KYTB 1.4 Somadi Brahmanam – Krishna Yajurveda Taittiriya Brahmana Patha – Ubhaye Va

kṛṣṇa yajurvēdīya taittirīya brāhmaṇē prathamāṣṭakē chaturthaḥ prapāṭhakaḥ – sōmādibrāhmaṇaṃ

ō-nnamaḥ paramātmanē, śrī mahāgaṇapatayē namaḥ,
śrī gurubhyō namaḥ । ha̠ri̠ḥ ōm ॥

anuvākaṃ 1 – grahaṇā grahaṇam
u̠bhayē̠ vā ē̠tē pra̠jāpa̍tē̠raddhya̍-sṛjyanta । dē̠vāśchāsu̍rāścha । tānna vya̍jānāt । i̠mē̎-‘nya i̠mē̎-‘nya iti̍ । sa dē̠vāna̠gṃ̠ śūna̍karōt । tāna̠bhya̍ṣuṇōt । tā-npa̠vitrē̍ṇā-punāt । tān-pa̠rastā̎t-pa̠vitra̍sya̠-vya̍gṛhṇāt । tē grahā̍ abhavann । tadgrahā̍ṇā-ṅgraha̠tvam ॥ 1 ॥

dē̠vatā̠ vā ē̠tā yaja̍mānasya gṛ̠hē gṛ̍hyantē । ya-dgrahā̎ḥ । vi̠durē̍na-ndē̠vāḥ । yasyai̠vaṃ vi̠duṣa̍ ē̠tē grahā̍ gṛ̠hyantē̎ ॥ ē̠ṣā vai sōma̠syāhu̍tiḥ । yadu̍pā̠gṃ̠śuḥ । sōmē̍na dē̠vāg​ sta̍rpayā̠ṇīti̠ khalu̠ vai sōmē̍na yajatē । yadu̍pā̠gṃ̠śu-ñju̠hōti̍ । sōmē̍nai̠va ta-ddē̠vāg​ sta̍rpayati ॥ yadgrahā̎mju̠hōti̍ ॥ 2 ॥

dē̠vā ē̠va ta-ddē̠vān-ga̍chChanti ॥ yachcha̍ma̠sāñju̠hōti̍ । tēnai̠vānu̍rūpēṇa̠ yaja̍māna-ssuva̠rgaṃ lō̠kamē̍ti ॥ ki-nnvē̍tadagra̍ āsī̠dityā̍huḥ । ya-tpātrā̠ṇīti̍ । i̠yaṃ vā ē̠tadagra̍ āsīt । mṛ̠nmayā̍ni̠ vā ē̠tānyā̍sann । tairdē̠vā na vyā̠vṛta̍-magachChann । ta ē̠tāni̍ dāru̠mayā̍ṇi̠ pātrā̎ṇya-paśyann । tānya̍kurvata ॥ 3 ॥

tairvai tē vyā̠vṛta̍-magachChann । ya-ddā̍ru̠mayā̍ṇi̠ pātrā̍ṇi̠ bhava̍nti । vyā̠vṛta̍mē̠va tai-ryaja̍mānō gachChati ॥ yāni̍ dāru̠mayā̍ṇi̠ pātrā̍ṇi̠ bhava̍nti । a̠mumē̠va tai-rlō̠ka-ma̠bhija̍yati । yāni̍ mṛ̠nmayā̍ni । i̠mamē̠va tai-rlō̠ka-ma̠bhija̍yati ॥ bra̠hma̠vā̠dinō̍ vadanti । kāśchata̍sra-ssthā̠līrvā̍ya̠vyā̎-ssōma̠graha̍ṇī̠riti̍ । dē̠vā vai pṛśñi̍maduhrann ॥ 4 ॥

tasyā̍ ē̠tē stanā̍ āsann । i̠yaṃ vai pṛśñi̍ḥ । tāmā̍di̠tyā ā̍dityasthā̠lyā chatu̍ṣpadaḥ pa̠śūna̍duhrann । yadā̍dityasthā̠lī bhava̍ti । chatu̍ṣpada ē̠va tayā̍ pa̠śūn. yaja̍māna i̠mā-ndu̍hē । tāmindra̍ ukthyasthā̠lyēndri̠ya-ma̍duhat । yadu̍kthyasthā̠lī bhava̍ti । i̠ndri̠yamē̠va tayā̠ yaja̍māna i̠mā-ndu̍hē । tāṃ viśvē̍ dē̠vā ā̎grayaṇasthā̠lyōrja̍-maduhrann । yadā̎grayaṇasthā̠lī bhava̍ti ॥ 5 ॥

ūrja̍mē̠va tayā̠ yaja̍māna i̠mā-ndu̍hē । tā-mma̍nu̠ṣyā̎ dhruvasthā̠lyā ”yu̍raduhrann । yaddhru̍vasthā̠lī bhava̍ti । āyu̍rē̠va tayā̠ yaja̍māna i̠mā-ndu̍hē । sthā̠lyā gṛ̠hṇāti̍ । vā̠ya̠vyē̍na juhōti । tasmā̍da̠nyēna̠ pātrē̍ṇa pa̠śū-ndu̠hanti̍ । a̠nyēna̠ prati̍gṛhṇanti । athō̎ vyā̠vṛta̍mē̠va ta-dyaja̍mānō gachChati ॥ 6 ॥
(gra̠ha̠tvaṃ – grahā̎n ju̠hōtya̍-kurva-tāduhra-nnāgrayaṇasthā̠lī bhava̍ti̠-+nava̍ cha) (a. 1)

anuvākaṃ 2 – sōtrāmaṇīśēṣā mantrāḥ
yu̠vagṃ su̠rāma̍maśvinā । namu̍chāvā-‘su̠rē sachā̎ । vi̠pi̠pā̠nā śu̍bhaspatī । indra̠-ṅkarma̍svāvatam ॥ pu̠trami̍va pi̠tarā̍va̠śvinō̠bhā । indrāva̍ta̠-ṅkarma̍ṇā da̠gṃ̠sanā̍bhiḥ । ya-thsu̠rāma̠ṃ vyapi̍ba̠-śśachī̍bhiḥ । sara̍svatī tvā maghavannabhīṣṇāt ॥ ahā̎vyagnē ha̠virā̠syē̍ tē । sru̠chīva̍ ghṛ̠ta-ñcha̠mū i̍va̠ sōma̍ḥ ॥ 7 ॥

vā̠ja̠sanigṃ̍ ra̠yima̠smē su̠vīra̎m । pra̠śa̠sta-ndhē̍hi ya̠śasa̍-mbṛ̠hanta̎m ॥ yasmi̠nnaśvā̍sa ṛṣa̠bhāsa̍ u̠kṣaṇa̍ḥ । va̠śā mē̠ṣā a̍vasṛ̠ṣṭāsa̠ āhu̍tāḥ । kī̠lā̠la̠pē sōma̍pṛṣṭhāya vē̠dhasē̎ । hṛ̠dāma̠ti-ñja̍naya̠ chāru̍ma̠gnayē̎ ॥ nānā̠ hi vā̎-ndē̠vahi̍ta̠gṃ̠ sadō̍ mi̠tam । mā sagṃsṛ̍kṣāthā-mpara̠mē vyō̍mann । surā̠ tvamasi̍ śu̠ṣmiṇī̠ sōma̍ ē̠ṣaḥ । mā mā̍ higṃsī̠-ssvāṃ yōni̍māvi̠śann ॥ 8 ॥

yadatra̍ śi̠ṣṭagṃ ra̠sina̍-ssu̠tasya̍ । yadindrō̠ api̍ba̠chChachī̍bhiḥ । a̠ha-ntada̍sya̠ mana̍sā śi̠vēna̍ । sōma̠gṃ̠ rājā̍nami̠ha bha̍kṣayāmi ॥ dvē sru̠tī a̍śṛṇava-mpitṛ̠ṇām । a̠ha-ndē̠vānā̍mu̠ta martyā̍nām । tābhyā̍mi̠daṃ viśva̠-mbhuva̍na̠gṃ̠ samē̍ti । a̠nta̠rā pūrva̠mapa̍ra-ñcha kē̠tum ॥ yastē̍ dēva varuṇa gāya̠traCha̍ndā̠ḥ pāśa̍ḥ । ta-nta̍ ē̠tēnāva̍yajē ॥ 9 ॥

yastē̍ dēva varuṇa tri̠ṣṭupCha̍ndā̠ḥ pāśa̍ḥ । ta-nta̍ ē̠tēnāva̍yajē । yastē̍ dēva varuṇa̠ jaga̍tīChandā̠ḥ pāśa̍ḥ । ta-nta̍ ē̠tēnāva̍yajē ॥ sōmō̠ vā ē̠tasya̍ rā̠jyamāda̍ttē । yō rājā̠ sa-nrā̠jyō vā̠ sōmē̍na̠ yaja̍tē । dē̠va̠su̠vāmē̠tāni̍ ha̠vīgṃṣi̍ bhavanti । ē̠tāva̍ntō̠ vai dē̠vānāgṃ̍ sa̠vāḥ । ta ē̠vāsmai̍ sa̠vā-npraya̍chChanti । ta ē̍na̠-mpuna̍-ssuvantē rā̠jyāya̍ । dē̠va̠sū rājā̍ bhavati ॥ 10 ॥
(sōma̍ – āvi̠śan. – ya̍jē – rā̠jyāyaikaṃ̍ cha) (a. 2)

anuvākaṃ 3 – dōhaprāyaśchittam, agnihōtrē
uda̍sthā-ddē̠vyadi̍ti-rviśvarū̠pī । āyu̍rya̠jñapa̍tāvadhāt । indrā̍ya kṛṇva̠tī bhā̠gam । mi̠trāya̠ varu̍ṇāya cha ॥ i̠yaṃ vā a̍gnihō̠trī । i̠yaṃ vā ē̠tasya̠ niṣī̍dati । yasyā̎gnihō̠trī ni̠ṣīda̍ti । tāmutthā̍payēt । uda̍sthā-ddē̠vyadi̍ti̠riti̍ । i̠yaṃ vai dē̠vyadi̍tiḥ ॥ 11 ॥

i̠māmē̠vāsmā̠ utthā̍payati ॥ āyu̍rya̠jñapa̍tāvadhā̠dityā̍ha । āyu̍rē̠vāsmi̍-ndadhāti ॥ indrā̍ya kṛṇva̠tī bhā̠ga-mmi̠trāya̠ varu̍ṇāya̠ chētyā̍ha । ya̠thā̠ ya̠jurē̠vaitat ॥ ava̍rti̠ṃ vā ē̠ṣaitasya̍ pā̠pmāna̍-mprati̠khyāya̠ niṣī̍dati । yasyā̎-gnihō̠tryupa̍sṛṣṭā ni̠ṣīda̍ti । tā-ndu̠gdhvā brā̎hma̠ṇāya̍ dadyāt । yasyānna̠-nnādyāt । ava̍rtimē̠vāsmi̍-npā̠pmāna̠-mprati̍muñchati ॥ 12 ॥

du̠gdhvā da̍dāti । na hyadṛ̍ṣṭā̠ dakṣi̍ṇā dī̠yatē̎ ॥ pṛ̠thi̠vīṃ vā ē̠tasya̠ paya̠ḥ pravi̍śati । yasyā̎gnihō̠tra-ndu̠hyamā̍na̠gg̠ skanda̍ti ॥ yada̠dya du̠gdha-mpṛ̍thi̠vīmasa̍kta । yadōṣa̍dhī-ra̠pyasa̍ra̠-dyadāpa̍ḥ । payō̍ gṛ̠hēṣu̠ payō̍ aghni̠yāsu̍ । payō̍ va̠thsēṣu̠ payō̍ astu̠ tanmayītyā̍ha । paya̍ ē̠vātma-ngṛ̠hēṣu̍ pa̠śuṣu̍ dhattē ॥ a̠pa upa̍sṛjati ॥ 13 ॥

a̠dbhirē̠vaina̍dāpnōti ॥ yō vai ya̠jñasyārtē̠nānā̎rtagṃ sagṃ sṛ̠jati̍ । u̠bhē vai tē tar​hyārchCha̍taḥ । ārchCha̍ti̠ khalu̠ vā ē̠tada̍gnihō̠tram । ya-ddu̠hyamā̍na̠gg̠ skanda̍ti । yada̍bhidu̠hyāt । ārtē̠nānā̎rtaṃ ya̠jñasya̠ sagṃsṛ̍jēt । tadē̠va yā̠dṛkkī̠dṛkcha̍ hōta̠vya̎m । athā̠nyā-ndu̠gdhvā puna̍r-hōta̠vya̎m । anā̎rtēnai̠vārta̍ṃ ya̠jñasya̠ niṣka̍rōti ॥ 14 ॥

ya-dyuddru̍tasya̠ skandē̎t । ya-ttatō-‘hu̍tvā̠ puna̍rē̠yāt । ya̠jñaṃ vichChi̍ndyāt । yatra̠ skandē̎t । tanni̠ṣadya̠ puna̍rgṛhṇīyāt । yatrai̠va skanda̍ti । tata̍ ē̠vaina̠t-puna̍rgṛhṇāti । tadē̠va yā̠dṛk-kī̠dṛkcha̍ hōta̠vya̎m । athā̠nyā-ndu̠gdhvā puna̍r-hōta̠vya̎m । anā̎rtēnai̠vārta̍ṃ ya̠jñasya̠ niṣka̍rōti ॥ 15 ॥

vi vā ē̠tasya̍ ya̠jñaśChi̍dyatē । yasyā̎gnihō̠trē̍-‘dhiśri̍tē̠ śvā-‘nta̠rā dhāva̍ti । ru̠draḥ khalu̠ vā ē̠ṣaḥ । yada̠gniḥ । ya-dgāma̍nvatyāva̠rtayē̎t । ru̠drāya̍ pa̠śū-napi̍daddhyāt । a̠pa̠śu-ryaja̍māna-ssyāt । yada̠pō̎ ‘nvatiṣi̠ñchēt । a̠nā̠dya-ma̠gnērāpa̍ḥ । a̠nā̠dyamā̎bhyā̠-mapi̍daddhyāt । gār​ha̍patyā̠-dbhasmā̠dāya̍ । i̠daṃ viṣṇu̠-rvicha̍krama̠ iti̍ vaiṣṇa̠vyarchā ”ha̍va̠nīyā̎ddhva̠gṃ̠ saya̠nnudra̍vēt । ya̠jñō vai viṣṇu̍ḥ । ya̠jñēnai̠va ya̠jñagṃ santa̍nōti । bhasma̍nā pa̠damapi̍vapati̠ śāntyai̎ ॥ 16 ॥
(vai dē̠vyadi̍ti–r muñchati – sṛjati – karōti – karōtyā – bhyā̠mapi̍daddhyā̠-tpañcha̍ cha) (a. 3)

anuvākaṃ 4 – agniprāyaśchittaṃ agnihōtrē
ni vā ē̠tasyā̍hava̠nīyō̠ gār​ha̍patya-ṅkāmayatē । ni gār​ha̍patya āhava̠nīya̎m । yasyā̠gnimanu̍ddhṛta̠gṃ̠ sūryō̠-‘bhini̠mrōcha̍ti । da̠rbhēṇa̠ hira̍ṇya-mpra̠baddhya̍ pu̠rastā̎ddharēt । athā̠gnim । athā̎gnihō̠tram । yaddhira̍ṇya-mpu̠rastā̠ddhara̍ti । jyōti̠rvai hira̍ṇyam । jyōti̍rē̠vaina̠-mpaśya̠-nnuddha̍rati । yada̠gni-mpūrva̠gṃ̠ hara̠tyathā̎-gnihō̠tram ॥ 17 ॥

bhā̠ga̠dhēyē̍nai̠vaina̠-mpraṇa̍yati ॥ brā̠hma̠ṇa ā̍r​ṣē̠ya uddha̍rēt । brā̠hma̠ṇō vai sarvā̍ dē̠vatā̎ḥ । sarvā̍bhirē̠vaina̍-ndē̠vatā̍bhi̠ruddha̍rati ॥ a̠gni̠hō̠tra-mu̍pa̠sā-dyātami̍tō-rāsīta । vra̠tamē̠va ha̠tamanu̍ mriyatē ॥ anta̠ṃ vā ē̠ṣa ā̠tmanō̍ gachChati । yastāmya̍ti । anta̍mē̠ṣa ya̠jñasya̍ gachChati । yasyā̠gnimanu̍ddhṛta̠gṃ̠ sūryō̠-‘bhini̠mrōcha̍ti ॥ 18 ॥

puna̍-ssa̠manya̍ juhōti । antē̍nai̠vānta̍ṃ ya̠jñasya̠ niṣka̍rōti ॥ varu̍ṇō̠ vā ē̠tasya̍ ya̠jña-ṅgṛ̍hṇāti । yasyā̠gni-manu̍ddhṛta̠gṃ̠ sūryō̠-‘bhini̠mrōcha̍ti । vā̠ru̠ṇa-ñcha̠ru-nnirva̍pēt । tēnai̠va ya̠jña-nniṣkrī̍ṇītē ॥ ni vā ē̠tasyā̍hava̠nīyō̠ gār​ha̍patya-ṅkāmayatē । ni gār​ha̍patya āhava̠nīya̎m । yasyā̠gni-manu̍ddhṛta̠gṃ̠ sūryō̠-‘bhyu̍dēti̍ । cha̠tu̠rgṛ̠hī̠ta-mājya̍-mpu̠rastā̎ddharēt ॥ 19 ॥

athā̠gnim । athā̎gnihō̠tram । yadājya̍-mpu̠rastā̠ddhara̍ti । ē̠tadvā a̠gnēḥ pri̠ya-ndhāma̍ । yadājya̎m । pri̠yēṇai̠vaina̠-ndhāmnā̠ sama̍rdhayati । yada̠gni-mpūrva̠gṃ̠ hara̠tyathā̎-gnihō̠tram । bhā̠ga̠dhēyē̍nai̠vaina̠-mpraṇa̍yati । brā̠hma̠ṇa ā̍r​ṣē̠ya uddha̍rēt । brā̠hma̠ṇō vai sarvā̍ dē̠vatā̎ḥ ॥ 20 ॥

sarvā̍bhirē̠vaina̍-ndē̠vatā̍bhi̠ruddha̍rati ॥ parā̍chī̠ vā ē̠tasmai̎ vyu̠chChantī̠ vyu̍chChati । yasyā̠gni-manu̍ddhṛta̠gṃ̠ sūryō̠-‘bhyu̍dēti̍ । u̠ṣāḥ kē̠tunā̍ juṣatām । ya̠jña-ndē̠vēbhi̍rinvi̠tam । dē̠vēbhyō̠ madhu̍mattama̠gg̠ svāhēti̍ pra̠tyaṃ-ni̠ṣadyājyē̍na juhuyāt । pra̠tīchī̍mē̠vāsmai̠ vivā̍sayati ॥ a̠gni̠hō̠tra-mu̍pa̠sādyātami̍tō-rāsīta । vra̠tamē̠va ha̠tamanu̍ mriyatē । anta̠ṃ vā ē̠ṣa ā̠tmanō̍ gachChati ॥ 21 ॥

yastāmya̍ti । anta̍mē̠ṣa ya̠jñasya̍ gachChati । yasyā̠gni-manu̍ddhṛta̠gṃ̠ sūryō̠-‘bhyu̍dēti̍ । puna̍-ssa̠manya̍ juhōti । antē̍nai̠vānta̍ṃ ya̠jñasya̠ niṣka̍rōti । mi̠trō vā ē̠tasya̍ ya̠jña-ṅgṛ̍hṇāti । yasyā̠gni-manu̍ddhṛta̠gṃ̠ sūryō̠-‘bhyu̍dēti̍ । mai̠tra-ñcha̠ru-nnirva̍pēt । tēnai̠va ya̠jña-nniṣkrī̍ṇītē ॥ yasyā̍-hava̠nīyē-‘nu̍dvātē̠ gār​ha̍patya u̠dvāyē̎t ॥ 22 ॥

yadā̍hava̠nīya̠-manu̍dvāpya̠ gār​ha̍patya̠-mmanthē̎t । vichChi̍ndyāt । bhrātṛ̍vyamasmai janayēt । yadvai ya̠jñasya̍ vāsta̠vya̍-ṅkri̠yatē̎ । tadanu̍ ru̠drō-‘va̍charati । ya-tpūrva̍-manvava̠syēt । vā̠sta̠vya̍-ma̠gnimupā̍sīta । ru̠drō̎-‘sya pa̠śū-nghātu̍ka-ssyāt । ā̠ha̠va̠nīya̍-mu̠dvāpya̍ । gār​ha̍patya-mmanthēt ॥ 23 ॥

i̠taḥ pra̍tha̠ma-ñja̍jñē a̠gniḥ । svādyōnē̠radhi̍ jā̠tavē̍dāḥ । sa gā̍yatri̠yā tri̠ṣṭubhā̠ jaga̍tyā । dē̠vēbhyō̍ ha̠vyaṃ va̍hatu prajā̠nanniti̍ । Chandō̍bhirē̠vaina̠gg̠ svādyōnē̠ḥ praja̍nayati ॥ gār​ha̍patya-mmanthati । gār​ha̍patya̠ṃ vā anvāhi̍tāgnēḥ pa̠śava̠ upa̍ tiṣṭhantē । sa yadu̠dvāya̍ti । tadanu̍ pa̠śavō-‘pa̍krāmanti । i̠ṣē ra̠yyai ra̍masva ॥ 24 ॥

saha̍sē dyu̠mnāya̍ । ū̠rjē patyā̠yētyā̍ha । pa̠śavō̠ vai ra̠yiḥ । pa̠śūnē̠vāsmai̍ ramayati ॥ sā̠ra̠sva̠tau tvōthsau̠ sami̍ndhātā̠mityā̍ha । ṛ̠-khsā̠mē vai sā̍rasva̠tāvuthsau̎ । ṛ̠kh-sā̠mābhyā̍mē̠vaina̠gṃ̠ sami̍ndhē ॥ sa̠mrāḍa̍si vi̠rāḍa̠sītyā̍ha । ra̠tha̠nta̠raṃ vai sa̠mrāṭ । bṛ̠ha-dvi̠rāṭ ॥ 25 ॥

tābhyā̍mē̠vaina̠gṃ̠ sami̍ndhē ॥ vajrō̠ vai cha̠kram । vajrō̠ vā ē̠tasya̍ ya̠jñaṃ vichChi̍natti । yasyānō̍ vā̠ rathō̍ vā-‘nta̠rā-‘gnī yāti̍ । ā̠ha̠va̠nīya̍-mu̠dvāpya̍ । gār​ha̍patyā̠-duddha̍rēt । yada̍gnē̠ pūrva̠-mprabhṛ̍ta-mpa̠dagṃ hi tē̎ । sūrya̍sya ra̠śmīna-nvā̍ta̠tāna̍ । tatra̍ rayi̠ṣṭhāmanu̠ sambha̍rai̠tam । sa-nna̍-ssṛja suma̠tyā vāja̍va̠tyēti̍ ॥ 26 ॥

pūrvē̍ṇai̠vāsya̍ ya̠jñēna̍ ya̠jñamanu̠ sa-nta̍nōti ॥ tvama̍gnē sa̠prathā̍ a̠sītyā̍ha । a̠gni-ssarvā̍ dē̠vatā̎ḥ । dē̠vatā̍bhirē̠va ya̠jñagṃ sa-nta̍nōti ॥ a̠gnayē̍ pathi̠kṛtē̍ purō̠ḍāśa̍ma̠ṣṭāka̍pāla̠-nnirva̍pēt । a̠gnimē̠va pa̍thi̠kṛta̠gg̠ svēna̍ bhāga̠dhēyē̠nōpa̍ dhāvati । sa ē̠vaina̍ṃ ya̠jñiya̠-mpanthā̠mapi̍-nayati । a̠na̠ḍvān-dakṣi̍ṇā । va̠hī hyē̍ṣa samṛ̍ddhyai ॥ 27 ॥
(hara̠tyathā̎gnihō̠traṃ – ni̠mrōcha̍ti – harē-d- dē̠vatā̍ – gachCha – tyu̠dvāyē̎-nmanthē-dramasva-bṛ̠ha-dvi̠rāḍ-iti̠-nava̍ cha) (a. 4)

(ni vai pūrva̠-ntrīṇi̍ ni̠mrōcha̍ti da̠rbhēṇa̠ yaddhira̍ṇyamagnihō̠tra-mpuna̠rvaru̍ṇō
vāru̠ṇa-nni vā ē̠tasyā̠bhyu̍dēti̍ chaturgṛhī̠tamājyaṃ̠ yadājyaṃ̠ parā̎chyu̠ṣāḥ puna̍rmi̠trō mē̠traṃ yasyā̍hava̠nīyē-‘nu̍dvātē̠ gār​ha̍patyō̠ yadvai ma̍nthē̠duddha̍rēt)

anuvākaṃ 5 – sōmātirēkaprāyaśchittam
yasya̍ prātassava̠nē sōmō̍-‘ti̠richya̍tē । māddhya̍ndina̠gṃ̠ sava̍na-ṅkā̠maya̍mānō̠-‘bhyati̍richyatē । gaurdha̍yati ma̠rutā̠miti̠ dhaya̍dvatīṣu kurvanti । hi̠nasti̠ vai sa̠ndhyadhī̍tam । sa̠ndhīva̠ khalu̠ vā ē̠tat । ya-thsava̍na syāti̠richya̍tē । yaddhaya̍dvatīṣu ku̠rvanti̍ । sa̠ndhē-śśāntyai̎ ॥ gā̠ya̠tragṃ sāma̍ bhavati pañchada̠śa-sstōma̍ḥ । tēnai̠va prā̍tassava̠nānnaya̍nti ॥ 28 ॥

ma̠rutva̍tīṣu kurvanti । tēnai̠va māddhya̍ndinā̠-thsava̍nā̠nnaya̍nti ॥ hōtu̍ścha ma̠samanūnna̍yantē । hōtā-‘nu̍śagṃsati । ma̠ddhya̠ta ē̠va ya̠jñagṃ sa̠māda̍dhāti ॥ yasya̠ māddhya̍ndinē̠ sava̍nē̠ sōmō̍-‘ti̠richya̍tē । ā̠di̠tya-ntṛ̍tīyasava̠na-ṅkā̠maya̍mānō̠-‘bhyati̍richyatē । gau̠ri̠vī̠tagṃ sāma̍ bhavati । ati̍rikta̠ṃ vai gau̍rivī̠tam । ati̍rikta̠ṃ ya-thsava̍nasyā-ti̠richya̍tē ॥ 29 ॥

ati̍riktasya̠ śāntyai̎ ॥ baṇma̠hāgṃ a̍si sū̠ryēti̍ kurvanti । yasyai̠vādi̠tyasya̠ sava̍nasya̠ kāmē̍nāti̠richya̍tē । tēnai̠vaina̠-ṅkāmē̍na̠ sama̍rdhayanti ॥ gau̠ri̠vī̠tagṃ sāma̍ bhavati । tēnai̠va māddhya̍ndinā̠-thsava̍nā̠nnaya̍nti ॥ sa̠pta̠da̠śa-sstōma̍ḥ । tēnai̠va tṛ̍tīyasava̠nānnaya̍nti ॥ hōtu̍śchama̠samanūnna̍yantē । hōtā-‘nu̍śagṃ sati ॥ 30 ॥

ma̠ddhya̠ta ē̠va ya̠jñagṃ sa̠māda̍dhāti ॥ yasya̍ tṛtīyasava̠nē sōmō̍-‘ti̠richyē̍ta । u̠kthya̍-ṅkurvīta । yasyō̠kthyē̍-‘ti̠richyē̍ta । a̠ti̠rā̠tra-ṅku̍rvīta । yasyā̍-tirā̠trē̍-‘ti̠richya̍tē। tattvai du̍ṣprajñā̠nam । yaja̍māna̠ṃ vā ē̠ta-tpa̠śava̍ ā̠sāhya̍ yanti । bṛ̠ha-thsāma̍ bhavati । bṛ̠hadvā i̠māṃ lō̠kā-ndā̍dhāra । bār​ha̍tāḥ pa̠śava̍ḥ । bṛ̠ha̠taivāsmai̍ pa̠śū-ndā̍dhāra ॥ śi̠pi̠vi̠ṣṭava̍tīṣu kurvanti । śi̠pi̠vi̠ṣṭō vai dē̠vānā̎-mpu̠ṣṭam । puṣṭyai̠vaina̠gṃ̠ sama̍rdhayanti ॥ hōtu̍śchama̠samanūnna̍yantē । hōtā-‘nu̍śagṃsati । ma̠ddhya̠ta ē̠va ya̠jñagṃ sa̠māda̍dhāti ॥ 31 ॥
(ya̠nti̠ – sava̍nasyāti̠richya̍tē – śagṃsati – dādhārā̠ṣṭau cha̍) (a. 5)

anuvākaṃ 6 – savananimitta-mprāyaśchittam
ēkai̍kō̠ vai ja̠natā̍yā̠-mindra̍ḥ । ēka̠ṃ vā ē̠tāvindra̍ma̠bhi sagṃsu̍nutaḥ । yau dvau sagṃ̍sunu̠taḥ । pra̠jāpa̍ti̠rvā ē̠ṣa vitā̍yatē । ya-dya̠jñaḥ । tasya̠ grāvā̍ṇō̠ dantā̎ḥ । a̠nya̠ta̠raṃ vā ē̠tē sagṃ̍sunva̠tō-rnirba̍phsati । pūrvē̍ṇōpa̠sṛtyā̍ dē̠vatā̠ ityā̍huḥ । pū̠rvō̠pa̠sṛ̠tasya̠ vai śrēyā̎-nbhavati । ēti̍va̠ntyājyā̍ni bhavantya̠-bhiji̍tyai ॥ 32 ॥

ma̠rutva̍tīḥ prati̠pada̍ḥ । ma̠rutō̠ vai dē̠vānā̠-mapa̍rājita-mā̠yata̍nam । dē̠vānā̍-mē̠vāpa̍rājita ā̠yata̍nē yatatē ॥u̠bhē bṛ̍hadrathanta̠rē bha̍vataḥ । i̠yaṃ vāva ra̍thanta̠ram । a̠sau bṛ̠hat । ā̠bhyāmē̠vaina̍-ma̠ntarē̍ti । vā̠chaścha̠ mana̍saścha । prā̠ṇāchchā̍-pā̠nāchcha̍ । di̠vaścha̍ pṛthi̠vyāścha̍ ॥ 33 ॥

sarva̍smā-dvi̠ttā-dvēdyā̎t ॥ a̠bhi̠va̠rtō bra̍hmasā̠ma-mbha̍vati । su̠va̠rgasya̍ lō̠kasyā̠-bhivṛ̍ttyai ॥ a̠bhi̠ji-dbha̍vati । su̠va̠rgasya̍ lō̠kasyā̠-bhiji̍tyai । vi̠śva̠ji-dbha̍vati । viśva̍sya̠ jityai̎ ॥ yasya̠ bhūyāgṃ̍sō yajñakra̠tava̠ ityā̍huḥ । sa dē̠vatā̍ vṛṅkta̠ iti̍ । yadya̍gniṣṭō̠ma-ssōma̍ḥ pa̠rastā̠-thsyāt ॥ 34 ॥

u̠kthya̍-ṅkurvīta । yadyu̠kthya̍-ssyāt । a̠ti̠rā̠tra-ṅku̍rvīta । ya̠jña̠kra̠tubhi̍-rē̠vāsya̍ dē̠vatā̍ vṛṅktē ॥ yō vai Chandō̍bhi-rabhi̠bhava̍ti । sa sagṃ̍ sunva̠tō-ra̠bhibha̍vati । sa̠ṃvē̠śāya̍ tvōpavē̠śāya̠-tvētyā̍ha । Chandāgṃ̍si̠ vai sa̍ṃvē̠śa u̍pavē̠śaḥ । Chandō̍bhirē̠vāsya̠ Chandāg̍sya̠-bhibha̍vati ॥ i̠ṣṭargō̠ vā ṛ̠tvijā̍-maddhva̠ryuḥ ॥ 35 ॥

i̠ṣṭarga̠ḥ khalu̠ vai pūrvō̠-‘r​ṣṭuḥ, kṣī̍yatē । prāṇā̍pānau mṛ̠tyōrmā̍ pāta̠mityā̍ha । prā̠ṇā̠pā̠nayō̍rē̠va śra̍yatē । prāṇā̍pānau̠ mā mā̍ hāsiṣṭa̠mityā̍ha । naina̍-mpu̠rā-”yu̍ṣaḥ prāṇāpā̠nau ja̍hitaḥ ॥ ārti̠ṃ vā ē̠tē niya̍nti । yēṣā̎-ndīkṣi̠tānā̎-mpra̠mīya̍tē । taṃ yada̍va̠varjē̍yuḥ । krū̠ra̠kṛtā̍mivaiṣāṃ lō̠ka-ssyā̎t । āha̍ra da̠hēti̍ brūyāt ॥ 36 ॥

ta-nda̍kṣiṇa̠tō vēdyai̍ ni̠dhāya̍ । sa̠rpa̠rā̠jñiyā̍ ṛ̠gbhi-sstu̍yuḥ । i̠yaṃ vai sarpa̍tō̠ rājñī̎ । a̠syā ē̠vaina̠-mpari̍dadati ॥ vyṛ̍ddha̠-ntadityā̍huḥ । ya-thstu̠ta-mana̍nuśasta̠-miti̍ । hōtā̎ pratha̠maḥ prā̍chīnāvī̠tī mā̎rjā̠līya̠-mparī̍yāt । yā̠mīra̍nu-bru̠vann । sa̠rpa̠rā̠jñīnā̎-ṅkīrtayēt । u̠bhayō̍rē̠vaina̍ṃ lō̠kayō̠ḥ pari̍dadati ॥ 37 ॥

athō̍ dhu̠vantyē̠vaina̎m । athō̠ nyē̍vāsmai̎ hnuvatē ॥ triḥ pari̍yanti । traya̍ i̠mē lō̠kāḥ । ē̠bhya ē̠vaina̍ṃ lō̠kēbhyō̍ dhuvatē । triḥ puna̠ḥ pari̍yanti । ṣaṭ-thsampa̍dyantē । ṣaḍvā ṛ̠tava̍ḥ । ṛ̠tubhi̍rē̠vaina̍-ndhuvatē ॥ agna̠ āyūgṃ̍ṣi pavasa̠ iti̍ prati̠pada̍-ṅkurvīrann । ra̠tha̠nta̠rasā̍maiṣā̠gṃ̠ sōma̍-ssyāt । āyu̍rē̠vātman-da̍dhatē । athō̍ pā̠pmāna̍mē̠va vi̠jaha̍tō yanti ॥ 38 ॥
(a̠bhiji̍tyai – pṛthi̠vyāścha̠ – syā – da̍ddhva̠ryu–r bru̍yāl – lō̠kayō̠ḥ pari̍dadati – kurvara̠gg̠ strīṇi̍ cha) (a. 6)

anuvākaṃ 7 – yūpavirōhaṇādiprāyaśchittam
a̠su̠rya̍ṃ vā ē̠tasmā̠-dvarṇa̍-ṅkṛ̠tvā । pa̠śavō̍ vī̠rya̍-mapa̍krāmanti । yasya̠ yūpō̍ vi̠rōha̍ti । tvā̠ṣṭra-mba̍hurū̠pa-māla̍bhēta । tvaṣṭā̠ vai rū̠pāṇā̍mīśē । ya ē̠va rū̠pāṇā̠mīśē̎ । sō̎-‘smi-npa̠śūn. vī̠rya̍ṃ yachChati । nāsmā̎t-pa̠śavō̍ vī̠rya̍-mapa̍krāmanti ॥ ārti̠ṃ vā ē̠tē niya̍nti । yēṣā̎-ndīkṣi̠tānā̍-ma̠gni-ru̠dvāya̍ti ॥ 39 ॥

yadā̍hava̠nīya̍ u̠dvāyē̎t । yatta-mmanthē̎t । vichChi̍ndyāt । bhrātṛ̍vyamasmai janayēt । yadā̍hava̠nīya̍ u̠dvāyē̎t । āgnī̎ddhrā̠-duddha̍rēt । yadāgnī̎ddhra u̠dvāyē̎t । gār​ha̍patyā̠-duddha̍rēt । ya-dgār​ha̍patya u̠dvāyē̎t । ata̍ ē̠va puna̍-rmanthēt ॥ 40 ॥

atra̠ vāva sa nila̍yatē । yatra̠ khalu̠ vai nilī̍na-mutta̠ma-mpaśya̍nti । tadē̍na-michChanti ॥ yasmā̠-ddārō̍ru̠dvāyē̎t । tasyā̠raṇī̍ kuryāt । kru̠mu̠kamapi̍ kuryāt । ē̠ṣā vā a̠gnēḥ pri̠yā ta̠nūḥ । yat-kru̍mu̠kaḥ । pri̠yayai̠vaina̍-nta̠nuvā̠ sama̍rdhayati ॥ gār​ha̍patya-mmanthati ॥ 41 ॥

gār​ha̍patyō̠ vā a̠gnēryōni̍ḥ । svādē̠vaina̠ṃ yōnē̎-rjanayati । nāsmai̠ bhrātṛ̍vya-ñjanayati ॥ yasya̠ sōma̍ upa̠dasyē̎t । su̠varṇa̠gṃ̠ hira̍ṇya-ndvē̠dhā vi̠chChidya̍ । ṛ̠jī̠ṣē̎-‘nyadā̍dhūnu̠yāt । ju̠hu̠yāda̠nyat । sōma̍mē̠vā-bhi̍ṣu̠ṇōti̍ । sōma̍-ñjuhōti ॥ sōma̍sya̠ vā a̍bhiṣū̠yamā̍ṇasya pri̠yā ta̠nū-ruda̍krāmat ॥ 42 ॥

ta-thsu̠varṇa̠gṃ̠ hira̍ṇya-mabhavat । ya-thsu̠varṇa̠gṃ̠ hira̍ṇya-ṅku̠rvanti̍ । pri̠yayai̠vaina̍-nta̠nuvā̠ sama̍rdhayanti ॥ yasyākrī̍ta̠gṃ̠ sōma̍-mapa̠harē̍yuḥ । krī̠ṇī̠yādē̠va । saiva tata̠ḥ prāya̍śchittiḥ ॥ yasya̍ krī̠tama̍pa̠harē̍yuḥ । ā̠dā̠rāg​ścha̍ phālgu̠nāni̍ chā̠bhiṣu̍ṇuyāt । gā̠ya̠trī yagṃ sōma̠māha̍rat । tasya̠ yō-‘gṃ̍śuḥ pa̠rā-‘pa̍tat ॥ 43 ॥

ta ā̍dā̠rā a̍bhavann । indrō̍ vṛ̠trama̍hann । tasya̍ va̠lkaḥ parā̍-‘patat । tāni̍ phālgu̠nānya̍bhavann । pa̠śavō̠ vai phā̎lgu̠nāni̍ । pa̠śava̠-ssōmō̠ rājā̎ । yadā̍dā̠rāg​ścha̍ phālgu̠nāni̍ chābhiṣu̠ṇōti̍ । sōma̍mē̠va rājā̍nama̠bhiṣu̍ṇōti ॥ śṛ̠tēna̍ prātassava̠nē śrī̍ṇīyāt । da̠ddhnā ma̠ddhyandi̍nē ॥ 44 ॥

nī̠ta̠mi̠śrēṇa̍ tṛtīyasava̠nē । a̠gni̠ṣṭō̠ma-ssōma̍-ssyā-drathanta̠rasā̍mā । ya ē̠vartvijō̍ vṛ̠tā-ssyuḥ । ta ē̍naṃ yājayēyuḥ । ēkā̠-ṅgā-ndakṣi̍ṇā-ndadyā̠ttēbhya̍ ē̠va । puna̠-ssōma̍-ṅkrīṇīyāt । ya̠jñēnai̠va ta-dya̠jña-mi̍chChati । saiva tata̠ḥ prāya̍śchittiḥ ॥ sarvā̎bhyō̠ vā ē̠ṣa dē̠vatā̎bhya̠-ssarvē̎bhyaḥ pṛ̠ṣṭhēbhya̍ ā̠tmāna̠-māgu̍ratē । ya-ssa̠trāyā̍gu̠ratē̎ । ē̠tāvā̠n-khalu̠ vai puru̍ṣaḥ । yāva̍dasya vi̠ttam । sa̠rva̠vē̠da̠sēna̍ yajēta । sarva̍pṛṣṭhō-‘sya̠ sōma̍-ssyāt । sarvā̎bhya ē̠va dē̠vatā̎bhya̠-ssarvē̎bhyaḥ pṛ̠ṣṭhēbhya̍ ā̠tmāna̠-nniṣkrī̍ṇītē ॥ 45 ॥
(u̠dvāya̍ti – manthēn – mantha – tyakrāmat – pa̠rā-‘pa̍tan – ma̠ddhyandi̍na – āgu̠ratē̠ pañcha̍ cha) (a. 7)

anuvākaṃ 8 – pāvamānīmantrāḥ (smārtē śñānādau mārjanārthāścha)
pava̍māna̠-ssuva̠rjana̍ḥ । pa̠vitrē̍ṇa̠ vicha̍r​ṣaṇiḥ । yaḥ pōtā̠ sa pu̍nātu mā ॥ pu̠nantu̍ mā dēvaja̠nāḥ । pu̠nantu̠ mana̍ vō dhi̠yā । pu̠nantu̠ viśva̍ ā̠yava̍ḥ ॥ jāta̍vēdaḥ pa̠vitra̍vat । pa̠vitrē̍ṇa punāhi mā । śu̠krēṇa̍ dēva̠ dīdya̍t । agnē̠ kratvā̠ kratū̠gṃ̠ ranu̍ ॥ 46 ॥

yattē̍ pa̠vitra̍-ma̠rchiṣi̍ । agnē̠ vita̍tamanta̠rā । brahma̠ tēna̍ punīmahē ॥ u̠bhābhyā̎-ndēva savitaḥ ।pa̠vitrē̍ṇa sa̠vēna̍ cha । i̠da-mbrahma̍ punīmahē ॥ vai̠śva̠dē̠vī pu̍na̠tī dē̠vyāgā̎t । yasyai̍ ba̠hvī-sta̠nuvō̍ vī̠tapṛ̍ṣṭhāḥ । tayā̠ mada̍nta-ssadha̠mādyē̍ṣu । va̠yagg​ syā̍ma̠ pata̍yō rayī̠ṇām ॥ 47 ॥

vai̠śvā̠na̠rō ra̠śmibhi̍rmā punātu । vāta̍ḥ prā̠ṇēnē̍ṣi̠rō ma̍yō̠bhūḥ । dyāvā̍pṛthi̠vī paya̍sā̠ payō̍bhiḥ । ṛ̠tāva̍rī ya̠jñiyē̍ mā punītām ॥ bṛ̠hadbhi̍-ssavita̠stṛbhi̍ḥ । var​ṣi̍ṣṭhai-rdēva̠ manma̍bhiḥ । agnē̠ dakṣai̎ḥ punāhi mā ॥ yēna̍ dē̠vā apu̍nata । yēnāpō̍ di̠vya-ṅkaśa̍ḥ । tēna̍ di̠vyēna̠ brahma̍ṇā ॥ 48 ॥

i̠da-mbrahma̍ punīmahē ॥ yaḥ pā̍vamā̠nīra̠ddhyēti̍ । ṛṣi̍bhi̠-ssambhṛ̍ta̠gṃ̠ rasa̎m । sarva̠gṃ̠ sa pū̠tama̍śñāti । sva̠di̠ta-mmā̍ta̠riśva̍nā ॥ pā̠va̠mā̠nīryō a̠ddhyēti̍ । ṛṣi̍bhi̠-ssambhṛ̍ta̠gṃ̠ rasa̎m । tasmai̠ sara̍svatī duhē । kṣī̠ragṃ sa̠rpi-rmadhū̍da̠kam ॥ pā̠va̠mā̠nī-ssva̠styaya̍nīḥ ॥ 49 ॥

su̠dughā̠ hi paya̍svatīḥ । ṛṣi̍bhi̠-ssambhṛ̍tō̠ rasa̍ḥ । brā̠hma̠ṇēṣva̠mṛtagṃ̍ hi̠tam ॥ pā̠va̠mā̠nī-rdi̍śantu naḥ । i̠maṃ lō̠kamathō̍ a̠mum । kāmā̠n-thsama̍rdhayantu naḥ । dē̠vī-rdē̠vai-ssa̠mābhṛ̍tāḥ ॥ pā̠va̠mā̠nī-ssva̠styaya̍nīḥ । su̠dughā̠hi ghṛ̍ta̠śchuta̍ḥ । ṛṣi̍bhi̠-ssambhṛ̍tō̠ rasa̍ḥ ॥ 50 ॥

brā̠hma̠ṇēṣva̠mṛtagṃ̍ hi̠tam ॥ yēna̍ dē̠vāḥ pa̠vitrē̍ṇa । ā̠tmāna̍-mpu̠natē̠ sadā̎ । tēna̍ sa̠hasra̍dhārēṇa । pā̠va̠mā̠nyaḥ pu̍nantu mā ॥ prā̠jā̠pa̠tya-mpa̠vitra̎m । śa̠tōdyā̍magṃ hira̠ṇmaya̎m । tēna̍ brahma̠ vidō̍ va̠yam । pū̠ta-mbrahma̍ punīmahē ॥ indra̍-ssunī̠tī sa̠ha mā̍ punātu । sōma̍-ssva̠styā varu̍ṇa-ssa̠mīchyā̎ । ya̠mō rājā̎ pramṛ̠ṇābhi̍ḥ punātu mā । jā̠tavē̍dā mō̠rjaya̍ntyā punātu ॥ 51 ॥
(anu̍ – rayī̠ṇāṃ – brahma̍ṇā – sva̠styaya̍nīḥ – su̠dughā̠ hi ghṛ̍ta̠śchuta̠ ṛṣi̍bhi̠-ssambhṛ̍tō̠ rasa̍ḥ – punātu̠ trīṇi̍ cha ) (a. 8)

anuvākaṃ 9 – rājasūyagatachāturmāsyaśēṣaḥ
pra̠jā vai sa̠tramā̍sata̠ tapa̠stapya̍mānā̠ aju̍hvatīḥ । dē̠vā a̍paśya-ñchama̠sa-ṅghṛ̠tasya̍ pū̠rṇagg​ sva̠dhām । tamupōda̍tiṣṭha̠nta-ma̍juhavuḥ । tēnā̎rdhamā̠sa ūrja̠mavā̍rundhata । tasmā̍dardhamā̠sē dē̠vā i̍jyantē ॥ pi̠tarō̍-‘paśya-ñchama̠sa-ṅghṛ̠tasya̍ pū̠rṇagg​ sva̠dhām । tamupōda̍tiṣṭha̠nta- ma̍juhavuḥ । tēna̍ mā̠syūrja̠mavā̍rundhata । tasmā̎-nmā̠si pi̠tṛbhya̍ḥ kriyatē । ma̠nu̠ṣyā̍ apaśya-ñchama̠sa-ṅghṛ̠tasya̍ pū̠rṇagg​ sva̠dhām ॥ 52 ॥

tamupōda̍tiṣṭha̠nta-ma̍juhavuḥ । tēna̍-dva̠yīmūrja̠mavā̍rundhata । tasmā̠-ddvirahnō̍-manu̠ṣyē̎bhya̠ upa̍hriyatē । prā̠taścha̍ sā̠ya-ñcha̍ । pa̠śavō̍-‘paśya-ñchama̠sa-ṅghṛ̠tasya̍ pū̠rṇagg​ sva̠dhām । tamupōda̍tiṣṭha̠nta-ma̍juhavuḥ । tēna̍-tra̠yīmūrja̠mavā̍-rundhata । tasmā̠-ttrirahna̍ḥ pa̠śava̠ḥ prēra̍tē । prā̠tassa̍gaṃ̠vē sā̠yam । asu̍rā apaśya-ñchama̠sa-ṅghṛ̠tasya̍ pū̠rṇagg​ sva̠dhām ॥ 53 ॥

tamupōda̍tiṣṭha̠nta-ma̍juhavuḥ । tēna̍ saṃvathsa̠ra ūrja̠mavā̍-rundhata ॥ tē dē̠vā a̍manyanta । a̠mī vā i̠dama̍bhūvann । yadva̠yagg​sma iti̍ । ta ē̠tāni̍ chāturmā̠syānya̍paśyann । tāni̠ nira̍vapann । tairē̠vaiṣā̠-ntāmūrja̍mavṛñjata । tatō̍ dē̠vā abha̍vann । parā-‘su̍rāḥ ॥ 54 ॥

ya-dyaja̍tē । yāmē̠va dē̠vā ūrja̍ma̠vāru̍ndhata । tā-ntēnā-va̍rundhē । ya-tpi̠tṛbhya̍ḥ ka̠rōti̍ । yāmē̠va pi̠tara̠ ūrja̍ma̠vā-ru̍ndhata । tā-ntēnā-va̍rundhē । yadā̍vasa̠thē-‘nna̠gṃ̠ hara̍nti । yāmē̠va ma̍nu̠ṣyā̍ ūrja̍ma̠vā-ru̍ndhata । tā-ntēnā-va̍rundhē । ya-ddakṣi̍ṇā̠-ndadā̍ti ॥ 55 ॥

yāmē̠va pa̠śava̠ ūrja̍ma̠vā-ru̍ndhata । tā-ntēnā-va̍rundhē । yachchā̍tu-rmā̠syai-ryaja̍tē । yāmē̠vāsu̍rā̠ ūrja̍ma̠-vāru̍ndhata । tā-ntēnā-va̍rundhē । bhava̍tyā̠tmanā̎ । parā̎-‘sya̠ bhrātṛ̍vyō bhavati ॥ vi̠rājō̠ vā ē̠ṣā vikrā̎mtiḥ । yachchā̍tu-rmā̠syāni̍ । vai̠śva̠dē̠vēnā̠smiँllō̠kē pratya̍tiṣṭhat । va̠ru̠ṇa̠ pra̠ghā̠sai-ra̠ntari̍kṣē । sā̠ka̠mē̠dhai-ra̠muṣmi̍ँllō̠kē । ē̠ṣa ha̠ tvāvaita-thsarva̍-mbhavati । ya ē̠vaṃ vi̠dvāg​śchā̍turmā̠syai-ryaja̍tē ॥ 56 ॥
(ma̠nu̠ṣyā̍ apaśyañchama̠sa-ṅghṛ̠tasya̍ pū̠rṇagg​ sva̠dhā-masu̍rā apaśyañchama̠sa-ṅghṛ̠tasya̍ pū̠rṇagg​ sva̠dhā-masu̍rā̠-dadā̎-tyatiṣṭha chcha̠tvāri̍ cha) (a. 9)

anuvākaṃ 10 – chāturmāsyapraśaṃsanam
a̠gnirvāva sa̍ṃvathsa̠raḥ । ā̠di̠tyaḥ pa̍rivathsa̠raḥ । cha̠ndramā̍ idāvathsa̠raḥ । vā̠yu-ra̍nuvathsa̠raḥ ॥ ya-dvai̎śvadē̠vēna̠ yaja̍tē । a̠gnimē̠va ta-thsa̍ṃvathsa̠ra-mā̎pnōti । tasmā̎-dvaiśvadē̠vēna̠ yaja̍mānaḥ । sa̠ṃva̠thsa̠rīṇāg̍ sva̠sti-māśā̎sta̠ ityāśā̍sīta ॥ ya-dva̍ruṇa praghā̠sai-ryaja̍tē । ā̠di̠tyamē̠va ta-tpa̍rivathsa̠ra-mā̎pnōti ॥ 57 ॥

tasmā̎-dvaruṇa-praghā̠sai-ryaja̍mānaḥ । pa̠ri̠va̠thsa̠rīṇāg̍ sva̠sti-māśā̎sta̠ ityāśā̍sīta । ya-thsā̍kamē̠dhai-ryaja̍tē । cha̠ndrama̍samē̠va tadi̍dāvathsa̠ra-mā̎pnōti । tasmā̎-thsākamē̠dhai-ryaja̍mānaḥ । i̠dā̠va̠thsa̠rīṇāg̍ sva̠sti-māśā̎sta̠ ityāśā̍sīta ॥ ya-tpi̍tṛ ya̠jñēna̠ yaja̍tē । dē̠vānē̠va tada̠nvava̍syati ॥ atha̠ vā a̍sya vā̠yuśchā̍-nuvathsa̠raśchā prī̍tā̠vuchChi̍ṣyētē । yachChu̍nāsī̠rīyē̍ṇa̠ yaja̍tē ॥ 58 ॥

vā̠yumē̠va tada̍nuvathsa̠ra-mā̎pnōti । tasmā̎-chChunāsī̠rīyē̍ṇa̠ yaja̍mānaḥ । a̠nu̠va̠thsa̠rīṇāg̍ sva̠sti-māśā̎sta̠ ityāśā̍sīta ॥ sa̠ṃva̠thsa̠raṃ vā ē̠ṣa ī̎phsa̠tītyā̍huḥ । yaśchā̍tu-rmā̠syai-ryaja̍ta̠ iti̍ । ē̠ṣa ha̠ tvai sa̍van​thsa̠ra-mā̎pnōti । ya ē̠vaṃ vi̠dvāg​ śchā̍turmā̠syai-ryaja̍tē ॥ viśvē̍ dē̠vā-ssama̍yajanta । tē̎-‘gnimē̠vāya̍janta । ta ē̠taṃ lō̠kama̍jayann ॥ 59 ॥

yasmi̍nna̠gniḥ । ya-dvai̎śvadē̠vēna̠ yaja̍tē । ē̠tamē̠va lō̠ka-ñja̍yati । yasmi̍nna̠gniḥ । a̠gnērē̠va sāyu̍jya̠mupai̍ti ॥ ya̠dā vai̎śvadē̠vēna̠ yaja̍tē । atha̍ saṃvathsa̠rasya̍ gṛ̠hapa̍ti-māpnōti । ya̠dā sa̍ṃvathsa̠rasya̍ gṛ̠hapa̍ti-mā̠pnōti̍ । atha̍ sahasrayā̠jina̍-māpnōti । ya̠dā sa̍hasrayā̠jina̍-mā̠pnōti̍ ॥ 60 ॥

atha̍ gṛhamē̠dhina̍-māpnōti । ya̠dā gṛ̍hamē̠dhina̍-mā̠pnōti̍ । athā̠gni-rbha̍vati । ya̠dā-‘gni-rbhava̍ti । atha̠ gaurbha̍vati । ē̠ṣā vai vai̎śvadē̠vasya̠ mātrā̎ । ē̠ta-dvā ē̠tēṣā̍mava̠mam । atō̍-‘tō̠ vā utta̍rāṇi̠ śrēyāgṃ̍si bhavanti । ya-dviśvē̍ dē̠vā-ssa̠maya̍janta । ta-dvai̎śvadē̠vasya̍ vaiśvadēva̠tvam ॥ 61 ॥

athā̍di̠tyō varu̍ṇa̠gṃ̠ rājā̍naṃ varuṇa praghā̠saira̍yajata । sa ē̠taṃ lō̠kama̍jayat । yasmi̍nnādi̠tyaḥ । ya-dva̍ruṇa-praghā̠sai-ryaja̍tē । ē̠tamē̠va lō̠ka-ñja̍yati । yasmi̍nnādi̠tyaḥ । ā̠di̠tyasyai̠va-sāyu̍jya̠-mupai̍ti । yadā̍di̠tyō varu̍ṇa̠gṃ̠ rājā̍naṃ varuṇa praghā̠sairaya̍jata । ta-dva̍ruṇa praghā̠sānā̎ṃ varuṇa praghāsa̠tvam ॥ atha̠ sōmō̠ rājā̠ Chandāgṃ̍si sākamē̠dhaira̍yajata ॥ 62 ॥

sa ē̠taṃ lō̠kama̍jayat । yasmigg̍ ścha̠ndramā̍ vi̠bhāti̍ । ya-thsā̍kamē̠dhai-ryaja̍tē । ē̠tamē̠va lō̠ka-ñja̍yati । yasmigg̍ ścha̠ndramā̍ vi̠bhāti̍ । cha̠ndrama̍sa ē̠va sāyu̍jya̠-mupai̍ti । sōmō̠ vai cha̠ndramā̎ḥ । ē̠ṣa ha̠ tvai sā̠kṣā-thsōma̍-mbhakṣayati । ya ē̠vaṃ vi̠dvān-thsā̍kamē̠dhai-ryaja̍tē । ya-thsōma̍ścha̠ rājā̠ Chandāgṃ̍si cha sa̠maidha̍nta ॥ 63 ॥

ta-thsā̍kamē̠dhānāgṃ̍ sākamēdha̠tvam ॥ atha̠rtava̍ḥ pi̠tara̍ḥ pra̠jāpa̍ti-mpi̠tara̍-mpitṛya̠jñē-nā̍yajanta । ta ē̠taṃ lō̠kama̍jayann । yasmi̍nnṛ̠tava̍ḥ । ya-tpi̍tṛya̠jñēna̠ yaja̍tē । ē̠tamē̠va lō̠ka-ñja̍yati । yasmi̍nnṛ̠tava̍ḥ । ṛ̠tū̠nāmē̠va sāyu̍jya̠-mupai̍ti । yad-ṛ̠tava̍ḥ pi̠tara̍ḥ pra̠jāpa̍ti-mpi̠tara̍-mpitṛya̠jñēnāya̍janta । ta-tpi̍tṛya̠jñasya̍ pitṛyajña̠tvam ॥ 64 ॥

athauṣa̍dhaya i̠ma-ndē̠va-ntrya̍mbakai-rayajanta̠ prathē̍ma̠hīti̍ । tatō̠ vai tā a̍prathanta । ya ē̠vaṃ vi̠dvāg​ strya̍mbakai̠-ryaja̍tē । pratha̍tē pra̠jayā̍ pa̠śubhi̍ḥ ॥ atha̍ vā̠yuḥ pa̍ramē̠ṣṭhinagṃ̍ śunāsī̠rīyē̍ṇāyajata । sa ē̠taṃ lō̠kama̍jayat । yasmi̍n-vā̠yuḥ । yachChu̍nāsī̠rīyē̍ṇa̠ yaja̍tē । ē̠tamē̠va lō̠ka-ñja̍yati । yasmi̍n-vā̠yuḥ ॥ 65 ॥

vā̠yōrē̠va sāyu̍jya̠-mupai̍ti ॥ bra̠hma̠vā̠dinō̍ vadanti । pra chā̍turmāsyayā̠jī-mī̍ya̠tā(3) na pramī̍ya̠tā(3) iti̍ । jīva̠nvā ē̠ṣa ṛ̠tūnapyē̍ti । yadi̍ va̠santā̎ pra̠mīya̍tē । va̠sa̠ntō bha̍vati । yadi̍ grī̠ṣmē grī̠ṣmaḥ । yadi̍ va̠r̠ṣāsu̍ va̠r̠ṣāḥ । yadi̍ śa̠radi̍ śa̠rat । yadi̠ hēma̍n. hēma̠ntaḥ । ṛ̠turbhū̠tvā sa̍ṃvathsa̠ramapyē̍ti । sa̠ṃva̠thsa̠raḥ pra̠jāpa̍tiḥ । pra̠jāpa̍ti̠rvā vaiṣaḥ ॥ 66 ॥
(pa̠ri̠va̠thsa̠ramā̎pnōti – śunāsī̠rīyē̍ṇa̠ yaja̍tē – ‘jayanth – sahasrayā̠jina̍mā̠pnōti̍ – vaiśvadēva̠tvagṃ – sā̍kamē̠dhaira̍yajata – sa̠maidha̍nta – pitṛyajña̠tvaṃ – ja̍yati̠ yasmi̍n vā̠yu–r hē̍ma̠nta strīṇī̍ cha) (a. 10)

(u̠bhayē̍ – yu̠vagṃ su̠rāma̠ – muda̍sthā̠n – ni vai – yasya̍ prātassava̠na – ēkai̍kō – ‘su̠ryam – pava̍mānaḥ – pra̠jā vai sa̠tramā̍sa – tā̠gnirvāva sa̍ṃvathsa̠rō daśa̍ )

(u̠bhayē̠ vā – uda̍sthā̠th – sarvā̍bhi–r maddhya̠tō – ‘tra̠ vāva – brā̎hma̠ṇēṣva – tha̍ gṛhamē̠dhina̠gṃ̠ ṣaṭ-thṣa̍ṣṭiḥ)

(u̠bhayē̠ – vāvaiṣaḥ)

॥ hari̍ḥ ōm ॥

॥ kṛṣṇa yajurvēdīya taittirīya brāhmaṇē prathamāṣṭakē chaturthaḥ prapāṭhaka-ssamāptaḥ ॥

1 kṛṣṇa yajurvēdīya taittirīya brāhmaṇē prathamāṣṭakaṃ