KYTB 2.5 Upahoma Sheshah – Krishna Yajurveda Taittiriya Brahmana Patha – Prano Rakshati

kṛṣṇa yajurvēdīya taittirīya brāhmaṇē dvitīyāṣṭakē pañchamaḥ prapāṭhakaḥ – upahōmaśēṣaḥ

ō-nnamaḥ paramātmanē, śrī mahāgaṇapatayē namaḥ,
śrī gurubhyō namaḥ । ha̠ri̠ḥ ōm ॥

2.5.1 upahōmāḥ
prā̠ṇō ra̍kṣati̠ viśva̠mēja̍t । iryō̍ bhū̠tvā ba̍hu̠dhā ba̠hūni̍ । sa ithsarva̠ṃ vyā̍naśē ॥ yō dē̠vō dē̠vēṣu̍ vi̠bhūra̠ntaḥ । āvṛ̍dū̠dā-tkṣētriya̍ddhva̠gadvṛṣā̎ । tami-tprā̠ṇa-mmana̠sō pa̍śikṣata । agra̍-ndē̠vānā̍-mi̠dama̍ttu nō ha̠viḥ ॥ mana̍sa̠śchittē̠dam । bhū̠ta-mbhavya̍-ñcha gupyatē । taddhi dē̠vēṣva̍gri̠yam ॥ 1 ॥

ā na̍ ētu puraścha̠ram । sa̠ha dē̠vairi̠magṃ hava̎m । mana̠-śśrēya̍si śrēyasi । karma̍n. ya̠jñapa̍ti̠-ndadha̍t ॥ ju̠ṣatā̎-mmē̠ vāgi̠dagṃ ha̠viḥ । vi̠rāḍdē̠vī pu̠rōhi̍tā । ha̠vya̠vāḍana̍ pāyinī ॥ yayā̍ rū̠pāṇi̍ bahu̠dhā vada̍nti । pēśāgṃ̍si dē̠vāḥ pa̍ra̠mē ja̠nitrē̎ । sānō̍ vi̠rāḍana̍pasphurantī ॥ 2 ॥

vāgdē̠vī ju̍ṣatāmi̠dagṃ ha̠viḥ ॥ chakṣu̍-rdē̠vānā̠-ñjyōti̍ra̠mṛtē̠ nya̍ktam । a̠sya vi̠jñānā̍ya bahu̠dhā nidhī̍yatē । tasya̍ su̠mna-ma̍śīmahi । mā nō̍ hāsī-dvichakṣa̠ṇam ॥ āyu̠rinna̠ḥ pratī̎ryatām । ana̍ndhā̠-śchakṣu̍ṣā va̠yam । jī̠vā jyōti̍raśīmahi । suva̠rjyōti̍-ru̠tāmṛta̎m ॥ śrōtrē̍ṇa bha̠dra mu̠ta śṛ̍ṇvanti sa̠tyam । śrōtrē̍ṇa̠ vācha̍-mbahu̠dhōdya mā̍nām । śrōtrē̍ṇa̠ mōda̍ścha̠ maha̍ścha śrūyatē । śrōtrē̍ṇa̠ sarvā̠ diśa̠ āśṛ̍ṇōmi ॥ yēna̠ prāchyā̍ u̠ta da̍kṣi̠ṇā । pra̠tīchyai̍ di̠śa-śśṛ̠ṇvantyu̍tta̠rāt । tadichChrōtra̍-mbahu̠dhōdyamā̍nam । a̠rānna nē̠miḥ pari̠ sarva̍-mbabhūva ॥ 3 ॥
(a̠gri̠ – yamana̍pasphurantī – sa̠tyagṃ sa̠pta cha̍) (a. 1)

2.5.2 upahōmāḥ
u̠dēhi̍ vāji̠nyō a̍sya̠phsva̍ntaḥ । i̠dagṃ rā̠ṣṭramāvi̍śa sū̠nṛtā̍vat । yō rōhi̍tō̠ viśva̍mi̠da-ñja̠jāna̍ । sa nō̍ rā̠ṣṭrēṣu̠ sudhi̍tāndadhātu ॥ rōhagṃ̍ rōha̠gṃ̠ rōhi̍ta̠ āru̍rōha । pra̠jābhi̠rvṛddhi̍-ñja̠nuṣā̍mu̠pastha̎m । tābhi̠-ssagṃra̍bdhō avida̠thṣaḍu̠rvīḥ । gā̠tu-mpra̠paśya̍nni̠ha rā̠ṣṭramāhā̎ḥ ॥ āhā̍r​ṣī-drā̠ṣṭrami̠ha rōhi̍taḥ । mṛdhō̠ vyā̎stha̠dabha̍ya-nnō astu ॥ 4 ॥

a̠smabhya̍-ndyāvāpṛthivī̠ śakva̍rībhiḥ । rā̠ṣṭra-ndu̍hāthāmi̠ha rē̠vatī̍bhiḥ ॥ vima̍mar​śa̠ rōhi̍tō vi̠śvarū̍paḥ । sa̠mā̠cha̠krā̠ṇaḥ pra̠ruhō̠ ruha̍ścha । diva̍ga̠ntvāya̍ maha̠tā ma̍hi̠mnā । vi nō̍ rā̠ṣṭramu̍nattu̠ paya̍sā̠ svēna̍ ॥ yāstē̠ viśa̠stapa̍sā sambabhū̠vuḥ । gā̠ya̠traṃ va̠thsamanu̠ tāsta̠ āgu̍ḥ । tāstvā vi̍śantu̠ maha̍sā̠ svēna̍ । sa-mmā̍tā pu̠trō a̠bhyē̍tu̠ rōhi̍taḥ ॥ 5 ॥

yū̠yamu̍grā marutaḥ pṛśnimātaraḥ । indrē̍ṇa sa̠yujā̠ pramṛ̍ṇītha̠ śatrūn̍ । ā vō̠ rōhi̍tō aśṛṇōdabhidyavaḥ । trisa̍ptāsō maruta-ssvādusammudaḥ ॥ rōhi̍tō̠ dyāvā̍pṛthi̠vī ja̍jāna । tasmi̠gg̠stantu̍-mparamē̠ṣṭhī ta̍tāna । tasmi̍ñChiśriyē a̠ja ēka̍pāt । adṛgṃ̍ ha̠ddyāvā̍pṛthi̠vī balē̍na ॥ rōhi̍tō̠ dyāvā̍pṛthi̠vī a̍dṛgṃhat । tēna̠ suva̍-sstabhi̠ta-ntēna̠ nāka̍ḥ ॥ 6 ॥

sō a̠ntari̍kṣē̠ raja̍sō vi̠māna̍ḥ । tēna̍ dē̠vā-ssuva̠ranva̍vindann ॥ su̠śēva̍-ntvā bhā̠navō̍ dīdi̠vāgṃsa̎m । sama̍grāsō ju̠hvō̍ jātavēdaḥ । u̠kṣanti̍ tvā vā̠jina̠mā ghṛ̠tēna̍ । sagṃsa̍magnē yuvasē̠ bhōja̍nāni ॥ agnē̠ śardha̍ maha̠tē saubha̍gāya । tava̍ dyu̠mnā-nyu̍tta̠māni̍ santu । sa-ñjā̎spa̠tyagṃ su̠yama̠mākṛ̍ṇuṣva । śa̠trū̠ya̠tāma̠bhiti̍ṣṭhā̠ mahā̍si ॥ 7 ॥
(a̠- stvē̠tu̠ rōhi̍tō̠ – nākō̠ – mahāgṃ̍si) (a. 2)

2.5.3 upahōmāḥ
puna̍rna̠ indrō̍ ma̠ghavā̍ dadātu । dhanā̍ni śa̠krō dhanya̍-ssu̠rādhā̎ḥ । a̠rvā̠chīna̍-ṅkṛṇutāṃ yāchi̠tō mana̍ḥ । śru̠ṣṭī nō̍ a̠sya ha̠viṣō̍ juṣā̠ṇaḥ ॥ yāni̍ nō ji̠na-ndhanā̍ni । ja̠hartha̍ śūra ma̠nyunā̎ । indrānu̍vinda na̠stāni̍ । a̠nēna̍ ha̠viṣā̠ puna̍ḥ ॥ indra̠ āśā̎bhya̠ḥ pari̍ । sarvā̠bhyō-‘bha̍ya-ṅkarat ॥ 8 ॥

jētā̠ śatrū̠n̠. vicha̍r​ṣaṇiḥ ॥ ākū̎tyai tvā̠ kāmā̍ya tvā sa̠mṛdhē̎ tvā । pu̠rō da̍dhē amṛta̠tvāya̍ jī̠vasē̎ ॥ ākū̍tima̠syāva̍sē । kāma̍masya̠ samṛ̍ddhyai । indra̍sya yuñjatē̠ dhiya̍ḥ ॥ ākū̍ti-ndē̠vī-mmana̍saḥ pu̠rō da̍dhē । ya̠jñasya̍ mā̠tā su̠havā̍ mē astu । yadi̠chChāmi̠ mana̍sā̠ sakā̍maḥ । vi̠dēya̍mēna̠ddhṛda̍yē̠ nivi̍ṣṭam ॥ 9 ॥

sēda̠gnira̠gnīgṃ ratyē̎tya̠nyān । yatra̍ vā̠jī tana̍yō vī̠ḍupā̍ṇiḥ । sa̠hasra̍pāthā a̠kṣarā̍ sa̠mēti̍ ॥ āśā̍nā-ntvā ”śāpā̠lēbhya̍ḥ । cha̠turbhyō̍ a̠mṛtē̎bhyaḥ । i̠da-mbhū̠tasyāddhya̍kṣēbhyaḥ । vi̠dhēma̍ ha̠viṣā̍ va̠yam ॥ viśvā̠ āśā̠ madhu̍nā̠ sagṃsṛ̍jāmi । a̠na̠mī̠vā āpa̠ ōṣa̍dhayō bhavantu । a̠yaṃ yaja̍mānō̠ mṛdhō̠ vya̍syatām ॥ 10 ॥

agṛ̍bhītāḥ pa̠śava̍-ssantu̠ sarvē̎ ॥ a̠gni-ssōmō̠ varu̍ṇō mi̠tra indra̍ḥ । bṛha̠spati̍-ssavi̠tā ya-ssa̍ha̠srī । pū̠ṣā nō̠ gōbhi̠rava̍sā̠ sara̍svatī । tvaṣṭā̍ rū̠pāṇi̠ sama̍naktu ya̠jñaiḥ ॥ tvaṣṭā̍ rū̠pāṇi̠ dadha̍tī̠ sara̍svatī । pū̠ṣā bhagagṃ̍ savi̠tā nō̍ dadātu । bṛha̠spati̠-rdada̠dindra̍-ssa̠hasra̎m । mi̠trō dā̠tā varu̍ṇa̠-ssōmō̍ a̠gniḥ ॥ 11 ॥
(ka̠ra̠n – nivi̍ṣṭa – masyatā̠ṃ – +nava̍ cha) (a. 3)

2.5.4 upahōmāḥ
ā nō̍ bhara̠ bhaga̍mindra dyu̠manta̎m । ni tē̍ dē̠ṣṇasya̍ dhīmahi prarē̠kē । u̠rva i̍va paprathē̠ kāmō̍ a̠smē । tamāpṛ̍ṇā vasupatē̠ vasū̍nām ॥ i̠ma-ṅkāma̍-mmandayā̠ gōbhi̠raśvai̎ḥ । cha̠ndrava̍tā̠ rādha̍sā pa̠pratha̍ścha । su̠va̠ryavō̍ ma̠tibhi̠stubhya̠ṃ viprā̎ḥ । indrā̍ya̠ vāha̍ḥ kuśi̠kāsō̍ akrann ॥ indra̍sya̠ nu vī̠ryā̍ṇi̠ pravō̍cham । yāni̍ cha̠kāra̍ pratha̠māni̍ va̠jrī ॥ 12 ॥

aha̠-nnahi̠manva̠pasta̍tarda । pra va̠kṣaṇā̍ abhina̠-tparva̍tānām ॥ aha̠nnahi̠-mparva̍tē śiśriyā̠ṇam । tvaṣṭā̎-‘smai̠ vajragg̍ sva̠rya̍-ntatakṣa । vā̠śrā i̍va dhē̠nava̠-ssyanda̍mānāḥ । añja̍-ssamu̠dra-mava̍jagmu̠rāpa̍ḥ ॥ vṛ̠ṣā̠yamā̍ṇō-‘vṛṇīta̠ sōma̎m । trika̍drukēṣva-piba-thsu̠tasya̍ । ā sāya̍ka-mma̠ghavā̍ datta̠ vajra̎m । aha̍nnēna-mprathama̠jā mahī̍nām ॥ 13 ॥

yadindrāha̍n-prathama̠jā mahī̍nām । ānmā̠yinā̠mami̍nā̠ḥ prōta mā̠yāḥ । ā-thsūrya̍-ñja̠naya̠-ndyāmu̠ṣāsa̎m । tā̠dīknā̠ śatrū̠nna kilā̍vivithsē ॥ aha̍n vṛ̠traṃ vṛ̍tra̠tara̠ṃ vyagṃsa̎m । indrō̠ vajrē̍ṇa maha̠tā va̠dhēna̍ । skandhāgṃ̍sīva̠ kuli̍śēnā̠ vivṛ̍kṇā । ahi̍-śśayata upa̠pṛk-pṛ̍thi̠vyām ॥ a̠yō̠ddhyēva du̠rmada̠ ā hi ju̠hvē । ma̠hā̠vī̠ra-ntu̍ vibā̠dha-mṛ̍jī̠ṣam ॥ 14 ॥

nātā̍rīrasya̠ samṛ̍tiṃ va̠dhānā̎m । sagṃ ru̠jānā̎ḥ pipiṣa̠ indra̍śatruḥ ॥ viśvō̠ vihā̍yā ara̠tiḥ । vasu̍rdadhē̠ hastē̠ dakṣi̍ṇē । ta̠raṇi̠rna śi̍śrathat । śra̠va̠sya̍yā̠ na śi̍śrathat । viśva̍smā̠ idi̍ṣuddhya̠sē । dē̠va̠trā ha̠vyamūhi̍ṣē । viśva̍smā̠ ithsu̠kṛtē̠ vāra̍mṛṇvati । a̠gni-rdvārā̠ vyṛ̍ṇvati ॥ 15 ॥

udu̠jjihā̍nō a̠bhi kāma̍mī̠rayann̍ । pra̠pṛ̠ñchan viśvā̠ bhuva̍nāni pū̠rvathā̎ । ā kē̠tunā̠ suṣa̍middhō̠ yaji̍ṣṭhaḥ । kāma̍-nnō agnē a̠bhiha̍rya di̠gbhyaḥ ॥ ju̠ṣā̠ṇō ha̠vyama̠mṛtē̍ṣu dū̠ḍhya̍ḥ । ā nō̍ ra̠yi-mba̍hu̠lā-ṅgōma̍tī̠miṣa̎m । nidhē̍hi̠ yakṣa̍da̠mṛtē̍ṣu̠ bhūṣann̍ ॥ aśvi̍nā ya̠jñamāga̍tam । dā̠śuṣa̠ḥ puru̍dagṃsasā । pū̠ṣā ra̍kṣatu nō ra̠yim ॥ 16 ॥

i̠maṃ ya̠jñama̠śvinā̍ va̠rdhaya̍ntā । i̠mau ra̠yiṃ yaja̍mānāya dhattam । i̠mau pa̠śū-nra̍kṣatāṃ vi̠śvatō̍ naḥ । pū̠ṣā na̍ḥ pātu̠ sada̠ma-pra̍yuchChann ॥ pra tē̍ ma̠hē sa̍rasvati । subha̍gē̠ vāji̍nīvati । sa̠tya̠vāchē̍ bharē ma̠tim ॥ i̠da-ntē̍ ha̠vya-ṅghṛ̠tava̍-thsarasvati । sa̠tya̠vāchē̠ prabha̍rēmā ha̠vīgṃṣi̍ । i̠māni̍ tē duri̠tā saubha̍gāni । tēbhi̍rva̠yagṃ su̠bhagā̍sa-ssyāma ॥ 17 ॥
(va̠j – yrahī̍nā – mṛjī̠ṣaṃ – ँvyṛ̍ṇvati – rakṣatu nō ra̠yigṃ – saubha̍gā̠nyēka̍-ñcha) (a. 4)

2.5.5 upahōmāḥ
ya̠jñō rā̠yō ya̠jña ī̍śē̠ vasū̍nām । ya̠jña-ssa̠syānā̍mu̠ta su̍kṣitī̠nām । ya̠jña i̠ṣṭaḥ pū̠rvachi̍tti-ndadhātu । ya̠jñō bra̍hma̠ṇvāgṃ apyē̍tu dē̠vān ॥ a̠yaṃ ya̠jñō va̍rdhatā̠-ṅgōbhi̠raśvai̎ḥ । i̠yaṃ vēdi̍-ssvapa̠tyā su̠vīrā̎ । i̠da-mba̠r̠hirati̍ ba̠ra̠.hīg​ṣya̠nyā । i̠maṃ ya̠jñaṃ viśvē̍ avantu dē̠vāḥ ॥ bhaga̍ ē̠va bhaga̍vāgṃ astu dēvāḥ । tēna̍ va̠ya-mbhaga̍vanta-ssyāma ॥ 18 ॥

ta-ntvā̍ bhaga̠ sarva̠ ijjō̍havīmi । sa nō̍ bhaga pura ē̠tā bha̍vē̠ha ॥ bhaga̠ praṇē̍ta̠-rbhaga̠ satya̍rādhaḥ । bhagē̠mā-ndhiya̠muda̍va̠ dada̍nnaḥ । bhaga̠ praṇō̍ janaya̠ gōbhi̠raśvai̎ḥ । bhaga̠ pra nṛbhi̍-rnṛ̠vanta̍-ssyāma ॥ śaśva̍tī̠-ssamā̠ upa̍yanti lō̠kāḥ । śaśva̍tī̠-ssamā̠ upa̍ya̠ntyāpa̍ḥ । i̠ṣṭa-mpū̠rtagṃ śaśva̍tīnā̠gṃ̠ samā̍nāgṃ śāśva̠tēna̍ । ha̠viṣē̠ṣṭvā ‘na̠ntaṃ lō̠ka-mpara̠māru̍rōha ॥ 19 ॥

i̠yamē̠va sā yā pra̍tha̠mā vyauchCha̍t । sā rū̠pāṇi̍ kurutē̠ pañcha̍ dē̠vī ॥ dvē svasā̍rau vayata̠stantra̍mē̠tat । sa̠nā̠tana̠ṃ vita̍ta̠gṃ̠ ṣaṇma̍yūkham । avā̠nyāg​ stantū̎n ki̠ratō̍ dha̠ttō a̠nyān । nāva̍pṛ̠jyātē̠ na ga̍mātē̠ anta̎m ॥ ā vō̍ yantūdavā̠hāsō̍ a̠dya । vṛṣṭi̠ṃ yē viśvē̍ ma̠rutō̍ ju̠nanti̍ । a̠yaṃ yō a̠gni-rma̍ruta̠-ssami̍ddhaḥ । ē̠ta-ñju̍ṣaddhva-ṅkavayō yuvānaḥ ॥ 20 ॥

dhā̠rā̠va̠rā ma̠rutō̍ dhṛ̠ṣṇuvō̍jasaḥ । mṛ̠gā na bhī̠māsta̍vi̠ṣēbhi̍-rū̠rmibhi̍ḥ । a̠gnayō̠ na śu̍śuchā̠nā ṛ̍jī̠ṣiṇa̍ḥ । bhrumi̠-ndhama̍nta̠ upa̠ gā a̍vṛṇvata ॥ vicha̍kramē pṛthi̠vīmē̠ṣa ē̠tām । kṣētrā̍ya̠ viṣṇu̠-rmanu̍ṣē daśa̠syann । dhru̠vāsō̍ asya kī̠rayō̠ janā̍saḥ । u̠ru̠kṣi̠tigṃ su̠jani̍mā chakāra ॥, trirdē̠vaḥ pṛ̍thi̠vīmē̠ṣa ē̠tām । vicha̍kramē śa̠tarcha̍sa-mmahi̠tvā । pra viṣṇu̍-rastu ta̠vasa̠sta vī̍yān । tvē̠ṣagg​ hya̍sya̠ sthavi̍rasya̠ nāma̍ ॥॥ āvē̠dhasa̠-nnīla̍pṛṣṭha-mbṛ̠hanta̎m । bṛha̠spati̠gṃ̠ sada̍nē sādayaddhvam । sā̠dadyō̍ni̠-ndama̠ ādī̍di̠vāgṃsa̎m । hira̍ṇyavarṇamaru̠ṣagṃ sa̍pēma ॥ sa hi śuchi̍-śśa̠tapa̍tra̠-ssa śu̠ndhyūḥ ॥ 21 ॥

hira̍ṇyavāśīriṣi̠ra-ssu̍va̠ra̠.ṣāḥ । bṛha̠spati̠-ssa svā̍vē̠śa ṛ̠ṣvāḥ । pū̠rū sakhi̍bhya ā su̠ti-ṅka̍riṣṭhaḥ ॥ pūṣa̠gg̠stava̍ vra̠tē va̠yam । na ri̍ṣyēma ka̠dā cha̠na । stō̠tāra̍sta i̠ha sma̍si ॥ yāstē̍ pūṣa̠nnāvō̍ a̠nta-ssa̍mu̠drē । hi̠ra̠ṇyayī̍ra̠ntari̍kṣē̠ chara̍nti । yābhi̍ryāsi dū̠tyāgṃ sūrya̍sya । kāmē̍na kṛ̠ta-śśrava̍ i̠chChamā̍naḥ ॥ 22 ॥

ara̍ṇyā̠nyara̍ṇyānya̠sau । yā prēva̠ naśya̍si । ka̠thā grāma̠-nna pṛ̍chChasi । na tvā̠ bhīri̍va vindatī(3) ॥ vṛ̠ṣā̠ra̠vāya̠ vada̍tē । yadu̠pāva̍ti chichchi̠kaḥ । ā̠ghā̠ṭībhi̍riva dhā̠vayann̍ । a̠ra̠ṇyā̠ni-rma̍hīyatē ॥ u̠ta gāva̍ ivādann । u̠tō vēśmē̍va dṛśyatē ॥ 23 ॥

u̠tō a̍raṇyā̠ni-ssā̠yam । śa̠ka̠ṭīri̍va sarjati ॥ gāma̠ṅgaiṣa̠ āhva̍yati । dārva̠ṅgaiṣa̠ upā̍vadhīt । vasa̍nnaraṇyā̠nyāgṃ sā̠yam । akru̍kṣa̠diti̍ manyatē ॥ na vā a̍raṇyā̠nir​ha̍nti । a̠nyaśchēnnābhi̠gachCha̍ti । svā̠dōḥ phala̍sya ja̠gdhvā । yatra̠ kāma̠-nnipa̍dyatē ॥ āñja̍nagandhīgṃ sura̠bhīm । ba̠hva̠nnāmakṛ̍ṣīvalām । prāha-mmṛ̠gāṇā̎-mmā̠tara̎m । a̠ra̠ṇyā̠nīma̍śagṃ-siṣam ॥ 24 ॥
(syā̠ma̠ – ru̠rō̠ha̠ – yu̠vā̠na̠ḥ – śu̠ndh – yūri̠chChamā̍nō – dṛśyatē̠ – nipa̍dyatē cha̠tvāri̍ cha) (a. 5)

2.5.6 upahōmāḥ
vārtra̍hatyāya̠ śava̍sē । pṛ̠ta̠nā̠-sāhyā̍ya cha । indra̠tvā-”va̍rtayāmasi ॥ su̠brahmā̍ṇaṃ vī̠rava̍nta-mbṛ̠hanta̎m । u̠ru-ṅga̍bhī̠ra-mpṛ̠thubu̍ddhnamindra । śru̠tar​ṣi̍-mu̠grama̍bhi-māti̠ṣāha̎m । a̠smabhya̍-ñchi̠traṃ vṛṣa̍ṇagṃ ra̠yi-ndā̎ḥ ॥ kṣē̠tri̠yai tvā̠ nir-ṛ̍tyai tvā । dru̠hō mu̍ñchāmi̠ varu̍ṇasya̠ pāśā̎t । a̠nā̠gasa̠-mbrahma̍ṇē tvā karōmi ॥ 25 ॥

śi̠vē tē̠ dyāvā̍pṛthi̠vī u̠bhē i̠mē ॥ śa-ntē̍ a̠gni-ssa̠hādbhira̍stu । śa-ndyāvā̍pṛthi̠vī sa̠hauṣa̍dhībhiḥ । śama̠ntari̍kṣagṃ sa̠ha vātē̍na tē । śa-ntē̠ chata̍sraḥ pra̠diśō̍ bhavantu ॥ yā daivī̠śchata̍sraḥ pra̠diśa̍ḥ । vāta̍patnīra̠bhi sūryō̍ vicha̠ṣṭē । tāsā̎-ntvā ja̠rasa̠ āda̍dhāmi । pra yakṣma̍ ētu̠ nir-ṛ̍ti-mparā̠chaiḥ ॥ amō̍chi̠ yakṣmā̎-dduri̠tā-dava̍rtyai ॥ 26 ॥

dru̠haḥ pāśā̠nnir-ṛ̍tyai̠ chōda̍mōchi । ahā̠ ava̍rti̠mavi̍da-thsyō̠nam । apya̍bhū-dbha̠drē su̍kṛ̠tasya̍ lō̠kē ॥ sūrya̍mṛ̠ta-ntama̍sō̠ grāhyā̠ yat । dē̠vā amu̍ñcha̠-nnasṛ̍ja̠nvyē̍nasaḥ । ē̠vama̠hami̠ma-ṅkṣē̎tri̠yājjā̍miśa̠gṃ̠sāt । dru̠hō mu̍ñchāmi̠ varu̍ṇasya̠ pāśā̎t ॥ bṛha̍spatē yu̠vamindra̍ścha̠ vasva̍ḥ । di̠vyasyē̍śāthē u̠ta pārthi̍vasya । dha̠ttagṃ ra̠yigg​ stu̍va̠tē kī̠rayē̍ chit ॥ 27 ॥

yū̠ya-mpā̍ta sva̠stibhi̠-ssadā̍ naḥ ॥ dē̠vā̠yudha̠mindra̠mājōhu̍vānāḥ । vi̠śvā̠vṛdha̍ma̠bhi yē rakṣa̍māṇāḥ । yēna̍ ha̠tā dī̠rghamaddhvā̍na̠māyann̍ । a̠na̠ntamartha̠mani̍var-thsyamānāḥ ॥ yattē̍ sujātē hi̠mava̍thsu bhēṣa̠jam । ma̠yō̠bhū-śśanta̍mā̠ yaddhṛ̠dō-‘si̍ । tatō̍ nō dēhi sībalē ॥ a̠dō gi̠ribhyō̠ adhi̠ yatpra̠dhāva̍si । sa̠gṃ̠śōbha̍mānā ka̠nyē̍va śubhrē ॥ 28 ॥

tā-ntvā̠ mudga̍lā ha̠viṣā̍ vardhayanti । sā na̍-ssībalē ra̠yimābhā̍jayē̠ha ॥ pūrva̍-ndēvā̠ apa̍rēṇā-nu̠paśya̠ñjanma̍bhiḥ । janmā̠nyava̍rai̠ḥ parā̍ṇi । vēdā̍ni dēvā a̠yama̠smīti̠ mām । a̠hagṃ hi̠tvā śarī̍ra-ñja̠rasa̍ḥ pa̠rastā̎t ॥ prā̠ṇā̠pā̠nau chakṣu̠-śśrōtra̎m । vācha̠-mmana̍si̠ sambhṛ̍tām । hi̠tvā śarī̍ra-ñja̠rasa̍ḥ pa̠rastā̎t । ā bhūti̠-mbhūti̍ṃ va̠yama̍śnavāmahai ॥ i̠mā ē̠va tā u̠ṣasō̠ yāḥ pra̍tha̠mā vyauchChann̍ । tā dē̠vya̍ḥ kurvatē̠ pañcha̍ rū̠pā । śaśva̍tī̠rnāva̍pṛjyanti । na ga̍ma̠ntyanta̎m ॥ 29 ॥
(ka̠rō̠ – myava̍rtyai – chi – chChubhrē – ‘śnavāmahai cha̠tvāri̍ cha) (a. 6)

2.5.7 upahōmāḥ
vasū̍nā̠-ntvā-”dhī̍tēna । ru̠drāṇā̍mū̠rmyā । ā̠di̠tyānā̠-ntēja̍sā । viśvē̍ṣā-ndē̠vānā̠-ṅkratu̍nā । ma̠rutā̠mēmnā̍ juhōmi̠ svāhā̎ ॥ a̠bhibhū̍ti-ra̠hamāga̍mam । indra̍sakhā svā̠yudha̍ḥ । āsvāśā̍su du̠ṣṣaha̍ḥ ॥ i̠daṃ varchō̍ a̠gninā̍ da̠ttamāgā̎t । yaśō̠ bharga̠-ssaha̠ ōjō̠ bala̍-ñcha ॥ 30 ॥

dī̠rghā̠yu̠tvāya̍ śa̠taśā̍radāya । prati̍gṛbhṇāmi maha̠tē vī̠ryā̍ya ॥ āyu̍rasi vi̠śvāyu̍rasi । sa̠rvāyu̍rasi̠ sarva̠māyu̍rasi । sarva̍-mma̠ āyu̍rbhūyāt । sarva̠māyu̍rgēṣam ॥ bhūrbhuva̠-ssuva̍ḥ ॥ a̠gni-rdharmē̍ṇānnā̠daḥ । mṛ̠tyu-rdharmē̠ṇānna̍patiḥ । brahma̍ kṣa̠tragg​ svāhā̎ ॥ 31 ॥

pra̠jāpa̍tiḥ praṇē̠tā । bṛha̠spati̍ḥ pura ē̠tā । ya̠maḥ panthā̎ḥ । cha̠ndramā̎ḥ punara̠su-ssvāhā̎ ॥ a̠gnira̍nnā̠dō-‘nna̍patiḥ । a̠nnādya̍ma̠smin. ya̠jñē yaja̍mānāya dadātu̠ svāhā̎ ॥ sōmō̠ rājā̠ rāja̍patiḥ । rā̠jyama̠smin. ya̠jñē yaja̍mānāya dadātu̠ svāhā̎ ॥ varu̍ṇa-ssa̠mrā-ṭthsa̠mrāṭpa̍tiḥ । sāmrā̎jyama̠smin. ya̠jñē yaja̍mānāya dadātu̠ svāhā̎ ॥ 32 ॥

mi̠traḥ, kṣa̠tra-ṅkṣa̠trapa̍tiḥ । kṣa̠trama̠smin. ya̠jñē yaja̍mānāya dadātu̠ svāhā̎ ॥ indrō̠ bala̠-mbala̍patiḥ । bala̍ma̠smin. ya̠jñē yaja̍mānāya dadātu̠ svāhā̎ ॥ bṛha̠spati̠-rbrahma̠ brahma̍patiḥ । brahmā̠smin. ya̠jñē yaja̍mānāya dadātu̠ svāhā̎ ॥ sa̠vi̠tā rā̠ṣṭragṃ rā̠ṣṭrapa̍tiḥ । rā̠ṣṭrama̠smin. ya̠jñē yaja̍mānāya dadātu̠ svāhā̎ ॥ pū̠ṣā vi̠śāṃ viṭpa̍tiḥ । viśa̍ma̠smin. ya̠jñē yaja̍mānāya dadātu̠ svāhā̎ ॥ sara̍svatī̠ puṣṭi̠ḥ puṣṭi̍patnī । puṣṭi̍ma̠smin. ya̠jñē yaja̍mānāya dadātu̠ svāhā̎ ॥ tvaṣṭā̍ paśū̠nā-mmi̍thu̠nānāgṃ̍ rūpa̠kṛ-drū̠papa̍tiḥ । rū̠pēṇā̠smin. ya̠jñē yaja̍mānāya pa̠śū-nda̍dātu̠ svāhā̎ ॥ 33 ॥
(cha – svāhā̠ – sāmrā̎jyama̠smin. ya̠jñē yaja̍mānāya dadātu̠ svāhā̠ – viśa̍ma̠smin. ya̠jñē yaja̍mānāya dadātu̠ svāhā̍ cha̠tvāri̍ cha) (a. 7)

(a̠gni-ssōmō̠ varu̍ṇō mi̠tra indrō̠ bṛha̠spati̍-ssavi̠tā pū̠ṣā sarasvatī̠ tvaṣṭā̠ daśa̍)

2.5.8 upahōmāḥ
sa ī̎-mpāhi̠ ya ṛ̍jī̠ṣī taru̍traḥ । ya-śśipra̍vān vṛṣa̠bhō yō ma̍tī̠nām । yō gō̎tra̠bhi-dva̍jra̠bhṛdyō ha̍ri̠ṣṭhāḥ । sa i̍ndra chi̠trāgṃ a̠bhitṛ̍ndhi̠ vājān̍ ॥ ā tē̠ śuṣmō̍ vṛṣa̠bha ē̍tu pa̠śchāt । ōtta̠rāda̍dha̠rāgā pu̠rastā̎t । ā vi̠śvatō̍ a̠bhi samē̎tva̠rvām । indra̍ dyu̠mnagṃ suva̍rvaddhēhya̠smē ॥ prōṣva̍smai purōra̠tham । indrā̍ya śū̠ṣama̍rchata ॥ 34 ॥

a̠bhīkē̍ chidu lōka̠kṛt । sa̠ṅgē sa̠mathsu̍ vṛtra̠hā । a̠smāka̍-mbōdhi chōdi̠tā । nabha̍ntā-manya̠kēṣā̎m । jyā̠kā adhi̠ dhanva̍su ॥ indra̍ṃ va̠yagṃ śu̍nā̠sīra̎m । a̠smin. ya̠jñē ha̍vāmahē । āvājai̠rupa̍ nō gamat ॥ indrā̍ya̠ śunā̠sīrā̍ya । sru̠chā ju̍huta nō ha̠viḥ ॥ 35 ॥

ju̠ṣatā̠-mprati̠ mēdhi̍raḥ ॥ pra ha̠vyāni̍ ghṛ̠tava̍ntyasmai । harya̍śvāya bharatā sa̠jōṣā̎ḥ । indra̠rtubhi̠-rbrahma̍ṇā vāvṛdhā̠naḥ । śu̠nā̠sī̠rī ha̠viri̠da-ñju̍ṣasva ॥ vaya̍-ssupa̠rṇā upa̍sēdu̠rindra̎m । pri̠yamē̍dhā̠ ṛṣa̍yō̠ nādha̍mānāḥ । apa̍ dhvā̠ntamū̎rṇu̠hi pū̠rdhi chakṣu̍ḥ । mu̠mu̠gdhya̍smā-nni̠dhayē̍va ba̠ddhān ॥ bṛ̠hadindrā̍ya gāyata ॥ 36 ॥

maru̍tō vṛtra̠hanta̍mam । yēna̠ jyōti̠-raja̍nayannṛtā̠vṛdha̍ḥ । dē̠va-ndē̠vāya̠ jāgṛ̍vi ॥ kā mi̠haikā̠ḥ ka i̠mē pa̍ta̠ṅgāḥ । mā̠nthā̠lāḥ kuli̠ pari̍ mā patanti । anā̍vṛtainā̠n-pradha̍mantu dē̠vāḥ । saupa̍rṇa̠-ñchakṣu̍sta̠nuvā̍ vidēya ॥ ē̠vā va̍ndasva̠ varu̍ṇa-mbṛ̠hanta̎m । na̠ma̠syā dhīra̍ma̠mṛta̍sya gō̠pām । sa na̠-śśarma̍ tri̠varū̍tha̠ṃ viyagṃ̍sat ॥ 37 ॥

yū̠ya-mpā̍ta sva̠stibhi̠-ssadā̍ naḥ ॥ nākē̍ supa̠rṇamupa̠ yat-pata̍ntam । hṛ̠dā vēna̍ntō a̠bhyacha̍kṣata tvā । hira̍ṇyapakṣa̠ṃ varu̍ṇasya dū̠tam । ya̠masya̠ yōnau̍ śaku̠na-mbhu̍ra̠ṇyum ॥ śa-nnō̍ dē̠vīra̠bhiṣṭa̍yē । āpō̍ bhavantu pī̠tayē̎ । śaṃ yōra̠bhisra̍vantu naḥ ॥ īśā̍nā̠ vāryā̍ṇām । kṣaya̍ntī-śchar​ṣaṇī̠nām ॥ 38 ॥

a̠pō yā̍chāmi bhēṣa̠jam ॥ a̠phsu mē̠ sōmō̍ abravīt । a̠nta-rviśvā̍ni bhēṣa̠jā । a̠gni-ñcha̍ vi̠śvaśa̍mbhuvam । āpa̍ścha vi̠śvabhē̍ṣajīḥ ॥ yada̠phsu tē̍ sarasvati । gōṣvaśvē̍ṣu̠ yanmadhu̍ । tēna̍ mē vājinīvati । mukha̍maṅgdhi sarasvati ॥ yā sara̍svatī vaiśambha̠lyā ॥ 39 ॥

tasyā̎-mmē rāsva । tasyā̎stē bhakṣīya । tasyā̎stē bhūyiṣṭha̠bhājō̍ bhūyāsma ॥ a̠ha-ntvada̍smi̠ mada̍si̠ tvamē̠tat । mamā̍si̠ yōni̠stava̠ yōni̍rasmi । mamai̠va sanvaha̍ ha̠vyānya̍gnē । pu̠traḥ pi̠trē lō̍ka̠kṛjjā̍tavēdaḥ ॥ i̠haiva santatra̠ santa̍-ntvā ‘gnē । prā̠ṇēna̍ vā̠chā mana̍sā bibharmi । ti̠rō mā̠ santa̠māyu̠rmā prahā̍sīt ॥ 40 ॥

jyōti̍ṣā tvā vaiśvāna̠rēṇōpa̍tiṣṭhē ॥ a̠ya-ntē̠ yōni̍r-ṛ̠tviya̍ḥ । yatō̍ jā̠tō arō̍chathāḥ । ta-ñjā̠nanna̍gna̠ ārō̍ha । athā̍ nō vardhayā ra̠yim ॥ yā tē̍ agnē ya̠jñiyā̍ ta̠nūstayē-hyārō̍hā̠tmā-”tmāna̎m । achChā̠ vasū̍ni kṛ̠ṇvanna̠smē naryā̍ pu̠rūṇi̍ । ya̠jñō bhū̠tvā ya̠jñamāsī̍da̠ svāṃ yōni̎m । jāta̍vēdō̠ bhuva̠ ājāya̍māna̠-ssakṣa̍ya̠ ēhi̍ ॥ u̠pāva̍rōha jātavēda̠ḥ puna̠stvam ॥ 41 ॥

dē̠vēbhyō̍ ha̠vyaṃ va̍ha naḥ prajā̠nann । āyu̍ḥ pra̠jāgṃ ra̠yima̠smāsu̍ dhēhi । aja̍srō dīdihi nō durō̠ṇē ॥ tamindra̍-ñjōhavīmi ma̠ghavā̍namu̠gram । sa̠trādadhā̍na̠-mapra̍tiṣkuta̠gṃ̠ śavāgṃ̍si । magṃhi̍ṣṭhō gī̠rbhirā cha̍ ya̠jñiyō̍ ‘va̠varta̍t । rā̠yē nō̠ viśvā̍ su̠pathā̍ kṛṇōtu va̠jrī ॥ trika̍drukēṣu mahi̠ṣō yavā̍śira-ntuvi̠śuṣma̍stṛ̠pat । sōma̍mapiba̠-dviṣṇu̍nā su̠taṃ yathāva̍śat । sa ī̎-mmamāda̠ mahi̠ karma̠ karta̍vē ma̠hāmu̠rum ॥ 42 ॥

sainagṃ̍ saścha-ddē̠va-ndē̠va-ssa̠tyamindugṃ̍ sa̠tya indra̍ḥ ॥ vi̠dadyatī̍ sa̠ramā̍ ru̠gṇamadrē̎ḥ । mahi̠ pātha̍ḥ pū̠rvyagṃ sa̠ddhriya̍kkaḥ । agra̍-nnaya-thsu̠padyakṣa̍rāṇām । achChā̠ rava̍-mpratha̠mā jā̍na̠tī gā̎t ॥ vi̠da-dgavyagṃ̍ sa̠ramā̍ dṛ̠ḍhamū̠rvam । yēnā̠ nuka̠-mmānu̍ṣī̠ bhōja̍tē̠ viṭ । ā yē viśvā̎ svapa̠tyāni̍ cha̠kruḥ । kṛ̠ṇvā̠nāsō̍ amṛta̠tvāya̍ gā̠tum ॥ tva-nnṛbhi̍rnṛpatē dē̠vahū̍tau ॥ 43 ॥

bhūrī̍ṇi vṛ̠tvā ha̍ryaśva hagṃsi । tva-nnida̍syu̠-ñchumu̍rim । dhuni̠-ñchāsvā̍payō da̠bhīta̍yē su̠hantu̍ ॥ ē̠vā pā̍hi pra̠tnathā̠ manda̍tu tvā । śru̠dhi brahma̍ vāvṛdhasvō̠ta gī̠rbhiḥ । ā̠vi-ssūrya̍-ṅkṛṇu̠hi pī̠pihī̠ṣaḥ । ja̠hi śatrūgṃ̍ra̠bhi gā i̍ndra tṛndhi ॥ agnē̠ bādha̍sva̠ vimṛdhō̍ nudasva । apāmī̍vā̠ apa̠ rakṣāgṃ̍si sēdha । a̠smā-thsa̍mu̠drā-dbṛ̍ha̠tō di̠vō na̍ḥ ॥ 44 ॥

a̠pā-mbhū̠māna̠mupa̍ na-ssṛjē̠ha ॥ yajña̠ prati̍tiṣṭha suma̠tau su̠śēvā̠ ā tvā̎ । vasū̍ni puru̠dhā vi̍śantu । dī̠rghamāyu̠-ryaja̍mānāya kṛ̠ṇvann । athā̠mṛtē̍na jari̠tāra̍maṅgdhi ॥ indra̍-śśu̠nāva̠-dvita̍nōti̠ sīra̎m । sa̠ṃva̠thsa̠rasya̍ prati̠māṇa̍mē̠tat । a̠rkasya̠ jyōti̠stadidā̍sa̠ jyēṣṭha̎m । sa̠ṃva̠thsa̠ragṃ śu̠nava̠thsīra̍mē̠tat ॥ indra̍sya̠ rādha̠ḥ praya̍ta-mpu̠ru tmanā̎ । tada̍rkarū̠paṃ vi̠mimā̍namēti । dvāda̍śārē̠ prati̍tiṣṭha̠tī-dvṛṣā̎ ॥ a̠śvā̠yantō̍ ga̠vyantō̍ vā̠jaya̍ntaḥ । havā̍mahē̠ tvōpa̍ganta̠ vā u̍ । ā̠bhūṣa̍ntastvā suma̠tau navā̍yām । va̠yami̍ndra tvā śu̠nagṃ hu̍vēma ॥ 45 ॥
(a̠rcha̠ta̠ – ha̠vi–r gā̍yata – yagṃsach – char​ṣaṇī̠nāṃ – ँvai̍śambha̠lyā – hā̍sī̠t – tva – mu̠ruṃ – dē̠vahū̍tau – na̠ḥ – tmanā̠ ṣaṭ cha̍) (a. 8)

(prā̠ṇa – u̠dēhi̠ – puna̍rna̠ – ā nō̍ bhara – ya̠jñō rā̠yō – vārtra̍hatyāya̠ – vasū̍nā̠gṃ̠ – sa ī̍-mpāhya̠ ṣṭau)

(prā̠ṇō ra̍kṣa̠ – tyagṛ̍bhītā – dhārāva̠rā ma̠rutō̍ – dīrghāyu̠tvāya̠ – jyōti̍ṣā tvā̠ pañcha̍chatvārigṃśat )

(prā̠ṇaḥ – śu̠nagṃ hu̍vēma)

॥ hari̍ḥ ōm ॥

॥ kṛṣṇa yajurvēdīya taittirīya brāhmaṇē dvitīyāṣṭakē pañchamaḥ prapāṭhaka-ssamāptaḥ ॥