KYTB 2.7 Sava Ekaha Visheshah – Krishna Yajurveda Taittiriya Brahmana Patha – Trivrut Stomo

kṛṣṇa yajurvēdīya taittirīya brāhmaṇē dvitīyāṣṭakē saptamaḥ prapāṭhakaḥ – savā ēkāhaviśēṣāḥ

ō-nnamaḥ paramātmanē, śrī mahāgaṇapatayē namaḥ,
śrī gurubhyō namaḥ । ha̠ri̠ḥ ōm ॥

2.7.1 anuvākaṃ – bṛhaspatisavaḥ

tri̠vṛ-thstōmō̍ bhavati । bra̠hma̠va̠rcha̠saṃ vai tri̠vṛt । bra̠hma̠va̠rcha̠samē̠vāva̍rundhē ॥ a̠gni̠ṣṭō̠ma-ssōmō̍ bhavati । bra̠hma̠va̠rcha̠saṃ vā a̍gniṣṭō̠maḥ । bra̠hma̠va̠rcha̠samē̠vāva̍rundhē ॥ ra̠tha̠nta̠ra̠gṃ sāma̍ bhavati । bra̠hma̠va̠rcha̠saṃ vai ra̍thanta̠ram । bra̠hma̠va̠rcha̠samē̠vāva̍rundhē ॥ pa̠ri̠sra̠jī hōtā̍ bhavati ॥ 1 ॥

a̠ru̠ṇō mi̍rmi̠rastriśu̍kraḥ । ē̠ta-dvai bra̍hmavarcha̠sasya̍ rū̠pam । rū̠pēṇai̠va bra̍hmavarcha̠samava̍rundhē ॥ bṛha̠spati̍-rakāmayata dē̠vānā̎-mpurō̠dhā-ṅga̍chChēya̠miti̍ । sa ē̠ta-mbṛ̍haspatisa̠vama̍paśyat । tamā-‘ha̍rat । tēnā̍yajata । tatō̠ vai sa dē̠vānā̎-mpurō̠dhā-ma̍gachChat । yaḥ pu̍rō̠dhākā̍ma̠-ssyāt । sa bṛ̍haspatisa̠vēna̍ yajēta ॥ 2 ॥

pu̠rō̠dhāmē̠va ga̍chChati ॥ tasya̍ prātassava̠nē sa̠nnēṣu̍ nārāśa̠gṃ̠sēṣu̍ । ēkā̍daśa̠ dakṣi̍ṇā nīyantē । ēkā̍daśa̠ māddhya̍dinnē̠ sava̍nē sa̠nnēṣu̍ nārāśa̠gṃ̠sēṣu̍ । ēkā̍daśa tṛtīyasava̠nē sa̠nnēṣu̍ nārāśa̠gṃ̠sēṣu̍ । traya̍strigṃśa̠-thsampa̍dyantē । traya̍strigṃśa̠-dvai dē̠vatā̎ḥ । dē̠vatā̍ ē̠vāva̍rundhē ॥ aśva̍śchatustri̠gṃ̠śaḥ । prā̠jā̠pa̠tyō vā aśva̍ḥ ॥ 3 ॥

pra̠jāpa̍ti-śchatustri̠gṃ̠śō dē̠vatā̍nām । yāva̍tīrē̠va dē̠vatā̎ḥ । tā ē̠vāva̍rundhē ॥ kṛ̠ṣṇā̠ji̠nē̍ ‘bhiṣi̍ñchati । brahma̍ṇō̠ vā ē̠ta-drū̠pam । ya-tkṛ̍ṣṇāji̠nam । bra̠hma̠va̠rcha̠sēnai̠vaina̠gṃ̠ sama̍rdhayati ॥ ājyē̍nā̠bhiṣi̍ñchati । tējō̠ vā ājya̎m । tēja̍ ē̠vāsmi̍-ndadhāti ॥ 4 ॥
(hōtā̍ bhavati – yajēta̠ – vā aśvō̍ – dadhāti) (a. 1)

2.7.2 anuvākaṃ – vaiśyasavaḥ
yadā̎gnē̠yō bhava̍ti । a̠gnimu̍khā̠ hyṛddhi̍ḥ ॥ atha̠ ya-tpau̠ṣṇaḥ । puṣṭi̠rvai pū̠ṣā । puṣṭi̠-rvaiśya̍sya । puṣṭi̍mē̠vāva̍rundhē ॥ pra̠sa̠vāya̍ sāvi̠traḥ ॥ atha̠ ya-ttvā̠ṣṭraḥ । tvaṣṭā̠ hi rū̠pāṇi̍ vika̠rōti̍ ॥ ni̠rva̠ru̠ṇa̠tvāya̍ vāru̠ṇaḥ ॥ 5 ॥

athō̠ ya ē̠va kaścha̠ san​thsū̠yatē̎ । sa hi vā̍ru̠ṇaḥ ॥ atha̠ ya-dvai̎śvadē̠vaḥ । vai̠śva̠dē̠vō hi vaiśya̍ḥ ॥ atha̠ ya-nmā̍ru̠taḥ । mā̠ru̠tō hi vaiśya̍ḥ ॥ sa̠ptaitāni̍ ha̠vīgṃṣi̍ bhavanti । sa̠ptaga̍ṇā̠ vai ma̠ruta̍ḥ ॥ pṛśni̍ḥ paṣṭhau̠hī mā̍ru̠tyāla̍bhyatē । viḍvai ma̠ruta̍ḥ ॥ viśa̍ ē̠vaita-nma̍ddhya̠tō̍-‘bhiṣi̍chyatē । tasmā̠-dvā ē̠ṣa vi̠śaḥ pri̠yaḥ । vi̠śō hi ma̍ddhya̠tō̍-‘bhiṣi̠chyatē̎ ॥ ṛ̠ṣa̠bha̠cha̠rmē-‘ddhya̠bhiṣi̍ñchati । sa hi pra̍janayi̠tā ॥ da̠ddhnā-‘bhiṣi̍ñchati । ūrgvā a̠nnādya̠-ndadhi̍ । ū̠rjaivaina̍-ma̠nnādyē̍na̠ sama̍rdhayati ॥ 6 ॥
(vā̠ru̠ṇō – viḍvai ma̠rutō̠-‘ṣṭau cha̍) (a. 2)

anuvākaṃ 3 – brāhmaṇasavaḥ
yadā̎gnē̠yō bhava̍ti । ā̠gnē̠yō vai brā̎hma̠ṇaḥ ॥ atha̠ ya-thsau̠myaḥ । sau̠myō hi brā̎hma̠ṇaḥ ॥ pra̠sa̠vāyai̠va sā̍vi̠traḥ ॥ atha̠ ya-dbā̍r​haspa̠tyaḥ । ē̠tadvai brā̎hma̠ṇasya̍ vākpa̠tīya̎m ॥ atha̠ yada̍gnīṣō̠mīya̍ḥ । ā̠gnē̠yō vai brā̎hma̠ṇaḥ । tau ya̠dā sa̠gañchChē̍tē ॥ 7 ॥

atha̍ vī̠ryā̍vattarō bhavati ॥ atha̠ ya-thsā̍rasva̠taḥ । ē̠taddhi pra̠tyakṣa̍-mbrāhma̠ṇasya̍ vākpa̠tīya̎m ॥ ni̠rva̠ru̠ṇa̠tvāyai̠va vā̍ru̠ṇaḥ । athō̠ ya ē̠va kaścha̠ san​thsū̠yatē̎ । sa hi vā̍ru̠ṇaḥ ॥ atha̠ ya-ddyā̍vāpṛthi̠vya̍ḥ । indrō̍ vṛ̠trāya̠ vajra̠muda̍yachChat । ta-ndyāvā̍pṛthi̠vī nānva̍manyētām । tamē̠tēnai̠va bhā̍ga̠dhēyē̠nā-nva̍manyētām ॥ 8 ॥

vajra̍sya̠ vā ē̠ṣō̍-‘numā̠nāya̍ । anu̍matavajra-ssūyātā̠ iti̍ ॥ a̠ṣṭāvē̠tāni̍ ha̠vīgṃṣi̍ bhavanti । a̠ṣṭākṣa̍rā gāya̠trī । gā̠ya̠trī bra̍hmavarcha̠sam । gā̠ya̠tri̠yaiva bra̍hmavarcha̠samava̍rundhē ॥ hira̍ṇyēna ghṛ̠tamu-tpu̍nāti । tēja̍sa ē̠va ru̠chē ॥ kṛ̠ṣṇā̠ji̠nē̍-‘bhiṣi̍ñchati । brahma̍ṇō̠ vā ē̠tadṛ̍khsā̠mayō̍ rū̠pam । ya-tkṛ̍ṣṇāji̠nam । brahma̍nnē̠vaina̍-mṛkhsā̠mayō̠-raddhya̠bhiṣi̍ñchati ॥ ghṛ̠tēnā̠-bhiṣi̍ñchati । tathā̍ vī̠ryā̍vattarō bhavati ॥ 9 ॥
(sa̠gañchChē̍tē – bhāga̠dhēyē̠nānva̍manyētāgṃ – rū̠pa-ñcha̠tvāri̍ cha) (a. 3)

anuvākaṃ 4 – sōmasavaḥ
na vai sōmē̍na̠ sōma̍sya sa̠vō̎-‘sti । ha̠tō hyē̍ṣaḥ । a̠bhiṣu̍tō̠ hyē̍ṣaḥ । na hi ha̠ta-ssū̠yatē̎ । sau̠mīgṃ sū̠tava̍śā̠māla̍bhatē । sōmō̠ vai rē̍tō̠dhāḥ । rēta̍ ē̠va ta-dda̍dhāti ॥ sau̠myarchā ‘bhiṣi̍ñchati । rē̠tō̠dhā hya̍ṣā । rēta̠-ssōma̍ḥ । rēta̍ ē̠vāsmi̍-ndadhāti ॥ ya-tkiñcha rāja̠sūya̍mṛ̠tē sōma̎m । ta-thsarva̍-mbhavati ॥ aṣā̍ḍhaṃ yu̠thsu pṛta̍nāsu̠ papri̎m । su̠va̠ra̠.ṣāma̠phsvāṃ vṛ̠jana̍sya gō̠pām । bha̠rē̠ṣu̠jāgṃ su̍kṣi̠tigṃ su̠śrava̍sam । jaya̍nta̠-ntvāmanu̍ madēma sōma ॥ 10 ॥
(rēta̠-ssōma̍-ssa̠pta cha̍ ) (a. 4)

anuvākaṃ 5 – pṛthisavaḥ
yō vai sōmē̍na sū̠yatē̎ । sa dē̍vasa̠vaḥ । yaḥ pa̠śunā̍ sū̠yatē̎ । sa dē̍vasa̠vaḥ । ya iṣṭyā̍ sū̠yatē̎ । sa ma̍nuṣyasa̠vaḥ । ē̠taṃ vai pṛtha̍yē dē̠vāḥ prāya̍chChann । tatō̠ vai sō-‘pyā̍ra̠ṇyānā̎-mpaśū̠nāma̍sūyata । yāva̍tī̠ḥ kiya̍tīścha pra̠jā vācha̠ṃ vada̍nti । tāsā̠gṃ̠ sarvā̍sāgṃ sūyatē ॥ 11 ॥

ya ē̠tēna̠ yaja̍tē । ya u̍ chainamē̠vaṃ vēda̍ ॥ nā̠rā̠śa̠gg̠syarchā ‘bhiṣi̍ñchati । ma̠nu̠ṣyā̍ vai narā̠śagṃsa̍ḥ । ni̠hnutya̠ vāvaitat । athā̠bhiṣi̍ñchati ॥ ya-tkiñcha̍ rāja̠sūya̍-manuttaravē̠dīka̎m । ta-thsarva̍-mbhavati ॥ yē mē̍ pañchā̠śata̍-nda̠duḥ । aśvā̍nāgṃ sa̠dhastu̍tiḥ । dyu̠mada̍gnē̠ mahi̠ śrava̍ḥ । bṛ̠ha-tkṛ̍dhi ma̠ghōnā̎m । nṛ̠vada̍mṛta nṛ̠ṇām ॥ 12 ॥
(sū̠ya̠tē̠ – sa̠dhastu̍ti̠strīṇi̍ cha) (a. 5)

anuvākaṃ 6 – gōsavaḥ
ē̠ṣa gō̍sa̠vaḥ । ṣa̠ṭtri̠gṃ̠śa u̠kthyō̍ bṛ̠ha-thsā̍mā । pava̍mānē kaṇvarathanta̠ra-mbha̍vati ॥ yō vai vā̍ja̠pēya̍ḥ । sa sa̍mrāṭthsa̠vaḥ । yō rā̍ja̠sūya̍ḥ । sa va̍ruṇasa̠vaḥ । pra̠jāpa̍ti̠-ssvārā̎jya-mparamē̠ṣṭhī । svārā̎jya̠-ṅgaurē̠va ॥ gauri̍va bhavati ॥ 13 ॥

ya ē̠tēna̠ yaja̍tē । ya u̍ chainamē̠vaṃ vēda̍ ॥ u̠bhē bṛ̍ha-drathanta̠rē bha̍vataḥ । taddhi svārā̎jyam ॥ a̠yuta̠-ndakṣi̍ṇāḥ । taddhi svārā̎jyam ॥ pra̠ti̠dhuṣā̠ ‘bhiṣi̍ñchati । taddhi svārā̎jyam ॥ anu̍ddhatē̠ vēdyai̍ dakṣiṇa̠ta ā̍hava̠nīya̍sya bṛha̠ta-sstō̠tra-mpratya̠bhiṣi̍ñchati । i̠yaṃ vāva ra̍thanta̠ram ॥ 14 ॥

a̠sau bṛ̠hat । a̠nayō̍rē̠vaina̠-mana̍ntar​hita-ma̠bhiṣi̍ñchati ॥ pa̠śu̠stō̠mō vā ē̠ṣaḥ । tēna̍ gōsa̠vaḥ । ṣa̠ṭtri̠gṃ̠śa-ssarva̍ḥ ॥ rē̠vajjā̠ta-ssaha̍sā vṛ̠ddhaḥ । kṣa̠trāṇā̎-ṅkṣatra̠bhṛtta̍mō vayō̠dhāḥ । ma̠hā-nma̍hi̠tvē ta̍stabhā̠naḥ । kṣa̠trē rā̠ṣṭrē cha̍ jāgṛhi । pra̠jāpa̍tēstvā paramē̠ṣṭhina̠-ssvārā̎jyēnā̠bhiṣi̍ñchā̠-mītyā̍ha ॥ svārā̎jya-mē̠vaina̍-ṅgamayati ॥ 15 ॥
(i̠va̠ bha̠va̠ti̠ – ra̠tha̠nta̠ra – mā̠haika̍-ñcha) (a. 6)

anuvākaṃ 7 – ōdanasavamantrāḥ
si̠gṃ̠hē vyā̠ghra u̠ta yā pṛdā̍kau । tviṣi̍ra̠gnau brā̎hma̠ṇē sūryē̠ yā । indra̠ṃ yā dē̠vī su̠bhagā̍ ja̠jāna̍ । sā na̠ āga̠n varcha̍sā saṃvidā̠nā ॥ yā rā̍ja̠nyē̍ dundu̠bhāvāya̍tāyām । aśva̍sya̠ krandyē̠ puru̍ṣasya mā̠yau । indra̠ṃ yā dē̠vī su̠bhagā̍ ja̠jāna̍ । sā na̠ āga̠n varcha̍sā saṃvidā̠nā ॥ yā ha̠stini̍ dvī̠pini̠ yā hira̍ṇyē । tviṣi̠-raśvē̍ṣu̠ puru̍ṣēṣu̠ gōṣu̍ ॥ 16 ॥

indra̠ṃ yā dē̠vī su̠bhagā̍ ja̠jāna̍ । sā na̠ āga̠n varcha̍sā saṃvidā̠nā ॥ rathē̍ a̠kṣēṣu̍ vṛṣa̠bhasya̠ vājē̎ । vātē̍ pa̠rjanyē̠ varu̍ṇasya̠ śuṣmē̎ । indra̠ṃ yā dē̠vī su̠bhagā̍ ja̠jāna̍ । sā na̠ āga̠n varcha̍sā saṃvidā̠nā ॥ rāḍa̍si vi̠rāḍa̍si । sa̠mrāḍa̍si sva̠rāḍa̍si ॥ indrā̍ya tvā̠ tēja̍svatē̠ tēja̍svantagg​ śrīṇāmi । indrā̍ya̠ tvauja̍svata̠ ōja̍savantagg​ śrīṇāmi ॥ 17 ॥

indrā̍ya tvā̠ paya̍svatē̠ paya̍svantagg​ śrīṇāmi । indrā̍ya̠ tvā-”yu̍ṣmata̠ āyu̍ṣmantagg​ śrīṇāmi ॥ tējō̍-‘si । ta-ttē̠ praya̍chChāmi । tēja̍svadastu mē̠ mukha̎m । tēja̍sva̠chChirō̍ astu mē । tēja̍svān. vi̠śvata̍ḥ pra̠tyam । tēja̍sā̠ sampi̍pṛgdhi mā ॥ ōjō̍-‘si । ta-ttē̠ praya̍chChāmi ॥ 18 ॥

ōja̍svadastu mē̠ mukha̎m । ōja̍sva̠chChirō̍ astu mē । ōja̍svān. vi̠śvata̍ḥ pra̠tyam । ōja̍sā̠ sampi̍pṛgdhi mā ॥ payō̍-‘si । tattē̠ praya̍chChāmi । paya̍svadastu mē̠ mukha̎m । paya̍sva̠chChirō̍ astu mē । paya̍svān. vi̠śvata̍ḥ pra̠tyam । paya̍sā̠ sampi̍pṛgdhi mā ॥ 19 ॥

āyu̍rasi । ta-ttē̠ praya̍chChāmi । āyu̍ṣmadastu mē̠ mukha̎m । āyu̍ṣma̠chChirō̍ astu mē । āyu̍ṣmān. vi̠śvata̍ḥ pra̠tyam । āyu̍ṣā̠ sampi̍pṛgdhi mā ॥ i̠mama̍gna̠ āyu̍ṣē̠ varcha̍sē kṛdhi । pri̠yagṃ rētō̍ varuṇa sōma rājann । mā̠tēvā̎smā aditē̠ śarma̍ yachCha । viśvē̍ dēvā̠ jara̍daṣṭi̠ryathā ‘sa̍t ॥ 20 ॥

āyu̍rasi vi̠śvāyu̍rasi । sa̠rvāyu̍rasi̠ sarva̠māyu̍rasi ॥ yatō̠ vātō̠ manō̍ javāḥ । yata̠ḥ, kṣara̍nti̠ sindha̍vaḥ । tāsā̎-ntvā̠ sarvā̍sāgṃ ru̠chā । a̠bhiṣi̍ñchāmi̠ varcha̍sā ॥ sa̠mu̠dra i̍vāsi ga̠hmanā̎ । sōma̍ ivā̠syadā̎bhyaḥ । a̠gniri̍va vi̠śvata̍ḥ pra̠tyam । sūrya̍ iva̠ jyōti̍ṣā vi̠bhūḥ ॥ 21 ॥

a̠pāṃ yō drava̍ṇē̠ rasa̍ḥ । tama̠hama̠smā ā̍muṣyāya̠ṇāya̍ । tēja̍sē brahmavarcha̠sāya̍ gṛhṇāmi । a̠pāṃ ya ū̠rmau rasa̍ḥ । tama̠hama̠smā ā̍muṣyāya̠ṇāya̍ । ōja̍sē vī̠ryā̍ya gṛhṇāmi । a̠pāṃ yō ma̍ddhya̠tō rasa̍ḥ । tama̠hama̠smā ā̍muṣyāya̠ṇāya̍ । puṣṭyai̎ pra̠jana̍nāya gṛhṇāmi । a̠pāṃ yō ya̠jñiyō̠ rasa̍ḥ । tama̠hama̠smā ā̍muṣyāya̠ṇāya̍ । āyu̍ṣē dīrghāyu̠tvāya̍ gṛhṇāmi ॥ 22 ॥
(gōṣ – vōja̍svantagg​ śrīṇā̠ – myōjō̍-‘si̠ tattē̠ praya̍chChāmi̠ – paya̍sā̠ sampi̍pṛgdhi̠ mā-sa̍-d- vi̠bhū–r ya̠jñiyō̠ rasō̠ dvē cha̍) (a. 7)

anuvākaṃ 8 – ōdanasavagatā sthārōhaṇamantrāḥ
a̠bhiprēhi̍ vī̠raya̍sva । u̠graśchēttā̍ sapatna̠hā ॥ āti̍ṣṭha mitra̠vardha̍naḥ । tubhya̍-ndē̠vā adhi̍bravann ॥ a̠ṅkaunya̠ṅkā va̠bhitō̠ ratha̠ṃ yau dhvā̠ntaṃ vā̍tā̠gramanu̍ sa̠chaṃra̍ntau dū̠rē hē̍tirindri̠yāvā̎-npata̠trī tē nō̠-‘gnaya̠ḥ papra̍yaḥ pārayantu ॥ śamē as itē-nnō. ॥ ā̠tiṣṭha̍nta̠-mpari̠ viśvē̍ abhūṣann । śriya̠ṃ vasā̍naścharati̠ svarō̍chāḥ । ma̠hat-tada̠syāsu̍rasya̠ nāma̍ । ā vi̠śvarū̍pō a̠mṛtā̍ni tasthau ॥ anu̠ tvēndrō̍ mada̠tvanu̠ bṛha̠spati̍ḥ ॥ 23 ॥

anu̠ sōmō̠ anva̠gnirā̍vīt । anu̍ tvā̠ viśvē̍ dē̠vā a̍vantu । anu̍ sa̠pta rājā̍nō̠ ya u̠tābhiṣi̍ktāḥ ॥ anu̍ tvā mi̠trāvaru̍ṇāvi̠hāva̍tam । anu̠ dyāvā̍pṛthi̠vī vi̠śvaśa̍bhūm । sūryō̠ ahō̍bhi̠ranu̍ tvā-‘vatu । cha̠ndramā̠ nakṣa̍trai̠ranu̍ tvā-‘vatu ॥ dyauścha̍ tvā pṛthi̠vī cha̠ prachē̍tasā । śu̠krō bṛ̠ha-ddakṣi̍ṇā tvā pipartu । anu̍ sva̠dhā chi̍kitā̠gṃ̠ sōmō̍ a̠gniḥ । ā-‘ya-mpṛ̍ṇaktu̠ raja̍sī u̠pastha̎m ॥ 24 ॥
(bṛha̠spati̠ḥ – sōmō̍ a̠gnirēka̍-ñcha) (a. 8)

anuvākaṃ 9 – ōdanasavaḥ
pra̠jāpa̍tiḥ pra̠jā a̍sṛjata । tā a̍smā-thsṛ̠ṣṭāḥ parā̍chīrāyann । sa ē̠ta-mpra̠jāpa̍tirōda̠na-ma̍paśyat । sō-‘nna̍-mbhū̠tō̍-‘tiṣṭhat । tā a̠nyatrā̠nnādya̠mavi̍ttvā । pra̠jāpa̍ti-mpra̠jā u̠pāva̍rtanta । anna̍mē̠vaina̍-mbhū̠ta-mpaśya̍ntīḥ pra̠jā u̠pāva̍rtantē । ya ē̠tēna̠ yaja̍tē । ya u̍ chainamē̠vaṃ vēda̍ ॥ sarvā̠ṇyannā̍ni bhavanti ॥ 25 ॥

sarvē̠ puru̍ṣāḥ । sarvā̎ṇyē̠vānnā̠nyava̍rundhē । sarvā̠-npuru̍ṣān ॥ rāḍa̍si vi̠rāḍa̠sītyā̍ha । svārā̎jyamē̠vaina̍-ṅgamayati ॥ yaddhira̍ṇya̠-ndadā̍ti । tēja̠stēnāva̍rundhē । yatti̍sṛdha̠nvam । vī̠rya̍-ntēna̍ । yadaṣṭrā̎m ॥ 26 ॥

puṣṭi̠-ntēna̍ । yat-ka̍ma̠ṇḍalu̎m । āyu̠ṣṭēna̍ ॥ yaddhira̍ṇyamāba̠ddhnāti̍ । jyōti̠rvai hira̍ṇyam । jyōti̍rē̠vāsmi̍n-dadhāti । athō̠ tējō̠ vai hira̍ṇyam । tēja̍ ē̠vātma-ndha̍ttē ॥ yadō̍da̠na-mprā̠śnāti̍ । ē̠tadē̠va sarva̍mava̠ruddhya̍ ॥ 27 ॥

tada̍smi-nnēka̠dhā-‘dhā̎t ॥ rō̠hi̠ṇyā-ṅkā̠rya̍ḥ । yadbrā̎hma̠ṇa ē̠va rō̍hi̠ṇī । tasmā̍dē̠va । athō̠ var​ṣmai̠vainagṃ̍ samā̠nānā̎-ṅkarōti ॥ u̠dya̠tā sūryē̍ṇa kā̠rya̍ḥ । u̠dyanta̠ṃ vā ē̠tagṃ sarvā̎ḥ pra̠jāḥ prati̍nandanti ॥ di̠dṛ̠kṣēṇyō̍ dar​śa̠nīyō̍ bhavati । ya ē̠vaṃ vēda̍ ॥ bra̠hma̠vā̠dinō̍ vadanti ॥ 28 ॥

a̠vētyō̍-‘vabhṛ̠thā(3) nā(3) iti̍ । ya-dda̍rbhapuñjī̠laiḥ pa̠vaya̍ti । ta-thsvi̍dē̠vāvai̍ti । tannāvai̍ti ॥ tri̠bhiḥ pa̍vayati । traya̍ i̠mē lō̠kāḥ । ē̠bhirē̠vaina̍ṃ lō̠kaiḥ pa̍vayati । athō̍ a̠pāṃ vā ē̠ta-ttējō̠ varcha̍ḥ । ya-dda̠rbhāḥ । ya-dda̍rbhapuñjī̠laiḥ pa̠vaya̍ti । a̠pāmē̠vaina̠-ntēja̍sā̠ varcha̍sā̠-‘bhiṣi̍ñchati ॥ 29 ॥
(bha̠va̠ – ntyaṣṭrā̍ – mava̠ruddhya̍ – vadanti – da̠rbhā ya-dda̍rbhapuñjī̠laiḥ pa̠vaya̠tyēka̍-ñcha ) (a. 9)

anuvākaṃ 10 – pañchaśāradīyavidhiḥ
pra̠jāpa̍tirakāmayata ba̠hōrbhūyā̎m-thsyā̠miti̍ । sa ē̠ta-mpa̍ñchaśāra̠dīya̍-mapaśyat । tamā-‘ha̍rat । tēnā̍yajata । tatō̠ vai sa ba̠hōrbhūyā̍-nabhavat । yaḥ kā̠mayē̍ta ba̠hōrbhūyā̎m-thsyā̠miti̍ । sa pa̍ñchaśāra̠dīyē̍na yajēta । ba̠hōrē̠va bhūyā̎-nbhavati ॥ ma̠ru̠-thstō̠mō vā ē̠ṣaḥ । ma̠rutō̠ hi dē̠vānā̠-mbhūyi̍ṣṭhāḥ ॥ 30 ॥

ba̠hurbha̍vati । ya ē̠tēna̠ yaja̍tē । ya u̍ chainamē̠vaṃ vēda̍ ॥ pa̠ñcha̠śā̠ra̠dīyō̍ bhavati । pañcha̠ vā ṛ̠tava̍-ssaṃvathsa̠raḥ । ṛ̠tuṣvē̠va sa̍ṃvathsa̠rē prati̍tiṣṭhati । athō̠ pañchā̎kṣarā pa̠ṅktiḥ । pāṅktō̍ ya̠jñaḥ । ya̠jñamē̠vāva̍rundhē ॥ sa̠pta̠da̠śagg​ stōmā̠ nāti̍yanti । sa̠pta̠da̠śaḥ pra̠jāpa̍tiḥ । pra̠jāpa̍tē̠rāptyai̎ ॥ 31 ॥
(bhūyi̍ṣṭhā – yanti̠ dvē cha̍) (a. 10)

anuvākaṃ 11 – pañchaśāradīyagatapaśuvidhiḥ
a̠gastyō̍ ma̠rudbhya̍ u̠kṣṇaḥ praukṣa̍t । tānindra̠ āda̍tta । ta ē̍na̠ṃ vajra̍mu̠dyatyā̠bhyā̍yanta । tāna̠gastya̍śchai̠vēndra̍ścha kayāśu̠bhīyē̍nāśamayatām । tāñChā̠-ntānupā̎hvayata । ya-tka̍yāśu̠bhīya̠-mbhava̍ti̠ śāntyai̎ ॥ tasmā̍dē̠ta ai̎mdrā māru̠tā u̠kṣāṇa̍-ssava̠nīyā̍ bhavanti । traya̍ḥ pratha̠mē-‘ha̠nnāla̍bhyantē । ē̠va-ndvi̠tīyē̎ । ē̠va-ntṛ̠tīyē̎ ॥ 32 ॥

ē̠va-ñcha̍tu̠rthē । pañchō̎tta̠mē-‘ha̠nnāla̍bhyantē । var​ṣi̍ṣṭhamiva̠ hyē̍tadaha̍ḥ ॥ var​ṣi̍ṣṭha-ssamā̠nānā̎-mbhavati । ya ē̠tēna̠ yaja̍tē । ya u̍ chainamē̠vaṃ vēda̍ ॥ svārā̎jya̠ṃ vā ē̠ṣa ya̠jñaḥ । ē̠tēna̠ vā ēka̠yāvā̍ kānda̠ma-ssvārā̎jya-magachChat ॥ svārā̎jya-ṅgachChati । ya ē̠tēna̠ yaja̍tē ॥ 33 ॥

ya u̍ chainamē̠vaṃ vēda̍ ॥ mā̠ru̠tō vā ē̠ṣa stōma̍ḥ । ē̠tēna̠ vai ma̠rutō̍ dē̠vānā̠-mbhūyi̍ṣṭhā abhavann । bhūyi̍ṣṭha-ssamā̠nānā̎-mbhavati । ya ē̠tēna̠ yaja̍tē । ya u̍ chainamē̠vaṃ vēda̍ ॥ pa̠ñcha̠śā̠ra̠dīyō̠ vā ē̠ṣa ya̠jñaḥ । ā pa̍ñcha̠māt-puru̍ṣā̠danna̍matti । ya ē̠tēna̠ yaja̍tē । ya u̍ chainamē̠vaṃ vēda̍ ॥ sa̠pta̠da̠śagg​ stōmā̠ nāti̍yanti । sa̠pta̠da̠śaḥ pra̠jāpa̍tiḥ । pra̠jāpa̍tērē̠va naiti̍ ॥ 34 ॥
(tṛ̠tīyē̍ – gachChati̠ ya ē̠tēna̠ yaja̍tē – ‘tti̠ ya ē̠tēna̠ yaja̍tē̠ ya u̍ chainamē̠vaṃ vēda̠ trīṇi̍ cha) (a. 11)

(a̠gastya̠-ssvārā̎jya-mmāru̠taḥ pa̍ñchaśāra̠dīyō̠ vā ē̠ṣa ya̠jña-ssa̍ptada̠śaṃ
pra̠jāpa̍tērē̠va naiti̍)

anuvākaṃ 12 – agniṣṭudyāgē grahāṇā-mpurōruchaḥ
a̠syājarā̍sō da̠mā ma̠ritrā̎ḥ । a̠rchaddhū̍māsō a̠gnaya̍ḥ pāva̠kāḥ । śvi̠chī̠chaya̍-śśvā̠trāsō̍ bhura̠ṇyava̍ḥ । va̠na̠ra̠.ṣadō̍ vā̠yavō̠ na sōmā̎ḥ ॥ yajā̍ nō mi̠trāvaru̍ṇā । yajā̍ dē̠vāgṃ ṛ̠ta-mbṛ̠hat । agnē̠ yakṣi̠ sva-ndama̎m ॥ aśvi̍nā̠ piba̍tagṃ su̠tam । dīdya̍gnī śuchi vratā । ṛ̠tunā̍ yajñavāhasā ॥ 35 ॥

dvē virū̍pē charata̠-ssvarthē̎ । a̠nyā-‘nyā̍ va̠thsamupa̍dhāpayētē । hari̍ra̠nyasyā̠-mbhava̍ti sva̠dhāvān̍ । śu̠krō a̠nyasyā̎-ndadṛśē su̠varchā̎ḥ ॥ pū̠rvā̠pa̠ra-ñcha̍ratō mā̠yayai̠tau । śiśū̠ krīḍa̍ntau̠ pari̍yātō addhva̠ram । viśvā̎nya̠nyō bhuva̍nā-‘bhi̠chaṣṭē̎ । ṛ̠tūna̠nyō vi̠dadha̍jjāyatē̠ puna̍ḥ ॥ trīṇi̍ śa̠tā trīṣa̠hasrā̎ṇya̠gnim । tri̠gṃ̠śachcha̍ dē̠vā nava̍ chāsaparyann ॥ 36 ॥

aukṣa̍n-ghṛ̠tairāstṛ̍ṇan-ba̠r̠hira̍smai । ādiddhōtā̍ra̠-nnya̍ṣādayanta ॥ a̠gninā̠-‘gni-ssami̍ddhyatē । ka̠vi-rgṛ̠hapa̍ti̠ryuvā̎ । ha̠vya̠vāḍ-ju̠hvā̎syaḥ ॥ a̠gni-rdē̠vānā̎-ñja̠ṭhara̎m । pū̠tada̍kṣaḥ ka̠vikra̍tuḥ । dē̠vō dē̠vēbhi̠rāga̍mat ॥ a̠gni̠śriyō̍ ma̠rutō̍ vi̠śvakṛ̍ṣṭayaḥ । ā tvē̠ṣamu̠gramava̍ īmahē va̠yam ॥ 37 ॥

tē svā̠ninō̍ ru̠driyā̍ va̠ra̠.ṣani̍rṇijaḥ । si̠gṃ̠hā na hē̠ṣakra̍tava-ssu̠dāna̍vaḥ ॥ yadu̍tta̠mē ma̍rutō maddhya̠mē vā̎ । yadvā̍-‘va̠mē su̍bhagāsō di̠viṣṭha । tatō̍ nō rudrā u̠ta vā̠-‘nvasya̍ । agnē̍ vi̠ttāddha̠viṣō̠ yadyajā̍maḥ ॥ īḍē̍ a̠gnigg​ svava̍sa̠-nnamō̍bhiḥ । i̠ha pra̍sa̠ptō vicha̍yatkṛ̠ta-nna̍ḥ । rathai̍riva̠ prabha̍rē vāja̠yadbhi̍ḥ । pra̠da̠kṣi̠ṇi-nma̠rutā̠g̠ stōma̍mṛddhyām ॥ 38 ॥

śru̠dhi śru̍tkarṇa̠ vahni̍bhiḥ । dē̠vaira̍gnē sa̠yāva̍bhiḥ । āsī̍dantu ba̠ra̠.hiṣi̍ । mi̠trō varu̍ṇō arya̠mā । prā̠ta̠ryāvā̍ṇō addhva̠ram ॥ viśvē̍ṣā̠-madi̍ti-rya̠jñiyā̍nām । viśva̍ṣā̠-mati̍thi̠-rmānu̍ṣāṇām । a̠gni-rdē̠vānā̠mava̍ āvṛṇā̠naḥ । su̠mṛ̠ḍī̠kō bha̍vatu vi̠śvavē̍dāḥ ॥ tvē a̍gnē suma̠ti-mbhikṣa̍māṇāḥ ॥ 39 ॥

di̠vi śravō̍ dadhirē ya̠jñiyā̍saḥ । naktā̍ cha cha̠kruru̠ṣasā̠ virū̍pē । kṛ̠ṣṇa-ñcha̠ varṇa̍maru̠ṇa-ñcha̠ sandhu̍ḥ ॥ tvāma̍gna ādi̠tyāsa̍ ā̠sya̎m । tvā-ñji̠hvāgṃ śucha̍yaśchakrirē kavē । tvāgṃ rā̍ti̠ṣāchō̍ addhva̠rēṣu̍ saśchirē । tvē dē̠vā ha̠vira̍da̠ntyāhu̍tam ॥ ni tvā̍ ya̠jñasya̠ sādha̍nam । agnē̠ hōtā̍ra-mṛ̠tvija̎m । va̠nu̠ṣva-ddē̍va dhīmahi̠ prachē̍tasam । jī̠ra-ndū̠tamama̍rtyam ॥ 40 ॥
(ya̠jña̠vā̠ha̠sā̠ – ‘sa̠pa̠rya̠n – va̠ya – mṛ̍ddhyā̠ṃ – bhikṣa̍māṇā̠ḥ – prachē̍tasa̠mēka̍-ñcha) (a. 12)

anuvākaṃ 13 – indrastudyāgē grahāṇā-mpurōruchaḥ
tiṣṭhā̠ harī̠ ratha̠ ā yu̠jyamā̍nā yā̠hi । vā̠yurna ni̠yutō̍ nō̠ achCha̍ । pibā̠syandhō̍ a̠bhisṛ̍ṣṭō a̠smē । indra̠ svāhā̍ rari̠mā tē̠ madā̍ya ॥ kasya̠ vṛṣā̍ su̠tē sachā̎ । ni̠yutvā̎n vṛṣa̠bhō ra̍ṇat । vṛ̠tra̠hā sōma̍pītayē ॥ indra̍ṃ va̠ya-mma̍hādha̠nē । indra̠marbhē̍ havāmahē । yuja̍ṃ vṛ̠trēṣu̍ va̠jriṇa̎m ॥ 41 ॥

dvi̠tāyō vṛ̍tra̠hanta̍maḥ । vi̠da indra̍-śśa̠takra̍tuḥ । upa̍ nō̠ hari̍bhi-ssu̠tam ॥ sa sūra̠ āja̠naya̠ñjyōti̠rindra̎m । a̠yā dhi̠yā ta̠raṇi̠radri̍bar​hāḥ । ṛ̠tēna̍ śu̠ṣmīnava̍mānō a̠rkaiḥ । vyu̍sridhō̍ a̠srō adri̍rbibhēda ॥ u̠ta tyadā̠śvaśvi̍yam । yadi̍ndra̠ nāhu̍ṣī̠ṣvā । agrē̍ vi̠kṣu pratīda̍yat ॥ 42 ॥

bharē̠ṣvindragṃ̍ su̠havagṃ̍ havāmahē । a̠gṃ̠hō̠muchagṃ̍ su̠kṛta̠-ndaivya̠ñjana̎m । a̠gni-mmi̠traṃ varu̍ṇagṃ sā̠tayē̠ bhaga̎m । dyāvā̍pṛthi̠vī ma̠ruta̍-ssva̠stayē̎ ॥ ma̠hi kṣētra̍-mpu̠ruścha̠ndraṃ vivi̠dvān । ādi-thsakhi̍bhyaścha̠ ratha̠gṃ̠ samai̍rat । indrō̠ nṛbhi̍rajana̠-ddīdyā̍na-ssā̠kam । sūrya̍mu̠ṣasa̍-ṅgā̠tuma̠gnim ॥ u̠ru-nnō̍ lō̠kamanu̍nēṣi vi̠dvān । suva̍rva̠-jjyōti̠rabha̍yagg​ sva̠sti ॥ 43 ॥

ṛ̠ṣvā ta̍ indra̠ sthavi̍rasya bā̠hū । upa̍sthēyāma śara̠ṇā bṛ̠hantā̎ ॥ ā nō̠ viśvā̍bhirū̠tibhi̍-ssa̠jōṣā̎ḥ । brahma̍ juṣā̠ṇō ha̍ryaśva yāhi । varī̍vṛja̠-thsthavi̍rēbhi-ssuśipra । a̠smē dadha̠-dvṛṣa̍ṇa̠gṃ̠ śuṣma̍mindra ॥ indrā̍ya̠ gāva̍ ā̠śira̎m । du̠du̠hrē va̠jriṇē̠ madhu̍ । ya-thsī̍mupahva̠rē-‘vi̠dat ॥ tāstē̍ vajri-ndhē̠navō̍ jōjayurnaḥ ॥ 44 ॥

gabha̍stayō ni̠yutō̍ vi̠śvavā̍rāḥ । aha̍raha̠rbhūya̠ ijjōgu̍vānāḥ । pū̠rṇā i̍ndra kṣu̠matō̠ bhōja̍nasya ॥ i̠mā-ntē̠ dhiya̠-mprabha̍rē ma̠hō ma̠hīm । a̠sya stō̠trē dhi̠ṣaṇā̠ yatta̍ āna̠jē । tamu̍thsa̠vē cha̍ prasa̠vē cha̍ sāsa̠him । indra̍-ndē̠vāsa̠-śśava̍sā mada̠nnanu̍ ॥ 45 ॥
(va̠jriṇa̍ – mayath – sva̠sti – jō̍jayurnaḥ – +sa̠pta cha̍) (a. 13)

anuvākaṃ 14 – aptōryāmāvidhiḥ
pra̠jāpa̍tiḥ pa̠śūna̍sṛjata । tē̎-‘smā-thsṛ̠ṣṭāḥ parā̎mcha āyann । tāna̍gniṣṭō̠mēna̠ nāpnō̎t । tānu̠kthyē̍na̠ nāpnō̎t । tān-thṣō̍ḍa̠śinā̠ nāpnō̎t । tānrātri̍yā̠ nāpnō̎t । tān-thsa̠ndhinā̠ nāpnō̎t । sō̎-‘gnima̍bravīt । i̠mānma̍ ī̠phsēti̍ । tāna̠gnistri̠vṛtā̠ stōmē̍na̠ nāpnō̎t ॥ 46 ॥

sa indra̍mabravīt । i̠mānma̍ ī̠phsēti̍ । tānindra̍ḥ pañchada̠śēna̠ stōmē̍na̠ nāpnō̎t । sa viśvā̎-ndē̠vā-na̍bravīt । i̠mānma̍ īphsa̠tēti̍ । tān. viśvē̍ dē̠vā-ssa̍ptada̠śēna̠ stōmē̍na̠ nāpnu̍vann । sa viṣṇu̍mabravīt । i̠mānma̍ ī̠phsēti̍ । tān. viṣṇu̍rēkavi̠gṃ̠śēna̠ stōmē̍nāpnōt । vā̠ra̠va̠ntīyē̍nāvārayata ॥ 47 ॥

i̠daṃ viṣṇu̠-rvicha̍krama̠ iti̠ vya̍kramata ॥ yasmā̎-tpa̠śava̠ḥ pra prēva̠ bhragṃśē̍rann । sa ē̠tēna̍ yajēta ॥ yadāpnō̎t । tada̠ptōryāma̍syāptōryāma̠tvam ॥ ē̠tēna̠ vai dē̠vā jaitvā̍ni ji̠tvā । ya-ṅkāma̠-makā̍mayanta̠ tamā̎pnuvann । ya-ṅkāma̍-ṅkā̠maya̍tē । tamē̠tēnā̎pnōti ॥ 48 ॥
(stōmē̍na̠ nāpnō̍ – davārayata̠ – +nava̍ cha) (a. 14)

anuvākaṃ 15 – rājābhiṣēkaḥ
vyā̠ghrō̍-‘yama̠gnau cha̍rati̠ pravi̍ṣṭaḥ । ṛṣī̍ṇā-mpu̠trō a̍bhiśasti̠pā a̠yam । na̠ma̠skā̠rēṇa̠ nama̍sā tē juhōmi । mā dē̠vānā̎-mmithu̠yā ka̍rma bhā̠gam ॥ sāvī̠ra̠.hi dē̍va prasa̠vāya̍ pitrē । va̠r​ṣmāṇa̍masmai vari̠māṇa̍masmai । athā̠smabhyagṃ̍ savita-ssa̠rvatā̍tā । di̠vē di̍va̠ āsu̍vā̠ bhūri̍pa̠śvaḥ ॥ bhū̠tō bhū̠tēṣu̍ charati̠ pravi̍ṣṭaḥ । sa bhū̠tānā̠-madhi̍pati-rbabhūva ॥ 49 ॥

tasya̍ mṛ̠tyau cha̍rati rāja̠sūya̎m । sa rājā̍ rā̠jya-manu̍manyatāmi̠dam ॥ yēbhi̠-śśilpai̎ḥ paprathā̠nāmadṛgṃ̍hat । yēbhi̠dryāma̠bhyapigṃ̍śat-pra̠jāpa̍tiḥ । yēbhi̠rvācha̍ṃ vi̠śvarū̍pāgṃ sa̠mavya̍yat । tēnē̠mama̍gna i̠ha varcha̍sā̠ sama̍ṅgdhi ॥ yēbhi̍rādi̠tyastapa̍ti̠ prakē̠tubhi̍ḥ । yēbhi̠-ssūryō̍ dadṛ̠śē chi̠trabhā̍nuḥ । yēbhi̠rvācha̍-mpuṣka̠lēbhi̠ravya̍yat । tēnē̠mama̍gna i̠ha varcha̍sā̠ sama̍ṅgdhi ॥ 50 ॥

ā-‘ya-mbhā̍tu̠ śava̍sā̠ pañcha̍ kṛ̠ṣṭīḥ । indra̍ iva jyē̠ṣṭhō bha̍vatu pra̠jāvān̍ । a̠smā a̍stu puṣka̠la-ñchi̠trabhā̍nu । ā-‘ya-mpṛ̍ṇaktu̠ raja̍sī u̠pastha̎m ॥ yattē̠ śilpa̍-ṅkaśyapa rōcha̠nāva̍t । i̠ndri̠yāva̍t-puṣka̠la-ñchi̠trabhā̍nu । yasmi̠n-thsūryā̠ arpi̍tā-ssa̠pta sā̠kam । tasmi̠n-rājā̍na̠-madhi̠viśra̍yē̠mam ॥ dyaura̍si pṛthi̠vya̍si ॥ vyā̠ghrō vaiyā̠ghrē-‘dhi̍ ॥ 51 ॥

viśra̍yasva̠ diśō̍ ma̠hīḥ । viśa̍stvā̠ sarvā̍ vāñChantu । mā tva-drā̠ṣṭramadhi̍bhraśat ॥ yā di̠vyā āpa̠ḥ paya̍sā sambabhū̠vuḥ । yā a̠ntari̍kṣa u̠ta pārthi̍vī̠ryāḥ । tā sā̎-ntvā̠ sarvā̍sāgṃ ru̠chā । a̠bhiṣi̍ñchāmi̠ varcha̍sā । a̠bhi tvā̠ varcha̍sā sicha-ndi̠vyēna̍ । paya̍sā sa̠ha । yathā-”sā̍ rāṣṭra̠vardha̍naḥ ॥ 52 ॥

tathā̎ tvā savi̠tā ka̍rat । indra̠ṃ viśvā̍ avīvṛdhann । sa̠mu̠dra vya̍chasa̠-ṅgira̍ḥ । ra̠thīta̍magṃ rathī̠nām । vājā̍nā̠gṃ̠ sa-tpa̍ti̠-mpati̎m । vasa̍vastvā pu̠rastā̍da̠bhiṣi̍ñchantu gāya̠trēṇa̠ Chanda̍sā । ru̠drāstvā̍ dakṣiṇa̠tō̍-‘bhiṣi̍ñchantu̠ traiṣṭu̍bhēna̠ Chanda̍sā । ā̠di̠tyāstvā̍ pa̠śchāda̠bhiṣi̍ñchantu̠ jāga̍tēna̠ Chanda̍sā । viśvē̎ tvā dē̠vā u̍ttara̠tō̍-‘bhiṣi̍ñcha̠n-tvānu̍ṣṭubhēna̠ Chanda̍sā । bṛha̠spati̍-stvō̠pari̍ṣṭā-da̠bhiṣi̍ñchatu̠ pāṅktē̍na̠ Chanda̍sā ॥ 53 ॥

a̠ru̠ṇa-ntvā̠ vṛka̍mu̠gra-ṅkha̍ja-ṅka̠ram । rōcha̍māna-mma̠rutā̠magrē̍ a̠rchiṣa̍ḥ । sūrya̍vanta-mma̠ghavā̍naṃ viṣāsa̠him । indra̍mu̠kthyēṣu̍ nāma̠hūta̍magṃ huvēma ॥ pra bā̠havā̍ sisṛta-ñjī̠vasē̍ naḥ । ā nō̠ gavyū̍timukṣata-ṅghṛ̠tēna̍ । ā nō̠ janē̎ śravayataṃ yuvānā । śru̠ta-mmē̍ mitrāvaruṇā̠ havē̠mā ॥ indra̍sya tē vīrya̠kṛta̍ḥ । bā̠hū u̠pāva̍harāmi ॥ 54 ॥
(ba̠bhū̠ – vāvya̍ya̠-ttēnē̠mama̍gna i̠ha varcha̍sā̠ sama̍ṅgdhi̠ – vaiyā̠ghrē-‘dhi̍ – rāṣṭra̠vardha̍na̠ḥ – pāṅktē̍na̠ Chanda̍sō̠ – pāva̍harāmi) (a. 15)

anuvākaṃ 16 – rājābhiṣēkāṅgaṃ rathārōhaṇam
a̠bhi prēhi̍ vī̠raya̍sva । u̠graśchēttā̍ sapatna̠hā ॥ āti̍ṣṭha vṛtra̠hanta̍maḥ । tubhya̍-ndē̠vā adhi̍bravann ॥ a̠ṅkau nya̠ṅkāva̠bhitō̠ ratha̠ṃ yau । dhvā̠ntaṃ vā̍tā̠gramanu̍sa̠-ñchara̍ntau । dū̠rē hē̍ti-rindri̠yāvā̎-npata̠trī । tē nō̠-‘gnaya̠ḥ papra̍yaḥ pārayantu ॥ nama̍sta ṛṣē gada । avya̍thāyai (avya̍dhāyai) tvā sva̠dhāyai̎ tvā ॥ 55 ॥

mā na̍ indrā̠bhita̠stva-dṛ̠ṣvāri̍ṣṭāsaḥ । ē̠vā bra̍hma̠ntavēda̍stu ॥ tiṣṭhā̠ rathē̠ adhi̠ ya-dvajra̍hastaḥ ॥ ā ra̠śmīndē̍va yuvasē̠ svaśva̍ḥ ॥ abōvē, ā̠tiṣṭha̍nta̠-mpari̠ viśvē̍ abhūṣann । śriya̠ṃ vasā̍naścharati̠ svarō̍chāḥ । ma̠hat-tada̠syāsu̍rasya̠ nāma̍ । ā vi̠śvarū̍pō a̠mṛtā̍ni tasthau ॥ । anu̠ tvēndrō̍ mada̠tvanu̠ bṛha̠spati̍ḥ । anu̠ sōmō̠ anva̠gnirā̍vīt । anu̍ tvā̠ viśvē̍ dē̠vā a̍vantu । anu̍ sa̠pta rājā̍nō̠ ya u̠tābhiṣi̍ktāḥ ॥. anu̍tvā mi̠trāvaru̍ṇāvi̠hāva̍tam । anu̠ dyāvā̍pṛthi̠vī vi̠śvaśa̍bhūm । sūryō̠ ahō̍bhi̠ranu̍ tvā-‘vatu । cha̠ndramā̠ nakṣa̍trai̠ranu̍ tvā ‘vatu ॥ ॥ dyauścha̍ tvā pṛthi̠vī cha̠ prachē̍tasā । śu̠krō bṛ̠ha-ddakṣi̍ṇā tvā pipartu । anu̍ sva̠dhā chikitā̠gṃ̠ sōmō̍ a̠gniḥ । anu̍ tvā-‘vatu savi̠tā sa̠vēna̍ ॥ 56 ॥

indra̠ṃ viśvā̍ avīvṛdhann । sa̠mu̠dra vya̍chasa̠-ṅgira̍ḥ । ra̠thīta̍magṃ rathī̠nām । vājā̍nā̠gṃ̠ sa-tpa̍ti̠-mpati̎m ॥ pari̍ mā sē̠nyā ghōṣā̎ḥ । jyānā̎ṃ vṛñjantu gṛ̠ddhnava̍ḥ । mē̠thi̠ṣṭhāḥ pinva̍mānā i̠ha । mā-ṅgōpa̍tima̠bhi saṃvi̍śantu ॥ tanmē-‘nu̍mati̠-ranu̍manyatām । tanmā̠tā pṛ̍thi̠vī ta-tpi̠tā dyauḥ ॥ 57 ॥

tadgrāvā̍ṇa-ssōma̠sutō̍ mayō̠bhuva̍ḥ । tada̍śvinā śṛṇutagṃ saubhagā yu̠vam ॥ ava̍ tē̠ hēḍō̍ varuṇa̠ namō̍bhi̠rava̍ ya̠jñēbhi̍rīmahē ha̠virbhi̍ḥ । kṣaya̍nna̠smabhya̍masura prachētō̠ rāja̠nnēnāgṃ̍si śiśrathaḥ kṛ̠tāni̍ ॥, udu̍tta̠maṃ va̍ruṇa̠ pāśa̍ma̠smadavā̍-‘dha̠maṃ vima̍dhya̠magg​ śra̍thāya । athā̍ va̠yamā̍ditya vra̠tē tavā-‘nā̍gasō̠ adi̍tayē syāma ॥ ॥ ē̠nā vyā̠ghra-mpa̍riṣasvajā̠nāḥ । si̠gṃ̠hagṃ hi̍nvanti maha̠tē saubha̍gāya । sa̠mu̠dra-nna su̠hava̍-ntasthi̠vāgṃsa̎m । ma̠rmṛ̠jyantē̎ dvī̠pina̍ma̠phsva̍ntaḥ ॥ uda̠sāvē̍tu̠ sūrya̍ḥ । udi̠da-mmā̍ma̠kaṃ vacha̍ḥ । udi̍hi dēva sūrya । sa̠ha va̠gnunā̠ mama̍ । a̠haṃ vā̠chō vi̠vācha̍nam । mayi̠ vāga̍stu dharṇa̠siḥ । yantu̍ na̠dayō̠ var​ṣa̍ntu pa̠rjanyā̎ḥ । su̠pi̠ppa̠lā ōṣa̍dhayō bhavantu ॥ anna̍vatāmōda̠nava̍tāmā̠mikṣa̍vatām । ē̠ṣāgṃ rājā̍ bhūyāsam ॥ 58 ॥
(sva̠dhāyai̎ tvā – sa̠vēna̠ – dyauḥ – su̎rya sa̠pta cha̍) (a. 16)

anuvākaṃ 17 – rājābhiṣēkāṅgaṃ vapanam
yē kē̠śina̍ḥ pratha̠mā-ssa̠tramāsa̍ta । yēbhi̠rābhṛ̍ta̠ṃ yadi̠daṃ vi̠rōcha̍tē । tēbhyō̍ juhōmi bahu̠dhā ghṛ̠tēna̍ । rā̠yaspōṣē̍ṇē̠maṃ varcha̍sā̠ sagṃsṛ̍jātha ॥ nartē brahma̍ṇa̠stapa̍sō vimō̠kaḥ । dvi̠nāmnī̍ dī̠kṣā va̠śinī̠ hyu̍grā । prakēśā̎-ssu̠vatē̍ kā̠ṇḍinō̍ bhavanti । tēṣā̎-mbra̠hmēdīśē̠ vapa̍nasya̠ nānyaḥ ॥ ārō̍ha̠ prōṣṭha̠ṃ viṣa̍hasva̠ śatrūn̍ । avā̎srāgdī̠kṣā va̠śinī̠ hyu̍grā ॥ 59 ॥

dē̠hi dakṣi̍ṇā̠-mprati̍ra̠svāyu̍ḥ । athā̍ muchyasva̠ varu̍ṇasya̠ pāśā̎t ॥ yēnāva̍pa-thsavi̠tā kṣu̠rēṇa̍ । sōma̍sya̠ rājñō̠ varu̍ṇasya vi̠dvān । tēna̍ brahmāṇō vapatē̠dama̠syōrjēmam । ra̠yyā varcha̍sā̠ sagṃsṛ̍jātha ॥ mā tē̠ kēśā̠nanu̍ gā̠dvarcha̍ ē̠tat । tathā̍ dhā̠tā ka̍rōtu tē । tubhya̠mindrō̠ bṛha̠spati̍ḥ । sa̠vi̠tā varcha̠ āda̍dhāt ॥ 60 ॥

tēbhyō̍ ni̠dhāna̍-mbahu̠dhā vyaichChann̍ । a̠nta̠rā dyāvā̍pṛthi̠vī a̠pa-ssuva̍ḥ । da̠rbha̠sta̠mbē vī̠rya̍kṛtē ni̠dhāya̍ । paugg​syē̍nē̠maṃ varcha̍sā̠ sagṃsṛ̍jātha ॥ bala̍-ntē bāhu̠vō-ssa̍vi̠tā da̍dhātu । sōma̍stvā-‘naktu̠ paya̍sā ghṛ̠tēna̍ । strī̠ṣu rū̠pama̍śvinai̠ta-nnidha̍ttam । paugg​syē̍nē̠maṃ varcha̍sā̠ sagṃsṛ̍jātha ॥ ya-thsī̠manta̠-ṅkaṅka̍tastē li̠lēkha̍ । yadvā̎ kṣu̠raḥ pa̍riva̠varja̠ vapagg̍stē । strī̠ṣu rū̠pama̍śvinai̠ta-nnidha̍ttam । paugg​syē̍nē̠magṃ sagṃsṛ̍jāthō vī̠ryē̍ṇa ॥ 61 ॥
(avā̎srāgdī̠kṣā vā̠śinī̠ hyu̍grā-”da̍dhā-dva̠varja̠ vapagg̍stē̠ dvē cha̍ ) (a. 17)

(yē kē̠śinō̠ nartē mā tē̠ bala̠ṃ ya-thsī̠manta̠-mpañcha̍)

anuvākaṃ 18 – vidyanākhya ēkāhaviśēṣaḥ
indra̠ṃ vai svā viśō̍ ma̠rutō̠ nāpā̍chāyann । sō-‘na̍pachāyyamāna ē̠taṃ vi̍gha̠nama̍paśyat । tamā-‘ha̍rat । tēnā̍yajata । tēnai̠vāsā̠-ntagṃ sagg̍sta̠mbhaṃ vya̍hann । ya-dvyahann̍ । ta-dvi̍gha̠nasya̍ vighana̠tvam ॥ vi pā̠pmāna̠-mbhrātṛ̍vyagṃ hatē । ya ē̠tēna̠ yaja̍tē । ya u̍ chainamē̠vaṃ vēda̍ ॥ 62 ॥

yagṃ rājā̍na̠ṃ viśō̠ nāpa̠chāyē̍yuḥ । yō vā̎ brāhma̠ṇastama̍sā pā̠pmanā̠ prāvṛ̍ta̠-ssyāt । sa ē̠tēna̍ yajēta । vi̠gha̠nēnai̠vaina̍-dvi̠hatya̍ । vi̠śāmādhi̍patya-ṅgachChati ॥ tasya̠ dvē dvā̍da̠śē stō̠trē bhava̍taḥ । dvē cha̍turvi̠gṃ̠śē । audbhi̍dyamē̠va tat । ē̠tadvai kṣa̠trasyaudbhi̍dyam । yada̍smai̠ svā viśō̍ ba̠ligṃ hara̍nti ॥ 63 ॥

hara̍ntyasmai̠ viśō̍ ba̠lim । aina̠mapra̍tikhyāta-ṅgachChati । ya ē̠vaṃ vēda̍ ॥ pra̠bāhu̠gvā agrē̎ kṣa̠trāṇyātē̍puḥ । tēṣā̠mindra̍ḥ, kṣa̠trāṇyāda̍tta । na vā i̠māni̍ kṣa̠trāṇya̍ bhūva̠nniti̍ । tannakṣa̍trāṇā-nnakṣatra̠tvam । ā śrēya̍sō̠ bhrātṛ̍vyasya̠ tēja̍ indri̠ya-nda̍ttē । ya ē̠tēna̠ yaja̍tē । ya u̍ chainamē̠vaṃ vēda̍ ॥ 64 ॥

ta-dyathā̍ ha̠ vai sa̍chyā̠kriṇau̠ kapla̍kāvu̠pā-va̍hitau̠ syātā̎m । ē̠vamē̠tau yu̠gmantau̠ stōmau̎ । a̠yukṣu̠ stōmē̍ṣu kriyētē । pā̠pmanō-‘pa̍hatyai ॥ apa̍ pā̠pmāna̠-mbhrātṛ̍vyagṃ hatē । ya ē̠tēna̠ yaja̍tē । ya u̍ chainamē̠vaṃ vēda̍ ॥ ta-dyathā̍ ha̠ vai sū̍tagrāma̠ṇya̍ḥ । ē̠va-ñChandāgṃ̍si । tēṣva̠sāvā̍di̠tyō bṛ̍ha̠tīra̠bhyū̍ḍhaḥ ॥ 65 ॥

sa̠tōbṛ̍hatīṣu stuvatē sa̠tō bṛ̍hann । pra̠jayā̍ pa̠śubhi̍-rasā̠nītyē̠va ॥ vyati̍ṣaktābhi-sstuvatē । vyati̍ṣakta̠ṃ vai kṣa̠traṃ vi̠śā । vi̠śaivaina̍-ṅkṣa̠trēṇa̠ vyati̍ṣajati ॥ vyati̍ṣaktābhi-sstuvatē । vyati̍ṣaktō̠ vai grā̍ma̠ṇī-ssa̍jā̠taiḥ । sa̠jā̠tairē̠vaina̠ṃ vyati̍ṣajati ॥ vyati̍ṣaktābhi-sstuvatē । vyati̍ṣaktō̠ vai puru̍ṣaḥ pā̠pmabhi̍ḥ । vyati̍ṣaktā-bhirē̠vāsya̍ pā̠pmanō̍ nudatē ॥ 66 ॥
(vēda̠ – hara̍n – tyēnamē̠vaṃ vēdā̠ – bhyū̍ḍhaḥ – pā̠pmabhi̠rēka̍-ñcha) (a. 18)

(tri̠vṛ–dyadā̎gnē̠yō̎-‘gnimu̍khā̠ hyṛddhi̠–r yadā̎gnē̠ya ā̎gnē̠yō – na vai sōmē̍na̠ – yō vai sōmē̍ – nai̠ṣa gō̍sa̠vaḥ – si̠gṃ̠hē̍ – ‘bhiprēhi̍ mitra̠vardha̍naḥ – pra̠jāpa̍ti̠stā ō̍da̠naṃ – pra̠jāpa̍tirakāmayata ba̠hō-rbhūyā̍ – na̠gastyō̠ – ‘syājarā̍sa̠ – stiṣṭhā̠ harī̎ – pra̠jāpa̍tiḥ pa̠śūn – vyā̠ghrō̍-‘yama̠ – bhiprēhi̍ vṛtra̠hanta̍mō̠ – yē kē̠śina̠ – indra̠ṃ vā a̠ṣṭāda̍śa )

(tri̠vṛ–dyō vai sōmē̠ – nāyu̍rasi vi̠śvāyu̍–r ba̠hu-rbha̍vati̠ – tiṣṭhā̠ harī̠ ratha̠ – ā-‘ya-mbhā̍tu̠ – tēbhyō̍ ni̠dhāna̠gṃ̠ ṣaṭthṣa̍ṣṭiḥ)

(tri̠vṛt – pā̠pmanō̍ nudatē)

॥ hari̍ḥ ōm ॥

॥ kṛṣṇa yajurvēdīya taittirīya brāhmaṇē dvitīyāṣṭakē saptamaḥ prapāṭhaka-ssamāptaḥ ॥