KYTB 1.8 Rajasuyanubrahmanam – Krishna Yajurveda Taittiriya Brahmana Patha – Varunasya Sushuvanasya

kṛṣṇa yajurvēdīya taittirīya brāhmaṇē prathamāṣṭakē aṣṭamaḥ prapāṭhakaḥ – rājasūyānubrāhmaṇaṃ

ō-nnamaḥ paramātmanē, śrī mahāgaṇapatayē namaḥ,
śrī gurubhyō namaḥ । ha̠ri̠ḥ ōm ॥

anuvākaṃ 1 – saṃsṛpāṃ havīṃṣi daśa
varu̍ṇasya suṣuvā̠ṇasya̍ daśa̠dhēndri̠yaṃ vī̠rya̍-mparā̍-‘patat । tathsa̠gṃ̠ sṛdbhi̠ranu̠ sama̍sarpat । tathsa̠gṃ̠ sṛpāgṃ̍ sagṃ sṛ̠ttvam । a̠gninā̍ dē̠vēna̍ pratha̠mē ‘ha̠nnanu̠ prāyu̍ṅkta । sara̍svatyā vā̠chā dvi̠tīyē̎ । sa̠vi̠trā pra̍sa̠vēna̍ tṛ̠tīyē̎ । pū̠ṣṇā pa̠śubhi̍śchatu̠rthē । bṛha̠spati̍nā̠ brahma̍ṇā pañcha̠mē । indrē̍ṇa dē̠vēna̍ ṣa̠ṣṭhē । varu̍ṇēna̠ svayā̍ dē̠vata̍yā sapta̠mē ॥ 1 ॥

sōmē̍na̠ rājñā̎-‘ṣṭa̠mē । tvaṣṭrā̍ rū̠pēṇa̍ nava̠mē । viṣṇu̍nā ya̠jñēnā̎pnōt । yathsa̠gṃ̠ sṛpō̠ bhava̍nti । i̠ndri̠yamē̠va ta-dvī̠rya̍ṃ yaja̍māna āpnōti । pūrvā̍ pūrvā̠ vēdi̍rbhavati । i̠ndri̠yasya̍ vī̠rya̍syāva̍ruddhyai । pu̠rastā̍-dupa̠sadāgṃ̍ sau̠myēna̠ pracha̍rati । sōmō̠ vai rē̍tō̠dhāḥ । rēta̍ ē̠va ta-dda̍dhāti । a̠nta̠rā tvā̠ṣṭrēṇa̍ । rēta̍ ē̠va hi̠ta-ntvaṣṭā̍ rū̠pāṇi̠ vika̍rōti । u̠pari̍ṣṭā-dvaiṣṇa̠vēna̍ । ya̠jñō vai viṣṇu̍ḥ । ya̠jña ē̠vānta̠taḥ prati̍ tiṣṭhati ॥ 2 ॥
(sa̠pta̠mē – da̍dhāti̠ pañcha̍ cha) (a. 1)

anuvākaṃ 2 – daśapēyaḥ
jā̠mi vā ē̠ta-tku̍rvanti । yathsa̠dyō dī̠kṣaya̍nti sa̠dya-ssōma̍-ṅkrī̠ṇanti̍ । pu̠ṇḍa̠ri̠sra̠jā-mpraya̍chCha̠tyajā̍mitvāya । aṅgi̍rasa-ssuva̠rgaṃ lō̠kaṃ yanta̍ḥ । a̠phsu dī̎kṣāta̠pasī̠ prāvē̍śayann । ta-tpu̠ṇḍarī̍ka-mabhavat । ya-tpu̍ṇḍarisra̠jā-mpra̠yachCha̍ti । sā̠kṣādē̠va dī̎kṣāta̠pasī̠ ava̍rundhē । da̠śabhi̍rvathsata̠rai-ssōma̍-ṅkrīṇāti । daśā̎kṣarā vi̠rāṭ ॥ 3 ॥

anna̍ṃ vi̠rāṭ । vi̠rājai̠vānnādya̠mava̍ rundhē । mu̠ṣka̠rā bha̍vanti sēndra̠tvāya̍ । da̠śa̠pēyō̍ bhavati । a̠nnādya̠syāva̍ruddhyai । śa̠ta-mbrā̎hma̠ṇāḥ pi̍banti । śa̠tāyu̠ḥ puru̍ṣa-śśa̠tēndri̍yaḥ । āyu̍ṣyē̠vēndri̠yē prati̍ tiṣṭhati । sa̠pta̠da̠śagg​ stō̠tra-mbha̍vati । sa̠pta̠da̠śaḥ pra̠jāpa̍tiḥ ॥ 4 ॥

pra̠jāpa̍tē̠rāptyai̎ । prā̠kā̠śāva̍ddhva̠ryavē̍ dadāti । pra̠kā̠śa-mē̠vaina̍-ṅgamayati । sraja̍mu-dgā̠trē । vyē̍vāsmai̍ vāsayati । ru̠kmagṃ hōtrē̎ । ā̠di̠tyamē̠vāsmā̠ unna̍yati । aśva̍-mprastōtṛpratiha̠rtṛbhyā̎m । prā̠jā̠patyō vā aśva̍ḥ । pra̠jāpa̍tē̠rāptyai̎ ॥ 5 ॥

dvāda̍śa-paṣṭhau̠hī-rbra̠hmaṇē̎ । āyu̍rē̠vāva̍-rundhē । va̠śā-mmai̎trāvaru̠ṇāya̍ । rā̠ṣṭramē̠va va̠śya̍kaḥ । ṛ̠ṣa̠bha-mbrā̎hmaṇāchCha̠gṃ̠sinē̎ । rā̠ṣṭra-mē̠vēndri̍yā̠vya̍kaḥ । vāsa̍sī nēṣṭāpō̠tṛbhyā̎m । pa̠vitrē̍ ē̠vāsyai̠tē । sthūri̍ yavāchi̠ta-ma̍chChāvā̠kāya̍ । a̠nta̠ta ē̠va varu̍ṇa̠mava̍ yajatē ॥ 6 ॥

a̠na̠ḍvāha̍-ma̠gnīdhē̎ । vahni̠rvā a̍na̠ḍvān । vahni̍ra̠gnīt । vahni̍nai̠va vahni̍ ya̠jñasyāva̍rundhē । indra̍sya suṣuvā̠ṇasya̍ trē̠dhēndri̠yaṃ vī̠rya̍-mparā̍-‘patat । bhṛgu̠-stṛtī̍ya-mabhavat । śrā̠ya̠ntīya̠-ntṛtī̍yam । sara̍svatī̠ tṛtī̍yam । bhā̠rga̠vō hōtā̍ bhavati । śrā̠ya̠ntīya̍-mbrahmasā̠ma-mbha̍vati । vā̠ra̠va̠ntīya̍-magniṣṭōma-sā̠mam । sā̠ra̠sva̠tīra̠pō gṛ̍hṇāti । i̠ndri̠yasya̍ vī̠rya̍syāva̍-ruddhyai । śrā̠ya̠ntīya̍-mbrahmasā̠ma-mbha̍vati । i̠ndri̠yamē̠vāsmi̍n vī̠rya̠gg̍ śrayati । vā̠ra̠va̠ntīya̍-magniṣṭōma-sā̠mam । i̠ndri̠yamē̠vāsmi̍n vī̠rya̍ṃ vārayati ॥ 7 ॥
(vi̠rāṭ – pra̠jāpa̍ti̠ – raśva̍ḥ pra̠jāpa̍tē̠rāptyai̍ – yajatē – brahmasā̠ma-mbha̍vati sa̠pta cha̍) (a. 2)

anuvākaṃ 3 – diśāmavēṣṭayaḥ, paśubandhaḥ, sātyadūtahavīṃṣi cha
ī̠śva̠rō vā ē̠ṣa diśō-‘nū-nma̍ditōḥ । ya-ndiśō-‘nu̍ vyāsthā̠paya̍nti । di̠śāmavē̎ṣṭayō bhavanti । di̠kṣvē̍va prati̍ tiṣṭha̠tyanu̍nmādāya । pañcha̍ dē̠vatā̍ yajati । pañcha̠ diśa̍ḥ । di̠kṣvē̍va prati̍ tiṣṭhati । ha̠viṣō̍ haviṣa i̠ṣṭvā bā̍r​haspa̠tya-ma̠bhighā̍rayati । ya̠ja̠mā̠na̠dē̠va̠tyō̍ vai bṛha̠spati̍ḥ । yaja̍mānamē̠va tēja̍sā̠ sama̍rdhayati ॥ 8 ॥

ā̠di̠tyā-mma̠l̠.hā-ṅga̠rbhiṇī̠mā la̍bhatē । mā̠ru̠tī-mpṛśñi̍-mpaṣṭhau̠hīm । viśa̍-ñchai̠vāsmai̍ rā̠ṣṭra-ñcha̍ sa̠mīchī̍ dadhāti । ā̠di̠tyayā̠ pūrva̍yā̠ pracha̍rati । mā̠ru̠tyōtta̍rayā । rā̠ṣṭra ē̠va viśa̠manu̍baddhnāti । u̠chchairā̍di̠tyāyā̠ āśrā̍vayati । u̠pā̠gṃ̠śu mā̍ru̠tyai । tasmā̎-drā̠ṣṭraṃ viśa̠mati̍vadati । ga̠rbhiṇyā̍di̠tyā bha̍vati ॥ 9 ॥

i̠ndri̠yaṃ vai garbha̍ḥ । rā̠ṣṭra-mē̠vēndri̍yā̠vya̍kaḥ । a̠ga̠rbhā mā̍ru̠tī । viḍvai ma̠ruta̍ḥ । viśa̍mē̠va niri̍ndriyāmakaḥ । dē̠vā̠su̠rā-ssaṃya̍ttā āsann । tē dē̠vā a̠śvinō̎ḥ pū̠ṣan-vā̠cha-ssa̠tyagṃ sa̍ni̠ndhāya̍ । anṛ̍tē̠nāsu̍rā-na̠bhya̍bhavann । tē̎-‘śvibhyā̎-mpū̠ṣṇē pu̍rō̠ḍāśa̠-ndvāda̍śakapāla̠-nnira̍vapann । tatō̠ vai tē vā̠cha-ssa̠tyamavā̍rundhata ॥ 10 ॥

yada̠śvibhyā̎-mpū̠ṣṇē pu̍rō̠ḍāśa̠-ndvāda̍śakapāla-nni̠rvapa̍ti । anṛ̍tēnai̠va bhrātṛ̍vyā-nabhi̠bhūya̍ । vā̠cha-ssa̠tyamava̍rundhē । sara̍svatē satya̠vāchē̍ cha̠rum । pūrva̍mē̠vōdi̠tam । utta̍rēṇā̠bhi gṛ̍ṇāti । sa̠vi̠trē sa̠tyapra̍savāya purō̠ḍāśa̠-ndvāda̍śakapāla̠-mprasū̎tyai । dū̠tān-prahi̍ṇōti । ā̠vida̍ ē̠tā bha̍vanti । ā̠vida̍mē̠vaina̍-ṅgamayanti । athō̍ dū̠tēbhya̍ ē̠va na Chi̍dyatē । ti̠sṛ̠dha̠nvagṃ śu̍ṣkadṛ̠ti-rdakṣi̍ṇā̠ samṛ̍ddhyai ॥ 11 ॥
(a̠rdha̠ya̠ti̠ – bha̠va̠ – tya̠ru̠ndha̠ta̠ – ga̠ma̠ya̠nti̠ dvē cha̍) (a. 3)

anuvākaṃ 4 – prayujāṃ havīṃṣi dvādaśa
ā̠gnē̠ya-ma̠ṣṭāka̍pāla̠-nnirva̍pati । tasmā̠-chChiśi̍rē kurupañchā̠lāḥ prāñchō̍ yānti । sau̠mya-ñcha̠rum । tasmā̎-dvasa̠ntaṃ vya̍va̠sāyā̍dayanti । sā̠vi̠tra-ndvāda̍śakapālam । tasmā̎t-pu̠rastā̠-dyavā̍nāgṃ savi̠trā viru̍ndhatē । bā̠r̠ha̠spa̠tya-ñcha̠rum । sa̠vi̠traiva vi̠ruddhya̍ । brahma̍ṇā̠ yavā̠nāda̍dhatē । tvā̠ṣṭra-ma̠ṣṭāka̍pālam ॥ 12 ॥

rū̠pāṇyē̠va tēna̍ kurvatē । vai̠śvā̠na̠ra-ndvāda̍śakapālam । tasmā̎jjagha̠nyē̍ naidā̍ghē pra̠tyañcha̍ḥ kurupañchā̠lā yā̎mti । sā̠ra̠sva̠ta-ñcha̠ru-nnirva̍pati । tasmā̎t-prā̠vṛṣi̠ sarvā̠ vāchō̍ vadanti । pau̠ṣṇēna̠ vyava̍syanti । mai̠trēṇa̍ kṛṣantē । vā̠ru̠ṇēna̠ vidhṛ̍tā āsatē । kṣai̠tra̠pa̠tyēna̍ pāchayantē । ā̠di̠tyēnāda̍dhatē ॥ 13 ॥

mā̠simā̎syē̠tāni̍ ha̠vīgṃṣi̍ ni̠rupyā̠ṇītyā̍huḥ । tēnai̠vartūn-prayu̍ṅkta̠ iti̍ । athō̠ khalvā̍huḥ । ka-ssa̍ṃvathsa̠ra-ñjī̍viṣya̠tīti̍ । ṣaḍē̠va pū̎rvē̠dyurni̠rupyā̍ṇi । ṣaḍu̍ttarē̠dyuḥ । tēnai̠vartūn-prayu̍ṅktē । dakṣi̍ṇō rathavāhanavā̠haḥ pūrvē̍ṣā̠-ndakṣi̍ṇā । utta̍ra̠ utta̍rēṣām । sa̠ṃva̠thsa̠rasyai̠vāntau̍ yunakti । su̠va̠rgasya̍ lō̠kasya̠ sama̍ṣṭyai ॥ 14 ॥
(tvā̠ṣṭrama̠ṣṭāka̍pālaṃ – dadhatē – yuna̠ktyēkaṃ̍ cha) (a. 4)

anuvākaṃ 5 – sautrāmaṇiḥ, paśavaḥ, havīṃṣi cha
indra̍sya suṣuvā̠ṇasya̍ daśa̠dhēndri̠yaṃ vī̠rya̍-mparā̍-‘patat । sa ya-tpra̍tha̠ma-nni̠raṣṭhī̍vat । tat-kva̍lamabhavat । ya-ddvi̠tīya̎m । ta-dbada̍ram । yat-tṛ̠tīya̎m । tat-ka̠rkandhu̍ । yanna̠staḥ । sa si̠gṃ̠haḥ । yadakṣyō̎ḥ ॥ 15 ॥

sa śā̎rdū̠laḥ । yat-karṇa̍yōḥ । sa vṛka̍ḥ । ya ū̠rdhvaḥ ।
sa sōma̍ḥ । yā ‘vā̍chī । sā surā̎ । tra̠yā-ssakta̍vō bhavanti ।
i̠ndri̠yasyāva̍-ruddhyai । tra̠yāṇi̠ lōmā̍ni ॥ 16 ॥

tviṣi̍mē̠vāva̍ rundhē । trayō̠ grahā̎ḥ । vī̠rya̍mē̠vāva̍ rundhē । nāmnā̍ daśa̠mī । nava̠ vai puru̍ṣē prā̠ṇāḥ । nābhi̍rdaśa̠mī । prā̠ṇā i̍ndri̠yaṃ vī̠rya̎m । prā̠ṇānē̠vēndri̠yaṃ vī̠rya̍ṃ yaja̍māna ā̠tman-dha̍ttē । sīsē̍na klī̠bāchChaṣpā̍ṇi krīṇāti । na vā ē̠tadayō̠ na hira̍ṇyam ॥ 17 ॥

ya-thsīsa̎m । na strī na pumān̍ । yat-klī̠baḥ । na sōmō̠ na surā̎ । ya-thsau̎trāma̠ṇī samṛ̍ddhyai । svā̠dvī-ntvā̎ svā̠dunētyā̍ha । sōma̍mē̠vainā̎-ṅkarōti । sōmō̎-‘sya̠śvibhyā̎-mpachyasva̠ sara̍svatyai pachya̠svēndrā̍ya su̠trāmṇē̍ pachya̠svētyā̍ha । ē̠tābhyō̠ hyē̍ṣā dē̠vatā̎bhya̠ḥ pachya̍tē । ti̠sra-ssagṃsṛ̍ṣṭā vasati ॥ 18 ॥

ti̠srō hi rātrī̎ḥ krī̠ta-ssōmō̠ vasa̍ti । pu̠nātu̍ tē pari̠sruta̠miti̠ yaju̍ṣā punāti̠ vyāvṛ̍ttyai । pa̠vitrē̍ṇa punāti । pa̠vitrē̍ṇa̠ hi sōma̍-mpu̠nanti̍ । vārē̍ṇa̠ śaśva̍tā̠ tanētyā̍ha । vārē̍ṇa̠ hi sōma̍-mpu̠nanti̍ ।vā̠yuḥ pū̠taḥ pa̠vitrē̠ṇēti̠ naitayā̍ punīyāt । vyṛ̍ddhā̠ hyē̍ṣā । a̠ti̠pa̠vi̠tasyai̠tayā̍ punīyāt । ku̠vida̠ṅgē-tyani̍ruktayā prājāpa̠tyayā̍ gṛhṇāti ॥ 19 ॥

ani̍ruktaḥ pra̠jāpa̍tiḥ । pra̠jāpa̍tē̠rāptyai̎ । ēka̍ya̠rchā gṛ̍hṇāti । ē̠ka̠dhaiva yaja̍mānē vī̠rya̍-ndadhāti । ā̠śvi̠na-ndhū̠mramā la̍bhatē । a̠śvinau̠ vai dē̠vānā̎-mbhi̠ṣajau̎ । tābhyā̍mē̠vāsmai̍ bhēṣa̠ja-ṅka̍rōti । sā̠ra̠sva̠ta-mmē̠ṣam । vāgvai sara̍svatī । vā̠chaivaina̍-mbhiṣajyati । ai̠ndramṛ̍ṣa̠bhagṃ sē̎mdra̠tvāya̍ ॥ 20 ॥
(akṣyō̠–r lōmā̍ni̠ – hira̍ṇyaṃ – ँvasati – gṛhṇāti – bhiṣajya̠tyēka̍-ñcha) (a. 5)

anuvākaṃ 6 – sautrāmaṇiḥ, paśavaḥ, havīṃṣi cha
yat-tri̠ṣu yūpē̎ṣvā̠-labhē̍ta । ba̠hi̠rdhā ‘smā̍dindri̠yaṃ vīrya̍-ndadhyāt । bhrātṛ̍vyamasmai janayēt । ē̠ka̠yū̠pa āla̍bhatē । ē̠ka̠dhaivāsmi̍-nnindri̠yaṃ vī̠rya̍-ndadhāti । nāsmai̠ bhrātṛ̍vya-ñjanayati । naitēṣā̎-mpaśū̠nā-mpu̍rō̠ḍāśā̍ bhavanti । graha̍purōḍāśā̠ hyē̍tē । yu̠vagṃ su̠rāma̍maśvi̠nēti̍ sarvadēva̠tyē̍ yājyānuvā̠kyē̍ bhavataḥ । sarvā̍ ē̠va dē̠vatā̎ḥ prīṇāti ॥ 21 ॥

brā̠hma̠ṇa-mpari̍krīṇīyā-du̠chChēṣa̍ṇasya pā̠tāra̎m । brā̠hma̠ṇō hyāhu̍tyā u̠chChēṣa̍ṇasya pā̠tā । yadi̍ brāhma̠ṇa-nna vi̠ndēt । va̠lmī̠ka̠va̠pāyā̠mava̍ nayēt । saiva tata̠ḥ prāya̍śchittiḥ । ya-dvai sau̎trāma̠ṇyai vyṛ̍ddham । tada̍syai̠ samṛ̍ddham । nā̠nā̠dē̠va̠tyā̎ḥ pa̠śava̍ścha purō̠ḍāśā̎ścha bhavanti̠ samṛ̍ddhyai । ai̠ndraḥ pa̍śū̠nāmu̍tta̠mō bha̍vati । ai̠ndraḥ pu̍rō̠ḍāśā̍nā-mpratha̠maḥ ॥ 22 ॥

i̠ndri̠yē ē̠vāsmai̍ sa̠mīchī̍ dadhāti । pu̠rastā̍-danūyā̠jānā̎-mpurō̠ḍāśai̠ḥ pracha̍rati । pa̠śavō̠ vai pu̍rō̠ḍāśā̎ḥ । pa̠śūnē̠vāva̍ rundhē । ai̠ndra-mēkā̍daśakapāla̠-nnirva̍pati । i̠ndri̠yamē̠vāva̍-rundhē । sā̠vi̠tra-ndvāda̍śakapāla̠-mprasū̎tyai । vā̠ru̠ṇa-ndaśa̍kapālam । a̠nta̠ta ē̠va varu̍ṇa̠mava̍-yajatē । vaḍa̍bā̠ dakṣi̍ṇā ॥ 23 ॥

u̠ta vā ē̠ṣā-‘śvagṃ̍ sū̠tē । u̠tāśva̍ta̠ram । u̠ta sōma̍ u̠ta surā̎ । ya-thsau̎trāma̠ṇī samṛ̍ddhyai । bā̠r̠ha̠spa̠tya-mpa̠śu-ñcha̍tu̠rtha-ma̍tipavi̠tasyāla̍bhatē । brahma̠ vai dē̠vānā̠-mbṛha̠spati̍ḥ । brahma̍ṇai̠va ya̠jñasya̠ vyṛ̍ddha̠mapi̍-vapati । pu̠rō̠ḍāśa̍vānē̠ṣa pa̠śurbha̍vati । na hyē̍tasya̠ graha̍-ṅgṛ̠hṇanti̍ । sōma̍pratīkāḥ pitara-stṛpṇu̠tēti̍ śatātṛ̠ṇṇāyāgṃ̍ sa̠mava̍nayati ॥ 24 ॥

śa̠tāyu̠ḥ puru̍ṣa-śśa̠tēndri̍yaḥ । āyu̍ṣyē̠vēndri̠yē prati̍tiṣṭhati । dakṣi̍ṇē̠-‘gnau ju̍hōti । pā̠pa̠va̠sya̠sasya̠ vyāvṛ̍ttyai । hira̍ṇyamanta̠rā dhā̍rayati । pū̠tāmē̠vainā̎-ñjuhōti । śa̠tamā̍na-mbhavati । śa̠tāyu̠ḥ puru̍ṣa-śśa̠tēndri̍yaḥ । āyu̍ṣyē̠vēndri̠yē prati̍ tiṣṭhati । yatrai̠va śa̍tātṛ̠ṇṇā-ndhā̠raya̍ti ॥ 25 ॥

tannida̍dhāti̠ prati̍ṣṭhityai । pi̠tṝn. vā ē̠tasyē̎mdri̠yaṃ vī̠rya̍-ṅgachChati । yagṃ sōmō̍-‘ti̠pava̍tē । pi̠tṛ̠ṇāṃ yā̎jyā-nuvā̠kyā̍bhi̠rupa̍ tiṣṭhatē । yadē̠vāsya̍ pi̠tṝni̍ndri̠yaṃ vī̠rya̍-ṅgachCha̍ti । tadē̠vāva̍ rundhē । ti̠sṛbhi̠rupa̍ tiṣṭhatē । tṛ̠tīyē̠ vā i̠tō lō̠kē pi̠tara̍ḥ । tānē̠va prī̍ṇāti । athō̠ trīṇi̠ vai ya̠jñasyē̎mdri̠yāṇi̍ । a̠ddhva̠ryur-hōtā̎ bra̠hmā । ta upa̍tiṣṭhantē । yānyē̠va ya̠jñasyē̎mdri̠yāṇi̍ । tairē̠vāsmai̍ bhēṣa̠ja-ṅka̍rōti ॥ 26 ॥
(pra̠ṇā̠ti̠ – pra̠tha̠mō – dakṣi̍ṇā – sa̠mava̍nayati – dhā̠raya̍ – tīndri̠yāṇi̍ cha̠tvāri̍ cha) (a. 6)

anuvākaṃ 7 – rājasūyasyāgrē kartavya-mpavitrākhyamagniṣṭōmamahaḥ
a̠gni̠ṣṭō̠mamagra̠ āha̍rati । ya̠jña̠mu̠khaṃ vā a̍gniṣṭō̠maḥ । ya̠jña̠mu̠khamē̠vārabhya̍ sa̠vamākra̍matē । athai̠ṣō̍-‘bhiṣēcha̠nīya̍-śchatustri̠gṃ̠śapa̍vamānō bhavati । traya̍strigṃśa̠dvai dē̠vatā̎ḥ । tā ē̠vāpnō̍ti । pra̠jāpa̍ti-śchatustri̠gṃ̠śaḥ । tamē̠vāpnō̍ti । sa̠gṃ̠śa̠ra ē̠ṣa stōmā̍nā̠maya̍thāpūrvam । ya-dviṣa̍mā̠-sstōmā̎ḥ ॥ 27 ॥

ē̠tāvā̠n.̠ vai ya̠jñaḥ । yāvā̠n-pava̍mānāḥ । a̠nta̠-śślēṣa̍ṇa̠-ntvā a̠nyat । ya-thsa̠māḥ pava̍mānāḥ । tēnāsagṃ̍śaraḥ । tēna̍ yathāpū̠rvam । ā̠tmanai̠-vāgni̍ṣṭō̠mēna̠rdhnōti̍ । ā̠tmanā̠ puṇyō̍ bhavati । pra̠jā vā u̠kthāni̍ । pa̠śava̍ u̠kthāni̍( ) । yadu̠kthyō̍ bhava̠tyanu̠ santa̍tyai ॥ 28 ॥
(stōmā̎ḥ-pa̠śava̍ u̠kthānyēka̍-ñcha) (a. 7)

anuvākaṃ 8 – abhiṣēchanīyē sāmamantraviśēṣaḥ
upa̍ tvā jā̠mayō̠ gira̠ iti̍ prati̠padbha̍vati । vāgvai vā̠yuḥ । vā̠cha ē̠vaiṣō̍-‘bhiṣē̠kaḥ । sarvā̍sāmē̠va pra̠jānāgṃ̍ sūyatē । sarvā̍ ēna-mpra̠jā rājēti̍ vadanti । ē̠tamu̠ tya-ndaśa̠kṣipa̠ ityā̍ha । ā̠di̠tyā vai pra̠jāḥ । pra̠jānā̍mē̠vaitēna̍ sūyatē । yanti̠ vā ē̠tē ya̍jñamu̠khāt । yē sa̍mbhā̠ryā̍ akrann̍ ॥ 29 ॥

yadāha̠ pava̍sva vā̠chō a̍griya̠ iti̍ । tēnai̠va ya̍jñamu̠khā-nnaya̍nti । a̠nu̠ṣṭuk-pra̍tha̠mā bha̍vati । a̠nu̠ṣṭu-gu̍tta̠mā । vāgvā a̍nu̠ṣṭuk । vā̠chaiva pra̠yanti̍ । vā̠chōdya̍nti । udva̍tī-rbhavanti । udva̠dvā a̍nu̠ṣṭubhō̍ rū̠pam । ānu̍ṣṭubhō rāja̠nya̍ḥ ॥ 30 ॥

tasmā̠dudva̍tī-rbhavanti । sau̠rya̍nu̠ṣṭu-gu̍tta̠mā bha̍vati । su̠va̠rgasya̍ lō̠kasya̠ santa̍tyai । yō vai sa̠vādēti̍ । nainagṃ̍ sa̠va upa̍namati । ya-ssāma̍bhya̠ ēti̍ । pāpī̍yān-thsuṣuvā̠ṇō bha̍vati । ē̠tāni̠ khalu̠ vai sāmā̍ni । yatpṛ̠ṣṭhāni̍ । yatpṛ̠ṣṭhāni̠ bhava̍nti ॥ 31 ॥

tairē̠va sa̠vānnaiti̍ । yāni̍ dēvarā̠jānā̠gṃ̠ sāmā̍ni । taira̠muṣmi̍n ँlō̠ka ṛ̍ddhnōti । yāni̍ manuṣyarā̠jānā̠gṃ̠ sāmā̍ni । taira̠smin ँlō̠ka ṛ̍ddhnōti । u̠bhayō̍rē̠va lō̠kayōr̍.-ṛddhnōti । dē̠va̠lō̠kē cha̍ manuṣyalō̠kē cha̍ । ē̠ka̠vi̠gṃ̠śō̍ ‘bhiṣēcha̠nīya̍-syōtta̠mō bha̍vati । ē̠ka̠vi̠gṃ̠śaḥ kē̍śavapa̠nīya̍sya pratha̠maḥ । sa̠pta̠da̠śō da̍śa̠pēya̍ḥ ॥ 32 ॥

viḍvā ē̍kavi̠gṃ̠śaḥ । rā̠ṣṭragṃ sa̍ptada̠śaḥ । viśa̍ ē̠vaita-nma̍ddhya̠tō̍-‘bhiṣi̍chyatē । tasmā̠dvā ē̠ṣa vi̠śā-mpri̠yaḥ । vi̠śō hi ma̍ddhya̠tō̍-‘bhiṣi̠chyatē̎ । yadvā ē̍nama̠dō diśō-‘nu̍ vyāsthā̠paya̍nti । ta-thsu̍va̠rgaṃ lō̠ka-ma̠bhyārō̍hati । yadi̠maṃ lō̠ka-nna pra̍tyava̠rōhē̎t । a̠ti̠ ja̠naṃ vē̠yāt । udvā̍ mādyēt । yadē̠ṣa pra̍tī̠chīna̍-stōmō̠ bhava̍ti । i̠mamē̠va tēna̍ lō̠ka-mpra̠tyava̍rōhati । athō̍ a̠sminnē̠va lō̠kē prati̍ tiṣṭha̠tya-nu̍nmādāya ॥ 33 ॥
(akra̍n – rāja̠nyō̍ – bhava̍nti – daśa̠pēyō̍ – mādyē̠-ttrīṇi̍ cha) (a. 8)

anuvākaṃ 9 – abhiṣēchanīyaviṣayayō rukmayō-sstutiḥ
i̠yaṃ vai ra̍ja̠tā । a̠sau hari̍ṇī । ya-dru̠kmau bhava̍taḥ । ā̠bhyāmē̠vaina̍-mubha̠yata̠ḥ pari̍ gṛhṇāti । varu̍ṇasya̠ vā a̍bhiṣi̠chyamā̍na̠syāpa̍ḥ । i̠ndri̠yaṃ vī̠rya̍-nnira̍ghnann । ta-thsu̠varṇa̠gṃ̠ hira̍ṇya-mabhavat । ya-dru̠kma-ma̍nta̠-rdadhā̍ti । i̠ndri̠yasya̍ vī̠rya̍syāni̍rghātāya । śa̠tamā̍nō bhavati śa̠takṣa̍raḥ । śa̠tāyu̠ḥ puru̍ṣa-śśa̠tēndri̍yaḥ । āyu̍ṣyē̠vēndri̠yē prati̍ tiṣṭhati । āyu̠rvai hira̍ṇyam । ā̠yu̠ṣyā̍ ē̠vaina̍-ma̠bhyati̍ kṣaranti । tējō̠ vai hira̍ṇyam । tē̠ja̠syā̍ ē̠vaina̍ma̠bhyati̍ kṣaranti । varchō̠ vai hira̍ṇyam । va̠rcha̠syā̍ ē̠vaina̍ma̠bhyati̍ kṣaranti ॥ 34 ॥
(śa̠takṣa̍rō̠-‘ṣṭau cha̍) (a. 9)

anuvākaṃ 10 – vyuṣṭidvirātraṃ rājasūyāntē kartavyam
apra̍tiṣṭhitō̠ vā ē̠ṣa ityā̍huḥ । yō rā̍ja̠sūyē̍na̠ yaja̍ta̠ iti̍ । ya̠dā vā ē̠ṣa ē̠tēna̍ dvirā̠trēṇa̠ yaja̍tē । atha̍ prati̠ṣṭhā । atha̍ saṃvathsa̠ramā̎pnōti । yāva̍nti saṃvathsa̠rasyā̍-hōrā̠trāṇi̍ । tāva̍tīrē̠tasya̍ stō̠trīyā̎ḥ । a̠hō̠rā̠trēṣvē̠va prati̍ tiṣṭhati । a̠gni̠ṣṭō̠maḥ pūrva̠maha̍-rbhavati । a̠ti̠rā̠tra utta̍ram ॥ 35 ॥

nānai̠vāhō̍rā̠trayō̠ḥ prati̍ tiṣṭhati । pau̠rṇa̠mā̠syā-mpūrva̠maha̍-rbhavati । vya̍ṣṭakāyā̠-mutta̍ram । nānai̠vārdha̍ mā̠sayō̠ḥ prati̍tiṣṭhati । a̠mā̠vā̠syā̍yā̠-mpūrva̠maha̍-rbhavati । uddṛ̍ṣṭa̠ utta̍ram । nānai̠va māsa̍yō̠ḥ prati̍ tiṣṭhati । athō̠ khalu̍ । yē ē̠va sa̍mānapa̠kṣē pu̍ṇyā̠hē syātā̎m । tayō̎ḥ kā̠rya̍-mprati̍ṣṭhityai ॥ 36 ॥

a̠pa̠śa̠vyō dvi̍rā̠tra ityā̍huḥ । dvē hyē̍tē Chanda̍sī । gā̠ya̠tra-ñcha̠ traiṣṭu̍bha-ñcha । jaga̍tīma̠ntarya̍nti । na tēna̠ jaga̍tī kṛ̠tētyā̍huḥ । yadē̍nā-ntṛtīyasava̠nē ku̠rvantīti̍ । ya̠dā vā ē̠ṣā-‘hīna̠syāha̠-rbhaja̍tē । sā̠hnasya̍ vā̠ sava̍nam । athai̠va jaga̍tī kṛ̠tā । atha̍ paśa̠vya̍ḥ । vyu̍ṣṭi̠rvā ē̠ṣa dvi̍rā̠traḥ । ya ē̠vaṃ vi̠dvā-ndvi̍rā̠trēṇa̠ yaja̍tē । vyē̍vāsmā̍ uchChati । athō̠ tama̍ ē̠vāpa̍hatē । a̠gni̠ṣṭō̠ma-ma̍nta̠ta āha̍rati । a̠gni-ssarvā̍ dē̠vatā̎ḥ । dē̠vatā̎svē̠va prati̍ tiṣṭhati ॥ 37 ॥
(utta̍ra̠ṃ – prati̍ṣṭhityai – paśa̠vya̍-ssa̠pta cha̍) (a. 10)

(varu̍ṇasya – jā̠ – mīśva̠ra – ā̎gnē̠ya – mindra̍sya̠ – ya-ttri̠ – ṣva̍gniṣṭō̠ma – mupa̍ tvē̠ – yaṃ vai ra̍ja̠tā – ‘pra̍tiṣṭhitō̠ daśa̍)

(varu̍ṇasya̠ – yada̠śvibhyā̠ṃ – ँya-ttri̠ṣu – tasmā̠dudva̍tī-ssa̠ptatrigṃ̍śat)

varu̍ṇasya̠ – prati̍ tiṣṭhati ।

॥ hari̍ḥ ōm ॥

॥ kṛṣṇa yajurvēdīya taittirīya brāhmaṇē prathamāṣṭakē aṣṭamaḥ prapāṭhaka-ssamāptaḥ ॥

॥ kṛṣṇa yajurvēdīya taittirīya brāhmaṇē prathamāṣṭakaṃ samāptam ॥