KYTA 4 Pravargya Mantrah – Krishna Yajurveda Taittiriya Aranyaka Patha – Yunjate Manah

kṛṣṇa yajurvēdīya taittirīya āraṇyakē chaturthaḥ prapāṭhakaḥ – pravargya mantrāḥ

ō-nnamaḥ paramātmanē, śrī mahāgaṇapatayē namaḥ,
śrī gurubhyō namaḥ । ha̠ri̠ḥ ōm ॥

anuvākaṃ 1
namō̍ vā̠chē yā chō̍di̠tā yā chānu̍ditā̠ tasyai̍ vā̠chē namō̠ namō̍ vā̠chē namō̍ vā̠chaspata̍yē̠ nama̠ ṛṣi̍bhyō mantra̠kṛdbhyō̠ mantra̍patibhyō̠ mā māmṛṣa̍yō mantra̠kṛtō̍ mantra̠pata̍ya̠ḥ parā̍du̠rmā-‘hamṛṣī̎-nmantra̠kṛtō̍ mantra̠patī̠-nparā̍dāṃ vaiśvadē̠vīṃ vācha̍mudyāsagṃ śi̠vāmada̍stā̠-ñjuṣṭā̎-ndē̠vēbhya̠-śśarma̍ mē̠ dyau-śśarma̍ pṛthi̠vī śarma̠ viśva̍mi̠da-ñjaga̍t ।
śarma̍ cha̠ndraścha̠ sūrya̍ścha̠ śarma̍ brahmaprajāpa̠tī ॥
bhū̠taṃ va̍diṣyē̠ bhuva̍naṃ vadiṣyē̠ tējō̍ vadiṣyē̠ yaśō̍ vadiṣyē̠ tapō̍ vadiṣyē̠ brahma̍ vadiṣyē sa̠tyaṃ va̍diṣyē̠ tasmā̍ a̠hami̠da-mu̍pa̠stara̍ṇa̠-mupa̍stṛṇa upa̠stara̍ṇa-mmē pra̠jāyai̍ paśū̠nā-mbhū̍yā-dupa̠stara̍ṇama̠ha-mpra̠jāyai̍ paśū̠nā-mbhū̍yāsa̠-mprāṇā̍pānau mṛ̠tyōrmā̍ pāta̠-mprāṇā̍pānau̠ mā mā̍ hāsiṣṭa̠-mmadhu̍ maniṣyē̠ madhu̍ janiṣyē̠ madhu̍ vakṣyāmi̠ madhu̍ vadiṣyāmi̠ madhu̍matī-ndē̠vēbhyō̠ vācha̍mudyāsagṃ śuśrū̠ṣēṇyā̎-mmanu̠ṣyē̎bhya̠sta-mmā̍ dē̠vā a̍vantu śō̠bhāyai̍ pi̠tarō-‘nu̍madantu ॥
ōṃ śānti̠-śśānti̠-śśānti̍ḥ ॥ 1 ॥ (a. 1)

anuvākaṃ 2
yu̠ñjatē̠ mana̍ u̠ta yu̍ñjatē̠ dhiya̍ḥ । viprā̠ vipra̍sya bṛha̠tō vi̍pa̠śchita̍ḥ । vi hōtrā̍ dadhē vayunā̠vidēka̠ it । ma̠hī dē̠vasya̍ savi̠tuḥ pari̍ṣṭutiḥ ॥ dē̠vasya̍ tvā savi̠tuḥ pra̍sa̠vē । a̠śvinō̎-rbā̠hubhyā̎m ।
pū̠ṣṇō hastā̎bhyā̠māda̍dē ॥ abhri̍rasi̠ nāri̍rasi ।
a̠ddhva̠ra̠kṛ-ddē̠vēbhya̍ḥ । utti̍ṣṭha brahmaṇaspatē ॥ 2 ॥

dē̠va̠yanta̍stvēmahē । upa̠ praya̍ntu ma̠ruta̍-ssu̠dāna̍vaḥ । indra̍ prā̠śūrbha̍vā̠ sachā̎ ॥ praitu̠ brahma̍ṇa̠spati̍ḥ । pra dē̠vyē̍tu sū̠nṛtā̎ ।
achChā̍ vī̠rannarya̍-mpa̠ṅktirā̍dhasam । dē̠vā ya̠jñanna̍yantu naḥ ॥ dēvī̎ dyāvāpṛthivī̠ anu̍ mē magṃsāthām । ṛ̠ddhyāsa̍ma̠dya । ma̠khasya̠ śira̍ḥ ॥ 3 ॥

ma̠khāya̍ tvā । ma̠khasya̍ tvā śī̠r​ṣṇē ॥ iya̠tyagra̍ āsīḥ ।
ṛ̠ddhyāsa̍ma̠dya । ma̠khasya̠ śira̍ḥ । ma̠khāya̍ tvā । ma̠khasya̍ tvā śī̠r​ṣṇē ॥ dēvī̎-rvamrīra̠sya bhū̠tasya̍ prathamajā ṛtāvarīḥ ॥ ṛ̠ddhyāsa̍ma̠dya । ma̠khasya̠ śira̍ḥ ॥ 4 ॥

ma̠khāya̍ tvā । ma̠khasya̍ tvā śī̠r​ṣṇē ॥ indra̠syaujō̍-‘si ।
ṛ̠ddhyāsa̍ma̠dya । ma̠khasya̠ śira̍ḥ । ma̠khāya̍ tvā । ma̠khasya̍ tvā śī̠r​ṣṇē ॥ a̠gni̠jā a̍si pra̠jāpa̍tē̠ rēta̍ḥ । ṛ̠ddhyāsa̍ma̠dya । ma̠khasya̠ śira̍ḥ ॥ 5 ॥

ma̠khāya̍ tvā । ma̠khasya̍ tvā śī̠r​ṣṇē ॥ āyu̍-rdhēhi prā̠ṇa-ndhē̍hi । a̠pā̠na-ndhē̍hi vyā̠na-ndhē̍hi । chakṣu̍-rdhēhi̠ śrōtra̍-ndhēhi । manō̍ dhēhi̠ vācha̍-ndhēhi । ā̠tmāna̍-ndhēhi prati̠ṣṭhā-ndhē̍hi ।
mā-ndhē̍hi̠ mayi̍ dhēhi ॥ madhu̍ tvā madhu̠lā ka̍rōtu ।
ma̠khasya̠ śirō̍-‘si ॥ 6 ॥

ya̠jñasya̍ pa̠dē stha̍ḥ । gā̠ya̠trēṇa̍ tvā̠ Chanda̍sā karōmi । traiṣṭu̍bhēna tvā̠ Chanda̍sā karōmi । jāga̍tēna tvā̠ Chanda̍sā karōmi ॥ ma̠khasya̠ rāsnā̍-‘si । adi̍tistē̠ bila̍ṅgṛhṇātu । pāṅktē̍na̠ Chanda̍sā ।
sūrya̍sya̠ hara̍sā śrāya । ma̠khō̍-‘si ॥ 7 ॥
(pa̠tē̠ – śira̍ – ṛtāvarīr-ṛddhyāsa̍ma̠dya ma̠khasya̠ śira̠ḥ – śira̠ḥ – śirō̍-‘si̠ – +nava̍ cha) (a. 2)

(iya̍ti̠ dēvī̠rindra̠syaujō̎-‘syagni̠jā a̠syāyu̍rdhēhi prā̠ṇa-mpañcha̍)

anuvākaṃ 3
vṛṣṇō̠ aśva̍sya ni̠ṣpada̍si । varu̍ṇastvā dhṛ̠tavra̍ta̠ ādhū̍payatu । mi̠trāvaru̍ṇayōr
dhru̠vēṇa̠ dharma̍ṇā ॥ a̠rchiṣē̎ tvā । śō̠chiṣē̎ tvā ।
jyōti̍ṣē tvā । tapa̍sē tvā ॥ a̠bhīma-mma̍hi̠nā diva̎m ।
mi̠trō ba̍bhūva sa̠prathā̎ḥ । u̠ta śrava̍sā pṛthi̠vīm ॥ 8 ॥
mi̠trasya̍ char​ṣaṇī̠dhṛta̍ḥ ।
śravō̍ dē̠vasya̍ sāna̠sim । dyu̠mnañchi̠traśra̍vastamam ॥ siddhyai̎ tvā । dē̠vastvā̍ savi̠tōdva̍patu ।
su̠pā̠ṇi-ssva̍ṅgu̠riḥ । su̠bā̠huru̠ta śaktyā̎ ॥ apa̍dyamānaḥ pṛthi̠vyām । āśā̠ diśa̠ ā pṛ̍ṇa । utti̍ṣṭha bṛ̠ha-nbha̍va ॥ 9 ॥

ū̠rdhvasti̍ṣṭha dhru̠vastvam ॥ sūrya̍sya tvā̠ chakṣu̠ṣā-‘nvī̎kṣē । ṛ̠javē̎ tvā । sā̠dhavē̎ tvā । su̠kṣi̠tyai tvā̠ bhūtyai̎ tvā ॥
i̠dama̠hama̠mumā̍muṣyāya̠ṇaṃ vi̠śā pa̠śubhi̍-rbrahmavarcha̠sēna̠ paryū̍hāmi ।
gā̠ya̠trēṇa̍ tvā̠ Chanda̠sā ”chChṛ̍ṇadmi । traiṣṭu̍bhēna tvā̠ Chanda̠sā ”chChṛ̍ṇadmi ।
jāga̍tēna tvā̠ Chanda̠sā ”chChṛ̍ṇadmi । Chṛ̠ṇattu̍ tvā̠ vāk । Chṛ̠ṇattu̠ tvōrk । Chṛ̠ṇattu̍ tvā ha̠viḥ ।
Chṛ̠ndhi vācha̎m । Chṛ̠ndhyūrja̎m । Chṛ̠ndhi ha̠viḥ ॥
dēva̍ puraśchara sa̠ghyāsa̍ntvā ॥ 10 ॥
(pṛ̠thi̠vīm – bha̍va̠ – vā-khṣaṭcha̍) (a. 3)

anuvākaṃ 4
brahma̍-nprava̠rgyē̍ṇa̠ pracha̍riṣyāmaḥ ।
hōta̍-rgha̠rmama̠bhiṣṭu̍hi । agnī̠drauhi̍ṇau purō̠ḍāśā̠vadhi̍śraya । prati̍prasthāta̠rviha̍ra ।
prastō̍ta̠-ssāmā̍ni gāya ॥ yaju̍ryukta̠gṃ̠ sāma̍bhi̠rākta̍khantvā । viśvai̎-rdē̠vairanu̍mata-mma̠rudbhi̍ḥ । dakṣi̍ṇābhi̠ḥ prata̍ta-mpārayi̠ṣṇum ।
stubhō̍ vahantu sumana̠syamā̍nam । sa nō̠ rucha̍ndhē̠hyahṛ̍ṇīyamānaḥ । bhūrbhuva̠ssuva̍ḥ ।
ōmindra̍vanta̠ḥ pracha̍rata ॥ 11 ॥
(ahṛ̍ṇīyamānō̠ dvē cha̍) (a. 4)

anuvākaṃ 5
brahma̠-npracha̍riṣyāmaḥ । hōta̍-rgha̠rmama̠bhiṣṭu̍hi ॥ ya̠māya̍ tvā ma̠khāya̍ tvā । sūrya̍sya̠ hara̍sē tvā ॥ prā̠ṇāya̠ svāhā̎ vyā̠nāya̠ svāhā̍ ‘pā̠nāya̠ svāhā̎ ।
chakṣu̍ṣē̠ svāhā̠ śrōtrā̍ya̠ svāhā̎ । mana̍sē̠ svāhā̍ vā̠chē sara̍svatyai̠ svāhā̎ । dakṣā̍ya̠ svāhā̠ krata̍vē̠ svāhā̎ । ōja̍sē̠ svāhā̠ balā̍ya̠ svāhā̎ ॥
dē̠vastvā̍ savi̠tā maddhvā̍-‘naktu ॥ 12 ॥

pṛ̠thi̠vī-ntapa̍sastrāyasva । a̠rchira̍si śō̠chira̍si̠ jyōti̍rasi̠ tapō̍-‘si । sagṃsī̍dasva ma̠hāgṃ a̍si । śōcha̍sva dēva̠vīta̍maḥ । vi dhū̠mama̍gnē aru̠ṣa-mmi̍yēddhya । sṛ̠ja pra̍śasta dar​śa̠tam ॥
a̠ñjanti̠ ya-mpra̠thaya̍ntō̠ na viprā̎ḥ । va̠pāva̍nta̠nnāgninā̠ tapa̍ntaḥ ।
pi̠turna pu̠tra upa̍si̠ prēṣṭha̍ḥ । ā gha̠rmō a̠gnimṛ̠taya̍nnasādīt ॥ 13 ॥

a̠nā̠dhṛ̠ṣyā pu̠rastā̎t । a̠gnērādhi̍patyē ।
āyu̍rmē dāḥ । pu̠trava̍tī dakṣiṇa̠taḥ । indra̠syādhi̍patyē । pra̠jā-mmē̍ dāḥ । su̠ṣadā̍ pa̠śchāt । dē̠vasya̍ savi̠turādhi̍patyē । prā̠ṇa-mmē̍ dāḥ । āśru̍tiruttara̠taḥ ॥ 14 ॥

mi̠trāvaru̍ṇayō̠rādhi̍patyē । śrōtra̍-mmē dāḥ । vidhṛ̍tiru̠pari̍ṣṭāt । bṛha̠spatē̠rādhi̍patyē ।
brahma̍ mē dāḥ, kṣa̠tra-mmē̍ dāḥ । tējō̍ mē dhā̠ varchō̍ mē dhāḥ । yaśō̍ mē dhā̠ stapō̍ mē dhāḥ ।
manō̍ mē dhāḥ ॥ manō̠raśvā̍-‘si̠ bhūri̍putrā ।
viśvā̎bhyō mā nā̠ṣṭrābhya̍ḥ pāhi ॥ 15 ॥

sū̠pa̠sadā̍ mē bhūyā̠ mā mā̍ higṃsīḥ ॥ tapō̠ ṣva̍gnē̠ anta̍rāgṃ a̠mitrān̍ ।
tapā̠śagṃsa̍mara̠ruṣa̠ḥ para̍sya । tapā̍ vasō chikitā̠nō a̠chittān̍ । vi tē̍ tiṣṭhantāma̠jarā̍ a̠yāsa̍ḥ ॥ chita̍-sstha pari̠chita̍ḥ । svāhā̍ ma̠rudbhi̠ḥ pari̍śrayasva । mā a̍si । pra̠mā a̍si । pra̠ti̠mā a̍si ॥ 16 ॥

sa̠mmā a̍si । vi̠mā a̍si । u̠nmā a̍si । a̠ntari̍kṣasyānta̠rdhira̍si ॥
diva̠ntapa̍sastrāyasva । ā̠bhi-rgī̠rbhi-ryadatō̍ na ū̠nam ।
āpyā̍yaya harivō̠ vardha̍mānaḥ । ya̠dā stō̠tṛbhyō̠ mahi̍ gō̠trā ru̠jāsi̍ । bhū̠yi̠ṣṭha̠bhājō̠ adha̍ tē syāma ॥ śu̠krantē̍ a̠nya-dya̍ja̠tantē̍ a̠nyat ॥ 17 ॥

viṣu̍rūpē̠ aha̍nī̠ dyauri̍vāsi । viśvā̠ hi mā̠yā ava̍si svadhāvaḥ । bha̠drā tē̍ pūṣanni̠ha rā̠tira̍stu ॥ ar​ha̍-nbibhar​ṣi̠ sāya̍kāni̠ dhanva̍ । ar​ha̍nni̠ṣkaṃ ya̍ja̠taṃ vi̠śvarū̍pam । ar​ha̍nni̠da-nda̍yasē̠ viśva̠-mabbhu̍vam । na vā ōjī̍yō rudra̠ tvada̍sti ॥ gā̠ya̠trama̍si । traiṣṭu̍bhamasi । jāga̍tamasi । madhu̠ madhu̠ madhu̍ ॥ 18 ॥
(a̠na̠ – ktva̠sā̠dī̠ – du̠tta̠ra̠taḥ – pā̍hi – prati̠mā a̍si – yaja̠tantē̍ a̠nyaj – jāga̍tama̠syēka̍-ñcha) (a. 5)

anuvākaṃ 6
daśa̠ prāchī̠rdaśa̍ bhāsi dakṣi̠ṇā । daśa̍ pra̠tīchī̠rdaśa̍ bhā̠syudī̍chīḥ । daśō̠rdhvā bhā̍si sumana̠syamā̍naḥ । sa nō̠ rucha̍ndhē̠hyahṛ̍ṇīyamānaḥ ॥
a̠gniṣṭvā̠ vasu̍bhiḥ pu̠rastā̎-drōchayatu gāya̠trēṇa̠ Chanda̍sā । sa mā̍ ruchi̠tō rō̍chaya ॥ indra̍stvā ru̠drai-rda̍kṣiṇa̠tō rō̍chayatu̠ traiṣṭu̍bhēna̠ Chanda̍sā ।
sa mā̍ ruchi̠tō rō̍chaya । varu̍ṇastvā-”di̠tyaiḥ pa̠śchā-drō̍chayatu̠ jāga̍tēna̠ Chanda̍sā ।
sa mā̍ ruchi̠tō rō̍chaya ॥ 19 ॥

dyu̠tā̠nastvā̍ māru̠tō ma̠rudbhi̍ruttara̠tō rō̍chaya̠tvānu̍ṣṭubhēna̠ Chanda̍sā । sa mā̍ ruchi̠tō rō̍chaya । bṛha̠spati̍stvā̠ viśvai̎-rdē̠vairu̠pari̍ṣṭā-drōchayatu̠ pāṅktē̍na̠ Chanda̍sā । sa mā̍ ruchi̠tō rō̍chaya ॥ rō̠chi̠tastva-ndē̍va gharma dē̠vēṣvasi̍ ।
rō̠chi̠ṣī̠yāha-mma̍nu̠ṣyē̍ṣu ॥
samrā̎ḍ gharma ruchi̠tastvaṃ ē̠vēṣvāyu̍ṣmāg​stēja̠svī bra̍hmavarcha̠sya̍si । ru̠chi̠tō̍-‘ha-mma̍nu̠ṣyē̎ṣvāyu̍ṣmāg​-stēja̠svī bra̍hmavarcha̠sī bhū̍yāsam ॥ ruga̍si । rucha̠-mmayi̍ dhēhi ॥ 20 ॥

mayi̠ ruk ॥ daśa̍ pu̠rastā̎-drōchasē । daśa̍ dakṣi̠ṇā । daśa̍ pra̠tyamm । daśōdaṅṅ̍ । daśō̠rdhvō bhā̍si sumana̠syamā̍naḥ । sa na̍-ssamrā̠ḍiṣa̠mūrja̍-ndhēhi । vā̠jī vā̠jinē̍ pavasva । rō̠chi̠tō gha̠rmō ru̍chī̠ya ॥ 21 ॥
(rō̠cha̠ya̠ – dhē̠hi̠ – +nava̍ cha) (a. 6)

anuvākaṃ 7
apa̍śyaṅgō̠pāmani̍padyamānam । ā cha̠ parā̍ cha pa̠thibhi̠śchara̍ntam । sa sa̠ddhrīchī̠-ssa viṣū̍chī̠rvasā̍naḥ । ā va̍rīvarti̠ bhuva̍nēṣva̠ntaḥ ॥ atra̍ prā̠vīḥ । madhu̠ māddhvī̎bhyā̠-mmadhu̠ mādhū̍chībhyām । anu̍ vā-ndē̠vavī̍tayē ॥ sama̠gnira̠gninā̍ gata । sa-ndē̠vēna̍ savi̠trā । sagṃ sūryē̍ṇa rōchatē ॥ 22 ॥

svāhā̠ sama̠gnistapa̍sā gata । sa-ndē̠vēna̍ savi̠trā ।
sagṃ sūryē̍ṇārōchiṣṭa ॥ dha̠rtā di̠vō vibhā̍si̠ raja̍saḥ । pṛ̠thi̠vyā dha̠rtā । u̠rōra̠ntari̍kṣasya dha̠rtā । dha̠rtā dē̠vō dē̠vānā̎m । ama̍rtyastapō̠jāḥ ॥ hṛ̠dē tvā̠ mana̍sē tvā । di̠vē tvā̠ sūryā̍ya tvā ॥ 23 ॥

ū̠rdhvami̠ma-ma̍ddhva̠raṅkṛ̍dhi । di̠vi dē̠vēṣu̠ hōtrā̍ yachCha ॥ viśvā̍sā-mbhuvā-mpatē । viśva̍sya bhuvanaspatē । viśva̍sya manasaspatē । viśva̍sya vachasaspatē । viśva̍sya tapasaspatē । viśva̍sya brahmaṇaspatē । dē̠va̠śrūstvandē̍va gharma dē̠vā-npā̍hi ॥ ta̠pō̠jāṃ vācha̍ma̠smē niya̍chCha dēvā̠yuva̎m ॥ 24 ॥

garbhō̍ dē̠vānā̎m ॥ pi̠tā ma̍tī̠nām ॥
pati̍ḥ pra̠jānā̎m ॥ mati̍ḥ kavī̠nām ॥
sandē̠vō dē̠vēna̍ savi̠trā-‘ya̍tiṣṭa । sagṃ sūryē̍ṇārukta ॥ ā̠yu̠rdāstvama̠smabhya̍-ṅgharma varchō̠dā a̍si ॥ pi̠tā nō̍-‘si pi̠tā nō̍ bōdha ॥ ā̠yu̠rdhāsta̍nū̠dhāḥ pa̍yō̠dhāḥ ।
va̠rchō̠dā va̍rivō̠dā dra̍viṇō̠dāḥ ॥ 25 ॥

a̠nta̠ri̠kṣa̠pra̠ u̠rōrvarī̍yān । a̠śī̠mahi̍ tvā̠ mā mā̍ higṃsīḥ ॥ tvama̍gnē gṛ̠hapa̍ti-rvi̠śāma̍si । viśvā̍sā̠-mmānu̍ṣīṇām । śa̠ta-mpū̠rbhirya̍viṣṭha pā̠hyagṃha̍saḥ । sa̠mē̠ddhāragṃ̍ śa̠tagṃ himā̎ḥ ।
ta̠-ndrā̠viṇagṃ̍ hārdivā̠nam । i̠haiva rā̠taya̍-ssantu ॥ tvaṣṭī̍matī tē sapēya । su̠rētā̠ rētō̠ dadhā̍nā ।
vī̠raṃ vi̍dēya̠ tava̍ sa̠ndṛśi̍ ।
mā-‘hagṃ rā̠yaspōṣē̍ṇa̠ vi yō̍ṣam ॥ 26 ॥
(rō̠cha̠tē̠-sūrya̍ya tvā – dēvā̠yuva̍ṃ – draviṇō̠dā – dadhā̍nā̠ dvē cha̍) (a. 7)

anuvākaṃ 8
dē̠vasya̍ tvā savi̠tuḥ pra̍sa̠vē । a̠śvinō̎-rbā̠hubhyā̎m ।
pū̠ṣṇō hastā̎bhyā̠mā da̍dē ॥ adi̍tyai̠ rāsnā̍-‘si । iḍa̠ ēhi̍ । adi̍ta̠ ēhi̍ । sara̍sva̠tyēhi̍ । asā̠vēhi̍ ।
asā̠vēhi̍ । asā̠vēhi̍ ॥ 27 ॥

adi̍tyā u̠ṣṇīṣa̍masi । vā̠yura̍syai̠ḍaḥ । pū̠ṣā tvō̠pāva̍sṛjatu । a̠śvibhyā̠-mpra dā̍paya । yastē̠ stana̍-śśaśa̠yō yō ma̍yō̠bhūḥ । yēna̠ viśvā̠ puṣya̍si̠ vāryā̍ṇi । yō ra̍tna̠dhā va̍su̠vidya-ssu̠datra̍ḥ ।
sara̍svati̠ tami̠ha dhāta̍vē-‘kaḥ ॥ usra̍ gha̠rmagṃ śigṃ̍ṣa । usra̍ gha̠rma-mpā̍hi ॥ 28 ॥

gha̠rmāya̍ śigṃṣa । bṛha̠spati̠stvōpa̍sīdatu । dāna̍va-sstha̠ pēra̍vaḥ । vi̠ṣva̠gvṛtō̠ lōhi̍tēna । a̠śvibhyā̎-mpinvasva । sara̍svatyai pinvasva ।
pū̠ṣṇē pi̍nvasva । bṛha̠spata̍yē pinvasva । indrā̍ya pinvasva । indrā̍ya pinvasva ॥ 29 ॥

gā̠ya̠trō̍-‘si । traiṣṭu̍bhō-‘si । jāga̍tamasi । sa̠hōrjō bhā̠gēnōpa̠ mēhi̍ । indrā̎śvinā̠ madhu̍na-ssāra̠ghasya̍ । gha̠rma-mpā̍ta vasavō̠ yaja̍tā̠ vaṭ । svāhā̎ tvā̠ sūrya̍sya ra̠śmayē̍ vṛṣṭi̠vana̍yē juhōmi । madhu̍ ha̠vira̍si । sūrya̍sya̠ tapa̍stapa । dyāvā̍pṛthi̠vībhyā̎-ntvā̠ pari̍gṛhṇāmi ॥ 30 ॥

a̠ntari̍kṣēṇa̠ tvōpa̍yachChāmi । dē̠vānā̎-ntvā pitṛ̠ṇāmanu̍matō̠ bhartugṃ̍ śakēyam । tējō̍-‘si ।
tējō-‘nu̠prēhi̍ । di̠vi̠spṛmmā mā̍ higṃsīḥ ।
a̠nta̠ri̠kṣa̠spṛmmā mā̍ higṃsīḥ । pṛ̠thi̠vi̠spṛmmā mā̍ higṃsīḥ ।
suva̍rasi̠ suva̍rmē yachCha ।
diva̍ṃ yachCha di̠vō mā̍ pāhi ॥ 31 ॥
(ēhi̍ – pāhi – pinvasva – gṛhṇāmi̠ – +nava̍ cha) (a. 8)

anuvākaṃ 9
sa̠mu̠drāya̍ tvā̠ vātā̍ya̠ svāhā̎ । sa̠li̠lāya̍ tvā̠ vātā̍ya̠ svāhā̎ । a̠nā̠dhṛ̠ṣyāya̍ tvā̠ vātā̍ya̠ svāhā̎ । a̠pra̠ti̠dhṛ̠ṣyāya̍ tvā̠ vātā̍ya̠ svāhā̎ ।
a̠va̠syavē̎ tvā̠ vātā̍ya̠ svāhā̎ । duva̍svatē tvā̠ vātā̍ya̠ svāhā̎ । śimi̍dvatē tvā̠ vātā̍ya̠ svāhā̎ । a̠gnayē̎ tvā̠ vasu̍matē̠ svāhā̎ ।
sōmā̍ya tvā ru̠drava̍tē̠ svāhā̎ ।
varu̍ṇāya tvā-”di̠tyava̍tē̠ svāhā̎ ॥ 32 ॥

bṛha̠spata̍yē tvā vi̠śvadē̎vyāvatē̠ svāhā̎ ।
sa̠vi̠trē tva̍rbhu̠matē̍ vibhu̠matē̎ prabhu̠matē̠ vāja̍vatē̠ svāhā̎ । ya̠māya̠ tvā-‘ṅgi̍rasvatē pitṛ̠matē̠ svāhā̎ ॥ viśvā̠ āśā̍ dakṣiṇa̠sat । viśvā̎-ndē̠vāna̍yāḍi̠ha । svāhā̍kṛtasya gha̠rmasya̍ । madhō̎ḥ pibatamaśvinā ।
svāhā̠-‘gnayē̍ ya̠jñiyā̍ya । śaṃ yaju̍rbhiḥ ॥
aśvi̍nā gha̠rma-mpā̍tagṃ hārdivā̠nam ॥ 33 ॥

aha̍-rdi̠vābhi̍-rū̠tibhi̍ḥ । anu̍ vā̠-ndyāvā̍pṛthi̠vī magṃ̍sātām । svāhēndrā̍ya ॥ svāhēndrā̠vaṭ । gha̠rmama̍pātamaśvinā hārdivā̠nam ।
aha̍-rdi̠vābhi̍rū̠tibhi̍ḥ । anu̍ vā̠-ndyāvā̍pṛthi̠vī a̍magṃsātām । ta-mprā̠vya̍ṃ yathā̠ vaṭ । namō̍ di̠vē । nama̍ḥ pṛthi̠vyai ॥ 34 ॥

di̠vi dhā̍ i̠maṃ ya̠jñam । ya̠jñami̠ma-ndi̠vi dhā̎ḥ । diva̍ṅgachCha । a̠ntari̍kṣaṅgachCha । pṛ̠thi̠vīṅga̍chCha । pañcha̍ pra̠diśō̍ gachCha । dē̠vā-ngha̍rma̠pā-nga̍chCha । pi̠tṝ-ngha̍rma̠pā-nga̍chCha ॥ 35 ॥
(ā̠di̠tyava̍tē̠ svāhā̍-hārdivā̠nam-pṛ̍thi̠vyā-+a̠ṣṭau cha̍) (a. 9)

anuvākaṃ 10
i̠ṣē pī̍pihi । ū̠rjē pī̍pihi । brahma̍ṇē pīpihi । kṣa̠trāya̍ pīpihi । a̠dbhyaḥ pī̍pihi । ōṣa̍dhībhyaḥ pīpihi । vana̠spati̍bhyaḥ pīpihi । dyāvā̍pṛthi̠vībhyā̎-mpīpihi । su̠bhū̠tāya̍ pīpihi । bra̠hma̠va̠rcha̠sāya̍ pīpihi ॥ 36 ॥

yaja̍mānāya pīpihi । mahya̠ñjyaiṣṭhyā̍ya pīpihi ॥ tviṣyai̎ tvā । dyu̠mnāya̍ tvā । i̠ndri̠yāya̍ tvā̠ bhūtyai̎ tvā । dharmā̍-‘si su̠dharmā mē̎ nya̠smē । brahmā̍ṇi dhāraya । kṣa̠trāṇi̍ dhāraya । viśa̍ndhāraya ।
nēttvā̠ vāta̍-sska̠ndayā̎t ॥ 37 ॥

a̠muṣya̍ tvā prā̠ṇē sā̍dayāmi । a̠munā̍ sa̠ha ni̍ra̠rthaṅga̍chCha । yō̎-‘smā-ndvēṣṭi̍ ।
yañcha̍ va̠ya-ndvi̠ṣmaḥ ॥ pū̠ṣṇē śara̍sē̠ svāhā̎ ।
grāva̍bhya̠-ssvāhā̎ । pra̠ti̠rēbhya̠-ssvāhā̎ । dyāvā̍pṛthi̠vībhyā̠g̠ svāhā̎ ।
pi̠tṛbhyō̍ gharma̠pēbhya̠-ssvāhā̎ ॥
ru̠drāya̍ ru̠drahō̎trē̠ svāhā̎ ॥ 38 ॥

aha̠-rjyōti̍ḥ kē̠tunā̍ juṣatām । su̠jyō̠ti-rjyōti̍ṣā̠g̠ svāhā̎ । rātri̠rjyōti̍ḥ kē̠tunā̍ juṣatām । su̠jyō̠ti-rjyōti̍ṣā̠g̠ svāhā̎ । apī̍parō̠ mā-‘hnō̠ rātri̍yai mā pāhi । ē̠ṣā tē̍ agnē sa̠mit । tayā̠ sami̍ddhyasva । āyu̍rmē dāḥ । varcha̍sā mā-‘ñjīḥ । apī̍parō mā̠ rātri̍yā̠ ahnō̍ mā pāhi ॥ 39 ॥

ē̠ṣā tē̍ agnē sa̠mit । tayā̠ sami̍ddhyasva । āyu̍rmē dāḥ । varcha̍sā mā-‘ñjīḥ । a̠gni-rjyōti̠-rjyōti̍ra̠gni-ssvāhā̎ ।
sūryō̠ jyōti̠-rjyōti̠-ssūrya̠-ssvāhā̎ । bhū-ssvāhā̎ । hu̠tagṃ ha̠viḥ । madhu̍ ha̠viḥ । indra̍tamē̠-‘gnau ॥ 40 ॥

pi̠tā nō̍-‘si̠ mā mā̍ higṃsīḥ । a̠śyāma̍ tē dēvagharma ।
madhu̍matō̠ vāja̍vataḥ pitu̠mata̍ḥ । aṅgi̍rasvata-ssvadhā̠vina̍ḥ । a̠śī̠mahi̍ tvā̠ mā mā̍ higṃsīḥ ॥ svāhā̎ tvā̠ sūrya̍sya ra̠śmibhya̍ḥ । svāhā̎ tvā̠ nakṣa̍trēbhyaḥ ॥ 41 ॥
(bra̠hma̠va̠rcha̠sāya̍ pīpihi – ska̠ndayā̎-d- ru̠drāya̍ ru̠drahō̎trē̠ svāhā – ‘hnō̍ mā pāh – ya̠gnau – +sa̠pta cha̍) (a. 10)

anuvākaṃ 11
gharma̠ yā tē̍ di̠vi śuk । yā gā̍ya̠trē Chanda̍si । yā brā̎hma̠ṇē । yā ha̍vi̠rdhānē̎ । tānta̍ ē̠tēnāva̍yajē̠ svāhā̎ ॥ gharma̠ yā tē̠-‘ntari̍kṣē̠ śuk ।
yā traiṣṭu̍bhē̠ Chanda̍si । yā rā̍ja̠nyē̎ । yā-”gnī̎ddhrē ।
tānta̍ ē̠tēnāva̍yajē̠ svāhā̎ ॥ 42 ॥

gharma̠ yā tē̍ pṛthi̠vyāgṃ śuk । yā jāga̍tē̠ Chanda̍si । yā vaiśyē̎ । yā sada̍si । tānta̍ ē̠tēnāva̍yajē̠ svāhā̎ ॥ a̠gniścha̍ havya̠vāha̍nō̠ bhava̍tā-ndā̠śuṣē̠ maya̍ḥ ॥ anvida̍numatē̠ tva-mmanyā̍sai̠ śañcha̍naḥ kṛdhi । kratvē̠ dakṣā̍ya nō hinu̠ praṇa̠ āyūgṃ̍ṣi tāriṣaḥ ॥ di̠vastvā̍ para̠spāyā̎ḥ । a̠ntari̍kṣasya ta̠nuva̍ḥ pāhi । pṛ̠thi̠vyāstvā̠ dharma̍ṇā ॥ 43 ॥

va̠yamanu̍krāmāma suvi̠tāya̠ navya̍sē ॥ brahma̍ṇastvā para̠spāyā̎ḥ । kṣa̠trasya̍ ta̠nuva̍ḥ pāhi । vi̠śastvā̠ dharma̍ṇā । va̠yamanu̍krāmāma suvi̠tāya̠ navya̍sē ॥ prā̠ṇasya̍ tvā para̠spāyai̎ । chakṣu̍ṣasta̠nuva̍ḥ pāhi । śrōtra̍sya tvā̠ dharma̍ṇā । va̠yamanu̍krāmāma suvi̠tāya̠ navya̍sē ॥ va̠lgura̍si śa̠ṃ yudhā̍yāḥ ॥ 44 ॥

śiśu̠-rjana̍dhāyāḥ ॥ śañcha̠ vakṣi̠ pari̍ cha̠ vakṣi̍ ।
chatu̍-ssrakti̠rnābhi̍r-ṛ̠tasya̍ । sadō̍ vi̠śvāyu̠-śśarma̍ sa̠prathā̎ḥ । apa̠ dvēṣō̠ apa̠ hvara̍ḥ । a̠nyadvra̍tasya saśchima । gharmai̠ta-ttē-‘nna̍mē̠ta-tpurī̍ṣam । tēna̠ vardha̍sva̠ chā cha̍ pyāyasva । va̠rdhi̠ṣī̠mahi̍ cha va̠yam । ā cha̍ pyāsiṣī̠mahi̍ ॥ 45 ॥

ranti̠-rnāmā̍si di̠vyō ga̍ndha̠rvaḥ । tasya̍ tē pa̠dvaddha̍vi̠rdhāna̎m । a̠gniraddhya̍kṣāḥ । ru̠drō-‘dhi̍patiḥ ॥ sama̠hamāyu̍ṣā । sa-mprā̠ṇēna̍ ।
saṃ varcha̍sā । sa-mpaya̍sā । saṅgau̍pa̠tyēna̍ । sagṃ rā̠yaspōṣē̍ṇa ॥ 46 ॥

vya̍sau । yō̎-‘smā-ndvēṣṭi̍ । yañcha̍ va̠ya-ndvi̠ṣmaḥ ॥
achi̍krada̠dvṛṣā̠ hari̍ḥ । ma̠hā-nmi̠trō na da̍r​śa̠taḥ । sagṃ sūryē̍ṇa rōchatē ॥ chida̍si samu̠drayō̍niḥ । indu̠-rdakṣa̍-śśyē̠na ṛ̠tāvā̎ । hira̍ṇyapakṣa-śśaku̠nō bhu̍ra̠ṇyuḥ । ma̠hān-thsa̠dhasthē̎ dhru̠va āniṣa̍ttaḥ ॥ 47 ॥

nama̍stē astu̠ mā mā̍ higṃsīḥ ॥ vi̠śvāva̍sugṃ sōma gandha̠rvam । āpō̍ dadṛ̠śuṣī̎ḥ । tadṛ̠tēnā̠ vyā̍yann । tada̠nvavai̎t । indrō̍ rārahā̠ṇa ā̍sām । pari̠ sūrya̍sya pari̠dhīgṃ ra̍paśyat ॥ vi̠śvāva̍sura̠bhi tannō̍ gṛṇātu । di̠vyō ga̍ndha̠rvō raja̍sō vi̠māna̍ḥ ।
yadvā̍ ghā sa̠tyamu̠ta yanna vi̠dma ॥ 48 ॥

dhiyō̍ hinvā̠nō dhiya̠ innō̍ avyāt ॥ sasni̍mavinda̠chchara̍ṇē na̠dīnā̎m ।
apā̍vṛṇō̠-ddurō̠ aśma̍vrajānām । prāsā̎-ngandha̠rvō a̠mṛtā̍ni vōchat । indrō̠ dakṣa̠-mpari̍jānāda̠hīna̎m ॥ ē̠tattva-ndē̍va gharma dē̠vō dē̠vānupā̍gāḥ ।
i̠dama̠ha-mma̍nu̠ṣyō̍ manu̠ṣyān̍ । sōma̍pī̠thānu̠ mēhi̍ । sa̠ha pra̠jayā̍ sa̠ha rā̠yaspōṣē̍ṇa ॥
su̠mi̠trā na̠ āpa̠ ōṣa̍dhaya-ssantu ॥ 49 ॥

du̠rmi̠trāstasmai̍ bhūyāsuḥ । yō̎-‘smā-ndvēṣṭi̍ ।
yañcha̍ va̠ya-ndvi̠ṣmaḥ ॥ udva̠ya-ntama̍sa̠spari̠ paśya̍ntō̠ jyōti̠rutta̍ram । dē̠va-ndē̍va̠trā sūrya̠maga̍nma̠ jyōti̍rutta̠mam ॥ udu̠ tya-ñjā̠tavē̍dasa-ndē̠vaṃ va̍hanti kē̠tava̍ḥ । dṛ̠śē viśvā̍ya̠ sūrya̎m । chi̠tra-ndē̠vānā̠-muda̍gā̠danī̍ka̠-ñchakṣu̍ rmi̠trasya̠ varu̍ṇasyā̠-‘gnēḥ ॥ i̠mamū̠ ṣu tyama̠smabhyagṃ̍ sa̠nim । gā̠ya̠trannavī̍yāgṃsam ।
agnē̍ dē̠vēṣu̠ pravō̍chaḥ ॥ 50 ॥
(yā-”gnī̎ddhrē̠ tāntā̍ ē̠tēnāva̍yajē̠ svāhā̠ – dharma̍ṇā – śa̠ṃ yudhā̍yāḥ – pyāsiṣī̠mahi̠-pōṣē̍ṇa̠-niṣa̍ttō-vi̠dma-sa̍n-+tva̠ṣṭau cha̍) (a. 11)

anuvākaṃ 12
ma̠hī̠nā-mpayō̍-‘si̠ vihi̍ta-ndēva̠trā ।
jyō̠ti̠rbhā a̍si̠ vana̠spatī̍nā̠mōṣa̍dhīnā̠gṃ̠ rasa̍ḥ ।
vā̠jina̍-ntvā vā̠jinō-‘va̍ nayāmaḥ ।
ū̠rdhva-mmana̍-ssuva̠rgam ॥ 51 ॥ (a. 12)

anuvākaṃ 13
askā̠-ndyauḥ pṛ̍thi̠vīm । askā̍nṛṣa̠bhō yuvā̠ gāḥ ।
ska̠nnēmā viśvā̠ bhuva̍nā । ska̠nnō ya̠jñaḥ praja̍nayatu ॥ askā̠naja̍ni̠ prāja̍ni । ā ska̠nnājjā̍yatē̠ vṛṣā̎ ।
ska̠nnā-tpraja̍niṣīmahi ॥ 52 ॥ (a. 13)
anuvākaṃ 14
yā pu̠rastā̎-dvi̠dyudāpa̍tat । tānta̍ ē̠tēnāva̍ yajē̠ svāhā̎ । yā da̍kṣiṇa̠taḥ । yā pa̠śchāt । yōtta̍ra̠taḥ । yōpari̍ṣṭā-dvi̠dyudāpa̍tat । tānta̍ ē̠tēnāva̍ yajē̠ svāhā̎ ॥ 53 ॥ (a. 14)

anuvākaṃ 15
prā̠ṇāya̠ svāhā̎ vyā̠nāya̠ svāhā̍ ‘pā̠nāya̠ svāhā̎ ।
chakṣu̍ṣē̠ svāhā̠ śrōtrā̍ya̠ svāhā̎ ।
mana̍sē̠ svāhā̍ vā̠chē sara̍svatyai̠ svāhā̎ ॥ 54 ॥ (a. 15)

anuvākaṃ 16
pū̠ṣṇē svāhā̍ pū̠ṣṇē śara̍sē̠ svāhā̎ ।
pū̠ṣṇē pra̍pa̠tthyā̍ya̠ svāhā̍ pū̠ṣṇē na̠randhi̍ṣāya̠ svāhā̎ । pū̠ṣṇē-‘ṅghṛ̍ṇayē̠ svāhā̍ pū̠ṣṇē na̠ruṇā̍ya̠ svāhā̎ ।
pū̠ṣṇē sā̍kē̠tāya̠ svāhā̎ ॥ 55 ॥ (a. 16)

anuvākaṃ 17
uda̍sya̠ śuṣmā̎-dbhā̠nurnārta̠ bibha̍rti । bhā̠ra-mpṛ̍thi̠vī na bhūma̍ । pra śu̠kraitu̍ dē̠vī ma̍nī̠ṣā । a̠sma-thsuta̍ṣṭō̠ rathō̠ na vā̠jī । archa̍nta̠ ēkē̠ mahi̠ sāma̍ manvata । tēna̠ sūrya̍madhārayann ।
tēna̠ sūrya̍marōchayann । gha̠rma-śśira̠stada̠yama̠gniḥ ।
purī̍ṣamasi̠ sampri̍ya-mpra̠jayā̍ pa̠śubhi̍rbhuvat । pra̠jāpati̍stvā sādayatu । tayā̍ dē̠vata̍yā ‘ṅgira̠sva-ddhru̠vā sī̍da ॥ 56 ॥ (a. 17)

anuvākaṃ 18
yāstē̍ agna ā̠rdrā yōna̍yō̠ yāḥ ku̍lā̠yinī̎ḥ ।
yē tē̍ agna̠ inda̍vō̠ yā u̠ nābha̍yaḥ । yāstē̍ agnē ta̠nuva̠ ūrjō̠ nāma̍ । tābhi̠stvamu̠bhayī̍bhi-ssaṃvidā̠naḥ । pra̠jābhi̍ragnē̠ dravi̍ṇē̠ha sī̍da ।
pra̠jāpa̍tistvā sādayatu । tayā̍ dē̠vata̍yā-‘ṅgira̠sva-ddhru̠vā sī̍da ॥ 57 ॥ (a. 18)

anuvākaṃ 19
a̠gnira̍si vaiśvāna̠rō̍-‘si । sa̠ṃva̠thsa̠rō̍-‘si parivathsa̠rō̍-‘si । i̠dā̠va̠thsa̠rō̍-‘sīduvathsa̠rō̍-‘si । i̠dva̠thsa̠rō̍-‘si vathsa̠rō̍-‘si । tasya̍ tē vasa̠nta-śśira̍ḥ । grī̠ṣmō dakṣi̍ṇaḥ pa̠kṣaḥ । va̠r̠ṣāḥ puchCha̎m ।
śa̠radutta̍raḥ pa̠kṣaḥ । hē̠ma̠ntō maddhya̎m । pū̠rva̠pa̠kṣāśchita̍yaḥ । a̠pa̠ra̠pa̠kṣāḥ purī̍ṣam । a̠hō̠rā̠trāṇīṣṭa̍kāḥ । tasya̍ tē̠ māsā̎śchārdhamā̠sāścha̍ kalpantām ।
ṛ̠tava̍stē kalpantām । sa̠ṃva̠thsa̠rastē̍ kalpatām ।
a̠hō̠rā̠trāṇi̍ tē kalpantām । ēti̠ prēti̠ vīti̠ samityuditi̍ ।
pra̠jāpa̍tistvā sādayatu । tayā̍ dē̠vata̍yā-‘ṅgira̠sva-ddhru̠vā sī̍da ॥ 58 ॥
(chita̍yō̠ nava̍ cha) (a. 19)

anuvākaṃ 20
bhūrbhuva̠ssuva̍ḥ । ū̠rdhva ū̠ ṣuṇa̍ ū̠tayē̎ । ū̠rdhvō na̍ḥ pā̠hyagṃha̍saḥ ॥
vi̠dhunda̍drā̠ṇagṃ sama̍nē bahū̠nām । yuvā̍na̠gṃ̠ santa̍-mpali̠tō ja̍gāra । dē̠vasya̍ paśya̠ kāvya̍-mmahi̠tvā-‘dyā ma̠māra̍ । sa hya̠-ssamā̍na ॥
yadṛ̠tē chi̍dabhi̠śriṣa̍ḥ । pu̠rā ja̠rtṛbhya̍ ā̠tṛda̍ḥ ।
sandhā̍tā sa̠ndhi-mma̠ghavā̍ purō̠vasu̍ḥ ॥ 59 ॥

niṣka̍rtā̠ vihru̍ta̠-mpuna̍ḥ ॥ puna̍rū̠rjā ni va̍rtasva̠ puna̍ragna i̠ṣā-”yu̍ṣā । puna̍rnaḥ pāhi vi̠śvata̍ḥ ॥ sa̠ha ra̠yyā ni va̍rta̠svāgnē̠ pinva̍sva̠ dhāra̍yā । vi̠śvaphsni̍yā vi̠śvata̠spari̍ ॥ mā nō̍ gharma vyathi̠tō vi̍vyathō naḥ । mā na̠ḥ para̠madha̍ra̠mmā rajō̍-‘naiḥ । mōṣva̍smāg​ stama̍syanta̠rā dhā̎ḥ । mā ru̠driyā̍sō a̠bhigu̍rvṛ̠dhāna̍ḥ ॥ mā na̠ḥ kratu̍bhir-hīḍi̠tēbhi̍ra̠smān । dviṣā̍ sunītē̠ mā parā̍dāḥ ।
mā nō̍ ru̠drō nir-ṛ̍ti̠rmā nō̠ astā̎ ।
mā dyāvā̍pṛthi̠vī hī̍ḍiṣātām ॥ 60 ॥

upa̍ nō mitrāvaruṇāvi̠hāva̍tam । a̠nvādī̎ddhyāthāmi̠ha na̍-ssakhāyā । ā̠di̠tyānā̠-mprasi̍tir​hē̠tiḥ । u̠grā śa̠tāpā̎ṣṭhā gha̠ viṣā̠ pari̍ṇō vṛṇaktu ॥
i̠ma-mmē̍ varuṇa śrudhī̠ hava̍ma̠dyā cha̍ mṛḍaya । tvāma̍va̠syurā cha̍kē ॥ tattvā̍ yāmi̠ brahma̍ṇā̠ vanda̍māna̠-stadā śā̎stē̠ yaja̍mānō ha̠virbhi̍ḥ । ahē̍ḍamānō varuṇē̠ha bō̠ddhyuru̍śagṃsa̠ mā na̠ āyu̠ḥ pramō̍ṣīḥ ॥ tva-nnō̍ agnē̠ varu̍ṇasya vi̠dvā-ndē̠vasya̠ hēḍō-‘va̍ yāsi sīṣṭhāḥ । yaji̍ṣṭhō̠ vahni̍ tama̠-śśōśu̍chānō̠ viśvā̠ dvēṣāgṃ̍si̠ pramu̍mugdhya̠smat ॥
sa tvannō̍ angē-‘va̠mō bha̍vō̠tī nēdi̍ṣṭhō a̠syā u̠ṣasō̠ vyu̍ṣṭau । ava̍ yakṣva nō̠ varu̍ṇa̠gṃ̠ rarā̍ṇō vī̠hi mṛ̍ḍī̠kagṃ su̠havō̍ na ēdhi ॥ tvama̍gnē a̠yā-‘si̍ । a̠yā sanmana̍sā hi̠taḥ । a̠yā san.ha̠vyamū̍hiṣē । a̠yā nō̍ dhēhi bhēṣa̠jam । i̠ṣṭō a̠gnirāhu̍taḥ । svāhā̍kṛtaḥ pipartu naḥ । sva̠gā dē̠vēbhya̍ i̠da-nnama̍ḥ ॥
udva̠ya-ntama̍sa̠spari̠ paśya̍ntō̠ jyōti̠rutta̍ram । dē̠va-ndē̍va̠trā sūrya̠maga̍nma̠ jyōti̍rutta̠mam ॥ udu̠ tya-ñjā̠tavē̍dasa-ndē̠vaṃ va̍hanti kē̠tava̍ḥ । dṛ̠śē viśvā̍ya̠ sūrya̎m । chi̠tra-ndē̠vānā̠-muda̍gā̠danī̍ka̠-ñchakṣu̍ rmi̠trasya̠ varu̍ṇasyā̠-‘gnēḥ ॥
vaya̍-ssupa̠rṇā upa̍sēdu̠rindra̎m । pri̠yamē̍dhā̠ ṛṣa̍yō̠ nādha̍mānāḥ । apa̍ dhvā̠ntamū̎rṇu̠hi pū̠rdhi chakṣu̍ḥ । mu̠mu̠gdhya̍smā-nni̠dhayē̍va ba̠ddhān ॥ 61 ॥
(pu̠rō̠vasu̍r​hīḍiṣātāgṃ supa̠rṇāḥ) (a. 20)

anuvākaṃ 21
bhūrbhuva̠ssuva̍ḥ । mayi̠ tyadi̍ndri̠ya-mma̠hat । mayi̠ dakṣō̠ mayi̠ kratu̍ḥ । mayi̍ dhāyi su̠vīrya̎m । triśu̍ggha̠rmō vibhā̍tu mē । ākū̎tyā̠ mana̍sā sa̠ha ।
vi̠rājā̠ jyōti̍ṣā sa̠ha । ya̠jñēna̠ paya̍sā sa̠ha । brahma̍ṇā̠ tēja̍sā sa̠ha । kṣa̠trēṇa̠ yaśa̍sā sa̠ha । sa̠tyēna̠ tapa̍sā sa̠ha । tasya̠ dōha̍maśīmahi ।
tasya̍ su̠mnama̍śīmahi । tasya̍ bha̠kṣama̍śīmahi ।
tasya̍ ta̠ indrē̍ṇa pī̠tasya̠ madhu̍mataḥ ।
upa̍hūta̠syōpa̍hūtō bhakṣayāmi ॥ 62 ॥
(yaśa̍sā sa̠ha ṣaṭcha̍) (a. 21)

anuvākaṃ 22
yāstē̍ agnē ghō̠rāsta̠nuva̍ḥ । kṣuchcha̠ tṛṣṇā̍ cha । asnu̠kchānā̍hutiścha । a̠śa̠na̠yā cha̍ pipā̠sā cha̍ । sē̠diśchāma̍tiścha । ē̠tāstē̍ agnē ghō̠rāsta̠nuva̍ḥ ।
tābhi̍ra̠muṅga̍chCha । yō̎-‘smā-ndvēṣṭi̍ ।
yañcha̍ va̠ya-ndvi̠ṣmaḥ ॥ 63 ॥ (a. 22)

anuvākaṃ 23
snikcha̠ snīhi̍tiścha̠ snihi̍tiścha । u̠ṣṇā cha̍ śī̠tā cha̍ ।
u̠grā cha̍ bhī̠mā cha̍ । sa̠dāmnī̍ sē̠dirani̍rā । ē̠tāstē̍ agnē ghō̠rāsta̠nuva̍ḥ । tābhi̍ra̠muṅga̍chCha । yō̎-‘smā-ndvēṣṭi̍ । yañcha̍ va̠ya-ndvi̠ṣmaḥ ॥ 64 ॥ (a. 23)

anuvākaṃ 24
dhuni̍ścha dhvā̠ntaścha̍ dhva̠naścha̍ dhva̠nayagg̍ścha ।
ni̠li̠mpaścha̍ vili̠mpaścha̍ vikṣi̠paḥ ॥ 65 ॥ (a. 24)

anuvākaṃ 25
u̠graścha̠ dhuni̍ścha dhvā̠ntaścha̍ dhva̠naścha̍ dhva̠nayagg̍ścha । sa̠ha̠sa̠hvāg​ścha̠ saha̍mānaścha̠ saha̍svāg​ścha̠ sahī̍yāg​ścha ।
ētya̠ prētya̍ vikṣi̠paḥ ॥ 66 ॥ (a. 25)

anuvākaṃ 26
a̠hō̠rā̠trē tvōdī̍rayatām । a̠rdha̠mā̠sāstvōdī̎-ñjayantu । māsā̎stvā śrapayantu । ṛ̠tava̍stvā pachantu ।
sa̠ṃva̠thsa̠rastvā̍ hantvasau ॥ 67 ॥ (a. 26)

anuvākaṃ 27
khaṭ pha-ḍja̠hi । Chi̠ndhī bhi̠ndhī ha̠ndhī kaṭ ।
iti̠ vācha̍ḥ krūrā̠ṇi ॥ 68 ॥ (a. 27)

anuvākaṃ 28
vigā i̍ndra vi̠chara̎m-thspāśayasva । sva̠panta̍mindra paśu̠manta̍michCha । vajrē̍ṇā̠mu-mbō̍dhaya durvi̠datra̎m । sva̠pa̠tō̎-‘sya̠ praha̍ra̠ bhōja̍nēbhyaḥ ॥
agnē̍ a̠gninā̠ saṃva̍dasva । mṛtyō̍ mṛ̠tyunā̠ saṃva̍dasva । nama̍stē astu bhagavaḥ ॥ sa̠kṛttē̍ agnē̠ nama̍ḥ । dvistē̠ nama̍ḥ । tristē̠ nama̍ḥ । cha̠tustē̠ nama̍ḥ । pa̠ñcha̠kṛtva̍stē̠ nama̍ḥ ।
da̠śa̠kṛtva̍stē̠ nama̍ḥ । śa̠ta̠kṛtva̍stē̠ nama̍ḥ । ā̠sa̠ha̠sra̠kṛtva̍stē̠ nama̍ḥ । a̠pa̠ri̠mi̠ta̠kṛtva̍stē̠ nama̍ḥ । nama̍stē astu̠ mā mā̍ higṃsīḥ ॥ 69 ॥
(tristē̠ nama̍-ssa̠pta cha̍) (a. 28)

anuvākaṃ 29
asṛ̍-nmukhō rudhi̠rēṇā̠vya̍ktaḥ । ya̠masya̍ dū̠ta-śśvapā̠-dvidhā̍vasi । gṛddhra̍-ssupa̠rṇaḥ ku̠ṇapa̠nniṣē̍vasē ।
ya̠masya̍ dū̠taḥ prahi̍tō bha̠vasya̍ chō̠bhayō̎ḥ ॥ 70 ॥ (a. 29)

anuvākaṃ 30
yadē̠ta-dvṛ̍ka̠sō bhū̠tvā । vāg dē̎vyabhi̠rāya̍si । dvi̠ṣanta̍-mmē̠-‘bhirā̍ya । ta-mmṛ̍tyō mṛ̠tyavē̍ naya । sa ārtyā-”rti̠mārchCha̍tu ॥ 71 ॥ (a. 30)

anuvākaṃ 31
yadī̍ṣi̠tō yadi̍ vā svakā̠mī । bha̠yēḍa̍kō̠ vada̍ti̠ vācha̍mē̠tām । tāmi̍ndrā̠gnī brahma̍ṇā saṃvidā̠nau ।
śi̠vāma̠smabhya̍-ṅkṛṇutaṅgṛ̠hēṣu̍ ॥ 72 ॥ (a. 31)

anuvākaṃ 32
dīrgha̍mukhi̠ dur​ha̍ṇu । mā sma̍ dakṣiṇa̠tō va̍daḥ ।
yadi̍ dakṣiṇa̠tō vadā̎-ddvi̠ṣanta̠-mmē-‘va̍ bādhāsai ॥ 73 ॥ (a. 32)

anuvākaṃ 33
i̠tthādulū̍ka̠ āpa̍ptat । hi̠ra̠ṇyā̠kṣō ayō̍mukhaḥ ।
rakṣa̍sāndū̠ta āga̍taḥ । tami̠tō nā̍śayāgnē ॥ 74 ॥ (a. 33)

anuvākaṃ 34
yadē̠ta-dbhū̠tānya̍nvā̠viśya̍ । daivī̠ṃ vācha̍ṃ va̠dasi̍ । dvi̠ṣatō̍ na̠ḥ parā̍vada । tā-nmṛ̍tyō mṛ̠tyavē̍ naya । ta ārtyā-”rti̠mārchCha̍ntu ।
a̠gninā̠-‘gni-ssaṃva̍datām ॥ 75 ॥ (a. 34)
anuvākaṃ 35
pra̠sārya̍ sa̠kthyau̍ pata̍si । sa̠vyamakṣi̍ ni̠pēpi̍ cha ।
mēha ka̍syacha̠nāma̍mat ॥ 76 ॥ (a. 35)

anuvākaṃ 36
atri̍ṇā tvā krimē hanmi । kaṇvē̍na ja̠mada̍gninā ।
vi̠śvāva̍sō̠-rbrahma̍ṇā ha̠taḥ । krimī̍ṇā̠gṃ̠ rājā̎ ।
apyē̍ṣāg​ stha̠pati̍r​ha̠taḥ । athō̍ mā̠tā-‘thō̍ pi̠tā ।
athō̎ sthū̠rā athō̎ kṣu̠drāḥ । athō̍ kṛ̠ṣṇā athō̎ śvē̠tāḥ । athō̍ ā̠śāti̍kā ha̠tāḥ ।
śvē̠tābhi̍-ssa̠ha sarvē̍ ha̠tāḥ ॥ 77 ॥ (a. 36)

anuvākaṃ 37
āha̠rāva̍dya । śṛ̠tasya̍ ha̠viṣō̠ yathā̎ । ta-thsa̠tyam ।
yada̠muṃ ya̠masya̠ jambha̍yōḥ । āda̍dhāmi̠ tathā̠ hi tat । khaṇphaṇmrasi̍ ॥ 78 ॥ (a. 37)

anuvākaṃ 38
brahma̍ṇā tvā śapāmi । brahma̍ṇastvā śa̠pathē̍na śapāmi । ghō̠rēṇa̍ tvā̠ bhṛgū̍ṇā̠ñchakṣu̍ṣā̠ prēkṣē̎ । rau̠drēṇa̠ tvāṅgi̍rasā̠-mmana̍sā dhyāyāmi ।
a̠ghasya̍ tvā̠ dhāra̍yā viddhyāmi ।
adha̍rō̠ ma-tpa̍dyasvāsau ॥ 79 ॥ (a. 38)

anuvākaṃ 39
uttu̍da śimijāvari । talpē̍jē̠ talpa̠ uttu̍da । gi̠rīgṃ ranu̠ pravē̍śaya । marī̍chī̠rupa̠ sannu̍da ।
yāva̍di̠taḥ pu̠rastā̍du̠dayā̍ti̠ sūrya̍ḥ ।
tāva̍di̠tō̍-‘munnā̍śaya । yō̎-‘smā-ndvēṣṭi̍ ।
yañcha̍ va̠ya-ndvi̠ṣmaḥ ॥ 80 ॥ (a. 39)

anuvākaṃ 40
bhūrbhuva̠ssuvō̠ bhūrbhuva̠ssuvō̠ bhūrbhuva̠ssuva̍ḥ ।
bhuvō̎-‘ddhāyi̠ bhuvō̎-‘ddhāyi̠ bhuvō̎-‘ddhāyi ।
nṛ̠mṇāyi nṛ̠mṇa-nnṛ̠mṇāyi nṛ̠mṇa-nnṛ̠mṇāyi nṛ̠mṇam । ni̠dhā yyō̍-‘vāyi ni̠dhā yyō̍-‘vāyi ni̠dhā yyō̍-‘vāyi । ē a̠smē a̠smē । suva̠rna jyōtī̎ḥ ॥ 81 ॥ (a. 40)

anuvākaṃ 41
pṛ̠thi̠vī sa̠mit । tāma̠gni-ssami̍ndhē । sā-‘gnigṃ sami̍ndhē । tāma̠hagṃ sami̍ndhē । sā mā̠ sami̍ddhā । āyu̍ṣā̠ tēja̍sā । varcha̍sā śri̠yā । yaśa̍sā brahmavarcha̠sēna̍ । a̠nnādyē̍na̠ sami̍ntā̠g̠ svāhā̎ ॥
a̠ntari̍kṣagṃ sa̠mit ॥ 82 ॥

tāṃ vā̠yu-ssami̍ndhē । sā vā̠yugṃ sami̍ndhē । tāma̠hagṃ sami̍ndhē । sā mā̠ sami̍ddhā । āyu̍ṣā̠ tēja̍sā । varcha̍sā śri̠yā । yaśa̍sā brahmavarcha̠sēna̍ । a̠nnādyē̍na̠ sami̍ntā̠g̠ svāhā̎ ।
dyau-ssa̠mit । tāmā̍di̠tya-ssami̍ndhē ॥ 83 ॥

sā-”di̠tyagṃ sami̍ndhē । tāma̠hagṃ sami̍ndhē । sā mā̠ sami̍ddhā । āyu̍ṣā̠ tēja̍sā । varcha̍sā śri̠yā । yaśa̍sā brahmavarcha̠sēna̍ । a̠nnādyē̍na̠ sami̍ntā̠g̠ svāhā̎ ॥ prā̠jā̠pa̠tyā mē̍ sa̠mida̍si sapatna̠kṣaya̍ṇī ।
bhrā̠tṛ̠vya̠hā mē̍-‘si̠ svāhā̎ ॥ agnē̎ vratapatē vra̠tañcha̍riṣyāmi ॥ 84 ॥

tachCha̍kēya̠-ntanmē̍ rāddhyatām । vāyō̎ vratapata̠ ādi̍tya vratapatē । vra̠tānā̎ṃ vratapatē vra̠tañcha̍riṣyāmi । tachCha̍kēya̠-ntanmē̍ rāddhyatām ॥ dyau-ssa̠mit । tāmā̍di̠tya-ssami̍ndhē । sā-”di̠tyagṃ sami̍ndhē ।
tāma̠hagṃ sami̍ndhē । sā mā̠ sami̍ddhā । āyu̍ṣā̠ tēja̍sā ॥ 85 ॥

varcha̍sā śri̠yā । yaśa̍sā brahmavarcha̠sēna̍ । a̠nnādyē̍na̠ sami̍ntā̠g̠ svāhā̎ ।
a̠ntari̍kṣagṃ sa̠mit । tāṃ vā̠yu-ssami̍ndhē । sā vā̠yugṃ sami̍ndhē । tāma̠hagṃ sami̍ndhē । sā mā̠ sami̍ddhā । āyu̍ṣā̠ tēja̍sā । varcha̍sā śri̠yā ॥ 86 ॥

yaśa̍sā brahmavarcha̠sēna̍ । a̠nnādyē̍na̠ sami̍ntā̠g̠ svāhā̎ । pṛ̠thi̠vī sa̠mit । tāma̠gni-ssami̍ndhē । sā-‘gnigṃ sami̍ndhē । tāma̠hagṃ sami̍ndhē ।
sā mā̠ sami̍ddhā । āyu̍ṣā̠ tēja̍sā । varcha̍sā śri̠yā ।
yaśa̍sā brahmavarcha̠sēna̍ ॥ 87 ॥

a̠nnādyē̍na̠ sami̍ntā̠g̠ svāhā̎ । prā̠jā̠pa̠tyā mē̍ sa̠mida̍si sapatna̠kṣaya̍ṇī । bhrā̠tṛ̠vya̠hā mē̍-‘si̠ svāhā̎ । ādi̍tya vratapatē vra̠tama̍chāriṣam ।
tada̍śaka̠-ntanmē̍-‘rādhi । vāyō̎ vratapa̠tē-‘gnē̎ vratapatē । vra̠tānā̎ṃ vratapatē vra̠tama̍chāriṣam । tada̍śaka̠-ntanmē̍-‘rādhi ॥ 88 ॥
(sa̠mith – sami̍ndhē – vra̠tañcha̍riṣyā̠ – myāyu̍ṣā̠ tēja̍sā̠ – varcha̍sā śri̠yā – yaśa̍sā brahmavarcha̠sēnā̠ – +ṣṭau cha̍) (a. 41)

anuvākaṃ 42
śannō̠ vāta̍ḥ pavatā-mmāta̠riśvā̠ śanna̍stapatu̠ sūrya̍ḥ । ahā̍ni̠ śa-mbha̍vantu na̠-śśagṃ rātri̠ḥ prati̍dhīyatām ॥ śamu̠ṣā nō̠ vyu̍chChatu̠ śamā̍di̠tya udē̍tu naḥ । śi̠vā na̠-śśanta̍mā bhava sumṛḍī̠kā sara̍svati । mā tē̠ vyō̍ma sa̠ndṛśi̍ ॥
iḍā̍yai̠ vāstva̍si vāstu̠ma-dvā̎stu̠mantō̍ bhūyāsma̠ mā vāstō̎-śChithsmahya vā̠stu-ssa bhū̍yā̠-dyō̎-‘smā-ndvēṣṭi̠ yañcha̍ va̠ya-ndvi̠ṣmaḥ ॥
pra̠ti̠ṣṭhā-‘si̍ prati̠ṣṭhāva̍ntō bhūyāsma̠ mā pra̍ti̠ṣṭhāyā̎- śChithsmahya prati̠ṣṭhaḥ
sa bhū̍yā̠-dyō̎-‘smā-ndvēṣṭi̠ yañcha̍ va̠ya-ndvi̠ṣmaḥ ॥ ā vā̍ta vāhi bhēṣa̠jam ँvi vā̍ta vāhi̠ yadrapa̍ḥ ।
tvagṃ hi vi̠śvabhē̍ṣajō dē̠vānā̎-ndū̠ta īya̍sē ॥
dvāvi̠mau vātau̍ vāta̠ ā sindhā̠rā pa̍rā̠vata̍ḥ ॥ 89 ॥

dakṣa̍-mmē a̠nya ā̠vātu̠ parā̠-‘nyō vā̍tu̠ ya-drapa̍ḥ ॥
yada̠dō vā̍ta tē gṛ̠hē̍-‘mṛta̍sya ni̠dhir​hi̠taḥ ।
tatō̍ nō dēhi jī̠vasē̠ tatō̍ nō dhēhi bhēṣa̠jam ॥
tatō̍ nō̠ maha̠ āva̍ha̠ vāta̠ āvā̍tu bhēṣa̠jam ।
śa̠mbhū-rma̍yō̠bhūrnō̍ hṛ̠dē pra ṇa̠ āyūgṃ̍ṣi tāriṣat ॥ indra̍sya gṛ̠hō̍-‘si̠ ta-ntvā̠ prapa̍dyē̠ sagu̠ssāśva̍ḥ । sa̠ha yanmē̠ asti̠ tēna̍ ॥
bhūḥ prapa̍dyē̠ bhuva̠ḥ prapa̍dyē̠ suva̠ḥ prapa̍dyē̠ bhūrbhuva̠ssuva̠ḥ prapa̍dyē vā̠yum
prapa̠dyē-‘nā̎rtā-ndē̠vatā̠-mprapa̠dyē ‘śmā̍namākha̠ṇa-mprapa̍dyē pra̠jāpa̍tēr
brahmakō̠śa-mbrahma̠ prapa̍dya̠ ō-mprapa̍dyē ॥
a̠ntari̍kṣa-mma u̠rva̍ntara̍-mbṛ̠hada̠gnaya̠ḥ parva̍tāścha̠ yayā̠ vāta̍-ssva̠styā sva̍sti̠māntayā̎ sva̠styā sva̍sti̠ māna̍sāni ॥
prāṇā̍pānau mṛ̠tyōrmā̍ pāta̠-mprāṇā̍pānau̠ mā mā̍ hāsiṣṭa̠-mmayi̍ mē̠dhā-mmayi̍ pra̠jā-mmayya̠gni stējō̍ dadhātu̠ mayi̍ mē̠dhā-mmayi̍ pra̠jā-mmayīndra̍ indri̠ya-nda̍dhātu̠ mayi̍ mē̠dhā-mmayi̍ pra̠jā-mmayi̠ sūryō̠
bhrājō̍ dadhātu ॥ 90 ॥

dyu̠bhira̠ktubhi̠ḥ pari̍pāta-ma̠smānari̍ṣṭēbhi-raśvinā̠ saubha̍gēbhiḥ । tannō̍ mi̠trō varu̍ṇō māmahantā̠ madi̍ti̠-ssindhu̍ḥ pṛthi̠vī u̠ta dyauḥ ॥
kayā̍ naśchi̠tra ābhu̍vadū̠tī sa̠dāvṛ̍dha̠-ssakhā̎ । kayā̠ śachi̍ṣṭhayā vṛ̠tā ॥ kastvā̍ sa̠tyō madā̍nā̠-mmagṃhi̍ṣṭhō mathsa̠dandha̍saḥ ।
dṛ̠ḍhā chi̍dā̠rujē̠ vasu̍ ॥ a̠bhī ṣu ṇa̠-ssakhī̍nāmavi̠tā ja̍ritṝ̠ṇām । śa̠ta-mbha̍vāsyū̠tibhi̍ḥ ॥
vaya̍-ssupa̠rṇā upa̍sēdu̠rindra̍-mpri̠yamē̍dhā̠ ṛṣa̍yō̠ nādha̍mānāḥ ।
apa̍ dhvā̠ntamū̎rṇu̠hi pū̠rdhi chakṣu̍-rmumu̠gdhya̍smā-nni̠dhayē̍va ba̠ddhān ॥ 91 ॥

śannō̍ dē̠vīra̠bhiṣṭa̍ya̠ āpō̍ bhavantu pī̠tayē̎ । śaṃ yōra̠bhisra̍vantu naḥ ॥ īśā̍nā̠ vāryā̍ṇā̠-ṅkṣaya̍ntīśchar​ṣaṇī̠nām । a̠pō yā̍chāmi bhēṣa̠jam ॥
su̠mi̠trā na̠ āpa̠ ōṣa̍dhaya-ssantu durmi̠trāstasmai̍ bhūyāsu̠-ryō̎-‘smān-dvēṣṭi̠ yañcha̍ va̠ya-ndvi̠ṣmaḥ ॥
āpō̠ hi ṣṭhā ma̍yō̠bhuva̠stā na̍ ū̠rjē da̍dhātana । ma̠hē raṇā̍ya̠ chakṣa̍sē ॥ yō va̍-śśi̠vata̍mō̠ rasa̠stasya̍ bhājayatē̠ha na̍ḥ । u̠śa̠tīri̍va mā̠tara̍ḥ ॥
tasmā̠ ara̍-ṅgamāma vō̠ yasya̠ kṣayā̍ya̠ jinva̍tha ॥ 92 ॥

āpō̍ ja̠naya̍thā cha naḥ ॥
pṛ̠thi̠vī śā̠ntā sā-‘gninā̍ śā̠ntā sā mē̍ śā̠ntā śuchagṃ̍ śamayatu ॥ a̠ntari̍kṣagṃ śā̠nta-nta-dvā̠yunā̍ śā̠nta-ntanmē̍ śā̠ntagṃ śuchagṃ̍ śamayatu ।
dyau-śśā̠ntā sā-”di̠tyēna̍ śā̠ntā sā mē̍ śā̠ntā śuchagṃ̍ śamayatu ॥ pṛ̠thi̠vī śānti̍ra̠ntari̍kṣa̠gṃ̠ śānti̠-rdyau-śśānti̠-rdiśa̠-śśānti̍ ravāntaradi̠śā-śśānti̍ ra̠gni-śśānti̍-rvā̠yu-śśānti̍ rādi̠tya-śśānti̍
ścha̠ndramā̠-śśānti̠-rnakṣa̍trāṇi̠ śānti̠ rāpa̠-śśānti̠ rōṣa̍dhaya̠-śśānti̠-rvana̠spata̍ya̠-śśānti̠-rgau-śśānti̍ ra̠jā śānti̠ raśva̠-śśānti̠ḥ puru̍ṣa̠-śśānti̠-rbrahma̠ śānti̍-rbrāhma̠ṇa-śśānti̠-śśānti̍rē̠va śānti̠-śśānti̍rmē astu̠ śānti̍ḥ ॥
tayā̠-‘hagṃ śā̠ntyā sa̍rvaśā̠ntyā mahya̍-ndvi̠padē̠ chatu̍ṣpadē cha̠ śānti̍-ṅkarōmi̠ śānti̍rmē astu̠ śānti̍ḥ ॥
ēha̠ śrīścha̠ hrīścha̠ dhṛti̍ścha̠ tapō̍ mē̠dhā pra̍ti̠ṣṭhā śra̠ddhā sa̠tya-ndharma̍śchai̠tāni̠ mōtti̍ṣṭhanta̠-manūtti̍ṣṭhantu̠ mā mā̠g̠ śrīścha̠ hrīścha̠ dhṛti̍ścha̠ tapō̍ mē̠dhā pra̍ti̠ṣṭhā śra̠ddhā sa̠tya-ndharma̍śchai̠tāni̍ mā̠ mā hā̍siṣuḥ ॥
udāyu̍ṣā svā̠yuṣōdōṣa̍dhīnā̠gṃ̠ rasē̠nō-tpa̠rjanya̍sya̠ śuṣmē̠ṇōda̍sthā-ma̠mṛtā̠gṃ̠ anu̍ ॥ tachchakṣu̍-rdē̠vahi̍ta-mpu̠rastā̎ chChu̠kramu̠chchara̍t ।
paśyē̍ma śa̠rada̍-śśa̠ta-ñjīvē̍ma śa̠rada̍-śśa̠ta-nnandā̍ma śa̠rada̍-śśa̠ta-mmōdā̍ma śa̠rada̍-śśa̠ta-mbhavā̍ma śa̠rada̍-śśa̠tagṃ śṛ̠ṇavā̍ma śa̠rada̍-śśa̠ta-mprabra̍vāma śa̠rada̍-śśa̠ta majī̍tā-ssyāma śa̠rada̍-śśa̠ta-ñjyōkcha̠ sūrya̍-ndṛ̠śē ॥ 93 ॥

ya uda̍gā-nmaha̠tō-‘rṇavā̎-dvi̠bhrāja̍māna-ssari̠rasya̠ maddhyā̠thsa mā̍ vṛṣa̠bhō lō̍hitā̠kṣa-ssūryō̍ vipa̠śchi-nmana̍sā punātu ॥ brahma̍ṇa̠-śśchōta̍nyasi̠ brahma̍ṇa ā̠ṇī sthō̠ brahma̍ṇa ā̠vapa̍namasi dhāri̠tēya-mpṛ̍thi̠vī brahma̍ṇā ma̠hī dhā̍ri̠tamē̍nēna ma̠hada̠ntari̍kṣa̠-ndiva̍-ndādhāra pṛthi̠vīgṃ sadē̍vā̠ṃ yada̠haṃ vēda̠ tada̠ha-ndhā̍rayāṇi̠ mā madvēdō-‘dhi̠ visra̍sat ॥ mē̠dhā̠ma̠nī̠ṣē mā-”vi̍śatāgṃ sa̠mīchī̍ bhū̠tasya̠ bhavya̠syāva̍ruddhyai̠ sarva̠māyu̍rayāṇi̠
sarva̠māyu̍rayāṇi ॥ ā̠bhi-rgī̠rbhi-ryadatō̍ na ū̠namāpyā̍yaya harivō̠ vardha̍mānaḥ ।
ya̠dā stō̠tṛbhyō̠ mahi̍ gō̠trā ru̠jāsi̍ bhūyiṣṭha̠bhājō̠ adha̍ tē syāma ॥ brahma̠ prāvā̍diṣma̠ tannō̠ mā hā̍sīt ॥ ōṃ śānti̠-śśānti̠-śśānti̍ḥ ॥ 94 ॥
(pa̠rā̠vatō̍-dadhātu-ba̠ddhān-jinva̍tha-dṛ̠śē-+sa̠pta cha̍) (a. 42)

(namō̍ – yu̠ñjatē̠ – vṛṣṇō̠ aśva̍sya̠ – brahma̍-nprava̠rgyē̍ṇa̠ – brahma̠-npracha̍riṣyāmō̠ – daśa̠ prāchī̠ – rapa̍śyaṅgō̠pām – dē̠vasya̍ – samu̠drā – yē̠ṣē pī̍pihi̠ – gharma̠ yā tē̍ – mahī̠nā-ñcha̠tvā – ryaskā̠n̠. – yā pu̠rastā̎-thsa̠pta sa̍pta – prā̠ṇāya̠ trīṇi̍ – pū̠ṣṇē cha̠tvā-ryu – da̠syaikā̍daśa̠ – yāstē̍ sa̠ptā – gni-rdhru̠vasī̠ḥ daikā̠nna vigṃ̍śati̠–r bhūrū̠rdhva stri̠gṃ̠śata-d- bhū-rmayi̠ ṣōḍa̍śa̠ – yāstē̍ ghō̠rā nava̠ – snikchā̠ṣṭau – dhuni̍ścha̠ dvē – u̠graścha̠ trīṇya̍ – hōrā̠trē pañcha̠ – kha-ṭtrīṇi̠ – vigā-ssa̠ptada̠śā – sṛ̍-nmukha-ścha̠tvāri̠ – yadē̠ta-dvṛ̍ka̠saḥ pañcha̠ – yadī̍ṣi̠ta ścha̠tvāri̠ – dīrgha̍mukhi̠ trīṇī̠ – tthā chcha̠tvāri̠ – yadē̠ta-dbhū̠tāni̠ ṣaṭ – pra̠sārya̠ trīṇya – tri̍ṇā̠ daśā- ha̠rāva̍dya̠ – brahma̍ṇā̠ ṣaṭ-thṣaḍ – uttu̍dā̠ṣṭau – bhū-ṣṣaṭ – pṛ̍thi̠vya̍ṣṭa ṣa̍ṣṭi̠ḥ – śanna̍-ssa̠ptapa̍ñchā̠śa-ddvicha̍tvārigṃśat )

(namō̍ vā̠chē – brahma̍-nprava̠rgyē̍ṇa̠ – mayi̠ ru – ga̠ntari̍kṣēṇa – pi̠tā nō̍-‘si – mahī̠nā – mupa̍ nō̠ – yadē̠ta-d- bhū–r dyū̠bhi śchatu̍-rnavatiḥ)

॥ hari̍ḥ ōm ॥

॥ kṛṣṇa yajurvēdīya taittirīya āraṇyakē chaturthaḥ prapāṭhaka-ssamāptaḥ ॥