KYTB 3.1 Nakshatreshtinam Yajyanuvakya Brahmanani – Krishna Yajurveda Taittiriya Brahmana Patha – Agnirah Patu Krittikah

kṛṣṇa yajurvēdīya taittirīya brāhmaṇē tṛtīyāṣṭakē prathamaḥ prapāṭhakaḥ – nakṣatrēṣṭīnāṃ yājyā-‘nuvākyā brāhmaṇāni

ō-nnamaḥ paramātmanē, śrī mahāgaṇapatayē namaḥ,
śrī gurubhyō namaḥ । ha̠ri̠ḥ ōm ॥

anuvākaṃ 1 – dēvanakṣatrāṇāṃ yājyānuvākyāḥ
a̠gnirna̍ḥ pātu̠ kṛtti̍kāḥ । nakṣa̍tra-ndē̠vami̍ndri̠yam । i̠damā̍sāṃ vichakṣa̠ṇam । ha̠virā̠sa-ñju̍hōtana ॥ yasya̠ bhānti̍ ra̠śmayō̠ yasya̍ kē̠tava̍ḥ । yasyē̠mā viśvā̠ bhuva̍nāni̠ sarvā̎ ।
sa kṛtti̍kābhira̠bhi sa̠ṃvasā̍naḥ । a̠gnirnō̍ dē̠va-ssu̍vi̠tē da̍dhātu ॥ pra̠jāpa̍tē rōhi̠ṇī vē̍tu̠ patnī̎ ।
vi̠śvarū̍pā bṛha̠tī chi̠trabhā̍nuḥ ॥ 1 ॥

sā nō̍ ya̠jñasya̍ suvi̠tē da̍dhātu । yathā̠ jīvē̍ma śa̠rada̠-ssavī̍rāḥ ॥ rō̠hi̠ṇī dē̠vyuda̍gā-tpu̠rastā̎t । viśvā̍ rū̠pāṇi̍ prati̠mōda̍mānā । pra̠jāpa̍tigṃ ha̠viṣā̍ va̠rdhaya̍ntī । pri̠yā dē̠vānā̠-mupa̍yātu ya̠jñam ॥ sōmō̠ rājā̍ mṛgaśī̠ra̠.ṣēṇa̠ āgann̍ । śi̠va-nnakṣa̍tra-mpri̠yama̍sya̠ dhāma̍ ।
ā̠pyāya̍mānō bahu̠dhā janē̍ṣu ।
rēta̍ḥ pra̠jāṃ yaja̍mānē dadhātu ॥ 2 ॥

ya-ttē̠ nakṣa̍tra-mmṛgaśī̠ra̠.ṣamasti̍ ।
pri̠yagṃ rā̍ja-npri̠yata̍ma-mpri̠yāṇā̎m ।
tasmai̍ tē sōma ha̠viṣā̍ vidhēma ।
śanna̍ ēdhi dvi̠padē̠ śa-ñchatu̍ṣpadē ॥
ā̠rdrayā̍ ru̠draḥ pratha̍māna ēti । śrēṣṭhō̍ dē̠vānā̠-mpati̍raghni̠yānā̎m । nakṣa̍tramasya ha̠viṣā̍ vidhēma । mā na̍ḥ pra̠jāgṃ rī̍riṣa̠-nmōta vī̠rān ॥
hē̠tī ru̠drasya̠ pari̍ṇō vṛṇaktu । ā̠rdrā nakṣa̍tra-ñjuṣatāgṃ ha̠virna̍ḥ ॥ 3 ॥

pra̠mu̠ñchamā̍nau duri̠tāni̠ viśvā̎ । apā̠ghaśagṃ̍ sa-nnudatā̠marā̍tim ॥ puna̍rnō dē̠vyadi̍ti-sspṛṇōtu । puna̍rvasū na̠ḥ puna̠rētā̎ṃ ya̠jñam ।
puna̍rnō dē̠vā a̠bhiya̍ntu̠ sarvē̎ । puna̍ḥ punarvō ha̠viṣā̍ yajāmaḥ ॥ ē̠vā na dē̠vyadi̍tirana̠rvā । viśva̍sya bha̠rtrī jaga̍taḥ prati̠ṣṭhā । puna̍rvasū ha̠viṣā̍ va̠rdhaya̍ntī । pri̠ya-ndē̠vānā̠-mapyē̍tu̠ pātha̍ḥ ॥ 4 ॥

bṛha̠spati̍ḥ pratha̠ma-ñjāya̍mānaḥ । ti̠ṣya̍-nnakṣa̍trama̠bhi samba̍bhūva । śrēṣṭhō̍ dē̠vānā̠-mpṛta̍nāsu ji̠ṣṇuḥ । diśō-‘nu̠ sarvā̠ abha̍yannō astu ॥
ti̠ṣya̍ḥ pu̠rastā̍du̠ta ma̍ddhya̠tō na̍ḥ । bṛha̠spati̍ rna̠ḥ pari̍pātu pa̠śchāt । bādhē̍tā̠-ndvēṣō̠ abha̍ya-ṅkṛṇutām । su̠vīrya̍sya̠ pata̍ya-ssyāma ॥
i̠dagṃ sa̠rpēbhyō̍ ha̠vira̍stu̠ juṣṭa̎m ।
ā̠śrē̠ṣā yēṣā̍-manu̠yanti̠ chēta̍ḥ ॥ 5 ॥

yē a̠ntari̍kṣa-mpṛthi̠vī-ṅkṣi̠yanti̍ । tēna̍-ssa̠rpāsō̠ hava̠māga̍miṣṭhāḥ ॥ yē rō̍cha̠nē sūrya̠syāpi̍
sa̠rpāḥ । yē diva̍-ndē̠vīmanu̍ sa̠ñchara̍nti ।
yēṣā̍māśrē̠ṣā a̍nu̠yanti̠ kāma̎m ।
tēbhya̍-ssa̠rpēbhyō̠ madhu̍majjuhōmi ॥
upa̍hūtāḥ pi̠tarō̠ yē ma̠ghāsu̍ । manō̍javasa-ssu̠kṛta̍-ssukṛ̠tyāḥ । tē nō̠ nakṣa̍trē̠ hava̠māga̍miṣṭhāḥ । sva̠dhābhi̍ rya̠jña-mpraya̍ta-ñjuṣantām ॥ 6 ॥

yē a̍gnida̠gdhā yē-‘na̍gni-dagdhāḥ । yē̍-‘muṃ lō̠ka-mpi̠tara̍ḥ, kṣi̠yanti̍ । yāg​ścha̍ vi̠dmayāgṃ u̍ cha̠ na pra̍vi̠dma । ma̠ghāsu̍ ya̠jñagṃ sukṛ̍ta-ñjuṣantām ॥
gavā̠-mpati̠ḥ phalgu̍nīnāmasi̠ tvam । tada̍ryaman varuṇa mitra̠ chāru̍ । ta-ntvā̍ va̠yagṃ sa̍ni̠tāragṃ̍ sanī̠nām । jī̠vā jīva̍nta̠mupa̠ saṃvi̍śēma ॥
yēnē̠mā viśvā̠ bhuva̍nāni̠ sañji̍tā ।
yasya̍ dē̠vā a̍nu sa̠ṃyanti̠ chēta̍ḥ ॥ 7 ॥

a̠rya̠mā rājā̠-‘jara̠stuvi̍ṣmān । phalgu̍nīnā-mṛṣa̠bhō rō̍ravīti ॥ śrēṣṭhō̍ dē̠vānā̎-mbhagavō bhagāsi । tattvā̍ vidu̠ḥ phalgu̍nī̠stasya̍ vittāt । a̠smabhya̍-ṅkṣa̠trama̠jaragṃ̍ su̠vīrya̎m । gōma̠daśva̍-va̠dupa̠-sannu̍dē̠ha ॥ bhagō̍ ha dā̠tā bhaga̠ i-tpra̍dā̠tā । bhagō̍ dē̠vīḥ phalgu̍nī̠rāvi̍vēśa । bhaga̠syētta-mpra̍sa̠va-ṅga̍mēma । yatra̍ dē̠vai-ssa̍dha̠māda̍-mmadēma ॥ 8 ॥

āyā̍tu dē̠va-ssa̍vi̠tōpa̍yātu । hi̠ra̠ṇyayē̍na su̠vṛtā̠ rathē̍na । vaha̠n̠. hastagṃ̍ su̠bhaga̍ṃ vidma̠nāpa̍sam । pra̠yachCha̍nta̠-mpapu̍ri̠-mpuṇya̠machCha̍ ॥
hasta̠ḥ praya̍chCha tva̠mṛta̠ṃ vasī̍yaḥ ।
dakṣi̍ṇēna̠ prati̍gṛbhṇīma ēnat ।
dā̠tāra̍ma̠dya sa̍vi̠tā vi̍dēya ।
yō nō̠ hastā̍ya prasu̠vāti̍ ya̠jñam ॥
tvaṣṭā̠ nakṣa̍trama̠bhyē̍ti chi̠trām ।
su̠bhagṃ sa̍saṃ yuva̠tigṃ rōcha̍mānām ॥ 9 ॥

ni̠vē̠śaya̍-nna̠mṛtā̠-nmartyāg̍ścha ।
rū̠pāṇi̍ pi̠gṃ̠śa-nbhuva̍nāni̠ viśvā̎ ॥
tanna̠stvaṣṭā̠ tadu̍ chi̠trā vicha̍ṣṭām ।
tannakṣa̍tra-mbhūri̠dā a̍stu̠ mahya̎m ।
tanna̍ḥ pra̠jāṃ vī̠rava̍tīgṃ sanōtu ।
gōbhi̍rnō̠ aśvai̠-ssama̍naktu ya̠jñam ॥
vā̠yurnakṣa̍tra-ma̠bhyē̍ti̠ niṣṭyā̎m ।
ti̠gmaśṛ̍ṅgō vṛṣa̠bhō rōru̍vāṇaḥ ।
sa̠mī̠raya̠-nbhuva̍nā māta̠riśvā̎ ।
apa̠ dvēṣāgṃ̍si nudatā̠marā̍tīḥ ॥ 10 ॥

tannō̍ vā̠yustadu̠ niṣṭyā̍ śṛṇōtu ।
tannakṣa̍tra-mbhūri̠dā a̍stu̠ mahya̎m ।
tannō̍ dē̠vāsō̠ anu̍ jānantu̠ kāma̎m । yathā̠ tarē̍ma duri̠tāni̠ viśvā̎ ॥ dū̠rama̠smachChatra̍vō yantu bhī̠tāḥ । tadi̍ndrā̠gnī kṛ̍ṇutā̠-nta-dviśā̍khē ।
tannō̍ dē̠vā anu̍madantu ya̠jñam । pa̠śchā-tpu̠rastā̠-dabha̍yannō astu ॥ nakṣa̍trāṇā̠-madhi̍patnī̠ viśā̍khē ।
śrēṣṭhā̍vindrā̠gnī bhuva̍nasya gō̠pau ॥ 11 ॥

viṣū̍cha̠-śśatrū̍-napa̠bādha̍mānau । apa̠ kṣudha̍-nnudatā̠marā̍tim ॥ pū̠rṇā pa̠śchādu̠ta pū̠rṇā pu̠rastā̎t । unma̍ddhya̠taḥ pau̎rṇamā̠sī ji̍gāya ।
tasyā̎-ndē̠vā adhi̍ sa̠ṃvasa̍ntaḥ ।
u̠tta̠mē nāka̍ i̠ha mā̍dayantām ॥
pṛ̠thvī su̠varchā̍ yuva̠ti-ssa̠jōṣā̎ḥ । pau̠rṇa̠mā̠syuda̍gā̠-chChōbha̍mānā ।
ā̠pyā̠yaya̍ntī duri̠tāni̠ viśvā̎ ।
u̠ru-nduhā̠ṃ yaja̍mānāya ya̠jñam ॥ 12 ॥
(chi̠trabhā̍nu̠-r yaja̍mānē dadhātu – ha̠virna̠ḥ – pātha̠ – śchētō̍ – juṣantā̠ṃ – chētō̍ – madēma̠ – rōcha̍mānā̠ – marā̍tī–r gō̠pau – ya̠jñaṃ) (a. 1)

anuvākaṃ 2 – yamanakṣatrāṇāṃ yājyānuvākyāḥ
ṛ̠ddhyāsma̍ ha̠vyai-rnama̍sōpa̠ sadya̍ ।
mi̠tra-ndē̠va-mmi̍tra̠dhēya̍nnō astu । a̠nū̠rā̠dhān. ha̠viṣā̍ va̠rdhaya̍ntaḥ । śa̠ta-ñjī̍vēma śa̠rada̠-ssavī̍rāḥ ॥ chi̠tra-nnakṣa̍tra̠-muda̍gā-tpu̠rastā̎t । a̠nū̠rā̠dhāsa̠ iti̠ ya-dvada̍nti । tanmi̠tra ē̍ti pa̠thibhi̍ rdēva̠yānai̎ḥ । hi̠ra̠ṇyayai̠ rvita̍tai-ra̠ntari̍kṣē ॥
indrō̎ jyē̠ṣṭhāmanu̠ nakṣa̍tramēti । yasmi̍n vṛ̠traṃ vṛ̍tra̠ tūryē̍ ta̠tāra̍ ॥ 13 ॥

tasmi̍n va̠yama̠mṛta̠-nduhā̍nāḥ । kṣudha̍-ntarēma̠ duri̍ti̠-nduri̍ṣṭim ॥ pu̠ra̠nda̠rāya̍ vṛṣa̠bhāya̍ dhṛ̠ṣṇavē̎ । aṣā̍ḍhāya̠ saha̍mānāya mī̠ḍhuṣē̎ ।
indrā̍ya jyē̠ṣṭhā madhu̍ma̠-dduhā̍nā ।
u̠ru-ṅkṛ̍ṇōtu̠ yaja̍mānāya lō̠kam ॥
mūla̍-mpra̠jāṃ vī̠rava̍tīṃ vidēya । parā̎chyētu̠ nir-ṛ̍tiḥ parā̠chā । gōbhi̠ rnakṣa̍tra-mpa̠śubhi̠-ssama̍ktam । aha̍rbhūyā̠-dyaja̍mānāya̠ mahya̎m ॥ 14 ॥
aha̍rnō a̠dya su̍vi̠tē da̍dhātu । mūla̠-nnakṣa̍tra̠miti̠ ya-dvada̍nti । parā̍chīṃ vā̠chā nir-ṛ̍ti-nnudāmi ।
śi̠va-mpra̠jāyai̍ śi̠vama̍stu̠ mahya̎m ॥
yā di̠vyā āpa̠ḥ paya̍sā sa-mbabhū̠vuḥ । yā a̠ntari̍kṣa u̠ta pārthi̍vī̠ryāḥ । yāsā̍maṣā̠ḍhā a̍nu̠yanti̠
kāma̎m । tā na̠ āpa̠-śśagg​ syō̠nā bha̍vantu ॥
yāścha̠ kūpyā̠ yāścha̍ nā̠dyā̎-ssamu̠driyā̎ḥ ।
yāścha̍ vaiśa̠ntīru̠ta prā̍sa̠chīryāḥ ॥ 15 ॥

yāsā̍maṣā̠ḍhā madhu̍ bha̠kṣaya̍nti । tā na̠ āpa̠-śśagg​ syō̠nā bha̍vantu ॥ tannō̠ viśvē̠ upa̍ śṛṇvantu dē̠vāḥ । tada̍ṣā̠ḍhā a̠bhi saṃya̍ntu ya̠jñam ।
tannakṣa̍tra-mprathatā-mpa̠śubhya̍ḥ ।
kṛ̠ṣi-rvṛ̠ṣṭi-ryaja̍mānāya kalpatām ॥
śu̠bhrāḥ ka̠nyā̍ yuva̠taya̍-ssu̠pēśa̍saḥ । ka̠rma̠kṛta̍-ssu̠kṛtō̍ vī̠ryā̍vatīḥ ।
viśvā̎-ndē̠vān. ha̠viṣā̍ va̠rdhaya̍ntīḥ ।
a̠ṣā̠ḍhāḥ kāma̠mupa̍yāntu ya̠jñam ॥ 16 ॥

yasmi̠-nbrahmā̠-‘bhyaja̍ya̠-thsarva̍mē̠tat ।
a̠muñcha̍ lō̠ka mi̠damū̍cha̠ sarva̎m ।
tannō̠ nakṣa̍tramabhi̠ji-dvi̠jitya̍ । śriya̍-ndadhā̠-tvahṛ̍ṇīyamānam ॥ u̠bhau lō̠kau brahma̍ṇā̠ sañji̍tē̠mau । tannō̠ nakṣa̍tramabhi̠ji-dvicha̍ṣṭām ।
tasmi̍n va̠ya-mpṛta̍nā̠-ssa-ñja̍yēma ।
tannō̍ dē̠vāsō̠ anu̍jānantu̠ kāma̎m ॥
śṛ̠ṇvanti̍ śrō̠ṇā-ma̠mṛta̍sya gō̠pām ।
puṇyā̍masyā̠ upa̍śṛṇōmi̠ vācha̎m ॥ 17 ॥
ma̠hī-ndē̠vīṃ viṣṇu̍patnī-majū̠ryām । pra̠tīchī̍mēnāgṃ ha̠viṣā̍ yajāmaḥ ॥
trē̠dhā viṣṇu̍-rurugā̠yō vicha̍kramē ।
ma̠hī-ndiva̍-mpṛthi̠vī-ma̠ntari̍kṣam ।
tachChrō̠ṇaiti̠ śrava̍ i̠chChamā̍nā ।
puṇya̠gg̠ ślōka̠ṃ yaja̍mānāya kṛṇva̠tī ॥
a̠ṣṭau dē̠vā vasa̍va-ssō̠myāsa̍ḥ ।
chata̍srō dē̠vī ra̠jarā̠-śśravi̍ṣṭhāḥ ।
tē ya̠jña-mpā̎mtu̠ raja̍saḥ pa̠rastā̎t ।
sa̠ṃva̠thsa̠rīṇa̍-ma̠mṛtagg̍ sva̠sti ॥ 18 ॥

ya̠jña-nna̍ḥ pāntu̠ vasa̍vaḥ pu̠rastā̎t । da̠kṣi̠ṇa̠tō̍-‘bhiya̍ntu̠ śravi̍ṣṭhāḥ । puṇya̠-nnakṣa̍trama̠bhi saṃvi̍śāma । mā nō̠ arā̍ti-ra̠ghaśa̠gṃ̠sā gann̍ ॥
kṣa̠trasya̠ rājā̠ varu̍ṇō-‘dhirā̠jaḥ । nakṣa̍trāṇāgṃ śa̠tabhi̍ṣa̠g vasi̍ṣṭhaḥ । tau dē̠vēbhya̍ḥ kṛṇutō dī̠rghamāyu̍ḥ । śa̠tagṃ sa̠hasrā̍ bhēṣa̠jāni̍ dhattaḥ ॥
ya̠jñannō̠ rājā̠ varu̍ṇa̠ upa̍yātu । tannō̠ viśvē̍ a̠bhi saṃya̍ntu dē̠vāḥ ॥ 19 ॥

tannō̠ nakṣa̍tragṃ śa̠tabhi̍ṣag juṣā̠ṇam । dī̠rghamāyu̠ḥ prati̍ra-dbhēṣa̠jāni̍ ॥ a̠ja ēka̍pā̠duda̍gā-tpu̠rastā̎t । viśvā̍ bhū̠tāni̍ prati̠mōda̍mānaḥ । tasya̍ dē̠vāḥ pra̍sa̠vaṃ ya̍nti̠ sarvē̎ । prō̠ṣṭha̠pa̠dāsō̍ a̠mṛta̍sya gō̠pāḥ ॥
vi̠bhrāja̍māna-ssamidhā̠na u̠graḥ । ā-‘ntari̍kṣa-maruha̠da-ga̠ndyām । tagṃ sūrya̍-ndē̠va-ma̠jamēka̍pādam । prō̠ṣṭha̠pa̠dāsō̠ anu̍yanti̠ sarvē̎ ॥ 20 ॥

ahi̍-rbu̠ddhniya̠ḥ pratha̍māna ēti । śrēṣṭhō̍ dē̠vānā̍mu̠ta mānu̍ṣāṇām । ta-mbrā̎hma̠ṇā-ssō̍ma̠pā-ssō̠myāsa̍ḥ ।
prō̠ṣṭha̠pa̠dāsō̍ a̠bhi ra̍kṣanti̠ sarvē̎ ॥
cha̠tvāra̠ ēka̍ma̠bhi karma̍ dē̠vāḥ ।
prō̠ṣṭha̠pa̠dāsa̠ iti̠ yān. vada̍nti ।
tē bu̠ddhaniya̍-mpari̠ṣadyagg̍ stu̠vanta̍ḥ ।
ahigṃ̍ rakṣanti̠ nama̍sōpa̠sadya̍ ॥
pū̠ṣā rē̠vatyanvē̍ti̠ panthā̎m । pu̠ṣṭi̠patī̍ paśu̠pā vāja̍bastyau ॥ 21 ॥

i̠māni̍ ha̠vyā praya̍tā juṣā̠ṇā ।
su̠gairnō̠ yānai̠rupa̍yātāṃ ya̠jñam ॥
kṣu̠drā-npa̠śū-nra̍kṣatu rē̠vatī̍ naḥ ।
gāvō̍ nō̠ aśvā̠gṃ̠ anvē̍tu pū̠ṣā ।
anna̠gṃ̠ rakṣa̍ntau bahu̠dhā virū̍pam ।
vājagṃ̍ sanutā̠ṃ yaja̍mānāya ya̠jñam ॥
tada̠śvinā̍-vaśva̠yujōpa̍yātām ।
śubha̠-ṅgami̍ṣṭhau su̠yamē̍bhi̠raśvai̎ḥ ।
sva-nnakṣa̍tragṃ ha̠viṣā̠ yaja̍ntau ।
maddhvā̠ sampṛ̍ktau̠ yaju̍ṣā̠ sama̍ktau ॥ 22 ॥

yau dē̠vānā̎-mbhi̠ṣajau̍ havyavā̠hau । viśva̍sya dū̠tā-va̠mṛta̍sya gō̠pau । tau nakṣa̍tra-ñjujuṣā̠ṇō-pa̍yātām । namō̠-‘śvibhyā̎-ṅkṛṇumō-‘śva̠yugbhyā̎m ॥
apa̍ pā̠pmāna̠-mbhara̍ṇīrbharantu । ta-dya̠mō rājā̠ bhaga̍vā̠n̠. vicha̍ṣṭām । lō̠kasya̠ rājā̍ maha̠tō ma̠hān. hi । su̠ga-nna̠ḥ panthā̠mabha̍ya-ṅkṛṇōtu ॥
yasmi̠-nnakṣa̍trē ya̠ma ēti̠ rājā̎ ।
yasmi̍-nnēnama̠bhyaṣi̍channta dē̠vāḥ ।
tada̍sya chi̠tragṃ ha̠viṣā̍ yajāma ।
apa̍ pā̠pmāna̠-mbhara̍ṇī-rbharantu ॥
ni̠vēśa̍nī sa̠ṅgama̍nī̠ vasū̍nā̠ṃ viśvā̍ rū̠pāṇi̠ vasū̎nyāvē̠śaya̍ntī । sa̠ha̠sra̠pō̠ṣagṃ su̠bhagā̠ rarā̍ṇā̠ sā na̠ āga̠n varcha̍sā saṃvidā̠nā ॥ yattē̍ dē̠vā ada̍dhu-rbhāga̠dhēya̠mamā̍vāsyē sa̠ṃvasa̍ntō mahi̠tvā । sānō̍ ya̠jña-mpi̍pṛhi viśvavārē ra̠yi-nnō̍ dhēhi subhagē su̠vīra̎m ॥ ॥ 23 ॥
(ta̠tāra̠ – mahya̍ṃ – prāsa̠chīryā – yā̎mtu ya̠jñaṃ – ँvāchagg̍ – sva̠sti – dē̠vā-anu̍ yanti̠ sarvē̠-vāja̍bastyau̠-sama̍ktau-dē̠vā strīṇi̍ cha) (a. 2)

anuvākaṃ 3 – chāndramasādīnāṃ saptanāmiṣṭīnāṃ yājyānuvākyāḥ
navō̍navō bhavati̠ jāya̍mā̠nō-‘hnā̎-ṅkē̠turu̠ṣasā̍ mē̠tyagrē̎ । bhā̠ga-ndē̠vēbhyō̠ vida̍dhātyā̠ya-npracha̠ndramā̎stirati dī̠rghamāyu̍ḥ ॥ yamā̍di̠tyā
a̠gṃ̠śumā̎pyā̠yaya̍nti yamā̍di̠tyā a̠gṃ̠śumā̎pyā̠yaya̍nti̠ yamakṣi̍ta̠-makṣi̍taya̠ḥ piba̍nti । tēna̍ nō̠ rājā̠ varu̍ṇō̠ bṛha̠spati̠rā pyā̍yayantu̠ bhuva̍nasya gō̠pāḥ ॥॥ yē virū̍pē̠ sama̍nasā sa̠ṃvyaya̍ntī । sa̠mā̠na-ntantu̍-mpari tāta̠nātē̎ । vi̠bhū pra̠bhū a̍nu̠bhū vi̠śvatō̍ huvē ।
tē nō̠ nakṣa̍trē̠ hava̠māga̍mētam ॥
va̠ya-ndē̠vī brahma̍ṇā saṃvidā̠nāḥ ।
su̠ratnā̍sō dē̠vavī̍ti̠-ndadhā̍nāḥ ।
a̠hō̠rā̠trē ha̠viṣā̍ va̠rdhaya̍ntaḥ ।
ati̍ pā̠pmāna̠-mati̍muktyā gamēma ॥ pratyu̍vadṛśyāya̠tī ॥ 24 ॥

vyu̠chChantī̍ duhi̠tā di̠vaḥ । a̠pō ma̠hī vṛ̍ṇutē̠ chakṣu̍ṣā ॥ tamō̠ jyōti̍ṣkṛṇōti sū̠narī̎ । udu̠śriyā̎-ssachatē̠ sūrya̍ḥ । sa chā̍ u̠dyannakṣa̍tra-marchi̠mat । tavēdu̍ṣō̠ vyuṣi̠ sūrya̍sya cha ॥
sa-mbha̠ktēna̍ gamēmahi । tannō̠ nakṣa̍tra-marchi̠mat । bhā̠nu̠mattēja̍ u̠chchara̍t । upa̍ ya̠jña-mi̠hāga̍mat ॥ 25 ॥

pra nakṣa̍trāya dē̠vāya̍ । indrā̠yēndugṃ̍ havāmahē ।
sa na̍-ssavi̠tā su̍va-thsa̠nim । pu̠ṣṭi̠dāṃ vī̠rava̍ttamam ॥ udu̠ tya-ñjā̠tavē̍dasa-ndē̠vaṃ va̍hanti kē̠tava̍ḥ । dṛ̠śē viśvā̍ya̠ sūrya̎m ॥ chi̠tra-ndē̠vānā̠-muda̍gā̠danī̍ka̠-ñchakṣu̍-rmi̠trasya̠ varu̍ṇasyā̠-‘gnēḥ । ā-‘ prā̠ dyāvā̍pṛthi̠vī a̠ntari̍kṣa̠gṃ̠ sūrya̍ ā̠tmā jaga̍tasta̠sthuṣa̍ścha ॥॥
adi̍tirna uruṣya̠tvadi̍ti̠-śśarma̍ yachChatu । adi̍tiḥ pā̠tvagṃ ha̍saḥ ॥ ma̠hīmū̠ṣu mā̠taragṃ̍ suvra̠tānā̍mṛ̠tasya̠ patnī̠mava̍sē huvēma । tu̠vi̠kṣa̠trāma̠jara̍ntīmurū̠chīgṃ su̠śarmā̍ṇa̠madi̍tigṃ su̠praṇī̍tim ॥ ॥
i̠daṃ viṣṇu̠-rvicha̍kramē trē̠dhā ni da̍dhē pa̠dam । sa mū̍ḍhamasya pāgṃ su̠rē ॥ prata-dviṣṇu̍-sstavatē vī̠ryā̍ya । mṛ̠gō na bhī̠maḥ ku̍cha̠rō gi̍ri̠ṣṭhāḥ । yasyō̠ruṣu̍ tri̠ṣu vi̠krama̍ṇēṣu । adhi̍kṣi̠yanti̠ bhuva̍nāni̠ viśvā̎ ॥ ॥
a̠gnirmū̠rdhā di̠vaḥ ka̠ku-tpati̍ḥ pṛthi̠vyā a̠yam । a̠pāgṃ rētāgṃ̍si jinvati ॥ bhuvō̍ ya̠jñasya̠ raja̍saścha nē̠tā yatrā̍ ni̠yudbhi̠-ssacha̍sē śi̠vābhi̍ḥ । di̠vi mū̠rdhāna̍-ndadhiṣē suva̠r̠ṣā-ñji̠hvāma̍gnē chakṛṣē havya̠vāha̎m ॥ ॥
anu̍ nō̠-‘dyā-‘nu̍mati-rya̠jña-ndē̠vēṣu̍ manyatām । a̠gniścha̍ havya̠vāha̍nō̠ bhava̍tā-ndā̠śuṣē̠ maya̍ḥ ॥ anvida̍numatē̠ tva-mmanyā̍sai̠ śañcha̍naḥ kṛdhi । kratvē̠ dakṣā̍ya nō hinu̠ praṇa̠ āyūgṃ̍ṣi tāriṣaḥ ॥ ॥
ha̠vya̠vāha̍-mabhimāti̠ṣā-‘ha̎m । ra̠kṣō̠haṇa̠-mpṛta̍nāsu ji̠ṣṇum । jyōti̍ṣmanta̠-ndīdya̍ta̠-mpura̍ndhim । a̠gnigg​ svi̍ṣṭa̠kṛta̠mā hu̍vēma ॥ svi̍ṣṭamagnē a̠bhi ta-tpṛ̍ṇāhi । viśvā̍ dēva̠ pṛta̍nā a̠bhiṣya । u̠ru-nna̠ḥ panthā̎-mpradi̠śanvi bhā̍hi । jyōti̍ṣmaddhēhya̠jara̍-nna̠ āyu̍ḥ ॥ ॥ 26 ॥
(ā̠ya̠tya̍ – gama̠th – svi̍ṣṭam) (a. 3)

anuvākaṃ 4 – dēva nakṣatrēṣṭibrāhmaṇam
a̠gnirvā a̍kāmayata । a̠nnā̠dō dē̠vānāg̍ syā̠miti̍ ।
sa ē̠tama̠gnayē̠ kṛtti̍kābhyaḥ purō̠ḍāśa̍-ma̠ṣṭāka̍pāla̠-nnira̍vapat । tatō̠ vai sō̎-‘nnā̠dō dē̠vānā̍mabhavat । a̠gnirvai dē̠vānā̍mannā̠daḥ ॥
yathā̍ ha̠ vā a̠gni-rdē̠vānā̍-mannā̠daḥ ।
ē̠vagṃ ha̠ vā ē̠ṣa ma̍nu̠ṣyā̍ṇā-mbhavati ।
ya ē̠tēna̍ ha̠viṣā̠ yaja̍tē । ya u̍ chainadē̠vaṃ vēda̍ ॥ sō-‘tra̍ juhōti । a̠gnayē̠ svāhā̠ kṛtti̍kābhya̠-ssvāhā̎ । a̠mbāyai̠ svāhā̍ du̠lāyai̠ svāhā̎ । ni̠ta̠tnyai svāhā̠ ‘bhraya̍ntyai̠ svāhā̎ । mē̠ghaya̍ntyai̠ svāhā̍ va̠ra̠.ṣaya̍ntyai̠ svāhā̎ । chu̠pu̠ṇīkā̍yai̠ svāhēti̍ ॥ 27 ॥

pra̠jāpa̍tiḥ pra̠jā a̍sṛjata । tā a̍smā-thsṛ̠ṣṭāḥ parā̍chīrāyann । tāsāgṃ̍ rōhi̠ṇī-ma̠bhya̍ddhyāyat । sō̍-‘kāmayata । upa̠ mā-”va̍rtēta । samē̍nayā gachChē̠yēti̍ । sa ē̠ta-mpra̠jāpa̍tayē rōhi̠ṇyai cha̠ru-nnira̍vapat । tatō̠ vai sā tamu̠pāva̍rtata । samē̍nayā ‘gachChata ॥ upa̍ ha̠ vā ē̍na-mpri̠yamāva̍rtatē ।
sa-mpri̠yēṇa̍ gachChatē । ya ē̠tēna̍ ha̠viṣā̠ yaja̍tē ।
ya u̍ chainadē̠vaṃ vēda̍ ॥ sō-‘tra̍ juhōti ।
pra̠jāpa̍tayē̠ svāhā̍ rōhi̠ṇyai svāhā̎ ।
rōcha̍mānāyai̠ svāhā̎ pra̠jābhya̠-ssvāhēti̍ ॥ 28 ॥
sōmō̠ vā a̍kāmayata । ōṣa̍dhīnāgṃ rā̠jya-ma̠bhija̍yēya̠miti̍ । sa ē̠tagṃ sōmā̍ya mṛgaśī̠ra̠.ṣāya̍ śyāmā̠ka-ñcha̠ru-mpaya̍si̠ nira̍vapat । tatō̠ vai sa ōṣa̍dhīnāgṃ
rā̠jyama̠bhya̍jayat । sa̠mā̠nānāgṃ̍ ha̠ vai rā̠jyama̠bhija̍yati । ya ē̠tēna̍ ha̠viṣā̠ yaja̍tē ।
ya u̍ chainadē̠vaṃ vēda̍ । sō-‘tra̍ juhōti ।
sōmā̍ya̠ svāhā̍ mṛgaśī̠ra̠.ṣāya̠ svāhā̎ ।
i̠nva̠kābhya̠-ssvāhauṣa̍dhībhya̠-ssvāhā̎ ।
rā̠jyāya̠ svāhā̠ ‘bhiji̍tyai̠ svāhēti̍ ॥ 29 ॥

ru̠drō vā a̍kāmayata । pa̠śu̠mān-thsyā̠miti̍ ।
sa ē̠tagṃ ru̠drāyā̠rdrāyai̠ praiya̍ṅgava-ñcha̠ru-mpaya̍si̠ nira̍vapat । tatō̠ vai sa pa̍śu̠māna̍bhavat । pa̠śu̠mān. ha̠ vai bha̍vati । ya ē̠tēna̍ ha̠viṣā̠ yaja̍tē । ya u̍ chainadē̠vaṃ vēda̍ । sō-‘tra̍ juhōti । ru̠drāya̠ svāhā̠ ”rdrāyai̠ svāhā̎ । pinva̍mānāyai̠ svāhā̍ pa̠śubhya̠-ssvāhēti̍ ॥ 30 ॥

ṛ̠kṣā vā i̠yama̍lō̠makā̍-”sīt । sā-‘kā̍mayata ।
ōṣa̍dhībhi̠-rvana̠spati̍bhi̠ḥ prajā̍yē̠yēti̍ ।
saitamadi̍tyai̠ puna̍rvasubhyā-ñcha̠ru-nnira̍vapat ।
tatō̠ vā i̠yamōṣa̍dhībhi̠-rvana̠spati̍bhi̠ḥ prājā̍yata ।
prajā̍yatē ha̠ vai pra̠jayā̍ pa̠śubhi̍ḥ । ya ē̠tēna̍ ha̠viṣā̠ yaja̍tē । ya u̍ chainadē̠vaṃ vēda̍ ।
sō-‘tra̍ juhōti । adi̍tyai̠ svāhā̠ puna̍rvasubhyām ।
svāhā-”bhū̎tyai̠ svāhā̠ prajā̎tyai̠ svāhēti̍ ॥ 31 ॥

bṛha̠spati̠rvā a̍kāmayata । bra̠hma̠va̠rcha̠sī syā̠miti̍ ।
sa ē̠ta-mbṛha̠spata̍yē ti̠ṣyā̍ya naivā̠ra-ñcha̠ru-mpaya̍si̠ nira̍vapat । tatō̠ vai sa bra̍hmavarcha̠sya̍bhavat । bra̠hma̠va̠rcha̠sī ha̠ vai bha̍vati । ya ē̠tēna̍ ha̠viṣā̠ yaja̍tē । ya u̍ chainadē̠vaṃ vēda̍ । sō-‘tra̍ juhōti ।
bṛha̠spata̍yē̠ svāhā̍ ti̠ṣyā̍ya̠ svāhā̎ । bra̠hma̠va̠rcha̠sāya̠ svāhēti̍ ॥ 32 ॥

dē̠vā̠su̠rā-ssaṃya̍ttā āsann । tē dē̠vā-ssa̠rpēbhya̍ āśrē̠ṣābhya̠ ājyē̍ kara̠mbha-nnira̍vapann ।
tānē̠tābhi̍rē̠va dē̠vatā̍-bhi̠rupā̍nayann ।
ē̠tābhi̍r​ha̠ vai dē̠vatā̍bhi-rdvi̠ṣanta̠-mbhrātṛ̍vya̠-mupa̍nayati । ya ē̠tēna̍ ha̠viṣā̠ yaja̍tē ।
ya u̍ chainadē̠vaṃ vēda̍ । sō-‘tra̍ juhōti ।
sa̠rpēbhya̠-ssvāhā̎-”śrē̠ṣābhya̠-ssvāhā̎ । da̠nda̠śūkē̎bhya̠-ssvāhēti̍ ॥ 33 ॥

pi̠tarō̠ vā a̍kāmayanta । pi̠tṛ̠lō̠ka ṛ̍ddhnuyā̠mēti̍ ।
ta ē̠ta-mpi̠tṛbhyō̍ ma̠ghābhya̍ḥ purō̠ḍāśa̠gṃ̠ ṣaṭka̍pāla̠-nnira̍vapann । tatō̠ vai tē pi̍tṛlō̠ka ā̎rdhnuvann । pi̠tṛ̠lō̠kē ha̠ vā ṛ̍dhnōti ।
ya ē̠tēna̍ ha̠viṣā̠ yaja̍tē । ya u̍ chainadē̠vaṃ vēda̍ । sō-‘tra̍ juhōti । pi̠tṛbhya̠-ssvāhā̍ ma̠ghābhya̍ḥ ।
svāhā̍ ‘na̠ghābhya̠-ssvāhā̍ ‘ga̠dābhya̍ḥ ।
svāhā̍ ‘rundha̠tībhya̠-ssvāhēti̍ ॥ 34 ॥
a̠rya̠mā vā a̍kāmayata । pa̠śu̠mān-thsyā̠miti̍ ।
sa ē̠tama̍rya̠mṇē phalgu̍nībhyā-ñcha̠ru-nnira̍vapat ।
tatō̠ vai sa pa̍śu̠māna̍bhavat ।
pa̠śu̠mān. ha̠ vai bha̍vati । ya ē̠tēna̍ ha̠viṣā̠ yaja̍tē ।
ya u̍ chainadē̠vaṃ vēda̍ । sō-‘tra̍ juhōti । a̠rya̠mṇē svāhā̠ phalgu̍nībhyā̠g̠ svāhā̎ ।
pa̠śubhya̠-ssvāhēti̍ ॥ 35 ॥

bhagō̠ vā a̍kāmayata । bha̠gī śrē̠ṣṭhī dē̠vānāg̍ syā̠miti̍ । sa ē̠ta-mbhagā̍ya̠ phalgu̍nībhyā-ñcha̠ru-nnira̍vapat । tatō̠ vai sa bha̠gī śrē̠ṣṭhī dē̠vānā̍mabhavat ।
bha̠gī ha̠ vai śrē̠ṣṭhī sa̍mā̠nānā̎-mbhavati । ya ē̠tēna̍ ha̠viṣā̠ yaja̍tē । ya u̍ chainadē̠vaṃ vēda̍ । sō-‘tra̍ juhōti । bhagā̍ya̠ svāhā̠ phalgu̍nībhyā̠g̠ svāhā̎ । śraiṣṭhyā̍ya̠ svāhēti̍ ॥ 36 ॥

sa̠vi̠tā vā a̍kāmayata । śranmē̍ dē̠vā dadhī̍rann । sa̠vi̠tā syā̠miti̍ । sa ē̠tagṃ sa̍vi̠trē hastā̍ya purō̠ḍāśa̠-ndvāda̍śakapāla̠-nnira̍vapadāśū̠nāṃ
ँvrī̍hī̠ṇām । tatō̠ vai tasmai̠ śraddē̠vā ada̍dhata । sa̠vi̠tā-‘bha̍vat । śraddha̠ vā a̍smai manu̠ṣyā̍ dadhatē । sa̠vi̠tā sa̍mā̠nānā̎-mbhavati । ya ē̠tēna̍ ha̠viṣā̠ yaja̍tē । ya u̍ chainadē̠vaṃ vēda̍ । sō-‘tra̍ juhōti ।
sa̠vi̠trē svāhā̠ hastā̍ya । svāhā̍ dada̠tē svāhā̍ pṛṇa̠tē । svāhā̎ pra̠yachCha̍tē̠ svāhā̎ pratigṛbhṇa̠tē svāhēti̍ ॥ 37 ॥

tvaṣṭā̠ vā a̍kāmayata । chi̠tra-mpra̠jāṃ vi̍ndē̠yēti̍ ।
sa ē̠ta-ntvaṣṭrē̍ chi̠trāyai̍ purō̠ḍāśa̍ma̠ṣṭā-ka̍pāla̠-nnira̍vapat । tatō̠ vai sa chi̠tra-mpra̠jāma̍vindata । chi̠tragṃ ha̠ vai pra̠jāṃ vi̍ndatē ।
ya ē̠tēna̍ ha̠viṣā̠ yaja̍tē ।
ya u̍ chainadē̠vaṃ vēda̍ । sō-‘tra̍ juhōti ।
tvaṣṭrē̠ svāhā̍ chi̠trāyai̠ svāhā̎ ।
chaitrā̍ya̠ svāhā̎ pra̠jāyai̠ svāhēti̍ ॥ 38 ॥

vā̠yurvā a̍kāmayata । kā̠ma̠chāra̍mē̠ṣu lō̠kēṣva̠bhija̍yēya̠miti̍ । sa ē̠ta-dvā̠yavē̠ niṣṭyā̍yai gṛ̠ṣṭyai du̠gdha-mpayō̠ nira̍vapat ।
tatō̠ vai sa kā̍ma̠chāra̍mē̠ṣu lō̠kēṣva̠bhya̍jayat ।
kā̠ma̠chāragṃ̍ ha̠ vā ē̠ṣu lō̠kēṣva̠bhija̍yati ।
ya ē̠tēna̍ ha̠viṣā̠ yaja̍tē । ya u̍ chainadē̠vaṃ vēda̍ । sō-‘tra̍ juhōti । vā̠yavē̠ svāhā̠ niṣṭyā̍yai̠ svāhā̎ ।
kā̠ma̠chārā̍ya̠ svāhā̠-‘bhiji̍tyai̠ svāhēti̍ ॥ 39 ॥

i̠ndrā̠gnī vā a̍kāmayētām । śraiṣṭhya̍-ndē̠vānā̍-ma̠bhija̍yē̠vēti̍ । tāvē̠tami̍ndrā̠gnibhyā̠ṃ viśā̍khābhyā-mpurō̠ḍāśa̠-mēkā̍daśakapāla̠-nnira̍vapatām । tatō̠ vai tau śraiṣṭhya̍-ndē̠vānā̍-ma̠bhya̍jayatām । śraiṣṭhyagṃ̍ ha̠ vai sa̍mā̠nānā̍ma̠bhija̍yati । ya ē̠tēna̍ ha̠viṣā̠ yaja̍tē ।
ya u̍ chainadē̠vaṃ vēda̍ । sō-‘tra̍ juhōti ।
i̠ndrā̠gnibhyā̠g̠ svāhā̠ viśā̍khābhyā̠g̠ svāhā̎ ।
śraiṣṭhyā̍ya̠ svāhā̠ ‘bhiji̍tyai̠ svāhēti̍ ॥ 40 ॥

athai̠tat-pau̎rṇamā̠syā ājya̠-nnirva̍pati । kāmō̠ vai pau̎rṇamā̠sī । kāma̠ ājya̎m । kāmē̍nai̠va kāma̠gṃ̠ sama̍rdhayati । kṣi̠pramē̍na̠gṃ̠ sa kāma̠ upa̍namati । yēna̠ kāmē̍na̠ yaja̍tē । sō-‘tra̍ juhōti ।
pau̠rṇa̠mā̠syai svāhā̠ kāmā̍ya̠ svāhā-”ga̍tyai̠ svāhēti̍ ॥ 41 ॥

anuvākaṃ 5 – yamanakṣatrēṣṭibrāhmaṇam
mi̠trō vā a̍kāmayata । mi̠tra̠dhēya̍mē̠ṣu lō̠kēṣva̠bhi ja̍yēya̠miti̍ । sa ē̠ta-mmi̠trāyā̍nūrā̠dhēbhya̍ścha̠ru-nnira̍vapat । tatō̠ vai sa mi̍tra̠dhēya̍mē̠ṣu lō̠kēṣva̠bhya̍jayat । mi̠tra̠dhēyagṃ̍ ha̠ vā ē̠ṣu lō̠kēṣva̠bhija̍yati । ya ē̠tēna̍ ha̠viṣā̠ yaja̍tē ।
ya u̍ chainadē̠vaṃ vēda̍ । sō-‘tra̍ juhōti ।
mi̠trāya̠ svāhā̍ ‘nūrā̠dhēbhya̠-ssvāhā̎ ।
mi̠tra̠dhēyā̍ya̠ svāhā̠ ‘bhiji̍tyai̠ svāhēti̍ ॥ 42 ॥

indrō̠ vā a̍kāmayata । jyaiṣṭhya̍-ndē̠vānā̍-ma̠bhija̍yēya̠miti̍ । sa ē̠tamindrā̍ya jyē̠ṣṭhāyai̍ purō̠ḍāśa̠-mēkā̍daśakapāla̠-nnira̍vapa-nma̠hāvrī̍hīṇām । tatō̠ vai sa jyaiṣṭhya̍-ndē̠vānā̍ma̠bhya̍jayat । jyaiṣṭhyagṃ̍ ha̠ vai sa̍mā̠nānā̍-ma̠bhija̍yati । ya ē̠tēna̍ ha̠viṣā̠ yaja̍tē ।
ya u̍ chainadē̠vaṃ vēda̍ । sō-‘tra̍ juhōti । indrā̍ya̠ svāhā̎ jyē̠ṣṭhāyai̠ svāhā̎ ।
jyaiṣṭhyā̍ya̠ svāhā̠ ‘bhiji̍tyai̠ svāhēti̍ ॥ 43 ॥

pra̠jāpa̍ti̠rvā a̍kāmayata । mūla̍-mpra̠jāṃ vi̍ndē̠yēti̍ । sa ē̠ta-mpra̠jāpa̍tayē̠ mūlā̍ya cha̠ru-nnira̍vapat । tatō̠ vai sa mūla̍-mpra̠jāma̍vindata । mūlagṃ̍ ha̠ vai pra̠jāṃ vi̍ndatē । ya ē̠tēna̍ ha̠viṣā̠ yaja̍tē । ya u̍ chainadē̠vaṃ vēda̍ । sō-‘tra̍ juhōti । pra̠jāpa̍tayē̠ svāhā̠ mūlā̍ya̠ svāhā̎ । pra̠jāyai̠ svāhēti̍ ॥ 44 ॥

āpō̠ vā a̍kāmayanta । sa̠mu̠dra-ṅkāma̍ma̠ bhija̍yē̠mēti̍ । tā ē̠tama̠dbhyō̍-‘ṣā̠ḍhābhya̍ścha̠ru-nnira̍vapann । tatō̠ vai tā-ssa̍mu̠dra-ṅkāma̍ma̠bhya̍jayann । sa̠mu̠dragṃ ha̠ vai kāma̍ma̠bhija̍yati । ya ē̠tēna̍ ha̠viṣā̠ yaja̍tē ।
ya u̍ chainadē̠vaṃ vēda̍ । sō-‘tra̍ juhōti ।
a̠dbhya-ssvāhā̍ ‘ṣā̠ḍhābhya̠-ssvāhā̎ । sa̠mu̠drāya̠ svāhā̠ kāmā̍ya̠ svāhā̎ । a̠bhiji̍tyai̠ svāhēti̍ ॥ 45 ॥

viśvē̠ vai dē̠vā a̍kāmayanta । a̠na̠pa̠ja̠yya-ñja̍yē̠mēti̍ । ta ē̠taṃ viśvē̎bhyō dē̠vēbhyō̍-‘ṣā̠ḍhābhya̍ścha̠ru-nnira̍vapann ।
tatō̠ vai tē̍-‘napaja̠yya-ma̍jayann । a̠na̠pa̠ja̠yyagṃ ha̠ vai ja̍yati । ya ē̠tēna̍ ha̠viṣā̠ yaja̍tē । ya u̍ chainadē̠vaṃ vēda̍ । sō-‘tra̍ juhōti ।
viśvē̎bhyō dē̠vēbhya̠-ssvāhā̍ ‘ṣā̠ḍhābhya̠-ssvāhā̎ ।
a̠na̠pa̠ja̠yyāya̠ svāhā̠ jityai̠ svāhēti̍ ॥ 46 ॥

brahma̠ vā a̍kāmayata । bra̠hma̠lō̠kama̠bhija̍yēya̠miti̍ ।
tadē̠ta-mbrahma̍ṇē-‘bhi̠jitē̍ cha̠ru-nnira̍vapat ।
tatō̠ vai tadbra̍hmalō̠kama̠bhya̍jayat । bra̠hma̠lō̠kagṃ ha̠ vā a̠bhija̍yati । ya ē̠tēna̍ ha̠viṣā̠ yaja̍tē । ya u̍ chainadē̠vaṃ vēda̍ । sō-‘tra̍ juhōti । brahma̍ṇē̠ svāhā̍ ‘bhi̠jitē̠ svāhā̎ । bra̠hma̠lō̠kāya̠ svāhā̠ ‘bhiji̍tyai̠ svāhēti̍ ॥ 47 ॥

viṣṇu̠rvā a̍kāmayata । puṇya̠gg̠ ślōkagṃ̍ śṛṇvīya ।
na mā̍ pā̠pī kī̠rtirāga̍chChē̠diti̍ । sa ē̠taṃ viṣṇa̍vē śrō̠ṇāyai̍ purō̠ḍāśa̍-ntrikapā̠la-nnira̍vapat ।
tatō̠ vai sa puṇya̠gg̠ ślōka̍ma śṛṇuta । naina̍-mpā̠pī kī̠rtirā- ga̍chChat । puṇyagṃ̍ ha̠ vai ślōkagṃ̍ śṛṇutē । naina̍-mpā̠pī kī̠rtirāga̍chChati । ya ē̠tēna̍ ha̠viṣā̠ yaja̍tē । ya u̍ chainadē̠vaṃ vēda̍ । sō-‘tra̍ juhōti ।
viṣṇa̍vē̠ svāhā̎ śrō̠ṇāyai̠ svāhā̎ ।
ślōkā̍ya̠ svāhā̎ śru̠tāya̠ svāhēti̍ ॥ 48 ॥

vasa̍vō̠ vā a̍kāmayanta । agra̍-ndē̠vatā̍nā̠-mparī̍yā̠mēti̍ । ta ē̠taṃ vasu̍bhya̠-śśravi̍ṣṭhābhyaḥ purō̠ḍāśa̍ma̠ṣṭāka̍pāla̠-nnira̍vapann ।
tatō̠ vai tē-‘gra̍-ndē̠vatā̍nā̠-mparyā̍yann ।
agragṃ̍ ha̠ vai sa̍mā̠nānā̠-mparyē̍ti ।
ya ē̠tēna̍ ha̠viṣā̠ yaja̍tē । ya u̍ chainadē̠vaṃ vēda̍ । sō-‘tra̍ juhōti । vasu̍bhya̠-ssvāhā̠ śravi̍ṣṭhābhya̠-ssvāhā̎ । agrā̍ya̠ svāhā̠ parī̎tyai̠ svāhēti̍ ॥ 49 ॥

indrō̠ vā a̍kāmayata । dṛ̠ḍhō ‘śi̍thila-ssyā̠miti̍ ।
sa ē̠taṃ varu̍ṇāya śa̠tabhi̍ṣajē bhēṣa̠jēbhya̍ḥ purō̠ḍāśa̠-ndaśa̍kapāla̠-nnira̍vapat-kṛ̠ṣṇānā̎ṃ vrīhī̠ṇām । tatō̠ vai sa dṛ̠ḍhō-‘śi̍thilō-‘bhavat ।
dṛ̠ḍhō ha̠ vā aśi̍thilō bhavati । ya ē̠tēna̍ ha̠viṣā̠ yaja̍tē । ya u̍ chainadē̠vaṃ vēda̍ । sō-‘tra̍ juhōti ।
varu̍ṇāya̠ svāhā̍ śa̠tabhi̍ṣajē̠ svāhā̎ ।
bhē̠ṣa̠jēbhya̠-ssvāhēti̍ ॥ 50 ॥

a̠jō vā ēka̍pādakāmayata । tē̠ja̠svī bra̍hmavarcha̠sī syā̠miti̍ । sa ē̠tama̠jāyaika̍padē prōṣṭhapa̠dēbhya̍-ścha̠ru-nnira̍vapat । tatō̠ vai sa tē̍ja̠svī bra̍hmavarcha̠sya̍bhavat । tē̠ja̠svī ha̠ vai bra̍hmavarcha̠sī bha̍vati । ya ē̠tēna̍ ha̠viṣā̠ yaja̍tē ।
ya u̍ chainadē̠vaṃ vēda̍ । sō-‘tra̍ juhōti ।
a̠jāyaika̍padē̠ svāhā̎ prōṣṭhapa̠dēbhya̠-ssvāhā̎ ।
tēja̍sē̠ svāhā̎ brahmavarcha̠sāya̠ svāhēti̍ ॥ 51 ॥

ahi̠rvai bu̠ddhniyō̍-‘kāmayata । i̠mā-mpra̍ti̠ṣṭhāṃ vi̍ndē̠yēti̍ । sa ē̠tamaha̍yē bu̠ddhniyā̍ya prōṣṭhapa̠dēbhya̍ḥ purō̠ḍāśa̠-mbhūmi̍kapāla̠-nnira̍vapat । tatō̠ vai sa i̠mā-mpra̍ti̠ṣṭhā-ma̍vindata । i̠māgṃ ha̠ vai pra̍ti̠ṣṭhāṃ vi̍ndatē ।
ya ē̠tēna̍ ha̠viṣā̠ yaja̍tē । ya u̍ chainadē̠vaṃ vēda̍ । sō-‘tra̍ juhōti । aha̍yē bu̠ddhniyā̍ya̠ svāhā̎ prōṣṭhapa̠dēbhya̠-ssvāhā̎ ।
pra̠ti̠ṣṭhāyai̠ svāhēti̍ ॥ 52 ॥

pū̠ṣā vā a̍kāmayata । pa̠śu̠mān-thsyā̠miti̍ ।
sa ē̠ta-mpū̠ṣṇē rē̠vatyai̍ cha̠ru-nnira̍vapat ।
tatō̠ vai sa pa̍śu̠māna̍bhavat ।
pa̠śu̠mān. ha̠ vai bha̍vati । ya ē̠tēna̍ ha̠viṣā̠ yaja̍tē । ya u̍ chainadē̠vaṃ vēda̍ ।
sō-‘tra̍ juhōti । pū̠ṣṇē svāhā̍ rē̠vatyai̠ svāhā̎ ।
pa̠śubhya̠-ssvāhēti̍ ॥ 53 ॥

a̠śvinau̠ vā a̍kāmayētām । śrō̠tra̠svinā̠vaba̍dhirau syā̠vēti̍ । tāvē̠tama̠śvibhyā̍-maśva̠yugbhyā̎-mpurō̠ḍāśa̍-ndvikapā̠la-nnira̍vapatām ।
tatō̠ vai tau śrō̎tra̠svinā̠vaba̍dhirā-vabhavatām ।
śrō̠tra̠svī ha̠ vā aba̍dhirō bhavati । ya ē̠tēna̍ ha̠viṣā̠ yaja̍tē । ya u̍ chainadē̠vaṃ vēda̍ । sō-‘tra̍ juhōti ।
a̠śvibhyā̠g̠ svāhā̎-‘śva̠yugbhyā̠g̠ svāhā̎ ।
śrōtrā̍ya̠ svāhā̠ śrutyai̠ svāhēti̍ ॥ 54 ॥

ya̠mō vā a̍kāmayata ।
pi̠tṛ̠ṇāgṃ rā̠jya-ma̠bhija̍yēya̠miti̍ ।
sa ē̠taṃ ya̠māyā̍pa̠bhara̍ṇībhyaścha̠ru-nnira̍vapat ।
tatō̠ vai sa pi̍tṛ̠ṇāgṃ rā̠jyama̠bhya̍jayat ।
sa̠mā̠nānāgṃ̍ ha̠ vai rā̠jyama̠bhija̍yati ।
ya ē̠tēna̍ ha̠viṣā̠ yaja̍tē ।
ya u̍ chainadē̠vaṃ vēda̍ । sō-‘tra̍ juhōti ।
ya̠māya̠ svāhā̍ ‘pa̠bhara̍ṇībhya̠-ssvāhā̎ ।
rā̠jyāya̠ svāhā̠ ‘bhiji̍tyai̠ svāhēti̍ ॥ 55 ॥

athai̠tada̍-māvā̠syā̍yā̠ ājya̠-nnirva̍pati ।
kāmō̠ vā a̍māvā̠syā̎ । kāma̠ ājya̎m । kāmē̍nai̠va kāma̠gṃ̠ sama̍rdhayati । kṣi̠pramē̍na̠gṃ̠ sa kāma̠ upa̍namati । yēna̠ kāmē̍na̠ yaja̍tē । sō-‘tra̍ juhōti । a̠mā̠vā̠syā̍yai̠ svāhā̠ kāmā̍ya̠ svāhā ”ga̍tyai̠ svāhēti̍ ॥ 56 ॥

bu̠ddhniya̍ḥ – pu̠ṣā – ‘śvinau̍ – ya̠mō daśa̍da̠śā – thai̠tada̍ – māvā̠syā̍yā a̠ṣṭau pañcha̍daśa ) (a. 5)

anuvākaṃ 6 – chāndramasādīṣṭibrāhmaṇam
cha̠ndramā̠ vā a̍kāmayata । a̠hō̠rā̠trā-na̍rdhamā̠sā-nmāsā̍-nṛ̠tūnth- sa̍ṃvathsa̠ra-mā̠ptvā । cha̠ndrama̍sa̠-ssāyu̍jyagṃ salō̠katā̍-māpnuyā̠miti̍ । sa ē̠ta-ñcha̠ndrama̍sē pratī̠dṛśyā̍yai purō̠ḍāśa̠-mpañcha̍daśakapāla̠-nnira̍vapat ।
tatō̠ vai sō̍-‘hōrā̠trā-na̍rdhamā̠sā-nmāsā̍-nṛ̠tūn-thsa̍ṃvathsa̠ra-mā̠ptvā ।
cha̠ndrama̍sa̠-ssāyu̍jyagṃ salō̠katā̍māpnōt ।
a̠hō̠rā̠trān. ha̠ vā a̍rdhamā̠sā-nmāsā̍n-ṛ̠tūn-thsa̍ṃvathsa̠ra-mā̠ptvā । cha̠ndrama̍sa̠-ssāyu̍jyagṃ salō̠katā̍māpnōti । ya ē̠tēna̍ ha̠viṣā̠ yaja̍tē ।
ya u̍ chainadē̠vaṃ vēda̍ । sō-‘tra̍ juhōti ।
cha̠ndrama̍sē̠ svāhā̎ pratī̠dṛśyā̍yai̠ svāhā̎ ।
a̠hō̠rā̠trēbhya̠-ssvāhā̎ ‘rdhamā̠sēbhya̠-ssvāhā̎ ।
māsē̎bhya̠-ssvāha̠rtubhya̠-ssvāhā̎ । sa̠ṃva̠thsa̠rāya̠ svāhēti̍ ॥ 57 ॥

a̠hō̠rā̠trē vā a̍kāmayētām । atya̍hōrā̠trē mu̍chyēvahi ।
na nā̍vahōrā̠trē ā̎pnuyātā̠miti̍ । tē ē̠tama̍hō-rā̠trābhyā̎-ñcha̠ru-nnira̍vapatām । dva̠yānā̎ṃ vrīhī̠ṇām । śu̠klānā̎-ñcha kṛ̠ṣṇānā̎-ñcha । sa̠vā̠tyōrdu̠gdhē । śvē̠tāyai̍ cha kṛ̠ṣṇāyai̍ cha ।
tatō̠ vai tē atya̍hōrā̠trē a̍muchyētē ।
nainē̍ ahōrā̠trē ā̎pnutām । ati̍ ha̠ vā a̍hōrā̠trē mu̍chyatē । naina̍mahōrā̠trē ā̎pnutaḥ । ya ē̠tēna̍ ha̠viṣā̠ yaja̍tē । ya u̍ chainadē̠vaṃvēda̍ ।
sō-‘tra̍ juhōti । ahnē̠ svāhā̠ rātri̍yai̠ svāhā̎ ।
ati̍muktyai̠ svāhēti̍ ॥ 58 ॥

u̠ṣā vā a̍kāmayata । pri̠yā ”di̠tyasya̍ su̠bhagā̎ syā̠miti̍ । saitamu̠ṣasē̍ cha̠ru-nnira̍vapat ।
tatō̠ vai sā pri̠yā ”di̠tyasya̍ su̠bhagā̍ ‘bhavat ।
pri̠yō ha̠ vai sa̍mā̠nānāgṃ̍ su̠bhagō̍ bhavati । ya ē̠tēna̍ ha̠viṣā̠ yaja̍tē । ya u̍ chainadē̠vaṃ vēda̍ । sō-‘tra̍ juhōti । u̠ṣasē̠ svāhā̠ vyu̍ṣṭyai̠ svāhā̎ ।
vyū̠ṣuṣyai̠ svāhā̎ vyu̠chChantyai̠ svāhā̎ । vyu̍ṣṭāyai̠ svāhēti̍ ॥ 59 ॥

athai̠tasmai̠ nakṣa̍trāya cha̠ru-nnirva̍pati । yathā̠ tva-ndē̠vānā̠masi̍ । ē̠vama̠ha-mma̍nu̠ṣyā̍ṇā-mbhūyāsa̠miti̍ । yathā̍ ha̠ vā ē̠ta-ddē̠vānā̎m ।
ē̠vagṃ ha̠ vā ē̠ṣa ma̍nu̠ṣyā̍ṇā-mbhavati । ya ē̠tēna̍ ha̠viṣā̠ yaja̍tē । ya u̍ chainadē̠vaṃ vēda̍ । sō-‘tra̍ juhōti । nakṣa̍trāya̠ svāhō̍dēṣya̠tē svāhā̎ ।
u̠dya̠tē svāhōdi̍tāya̠ svāhā̎ । hara̍sē̠ svāhā̠ bhara̍sē̠ svāhā̎ । bhrāja̍sē̠ svāhā̠ tēja̍sē̠ svāhā̎ ।
tapa̍sē̠ svāhā̎ brahmavarcha̠sāya̠ svāhēti̍ ॥ 60 ॥

sūryō̠ vā a̍kāmayata । nakṣa̍trāṇā-mprati̠ṣṭhā syā̠miti̍ । sa ē̠tagṃ sūryā̍ya̠ nakṣa̍trēbhyaścha̠ru-nnira̍vapat ।
tatō̠ vai sa nakṣa̍trāṇā-mprati̠ṣṭhā ‘bha̍vat ।
pra̠ti̠ṣṭhā ha̠ vai sa̍mā̠nānā̎-mbhavati ।
ya ē̠tēna̍ ha̠viṣā̠ yaja̍tē ।
ya u̍ chainadē̠vaṃ vēda̍ । sō-‘tra̍ juhōti ।
sūryā̍ya̠ svāhā̠ nakṣa̍trēbhya̠-ssvāhā̎ । pra̠ti̠ṣṭhāyai̠ svāhēti̍ ॥ 61 ॥

athai̠tamadi̍tyai cha̠ru-nnirva̍pati । i̠yaṃ vā adi̍tiḥ ।
a̠syāmē̠va prati̍ tiṣṭhati । sō-‘tra̍ juhōti ।
adi̍tyai̠ svāhā̎ prati̠ṣṭhāyai̠ svāhēti̍ ॥ 62 ॥

athai̠taṃ viṣṇa̍vē cha̠ru-nnirva̍pati । ya̠jñō vai viṣṇu̍ḥ । ya̠jña ē̠vānta̠taḥ prati̍ tiṣṭhati । sō-‘tra̍ juhōti । viṣṇa̍vē̠ svāhā̍ ya̠jñāya̠ svāhā̎ । pra̠ti̠ṣṭhāyai̠ svāhēti̍ ॥ 63 ॥
(cha̠ndramā̠ḥ pañcha̍daśā – hōrā̠trē sa̠ptada̍ – śō̠ṣā ēkā̍da̠śā – thai̠tasmai̠ nakṣa̍ttāya̠ trayō̍daśa̠ – sūryō̠ daśā – thai̠tamadi̍tyai̠ pañchā – thai̠taṃ viṣṇa̍vē̠ ṣaṭ-thsa̠pta) (a. 6)

[sa̠vi̠tā-”śū̠nāṃ vrī̍hī̠ṇāmindrō̍ ma̠hāvrī̍hīṇā̠mindra̍ḥ kṛ̠ṣṇānō̎m
ँvrīhī̠ṇāma̍hōrā̠trē dva̠yānā̎ṃ vrīhī̠ṇām । pi̠tara̠-ṣṣaṭka̍pālagṃ savi̠tā dvāda̍śakapālamindrā̠gnī ēkā̍daśakapāla̠mindra̠ ēkā̍daśakapāla̠mindrō̠ daśa̍kapāla̠ṃ viṣṇu̍strikapā̠lamahi̠-rbhūmi̍kapālama̠śvinau̎ dvikapā̠la-ñcha̠ndramā̠ḥ pañcha̍daśakapāla-ma̠gniratvaṣṭā̠ vasa̍vō̠-‘ṣṭāka̍pālama̠nyatra̍ cha̠rum । ru̠drō̎-‘rya̠mā pū̠ṣā pa̍śu̠mān-thsyā̠gṃ̠ sōmō̍ ru̠drō bṛha̠spati̠ḥ paya̍si vā̠yuḥ paya̠-ssōmō̍ vā̠yuri̍ndrā̠gnī mi̠tra indra̠ āpō̠ brahma̍ ya̠mō̍-‘bhiji̍tyai̠ tvaṣṭā̎ pra̠jāpa̍tiḥ pra̠jāyai̍ paurṇamā̠syā a̍māvā̠syā̍yā̠ āga̍tyai̠ viśvē̠ jityā̍
a̠śvinau̠ śrutyai̎ । brahma̠ tadē̠taṃ viṣṇu̠-ssa ē̠taṃ vā̠yu-ssa ē̠tadāpa̠stāḥ । pi̠tarō̠ viśvē̠ vasa̍vō-‘kāmayanta̠mēti̠ ta ē̠ta-nnira̍vapann । āpō̍-‘kāmayanta̠ mēti̠ tā ē̠ta-nnira̍vapann । i̠ndrā̠gnī a̠śvinā̍vakāmayētā̠ṃ vēti̠ tāvē̠ta-nnira̍vapadām । a̠hō̠rā̠trē vā a̍kāmayētā̠miti̠ tē ē̠ta-nnira̍vapatām ।
a̠nyatrā̍kāmayata̠miti̠ sa ē̠ta-nnira̍vapat । i̠ndrā̠gnī śraiṣṭhya̠mindrō̠ jyaiṣṭhya̠mindrō̍ dṛ̠ḍhaḥ ।
āhi̠-ssūryō-‘di̍tyai̠ viṣṇa̍vē prati̠ṣṭhāyai̎ ।
sōmō̍ ya̠ma-ssa̍mā̠nānā̎m । a̠gnirnō̍ rīriṣada̠nyatra̍ rīriṣaḥ]

[vi̠duṣō̍ ha̠viṣā̠ ya u̍ chainadē̠vaṃ vēda̍ । iṣṭi̍bhi̠rya u̍ chainā ē̠vaṃ vēda̍ ।
a̠nyatra̍ brāhma̠ṇē ya u̍ chainamē̠vaṃ vēda̍ ]

phrapātaka khōrvai vi-thstarting phadams of 1 to 6 ānuvākams ḥ-
(a̠gnirna̍-ṛ̠ddhyāsma̠-navō̍navō̠-‘gni-rmi̠tra – ścha̠ndramā̠-ṣṣaṭ)

(a̠gnirna̠ – stannō̍ vā̠yu – rahi̍rbū̠ddhniya̍ – ṛ̠kṣā vā i̠ya – mathai̠ta-tpau̎rṇamā̠syā – a̠jō vā ēka̍pā̠th – sūrya̠ striṣa̍ṣṭiḥ)

(a̠gnirna̍ḥ – pātu prati̠ṣṭhāyai̠ svāhēti̍ )
॥ hari̍ḥ ōm ॥

॥ kṛṣṇa yajurvēdīya taittirīya brāhmaṇē tṛtīyāṣṭakē prathamaḥ prapāṭhaka-ssamāptaḥ ॥