ṃ vā i̠yamagra̍ āsīt । yāva̠dāsī̍naḥ parā̠ paśya̍ti ।
tāva̍-ddē̠vānā̎m । tē dē̠vā a̍bruvann ।
astvē̠va nō̠-‘syāmapīti̍ ॥ 73 ॥

kya̍nnō dāsya̠thēti̍ । yāva̍thsva̠ya-mpa̍rigṛhṇī̠thēti̍ ।
tē vasa̍va̠stvēti̍ dakṣiṇa̠taḥ parya̍gṛhṇann । ru̠drāstvēti̍ pa̠śchāt । ā̠di̠tyā-stvētyu̍ttara̠taḥ । tē̎-‘gninā̠ prāñchō̍-‘jayann । vasu̍bhi-rdakṣi̠ṇā ।
ru̠draiḥ pra̠tyañcha̍ḥ । ā̠di̠tyairuda̍ñchaḥ ।
yasyai̠vaṃ vi̠duṣō̠ vēdi̍-mpari gṛ̠hṇanti̍ ॥ 74 ॥

bhava̍tyā̠tmanā̎ । parā̎-‘sya̠ bhrātṛ̍vyō bhavati ॥
dē̠vasya̍ savi̠tu-ssa̠va ityā̍ha̠ prasū̎tyai ।
karma̍ kṛṇvanti vē̠dhasa̠ ityā̍ha । i̠ṣi̠tagṃ hi karma̍ kri̠yatē̎ । pṛ̠thi̠vyai mēddhya̍-ñchāmē̠ddhya-ñcha̠ vyuda̍krāmatām । prā̠chīna̍-mudī̠chīna̠-mmēddhya̎m । pra̠tī̠chīna̍-ndakṣi̠ṇā ‘mē̠ddhyam ।
prāchī̠mudī̍chī-mprava̠ṇā-ṅka̍rōti ।
mēddhyā̍mē̠vainā̎-ndēva̠yaja̍nī-ṅkarōti ॥ 75 ॥

prāñchau̍ vēdya̠gṃ̠ sāvunna̍yati । ā̠ha̠va̠nīya̍sya̠ pari̍gṛhītyai । pra̠tīchī̠ śrōṇī̎ । gār​ha̍patyasya̠ pari̍gṛhītyai । athō̍ mithuna̠tvāya̍ । uddha̍nti । yadē̠vāsyā̍ amē̠ddhyam । tadapa̍hanti । uddha̍nti ।
tasmā̠dōṣa̍dhaya̠ḥ parā̍bhavanti ॥ 76 ॥

mūla̍-ñChinatti । bhrātṛ̍vyasyai̠va mūla̍-ñChinatti ।
mūla̠ṃ vā a̍ti̠tiṣṭha̠-drakṣā̠g̠syanū-tpi̍patē । yaddhastē̍na Chi̠ndyāt । ku̠na̠khinī̎ḥ pra̠jā-ssyu̍ḥ । sphyēna̍ Chinatti । vajrō̠ vai sphyaḥ ।
vajrē̍ṇai̠va ya̠jñā-drakṣā̠g̠syapa̍hanti । pi̠tṛ̠dē̠va̠tyā ‘ti̍khātā । iya̍tī-ṅkhanati ॥ 77 ॥

pra̠jāpa̍tinā yajñamu̠khēna̠ sammi̍tām ॥ vēdi̍rdē̠vēbhyō̠ nilā̍yata । tā-ñcha̍turaṅgu̠lē ‘nva̍vindann । tasmā̎chchaturaṅgu̠la-ṅkhēyā̎ ।
cha̠tu̠ra̠ṅgu̠la-ṅkha̍nati । cha̠tu̠ra̠ṅgu̠lē hyōṣa̍dhayaḥ prati̠tiṣṭha̍nti ।
āpra̍ti̠ṣṭhāyai̍ khanati । yaja̍mānamē̠va pra̍ti̠ṣṭhā-ṅga̍mayati । da̠kṣi̠ṇa̠tō var​ṣī̍yasī-ṅkarōti ।
dē̠va̠yaja̍nasyai̠va rū̠pama̍kaḥ ॥ 78 ॥

purī̍ṣavatī-ṅkarōti । pra̠jā vai pa̠śava̠ḥ purī̍ṣam ।
pra̠jayai̠vaina̍-mpa̠śubhi̠ḥ purī̍ṣavanta-ṅkarōti । utta̍ra-mparigrā̠ha-mpari̍gṛhṇāti । ē̠tāva̍tī̠ vai pṛ̍thi̠vī । yāva̍tī̠ vēdi̍ḥ । tasyā̍ ē̠tāva̍ta ē̠va bhrātṛ̍vya-nni̠rbhajya̍ । ā̠tmana̠ utta̍ra-mparigrā̠ha-mpari̍gṛhṇāti ।
ṛ̠ta-ma̍syṛta̠sada̍na-masyṛta̠śrīra̠sītyā̍ha । ya̠thā̠ ya̠jurē̠vai tat ॥ 79 ॥

krū̠rami̍va̠ vā ē̠ta-tka̍rōti । yadvēdi̍-ṅka̠rōti̍ ।
dhā a̍si sva̠dhā a̠sīti̍ yōyupyatē̠ śāntyai̎ ।
u̠rvī chāsi̠ vasvī̍ chā̠sītyā̍ha ।
u̠rvīmē̠vainā̠ṃ vasvī̎-ṅkarōti ।
pu̠rā krū̠rasya̍ vi̠sṛpō̍ viraphśi̠nnityā̍ha mēddhya̠tvāya̍ । u̠dā̠dāya̍ pṛthi̠vī-ñjī̠radā̍nu̠ryāmaira̍ya-ñcha̠ndrama̍si sva̠dhābhi̠rityā̍ha ।
yadē̠vāsyā̍ amē̠ddhyam । tada̍pa̠hatya̍ ।
mēddhyā̎-ndēva̠yaja̍nī-ṅkṛ̠tvā ॥ 80 ॥

yada̠daścha̠ndrama̍si̠ mēddhya̎m । tada̠syāmēra̍yati ।
tā-ndhīrā̍sō anu̠dṛśya̍ yajanta̠ ityā̠hānu̍khyātyai ॥ prōkṣa̍ṇī̠rāsā̍daya । i̠ddhmāba̠r̠hi-rupa̍sādaya । sru̠va-ñcha̠ srucha̍ścha̠ sammṛ̍ḍḍhi । patnī̠gṃ̠ sanna̍hya । ājyē̍nō̠dēhītyā̍hānupū̠rvatā̍yai । prōkṣa̍ṇī̠rāsā̍dayati । āpō̠ vai ra̍kṣō̠ghnīḥ ॥ 81 ॥

rakṣa̍sā̠mapa̍hatyai । sphyasya̠ vartman̎-thsādayati । ya̠jñasya̠ santa̍tyai । u̠vācha̠ hāsi̍tō daiva̠laḥ । ē̠tāva̍tī̠rvā a̠muṣmi̍n ँlō̠ka āpa̍ āsann ।
yāva̍tī̠ḥ prōkṣa̍ṇī̠riti̍ । tasmā̎-dba̠hvīrā̠sādyā̎ḥ । sphyamu̠dasyann̍ । ya-ndvi̠ṣyātta-ndhyā̍yēt । śu̠chaivaina̍-marpayati ॥ 82 ॥
(vai vā̠yu – rā̍ha – parā̠vatītyā̠hā – ha̍ – dvi̠tīyagṃ̍ hara̠ – tīti̍ – parigṛ̠hṇanti̍ – dēva̠yaja̍nī-ṅkarōti – bhavanti – khanatya – ka – rē̠tat – kṛ̠tvā – ra̍kṣō̠ghnī – ra̍rpayati) (a. 9)

anuvākaṃ 10 – idhmābar​hi-ssādanam
vajrō̠ vai sphyaḥ । yada̠nvañcha̍-ndhā̠rayē̎t । vajrē̎-‘ddhva̠ryuḥ, kṣa̍ṇvīta । pu̠rastā̎-tti̠ryañcha̍-ndhārayati । vajrō̠ vai sphyaḥ । vajrē̍ṇai̠va ya̠jñasya̍ dakṣiṇa̠tō rakṣā̠g̠syapa̍hanti ।
a̠gnibhyā̠-mprācha̍ścha pra̠tīcha̍ścha । sphyēnōdī̍chaśchā-dha̠rācha̍ścha । sphyēna̠ vā ē̠ṣa vajrē̍ṇā̠syai pā̠pmāna̠-mbhrātṛ̍vya-mapa̠hatya̍ ।
u̠tka̠rē-‘dhi̠ pravṛ̍śchati ॥ 83 ॥

yathō̍pa̠dhāya̍ vṛ̠śchantya̠vam । hastā̠vava̍ nēniktē । ā̠tmāna̍mē̠va pa̍vayatē । sphya-mprakṣā̍layati mēddhya̠tvāya̍ । athō̍ pā̠pmana̍ ē̠va bhrātṛ̍vyasya nya̠ṅga-ñChi̍natti ॥ i̠ddhmā-ba̠r̠hi-rupa̍sādayati̠ yuktyai̎ । ya̠jñasya̍ mithuna̠tvāya̍ ।
athō̍ purō̠rucha̍mē̠vaitā-nda̍dhāti ।
utta̍rasya̠ karma̠ṇō-‘nu̍khyātyai ।
na pu̠rastā̎-tpra̠tyagupa̍sādayēt ॥ 84 ॥

ya-tpu̠rastā̎-tpra̠tya-gu̍pasā̠dayē̎t ।
a̠nyatrā̍hutipa̠thādi̠ddhma-mprati̍pādayēt । pra̠jā vai ba̠r̠hiḥ । apa̍rāddhnuyā-dba̠r̠hiṣā̎ pra̠jānā̎-mpra̠jana̍nam । pa̠śchāt-prāgupa̍sādayati । ā̠hu̠ti̠pa̠thēnē̠ddhma-mprati̍pādayati ।
sa̠pra̠ntyē̍va ba̠r̠hiṣā̎ pra̠jānā̎-mpra̠jana̍na̠mupai̍ti । dakṣi̍ṇami̠ddhmam ।
utta̍ra-mba̠ra̠.hiḥ । ā̠tmā vā i̠ddhmaḥ ।
pra̠jā ba̠r̠hiḥ । pra̠jā hyā̎tmana̠ utta̍ratarā tī̠rthē ।
tatō̠ mēdha̍mupa̠nīya̍ । ya̠thā̠ dē̠va̠tamē̠vaina̠t-prati̍ṣṭhāpayati । prati̍tiṣṭhati pra̠jayā̍ pa̠śubhi̠-ryaja̍mānaḥ ॥ 85 ॥
(vṛ̠ścha̠ti̠ – sā̠da̠yē̠ – di̠ddhmaḥ pañcha̍ cha) (a. 10)

(tṛtīya̍syāṃ – dē̠vasyā̎śvapa̠r̠śuṃ yō vai – pū̎rvē̠dyuḥ – karma̍ṇē vā̠ – mindrō̍ vṛ̠trama̍ha̠n-thsō̍-‘pō – ‘va̍dhūta̠ṃ – dhṛṣṭi̍–r dē̠vasyētyā̍ha̠ saṃva̍pāmi – dē̠vasya̠ sphyamāda̍dē̠ – vajrō̠ vai sphyō daśa̍)

(tṛ̠tīya̍syāṃ – ँya̠jñasyāna̍tirēkāya – pa̠vitra̍vatya – dhva̠ryu-ñchā̍ – dhi̠ṣava̍ṇamasya̠ – ntari̍kṣa ē̠va – rakṣa̍sāma̠ntar​hi̍tyai̠ – dvau vāva puru̍ṣō̠ – yada̠daścha̠ndrama̍si̠ mēddhya̠-mpañchāśī̍tiḥ)

(tṛ̠tīya̍syā̠ṃ – ँyaja̍mānaḥ)

॥ hari̍ḥ ōm ॥

॥ kṛṣṇa yajurvēdīya taittirīya brāhmaṇē tṛtīyāṣṭakē dvitīyaḥ prapāṭhaka-ssamāptaḥ ॥