KYTB 2.8 Kamyapashu Yajyanuvakya Brahmanam – Krishna Yajurveda Taittiriya Brahmana Patha – Pivonnam Rayivrudhah

kṛṣṇa yajurvēdīya taittirīya brāhmaṇē dvitīyāṣṭakē aṣṭamaḥ prapāṭhakaḥ – kāmyapaśuyājyānuvākyā brāhmaṇam

ō-nnamaḥ paramātmanē, śrī mahāgaṇapatayē namaḥ,
śrī gurubhyō namaḥ । ha̠ri̠ḥ ōm ॥

anuvākaṃ 1 – vāyavyādipaśūnāṃ sūktāni

pīvō̎nnāgṃ rayi̠vṛdha̍-ssumē̠dhāḥ । śvē̠ta-ssi̍ṣakti ni̠yutā̍mabhi̠śrīḥ । tē vā̠yavē̠ sama̍nasō̠ vita̍sthuḥ । viśvēnnara̍-ssvapa̠tyāni̍ chakruḥ ॥ rā̠yē-‘nu ya-ñja̠jñatū̠ rōda̍sī u̠bhē । rā̠yē dē̠vī dhi̠ṣaṇā̍ dhāti dē̠vam । adhā̍ vā̠yu-nni̠yuta̍-ssaśchata̠ svāḥ । u̠ta śvē̠taṃ vasu̍dhiti-nnirē̠kē ॥ ā vā̍yō bhūṣa śuchipā̠ upa̍ na-ssa̠hasra̍-ntē ni̠yutō̍ viśvavāra । upō̍ tē̠ andhō̠ madya̍mayāmi̠ yasya̍ dēva dadhi̠ṣē pū̎rva̠pēya̎m ॥ pra yābhi̠ryāsi̍ dā̠śvāgṃ samachChā̍ ni̠yudbhi̍-rvāyavi̠ṣṭayē̍ durō̠ṇē । ni nō̍ ra̠yigṃ su̠bhōja̍saṃ yuvē̠ha ni vī̠rava̠-dgavya̠maśvi̍ya-ñcha̠ rādha̍ḥ ॥॥ pra vā̠yumachChā̍ bṛha̠tī ma̍nī̠ṣā ॥ 1 ॥

bṛ̠hadra̍yiṃ vi̠śvavā̍rāgṃ ratha̠prām । dyu̠tadyā̍mā ni̠yuta̠ḥ patya̍mānaḥ । ka̠viḥ ka̠vimi̍yakṣasi prayajyō ॥ ā nō̍ ni̠yudbhi̍-śśa̠tinī̍bhi-raddhva̠ram । sa̠ha̠sriṇī̍bhi̠rupa̍ yāhi ya̠jñam । vāyō̍ a̠smin. ha̠viṣi̍ mādayasva । yū̠ya-mpā̍ta sva̠stibhi̠-ssadā̍ naḥ ॥ prajā̍patē̠ na tvadē̠tānya̠nyaḥ । viśvā̍ jā̠tāni̠ pari̠ tā ba̍bhūva । ya-tkā̍māstē juhu̠mastannō̍ astu ॥ 2 ॥

va̠yagg​ syā̍ma̠ pata̍yō rayī̠ṇām ॥ ra̠yī̠ṇā-mpati̍ṃ yaja̠ta-mbṛ̠hanta̎m । a̠sminbharē̠ nṛta̍ma̠ṃ vāja̍sātau । pra̠jāpa̍ti-mprathama̠jāmṛ̠tasya̍ । yajā̍ma dē̠vamadhi̍ nō bravītu ॥ prajā̍patē̠ tva-nni̍dhi̠pāḥ pu̍rā̠ṇaḥ । dē̠vānā̎-mpi̠tā ja̍ni̠tā pra̠jānā̎m । pati̠-rviśva̍sya̠ jaga̍taḥ para̠spāḥ । ha̠virnō̍ dēva viha̠vē ju̍ṣasva ॥ tavē̠mē lō̠kāḥ pra̠diśō̠ diśa̍ścha ॥ 3 ॥

pa̠rā̠vatō̍ ni̠vata̍ u̠dvata̍ścha । prajā̍patē viśva̠sṛjjī̠vadha̍nya i̠da-nnō̍ dēva । prati̍harya ha̠vyam ॥ pra̠jāpa̍ti-mpratha̠maṃ ya̠jñiyā̍nām । dē̠vānā̠magrē̍ yaja̠taṃ ya̍jaddhvam । sa nō̍ dadātu̠ dravi̍ṇagṃ su̠vīrya̎m । rā̠yaspōṣa̠ṃ viṣya̍tu̠ nābhi̍ma̠smē ॥ yō rā̠ya īśē̍ śatadā̠ya u̠kthya̍ḥ । yaḥ pa̍śū̠nāgṃ ra̍kṣi̠tā viṣṭhi̍tānām । pra̠jāpa̍tiḥ prathama̠jā ṛ̠tasya̍ ॥ 4 ॥

sa̠hasra̍dhāmā juṣatāgṃ ha̠virna̍ḥ ॥ sōmā̍pūṣaṇā̠ jana̍nā rayī̠ṇā-ñjana̍nā di̠vō jana̍nā pṛthi̠vyāḥ । jā̠tau viśva̍sya̠ bhuva̍nasya gō̠pau dē̠vā a̍kṛṇvanna̠mṛta̍sya̠ nābhi̎m ॥ i̠mau dē̠vau jāya̍mānau juṣantē̠mau tamāgṃ̍si gūhatā̠maju̍ṣṭā । ā̠bhyāmindra̍ḥ pa̠kvamā̠māsva̠nta-ssō̍māpū̠ṣabhyā̎-ñjanadu̠sriyā̍su ॥ ॥ sōmā̍pūṣaṇā̠ raja̍sō vi̠māna̎m । sa̠ptacha̍kra̠gṃ̠ ratha̠mavi̍śvaminvam । vi̠ṣū̠vṛta̠-mmana̍sā yu̠jyamā̍nam । ta-ñji̍nvathō vṛṣaṇā̠ pañcha̍raśmim ॥ di̠vya̍nya-ssada̍na-ñcha̠kra u̠chchā । pṛ̠thi̠vyāma̠nyō addhya̠ntari̍kṣē । tāva̠smabhya̍-mpuru̠vāra̍-mpuru̠kṣum । rā̠yaspōṣa̠ṃ viṣya̍tā̠-nnābhi̍ma̠smē ॥ 5 ॥

dhiya̍-mpū̠ṣā ji̍nvatu viśvami̠nvaḥ । ra̠yigṃ sōmō̍ rayi̠pati̍-rdadhātu । ava̍tu dē̠vyadi̍tira-na̠rvā । bṛ̠ha-dva̍dēma vi̠dathē̍ su̠vīrā̎ḥ ॥ viśvā̎nya̠nyō bhuva̍nā ja̠jāna̍ । viśva̍ma̠nyō a̍bhi̠chakṣā̍ṇa ēti । sōmā̍pūṣaṇā̠-vava̍ta̠-ndhiya̍-mmē । yu̠vabhyā̠ṃ viśvā̠ḥ pṛta̍nā jayēma ॥ udu̍tta̠maṃ va̍ruṇa̠ pāśa̍ma̠smadavā̍-‘dha̠maṃ vima̍dhya̠magg​ śra̍thāya । athā̍ va̠yamā̍ditya vra̠tē tavā-‘nā̍gasō̠ adi̍tayē syāma asta̍bhnā̠dyāmṛ̍ṣa̠bhō a̠ntari̍kṣa̠mami̍mīta vari̠māṇa̍-mpṛthi̠vyā ā-‘sī̍da̠-dviśvā̠ bhuva̍nāni sa̠mrā-ḍviśvēttāni̠ varu̍ṇasya vra̠tāni̍ ॥ । ya-tkiñchē̠daṃ va̍ruṇa̠ daivyē̠ janē̍-‘bhidrō̠ha-mma̍nu̠ṣyā̎ścharā̍masi । achi̍ttī̠ya-ttava̠ dharmā̍ yuyōpi̠ma mā na̠stasmā̠ dēna̍sō dēva rīriṣaḥ ॥ ki̠ta̠vāsō̠ yadri̍ ri̠purna dī̠vi yadvā̍ ghā sa̠tya mu̠tayanna vi̠dma । sarvā̠ tā viṣya̍ śithi̠rēva̍ dē̠vāthā̍ tē syāma varuṇa pri̠yāsa̍ḥ ॥( ) । ava̍ tē̠ hēḍō̍ varuṇa̠ namō̍bhi̠rava̍ ya̠jñēbhi̍rīmahē ha̠virbhi̍ḥ । kṣaya̍nna̠smabhya̍masura prachētō̠ rāja̠nnēnāgṃ̍si śiśrathaḥ kṛ̠tāni̍ ॥, tattvā̍ yāmi̠ brahma̍ṇā̠ vanda̍māna̠stadā śā̎stē̠ yaja̍mānō ha̠virbhi̍ḥ । ahē̍ḍamānō varuṇē̠ha bō̠dhyuru̍śagṃsa̠ mā na̠ āyu̠ḥ pramō̍ṣīḥ ॥ ॥ ā̠di̠tyānā̠mava̍sā̠ nūta̍nēna sakṣī̠mahi̠ śarma̍ṇā̠ śanta̍mēna । a̠nā̠gā̠stvē a̍diti̠tvē tu̠rāsa̍ i̠maṃ ya̠jña-nda̍dhatu̠ śrōṣa̍māṇāḥ ॥, na da̍kṣi̠ṇā vichi̍kitē̠ na sa̠vyā na prā̠chīna̍mādityā̠ nōta pa̠śchā । pā̠kyā̍ chidvasavō dhī̠ryā̍ chi–dyu̠ṣmānī̍tō̠ abha̍ya̠-ñjyōti̍raśyām ॥ । dhā̠raya̍nta ādi̠tyāsō̠ jaga̠thsthā dē̠vā viśva̍sya̠ bhuva̍nasya gō̠pāḥ । dī̠rghādhi̍yō̠ rakṣa̍māṇā asu̠rya̍mṛ̠tāvā̍na̠-śchaya̍mānā ṛ̠ṇāni̍ ॥, ti̠srō bhūmī̎rdhāraya̠-ntrīgṃ ru̠ta dyū-ntrīṇi̍ vra̠tā vi̠dathē̍ a̠ntarē̍ṣām । ṛ̠tēnā̍-”dityā̠ mahi̍ vō mahi̠tva-ntada̍ryaman varuṇa mitra̠ chāru̍ ॥ । ya̠jñō dē̠vānā̠-mpratyē̍ti su̠mnamādi̍tyāsō̠ bhava̍tā mṛḍa̠yanta̍ḥ । ā vō̠-‘rvāchī̍ suma̠ti rva̍vṛtyāda̠gṃ̠ hōśchi̠dyā va̍rivō̠vitta̠rā-‘sa̍t ॥ śuchi̍ra̠pa-ssū̠yava̍sā̠ ada̍bdha̠ upa̍ kṣēti vṛ̠ddhava̍yā-ssu̠vīra̍ḥ । naki̠ṣṭa-ṅghna̠ntyanti̍tō̠ na dū̠rādya ā̍di̠tyānā̠-mbhava̍ti̠ praṇī̍tau ॥ ॥ 6 ॥
(ma̠nī̠ṣā-‘stu̍-cha̠-rta-syā̠smē-ki̍ta̠vāsa̍ ścha̠tvāri̍ cha ) (a. 1)

anuvākaṃ 2 – vaśādīnāṃ sūktāni
tē śu̠krāsa̠-śśucha̍yō raśmi̠vanta̍ḥ । sīda̍nnādi̠tyā adhi̍ ba̠ra̠.hiṣi̍ pri̠yē । kāmē̍na dē̠vā-ssa̠ratha̍-ndi̠vō na̍ḥ । āyā̎mtu ya̠jñamupa̍ nō juṣā̠ṇāḥ ॥ tē sū̠navō̠ adi̍tēḥ pīva̠sāmiṣa̎m । ghṛ̠ta-mpinva̠t-prati̍haryannṛtē̠jāḥ । pra ya̠jñiyā̠ yaja̍mānāya yēmurē । ā̠di̠tyāḥ kāma̍-mpitu̠manta̍ma̠smē ॥ ā na̍ḥ pu̠trā adi̍tēryāntu ya̠jñam । ā̠di̠tyāsa̍ḥ pa̠thibhi̍-rdēva̠yānai̎ḥ ॥ 7 ॥

a̠smē kāma̍-ndā̠śuṣē̍ sa̠nnama̍ntaḥ । pu̠rō̠ḍāśa̍-ṅghṛ̠tava̍nta-ñjuṣantām ॥ ska̠bhā̠yata̠ nir-ṛ̍ti̠gṃ̠ sēdha̠tāma̍tim । pra ra̠śmibhi̠-ryata̍mānā amṛddhrāḥ । ādi̍tyā̠ḥ kāma̠ praya̍tā̠ṃ vaṣa̍ṭkṛtim । ju̠ṣaddhva̍-nnō ha̠vyadā̍tiṃ yajatrāḥ ॥ ā̠di̠tyān-kāma̠mava̍sē huvēma । yē bhū̠tāni̍ ja̠naya̍ntō vichi̠khyuḥ । sīda̍ntu pu̠trā adi̍tēru̠pastha̎m । stī̠rṇa-mba̠ra̠.hir​ha̍vi̠radyā̍ya dē̠vāḥ ॥ 8 ॥

stī̠rṇa-mba̠ra̠.hi-ssī̍datā ya̠jñē a̠sminn । dhrā̠jā-ssēdha̍ntō̠ ama̍ti-ndu̠rēvā̎m । a̠smabhya̍-mputrā aditē̠ḥ prayagṃ̍sata । ādi̍tyā̠ḥ kāma̍ ha̠viṣō̍ juṣā̠ṇāḥ ॥ agnē̠ naya̍ su̠pathā̍ rā̠yē a̠smān । viśvā̍ni dēva va̠yunā̍ni vi̠dvān । yu̠yō̠ddhya̍sma-jju̍hurā̠ṇamēna̍ḥ । bhūyi̍ṣṭhā-ntē̠ nama̍ uktiṃ vidhēma ॥ prava̍-śśu̠krāya̍ bhā̠navē̍ bharaddhvam । ha̠vya-mma̠ti-ñchā̠gnayē̠ supū̍tam ॥ 9 ॥

yō daivyā̍ni̠ mānu̍ṣā ja̠nūgṃṣi̍ । a̠nta-rviśvā̍ni vi̠dmanā̠ jigā̍ti ॥ achChā̠ girō̍ ma̠tayō̍ dēva̠yantī̎ḥ । a̠gniṃ ya̍nti̠ dravi̍ṇa̠-mbhikṣa̍māṇāḥ । su̠sa̠dṛṃśagṃ̍ su̠pratī̍ka̠gg̠ svañcha̎m । ha̠vya̠vāha̍mara̠ti-mmānu̍ṣāṇām ॥ agnē̠ tvama̠sma-dyu̍yō̠ddhyamī̍vāḥ । ana̍gnitrā a̠bhya̍manta kṛ̠ṣṭīḥ । puna̍ra̠smabhyagṃ̍ suvi̠tāya̍ dēva । kṣāṃ viśvē̍bhira̠jarē̍bhi-ryajatra ॥ 10 ॥

agnē̠ tva-mpā̍rayā̠ navyō̍ a̠smān । sva̠stibhi̠rati̍ du̠rgāṇi̠ viśvā̎ । pūścha̍ pṛ̠thvī ba̍hu̠lā na̍ u̠rvī । bhavā̍ tō̠kāya̠ tana̍yāya̠ śaṃ yōḥ ॥ pra kā̍ravō mana̠nā va̠chyamā̍nāḥ । dē̠va̠drīchī̎-nnayatha dēva̠yanta̍ḥ । da̠kṣi̠ṇā̠vāḍ-vā̠jinī̠ prāchyē̍ti । ha̠virbhara̍ntya̠gnayē̍ ghṛ̠tāchī̎ ॥ indra̠-nnarō̍ nē̠madhi̍tā havantē̠ yatpāryā̍ yu̠naja̍tē̠ dhiya̠stāḥ । śūrō̠ nṛṣā̍tā̠ śava̍saśchakā̠na ā gōma̍ti vra̠jē bha̍jā̠ tvanna̍ḥ ॥ yu̠jē ratha̍-ṅga̠vēṣa̍ṇa̠gṃ̠ hari̍bhyām । upa̠ brahmā̍ṇi jujuṣā̠ṇa-ma̍sthuḥ । vibā̍dhiṣṭā̠sya rōda̍sī mahi̠tvā । indrō̍ vṛ̠trāṇya̍pra̠tī ja̍gha̠nvān ॥ ॥ ja̠gṛ̠bhṇā tē̠ dakṣi̍ṇamindra̠ hasta̎m ॥ 11 ॥

va̠sū̠yavō̍ vasupatē̠ vasū̍nām । vi̠dmā hi tvā̠ gōpa̍tigṃ śūra̠ gōnā̎m । a̠smabhya̍-ñchi̠traṃ vṛṣa̍ṇagṃ ra̠yi-ndā̎ḥ ॥ tavē̠daṃ viśva̍ma̠bhita̍ḥ paśa̠vya̎m । ya-tpaśya̍si̠ chakṣa̍sā̠ sūrya̍sya । gavā̍masi̠ gōpa̍ti̠rēka̍ indra । bha̠kṣī̠mahi̍ tē̠ praya̍tasya̠ vasva̍ḥ ॥ sami̍ndra ṇō̠ mana̍sā nēṣi̠ gōbhi̍ḥ । sagṃ sū̠ribhi̍-rmaghava̠n-thsagg​ sva̠styā । sa-mbrahma̍ṇā dē̠vakṛ̍ta̠ṃ yadasti̍ ॥ 12 ॥

sa-ndē̠vānāgṃ̍ suma̠tyā ya̠jñiyā̍nām ॥ ā̠rāchChatru̠-mapa̍bādhasva dū̠ram । u̠grō ya-śśamba̍ḥ puruhūta̠ tēna̍ । a̠smē dhē̍hi̠ yava̍ma̠dgōma̍dindra । kṛ̠dhī dhiya̍-ñjari̠trē vāja̍ratnām ॥ āvē̠dhasa̠-nnīla̍pṛṣṭha-mbṛ̠hanta̎m । bṛha̠spati̠gṃ̠ sada̍nē sādayadhvam । sā̠dadyō̍ni̠-ndama̠ ādī̍di̠vāgṃsa̎m । hira̍ṇyavarṇamaru̠ṣagṃ sa̍pēma ॥ sa hi śuchi̍ḥ ॥ bṛha̠spati̍ḥ pratha̠ma-ñjāya̍mānaḥ । ma̠hō jyōti̍ṣaḥ para̠mē vyō̍mann । sa̠ptāsya̍stuvijā̠tō ravē̍ṇa । vi sa̠ptara̍śmiradhama̠ttamāgṃ̍si ॥ 13 ॥

bṛha̠spati̠-ssama̍jaya̠-dvasū̍ni । ma̠hō vra̠jā-ngōma̍tō dē̠va ē̠ṣaḥ । a̠pa-ssiṣā̍sa̠n-thsuva̠ra pra̍tīttaḥ । bṛha̠spati̠ra̠.hantya̠mitra̍-ma̠rkaiḥ ॥ bṛha̍spatē̠ pari̍ dīyā̠ rathē̍na rakṣō̠hā ‘mitrāgṃ̍ apa̠ bādha̍mānaḥ । pra̠bha̠ñjan-thsēnā̎ḥ pramṛ̠ṇō yu̠dhā jaya̍nna̠smāka̍-mēdhyavi̠tā rathā̍nām ॥ ē̠vā pi̠trē vi̠śvadē̍vāya̠ vṛṣṇē̍ ya̠jñairvi̍dhēma̠ nama̍sā ha̠virbhi̍ḥ । bṛha̍spatē supra̠jā vī̠rava̍ntō va̠yagg​ syā̍ma̠ pata̍yō rayī̠ṇām ॥ ॥ ā nō̍ di̠vō bṛ̍ha̠taḥ parva̍tā̠dā sara̍svatī yaja̠tā ga̍ntu ya̠jñam । hava̍-ndē̠vī ju̍juṣā̠ṇā ghṛ̠tāchī̍ śa̠gmā-nnō̠ vācha̍muśa̠tī śṛ̍ṇōtu ॥pāvī̍ravī ka̠nyā̍ chi̠trāyu̠-ssara̍svatī vī̠rapa̍tnī̠ dhiya̍-ndhāt । gnābhi̠rachChi̍dragṃ śara̠ṇagṃ sa̠jōṣā̍ durā̠dhar​ṣa̍-ṅgṛṇa̠tē śarma̍ yagṃsat ॥ । i̠mā juhvā̍nā yu̠ṣmadā namō̍bhiḥ । prati̠ stōmagṃ̍ sarasvati juṣasva । tava̠ śarma̍-npri̠yata̍mē̠ dadhā̍nāḥ । upa̍sthēyāma śara̠ṇa-nna vṛ̠kṣam ॥ yastē̠ stana̍śśaśa̠ya ityā̍ha । stautyē̠vainā̎m । usra̍ gha̠rmagṃ śi̠gṃ̠ṣōsra̍ gha̠rma-mpā̍hi gha̠rmāya̍ śi̠gṃ̠ṣētyā̍ha । yathā̎ brū̠yāda̠muṣmai̍ dē̠hīti̍ । tā̠dṛgē̠va tat । bṛha̠spati̠stvōpa̍ sīda̠tvityā̍ha । । sara̍svatya̠bhi nō̍ nēṣi̠ vasya̍ḥ । mā pa̍spharī̠ḥ paya̍sā̠ mā na̠ ā dha̍k । ju̠ṣasva̍ na-ssa̠khyā̍ vē̠śyā̍ cha । mā tvatkṣētrā̠-ṇyara̍ṇāni ganma ॥ ॥ i̠yagṃ śuṣmē̍bhirbisa̠khā i̍vārujat । sānu̍ girī̠ṇā-nta̍vi̠ṣēbhi̍rū̠rmibhi̍ḥ । pā̠rā̠va̠da̠ghnīmava̍sē suvṛ̠ktibhi̍ḥ । sara̍svatī̠-māvi̍vāsēma dhī̠tibhi̍ḥ ॥ 14 ॥
(dē̠va̠yānai̎–r dē̠vāḥ – supū̍taṃyajatra̠-hasta̠-masti̠-tamāg̍-syū̠rmibhi̠-rdvē cha̍) (a. 2)

anuvākaṃ 3 – saumyādīnāṃ sūktāni
sōmō̍ dhē̠nugṃ sōmō̠ arva̍ntamā̠śum । sōmō̍ vī̠ra-ṅka̍rma̠ṇya̍-ndadātu । sā̠da̠nya̍ṃ vida̠thyagṃ̍ sa̠bhēya̎m । pi̠tu̠-śśrava̍ṇa̠ṃ yō dadā̍śadasmai ॥ aṣā̍ḍhaṃ yu̠thsu pṛta̍nāsu̠ papri̎m । su̠va̠r̠ṣāma̠phsvāṃ vṛ̠jana̍sya gō̠pām । bha̠rē̠ṣu̠jāgṃ su̍kṣi̠tigṃ su̠śrava̍sam । jaya̍nta̠-ntvāmanu̍ madēma sōma ॥ tvagṃ sō̍ma̠ kratu̍bhiḥ ॥ yā tē̠ dhāmā̍ni ha̠viṣā̠ yaja̍nti̠ tā tē̠ viśvā̍ pari̠bhūra̍stu ya̠jña-ṅga̍ya̠sphāna̍ḥ pra̠tara̍ṇa-ssu̠vīrō-‘vī̍rahā̠ pracha̍rā sōma̠ duryā̠na॥ tvami̠mā ōṣa̍dhī-ssōma̠ viśvā̎ḥ । tvama̠pō a̍janaya̠stva-ṅgāḥ । tvamāta̍tanthō̠rva̍ntari̍kṣam । tva-ñjyōti̍ṣā̠ vitamō̍ vavartha ॥ 15 ॥

yā tē̠ dhāmā̍ni di̠vi yā pṛ̍thi̠vyām । yā parva̍tē̠ṣvōṣa̍dhīṣva̠phsu । tēbhi̍rnō̠ viśvai̎-ssu̠manā̠ ahē̍ḍann । rājan̎-thsōma̠ prati̍ ha̠vyā gṛ̍bhāya ॥ viṣṇō̠rnuka̍ṃ vī̠ryā̍ṇi̠ pra vō̍cha̠ṃ yaḥ pārthi̍vāni vima̠mē rajāgṃ̍si̠ yō aska̍bhāya̠dutta̍ragṃ sa̠dhastha̍ṃ vichakramā̠ṇa strē̠dhōru̍gā̠yō viṣṇō̍ ra̠rāṭa̍masi̠ viṣṇō̎ḥ pṛ̠ṣṭhama̍si̠ viṣṇō̠-śśnyaptrē̎ sthō̠ viṣṇō̠-ssyūra̍si̠ viṣṇō̎-rdhru̠vama̍si vaiṣṇa̠vama̍si̠ viṣṇa̍vē tvā ॥ tada̍sya pri̠yama̠bhi pāthō̍ aśyām । narō̠ yatra̍ dēva̠yavō̠ mada̍nti । u̠ru̠kra̠masya̠ sa hi bandhu̍ri̠tthā । viṣṇō̎ḥ pa̠dē pa̍ra̠mē madhva̠ uthsa̍ḥ ॥ । prata-dviṣṇu̍-sstavatē vī̠ryā̍ya । mṛ̠gō na bhī̠maḥ ku̍cha̠rō gi̍ri̠ṣṭhāḥ । yasyō̠ruṣu̍ tri̠ṣu vi̠krama̍ṇēṣu । adhi̍kṣi̠yanti̠ bhuva̍nāni̠ viśvā̎ ॥ ॥ pa̠rō mātra̍yā ta̠nuvā̍ vṛdhāna । na tē̍ mahi̠tva-manva̍śnuvanti । u̠bhē tē̍ vidma̠ raja̍sī pṛthi̠vyā viṣṇō̍ dēva̠ tvam । pa̠ra̠masya̍ vithsē ॥ 16 ॥

vicha̍kramē pṛthi̠vīmē̠ṣa ē̠tām । kṣētrā̍ya̠ viṣṇu̠-rmanu̍ṣē daśa̠syann । dhru̠vāsō̍ asya kī̠rayō̠ janā̍saḥ । u̠ru̠kṣi̠tigṃ su̠jani̍mā chakāra ॥ trirdē̠vaḥ pṛ̍thi̠vīmē̠ṣa ē̠tām । vicha̍kramē śa̠tarcha̍sa-mmahi̠tvā । pra viṣṇu̍-rastu ta̠vasa̠sta vī̍yān । tvē̠ṣagg​ hya̍sya̠ sthavi̍rasya̠ nāma̍ ॥ ॥ ā tē̍ ma̠ha i̍ndrō̠tyu̍gra̠ sama̍nyavō̠ ya-thsa̠mara̍nta̠ sēnā̎ḥ । patā̍ti di̠dyunnarya̍sya bāhu̠vōrmā tē̠ manō̍ viṣva̠driya̠gvi chā̍rīt ॥ yō jā̠ta ē̠va pra̍tha̠mō mana̍svā-ndē̠vō dē̠vān kratu̍nā pa̠ryabhū̍ṣat । yasya̠ śuṣmā̠drōda̍sī̠ abhya̍sētā-nnṛ̠mṇasya̍ ma̠hnā sa ja̍nāsa̠ indra̍ḥ ॥ । a̠bhi gō̠trāṇi̠ saha̍sā̠ gāha̍mānō-‘dā̠yō vī̠ra-śśa̠tama̍nyu̠rindra̍ḥ । du̠śchya̠va̠naḥ pṛ̍tanā̠ṣāḍa̍ yu̠dhyō̎-smāka̠gṃ̠ sēnā̍ avatu̠ pra yu̠thsu ॥ ॥ ābhi̠-sspṛdhō̍ mitha̠tī- rari̍ṣaṇyann । a̠mitra̍sya vyathayā ma̠nyumi̍ndra । ābhi̠rviśvā̍ abhi̠yujō̠ viṣū̍chīḥ । āryā̍ya̠ viśō-‘va̍tārī̠rdāsī̎ḥ ॥ a̠yagṃ śṛ̍ṇvē̠ adha̠ jaya̍nnu̠ta ghnann । a̠yamu̠ta prakṛ̍ṇutē yu̠dhā gāḥ । ya̠dā sa̠tya-ṅkṛ̍ṇu̠tē ma̠nyumindra̍ḥ ॥ 17 ॥

viśva̍-ndṛ̠ḍha-mbha̍yata̠ ēja̍dasmāt ॥ anu̍ sva̠dhā-ma̍kṣara̠nnāpō̍ asya । ava̍rdhata̠ maddhya̠ ā nā̠vyā̍nām । sa̠ddhrī̠chīnē̍na̠ mana̍sā̠ tami̍ndra̠ ōji̍ṣṭhēna । hanma̍nā-‘hanna̠bhidyūn ॥ ma̠rutva̍ntaṃ vṛṣa̠bhaṃ vā̍vṛdhā̠nam । aka̍vāri-ndi̠vyagṃ śā̠samindra̎m । vi̠śvā̠sāha̠mava̍sē̠ nūta̍nāya । u̠gragṃ sa̍hō̠dāmi̠ha tagṃ hu̍vēma ॥ jani̍ṣṭhā u̠gra-ssaha̍sē tu̠rāya̍ ॥ 18 ॥

ma̠ndra ōji̍ṣṭhō bahu̠lābhi̍mānaḥ । ava̍rdha̠nnindra̍-mma̠ruta̍śchi̠datra̍ । mā̠tā ya-dvī̠ra-nda̠dhana̠ddhani̍ṣṭhā ॥ kva̍ syā vō̍ maruta-ssva̠dhā-”sī̎t । ya-nmāmēkagṃ̍ sa̠madha̍ttāhi̠hatyē̎ । a̠hagg​ hyu̍grasta̍vi̠ṣa-stuvi̍ṣmān । viśva̍sya̠ śatrō̠rana̍maṃ vadha̠snaiḥ ॥ vṛ̠trasya̍ tvā śva̠sathā̠dīṣa̍māṇāḥ । viśvē̍ dē̠vā a̍jahu̠ryē sakhā̍yaḥ । ma̠rudbhi̍rindra sa̠khya-ntē̍ astu ॥ 19 ॥

athē̠mā viśvā̠ḥ pṛta̍nā jayāsi ॥ vadhī̎ṃ vṛ̠tra-mma̍ruta indri̠yēṇa̍ । svēna̠ bhāmē̍na tavi̠ṣō ba̍bhū̠vān । a̠hamē̠tā mana̍vē vi̠śvaścha̍ndrāḥ । su̠gā a̠paścha̍kara̠ vajra̍bāhuḥ ॥ sa yō vṛṣā̠ vṛṣṇi̍yēbhi̠-ssamō̍kāḥ । ma̠hō di̠vaḥ pṛ̍thi̠vyāścha̍ sa̠mrāṭ । sa̠tī̠nasa̍ttvā̠ havyō̠ bharē̍ṣu । ma̠rutvā̎nnō bhava̠tvindra̍ ū̠tī ॥ indrō̍ vṛ̠trama̍tara-dvṛtra̠tūryē̎ ॥ 20 ॥

a̠nā̠dhṛ̠ṣyō ma̠ghavā̠ śūra̠ indra̍ḥ । anvē̍na̠ṃ viśō̍ amadanta pū̠rvīḥ । a̠yagṃ rājā̠ jaga̍taśchar​ṣaṇī̠nām ॥ sa ē̠va vī̠ra-ssa u̍ vī̠ryā̍vān । sa ē̍karā̠jō jaga̍taḥ para̠spāḥ । ya̠dā vṛ̠tramata̍ra̠chChūra̠ indra̍ḥ । athā̍ bhavaddami̠tā-‘bhikra̍tūnām ॥ indrō̍ ya̠jñaṃ va̠rdhaya̍n vi̠śvavē̍dāḥ । pu̠rō̠ḍāśa̍sya juṣatāgṃ ha̠virna̍ḥ । vṛ̠tra-ntī̠rtvā dā̍na̠vaṃ vajra̍bāhuḥ ॥ 21 ॥

diśō̍-‘dṛgṃ haddṛgṃhi̠tā dṛgṃha̍ṇēna ॥ i̠maṃ ya̠jñaṃ va̠rdhaya̍n vi̠śvavē̍dāḥ । pu̠rō̠ḍāśa̠-mprati̍gṛbhṇā̠tvindra̍ḥ । ya̠dā vṛ̠tramata̍ra̠chChūra̠ indra̍ḥ । athai̍karā̠jō a̍bhava̠jjanā̍nām ॥ indrō̍ dē̠vāñCha̍mbara̠hatya̍ āvat । indrō̍ dē̠vānā̍- mabhava-tpurō̠gāḥ । indrō̍ ya̠jñē ha̠viṣā̍ vāvṛdhā̠naḥ । vṛ̠tra̠tūrṇō̠ abha̍ya̠gṃ̠ śarma̍ yagṃsat ॥ ya-ssa̠pta sindhū̠gṃ̠ rada̍dhāt-pṛthi̠vyām । ya-ssa̠pta lō̠kānakṛ̍ṇō̠-ddiśa̍ścha । indrō̍ ha̠viṣmā̠n-thsaga̍ṇō ma̠rudbhi̍ḥ । vṛ̠tra̠tūrṇō̍ ya̠jñami̠hōpa̍yāsat ॥ 22 ॥
(va̠va̠rtha̠ – vi̠thsa̠ – indra̍ – stu̠rā – yā̎stu̠ – vṛtra̠tūryē̠ – vajra̍bāhuḥ – pṛthi̠vyā-ntrīṇi̍ cha) (a. 3)

anuvākaṃ 4 – abhimātihaindrādipaśūnāṃ sūktāni
indra̠-stara̍svā-nabhimāti̠hōgraḥ । hira̍ṇyavāśī-riṣi̠ra-ssu̍va̠ra̠.ṣāḥ । tasya̍ va̠yagṃ su̍ma̠tau ya̠jñiya̍sya । api̍ bha̠drē sau̍mana̠sē syā̍ma ॥ hira̍ṇyavarṇō̠ abha̍ya-ṅkṛṇōtu । a̠bhi̠mā̠ti̠hēndra̠ḥ pṛta̍nāsu ji̠ṣṇuḥ । sa na̠-śśarma̍ tri̠varū̍tha̠ṃ viyagṃ̍sat । yū̠ya-mpā̍ta sva̠stibhi̠-ssadā̍ naḥ ॥ indragg̍ stuhi va̠jriṇa̠gg̠ stōma̍pṛṣṭham । pu̠rō̠ḍāśa̍sya juṣatāgṃ ha̠virna̍ḥ ॥ 23 ॥

ha̠tvā-‘bhimā̍tī̠ḥ pṛta̍nā̠-ssaha̍svān । athābha̍ya-ṅkṛṇuhi vi̠śvatō̍ naḥ ॥ stu̠hi śūra̍ṃ va̠jriṇa̠-mapra̍tītam (mapra̍tīttam) । a̠bhi̠mā̠ti̠hana̍-mpuruhū̠tamindra̎m । ya ēka̠ ichCha̠tapa̍ti̠rjanē̍ṣu । tasmā̠ indrā̍ya ha̠virāju̍hōta ॥ indrō̍ dē̠vānā̍madhi̠pāḥ pu̠rōhi̍taḥ । di̠śā-mpati̍rabhava-dvā̠jinī̍vān । a̠bhi̠mā̠ti̠hā ta̍vi̠ṣastuvi̍ṣmān । a̠smabhya̍-ñchi̠traṃ vṛṣa̍ṇagṃ ra̠yi-ndā̎t ॥ 24 ॥

ya i̠mē dyāvā̍pṛthi̠vī ma̍hi̠tvā । balē̠nādṛgṃ̍hadabhimāti̠hēndra̍ḥ । sa nō̍ ha̠viḥ prati̍gṛbhṇātu rā̠tayē̎ । dē̠vānā̎-ndē̠vō ni̍dhi̠pā nō̍ avyāt ॥ ana̍vastē̠ ratha̠maśvā̍ya takṣa̠n-tvaṣṭā̠ vajra̍-mpuruhūta dyu̠manta̎m । bra̠hmāṇa̠ indra̍-mma̠haya̍ntō a̠rkairava̍rdhaya̠nnaha̍yē̠ hanta̠ vā u̍ ॥ vṛṣṇē̠ ya-ttē̠ vṛṣa̍ṇō a̠rkamarchā̠nindra̠ grāvā̍ṇō̠ adi̍ti-ssa̠jōṣā̎ḥ । a̠na̠śvāsō̠ yē pa̠vayō̍-‘ra̠thā indrē̍ṣitā a̠bhyava̍rtanta̠ dasyūn̍ ॥ । indra̍sya̠ nu vī̠ryā̍ṇi̠ pravō̍cham । yāni̍ cha̠kāra̍ pratha̠māni̍ va̠jrī ॥ aha̠-nnahi̠manva̠pasta̍tarda । pra va̠kṣaṇā̍ abhina̠-tparva̍tānām ॥ ॥ indrō̍ yā̠tō-‘va̍sitasya̠ rājā̎ । śama̍sya cha śṛ̠ṅgiṇō̠ vajra̍bāhuḥ । sēdu̠ rājā̎ kṣēti char​ṣaṇī̠nām । a̠rānna nē̠miḥ pari̠tā ba̍bhūva ॥ 25 ॥

a̠bhi si̠ddhmō a̍jigādasya̠ śatrūn̍ । vi ti̠gmēna̍ vṛṣa̠bhēṇā̠ purō̍-‘bhēt । saṃ vajrē̍ṇāsṛja-dvṛ̠tramindra̍ḥ । pra svā-mma̠tima̍tira̠chChāśa̍dānaḥ ॥ viṣṇu̍-ndē̠vaṃ varu̍ṇamū̠tayē̠ bhaga̎m । mēda̍sā dē̠vā va̠payā̍ yajaddhvam । tā nō̍ ya̠jñamāga̍taṃ vi̠śvadhē̍nā । pra̠jāva̍da̠smē dravi̍ṇē̠ha dha̍ttam ॥ mēda̍sā dē̠vā va̠payā̍ yajaddhvam । viṣṇu̍-ñcha dē̠vaṃ varu̍ṇa-ñcha rā̠tim ॥ 26 ॥

tā nō̠ amī̍vā apa̠bādha̍mānau । i̠maṃ ya̠jña-ñju̠ṣamā̍ṇā̠vupēta̎m ॥ viṣṇū̍varuṇā yu̠vama̍ddhva̠rāya̍ naḥ । vi̠śē janā̍ya̠ mahi̠ śarma̍ yachChatam । dī̠rghapra̍yajyū ha̠viṣā̍ vṛdhā̠nā । jyōti̠ṣā-‘rā̍tīrdahata̠-ntamāgṃ̍si ॥ yayō̠rōja̍sā skabhi̠tā rajāgṃ̍si । vī̠ryē̍bhi-rvī̠rata̍mā̠ śavi̍ṣṭhā । yā patyē̍tē̠ apra̍tīttā̠ sahō̍bhiḥ । viṣṇū̍ aga̠nvaru̍ṇā pū̠rvahū̍tau ॥ 27 ॥

viṣṇū̍varuṇā vabhiśasti̠pā vā̎m । dē̠vā ya̍janta ha̠viṣā̍ ghṛ̠tēna̍ । apāmī̍vāgṃ sēdhatagṃ ra̠kṣasa̍ścha । athā̍ dhatta̠ṃ yaja̍mānāya̠ śaṃ yōḥ ॥ a̠gṃ̠hō̠muchā̍ vṛṣa̠bhā su̠pratū̎rtī । dē̠vānā̎-ndē̠vata̍mā̠ śachi̍ṣṭhā । viṣṇū̍varuṇā̠ prati̍haryata-nnaḥ । i̠da-nnarā̠ praya̍tamū̠tayē̍ ha̠viḥ ॥ ma̠hī nu dyāvā̍pṛthi̠vī i̠ha jyēṣṭhē̎ । ru̠chā bha̍vatāgṃ śu̠chaya̍dbhi-ra̠rkaiḥ ॥ 28 ॥

yathsī̠ṃ vari̍ṣṭhē bṛha̠tī vi̍mi̠nvann । nṛ̠vadbhyō̠-‘kṣā pa̍prathā̠nēbhi̠rēvai̎ḥ ॥ pra pū̎rva̠jē pi̠tarā̠ navya̍sībhiḥ । gī̠rbhiḥ kṛ̍ṇuddhva̠gṃ̠ sada̍nē ṛ̠tasya̍ । ā nō̎ dyāvāpṛthivī̠ daivyē̍na । janē̍na yāta̠-mmahi̍ vā̠ṃ varū̍tham ॥ sa ithsvapā̠ bhuva̍nēṣvāsa । ya i̠mē dyāvā̍pṛthi̠vī ja̠jāna̍ । u̠rvī ga̍bhī̠rē raja̍sī su̠mēkē̎ । a̠va̠gṃ̠śē dhīra̠-śśachyā̠ samai̍rat ॥ 29 ॥

bhūri̠-ndvē acha̍rantī̠ chara̍ntam । pa̠dvanta̠-ṅgarbha̍ma̠padī̍ dadhātē । nitya̠-nna sū̠nu-mpi̠trōru̠pasthē̎ । ta-mpi̍pṛtagṃ rōdasī satya̠vācha̎m ॥ i̠da-ndyā̍vāpṛthivī sa̠tyama̍stu । pita̠-rmāta̠-ryadi̠hōpa̍bru̠vē vā̎m । bhū̠ta-ndē̠vānā̍mava̠mē avō̍bhiḥ । vidyāmē̠ṣaṃ vṛ̠jana̍-ñjī̠radā̍num ॥ u̠rvī pṛ̠thvī ba̍hu̠lē dū̠rē a̍ntē । upa̍bruvē̠ nama̍sā ya̠jñē a̠sminn । dadhā̍tē̠ yē su̠bhagē̍ su̠pratū̎rtī । dyāvā̠ rakṣa̍ta-mpṛthi̠vī nō̠ abhvā̎t ॥ yā jā̠tā ōṣa̍dhayō dē̠vēbhya̍striyu̠ga-mpu̠rā । mandā̍mi ba̠bhrūṇā̍ma̠hagṃ śa̠ta-ndhāmā̍ni sa̠pta cha̍ ॥, ati̠ viśvā̎ḥ pari̠ṣṭhā-sstē̠na i̍va vra̠jama̍kramuḥ । ōṣa̍dhaya̠ḥ prāchu̍chyavu̠ rya-tki-ñcha̍ ta̠nuvā̠gṃ̠ rapa̍ḥ ॥ । yā ōṣa̍dhaya̠-ssōma̍rājñī̠ḥ pravi̍ṣṭāḥ pṛthi̠vīmanu̍ । tāsā̠-ntvama̍syutta̠mā praṇō̍ jī̠vāta̍-vēsuva ॥ a̠śvā̠va̠tīgṃ sō̍mava̠tī mū̠rjaya̍ntī̠ mudō̍jasam । ā vi̍thsi̠ sarvā̠ ōṣa̍dhīra̠smā a̍ri̠ṣṭatā̍tayē ॥ । ōṣa̍dhī̠riti̍ mātara̠-stadvō̍ dēvī̠-rupa̍ bruvē । rapāgṃ̍si vighna̠tīri̍ta̠ rapa̍śchā̠taya̍mānāḥ ॥ a̠nyā vō̍ a̠nyāma̍va-tva̠nyā-‘nyasyā̠ upā̍vata । tā-ssarvā̠ ōṣa̍dhaya-ssaṃvidā̠nā i̠da-mmē̠ prāva̍tā̠ vacha̍ḥ ॥ ॥ 30 ॥
(ha̠virnō̍ – dā-d- babhūva – rā̠tiṃ – pū̠rvahū̍tā – va̠rkai – rai̍ra – da̠smi-npañcha cha) (a. 4)

anuvākaṃ 5 – aindrāgnapaśvādīnāṃ sūktāni
śuchi̠-nnu stōma̠-nnava̍jāta-ma̠dyēndrā̎gnī vṛtrahaṇā ju̠ṣēthā̎m । u̠bhā hi vāgṃ̍ su̠havā̠ jōha̍vīmi̠ tā vājagṃ̍ sa̠dya u̍śa̠tē dhēṣṭhā̎ ॥, śnatha̍-dvṛ̠tramu̠ta sa̍nōti̠ vāja̠mindrā̠ yō a̠gnī sahu̍rī sapa̠ryāt । i̠ra̠jyantā̍ vasa̠vya̍sya̠ bhūrē̠-ssaha̍stamā̠ saha̍sā vāja̠yantā̎ ॥ । u̠bhā vā̍mindrāgnī āhu̠vadhyā̍ u̠bhā rādha̍sa-ssa̠ha mā̍da̠yadhyai̎ । u̠bhā dā̠tārā̍vi̠ṣāgṃ ra̍yī̠ṇāmu̠bhā vāja̍sya sā̠tayē̍ huvē vām ॥,pra cha̍r​ṣa̠ṇibhya̍ḥ pṛtanā̠ havē̍ṣu̠ pra pṛ̍thi̠vyā ri̍richāthē di̠vaścha̍ । pra sindhu̍bhya̠ḥ pragi̠ribhyō̍ mahi̠tvā prēndrā̎gnī̠ viśvā̠ bhuva̠nā-‘tya̠nyā ॥ । ā vṛ̍trahaṇā vṛtra̠habhi̠-śśuṣmai̎ḥ । indra̍ yā̠ta-nnamō̍bhiragnē a̠rvāk । yu̠vagṃ rādhō̍bhi̠raka̍vēbhirindra । agnē̍ a̠smē bha̍vatamutta̠mēbhi̍ḥ ॥ gī̠rbhi-rvipra̠ḥ prama̍timi̠chChamā̍naḥ । ī̠̍ ra̠yiṃ ya̠śasa̍-mpūrva̠bhāja̎m । indrā̎gnī vṛtrahaṇā suvajrā । praṇō̠ navyē̍bhistirata-ndē̠ṣṇaiḥ ॥ ॥ brahma̍ṇaspatē̠ tvama̠sya ya̠ntā । sū̠ktasya̍ bōdhi̠ tana̍ya-ñcha jinva । viśva̠-nta-dbha̠draṃ yada̠vanti̍ dē̠vāḥ । bṛ̠hadva̍dēma vi̠dathē̍ su̠vīrā̎ḥ ॥ sa īgṃ̍ sa̠tyēbhi̠-ssakhi̍bhi-śśu̠chadbhi̍ḥ । gōdhā̍yasa̠ṃvi dha̍na̠saira̍tardat । brahma̍ṇa̠spati̠-rvṛṣa̍bhirva̠rāhai̎ḥ ॥ 31 ॥

gha̠rmasvē̍dēbhi̠-rdravi̍ṇa̠ṃ vyā̍naṭ ॥ brahma̍ṇa̠spatē̍-rabhavadyathā va̠śam । sa̠tyō ma̠nyurmahi̠ karmā̍ kariṣya̠taḥ । yō gā u̠dāja̠thsa di̠vē vi chā̍bhajat । ma̠hīva̍ rī̠ti-śśava̍sā sara̠-tpṛtha̍k ॥ indhā̍nō a̠gniṃ va̍navadvanuṣya̠taḥ । kṛ̠tabra̍hmā śūśuva-drā̠taha̍vya̠ it । jā̠tēna̍ jā̠tamati̠ sṛ-tprasṛgṃ̍satē । yaṃ ya̠ṃ yuja̍-ṅkṛṇu̠tē brahma̍ṇa̠spati̍ḥ ॥ brahma̍ṇaspatē su̠yama̍sya vi̠śvahā̎ ॥ 32 ॥

rā̠ya-ssyā̍ma ra̠thyō̍ viva̍svataḥ । vī̠rēṣu̍ vī̠rāgṃ upa̍pṛṅgdhi na̠stvam । yadīśā̍nō̠ brahma̍ṇā̠ vēṣi̍ mē̠ hava̎m ॥ sa ijjanē̍na̠ sa vi̠śā sa janma̍nā । sa pu̠trairvāja̍-mbharatē̠ dhanā̠ nṛbhi̍ḥ । dē̠vānā̠ṃ yaḥ pi̠tara̍mā̠vivā̍sati । śra̠ddhāma̍nā ha̠viṣā̠ brahma̍ṇa̠spati̎m ॥ yāstē̍ pūṣa̠nnāvō̍ a̠nta-ssa̍mu̠drē । hi̠ra̠ṇyayī̍ra̠ntari̍kṣē̠ chara̍nti । yābhi̍ryāsi dū̠tyāgṃ sūrya̍sya । kāmē̍na kṛ̠ta-śśrava̍ i̠chChamā̍naḥ ॥ । śu̠kra-ntē̍ a̠nyadya̍ja̠ta-ntē̍ a̠nyadviṣu̍rūpē̠ aha̍nī̠ dyauri̍vāsi । viśvā̠ hi mā̠yā ava̍si svadhāvō bha̠drā tē̍ pūṣanni̠ha rā̠tira̍stu ॥, pū̠ṣēmā āśā̠ anu̍vēda̠ sarvā̎-ssō a̠smāgṃ abha̍yatamēna nēṣat । sva̠sti̠dā aghṛ̍ṇi̠-ssarva̍vīraḥ । apra̍yuchCha-npu̠ra ē̍tu̠ prajā̠nann ॥ ॥ prapa̍thē pa̠thāma̍janiṣṭa pū̠ṣā ॥ 33 ॥

prapa̍thē di̠vaḥ prapa̍thē pṛthi̠vyāḥ । u̠bhē a̠bhi pri̠yata̍mē sa̠dhasthē̎ । ā cha̠ parā̍ cha charati prajā̠nann ॥ pū̠ṣā su̠bandhu̍rdi̠va ā pṛ̍thi̠vyāḥ । i̠ḍaspati̍-rma̠ghavā̍ da̠smava̍rchāḥ । ta-ndē̠vāsō̠ ada̍du-ssū̠ryāyai̎ । kāmē̍na kṛ̠ta-nta̠vasa̠gg̠ svañcha̎m ॥ a̠jāśva̍ḥ paśu̠pā vāja̍vastyaḥ । dhi̠ya̠ji̠nnvō viśvē̠ bhuva̍nē̠ arpi̍taḥ । aṣṭrā̎-mpū̠ṣā śi̍thi̠rāmu̠dvarī̍vṛjat ॥ 34 ॥

sa̠chaṅkṣā̍ṇō̠ bhuva̍nā dē̠va ī̍yatē ॥ śuchī̍ vō ha̠vyā ma̍ruta̠-śśuchī̍nām । śuchigṃ̍ hinōmyaddhva̠ragṃ śuchi̍bhyaḥ । ṛ̠tēna̍ sa̠tyamṛta̠sāpa̍ āyann । śuchi̍janmāna̠-śśucha̍yaḥ pāva̠kāḥ ॥ pra chi̠trama̠rka-ṅgṛ̍ṇa̠tē tu̠rāya̍ । māru̍tāya̠ svata̍vasē bharaddhvam । yē sahāgṃ̍si̠ saha̍sā̠ saha̍ntē । rēja̍tē agnē pṛthi̠vī ma̠khēbhya̍ḥ ॥ agṃsē̠ṣvā ma̍rutaḥ khā̠dayō̍ vaḥ ॥ 35 ॥

vakṣa̍ssu ru̠kmā upa̍śiśriyā̠ṇāḥ । vi vi̠dyutō̠ na vṛ̠ṣṭibhī̍ ruchā̠nāḥ । anu̍ sva̠dhāmāyu̍dhai̠-ryachCha̍mānāḥ ॥ yā va̠-śśarma̍ śaśamā̠nāya̠ santi̍ । tri̠dhātū̍ni dā̠śuṣē̍ yachCha̠tādhi̍ । a̠smabhya̠-ntāni̍ marutō̠ viya̍nta । ra̠yi-nnō̍ dhatta vṛṣaṇa-ssu̠vīra̎m ॥ i̠mē tu̠ra-mma̠rutō̍ rāmayanti । i̠mē sa̠ha-ssaha̍sa̠ āna̍manti । i̠mē śagṃsa̍ṃ vanuṣya̠tō nipā̎mti ॥ 36 ॥

gu̠rudvēṣō̠ ara̍ruṣē dadhanti ॥ a̠rā i̠vēdacha̍ramā̠ ahē̍va । pra pra̍jāyantē̠ aka̍vā̠ mahō̍bhiḥ । pṛśnē̎ḥ pu̠trā u̍pa̠māsō̠ rabhi̍ṣṭhāḥ । svayā̍ ma̠tyā ma̠ruta̠-ssammi̍mikṣuḥ ॥ anu̍ tē dāyi ma̠ha i̍ndri̠yāya̍ । sa̠trā tē̠ viśva̠manu̍ vṛtra̠hatyē̎ । anu̍ kṣa̠tramanu̠ sahō̍ yajatra । indra̍ dē̠vēbhi̠ranu̍ tē nṛ̠ṣahyē̎ ॥ ya indra̠ śuṣmō̍ maghavantē̠ asti̍ ॥ 37 ॥

śikṣā̠ sakhi̍bhyaḥ puruhūta̠ nṛbhya̍ḥ । tvagṃ hi dṛ̠ḍhā ma̍ghava̠n vichē̍tāḥ । apā̍vṛdhi̠ pari̍vṛti̠-nna rādha̍ḥ ॥ indrō̠ rājā̠ jaga̍taśchar​ṣaṇī̠nām । adhi̠kṣami̠ viṣu̍rūpa̠ṃ yadasti̍ । tatō̍ dadātu dā̠śuṣē̠ vasū̍ni । chōda̠drādha̠ upa̍stutaśchida̠rvāk ॥ tamu̍ ṣṭuhi̠ yō a̠bhibhū̎tyōjāḥ । va̠nvannavā̍taḥ puruhū̠ta indra̍ḥ । aṣā̍ḍhamu̠gragṃ saha̍mānamā̠bhiḥ ॥ 38 ॥

gī̠rbhirva̍rdha vṛṣa̠bha-ñcha̍r​ṣaṇī̠nām ॥ sthū̠rasya̍ rā̠yō bṛ̍ha̠tō ya īśē̎ । tamu̍ ṣṭavāma vi̠dathē̠ṣvindra̎m । yō vā̠yunā̠ jaya̍ti̠ gōma̍tīṣu । pra dhṛ̍ṣṇu̠yā na̍yati̠ vasyō̠ achCha̍ ॥ ā tē̠ śuṣmō̍ vṛṣa̠bha ē̍tu pa̠śchāt । ōtta̠rāda̍dha̠rāgā pu̠rastā̎t । ā vi̠śvatō̍ a̠bhi samē̎tva̠rvām । indra̍ dyu̠mnagṃ suva̍rvaddhēhya̠smē ॥ 39 ॥
(va̠rāhai̎–r vi̠śvahā̍ – ‘janiṣṭa pū̠ṣō – dvarī̍vṛjat – khā̠dayō̍ vaḥ – pā̠n – tyasta – yā̠bhi–r + nava̍ cha) (a. 5)

anuvākaṃ 6 – sāvitrādipaśūnāṃ sūktāni
ā dē̠vō yā̍tu savi̠tā su̠ratna̍ḥ । a̠nta̠ri̠kṣa̠prā vaha̍mānō̠ aśvai̎ḥ । hastē̠ dadhā̍nō̠ naryā̍ pu̠rūṇi̍ । ni̠vē̠śaya̍n cha prasu̠van cha̠ bhūma̍ ॥ a̠bhīvṛ̍ta̠-ṅkṛśa̍nai-rvi̠śvarū̍pam ।
hira̍ṇyaśamyaṃ yaja̠tō bṛ̠hanta̎m । āsthā̠-drathagṃ̍ savi̠tā chi̠trabhā̍nuḥ । kṛ̠ṣṇā rajāgṃ̍si̠ tavi̍ṣī̠-ndadhā̍naḥ ॥ saghā̍ nō dē̠va-ssa̍vi̠tā sa̠vāya̍ । āsā̍viṣa̠-dvasu̍pati̠-rvasū̍ni ॥ 40 ॥

vi̠śraya̍māṇō̠ ama̍timurū̠chīm । ma̠rta̠bhōja̍na̠madha̍ rāsatē na ॥ vi janā̎mChyā̠vā-śśi̍ti̠pādō̍ akhyann । ratha̠gṃ̠ hira̍ṇya pra uga̠ṃ vaha̍ntaḥ । śaśva̠-ddiśa̍-ssavi̠tu-rdaivya̍sya । u̠pasthē̠ viśvā̠ bhuva̍nāni tasthuḥ ॥ vi su̍pa̠rṇō a̠ntari̍kṣāṇyakhyat । ga̠bhī̠ravē̍pā̠ asu̍ra-ssunī̠thaḥ । kvē̍dānī̠gṃ̠ sūrya̠ḥ kaśchi̍kēta । ka̠ta̠mā-ndyāgṃ ra̠śmira̠syāta̍tāna ॥ 41 ॥

bhaga̠-ndhiya̍ṃ vā̠jaya̍nta̠ḥ pura̍ndhim । narā̠śagṃsō̠ gnāspati̍rnō avyāt । ā-‘yē vā̠masya̍ saṅga̠thē ra̍yī̠ṇām । pri̠yā dē̠vasya̍ savi̠tu-ssyā̍ma ॥ ā nō̠ viśvē̠ askrā̍ gamantu dē̠vāḥ । mi̠trō a̍rya̠mā varu̍ṇa-ssa̠jōṣā̎ḥ । bhuva̠n̠. yathā̍ nō̠ viśvē̍ vṛ̠dhāsa̍ḥ । kara̎m-thsu̠ṣāhā̍ vithu̠ra-nna śava̍ḥ ॥ śa-nnō̍ dē̠vā vi̠śvadē̍vā bhavantu । śagṃ sara̍svatī sa̠ha dhī̠bhira̍stu ॥ 42 ॥

śama̍bhi̠ṣācha̠-śśamu̍ rāti̠ṣācha̍ḥ । śa-nnō̍ di̠vyāḥ pārthi̍vā̠-śśa-nnō̠ apyā̎ḥ ॥ yē sa̍vi̠tu-ssa̠tyasa̍vasya̠ viśvē̎ । mi̠trasya̍ vra̠tē varu̍ṇasya dē̠vāḥ । tē saubha̍gaṃ vī̠rava̠dgōma̠dapna̍ḥ । dadhā̍tana̠ dravi̍ṇa-ñchi̠trama̠smē ॥ agnē̍ yā̠hi dū̠tya̍ṃ vāri̍ṣēṇyaḥ । dē̠vāgṃ achChā̎ brahma̠kṛtā̍ ga̠ṇēna̍ । sara̍svatī-mma̠rutō̍ a̠śvinā-‘̠paḥ । ya̠kṣi̠ dē̠vā-nra̍tna̠dhēyā̍ya̠ viśvān̍ ॥ 43 ॥

dyauḥ pi̍ta̠ḥ pṛthi̍vi̠ māta̠raddhru̍k । agnē̎ bhrātarvasavō mṛ̠ḍatā̍ naḥ । viśva̍ ādityā aditē sa̠jōṣā̎ḥ । a̠smabhya̠gṃ̠ śarma̍ bahu̠laṃ viya̍nta ॥ viśvē̍ dēvā-śśṛṇu̠tēmagṃ hava̍-mmē । yē a̠ntari̍kṣē̠ ya upa̠ dyavi̠ ṣṭha । yē a̍gniji̠hvā u̠ta vā̠ yaja̍trāḥ । ā̠sa-dyā̠smi-nba̠r̠hiṣi̍ mādayaddhvam ॥ ā vā̎-mmitrāvaruṇā ha̠vyaju̍ṣṭim । nama̍sā dēvā̠ vava̍sā-”vavṛtyām ॥ 44 ॥

a̠smāka̠-mbrahma̠ pṛta̍nāsu sahyā a̠smāka̎m । vṛ̠ṣṭi-rdi̠vyā su̍pā̠rā ॥ yu̠vaṃ vastrā̍ṇi pīva̠sā va̍sāthē । yu̠vōrachChi̍drā̠ manta̍vō ha̠ sargā̎ḥ । avā̍tirata̠manṛ̍tāni̠ viśvā̎ । ṛ̠tēna̍ mitrāvaruṇā sachēthē ॥ tathsu vā̎-mmitrāvaruṇā mahi̠tvam । ī̠rmā ta̠sthuṣī̠raha̍bhi-rduduhrē । viśvā̎ḥ pinvatha̠ svasa̍rasya̠ dhēnā̎ḥ । anu̍ vā̠mēka̍ḥ pa̠virāva̍varti ॥ 45 ॥

yadbagṃhi̍ṣṭha̠-nnāti̠vidē̍ sudānū । achChi̍dra̠gṃ̠ śarma̠ bhuva̍nasya gōpā । tatō̍ nō mitrāvaruṇā-vavīṣṭam । siṣā̍santō jīgi̠vāgṃsa̍-ssyāma ॥ ā nō̍ mitrāvaruṇā ha̠vyadā̍tim । ghṛ̠tai-rgavyū̍timukṣata̠miḍā̍bhiḥ । prati̍ vā̠matra̠ vara̠mā janā̍ya । pṛ̠ṇī̠tamu̠dgō di̠vyasya̠ chārō̎ḥ ॥ pra bā̠havā̍ sisṛta-ñjī̠vasē̍ naḥ । ā nō̠ gavyū̍timukṣata-ṅghṛ̠tēna̍ ॥ 46 ॥

ā nō̠ janē̎ śravayataṃ yuvānā । śru̠ta-mmē̍ mitrāvaruṇā̠ havē̠mā ॥ i̠mā ru̠drāya̍ sthi̠radha̍nvanē̠ gira̍ḥ । kṣi̠prēṣa̍vē dē̠vāya̍ sva̠dhāmnē̎ । aṣā̍ḍhāya̠ saha̍mānāya mī̠ḍhuṣē̎ । ti̠gmāyu̍dhāya bharatā śṛ̠ṇōta̍na ॥ tvā da̍ttēbhī rudra̠ śanta̍mēbhiḥ । śa̠tagṃ himā̍ aśīya bhēṣa̠jēbhi̍ḥ । vya̍smaddvēṣō̍ vita̠raṃ vyagṃha̍ḥ । vyamī̍vāg​ śchātayasvā̠ viṣū̍chīḥ ॥ 47 ॥

ar​ha̍nbibhar​ṣi̠ sāya̍kāni̠ dhanva̍ । ar​ha̍nni̠ṣkaṃ ya̍ja̠taṃ vi̠śvarū̍pam । ar​ha̍nni̠danda̍yasē̠ viśva̠mabbhu̍vam । na vā ōjī̍yō rudra̠ tvada̍sti ॥, mā na̍stō̠kē tana̍yē̠ mā na̠ āyu̍ṣi̠ mā nō̠ gōṣu̠ mā nō̠ aśvē̍ṣu rīriṣaḥ । vī̠rā-nmānō̍ rudra bhāmi̠tō va̍dhīr​ha̠viṣma̍ntō̠ nama̍sā vidhēma tē ॥॥ ā tē̍ pitarmarutāgṃ su̠mnamē̍tu । mā na̠-ssūrya̍sya sa̠dṛṃśō̍ yuyōthāḥ । a̠bhi nō̍ vī̠rō arva̍ti kṣamēta । prajā̍yēmahi rudra pra̠jābhi̍ḥ ॥ ē̠vā ba̍bhrō vṛṣabha chēkitāna । yathā̍ dēva̠ na hṛ̍ṇī̠ṣē na hagṃsi̍ । hā̠va̠na̠śrūrnō̍ rudrē̠ha bō̍dhi । bṛ̠hadva̍dēma vi̠dathē̍ su̠vīrā̎ḥ ॥ pari̍ṇō ru̠drasya̍ hē̠ti rvṛ̍ṇaktu̠ pari̍tvē̠ṣasya̍ durma̠tira̍ghā̠yōḥ । ava̍ sthi̠rā ma̠ghava̍dbhya-stanuṣva̠ mīḍhva̍stō̠kāya̠ tana̍yāya mṛḍaya ॥, stu̠hi śru̠ta-ṅga̍rta̠sada̠ṃ yuvā̍na-mmṛ̠ga-nna bhī̠ma-mu̍paha̠tnu-mu̠gram । mṛ̠ḍā ja̍ri̠trē ru̍dra̠ stavā̍nō a̠nyantē̍ a̠smanniva̍pantu̠ sēnā̎ḥ ॥ । mīḍhu̍ṣṭama̠ śiva̍tama śi̠vō na̍-ssu̠manā̍ bhava ।pa̠ra̠mē vṛ̠kṣa āyu̍dha-nni̠dhāya̠ kṛtti̠ṃ vasā̍na̠ ācha̍ra̠ pinā̍ka̠mbibhra̠dāga̍hi ॥ ar​ha̍nbibhar​ṣi̠ sāya̍kāni̠ dhanva̍ । ar​ha̍nni̠ṣkaṃ ya̍ja̠taṃ vi̠śvarū̍pam । ar​ha̍nni̠danda̍yasē̠ viśva̠mabbhu̍vam । na vā ōjī̍yō rudra̠ tvada̍sti ॥। tvama̍gnē ru̠drō asu̍rō ma̠hō di̠vastvagṃ śardhō̠ māru̍ta-mpṛ̠kṣa ī̍śiṣē । tvaṃ vātai̍raru̠ṇairyā̍si śaṅga̠yastva-mpū̠ṣā vi̍dha̠taḥ pā̍si̠ nutmanā̎ ॥, ā vō̠ rājā̍namadhva̠rasya̍ ru̠dragṃ hōtā̍ragṃ satya̠yaja̠gṃ̠ rōda̍syōḥ । a̠gni-mpu̠rā ta̍nayi̠tnō ra̠chittā̠-ddhira̍ṇyarūpa̠mava̍sē kṛṇudhvam ॥ ॥ 48 ॥
(vasū̍ni – tatā – nāstu̠ – viśvān̍.-vavṛtyāṃvavarti-ghṛ̠tēna̠-viṣū̍chīḥ-śru̠ta-ndvē cha̍) (a. 6)

anuvākaṃ 7 – sauryādipaśūnāṃ sūktāni
sūryō̍ dē̠vīmu̠ṣasa̠gṃ rōcha̍mānā̠ marya̍ḥ । na yōṣā̍ma̠bhyē̍ti pa̠śchāt । yatrā̠ narō̍ dēva̠yantō̍ yu̠gāni̍ । vi̠ta̠nvatē̠ prati̍ bha̠drāya̍ bha̠dram ॥ bha̠drā aśvā̍ ha̠rita̠-ssūrya̍sya । chi̠trā ēda̍gvā anu̠mādyā̍saḥ । na̠ma̠syantō̍ di̠va ā pṛ̠ṣṭhama̍sthuḥ ।
pari̠ dyāvā̍pṛthi̠vī ya̍nti sa̠dyaḥ ॥ ta-thsūrya̍sya dēva̠tva-nta-nma̍hi̠tvam । ma̠ddhyā kartō̠-rvita̍ta̠gṃ̠ sañja̍bhāra ॥ 49 ॥

ya̠dēdayu̍kta ha̠rita̍-ssa̠dhasthā̎t । ādrātrī̠ vāsa̍stanutē si̠masmai̎ ॥ ta-nmi̠trasya̠ varu̍ṇasyābhi̠chakṣē̎ । sūryō̍ rū̠pa-ṅkṛ̍ṇutē̠ dyōru̠pasthē̎ । a̠na̠ntama̠nya-druśa̍dasya̠ pāja̍ḥ । kṛ̠ṣṇama̠nyaddha̠rita̠-ssambha̍ranti ॥ a̠dyā dē̍vā̠ udi̍tā̠ sūrya̍sya । niragṃha̍saḥ pipṛ̠tānnira̍va̠dyāt । tannō̍ mi̠trō varu̍ṇō māmahantām । adi̍ti̠-ssindhu̍ḥ pṛthi̠vī u̠ta dyauḥ ॥ 50 ॥

di̠vō ru̠kma u̍ru̠chakṣā̠ udē̍ti । dū̠rē a̍rthasta̠raṇi̠-rbhrāja̍mānaḥ । nū̠na-ñjanā̠-ssūryē̍ṇa̠ prasū̍tāḥ । āyannarthā̍ni kṛ̠ṇava̠nnapāgṃ̍si ॥ śa-nnō̍ bhava̠ chakṣa̍sā̠ śa-nnō̠ ahnā̎ । śa-mbhā̠nunā̠ śagṃ hi̠mā śa-ṅghṛ̠ṇēna̍ । yathā̠ śama̠smai śamasa̍-ddurō̠ṇē । ta-thsū̎rya̠ dravi̍ṇa-ndhē̠hi chi̠tram ॥ chi̠tra-ndē̠vānā̠-muda̍gā̠danī̍kam । chakṣu̍rmi̠trasya̠ varu̍ṇasyā̠gnēḥ ॥ 51 ॥

ā-‘prā̠ dyāvā̍pṛthi̠vī a̠ntari̍kṣam । sūrya̍ ā̠tmā jaga̍tasta̠sthuṣa̍ścha ॥ tvaṣṭā̠ dadha̠dindrā̍ya̠ śuṣma̎m । apā̠kō-‘chi̍ṣṭurya̠śasē̍ pu̠rūṇi̍ । vṛṣā̠ yaja̠n vṛṣa̍ṇa̠-mbhūri̍rētāḥ । mū̠rdhan. ya̠jñasya̠ sama̍naktu dē̠vān ॥, tanna̍stu̠rīpa̠madha̍ pōṣayi̠tnu dēva̍ tvaṣṭa̠rvi ra̍rā̠ṇa-ssya̍sva । yatō̍ vī̠raḥ ka̍rma̠ṇya̍-ssu̠dakṣō̍ yu̠ktagrā̍vā̠ jāya̍tē dē̠vakā̍maḥ ॥ । tvaṣṭā̍ vī̠ra-ndē̠vakā̍ma-ñjajāna̠ tvaṣṭu̠rarvā̍ jāyata ā̠śuraśva̍ḥ । tvaṣṭē̠daṃ viśva̠-mbhuva̍na-ñjajāna ba̠hōḥ ka̠rtāra̍mi̠ha ya̍kṣi hōtaḥ ॥ pi̠śaṅga̍rūpa-ssu̠bharō̍ vayō̠dhā-śśru̠ṣṭī vī̠rō jā̍yatē dē̠vakā̍maḥ । pra̠jā-ntvaṣṭā̠ viṣya̍tu̠ nābhi̍ma̠smē athā̍ dē̠vānā̠mapyē̍tu̠ pātha̍ḥ ॥ ॥ daśē̠ma-ntvaṣṭu̍rjanayanta̠ garbha̎m । ata̍ndrāsō yuva̠tayō̠ bibha̍rtram । ti̠gmānī̍ka̠gg̠ svaya̍śasa̠-ñjanē̍ṣu । vi̠rōcha̍māna̠-mpari̍ṣī-nnayanti ॥ āviṣṭyō̍ vardhatē̠ chāru̍rāsu । ji̠hmānā̍mū̠rdhva-ssvaya̍śā u̠pasthē̎ ॥ 52 ॥

u̠bhē tvaṣṭu̍rbibhyatu̠-rjāya̍mānāt । pra̠tīchī̍ si̠gṃ̠ha-mprati̍jōṣayētē ॥ mi̠trō janān̍ yātayati prajā̠na-nmi̠trō dā̍dhāra pṛthi̠vīmu̠ta dyām । mi̠traḥ kṛ̠ṣṭīrani̍miṣā̠-‘bhi cha̍ṣṭē sa̠tyāya̍ ha̠vya-ṅghṛ̠tava̍-dvidhēma ॥, pra sa mi̍tra̠ martō̍ astu̠ praya̍svā̠n yasta̍ āditya̠ śikṣa̍ti vra̠tēna̍ । na ha̍nyatē̠ na jī̍yatē̠ tvōtō̠ naina̠magṃhō̍ aśnō̠tyanti̍tō̠ na dū̠rāt ॥ ॥ a̠ya-mmi̠trō na̍ma̠sya̍-ssu̠śēva̍ḥ । rājā̍ sukṣa̠trō a̍janiṣṭa vē̠dhāḥ । tasya̍ va̠yagṃ su̍ma̠tau ya̠jñiya̍sya । api̍ bha̠drē sau̍mana̠sē syā̍ma ॥ a̠na̠mī̠vāsa̠ iḍa̍yā̠ mada̍ntaḥ । mi̠tajma̍vō̠ vari̍ma̠nnā pṛ̍thi̠vyāḥ । ā̠di̠tyasya̍ vra̠tamu̍pa̠kṣyanta̍ḥ ॥ 53 ॥

va̠ya-mmi̠trasya̍ suma̠tau syā̍ma ॥ mi̠tra-nna īgṃ śimyā̠ gōṣu̍ ga̠vyava̍t । svā̠dhiyō̍ vi̠dathē̍ a̠phsvajī̍janann । arē̍jayatā̠gṃ̠ rōda̍sī̠ pāja̍sā gi̠rā । prati̍ pri̠yaṃ ya̍ja̠ta-ñja̠nuṣā̠mava̍ḥ ॥ ma̠hāgṃ ā̍di̠tyō nama̍sōpa̠sadya̍ḥ । yā̠ta̠yajja̍nō gṛṇa̠tē su̠śēva̍ḥ । tasmā̍ ē̠ta-tpanya̍tamāya̠ juṣṭa̎m । a̠gnau mi̠trāya̍ ha̠virāju̍hōta ॥ āvā̠gṃ̠ rathō̠ rōda̍sī badbadhā̠naḥ ॥ 54 ॥

hi̠ra̠ṇyayō̠ vṛṣa̍bhiryā̠tvaśvai̎ḥ । ghṛ̠tava̍rtaniḥ pa̠vibhī̍ ruchā̠naḥ । i̠ṣāṃ vō̠ḍhā nṛ̠pati̍rvā̠jinī̍vān ॥ sa pa̍prathā̠nō a̠bhi pañcha̠ bhūma̍ । tri̠va̠ndhu̠rō mana̠sā-”yā̍tu yu̠ktaḥ । viśō̠ yēna̠ gachCha̍thō dēva̠yantī̎ḥ । kutrā̍ chi̠dyāma̍maśvinā̠ dadhā̍nā ॥ svaśvā̍ ya̠śasā-”yā̍tama̠rvāk । dasrā̍ ni̠dhi-mmadhu̍manta-mpibāthaḥ । vi vā̠gṃ̠ rathō̍ va̠ddhvā̍ yāda̍mānaḥ ॥ 55 ॥

antā̎-ndi̠vō bā̍dhatē varta̠nibhyā̎m ॥ yu̠vō-śśriya̠-mpari̠ yōṣā̍ vṛṇīta । sūrō̍ duhi̠tā pari̍takmiyāyām । ya-ddē̍va̠yanta̠mava̍tha̠-śśachī̍bhiḥ । pari̍ghra̠gṃ̠sa vā̠-mmanā̍ vā̠ṃ vayō̍ gām ॥ yō ha̠ sya vāgṃ̍ rathirā̠ vasta̍ u̠srāḥ । rathō̍ yujā̠naḥ pa̍ri̠yāti̍ va̠rtiḥ । tēna̍ na̠-śśaṃ yōru̠ṣasō̠ vyu̍ṣṭau । nya̍śvinā vahataṃ ya̠jñē a̠sminn ॥ yu̠va-mbhu̠jyumava̍viddhagṃ samu̠drē ॥ 56 ॥

udū̍hathu̠rarṇa̍sō̠ asri̍dhānaiḥ । pa̠ta̠tribhi̍-raśra̠mai-ra̍vya̠thibhi̍ḥ । da̠gṃ̠sanā̍bhiraśvinā pā̠raya̍ntā ॥ agnī̍ṣōmā̠ yō a̠dya vā̎m । i̠daṃ vacha̍-ssapa̠ryati̍ । tasmai̍ dhattagṃ su̠vīrya̎m । gavā̠-mpōṣa̠gg̠ svaśvi̍yam ॥ yō a̠gnīṣōmā̍ ha̠viṣā̍ sapa̠ryāt । dē̠va̠drīchā̠ mana̍sā̠ yō ghṛ̠tēna̍ । tasya̍ vra̠tagṃ ra̍kṣata-mpā̠tamagṃha̍saḥ ॥ 57 ॥

vi̠śē janā̍ya̠ mahi̠ śarma̍ yachChatam ॥ agnī̍ṣōmā̠ ya āhu̍tim । yō vā̠-ndāśā̎ddha̠viṣkṛ̍tim । sa pra̠jayā̍ su̠vīrya̎m । viśva̠māyu̠-rvya̍śnavat ॥ agnī̍ṣōmā̠ chēti̠ ta-dvī̠rya̍ṃ vām । yadamu̍ṣṇītamava̠sa-mpa̠ṇi-ṅgōḥ । avā̍tirata̠-mpratha̍yasya̠ śēṣa̍ḥ । avi̍ndata̠-ñjyōti̠rēka̍-mba̠hubhya̍ḥ ॥ agnī̍ṣōmā vi̠magṃ su mē̍ śṛṇu̠taṃ vṛ̍ṣaṇā̠ hava̎m । prati̍ sū̠ktāni̍ haryata̠-mbhava̍ta-ndā̠śuṣē̠ maya̍ḥ ॥ agnī̍ṣōmā ha̠viṣa̠ḥ prasthi̍tasya vī̠tagṃharya̍taṃ vṛṣaṇā ju̠ṣēthā̎m । su̠śarmā̍ṇā̠ svava̍sā̠ hi bhū̠tamathā̍ dhatta̠ṃ yaja̍mānāya̠ śaṃ yōḥ ॥ ॥ 58 ॥
(ja̠bhā̠ra̠ – dyau – ra̠gnē – ru̠pastha̍ – upa̠kṣyantō̍ – badbadhā̠nō-yāda̍mānaḥ – samu̠drē – ‘gṃha̍sa̠ḥ – prasthi̍tasya) (a. 7)

anuvākaṃ 8 – vēhadādipaśūnāṃ sūktāni
a̠hama̍smi prathama̠jā ṛ̠tasya̍ । pūrva̍-ndē̠vēbhyō̍ a̠mṛta̍sya̠ nābhi̍ḥ । yō mā̠ dadā̍ti̠ sa idē̠va mā vā̎ḥ । a̠ha-manna̠-manna̍-ma̠danta̍madmi ॥ pūrva̍-ma̠gnērapi̍ daha̠tyanna̎m । ya̠ttau hā̍-”sātē ahamutta̠rēṣu̍ । vyātta̍masya pa̠śava̍-ssu̠jambha̎m । paśya̍nti̠ dhīrā̠ḥ pracha̍ranti̠ pākā̎ḥ ॥ jahā̎mya̠nya-nna ja̍hāmya̠nyam । a̠hamanna̠ṃ vaśa̠michcha̍rāmi ॥ 59 ॥

sa̠mā̠namartha̠-mparyē̍mi bhu̠ñjat । kō māmanna̍-mmanu̠ṣyō̍ dayēta ॥ parā̍kē̠ anna̠-nnihi̍taṃ lō̠ka ē̠tat । viśvai̎-rdē̠vaiḥ pi̠tṛbhi̍-rgu̠ptamanna̎m । yada̠dyatē̍ lu̠pyatē̠ ya-tpa̍rō̠pyatē̎ । śa̠ta̠ta̠mī sā ta̠nūrmē̍ babhūva ॥ ma̠hāntau̍ cha̠rū sa̍kṛ-ddu̠gdhēna̍ paprau । diva̍ñcha̠ pṛśñi̍ pṛthi̠vī-ñcha̍ sā̠kam । ta-thsa̠mpiba̍ntō̠ na mi̍nanti vē̠dhasa̍ḥ । naita-dbhūyō̠ bhava̍ti̠ nō kanī̍yaḥ ॥ 60 ॥

anna̍-mprā̠ṇa-manna̍-mapā̠na-mā̍huḥ । anna̍-mmṛ̠tyu-ntamu̍ jī̠vātu̍māhuḥ । anna̍-mbra̠hmāṇō̍ ja̠rasa̍ṃ vadanti । anna̍māhuḥ pra̠jana̍na-mpra̠jānā̎m ॥ mōgha̠manna̍ṃ vindatē̠ apra̍chētāḥ । sa̠tya-mbra̍vīmi va̠dha ithsa tasya̍ । nārya̠maṇa̠-mpuṣya̍ti̠ nō sakhā̍yam । kēva̍lāghō bhavati kēvalā̠dī ॥ a̠ha-mmē̠gha-ssta̠naya̠n. var​ṣa̍nnasmi । māma̍dantya̠hama̍dmya̠nyān ॥ 61 ॥

a̠hagṃ sada̠mṛtō̍ bhavāmi । madā̍di̠tyā adhi̠ sarvē̍ tapanti ॥ sā nō̍ ma̠ndrēṣa̠mūrja̠-nduhā̍nā । dhē̠nurvāga̠smānupa̠ suṣṭu̠taitu̍ ॥, ya-dvāgvada̍ntya-vichēta̠nāni̍ । rāṣṭrī̍ dē̠vānā̎-nniṣa̠sāda̍ ma̠ndrā । chata̍sra̠ ūrja̍-nduduhē̠ payāgṃ̍si । kva̍ svi dasyāḥ para̠ma-ñja̍gāma ॥ ॥ a̠na̠ntā-mantā̠dadhi̠ nirmi̍tā-mma̠hīm । yasyā̎-ndē̠vā a̍dadhu̠-rbhōja̍nāni । ēkā̎kṣarā-ndvi̠padā̠gṃ̠ ṣaṭpa̍dāñcha । vācha̍-ndē̠vā upa̍jīvanti̠ viśvē̎ ॥ vācha̍-ndē̠vā upa̍jīvanti̠ viśvē̎ । vācha̍-ṅgandha̠rvāḥ pa̠śavō̍ manu̠ṣyā̎ḥ । vā̠chīmā viśvā̠ bhuva̍nā̠nyarpi̍tā ॥ 62 ॥

sā nō̠ hava̍-ñjuṣatā̠-mindra̍patnī ॥ vāga̠kṣara̍-mprathama̠jā ṛ̠tasya̍ । vēdā̍nā-mmā̠tā-‘mṛta̍sya̠ nābhi̍ḥ । sā nō̍ juṣā̠ṇōpa̍ ya̠jñamāgā̎t । ava̍ntī dē̠vī su̠havā̍ mē astu ॥ yā mṛṣa̍yō mantra̠kṛtō̍ manī̠ṣiṇa̍ḥ । a̠nvaichCha̍-ndē̠vā-stapa̍sā̠ śramē̍ṇa । tā-ndē̠vīṃ vāchagṃ̍ ha̠viṣā̍ yajāmahē । sā nō̍ dadhātu sukṛ̠tasya̍ lō̠kē ॥ cha̠tvāri̠ vā-kpari̍mitā pa̠dāni̍ ॥ 63 ॥

tāni̍ vidu-rbrāhma̠ṇā yē ma̍nī̠ṣiṇa̍ḥ । guhā̠ trīṇi̠ nihi̍tā̠ nēṅga̍yanti । tu̠rīya̍ṃ vā̠chō ma̍nu̠ṣyā̍ vadanti ॥ śra̠ddhayā̠-‘gni-ssami̍ddhyatē । śra̠ddhayā̍ vindatē ha̠viḥ । śra̠ddhā-mbhaga̍sya mū̠rdhani̍ । vacha̠sā ”vē̍dayāmasi ॥ pri̠yagg​ śra̍ddhē̠ dada̍taḥ । pri̠yagg​ śra̍ddhē̠ didā̍sataḥ । pri̠ya-mbhō̠jēṣu̠ yajva̍su ॥ 64 ॥

i̠da-mma̍ udi̠ta-ṅkṛ̍dhi ॥ yathā̍ dē̠vā asu̍rēṣu । śra̠ddhā-mu̠grēṣu̍ chakri̠rē । ē̠va-mbhō̠jēṣu̠ yajva̍su । a̠smāka̍-mudi̠ta-ṅkṛ̍dhi ॥ śra̠ddhā-ndē̍vā̠ yaja̍mānāḥ । vā̠yugō̍pā̠ upā̍satē । śra̠ddhāgṃ hṛ̍da̠yya̍yā-”kū̎tyā । śra̠ddhayā̍ hūyatē ha̠viḥ ॥ śra̠ddhā-mprā̠tar-ha̍vāmahē ॥ 65 ॥

śra̠ddhā-mma̠ddhyandi̍na̠-mpari̍ । śra̠ddhāgṃ sūrya̍sya ni̠mruchi̍ । śraddhē̠ śraddhā̍payē̠ha mā̎ ॥ śra̠ddhā dē̠vā-nadhi̍vastē । śra̠ddhā viśva̍mi̠da-ñjaga̍t । śra̠ddhā-ṅkāma̍sya mā̠tara̎m । ha̠viṣā̍ vardhayāmasi ॥ brahma̍jajñā̠na-mpra̍tha̠ma-mpu̠rastā̎t । vi sī̍ma̠ta-ssu̠ruchō̍ vē̠na ā̍vaḥ । sa bu̠ddhniyā̍ upa̠mā a̍sya vi̠ṣṭhāḥ ॥ 66 ॥

sa̠taścha̠ yōni̠-masa̍taścha̠ viva̍ḥ ॥ pi̠tā vi̠rājā̍mṛṣa̠bhō ra̍yī̠ṇām । a̠ntari̍kṣaṃ vi̠śvarū̍pa̠ āvi̍vēśa । tama̠rkai-ra̠bhya̍rchanti va̠thsam । brahma̠ santa̠-mbrahma̍ṇā va̠rdhaya̍ntaḥ ॥ brahma̍ dē̠vāna̍janayat । brahma̠ viśva̍mi̠da-ñjaga̍t । brahma̍ṇaḥ, kṣa̠tra-nnirmi̍tam । brahma̍ brāhma̠ṇa ā̠tmanā̎ ॥ a̠ntara̍smi-nni̠mē lō̠kāḥ ॥ 67 ॥

a̠nta-rviśva̍mi̠da-ñjaga̍t । brahmai̠va bhū̠tānā̠-ñjyēṣṭha̎m । tēna̠ kō̍-‘r​hati̠ spardhi̍tum ॥ brahma̍-ndē̠vā-straya̍strigṃśat । brahma̍nnindra prajāpa̠tī । brahma̍n. ha̠ viśvā̍ bhū̠tāni̍ । nā̠vī vā̠nta-ssa̠māhi̍tā ॥ chata̍sra̠ āśā̠ḥ pracha̍rantva̠-gnaya̍ḥ । i̠mannō̍ ya̠jña-nna̍yatu prajā̠nann । ghṛ̠ta-mpinva̍nna̠jaragṃ̍ su̠vīra̎m ॥ 68 ॥

brahma̍ sa̠mi-dbha̍va̠tyāhu̍tīnām ॥ ā gāvō̍ agmannu̠ta bha̠drama̍krann । sīda̍ntu gō̠ṣṭhē ra̠ṇaya̍ntva̠smē । pra̠jāva̍tīḥ puru̠rūpā̍ i̠ha syuḥ । indrā̍ya pū̠rvī ru̠ṣasō̠ duhā̍nāḥ ॥ indrō̠ yajva̍nē pṛṇa̠tē cha̍ śikṣati । upēdda̍dāti̠ na sva-mmu̍ṣāyati । bhūyō̍ bhūyō ra̠yimida̍sya va̠rdhayann̍ । abhi̍nnē khi̠llē nida̍dhāti dēva̠yum ॥ na tā na̍śanti̠ na da̍bhāti̠ taska̍raḥ । nainā̍ ami̠trō vyathi̠rāda̍dhar​ṣati । dē̠vāg​ścha̠ yābhi̠-ryaja̍tē̠ dadā̍ti cha । jyōgittābhi̍-ssachatē̠ gōpa̍ti-ssa̠ha ॥, na tā arvā̍ rē̠ṇuka̍kāṭō aśnutē । na sagg̍ skṛta̠tra-mupa̍yanti̠ tā a̠bhi । u̠ru̠gā̠yamabha̍ya̠-ntasya̠ tā anu̍ । gāvō̠ martya̍sya̠ vicha̍ranti̠ yajva̍naḥ ॥ ॥ 69 ॥

gāvō̠ bhagō̠ gāva̠ indrō̍ mē achChāt । gāva̠-ssōma̍sya pratha̠masya̍ bha̠kṣaḥ । i̠mā yā gāva̠-ssaja̍nāsa̠ indra̍ḥ । i̠chChāmīddhṛ̠dā mana̍sā chi̠dindra̎m ॥ yū̠ya-ṅgā̍vō mēdayathā kṛ̠śa-ñchi̍t । a̠ślī̠la-ñchi̍-tkṛṇuthā su̠pratī̍kam । bha̠dra-ṅgṛ̠ha-ṅkṛ̍ṇutha bhadravāchaḥ । bṛ̠hadvō̠ vaya̍ uchyatē sa̠bhāsu̍ ॥ pra̠jāva̍tī-ssū̠yava̍sagṃ ri̠śantī̎ḥ (ru̠śantī̎ḥ) । śu̠ddhā a̠pa-ssu̍prapā̠ṇē piba̍ntīḥ । mā va̍-sstē̠na ī̍śata̠ mā-‘ghaśagṃ̍saḥ । pari̍vō hē̠tī ru̠drasya̍ vṛñjyāt ॥ upē̠da-mu̍pa̠parcha̍nam । ā̠su gōṣūpa̍pṛchyatām । upa̍r​ṣa̠bhasya̠ rēta̍si । upē̎mdra̠ tava̍ vī̠ryē̎ ॥ 70 ॥
(cha̠rā̠mi̠ – kanī̍yō̠ – ‘nyā – narpi̍tā – pa̠dāni̠ – yajva̍su – havāmahē – vi̠ṣṭhā – lō̠kāḥ – su̠vīra̠ – marvā̠ – piba̍ntī̠-ṣṣaṭcha̍) (a. 8)

anuvākaṃ 9 – śuklakṛṣṇapaśvādīnāṃ sūktāni
tā sū̎ryā chandra̠masā̍ viśva̠bhṛtta̍mā ma̠hat । tējō̠ vasu̍ma-drājatō di̠vi । sāmā̎tmānā charata-ssāmachā̠riṇā̎ । yayō̎rvra̠ta-nna ma̠mē jātu̍ dē̠vayō̎ḥ ॥ u̠bhāvantau̠ pari̍yāta̠ armyā̎ । di̠vō na ra̠śmīg​ sta̍nu̠tō-vya̍rṇa̠vē । u̠bhā bhu̍va̠ntī bhuva̍nā ka̠vikra̍tū । sūryā̠ na cha̠ndrā cha̍ratō ha̠tāma̍tī ॥ patī̎ dyu̠ma-dvi̍śva̠vidā̍ u̠bhā di̠vaḥ । sūryā̍ u̠bhā cha̠ndrama̍sā vichakṣa̠ṇā ॥ 71 ॥

vi̠śvavā̍rā varivō̠bhā varē̎ṇyā । tā nō̍-‘vata-mmati̠mantā̠ mahi̍vratā ॥ vi̠śva̠vapa̍rī pra̠tara̍ṇā tara̠ntā । su̠va̠rvidā̍ dṛ̠śayē̠ bhūri̍raśmī । sūryā̠ hi cha̠ndrā vasu̍tvē̠ṣa-da̍r​śatā । ma̠na̠svinō̠bhā-‘nu̍ chara̠tō nu̠ sa-ndiva̎m ॥ a̠sya śravō̍ na̠dya̍-ssa̠pta bi̍bhrati । dyāvā̠ kṣāmā̍ pṛthi̠vī da̍r​śa̠taṃ vapu̍ḥ । a̠smē sū̎ryā chandra̠masā̍-‘bhi̠chakṣē̎ । śra̠ddhē kami̍ndra charatō vichartu̠ram ॥ 72 ॥

pū̠rvā̠pa̠ra-ñcha̍ratō mā̠ya yai̠tau । śiśū̠ krīḍa̍ntau̠ pari̍yātō addhva̠ram । viśvā̎nya̠nyō bhuva̍nā ‘bhi̠chaṣṭē̎ । ṛ̠tūna̠nyō vi̠dadha̍jjāyatē̠ puna̍ḥ ॥ hira̍ṇyavarṇā̠-śśucha̍yaḥ pāva̠kā yāsu̍ jā̠taḥ ka̠śyapō̠ yāsvindra̍ḥ । a̠gniṃ yā garbha̍-ndadhi̠rē virū̍pā̠stā na̠ āpa̠-śśagg​ syō̠nā bha̍vantu ॥,
yāsā̠gṃ̠ rājā̠ varu̍ṇō̠ yāti̠ madhyē̍ satyānṛ̠tē a̍va̠paśya̠n janā̍nām । ma̠dhu̠śchuta̠-śśucha̍yō̠ yāḥ pā̍va̠kāstā na̠ āpa̠-śśagg​ syō̠nā bha̍vantu ॥ । yāsā̎-ndē̠vā di̠vi kṛ̠ṇvanti̍ bha̠kṣaṃ yā a̠ntari̍kṣē bahu̠dhā bhava̍nti । yāḥ pṛ̍thi̠vī-mpaya̍sō̠ndanti̍śu̠krāstā na̠ āpa̠-śśagg​ syō̠nā bha̍vantu ॥, śi̠vēna̍ mā̠ chakṣu̍ṣā paśyatā-”pa-śśi̠vayā̍ ta̠nuvōpa̍ spṛśata̠ tvacha̍-mmē । sarvāgṃ̍ a̠gnīgṃ ra̍phsu̠ṣadō̍ huvē vō̠ mayi̠ varchō̠ bala̠mōjō̠ ni dha̍tta ॥ । āpō̍ bha̠drā ghṛ̠tamidāpa̍ āsura̠gnī-ṣōmau̍ bibhra̠tyāpa̠ i-ttāḥ । tī̠vrō rasō̍ madhu̠pṛchā̍ -maraṅga̠ma ā mā̎ prā̠ṇēna̍ sa̠ha varcha̍sā gann ॥, ādi-tpa̍śyāmyu̠ta vā̍ śṛṇō̠myā mā̠ ghōṣō̍ gachChati̠ vānna̍ āsām । manyē̍ bhējā̠nō a̠mṛta̍sya̠ tar​hi̠ hira̍ṇyavarṇā̠ atṛ̍paṃ ya̠dā va̍ḥ ॥ ॥ nāsa̍dāsī̠nnō sadā̍sī-tta̠dānī̎m । nāsī̠-drajō̠ nō vyō̍māpa̠rō yat । kimāva̍rīva̠ḥ kuha̠ kasya̠ śarmann̍ ॥ 73 ॥

ambha̠ḥ kimā̍sī̠-dgaha̍na-ṅgabhī̠ram ॥ na mṛ̠tyura̠mṛta̠-ntar​hi̠ na । rātri̍yā̠ ahna̍ āsī-tprakē̠taḥ । ānī̍davā̠tagg​ sva̠dhayā̠ tadēka̎m । tasmā̎-ddhā̠nya-nna pa̠raḥ (pa̠raṃ) kiñcha̠ nāsa̍ ॥ tama̍ āsī̠-ttama̍sā gū̠ḍhamagrē̎ prakē̠tam । sa̠li̠lagṃ sarva̍mā i̠dam । tu̠chChē nā̠bhvapi̍hitaQṃ yadāsī̎t । tama̍sa̠ stanma̍hi̠nā jā̍ya̠taika̎m ॥ kāma̠stadagrē̠ sama̍varta̠tādhi̍ ॥ 74 ॥

mana̍sō̠ rēta̍ḥ pratha̠maṃ yadāsī̎t । sa̠ tō bandhu̠masa̍ti̠ nira̍vindann (nira̍vidann) । hṛ̠di pra̠tīṣyā̍ ka̠vayō̍ manī̠ṣā ॥ ti̠ra̠śchīnō̠ vita̍tō ra̠śmirē̍ṣām । a̠dha-ssvi̍dā̠sī(3) du̠pari̍ svidāsī(3)t । rē̠tō̠dhā ā̍sa-nmahi̠māna̍ āsann । sva̠dhā a̠vastā̠-tpraya̍tiḥ pa̠rastā̎t ॥ kō a̠ddhā vē̍da̠ ka i̠ha pravō̍chat । kuta̠ ājā̍tā̠ kuta̍ i̠yaṃ visṛ̍ṣṭiḥ । a̠rvāgdē̠vā a̠sya vi̠sarja̍nāya ॥ 75 ॥

athā̠ kō vē̍da̠ yata̍ āba̠bhūva̍ ॥ i̠yaṃ visṛ̍ṣṭi̠-ryata̍ āba̠bhūva̍ । yadi̍ vā da̠dhē yadi̍ vā̠ na । yō a̠syāddhya̍kṣaḥ para̠mē vyō̍mann । sō a̠ṅga vē̍da̠ yadi̍ vā̠ na vēda̍ ॥ kigg​svi̠dvana̠-ṅka u̠ sa vṛ̠kṣa ā̍sīt । yatō̠ dyāvā̍pṛthi̠vī ni̍ṣṭata̠kṣuḥ । manī̍ṣiṇō̠ mana̍sā pṛ̠chChatēdu̠ tat । yada̠ddhyati̍ṣṭha̠-dbhuva̍nāni dhā̠rayann̍ ॥ brahma̠ vana̠-mbrahma̠ sa vṛ̠kṣa ā̍sīt ॥ 76 ॥

yatō̠ dyāvā̍pṛthi̠vī ni̍ṣṭata̠kṣuḥ । manī̍ṣiṇō̠ mana̍sā̠ vibra̍vīmi vaḥ । brahmā̠ddhyati̍ṣṭha̠-dbhuva̍nāni dhā̠rayann̍ ॥ prā̠tara̠gni-mprā̠tarindragṃ̍ havāmahē । prā̠ta rmi̠trāvaru̍ṇā prā̠tara̠śvinā̎ । prā̠ta rbhaga̍-mpū̠ṣaṇa̠-mbrahma̍ṇa̠spati̎m । prā̠tassōma̍mu̠ta ru̠dragṃ hu̍vēma ॥ prā̠ta̠rjita̠-mbhaga̍mu̠gragṃ hu̍vēma । va̠ya-mpu̠tramadi̍tē̠ryō vi̍dha̠rtā । ā̠ddhraśchi̠dya-mmanya̍māna-stu̠raśchi̍t ॥ 77 ॥

rājā̍ chi̠dya-mbhaga̍-mbha̠kṣītyāha̍ ॥ bhaga̠ praṇē̍ta̠rbhaga̠ satya̍rādhaḥ । bhagē̠mā-ndhiya̠muda̍va̠ dada̍nnaḥ । bhaga̠ praṇō̍ janaya̠ gōbhi̠raśvai̎ḥ । bhaga̠ pranṛbhi̍-rnṛ̠vanta̍-ssyāma । u̠tēdānī̠-mbhaga̍vanta-ssyāma ॥ u̠ta prapi̠tva u̠ta maddhyē̠ ahnā̎m । u̠tōdi̍tā maghava̠n-thsūrya̍sya । va̠ya-ndē̠vānāgṃ̍ suma̠tau syā̍ma ॥ bhaga̍ ē̠va bhaga̍vāgṃ astu dēvāḥ ॥ 78 ॥

tēna̍ va̠ya-mbhaga̍vanta-ssyāma । ta-ntvā̍ bhaga̠ sarva̠ ijjō̍havīmi । sa nō̍ bhaga pura ē̠tā bha̍vē̠ha ॥ sama̍ddhva̠rāyō̠ṣasō̍ namanta । da̠dhi̠krāvē̍va̠ śucha̍yē pa̠dāya̍ । a̠rvā̠chī̠naṃ va̍su̠vida̠-mbhaga̍nnaḥ । ratha̍mi̠vāśvā̍ vā̠jina̠ āva̍hantu ॥ aśvā̍vatī̠-rgōma̍tī-rna u̠ṣāsa̍ḥ । vī̠rava̍tī̠-ssada̍muchChantu bha̠drāḥ । ghṛ̠ta-nduhā̍nā vi̠śvata̠ḥ prapī̍nāḥ । yū̠ya-mpā̍ta sva̠stibhi̠-ssadā̍ naḥ ॥ 79 ॥
(vi̠cha̠kṣa̠ṇā – vi̍chartu̠ragṃ – śarma̠ – nnadhi̍ – vi̠sarja̍nāya̠ – brahma̠ vana̠-mbrahma̠ sa vṛ̠kṣa ā̍sīt- tu̠raśchi̍-d- dēvā̠ḥ – prapī̍nā̠ ēka̍-ñcha) (a. 9)

(pīvō̎-‘nnā̠ – magnē̠ tva-mpā̍ra – yānāghṛ̠ṣyaḥ – śuchi̠-nnu stōma̍ṃ – ँvi̠śraya̍māṇō – di̠vō ru̠kmō – ‘nna̍-mprā̠ṇaṃ – tā sū̎ryāchandra̠masā̠ nava̍saptatiḥ)

(pīvō̎nnā – ँyū̠ya-mpā̍ta sva̠stibhi̠-ssadā̍naḥ)

॥ hari̍ḥ ōm ॥

॥ kṛṣṇa yajurvēdīya taittirīya brāhmaṇē dvitīyāṣṭakē aṣṭamaḥ prapāṭhaka-ssamāptaḥ ॥

॥ kṛṣṇa yajurvēdīya taittirīya brāhmaṇē dvitīyāṣṭakaṃ samāptam ॥