KYTB 1.3 Vajapeya Brahmanam – Krishna Yajurveda Taittiriya Brahmana Patha – Devasurah Samyatta

kṛṣṇa yajurvēdīya taittirīya brāhmaṇē prathamāṣṭakē tṛtīyaḥ prapāṭhakaḥ – vājapēyabrāhmaṇaṃ

ō-nnamaḥ paramātmanē, śrī mahāgaṇapatayē namaḥ,
śrī gurubhyō namaḥ । ha̠ri̠ḥ ōm ॥

anuvākaṃ 1 – punarādhēyaśēṣaḥ ājyabhāgayōrviśēṣaḥ

dē̠vā̠su̠rā-ssaṃ ya̍ttā āsann । tē dē̠vā vi̍ja̠ya-mu̍pa̠yanta̍ḥ । a̠gnīṣōma̍yō-stēja̠svinī̎sta̠nū-ssa-nnya̍dadhata । i̠damu̍ nō bhaviṣyati । yadi̍ nō jē̠ṣyantīti̍ । tēnā̠gnīṣōmā̠-vapā̎krāmatām । tē dē̠vā vi̠jitya̍ । a̠gnīṣōmā̠-vanvai̎chChann । tē̎-‘gni-manva̍vinda-nnṛ̠tuṣū-thsa̍nnam । tasya̠ vibha̍ktībhi-stēja̠svinī̎sta̠nū-ravā̍rundhata ॥ 1 ॥

tē sōma̠-manva̍vindann । tama̍ghnann । tasya̍ yathā-‘bhi̠jñāya̍-nta̠nū-rvya̍gṛhṇata । tē grahā̍ abhavann । ta-dgrahā̍ṇā-ṅgraha̠tvam । yasyai̠vaṃ vi̠duṣō̠ grahā̍ gṛ̠hyantē̎ । tasya̠ tvē̍va gṛ̍hī̠tāḥ ॥ nānā̎gnēya-mpunarā̠dhēyē̍ kuryāt । yadanā̎gnēya-mpunarā̠dhēyē̍ ku̠ryāt । vyṛ̍ddhamē̠va tat ॥ 2 ॥

anā̎gnēya̠ṃ vā ē̠ta-tkri̍yatē । ya-thsa̠midha̠-stanū̠napā̍tami̠ḍō ba̠r̠hi-rya̍jati ॥ u̠bhāvā̎gnē̠yā-vājya̍bhāgau syātām ॥ anā̎jyabhāgau-bhavata̠ ityā̍huḥ । yadu̠bhāvā̎gnē̠yāva̠nvañchā̠viti̍ । a̠gnayē̠ pava̍mānā̠yōtta̍ra-ssyāt । ya-tpava̍mānāya । tēnājya̍ bhāgaḥ । tēna̍ sau̠myaḥ ॥ budha̍nvatyāgnē̠ya-syājya̍-bhāgasya purō-‘nuvā̠kyā̍ bhavati ॥ 3 ॥

yathā̍ su̠pta-mbō̠dhaya̍ti । tā̠dṛgē̠va tat ॥ a̠gninya̍ktāḥ patnī saṃyā̠jānā̠mṛcha̍-ssyuḥ । tēnā̎gnē̠yagṃ sarva̍-mbhavati ॥ ē̠ka̠dhā tē̍ja̠svinī̎-ndē̠vatā̠-mupai̠tītyā̍huḥ । saina̍mīśva̠rā pra̠daha̠ iti̍ ॥ nēti̍ brūyāt । pra̠jana̍na̠ṃ vā a̠gniḥ । pra̠jana̍na-mē̠vōpai̠tīti̍ ॥ kṛ̠taya̍ju̠-ssambhṛ̍ta sambhāra̠ ityā̍huḥ ॥ 4 ॥

na sa̠bhṛntyā̎-ssambhā̠rāḥ । na yaju̍ḥ kā̠rya̍miti̍ ॥ athō̠ khalu̍ । sa̠bhṛntyā̍ ē̠va sa̍bhāṃ̠rāḥ । kā̠rya̍ṃ yaju̍ḥ । pu̠na̠rā̠dhēya̍sya̠ samṛ̍ddhyai ॥ tēnō̍pā̠gṃ̠śu pracha̍rati । ēṣya̍ iva̠ vā ē̠ṣaḥ । ya-tpu̍na-rā̠dhēya̍ḥ । yathō̍pā̠gṃ̠śu na̠ṣṭami̠chChati̍ ॥ 5 ॥

tā̠dṛgē̠va tat ॥ u̠chchai-ssvi̍ṣṭa̠kṛta̠mu-thsṛ̍jati । yathā̍ na̠ṣṭaṃ vi̠tvā prāhā̠yamiti̍ । tā̠dṛgē̠va tat ॥ ē̠ka̠dhā tē̍ja̠svinī̎-ndē̠vatā̠mupai̠tītyā̍huḥ । saina̍mīśva̠rā pra̠daha̠ iti̍ । tattathā̠ nōpai̍ti । pra̠yā̠jā̠nū̠yā̠jēṣvē̠va vibha̍ktīḥ kuryāt । ya̠thā̠pū̠rva-mājya̍bhāgau̠ syātā̎m । ē̠va-mpa̍tnī saṃyā̠jāḥ ॥ 6 ॥

ta-dvai̎śvāna̠rava̍t-pra̠jana̍navattara̠-mupai̠tīti̍ ॥ tadā̍huḥ । vyṛ̍ddha̠ṃ vā ē̠tat । anā̎gnēya̠ṃ vā ē̠ta-tkri̍yata̠ iti̍ ॥ nēti̍ brūyāt । a̠gni-mpra̍tha̠maṃ vibha̍ktīnāṃ yajati । a̠gnimu̍tta̠ma-mpa̍tnī saṃyā̠jānā̎m । tēnā̎gnē̠yam । tēna̠ samṛ̍ddha-ṅkriyata̠ iti̍ ॥ 7 ॥
(a̠ru̠ndha̠ – tai̠va ta-d- bha̍vati̠ – sambhṛ̍tasambhāra̠ ityā̍hu – ri̠chChati̍ – patnīsaṃyā̠jā – +nava̍ cha) ( ā1)

anuvākaṃ 2 – vājapēyasya vidhiḥ
dē̠vā vai yathā̠dar​śa̍ṃ ya̠jñānāha̍ranta । yō̎-‘gniṣṭō̠mam । ya u̠kthya̎m । yō̍-‘tirā̠tram । tē sa̠haiva sarvē̍ vāja̠pēya̍-mapaśyann । tē । a̠nyō̎nyasmai̠ nāti̍ṣṭhanta । a̠hama̠nēna̍ yajā̠ iti̍ । tē̎-‘bruvann । ā̠jima̠sya dhā̍vā̠mēti̍ ॥ 8 ॥

tasmi̍-nnā̠jima̍dhāvann । ta-mbṛha̠spati̠-ruda̍jayat । tēnā̍yajata । sa svārā̎jya-magachChat । tamindrō̎-‘bravīt । māma̠nēna̍ yāja̠yēti̍ । tēnēndra̍-mayājayat । sō-‘gra̍-ndē̠vatā̍nā̠-mparyai̎t । aga̍chCha̠-thsvārā̎jyam । ati̍ṣṭhantāsmai̠ jyaiṣṭhyā̍ya ॥ 9 ॥

ya ē̠vaṃ vi̠dvān. vā̍ja̠pēyē̍na̠ yaja̍tē । gachCha̍ti̠ svārā̎jyam । agragṃ̍ samā̠nānā̠-mparyē̍ti । tiṣṭha̍ntē-‘smai̠ jyaiṣṭhyā̍ya ॥ sa vā ē̠ṣa brā̎hma̠ṇasya̍ chai̠va rā̍ja̠nya̍sya cha ya̠jñaḥ ॥ taṃ vā ē̠taṃ vā̍ja̠pēya̠ ityā̍huḥ । vā̠jāpyō̠ vā ē̠ṣaḥ । vāja̠gg̠ hyē̍tēna̍ dē̠vā aiphsann̍ ॥ sōmō̠ vai vā̍ja̠pēya̍ḥ । yō vai sōma̍ṃ vāja̠pēya̠ṃ vēda̍ ॥ 10 ॥

vā̠jyē̍vaina̍-mpī̠tvā bha̍vati । ā-‘sya̍ vā̠jī jā̍yatē ॥ anna̠ṃ vai vā̍ja̠pēya̍ḥ । ya ē̠vaṃ vēda̍ । attyanna̎m । ā-‘syā̎nnā̠dō jā̍yatē ॥ brahma̠ vai vā̍ja̠pēya̍ḥ । ya ē̠vaṃ vēda̍ । atti̠ brahma̠ṇā-‘nna̎m । ā-‘sya̍ bra̠hmā jā̍yatē ॥ 11 ॥

vāgvai vāja̍sya prasa̠vaḥ । ya ē̠vaṃ vēda̍ । ka̠rōti̍ vā̠chā vī̠rya̎m । aina̍ṃ vā̠chā ga̍chChati । api̍vatī̠ṃ vācha̍ṃ vadati ॥ pra̠jāpa̍ti-rdē̠vēbhyō̍ ya̠jñān vyādi̍śat । sa ā̠tman vā̍ja̠pēya̍-madhatta । ta-ndē̠vā a̍bruvann । ē̠ṣa vāva ya̠jñaḥ । ya-dvā̍ja̠pēya̍ḥ ॥ 12 ॥

apyē̠va nō-‘trā̠stviti̍ । tēbhya̍ ē̠tā ujji̍tī̠ḥ prāya̍chChat ॥ tā vā ē̠tā ujji̍tayō̠ vyākhyā̍yantē । ya̠jñasya̍ sarva̠tvāya̍ । dē̠vatā̍nā̠-mani̍rbhāgāya ॥ dē̠vā vai brahma̍ṇa̠śchānna̍sya cha̠ śama̍la̠mapā̎ghnann । ya-dbrahma̍ṇa̠-śśama̍la̠māsī̎t । sā gāthā̍ nārāśa̠gg̠sya̍ bhavat । yadanna̍sya । sā surā̎ ॥ 13 ॥

tasmā̠-dgāya̍taścha ma̠ttasya̍ cha̠ na pra̍ti̠gṛhya̎m । ya-tpra̍tigṛhṇī̠yāt । śama̍la̠-mprati̍gṛhṇīyāt ॥ sarvā̠ vā ē̠tasya̠ vāchō ‘va̍ruddhāḥ । yō vā̍japēyayā̠jī । yā pṛ̍thi̠vyāṃ yā-‘gnau yā ra̍thanta̠rē । yā-‘ntari̍kṣē̠ yā vā̠yau yā vā̍madē̠vyē । yā di̠vi yā-”di̠tyē yā bṛ̍ha̠ti । yā-‘phsu yauṣa̍dhīṣu̠ yā vana̠spati̍ṣu ॥ tasmā̎-dvājapēyayā̠jyārtvi̍jīnaḥ । sarvā̠ hya̍sya̠ vāchō ‘va̍ruddhāḥ ॥ 14 ॥
(dhā̠vā̠mēti̠ – jyaiṣṭhyā̍ya̠ – vēda̍ – bra̠hmā jā̍yatē-vāja̠pēya̠ḥ-surā-”rtvi̍jīna̠ ēkaṃ̍ cha ) (a. 2)

anuvākaṃ 3 – tasyagrahaviśēṣāḥ
dē̠vā vai yada̠nyai-rgrahai̎-rya̠jñasya̠ nāvāru̍ndhata । tada̍tigrā̠hyai̍-rati̠gṛhyā-vā̍rundhata । tada̍tigrā̠hyā̍ṇā-matigrāhya̠tvam ॥ yada̍tigrā̠hyā̍ gṛ̠hyantē̎ । yadē̠vānyai-rgrahai̎-rya̠jñasya̠ nāva̍ru̠ndhē । tadē̠va taira̍ti̠gṛhyā-va̍rundhē ॥ pañcha̍ gṛhyantē । pāṅktō̍ ya̠jñaḥ । yāvā̍nē̠va ya̠jñaḥ । tamā̠ptvā ‘va̍rundhē ॥ 15 ॥

sarva̍ ai̠ndrā bha̍vanti । ē̠ka̠dhaiva yaja̍māna indri̠ya-nda̍dhati ॥ sa̠ptada̍śa prājāpa̠tyā grahā̍ gṛhyantē । sa̠pta̠da̠śaḥ pra̠jāpa̍tiḥ । pra̠jāpa̍tē̠-rāptyai̎ ॥ ēka̍ya̠rchā gṛ̍hṇāti । ē̠ka̠dhaiva yaja̍mānē vī̠rya̍-ndadhāti ॥ sō̠ma̠gra̠hāg​ścha̍ surāgra̠hāg​ścha̍ gṛhṇāti । ē̠ta-dvai dē̠vānā̎-mpara̠mamanna̎m । ya-thsōma̍ḥ ॥ 16 ॥

ē̠ta-nma̍nu̠ṣyā̍ṇām । ya-thsurā̎ । pa̠ra̠mēṇai̠vāsmā̍ a̠nnādyē̠nāva̍ra-ma̠nnādya̠-mava̍rundhē ॥ sō̠ma̠gra̠hā-ngṛ̍hṇāti । brahma̍ṇō̠ vā ē̠ta-ttēja̍ḥ । ya-thsōma̍ḥ । brahma̍ṇa ē̠va tēja̍sā̠ tējō̠ yaja̍mānē dadhāti । su̠rā̠gra̠hā-ngṛ̍hṇāti । anna̍sya̠ vā ē̠tachChama̍lam । ya-thsurā̎ ॥ 17 ॥

anna̍syai̠va śama̍lēna̠ śama̍la̠ṃ yaja̍mānā̠-dapa̍hanti ॥ sō̠ma̠gra̠hāg​ścha̍ surāgra̠hāg​ścha̍ gṛhṇāti । pumā̠n̠. vai sōma̍ḥ । strī surā̎ । ta-nmi̍thu̠nam । mi̠thu̠namē̠vāsya̠ ta-dya̠jñē ka̍rōti pra̠jana̍nāya । ā̠tmāna̍mē̠va sō̍magra̠hai-sspṛ̍ṇōti । jā̠yāgṃ su̍rā gra̠haiḥ । tasmā̎-dvājapēyayā̠jya̍muṣmi̍ँllō̠kē striya̠gṃ̠ sambha̍vati । vā̠ja̠pēyā̍-bhijita̠gg̠ hya̍sya ॥ 18 ॥

pūrvē̍ sōmagra̠hā gṛ̍hyantē । apa̍rē surāgra̠hāḥ । pu̠rō̠kṣagṃ sō̍magra̠hānth- sā̍dayati । pa̠śchā̠da̠kṣagṃ su̍rāgra̠hān । pā̠pa̠va̠sya̠sasya̠ vidhṛ̍tyai ॥ ē̠ṣa vai yaja̍mānaḥ । ya-thsōma̍ḥ । anna̠gṃ̠ surā̎ । sō̠ma̠gra̠hāg​ścha̍ surāgra̠hāg​ścha̠ vyati̍ṣajati । a̠nnādyē̍nai̠vaina̠ṃ vyati̍ṣajati ॥ 19 ॥

sa̠pṛñcha̍-sstha̠ sa-mmā̍ bha̠drēṇa̍ pṛ̠ṅktētyā̍ha । anna̠ṃ vai bha̠dram । a̠nnādyē̍nai̠vaina̠gṃ̠ sagṃsṛ̍jati ॥ anna̍sya̠ vā ē̠tachChama̍lam । ya-thsurā̎ । pā̠pmeva̠ khalu̠ vai śama̍lam । pā̠pmanā̠ vā ē̍namē̠tachChama̍lēna̠ vyati̍ṣajati । ya-thsō̍magra̠hāg​ścha̍ surāgra̠hāg​ścha̍ vyati̠ṣaja̍ti ॥ vi̠pṛcha̍-sstha̠ vi mā̍ pā̠pmanā̍ pṛ̠ṅktētyā̍ha । pā̠pmanai̠vaina̠gṃ̠ śama̍lēna̠ vyāva̍rtayati ॥ 20 ॥

tasmā̎-dvājapēyayā̠jī pū̠tō mēddhyō̍ dakṣi̠ṇya̍ḥ ॥ prāṃu-ddra̍vati sōmagra̠haiḥ । a̠mumē̠va tai-rlō̠ka-ma̠bhija̍yati । pra̠tyaṅkhsu̍rā gra̠haiḥ । i̠mamē̠va tai-rlō̠ka-ma̠bhija̍yati ॥ prati̍ṣṭhanti sōmagra̠haiḥ । yāva̍dē̠va sa̠tyam । tēna̍ sūyatē ॥ vā̠ja̠sṛdbhya̍-ssurāgra̠hān. ha̍ranti । anṛ̍tēnai̠va viśa̠gṃ̠ sagṃsṛ̍jati ॥ hi̠ra̠ṇya̠pā̠tra-mmadhō̎ḥ pū̠rṇa-nda̍dāti । ma̠dha̠vyō̍-‘sā̠nīti̍ ॥ ē̠ka̠dhā bra̠hmaṇa̠ upa̍ harati । ē̠ka̠dhaiva yaja̍māna̠ āyu̠stējō̍ dadhāti ॥ 21 ॥
(ā̠ptvā-‘va̍rundhē̠ – sōma̠ḥ – śama̍la̠ṃ ya-thsurā̠ – hya̍-syaina̠ṃ vyati̍ṣajati̠ – vyāva̍rtayati – sṛjati cha̠tvāri̍ cha ) (a. 3)

anuvākaṃ 4 – paśava-ssaptadaśa
bra̠hma̠vā̠dinō̍ vadanti । nāgni̍ṣṭō̠mō nōkthya̍ḥ । na ṣō̍ḍa̠śī nāti̍rā̠traḥ । atha̠ kasmā̎-dvāja̠pēyē̠ sarvē̍ yajñakra̠tavō-‘va̍ruddhyanta̠ iti̍ । pa̠śubhi̠riti̍ brūyāt ॥ ā̠gnē̠ya-mpa̠śumāla̍bhatē । a̠gni̠ṣṭō̠mamē̠va tēnāva̍rundhē । ai̠ndrā̠gnēnō̠kthya̎m । ai̠ndrēṇa̍ ṣōḍa̠śina̍-sstō̠tram । sā̠ra̠sva̠tyā-‘ti̍rā̠tram ॥ 22 ॥

mā̠ru̠tyā bṛ̍ha̠ta-sstō̠tram । ē̠tāva̍ntō̠ vai ya̍jñakra̠tava̍ḥ । tā-npa̠śubhi̍rē̠vā-va̍rundhē ॥ ā̠tmāna̍mē̠va spṛ̍ṇō-tyagniṣṭō̠mēna̍ । prā̠ṇā̠pā̠nā-vu̠kthyē̍na । vī̠ryagṃ̍ ṣōḍa̠śina̍-sstō̠trēṇa̍ । vācha̍-matirā̠trēṇa̍ । pra̠jā-mbṛ̍ha̠ta-sstō̠trēṇa̍ । i̠mamē̠va lō̠kama̠bhi ja̍yatyagniṣṭō̠mēna̍ । a̠ntari̍kṣa-mu̠kthyē̍na ॥ 23 ॥

su̠va̠rgaṃ lō̠kagṃ ṣō̍ḍa̠śina̍-sstō̠trēṇa̍ । dē̠va̠yānā̍nē̠va pa̠tha ārō̍ha-tyatirā̠trēṇa̍ । nākagṃ̍ rōhati bṛha̠ta-sstō̠trēṇa̍ । tēja̍ ē̠vātma-ndha̍tta āgnē̠yēna̍ pa̠śunā̎ । ōjō̠ bala̍maindrā̠gnēna̍ । i̠ndri̠ya-mai̠ndrēṇa̍ । vāchagṃ̍ sārasva̠tyā । u̠bhāvē̠va dē̍valō̠ka-ñcha̍ manuṣyalō̠ka-ñchā̠bhija̍yati māru̠tyā va̠śayā̎ ॥ sa̠ptada̍śa prājāpa̠tyā-npa̠śūnāla̍bhatē । sa̠pta̠da̠śaḥ pra̠jāpa̍tiḥ ॥ 24 ॥

pra̠jāpa̍tē̠rāptyai̎ ॥ śyā̠mā ēka̍rūpā bhavanti । ē̠vami̍va̠ hi pra̠jāpa̍ti̠-ssamṛ̍ddhyai ॥ tā-nparya̍gnikṛtā̠-nuthsṛ̍jati ॥ ma̠rutō̍ ya̠jñama̍jighāgṃsa-npra̠jāpa̍tēḥ । tēbhya̍ ē̠tā-mmā̍ru̠tīṃ va̠śāmāla̍bhata । tayai̠vainā̍-naśamayat ॥ mā̠ru̠tyā pra̠charya̍ । ē̠tān-thsañjña̍payēt । ma̠ruta̍ ē̠va śa̍mayi̠tvā ॥ 25 ॥

ē̠taiḥ pracha̍rati । ya̠jñasyāghā̍tāya ॥ ē̠ka̠dhā va̠pā ju̍hōti । ē̠ka̠dē̠va̠tyā̍ hi । ē̠tē । athō̍ ēka̠dhaiva yaja̍mānē vī̠rya̍-ndadhāti ॥ nai̠vā̠rēṇa̍ sa̠ptada̍śaśarāvē-ṇai̠tar​hi̠ pracha̍rati । ē̠ta-tpu̍rōḍāśā̠ hyē̍tē । athō̍ paśū̠nāmē̠va Chi̠dramapi̍dadhāti ॥ sā̠ra̠sva̠tyōtta̠mayā̠ pracha̍rati । vāg vai sara̍svatī । tasmā̎-tprā̠ṇānā̠ṃ vāgu̍tta̠mā । athō̎ pra̠jāpa̍tāvē̠va ya̠jña-mprati̍ṣṭhāpayati । pra̠jāpa̍ti̠r̠ hi vāk ॥ apa̍nnadatī bhavati । tasmā̎-nmanu̠ṣyā̎-ssarvā̠ṃ vācha̍ṃ vadanti ॥ 26 ॥
(a̠ti̠rā̠tra – ma̠ntari̍kṣamu̠kthyē̍na – pra̠jāpa̍tiḥ – śamayi̠tvōt – ta̠mayā̠ pracha̍rati̠ ṣaṭ cha̍) (a. 4)

anuvākaṃ 5 – rathayājanam
sā̠vi̠tra-ñju̍hōti̠ karma̍ṇaḥ karmaṇaḥ pu̠rastā̎t ॥ kasta-dvē̠dētyā̍huḥ । ya-dvā̍ja̠pēya̍sya̠ pūrva̠ṃ yadapa̍ra̠miti̍ । sa̠vi̠tṛpra̍sūta ē̠va ya̍thāpū̠rva-ṅkarmā̍ṇi karōti ॥ sava̍nē savanē juhōti । ā̠krama̍ṇamē̠va ta-thsētu̠ṃ yaja̍mānaḥ kurutē । su̠va̠rgasya̍ lō̠kasya̠ sama̍ṣṭyai ॥ vā̠chaspati̠-rvācha̍ma̠dya sva̍dāti na̠ ityā̍ha । vāgvai dē̠vānā̎-mpu̠rā-‘nna̍māsīt । vācha̍mē̠vāsmā̠ annagg̍ svadayati ॥ 27 ॥

indra̍sya̠ vajrō̍-‘si̠ vārtra̍ghna̠ iti̠ ratha̍mu̠pāva̍harati̠ viji̍tyai ॥ vāja̍sya̠ nu pra̍sa̠vē mā̠tara̍-mma̠hīmityā̍ha । yachchai̠vēyam । yachchā̠syāmadhi̍ । tadē̠vā-va̍rundhē । athō̠ tasmi̍nnē̠vōbhayē̠-‘bhiṣi̍chyatē ॥ a̠phsva̍ntara̠-mṛta̍ma̠phsu bhē̍ṣa̠jamityaśvā̎-npalpūlayati । a̠phsu vā aśva̍sya̠ tṛtī̍ya̠-mpravi̍ṣṭam । tada̍nu̠vēna̠nvava̍plavatē । yada̠phsu pa̍lpū̠laya̍ti ॥ 28 ॥

yadē̠vāsyā̠phsu pravi̍ṣṭam । tadē̠vāva̍rundhē ॥ ba̠hu vā aśvō̍-‘mē̠ddhya-mupa̍gachChati । yada̠phsu pa̍lpū̠laya̍ti । mēddhyā̍nē̠vainā̎n karōti ॥ vā̠yurvā̎ tvā̠ manu̍rvā̠ tvētyā̍ha । ē̠tā vā ē̠ta-ndē̠vatā̠ agrē̠ aśva̍mayuñjann । tābhi̍rē̠vainān̍. yunakti । sa̠vasyōjji̍tyai ॥ yaju̍ṣā yunakti̠ vyāvṛ̍ttyai ॥ 29 ॥

apā̎-nna pādāśuhēma̠nniti̠ sammā̎r​ṣṭi । mēddhyā̍nē̠vainā̎n karōti । athō̠ stautyē̠vainā̍nā̠jigṃ sa̍riṣya̠taḥ ॥ vi̠ṣṇu̠ kra̠mān kra̍matē । viṣṇu̍rē̠va bhū̠tvēmāँllō̠kā-na̠bhija̍yati ॥ vai̠śva̠dē̠vō vai ratha̍ḥ । a̠ṅkau nya̠ṅkāva̠bhitō̠ ratha̠ṃ yāvityā̍ha । yā ē̠va dē̠vatā̠ rathē̠ pravi̍ṣṭāḥ । tābhya̍ ē̠va nama̍skarōti । ā̠tmanō-‘nā̎rtyai ॥ aśa̍maratha-mbhāvukō-‘sya̠ rathō̍ bhavati । ya ē̠vaṃ vēda̍ ॥ 30 ॥
(sva̠da̠ya̠ti̠ – pa̠lpū̠laya̍ti̠ – vyāvṛ̍ttyā̠ – anā̎rtyai̠ dvē cha̍) (a. 5)

anuvākaṃ 6 – rathadhāvanam
dē̠vasyā̠hagṃ sa̍vi̠tuḥ pra̍sa̠vē bṛha̠spati̍nā vāja̠jitā̠ vāja̍-ñjēṣa̠mityā̍ha । sa̠vi̠tṛpra̍sūta ē̠va brahma̍ṇā̠ vāja̠mujja̍yati ॥ dē̠vasyā̠hagṃ sa̍vi̠tuḥ pra̍sa̠vē bṛha̠spati̍nā vāja̠jitā̠ var​ṣi̍ṣṭha̠-nnākagṃ̍ ruhēya̠mityā̍ha । sa̠vi̠tṛpra̍sūta ē̠va brahma̍ṇā̠ var​ṣi̍ṣṭha̠-nnākagṃ̍ rōhati ॥ chātvā̍lē rathacha̠kra-nnimi̍tagṃ rōhati । atō̠ vā aṅgi̍rasa utta̠mā-ssu̍va̠rgaṃ lō̠kamā̍yann । sā̠kṣādē̠va yaja̍māna-ssuva̠rgaṃ lō̠kamē̍ti ॥ āvē̎ṣṭayati । vajrō̠ vai ratha̍ḥ । vajrē̍ṇai̠va diśō̠-‘bhija̍yati ॥ 31 ॥

vā̠jinā̠gṃ̠ sāma̍ gāyatē । anna̠ṃ vai vāja̍ḥ । anna̍mē̠-vāva̍rundhē ॥ vā̠chō var​ṣma̍ dē̠vēbhyō-‘pā̎krāmat । ta-dvana̠spatī̠-nprāvi̍śat । saiṣā vāg-vana̠spati̍ṣu vadati । yā du̍ndu̠bhau । tasmā̎-ddundu̠bhi-ssarvā̠ vāchōti̍ vadati ॥ du̠ndu̠bhīn-thsa̠māghna̍nti । pa̠ra̠mā vā ē̠ṣā vāk ॥ 32 ॥

yā du̍ndu̠bhau । pa̠ra̠mayai̠va vā̠chā-‘va̍rā̠ṃ vācha̠ma-va̍rundhē । athō̍ vā̠cha ē̠va var​ṣma̠ yaja̍mā̠nō ‘va̍rundhē ॥ indrā̍ya̠ vācha̍ṃ vada̠tēndra̠ṃ vāja̍-ñjāpaya̠tēndrō̠ vāja̍majayi̠-dityā̍ha । ē̠ṣa vā ē̠tar​hīndra̍ḥ । yō yaja̍tē । yaja̍māna ē̠va vāja̠mujja̍yati ॥ sa̠ptada̍śa pravyā̠dhānā̠ji-ndhā̍vanti । sa̠pta̠da̠śagg​ stō̠tra-mbha̍vati । sa̠ptada̍śa saptadaśa dīyantē ॥ 33 ॥

sa̠pta̠da̠śaḥ pra̠jāpa̍tiḥ । pra̠jāpa̍tē̠-rāptyai̎ ॥ arvā̍-‘si̠ sapti̍rasi vā̠jya̍sītyā̍ha । a̠gnirvā arvā̎ । vā̠yu-ssapti̍ḥ । ā̠di̠tyō vā̠jī । ē̠tābhi̍rē̠vāsmai̍ dē̠vatā̍bhi-rdēvara̠thaṃ yu̍nakti ॥ pra̠ṣṭi̠vā̠hina̍ṃ yunakti । pra̠ṣṭi̠vā̠hī vai dē̍vara̠thaḥ । dē̠va̠ra̠thamē̠vāsmai̍ yunakti ॥ 34 ॥

vāji̍nō̠ vāja̍-ndhāvata̠ kāṣṭhā̎-ṅgachCha̠tētyā̍ha । su̠va̠rgō vai lō̠kaḥ kāṣṭhā̎ । su̠va̠rgamē̠va lō̠kaṃ ya̍nti ॥ su̠va̠rgaṃ vā ē̠tē lō̠kaṃ ya̍nti । ya ā̠ji-ndhāva̍nti ॥ prāñchō̍ dhāvanti । prāṃi̍va̠ hi su̍va̠rgō lō̠kaḥ ॥ cha̠ta̠sṛbhi̠ranu̍ mantrayatē । cha̠tvāri̠ Chandāgṃ̍si । Chandō̍bhirē̠vainā̎m-thsuva̠rgaṃ lō̠ka-ṅga̍mayati ॥ 35 ॥

pra vā ē̠tē̎-‘smāl-lō̠kāchchya̍vantē । ya ā̠ji-ndhāva̍nti । uda̍ñcha̠ āva̍rtantē । a̠smādē̠va tēna̍ lō̠kānnaya̍nti ॥ ra̠tha̠vi̠mō̠cha̠nīya̍-ñjuhōti̠ prati̍ṣṭhityai ॥ ā mā̠ vāja̍sya prasa̠vō ja̍gamyā̠dityā̍ha । anna̠ṃ vai vāja̍ḥ । anna̍mē̠vāva̍rundhē ॥ ya̠thā̠lō̠kaṃ vā ē̠ta ujja̍yanti । ya ā̠ji-ndhāva̍nti ॥ 36 ॥

kṛ̠ṣṇala̍-ṅkṛṣṇalaṃ vāja̠sṛdbhya̠ḥ praya̍chChati । yamē̠va tē vāja̍ṃ lō̠kamu̠jjaya̍nti । ta-mpa̍ri̠krīyā-va̍rundhē ॥ ē̠ka̠dhā bra̠hmaṇa̠ upa̍harati । ē̠ka̠dhaiva yaja̍mānē vī̠rya̍-ndadhāti ॥ dē̠vā vā ōṣa̍dhīṣvā̠jima̍yuḥ । tā bṛha̠spati̠-ruda̍jayat । sa nī̠vārā̠nnira̍vṛṇīta । tannī̠vārā̍ṇā-nnīvāra̠tvam ॥ nai̠vā̠raścha̠ru-rbha̍vati ॥ 37 ॥

ē̠tadvai dē̠vānā̎-mpara̠mamanna̎m । yannī̠vārā̎ḥ । pa̠ra̠mēṇai̠vāsmā̍ a̠nnādyē̠-nāva̍ra-ma̠nnādya̠mava̍rundhē ॥ sa̠ptada̍śaśarāvō bhavati । sa̠pta̠da̠śaḥ pra̠jāpa̍tiḥ । pra̠jāpa̍tē̠-rāptyai̎ ॥ kṣī̠rē bha̍vati । rucha̍mē̠vāsmi̍n-dadhāti ॥ sa̠rpiṣvā̎-nbhavati mēddhya̠tvāya̍ ॥ bā̠r̠ha̠spa̠tyō vā ē̠ṣa dē̠vata̍yā ॥ 38 ॥

yō vā̍ja̠pēyē̍na̠ yaja̍tē । bā̠r̠ha̠spa̠tya ē̠ṣa cha̠ruḥ ॥ aśvā̎m-thsariṣya̠ta-ssa̠sruṣa̠śchāva̍-ghrāpayati । yamē̠va tē vāja̍ṃ lō̠kamu̠jjaya̍nti । tamē̠vāva̍rundhē ॥ ajī̍jipata vanaspataya̠ indra̠ṃ vāja̠ṃ vimu̍chyaddhva̠miti̍ dundu̠bhīn. vimu̍ñchati । yamē̠va tē vāja̍ṃ lō̠kami̍ndri̠ya-ndu̍ndu̠bhaya̍ u̠jjaya̍nti । tamē̠vā-va̍rundhē ॥ 39 ॥
(a̠bhija̍yati̠ – vā ē̠ṣā vāg – dī̍yantē – ‘smai yunakti – gamayati̠ – ya ā̠ji-ndhāva̍nti – bhavati – dē̠vata̍yā̠ – +-‘ṣṭau cha̍) (a. 6)

anuvākaṃ 7 – yūpārōhaṇam
tā̠rpyaṃ yaja̍māna̠-mpari̍dhāpayati । ya̠jñō vai tā̠rpyam । ya̠jñēnai̠vaina̠gṃ̠ sama̍rdhayati । da̠rbha̠maya̠-mpari̍dhāpayati । pa̠vitra̠ṃ vai da̠rbhāḥ । pu̠nātyē̠vaina̎m । vāja̠ṃ vā ē̠ṣō-‘va̍ruruthsatē । yō vā̍ja̠pēyē̍na̠ yaja̍tē । ōṣa̍dhaya̠ḥ khalu̠ vai vāja̍ḥ । ya-dda̍rbha̠maya̍-mparidhā̠paya̍ti ॥ 40 ॥

vāja̠syāva̍-ruddhyai ॥ jāya̠ ēhi̠ suvō̠ rōhā̠vētyā̍ha । patni̍yā ē̠vaiṣa ya̠jñasyā̎n-vāra̠mbhō-‘na̍vachChityai ॥ sa̠ptada̍śā-ratni̠ryūpō̍ bhavati । sa̠pta̠da̠śaḥ pra̠jāpa̍tiḥ । pra̠jāpa̍tē̠rāptyai̎ ॥ tū̠pa̠ra-śchatu̍raśri-rbhavati ॥ gau̠dhū̠ma-ñcha̠ṣāla̎m । na vā ē̠tē vrī̠hayō̠ na yavā̎ḥ । ya-dgō̠dhūmā̎ḥ ॥ 41 ॥

ē̠vami̍va̠ hi pra̠jāpa̍ti̠-ssamṛ̍ddhyai । athō̍ a̠mumē̠vāsmai̍ lō̠kamanna̍vanta-ṅkarōti ॥ vāsō̍bhi-rvēṣṭayati । ē̠ṣa vai yaja̍mānaḥ । yadyūpa̍ḥ । sa̠rva̠dē̠va̠tya̍ṃ vāsa̍ḥ । sarvā̍bhirē̠vaina̍-ndē̠vatā̍bhi̠-ssama̍rdhayati । athō̍ ā̠krama̍ṇamē̠va tathsētu̠ṃ yaja̍mānaḥ kurutē । su̠va̠rgasya̍ lō̠kasya̠ sama̍ṣṭyai ॥ dvāda̍śa vājaprasa̠vīyā̍ni juhōti ॥ 42 ॥

dvāda̍śa̠ māsā̎-ssaṃvathsa̠raḥ । sa̠ṃva̠thsa̠ramē̠va prī̍ṇāti । athō̍ saṃvathsa̠ramē̠vāsmā̠ upa̍ dadhāti । su̠va̠rgasya̍ lō̠kasya̠ sama̍ṣṭyai ॥ da̠śabhi̠ḥ kalpai̍ rōhati । nava̠ vai puru̍ṣē prā̠ṇāḥ । nābhi̍rdaśa̠mī । prā̠ṇānē̠va ya̍thāsthā̠na-ṅka̍lpayi̠tvā । su̠va̠rgaṃ lō̠kamē̍ti । ē̠tāva̠dvai puru̍ṣasya̠ svam ॥ 43 ॥

yāva̍t-prā̠ṇāḥ । yāva̍dē̠vāsyāsti̍ । tēna̍ sa̠ha su̍va̠rgaṃ lō̠kamē̍ti ॥ suva̍rdē̠vāgṃ a̍ga̠nmētyā̍ha । su̠va̠rgamē̠va lō̠kamē̍ti । a̠mṛtā̍ abhū̠mētyā̍ha । a̠mṛta̍miva̠ hi su̍va̠rgō lō̠kaḥ । pra̠jāpa̍tēḥ pra̠jā a̍bhū̠mētyā̍ha । prā̠jā̠pa̠tyō vā a̠yaṃ lō̠kaḥ । a̠smādē̠va tēna̍ lō̠kānnaiti̍ ॥ 44 ॥

sama̠ha-mpra̠jayā̠ sa-mmayā̎ pra̠jētyā̍ha । ā̠śiṣa̍mē̠vaitā-māśā̎stē ॥ ā̠sa̠pu̠ṭai-rghna̍nti । anna̠ṃ vā i̠yam । a̠nnādyē̍nai̠vaina̠gṃ̠ sama̍rdhayanti । ūṣai̎-rghnanti । ē̠tē hi sā̠kṣādanna̎m । yadūṣā̎ḥ । sā̠kṣādē̠vaina̍-ma̠nnādyē̍na̠ sama̍rdhayanti ॥ pu̠rastā̎t-pra̠tyañcha̎-ṅghnanti ॥ 45 ॥

pu̠rastā̠ddhi pra̍tī̠chīna̠-manna̍ma̠dyatē̎ ॥ śī̠r̠ṣa̠tō ghna̍nti । śī̠r̠ṣa̠tō hyanna̍ma̠dyatē̎ ॥ di̠gbhyō ghna̍nti । di̠gbhya ē̠vāsmā̍ a̠nnādya̠-mava̍rundhatē ॥ ī̠śva̠rō vā ē̠ṣa parā̎m-pra̠dagha̍ḥ । yō yūpa̠gṃ̠ rōha̍ti ॥ hira̍ṇyama̠ddhya-va̍rōhati । a̠mṛta̠ṃ vai hira̍ṇyam । a̠mṛtagṃ̍ suva̠rgō lō̠kaḥ ॥ 46 ॥

a̠mṛta̍ ē̠va su̍va̠rgē lō̠kē prati̍ tiṣṭhati ॥ śa̠tamā̍na-mbhavati । śa̠tāyu̠ḥ puru̍ṣa-śśa̠tēndri̍yaḥ । āyu̍ṣyē̠vēndri̠yē prati̍ tiṣṭhati ॥ puṣṭyai̠ vā ē̠ta-drū̠pam । yada̠jā । tri-ssa̍ṃvathsa̠rasyā̠nyān-pa̠śū-npari̠ prajā̍yatē ॥ ba̠stā̠ji̠na-ma̠ddhyava̍ rōhati । puṣṭyā̍mē̠va pra̠jana̍nē̠ prati̍tiṣṭhati ॥ 47 ॥
(pa̠ri̠dhā̠paya̍ti – gō̠dhūmā̍ – juhōti̠ – svaṃ – naiti̍ – pra̠tyañja̍-ṅghnanti – lō̠kō – +nava̍ cha (a. 7)

anuvākaṃ 8 – annahōmāḥ, abhiṣēkaścha
sa̠ptānna̍-hō̠māñju̍hōti । sa̠pta vā annā̍ni । yāva̍ntyē̠vānnā̍ni । tānyē̠vāva̍rundhē । sa̠pta grā̠myā ōṣa̍dhayaḥ । sa̠ptāra̠ṇyāḥ । u̠bhayī̍ṣā̠-mava̍ruddhyai ॥ anna̍syā-nnasya juhōti । anna̍syānna̠syā-va̍ruddhyai ॥ ya-dvā̍japēyayā̠jya-na̍varuddhasyāśñī̠yāt ॥ 48 ॥

ava̍ruddhēna̠ vyṛ̍ddhyēta । sarva̍sya samava̠dāya̍ juhōti । ana̍varuddha̠-syāva̍ruddhyai ॥ audu̍mbarēṇa sru̠vēṇa̍ juhōti । ūrgvā anna̍-mudu̠mbara̍ḥ । ū̠rja ē̠vānnādya̠syāva̍ruddhyai ॥ dē̠vasya̍ tvā savi̠tuḥ pra̍sa̠va ityā̍ha । sa̠vi̠tṛ pra̍sūta ē̠vaina̠-mbrahma̍ṇā dē̠vatā̍bhi-ra̠bhiṣi̍ñchati ॥ anna̍syānnasyā̠bhiṣi̍ñchati । anna̍syānna̠syāva̍ruddhyai ॥ 49 ॥

pu̠rastā̎t-pra̠tyañcha̍-ma̠bhiṣi̍ñchati । pu̠rastā̠ddhi-pra̍tī̠chīna̠-manna̍ma̠dyatē̎ । śī̠r̠ṣa̠tō̍-‘bhiṣi̍ñchati । śī̠r̠ṣa̠tō hyanna̍ma̠dyatē̎ ॥ āmukhā̍da̠nvava̍ srāvayati । mu̠kha̠ta ē̠vāsmā̍ a̠nnādya̍-ndadhāti ॥ a̠gnēstvā̠ sāmrā̎jyēnā̠bhiṣi̍ñchā̠mītyā̍ha । ē̠ṣa vā a̠gnē-ssa̠vaḥ । tēnai̠vaina̍-ma̠bhiṣi̍ñchati । indra̍sya tvā̠ sāmrā̎jyēnā̠bhiṣi̍ñchā̠mītyā̍ha ॥ 50 ॥

i̠ndri̠ya-mē̠vāsmi̍-nnē̠tēna̍ dadhāti । bṛha̠spatē̎stvā̠ sāmrā̎jyēnā̠bhiṣi̍ñchā̠-mītyā̍ha । brahma̠ vai dē̠vānā̠-mbṛha̠spati̍ḥ । brahma̍ṇai̠vaina̍-ma̠bhiṣi̍ñchati ॥ sō̠ma̠gra̠hāg​śchā̍-vadānī̠yāni̍ cha̠rtvigbhya̠ upa̍ haranti । a̠mumē̠va tai-rlō̠ka-manna̍vanta-ṅkarōti । su̠rā̠gra̠hāg​śchā̍-navadānī̠yāni̍ cha vāja̠sṛdbhya̍ḥ । i̠mamē̠va tai-rlō̠ka-manna̍vanta-ṅkarōti । athō̍ u̠bhayī̎ṣvē̠vābhiṣi̍chyatē ॥ vi̠mā̠tha-ṅku̍rvatē vāja̠sṛta̍ḥ ॥ 51 ॥

i̠ndri̠yasyāva̍ruddhyai ॥ ani̍ruktābhiḥ prātassava̠nē stu̍vatē । ani̍ruktaḥ pra̠jāpa̍tiḥ । pra̠jāpa̍tē̠rāptyai̎ । vāja̍vatībhi̠-rmāddhya̍ndinē । anna̠ṃ vai vāja̍ḥ । anna̍mē̠vā-va̍rundhē । śi̠pi̠vi̠ṣṭava̍tībhi-stṛtīyasava̠nē । ya̠jñō vai viṣṇu̍ḥ । pa̠śava̠-śśipi̍ḥ । ya̠jña ē̠va pa̠śuṣu̠ prati̍ tiṣṭhati ॥ bṛ̠hadantya̍-mbhavati । anta̍mē̠vainagg̍ śri̠yai ga̍mayati ॥ 52 ॥
(a̠śñī̠yā – danna̍syānna̠syā va̍ruddhyā̠ – indra̍sya tvā̠ sāmrā̎jyēnā̠bhiṣi̍ñchā̠ mītyā̍ha-vāja̠sṛta̠ḥ – śipi̠ strīṇi̍ cha) (a. 8)

anuvākaṃ 9 – atigrāhyāḥ, pañchaindrāḥ
nṛ̠ṣada̠-ntvētyā̍ha । pra̠jā vai nṝn । pra̠jānā̍mē̠vaitēna̍ sūyatē । dru̠ṣada̠mityā̍ha । vana̠spata̍yō̠ vai dru । vana̠spatī̍nāmē̠vai tēna̍ sūyatē । bhu̠va̠na̠sada̠-mityā̍ha । ya̠dā vai vasī̍yā̠-nbhava̍ti । bhuva̍namaga̠nniti̠ vai tamā̍huḥ । bhuva̍namē̠vaitēna̍ gachChati ॥ 53 ॥

a̠phsu̠ṣada̍-ntvā ghṛta̠sada̠-mityā̍ha । a̠pāmē̠vaitēna̍ ghṛ̠tasya̍ sūyatē । vyō̠ma̠sada̠-mityā̍ha । ya̠dā vai vasī̍yā̠-nbhava̍ti । vyō̍māga̠nniti̠ vai tamā̍huḥ । vyō̍mai̠vaitēna̍ gachChati ॥ pṛ̠thi̠vi̠ṣada̍-ntvā-‘ntarikṣa̠sada̠-mityā̍ha । ē̠ṣāmē̠vaitēna̍ lō̠kānāgṃ̍ sūyatē । tasmā̎-dvājapē-yayā̠jī na ka-ñcha̠na pra̠tyava̍rōhati । apī̍va̠ hi dē̠vatā̍nāgṃ sū̠yatē̎ ॥ 54 ॥

nā̠ka̠sada̠-mityā̍ha । ya̠dāvai vasī̍yā̠-nbhava̍ti । nāka̍maga̠nniti̠ vai tamā̍huḥ । nāka̍mē̠vaitēna̍ gachChati ॥ yē grahā̎ḥ pañchaja̠nīnā̠ ityā̍ha । pa̠ñcha̠ja̠nānā̍-mē̠vaitēna̍ sūyatē ॥ a̠pāgṃ rasa̠mudva̍yasa̠-mityā̍ha । a̠pāmē̠vaitēna̠ rasa̍sya sūyatē । sūrya̍raśmigṃ sa̠mābhṛ̍ta̠-mityā̍ha saśukra̠tvāya̍ ॥ 55 ॥
(ga̠chCha̠ti̠ – sū̠yatē̠ – +nava̍ cha) (a. 9)

anuvākaṃ 10 – piṇḍapitṛyajñaḥ dar​śapūrṇamāsabrāhmaṇaśēṣaḥ
indrō̍ vṛ̠tragṃ ha̠tvā । asu̍rā-nparā̠bhāvya̍ । sō̍-‘māvā̠syā̎-mpratyāga̍chChat । tē pi̠tara̍ḥ pūrvē̠dyu-rāga̍chChann । pi̠tṝn. ya̠jñō̍-‘gachChat । ta-ndē̠vāḥ puna̍rayāchanta । tamē̎bhyō̠ na puna̍radaduḥ । tē̎-‘bruva̠n vara̍ṃ vṛṇāmahai । atha̍ va̠ḥ puna̍rdāsyāmaḥ । a̠smabhya̍mē̠va pū̎rvē̠dyuḥ kri̍yātā̠ iti̍ ॥ 56 ॥

tamē̎bhya̠ḥ puna̍radaduḥ । tasmā̎t-pi̠tṛbhya̍ḥ pūrvē̠dyuḥ kri̍yatē । ya-tpi̠tṛbhya̍ḥ pūrvē̠dyuḥ ka̠rōti̍ । pi̠tṛbhya̍ ē̠va ta-dya̠jña-nni̠ṣkrīya̠ yaja̍māna̠ḥ prata̍nutē ॥ sōmā̍ya pi̠tṛpī̍tāya sva̠dhā nama̠ ityā̍ha । pi̠turē̠vādhi̍ sōmapī̠thamava̍ rundhē । na hi pi̠tā pra̠mīya̍māṇa̠ āhai̠ṣa sō̍mapī̠tha iti̍ । i̠ndri̠yaṃ vai sō̍mapī̠thaḥ । i̠ndri̠yamē̠va sō̍mapī̠thamava̍-rundhē । tēna̎mdri̠yēṇa̍ dvi̠tīyā̎-ñjā̠yāma̠bhya̍śñutē ॥ 57 ॥

ē̠ta-dvai brāhma̍ṇa-mpu̠rā vā̍jaśrava̠sā vi̠dāma̍krann । tasmā̠-ttē dvēdvē̍ jā̠yē a̠bhyā̎kṣata । ya ē̠vaṃ vēda̍ । a̠bhi dvi̠tīyā̎-ñjā̠yāma̍śñutē ॥ a̠gnayē̍ kavya̠vāha̍nāya sva̠dhā nama̠ ityā̍ha । ya ē̠va pi̍tṛ̠ṇāma̠gniḥ । ta-mprī̍ṇāti ॥ ti̠sra āhu̍tī-rjuhōti ॥ trirnida̍dhāti ॥ ṣaṭ-thsampa̍dyantē ॥ 58 ॥

ṣaḍvā ṛ̠tava̍ḥ । ṛ̠tūnē̠va prī̍ṇāti ॥ tū̠ṣṇī-mmēkṣa̍ṇa̠-māda̍dhāti । asti̍ vā̠ hi ṣa̠ṣṭha ṛ̠turna vā̎ ॥ dē̠vān. vai pi̠tṝ-nprī̠tān । ma̠nu̠ṣyā̎ḥ pi̠tarō-‘nu̠ prapi̍patē । ti̠sra āhu̍tī-rjuhōti । trirnida̍dhāti । ṣaṭ-thsampa̍dyantē । ṣaḍvā ṛ̠tava̍ḥ ॥ 59 ॥

ṛ̠tava̠ḥ khalu̠ vai dē̠vāḥ pi̠tara̍ḥ । ṛ̠tūnē̠va dē̠vā-npi̠tṝ-nprī̍ṇāti । tānprī̠tān । ma̠nu̠ṣyā̎ḥ pi̠tarō-‘nu̠ prapi̍patē ॥ sa̠kṛ̠dā̠chChi̠nna-mba̠r̠hi-rbha̍vati । sa̠kṛdi̍va̠ hi pi̠tara̍ḥ ॥ trirnida̍dhāti । tṛ̠tīyē̠ vā i̠tō lō̠kē pi̠tara̍ḥ । tānē̠va prī̍ṇāti ॥ parā̠ṃāva̍rtatē ॥ 60 ॥

hlīkā̠ hi pi̠tara̍ḥ ॥ oṣmaṇō̎ vyā̠vṛta̠ upā̎stē । ū̠ṣmabhā̍gā̠ hi pi̠tara̍ḥ ॥ bra̠hma̠vā̠dinō̍ vadanti । prāśyāṃ(3)na prāśyā(3)miti̍ । ya-tprā̎śñī̠yāt । janya̠manna̍madyāt । pra̠māyu̍ka-ssyāt । yanna prā̎śñī̠yāt । aha̍vi-ssyāt ॥ 61 ॥

pi̠tṛbhya̠ āvṛ̍śchyēta । a̠va̠ghrēya̍mē̠va । tannēva̠ prāśi̍ta̠-nnēvāprā̍śitam ॥ vī̠raṃ vā̠ vai pi̠tara̍ḥ pra̠yantō̠ hara̍nti । vī̠raṃ vā̍ dadati । da̠śā-ñChi̍natti । hara̍ṇabhāgā̠ hi pi̠tara̍ḥ । pi̠tṝnē̠va ni̠rava̍dayatē ॥ utta̍ra̠ āyu̍ṣi̠ lōma̍ Chindīta । pi̠tṛ̠ṇāg​ hyē̍tar​hi̠ nēdī̍yaḥ ॥ 62 ॥

nama̍skarōti । na̠ma̠skā̠rō hi pi̍tṛ̠ṇām ॥ namō̍ vaḥ pitarō̠ rasā̍ya । namō̍ vaḥ pitara̠-śśuṣmā̍ya । namō̍ vaḥ pitarō jī̠vāya̍ । namō̍ vaḥ pitara-ssva̠dhāyai̎ । namō̍ vaḥ pitarō ma̠nyavē̎ । namō̍ vaḥ pitarō ghō̠rāya̍ । pita̍rō̠ namō̍ vaḥ । ya ē̠tasmi̍n ँlō̠kē stha ॥ 63 ॥

yu̠ṣmāg​stē-‘nu̍ । yē̎-‘smiँllō̠kē । mā-ntē nu̍ । ya ē̠tasmi̍ँllō̠kē stha । yū̠ya-ntēṣā̠ṃ vasi̍ṣṭhā bhūyāsta । yē̎-‘smiँllō̠kē । a̠ha-ntēṣā̠ṃ vasi̍ṣṭhō bhūyāsa̠mityā̍ha । vasi̍ṣṭha-ssamā̠nānā̎-mbhavati । ya ē̠vaṃ vi̠dvān-pi̠tṛbhya̍ḥ ka̠rōti̍ ॥ ē̠ṣa vai ma̍nu̠ṣyā̍ṇāṃ ya̠jñaḥ ॥ 64 ॥

dē̠vānā̠ṃ vā ita̍rē ya̠jñāḥ । tēna̠ vā ē̠ta-tpi̍tṛlō̠kē cha̍rati ॥ ya-tpi̠tṛbhya̍ḥ ka̠rōti̍ । sa ī̎śva̠raḥ pramē̍tōḥ । prā̠jā̠pa̠tyaya̠rchā puna̠raiti̍ । ya̠jñō vai pra̠jāpa̍tiḥ । ya̠jñēnai̠va sa̠ha puna̠raiti̍ । na pra̠māyu̍kō bhavati ॥ pi̠tṛ̠lō̠kē vā ē̠ta-dyaja̍mānaścharati । ya-tpi̠tṛbhya̍ḥ ka̠rōti̍ । sa ī̎śva̠ra ārti̠mārtō̎ḥ । pra̠jāpa̍ti̠-stvāvaina̠-ntata̠ unnē̍tumar​ha̠tītyā̍huḥ । ya-tprā̍jāpa̠tyaya̠rchā puna̠raiti̍ । pra̠jāpa̍tirē̠vaina̠-ntata̠ unna̍yati । nārti̠mārchCha̍ti̠ yaja̍mānaḥ ॥ 65 ॥
(itya̍ – śñutē – padyantē – padyantē̠ ṣaḍvā ṛ̠tavō̍ – varta̠tē-‘ – ha̍vi-ssyā̠n – nēdī̍ya̠ḥ – stha – ya̠jñō – yaja̍mānaścharati̠ ya-tpi̠tṛbhya̍ḥ ka̠rōti̠ pañcha̍ cha) (a. 10)

(dē̠vā̠su̠rā a̠gnīṣōma̍yō–r dē̠vā vai yathā̠ dar​śa̍ṃ – dē̠vā vai yada̠nyai-rgrahai̎–r brahmavā̠dinō̠ nāgni̍ṣṭō̠mō na – sā̍vi̠traṃ – dē̠vasyā̠haṃ – tā̠rpyagṃ – sa̠ptānna̍hō̠mān – nṛ̠ṣadaṃ̠ – tvēndrō̍ vṛ̠tragṃ ha̠tvā daśa̍)

(dē̠vā̠su̠rā – vā̠jyē̍vaina̠ṃ – tasmā̎-dvājapēyayā̠jī – dē̠vasyā̠haṃ – ँvāja̠syāva̍ruddhyā- indri̠yamē̠vāsmi̠n̠. – hlīkā̠ hi pi̠tara̠ḥ pañcha̍ṣaṣṭiḥ)

(dē̠vā̠su̠rā – yaja̍mānaḥ)

॥ hari̍ḥ ōm ॥

॥ kṛṣṇa yajurvēdīya taittirīya brāhmaṇē prathamāṣṭakē tṛtīyaḥ prapāṭhaka-ssamāptaḥ ॥