KYTA 1 Aruna Ketuka Chayanam – Krishna Yajurveda Taittiriya Aranyaka Patha – Bhadram Karnebhi

kṛṣṇa yajurvēdīya taittirīya āraṇyakē prathamaḥ prapāṭhakaḥ – aruṇakētukachayanaṃ

ō-nnamaḥ paramātmanē, śrī mahāgaṇapatayē namaḥ,
śrī gurubhyō namaḥ । ha̠ri̠ḥ ōm ॥

anuvākaṃ 1
bha̠dra-ṅkarṇē̍bhi-śśṛṇu̠yāma̍ dēvāḥ ।
bha̠dra-mpa̍śyēmā̠kṣabhi̠-ryaja̍trāḥ ।
sthi̠rairaṅgai̎stuṣṭu̠vāgṃ sa̍sta̠nūbhi̍ḥ । vyaśē̍ma dē̠vahi̍ta̠ṃ yadāyu̍ḥ ॥
sva̠sti na̠ indrō̍ vṛ̠ddhaśra̍vāḥ ।
sva̠sti na̍ḥ pū̠ṣā vi̠śvavē̍dāḥ ।
sva̠sti na̠stārkṣyō̠ ari̍ṣṭanēmiḥ ।
sva̠sti nō̠ bṛha̠spati̍-rdadhātu ॥
āpa̍māpāma̠pa-ssarvā̎ḥ ।
a̠smā-da̠smā-di̠tō-‘muta̍ḥ ॥ 1 ॥

a̠gnirvā̠yuścha̠ sūrya̍ścha । sa̠ha sa̍ñcha-ska̠rardhi̍yā ॥ vā̠yvaśvā̍ raśmi̠pata̍yaḥ । marī̎chyātmānō̠ adru̍haḥ । dē̠vī-rbhu̍vana̠ sūva̍rīḥ । pu̠tra̠va̠ttvāya̍ mē suta ॥ mahānāmnī-rma̍hāmā̠nāḥ । ma̠ha̠sō ma̍hasa̠-ssva̍ḥ ।
dē̠vīḥ pa̍rjanya̠ sūva̍rīḥ । pu̠tra̠va̠ttvāya̍ mē suta ॥ 2 ॥

a̠pāśnyu̍ṣṇi-ma̠pā rakṣa̍ḥ । a̠pāśnyu̍ṣṇi-ma̠pā ragha̎m । apā̎ghrā̠mapa̍ chā̠varti̎m । apa̍ dē̠vīri̠tō hi̍ta ॥ vajra̍-ndē̠vīrajī̍tāg​ścha ।
bhuva̍na-ndēva̠sūva̍rīḥ । ā̠di̠tyānadi̍ti-ndē̠vīm । yōni̍nōrdhva-mu̠dīṣa̍ta ॥ śi̠vā na̠-śśanta̍mā bhavantu । di̠vyā āpa̠ ōṣa̍dhayaḥ( ) ।
su̠mṛ̠ḍī̠kā sara̍svati । mā tē̠ vyō̍ma sa̠ndṛśi̍ ॥ 3 ॥
(a̠muta̍ḥ – su̠ – tauṣa̍dhayō̠ dvē cha̍ ) (a. 1)

anuvākaṃ 2
smṛti̍ḥ pra̠tyakṣa̍-maiti̠hya̎m । anu̍māna-śchatuṣṭa̠yam । ē̠tairādi̍tya maṇḍalam ।
sarvai̍rēva̠ vidhā̎syatē ॥ sūryō̠ marī̍chi̠māda̍ttē । sarvasmā̎-dbhuva̍nāda̠dhi । tasyāḥ pāka vi̍śēṣē̠ṇa । smṛ̠ta-ṅkā̍la vi̠śēṣa̍ṇam ॥
na̠dīva̠ prabha̍vā-tkā̠chit । a̠kṣayyā̎-thsyanda̠tē ya̍thā ॥ 4 ॥

tānnadyō-‘bhi sa̍māya̠nti । sō̠ru-ssatī̍ na ni̠varta̍tē ॥
ē̠vannā̠nā sa̍mutthā̠nāḥ । kā̠lā-ssa̍ṃvathsa̠ragg​ śri̍tāḥ । aṇuśaścha ma̍haśa̠ścha । sarvē̍ samava̠yantri̍ tam ॥ sa tai̎-ssa̠rvai-ssa̍māvi̠ṣṭaḥ । ū̠ru-ssa̍nna ni̠varta̍tē । adhi saṃvathsa̍raṃ vi̠dyāt ।
tadēva̍ lakṣa̠ṇē ॥ 5 ॥

aṇubhiścha ma̍hadbhi̠ścha । sa̠mārū̍ḍhaḥ pra̠dṛśya̍tē । saṃvathsaraḥ pra̍tyakṣē̠ṇa ।
nā̠dhisa̍ttvaḥ pra̠dṛśya̍tē ॥ pa̠ṭarō̍ vikli̍dhaḥ pi̠ṅgaḥ । ē̠ta-dva̍ruṇa̠ lakṣa̍ṇam । yatraita̍-dupa̠dṛśya̍tē । sa̠hasra̍-ntatra̠ nīya̍tē ॥
ēkagṃ hi śirō nā̍nā mu̠khē । kṛ̠thsna-nta̍dṛta̠ lakṣa̍ṇam ॥ 6 ॥

ubhayata-ssaptē̎mdriyā̠ṇi । ja̠lpita̍-ntvēva̠ dihya̍tē ॥
śuklakṛṣṇē saṃva̍thsara̠sya । dakṣiṇa vāma̍yōḥ pā̠r​śvayōḥ । tasyai̠ṣā bhava̍ti ॥ śu̠kra-ntē̍ a̠nyadya̍ja̠ta-ntē̍ a̠nyat ।
viṣu̍rūpē̠ aha̍nī̠ dyauri̍vāsi । viśvā̠ hi mā̠yā ava̍si svadhāvaḥ । bha̠drā tē̍ pūṣanni̠ha rā̠tira̠stviti̍ ॥
nātra̠ bhuva̍nam । na pū̠ṣā । na pa̠śava̍ḥ ।
nāditya-ssaṃvathsara ēva pratyakṣēṇa priyata̍maṃ vi̠dyāt । ētadvai saṃvathsarasya priyata̍magṃ rū̠pam । yō-‘sya mahānartha utpathsyamā̍nō bha̠vati । ida-mpuṇya-ṅku̍ruṣvē̠ti । tamāhara̍ṇa-nda̠dyāt ॥ 7 ॥
(ya̠thā̠ – la̠kṣa̠ṇa – ṛ̍tu̠lakṣa̍ṇa̠ṃ – bhuva̍nagṃ sa̠pta cha̍) (a. 2)

anuvākaṃ 3
sā̠ka̠ñjānāgṃ̍ sa̠ptatha̍māhu-rēka̠jam । ṣaḍu̍dya̠mā ṛṣa̍yō dēva̠jā iti̍ ।
tēṣā̍mi̠ṣṭāni̠ vihi̍tāni dhāma̠śaḥ । sthā̠trē rē̍jantē̠ vikṛ̍tāni rūpa̠śaḥ ॥ kōnu̍ maryā̠ ami̍thitaḥ । sakhā̠ sakhā̍yamabravīt । jahā̍kō a̠smadī̍ṣatē ॥
yasti̠tyāja̍ sakhi̠vida̠gṃ̠ sakhā̍yam ।
na tasya̍ vā̠chyapi̍ bhā̠gō a̍sti ।
yadīgṃ̍ śṛ̠ṇōtya̠lakagṃ̍ śṛṇōti ॥ 8 ॥

na hi pra̠vēda̍ sukṛ̠tasya̠ panthā̠miti̍ ॥
ṛ̠tur-ṛ̍tunā nu̠dyamā̍naḥ ।
vina̍nādā̠bhidhā̍vaḥ । ṣaṣṭiścha trigṃśa̍kā va̠lgāḥ ।
śu̠klakṛ̍ṣṇau cha̠ ṣāṣṭi̍kau ॥
sā̠rā̠ga̠va̠strai-rja̠rada̍kṣaḥ ।
va̠sa̠ntō vasu̍bhi-ssa̠ha । sa̠ṃva̠thsa̠rasya̍ savi̠tuḥ । prai̠ṣa̠kṛ-tpra̍tha̠ma-ssmṛ̍taḥ ॥ a̠mūnā̠daya̍-tētya̠nyān ॥ 9 ॥

a̠mūg​ścha̍ pari̠rakṣa̍taḥ । ē̠tā vā̠chaḥ pra̍yujya̠ntē । yatrai ta̍dupa̠dṛśya̍tē ॥ ē̠tadē̠va vi̍jānī̠yāt । pra̠māṇa̍-ṅkāla̠parya̍yē । vi̠śē̠ṣa̠ṇa-ntu̍ vakṣyā̠maḥ । ṛ̠tūnā̎-ntanni̠bōdha̍ta ॥ śuklavāsā̍ rudra̠gaṇaḥ । grī̠ṣmēṇā̍varta̠tē sa̍ha ।
ni̠jaha̍-npṛthi̍vīgṃ sa̠rvām ॥ 10 ॥

jyō̠tiṣā̎ ‘prati̠khyēna̍ saḥ ॥ vi̠śva̠rū̠pāṇi̍ vāsā̠gṃ̠si । ā̠di̠tyānā̎-nni̠bōdha̍ta । saṃvathsarīṇa̍-ṅkarma̠phalam । var​ṣābhi-rda̍datā̠gṃ̠ saha ॥ aduḥkhō̍ duḥkha cha̍kṣuri̠va । tadmā̍ pīta iva̠ dṛśya̍tē । śītēnā̎ vyatha̍yanni̠va । ru̠ruda̍kṣa iva̠ dṛśya̍tē ॥ hlādayatē̎ jvala̍taśchai̠va ।
śā̠myata̍śchāsya̠ chakṣu̍ṣī । yāvai prajā bhragg̍śya̠ntē । saṃvathsarāttā bhragg̍śya̠ntē ॥ yā̠ḥ prati̍tiṣṭha̠nti । saṃvathsarē tāḥ prati̍tiṣṭha̠nti । va̠r̠ṣābhya̍ itya̠rthaḥ ॥ 11 ॥
(śṛ̠ṇō̠ – tya̠nyānth – sa̠rvā – mē̠va ṣaṭcha̍) (a. 3)

anuvākaṃ 4
akṣi̍du̠ḥkhōtthi̍tasyai̠va । vi̠prasa̍nnē ka̠nīni̍kē । āṅktē chādga̍ṇa-nnā̠sti । ṛ̠bhūṇā̎-ntanni̠bōdha̍ta ॥ ka̠na̠kā̠bhāni̍ vāsā̠gṃ̠si । a̠hatā̍ni ni̠bōdha̍ta ।
annamaśrnīta̍ mṛjmī̠ta । a̠haṃ vō̍ jīva̠napra̍daḥ ॥ ē̠tā vā̠chaḥ pra̍yujya̠ntē ।
śa̠radya̍trōpa̠ dṛśya̍tē ॥ 12 ॥
abhidhūnvantō-‘bhighna̍nta i̠va । vā̠tava̍ntō ma̠rudga̍ṇāḥ ॥ amutō jētumiṣumu̍khami̠va । sannaddhā-ssaha da̍dṛśē̠ ha । apaddhvastai-rvastiva̍rṇairi̠va । vi̠śi̠khāsa̍ḥ kapa̠rdinaḥ ॥ akruddhasya yōthsya̍māna̠sya । kṛ̠ddhasyē̍va̠ lōhi̍nī । hēmataśchakṣu̍ṣī vi̠dyāt । a̠kṣṇayō̎ḥ, kṣipa̠ṇōri̍va ॥ 13 ॥

durbhikṣa-ndēva̍lōkē̠ṣu । ma̠nūnā̍muda̠ka-ṅgṛ̍hē । ē̠tā vā̠chaḥ pra̍vada̠ntīḥ । vai̠dyutō̍ yānti̠ śaiśi̍rīḥ ॥ tā a̠gniḥ pava̍mānā̠ anvai̎kṣata । i̠ha jī̍vi̠kāma-pa̍ripaśyann । tasyai̠ṣā bhava̍ti ॥ i̠hēha va̍-ssvata̠pasaḥ । maru̍ta̠-ssūrya̍tvachaḥ । śarma̍ sa̠prathā̠ āvṛ̍ṇē ॥ 14 ॥
(dṛśya̍ta – i̠vā – vṛ̍ṇē) (a. 4)

anuvākaṃ 5
ati̍ tā̠mrāṇi̍ vāsā̠gṃ̠si । a̠ṣṭiva̍jri śa̠taghni̍ cha ।
viśvē dēvā vipra̍hara̠nti । a̠gniji̍hvā a̠saścha̍ta ॥ naiva dēvō̍ na ma̠rtyaḥ । na rājā va̍ruṇō̠ vibhuḥ । nāgni-rnēndrō na pa̍vamā̠naḥ । mā̠tṛkka̍chcha na̠ vidya̍tē ॥ di̠vyasyaikā̠ dhanu̍rārtniḥ ।
pṛ̠thi̠vyāmapa̍rā śri̠tā ॥ 15 ॥

tasyēndrō vamri̍rūpē̠ṇa । dha̠nurjyā̍-maChi̠nathsva̍yam ॥ tadi̍ndra̠dhanu̍ritya̠jyam । a̠bhrava̍rṇēṣu̠ chakṣa̍tē । ētadēva śaṃyō-rbār​ha̍spatya̠sya । ē̠ta-dru̍drasya̠ dhanuḥ ॥ ru̠drasya̍ tvēva̠ dhanu̍rārtniḥ । śira̠ utpi̍pēṣa ।
sa pra̍va̠rgyō̍-‘bhavat । tasmā̠-dya-ssapra̍va̠rgyēṇa̍ ya̠jñēna̠ yaja̍tē ।
ru̠drasya̠ sa śira̠ḥ prati̍dadhāti । nainagṃ̍ ru̠dra āru̍kō bhavati । ya ē̠vaṃ vēda̍ ॥ 16 ॥
(śri̠tā – yaja̍tē̠ trīṇi̍ cha) (a. 5)

anuvākaṃ 6
a̠tyū̠rdhvā̠kṣō-‘ti̍raśchāt । śiśi̍raḥ pra̠dṛśya̍tē ।
naiva rūpa-nna̍ vāsā̠gṃ̠si । na chakṣu̍ḥ prati̠dṛśya̍tē ॥ a̠nyōnya̠-ntu na̍ higg​srā̠taḥ । sa̠ta sta̍-ddēva̠lakṣa̍ṇam । lōhitō-‘kṣṇi śā̍raśī̠r​ṣṇiḥ ।
sū̠ryasyō̍daya̠na-mpra̍ti ॥ tva-ṅkarōṣi̍ nyañja̠likām । tva̠-ṅkarō̍ṣi ni̠jānu̍kām ॥ 17 ॥

nijānukāmē̎ nyañja̠likā । amī vācha-mupāsa̍tāmi̠ti ॥
tasmai sarva ṛtavō̍ nama̠ntē । maryādā karatvā-tpra̍purō̠dhām । brāhmaṇa̍ āpnō̠ti । ya ē̍vaṃ vē̠da ।
sa khalu saṃvathsara ētai-ssēnānī̍bhi-ssa̠ha ।
indrāya sarvān-kāmāna̍bhiva̠hati । sa dra̠phsaḥ ।
tasyai̠ṣā bhava̍ti ॥ 18 ॥

ava̍ dra̠phsō agṃ̍śa̠matī̍matiṣṭhat । i̠yā̠naḥ kṛ̠ṣṇō da̠śabhi̍-ssa̠hasrai̎ḥ ।
āva̠rta-mindra̠-śśachyā̠ dhama̍ntam । upasnuhi ta-nnṛmaṇā-matha̍drāmi̠ti ॥ ētayai vēndra-ssalā vṛ̍kyā sa̠ha । asurā-npa̍rivṛ̠śchati । pṛthi̍vya̠gṃ̠ śuma̍tī । tāma̠nva-va̍sthita-ssaṃvathsa̠rō di̠vañcha̍ ।
naivaṃ viduṣā-”chāryā̎-ntēvā̠sinau । anyōnyasmai̎ druhyā̠tām । yō dru̠hyati । bhraśyatē sva̍rgā-llō̠kāt । ityatu ma̍ṇḍalā̠ni । sūrya maṇḍalā̎ nyākhyā̠yikāḥ । ata ūrdhvagṃsa̍nirva̠chanāḥ ॥ 19 ॥
(ni̠jānu̍kā̠ṃ – bhava̍ti – druhyā̠tā-mpañcha̍ cha) (a. 6)
anuvākaṃ 7
ārōgō bhrājaḥ paṭara̍ḥ pata̠ṅgaḥ । svarṇarō jyōtiṣīmān̍. vibhā̠saḥ । tē asmai sarvē divamā̍tapa̠nti । ūrja-nduhānā anapasphura̍nta i̠ti ॥ kaśya̍pō-‘ṣṭa̠maḥ । sa mahāmēru-nna̍ jahā̠ti । tasyai̠ṣā bhava̍ti ॥ yattē̠ śilpa̍-ṅkaśyapa rōcha̠nāva̍t । i̠ndri̠yāva̍-tpuṣka̠la-ñchi̠trabhā̍nu ।
yasmi̠-nthsūryā̠ arpi̍tā-ssa̠pta sā̠kam ॥ 20 ॥

tasmi-nrājāna-madhiviśrayē̍mami̠ti ॥ tē asmai sarvē kaśyapā-jjyōti̍–rlabha̠ntē । tān​thsōmaḥ kaśyapādadhi̍ nirdha̠mati । bhrastā karma kṛ̍divai̠vam ॥
prāṇō jīvānīndriya̍ jīvā̠ni । sapta śīr​ṣa̍ṇyāḥ prā̠ṇāḥ ।
sūryā i̍tyāchā̠ryāḥ ॥ apaśyamaha mētān-thsapta sū̎ryāni̠ti । pañchakarṇō̍ vāthsyā̠yanaḥ । saptakarṇa̍ścha plā̠kṣiḥ ॥ 21 ॥

ānuśravika ēva nau kaśya̍pa i̠ti । ubhau̍ vēda̠yitē ।
na hi śēkumiva mahāmē̍ru-ṅga̠ntum ॥
apaśyamahamēta-thsūryamaṇḍala-mpariva̍rtamā̠nam ।
gā̠rgyaḥ prā̍ṇatrā̠taḥ । gachChanta ma̍hāmē̠rum । ēka̍ñchāja̠hatam ॥ bhrājapaṭara pata̍ṅgā ni̠hanē । tiṣṭhannā̍tapa̠nti । tasmā̍di̠ha taptri̍ tapāḥ ॥ 22 ॥

a̠mutrē̠tarē । tasmā̍di̠hā taptri̍ tapāḥ ॥ tēṣā̍mēṣā̠ bhava̍ti ॥ sa̠pta sūryā̠ diva̠-manu̠ pravi̍ṣṭāḥ । tāna̠nvēti̍ pa̠thibhi̍-rdakṣi̠ṇāvān̍ । tē asmai sarvē ghṛtamā̍tapa̠nti । ūrja-nduhānā anapasphura̍nta i̠ti ॥
saptartvija-ssūryā i̍tyāchā̠ryāḥ ॥ tēṣā̍mēṣā̠ bhava̍ti ॥
sa̠pta diśō̠ nānā̍ sūryāḥ ॥ 23 ॥
sa̠pta hōtā̍ra ṛ̠tvija̍ḥ । dēvā ādityā̍ yē sa̠pta ।
tēbhi-ssōmābhī rakṣa̍ṇa i̠ti ॥ tada̍pyāmnā̠yaḥ । digbhrāja ṛtū̎n karō̠ti ॥ ēta̍yaivā̠vṛtā ”sahasrasūryatāyā iti vai̍śampā̠yanaḥ ॥ tasyai̠ṣā bhava̍ti ॥
yaddyāva̍ indra tē śa̠tagṃ śa̠ta-mbhūmī̎ḥ । u̠ta syuḥ ।
na tvā̍ vajrin-thsa̠hasra̠gṃ̠ sūryā̎ḥ ॥ 24 ॥

anu na jātamaṣṭa rōda̍sī i̠ti ॥ nānā liṅgatvā-dṛtūnā-nnānā̍ sūrya̠tvam ॥ aṣṭau tu vyavasi̍tā i̠ti ॥ sūryamaṇḍalā-nyaṣṭā̍ta ū̠rdhvam ॥
tēṣā̍mēṣā̠ bhava̍ti ॥ chi̠tra-ndē̠vānā̠-muda̍gā̠danī̍kam । chakṣu̍-rmi̠trasya̠ varu̍ṇasyā̠gnēḥ । ā-‘prā̠ dyāvā̍ pṛthi̠vī a̠ntari̍kṣam ।
sūrya ātmā jagatastasthu̍ṣaśchē̠ti ॥ 25 ॥
(sā̠kaṃ – plā̠kṣi – staptri̍tapā̠ – nānā̍sūryā̠ḥ – sūryā̠ – +nava̍ cha) (a. 7)

anuvākaṃ 8
kvēdamabhra̍-nnivi̠śatē । kvāyagṃ̍ saṃvathsa̠rō mi̍thaḥ । kvāhaḥ kvēya-ndē̍va rā̠trī । kva māsā ṛ̍tava̠-śśritāḥ ॥ ardhamāsā̍ muhū̠rtāḥ । nimēṣāstu̍ṭibhi̠ḥ (nimēṣāstra̍ṭibhi̠ḥ) saha । kvēmā āpō ni̍viśa̠ntē । ya̠dītō̍ yānti̠ sampra̍ti ॥ kālā aphsu ni̍viśa̠ntē । ā̠pa-ssūryē̍ sa̠māhi̍tāḥ ॥ 26 ॥

abhrā̎ṇya̠paḥ pra̍padya̠ntē । vi̠dyuthsūryē̍ sa̠māhi̍tā ॥ anavarṇē i̍mē bhū̠mī । i̠yañchā̍sau cha̠ rōda̍sī ॥ kigg​ svidatrānta̍rā bhū̠tam । yē̠nēmē vi̍dhṛtē̠ ubhē ।
vi̠ṣṇunā̍ vidhṛ̍tē bhū̠mī । i̠ti va̍thsasya̠ vēda̍nā ॥
irā̍vatī dhēnu̠matī̠ hi bhū̠tam । sū̠ya̠va̠sinī̠ manu̍ṣē daśa̠syē̎ ॥ 27 ॥

vya̍ṣṭabhnā̠-drōda̍sī̠ viṣṇa̍vē̠tē । dā̠dhartha̍ pṛthi̠vī-ma̠bhitō̍ ma̠yūkhai̎ḥ ॥
kinta-dviṣṇō rbala̍mā̠huḥ । kā̠ dīpti̍ḥ ki-mpa̠rāya̍ṇam ।
ēkō̍ ya̠ddhā-ra̍ya ddē̠vaḥ । rē̠jatī̍ rōda̠sī u̍bhē ॥ vātādviṣṇō-rba̍la mā̠huḥ । a̠kṣarā̎-ddīpti̠ ruchya̍tē । tri̠padā̠ddhāra̍ya-ddē̠vaḥ । yadviṣṇō̍rēka̠-mutta̍mam ॥ 28 ॥

a̠gnayō̍ vāya̍vaśchai̠va । ē̠tada̍sya pa̠rāya̍ṇam ॥ pṛchChāmi tvā pa̍ra-mmṛ̠tyum । a̠vama̍-mmaddhya̠mañcha̍tum । lō̠kañcha̠ puṇya̍pāpā̠nām ।
ē̠ta-tpṛ̍chChāmi̠ sampra̍ti ॥ a̠mumā̍huḥ pa̍ra-mmṛ̠tyum । pa̠vamā̍na-ntu̠ maddhya̍mam । a̠gnirē̠vāva̍mō mṛ̠tyuḥ । cha̠ndramā̎-śchatu̠ruchya̍tē ॥ 29 ॥

a̠nā̠bhō̠gāḥ pa̍ra-mmṛ̠tyum । pā̠pā-ssa̍ṃyanti̠ sarva̍dā । ābhōgāstvēva̍ saṃya̠nti । ya̠tra pu̍ṇyakṛ̠tō ja̍nāḥ ॥ tatō̍ ma̠ddhyama̍māya̠nti । cha̠tuma̍gniñcha̠ sampra̍ti ॥ pṛchChāmi tvā̍ pāpa̠kṛtaḥ । ya̠tra yā̍taya̠tē ya̍maḥ । tvannasta–dbrahma̍-nprabrū̠hi । ya̠di vē̎tthā-‘sa̠tō gṛ̍hān ॥ 30 ॥

ka̠śyapā̍ dudi̍tā-ssū̠ryāḥ । pā̠pānni̍rghnanti̠ sarva̍dā ।
rōdasyōranta̍-rdēśē̠ṣu । tatra nyasyantē̍ vāsa̠vaiḥ ॥
tē ‘śarīrāḥ pra̍padya̠ntē ।
ya̠thā ‘pu̍ṇyasya̠ karma̍ṇaḥ । apā̎ṇya̠pāda̍ kēśā̠saḥ । ta̠tra tē̍-‘yōni̠jā ja̍nāḥ ॥ mṛtvā punarmṛtyu-mā̍padya̠ntē । a̠dyamā̍nā-ssva̠karma̍bhiḥ ॥ 31 ॥

āśātikāḥ krima̍ya i̠va । tataḥ pūyantē̍ vāsa̠vaiḥ ॥
apai̍ta-mmṛ̠tyu-ñja̍yati । ya ē̠vaṃ vēda̍ । sa khalvaiva̍ṃ vidbrā̠hmaṇaḥ । dī̠rghaśru̍ttamō̠ bhava̍ti । kaśya̍pa̠syāti̍thi̠-ssiddhaga̍mana̠-ssiddhāga̍manaḥ ॥
tasyai̠ṣā bhava̍ti ॥ āyasmina̎-thsa̠pta vā̍sa̠vāḥ ।
rōha̍nti pū̠rvyā̍ ruha̍ḥ ॥ 32 ॥

ṛṣi̍r​ha dīrgha̠śrutta̍maḥ । indrasya gharmō ati̍thiri̠ti ॥
kaśyapaḥ paśya̍kō bha̠vati । yathsarva-mparipaśyatī̍ti sau̠kṣmyāt ॥ athāgnē̍raṣṭapu̍ruṣa̠sya । tasyai̠ṣā bhava̍ti ॥ agnē̠ naya̍ su̠pathā̍ rā̠yē a̠smān ।
viśvā̍ni dēva va̠yunā̍ni vi̠dvān । yu̠yō̠ddhya̍sma-jju̍hurā̠ṇamēna̍ḥ । bhūyiṣṭhāntē nama uktiṃ vi̍dhēmē̠ti ॥ 33 ॥
sa̠māhi̍tā – daśa̠syē̍ – utta̍ma̠-muchya̍tē-gṛhān-thsva̠karma̍bhiḥ-pū̠rvyā̍ ruha̍-i̠ti) (a. 8)

anuvākaṃ 9
agniścha jāta̍vēdā̠ścha । sahōjā a̍jirā̠prabhuḥ । vaiśvānarō na̍ryāpā̠ścha । pa̠ṅktirā̍dhāścha̠ sapta̍maḥ ।
visarpē vāṣṭa̍mō-‘gnī̠nām । ētē-‘ṣṭau vasavaḥ, kṣi̍tā i̠ti ॥ yathartvē-vāgnē-rarchirvarṇa̍ viśē̠ṣāḥ ।
nīlārchiścha pītakā̎rchiśchē̠ti ॥ atha vāyō-rēkādaśa-puruṣasyaikādaśa̍strīka̠sya ॥
prabhrājamānā vya̍vadā̠tāḥ ॥ 34 ॥

yāścha vāsu̍ki vai̠dyutāḥ । rajatāḥ paru̍ṣā-śśyā̠māḥ ।
kapilā a̍tilō̠hitāḥ । ūrdhvā avapa̍tantā̠ścha । vaidyuta i̍tyēkā̠daśa ॥ nainaṃ vaidyutō̍ hina̠sti । ya ē̍vaṃ vē̠da ॥ sa hōvācha vyāsaḥ pā̍rāśa̠ryaḥ ।
vidyudvadhamēvāha-mmṛtyumai̎chChami̠ti ॥
na tvakā̍magṃ ha̠nti ॥ 35 ॥

ya ē̍vaṃ vē̠da ॥ atha ga̍ndharva̠gaṇāḥ । svāna̠ bhrāṭ । aṅghā̍ri̠-rbambhā̍riḥ । hasta̠-ssuha̍staḥ । kṛśā̍nu-rvi̠śvāva̍suḥ । mūrdhanvān-thsū̎ryava̠rchāḥ ।
kṛtirityēkādaśa ga̍ndharva̠gaṇāḥ ॥ dēvāścha ma̍hādē̠vāḥ । raśmayaścha dēvā̍ gara̠giraḥ ॥ 36 ॥

naina-ṅgarō̍ hina̠sti । ya ē̍vaṃ vē̠da ॥ gau̠rī mi̍māya sali̠lāni̠ takṣa̍tī । ēka̍padī dvi̠padī̠ sā chatu̍ṣpadī । a̠ṣṭāpa̍dī̠ nava̍padī babhū̠vuṣī̎ । sahasrākṣarā paramē vyō̍manni̠ti ॥ vāchō̍ viśē̠ṣaṇam ॥
atha nigada̍vyākhyā̠tāḥ । tānanukra̍miṣyā̠maḥ ॥
va̠rāhava̍ḥ-svata̠pasaḥ ॥ 37 ॥

vi̠dyu-nma̍hasō̠ dhūpa̍yaḥ । śvāpayō gṛhamēdhā̎śchētyē̠tē । yē̠ chēmē-‘śi̍mivi̠dviṣaḥ ॥ parjanyā-ssapta pṛthivīmabhiva̍r​ṣa̠nti ।
vṛṣṭi̍bhiri̠ti । ētayaiva vibhakti vi̍parī̠tāḥ । sa̠ptabhi̠rvātai̍ rudī̠ritāḥ । amūṃ lōkā-nabhiva̍r​ṣa̠nti । tēṣā̍mēṣā̠ bhava̍ti ॥ sa̠mā̠na-mē̠taduda̍kam ॥ 38 ॥

u̠chchaitya̍va̠ chāha̍bhiḥ । bhūmi̍-mpa̠rjanyā̠ jinva̍nti ।
diva-ñjinvan-tyagna̍ya i̠ti ॥ yadakṣa̍ra-mbhū̠takṛ̍tam ।
viśvē̍ dēvā u̠pāsa̍tē । ma̠har​ṣi̍masya gō̠ptāra̎m । ja̠mada̍gni̠-maku̍rvata ॥ ja̠mada̍gni̠-rāpyā̍yatē । Chandō̍bhi-śchaturutta̠raiḥ । rājña̠-ssōma̍sya tṛ̠ptāsa̍ḥ ॥ 39 ॥

brahma̍ṇā vī̠ryā̍vatā । śi̠vā na̍ḥ pra̠diśō̠ diśa̍ḥ ॥ tachCha̠ṃyōrā vṛ̍ṇīmahē । gā̠tuṃ ya̠jñāya̍ । gā̠tuṃ ya̠jñapa̍tayē । daivī̎ sva̠stira̍stu naḥ ।
sva̠sti-rmānu̍ṣēbhyaḥ । ū̠rdhva-ñji̍gātu bhēṣa̠jam ।
śannō̍ astu dvi̠padē̎ । śañchatu̍ṣpadē ॥
sōmapā(3) asōmapā(3) iti nigada̍vyākhyā̠tāḥ ॥ 40 ॥
(vya̠va̠dā̠tā – ha̠nti – ga̍ra̠gira – sta̠pasa – uda̍kaṃ – tṛptāsa̠ – śvatu̍ṣpada̠ ēka̍-ñcha) (a. 9)

anuvākaṃ 10
sa̠ha̠sra̠vṛdi̍ya-mbhū̠miḥ । pa̠raṃ vyō̍ma sa̠hasra̍vṛt । a̠śvinā̍ bhujyū̍ nāsa̠tyā । vi̠śvasya̍ jaga̠taspa̍tī ॥ jāyā bhūmiḥ pa̍tirvyō̠ma । mi̠thuna̍ntā a̠turya̍thuḥ । putrō bṛhaspa̍tī ru̠draḥ । sa̠ramā̍ iti̍ strīpu̠mam ॥ śu̠kraṃ vā̍ma̠nyadya̍ja̠taṃ vā̍ma̠nyat । viṣu̍rūpē̠ aha̍nī̠ dyauri̍va sthaḥ ॥ 41 ॥

viśvā̠ hi mā̠yā ava̍tha-ssvadhāvantau । bha̠drā vā̎-mpūṣaṇāvi̠ha rā̠tira̍stu ॥ vāsā̎tyau chi̠trau jaga̍tō ni̠dhānau̎ । dyāvā̍bhūmī cha̠ratha̍-ssa̠gṃ̠ sakhā̍yau ।
tāva̠śvinā̍ rā̠sabhā̎śvā̠ hava̍-mmē । śu̠bha̠spa̠tī̠ ā̠gatagṃ̍ sū̠ryayā̍ sa̠ha ॥ tyugrō̍ ha bhu̠jyu-ma̍śvinōda mē̠ghē । ra̠yinna kaśchi̍-nmamṛ̠vāँ(2) avā̍hāḥ । tamū̍hathu-rnau̠bhirā̎tma̠n-vatī̍bhiḥ ।
a̠nta̠ri̠kṣa̠ pruḍbhi̠ra-pō̍dakābhiḥ ॥ 42 ॥

ti̠sraḥ, kṣapa̠strirahā̍ ‘ti̠vraja̍dbhiḥ । nāsa̍tyā bhu̠jyumū̍hathuḥ pata̠ṅgaiḥ । sa̠mu̠drasya̠ dhanva̍nnā̠rdrasya̍ pā̠rē । tri̠bhī rathai̎-śśa̠tapa̍dbhi̠-ṣṣaḍa̍śvaiḥ ॥ sa̠vi̠tāra̠ṃ vita̍nvantam । anu̍baddhnāti śāmba̠raḥ । āpapūr​ṣaṃ-ba̍raśchai̠va ।
sa̠vitā̍ ‘rēpa̠sō̍ ‘bhavat ॥ tyagṃ sutṛptaṃ vi̍ditvai̠va । ba̠husō̍ma gi̠raṃ va̍śī ॥ 43 ॥

anvēti tugrō va̍kriyā̠ntam । āyasūyān-thsōma̍tṛphsu̠ṣu ॥
sa saṅgrāma-stamō̎dyō-‘tyō̠taḥ । vāchō gāḥ pi̍pāti̠ tat ।
sa tadgōbhi-sstavā̎ ‘tyētya̠nyē । ra̠kṣasā̍ ‘nanvi̠tāścha̍ yē ॥ a̠nvēti̠ pari̍vṛttyā̠-‘staḥ । ē̠vamē̠tau sthō̍ aśvinā । tē ē̠tē dyu̍ḥ pṛthi̠vyōḥ । aha̍raha̠-rgarbha̍ndadhāthē ॥ 44 ॥

tayō̍ rē̠tau va̠thsā va̍hōrā̠trē । pṛ̠thi̠vyā aha̍ḥ । di̠vō rātri̍ḥ । tā avi̍sṛṣṭau । dampa̍tī ē̠va bha̍vataḥ ॥ tayō̍ rē̠tau va̠thsau । a̠gniśchā̍-di̠tyaścha̍ । rā̠trērva̠thsaḥ । śvē̠ta ā̍di̠tyaḥ । ahnō̠-‘gniḥ ॥ 45 ॥
tā̠mrō a̍ru̠ṇaḥ । tā avi̍sṛṣṭau । dampa̍tī ē̠va bha̍vataḥ ॥ tayō̍ rē̠tau va̠thsau । vṛ̠traścha̍ vaidyu̠taścha̍ । a̠gnērvṛ̠traḥ । vai̠dyuta̍ ādi̠tyasya̍ ।
tā avi̍sṛṣṭau । dampa̍tī ē̠va bha̍vataḥ ॥ tayō̍ rē̠tau va̠thsau ॥ 46 ॥

u̠ṣmā cha̍ nīhā̠raścha̍ । vṛ̠trasyō̠ṣmā । vai̠dyu̠tasya̍ nīhā̠raḥ । tau tāvē̠va prati̍padyētē ॥ sēyagṃ rātrī̍ ga̠rbhiṇī̍ pu̠trēṇa̠ saṃva̍sati ।
tasyā̠ vā ē̠tadu̠lbaṇa̎m । yadrātrau̍ ra̠śmaya̍ḥ । yathā̠ gōrga̠rbhiṇyā̍ u̠lbaṇa̎m । ē̠vamē̠tasyā̍ u̠lbaṇa̎m ॥ prajayiṣṇuḥ prajayā cha paśubhi̍ścha bha̠vati ।
ya ē̍vaṃ vē̠da । ētamudyanta-mapiya̍ntañchē̠ti । ādityaḥ puṇya̍sya va̠thsaḥ । atha pavi̍trāṅgi̠rasaḥ ॥ 47 ॥
(sthō – ‘pō̍dakābhi–r vaśī – dadhāthē – a̠gni – stayō̍ rē̠tau va̠thsau – bha̠vati cha̠tvāri̍ cha) (a. 10)

anuvākaṃ 11
pa̠vitra̍vanta̠ḥ pari̠vāja̠māsa̍tē । pi̠taiṣā̎-mpra̠tnō a̠bhira̍kṣati vra̠tam । ma̠hassa̍mu̠draṃ varu̍ṇa sti̠rōda̍dhē । dhīrā̍ ichChēku̠rdharu̍ṇēṣvā̠rabha̎m ॥
pa̠vitra̍-ntē̠ vita̍ta̠-mbrahma̍ṇa̠spatē̎ । prabhu̠rgātrā̍ṇi̠ paryē̍ṣi vi̠śvata̍ḥ ।
ata̍ptatanū̠-rna tadā̠mō a̍śnutē । śṛ̠tāsa̠ idvaha̍n-ta̠sta-thsamā̍śata ॥ bra̠hmā dē̠vānā̎-mpada̠vīḥ ka̍vī̠nāmṛṣi̠rviprā̍ṇā-mmahi̠ṣō mṛ̠gāṇā̎m । śyē̠nō gṛdhrā̍ṇā̠g̠ svadhi̍ti̠-rvanā̍nā̠gṃ̠ sōma̍ḥ pa̠vitra̠matyē̍ti̠ rēbhann̍ ॥ asa̍ta-ssa̠dyē tata̍kṣuḥ ॥ 48 ॥

ṛṣa̍ya-ssa̠ptātri̍ścha̠ yat । sarvē-‘trayō a̍gastya̠ścha ।
nakṣa̍trai̠-śśaṅkṛ̍tō ‘vasann ॥ atha̍ savitu̠-śśyāvāśva̠syā ‘varti̍kāmasya ॥ a̠mī ya ṛkṣā̠ nihi̍tā sa u̠chchā । nakta̠-ndadṛ̍śrē̠ kuha̍chi̠ddivē̍yuḥ ।
ada̍bdhāni̠ varu̍ṇasya vra̠tāni̍ । vi̠chā̠kaśa̍-chcha̠ndramā̠ nakṣa̍tramēti ॥
ta-thsa̍vi̠tu-rvarē̎ṇyam । bhargō̍ dē̠vasya̍ dhīmahi ॥ 49 ॥

dhiyō̠ yō na̍ḥ prachō̠dayā̎t ॥ tathsa̍vi̠tu-rvṛ̍ṇīmahē ।
va̠ya-ndē̠vasya̠ bhōja̍nam । śrēṣṭhagṃ̍ sarva̠dhāta̍mam । tura̠-mbhaga̍sya dhīmahi ॥
apā̍gūhata savitā̠ tṛbhīn̍ । sarvā̎-ndi̠vō andha̍saḥ ।
nakta̍006Ch;̠tānya̍bhava-ndṛ̠śē । asthya̠sthnā sambha̍viṣyāmaḥ ॥ nāma̠ nāmai̠va nā̠ma mē̎ ॥ 50 ॥

napugṃsa̍ka̠-mpumā̠g̠strya̍smi । sthāva̍rō-‘smyatha̠ jaṅga̍maḥ ।
ya̠jē-‘yakṣi̠ yaṣṭā̠hē cha̍ ॥ mayā̍ bhū̠tānya̍yakṣata । pa̠śavō̍ mama̍ bhūtā̠ni । anūbandhyō ‘smya̍haṃ vi̠bhuḥ ॥ striya̍-ssa̠tīḥ । tā u̍ mē pu̠gṃ̠sa ā̍huḥ ।
paśya̍dakṣa̠ṇvānna-vichē̍tada̠ndhaḥ । ka̠viryaḥ pu̠tra-ssa i̠mā chi̍kēta ॥ 51 ॥

yastā vi̍jā̠nā-thsa̍vi̠tuḥ pi̠tā-‘sa̍t ॥ a̠ndhō maṇima̍vindat । tama̍naṅguli̠-rāva̍yat । a̠grī̠vaḥ pratya̍muñchat । tamaji̍hva a̠saścha̍ta ॥
ūrdhvamūla-ma̍vākChā̠kham । vṛ̠kṣaṃ yā̍ vēda̠ sampra̍ti । na sa jātu jana̍-śśradda̠ddhyāt । mṛ̠tyurmā̍ māra̠yādi̍tiḥ ॥ hasitagṃ rudi̍taṅgī̠tam ॥ 52 ॥

vīṇā̍ paṇa va̠lāsi̍tam । mṛ̠tañjī̠vañcha̍ yatki̠ñchit ।
a̠ṅgāni̍ snēva̠ viddhi̍ tat ॥ atṛ̍ṣya̠gg̠stṛṣya̍ dhyāyat । a̠smājjā̠tā mē̍ mithū̠ charann̍ । putrō nir-ṛtyā̍ vaidē̠haḥ । a̠chētā̍ yaścha̠ chēta̍naḥ ॥ sa̠ ta-mmaṇima̍vindat । sō̍-‘naṅguli̠rāva̍yat ।
sō̠-‘grī̠vaḥ pratya̍munchat ॥ 53 ॥

sō-‘ji̍hvō a̠saścha̍ta ॥ naitamṛṣiṃ viditvā naga̍ra-mpra̠viśēt । ya̍di pra̠viśēt । mi̠thau chari̍tvā pra̠viśēt । tathsambhava̍sya vra̠tam ॥ ā̠ tama̍gnē ra̠thanti̍ṣṭha । ēkā̎śvamēka̠ yōja̍nam । ēkachakra̍-mēka̠dhuram ।
vā̠ta dhrā̍ji ga̠tiṃ vi̍bhō ॥ na̠ ri̠ṣyati̍ na vya̠thatē ॥ 54 ॥

nā̠syākṣō̍ yātu̠ sajja̍ti । yachChvētā̎-nrōhi̍tāg​śchā̠gnēḥ । ra̠thē yu̍ktvā-‘dhi̠tiṣṭha̍ti ॥ ēkayā cha daśabhiścha̍ svabhū̠tē । dvābhyā miṣṭayē vigṃ̍śatyā̠ cha । tisṛbhiścha vahasē trigṃ̍śatā̠ cha ।
niyudbhi-rvāyaviha tā̍ vimu̠ñcha ॥ 55 ॥
(tata̍kṣu–r dhīmahi – nā̠ma mē̍ – chikēta – gī̠taṃ – pratya̍muñcha-d- vya̠thatē – +sa̠pta cha̍) (a. 11)

anuvākaṃ 12
āta̍nuṣva̠ prata̍nuṣva । u̠ddhamādha̍ma̠ sandha̍ma । ādityē chandra̍varṇā̠nām । garbha̠ mā dhē̍hi̠ yaḥ pumān̍ ॥ i̠ta-ssi̠ktagṃ sūrya̍gatam ।
cha̠ndrama̍sē̠ rasa̍ṅkṛdhi ।
vārāda-ñjana̍yā-grē̠-‘gnim । ya ēkō̍ rudra̠ uchya̍tē ॥
a̠sa̠-ṅkhyā̠tā-ssa̍hasrā̠ṇi ।
sma̠ryatē̍ na cha̠ dṛśya̍tē ॥ 56 ॥

ē̠vamē̠tanni̍bōdhata ॥ ā ma̠ndrai-ri̍ndra̠ hari̍bhiḥ । yā̠ hi ma̠yūra̍-rōmabhiḥ । mātvā kēchinniyē muri̍nna pā̠śinaḥ । da̠dha̠nvēva̠ tā i̍hi ॥ mā ma̠ndrai-ri̍ndra̠ hari̍bhiḥ । yā̠mi ma̠yūra̍ rōmabhiḥ । mā mā kēchinniyē muri̍nna pā̠śinaḥ । ni̠dha̠nvēva̠ tāँ(2) i̍mi ॥
aṇubhiścha ma̍hadbhi̠ścha ॥ 57 ॥

ni̠ghṛṣvai̍ rasa̠māyu̍taiḥ । kālair-haritva̍māpa̠nnaiḥ । indrāyā̍hi sa̠hasra̍ yuk ॥ a̠gni-rvi̠bhrāṣṭi̍ vasanaḥ । vā̠yu-śśvēta̍sikadru̠kaḥ । sa̠ṃva̠thsa̠rō vi̍ṣū̠ varṇai̎ḥ । nityā̠stē ‘nucha̍rāsta̠va ॥
subrahmaṇyōgṃ subrahmaṇyōgṃ su̍brahma̠ṇyōm ।
indrāgachCha hariva āgachCha mē̍dhāti̠thēḥ । mēṣa vṛṣaṇaśva̍sya mē̠nē ॥ 58 ॥

gaurāvaskandinna-halyā̍yai jā̠ra । kauśika-brāhmaṇa gautama̍bruvā̠ṇa ॥ a̠ru̠ṇāśvā̍ i̠hāga̍tāḥ । vasa̍vaḥ pṛthivi̠ kṣita̍ḥ । a̠ṣṭau di̠gvāsa̍sō̠ ‘gnaya̍ḥ । agniścha jātavēdā̎śchētyē̠tē ॥ tāmrāśvā̎-stāmra̠rathāḥ । tāmravarṇā̎ stathā̠-‘sitāḥ । daṇḍahastā̎ḥ khāda̠gdataḥ । itō rudrā̎ḥ parā̠ṅgatāḥ ॥ 59 ॥

uktagg​ sthāna-mpramāṇañcha̍ pura̠ ita ॥ bṛha̠spati̍ścha savi̠tā cha̍ । vi̠śvarū̍pai-ri̠hāga̍tām । rathē̍nōdaka̠vartma̍nā । a̠phsuṣā̍ iti̠ taddva̍yōḥ ॥
uktō vēṣō̍ vāsā̠gṃ̠si cha । kālāvayavānā-mita̍ḥ pratī̠jyā । vāsātyā̍ itya̠śvinōḥ । kō-‘ntarikṣē śabdaṅka̍rōtī̠ti । vāsiṣṭhō rauhiṇō mīmāgṃ̍sā-ñcha̠krē । tasyai̠ṣā bhava̍ti ॥
vā̠śrēva̍ vi̠dyunmi̍māti va̠thsa-nna mā̠tā si̍ṣakti । yadē̍ṣāṃ vṛ̠ṣṭirasa̍rji ॥ diti̍ ॥ brahma̍ṇa u̠dara̍ṇamasi । brahma̍ṇa udī̠raṇa̍masi । brahma̍ṇa ā̠stara̍ṇamasi । brahma̍ṇa upa̠stara̍ṇamasi ॥ 60 ॥
(dṛśya̍tē̠ – cha – mē̠nē – pa̍rā̠-ṅgatā – ścha̠krē ṣaṭ cha̍) (a. 12)

anuvākaṃ 13
a̠ṣṭayō̍nī-ma̠ṣṭapu̍trām । a̠ṣṭapa̍tnī-mi̠mā-mmahī̎m । a̠haṃ vēda̠ na mē̍ mṛtyuḥ ।
na chāmṛ̍tyura̠ghāha̍rat ॥ a̠ṣṭayō̎nya̠ṣṭa pu̍tram । a̠ṣṭapa̍di̠da-ma̠ntari̍kṣam । a̠haṃ vēda̠ na mē̍ mṛtyuḥ । na chāmṛ̍tyura̠ghāha̍rat । a̠ṣṭayō̍nī-ma̠ṣṭapu̍trām । a̠ṣṭapa̍tnī-ma̠mūndiva̎m ॥ 61 ॥

a̠haṃ vēda̠ na mē̍ mṛtyuḥ ।
na chāmṛ̍tyura̠ghāha̍rat ॥ su̠trāmā̍ṇa-mpṛthi̠vī-ndyāma̍nē̠hasagṃ̍ su̠śarmā̍ṇa̠ madi̍tigṃ su̠praṇī̍tim । daivī̠-nnāvagg̍ svari̠trāmanā̍gasa̠masra̍vantī̠mā ru̍hēmā sva̠stayē̎ ॥ ma̠hīmū̠ṣuma̠hīmū̠ ṣu mā̠taragṃ̍ suvra̠tānā̍mṛ̠tasya̠ patnī̠mava̍sē huvēma । tu̠vi̠kṣa̠trāma̠jara̍ntīmurū̠chīgṃ su̠śarmā̍ṇa̠madi̍tigṃ su̠praṇī̍tim ॥ adi̍ti̠rdyau-radi̍ti-ra̠ntari̍kṣam ।
adi̍ti rmā̠tā sa pi̠tā sa pu̠traḥ । viśvē̍ dē̠vā adi̍ti̠ḥ pañcha̠ janā̎ḥ । adi̍ti-rjā̠ta-madi̍ti̠-rjani̍tvam ॥ a̠ṣṭau pu̠trāsō̠ adi̍tēḥ । yē jā̠tā sta̠nva̍ḥ pari̍ । dē̠vāँ (2) upa̍prai-thsa̠ptabhi̍ḥ ॥ 62 ॥

pa̠rā̠ mā̠rtā̠ṇḍamāsya̍t ॥ sa̠ptabhi̍ḥ pu̠trai-radi̍tiḥ । upa̠ prai-tpū̠rvya̍ṃ yuga̎m । pra̠jāyai̍ mṛ̠tyavē ta̍t । pa̠rā̠ mā̠rtā̠ṇḍa-mābha̍ra̠diti̍ ॥ tānanukra̍miṣyā̠maḥ ॥ mi̠traścha̠ varu̍ṇaścha । dhā̠tā chā̎rya̠mā cha̍ । agṃśa̍ścha̠ bhaga̍ścha । indraścha vivasvāg̍śchētyē̠tē ॥ hi̠ra̠ṇya̠ga̠rbha-ssama̍varta̠tāgrē̍ bhū̠tasya̍ jā̠taḥ pati̠rēka̍ āsīt । sa dā̍dhāra pṛthi̠vī-ndyā mu̠tēmā-ṅkasmai̍ dē̠vāya̍ ha̠viṣā̍ vidhēma ॥ ha̠gṃ̠sa-śśu̍chi̠ṣa-dvasu̍rantarikṣa̠-saddhōtā̍ vēdi̠ṣadati̍thi rdurōṇa̠sat । nṛ̠ṣa-dva̍ra̠sadṛ̍ta̠sa-dvyō̍ma̠sada̠bjā gō̠jā ṛ̍ta̠jā a̍dri̠jā ṛ̠taṃ-bṛ̠hat ॥
brahma̍ jajñā̠na-mpra̍tha̠ma-mpu̠rastā̠dvi sī̍ma̠ta-ssu̠ruchō̍ vē̠na ā̍vaḥ । sa bu̠dhniyā̍ upa̠mā a̍sya vi̠ṣṭhā-ssa̠taścha̠ yōni̠masa̍taścha̠ viva̍ḥ ॥ taditpa̠da-nna vichi̍kēta vi̠dvān । yanmṛ̠taḥ puna̍ra̠pyēti̍ jī̠vān । tri̠vṛdya-dbhuva̍nasya ratha̠vṛt । jī̠vō garbhō̠ na mṛ̠ta-ssa jī̍vāt ॥ miti̍ ॥
ga̠rbhaḥ prā̍jāpa̠tyaḥ । atha̠ puru̍ṣa-ssa̠ptapuru̍ṣaḥ ॥ 63 ॥
(a̠mū-ndivagṃ̍ – sa̠ptabhi̍ – rē̠tē cha̠tvāri̍ cha) (a. 13)

anuvākaṃ 14
[ ya̠thā̠sthā̠na-ṅga̍rbhi̠ṇya̍ḥ ]
yō-‘sau̍ ta̠pannu̠dēti̍ । sa sarvē̍ṣā-mbhū̠tānā̎-mprā̠ṇānā̠dāyō̠dēti̍ । mā mē̎ pra̠jāyā̠ mā pa̍śū̠nām । mā mama̍ prā̠ṇānā̠dāyōda̍gāḥ ॥
a̠sau yō̎ ‘sta̠mēti̍ । sa sarvē̍ṣā-mbhū̠tānā̎-mprā̠ṇānā̠dāyā̠stamēti̍ । mā mē̎ pra̠jāyā̠ mā pa̍śū̠nām । mā mama̍ prā̠ṇānā̠dāyā sta̍ṅgāḥ ॥
a̠sau ya ā̠pūrya̍ti । sa sarvē̍ṣā-mbhū̠tānā̎-mprā̠ṇai rā̠pūrya̍ti ॥ 64 ॥

mā mē̎ pra̠jāyā̠ mā pa̍śū̠nām । mā mama̍ prā̠ṇai-rā̠pūri̍ṣṭhāḥ ॥ a̠sau yō̍-‘pa̠kṣīya̍ti । sa sarvē̍ṣā-mbhū̠tānā̎-mprā̠ṇai-rapa̍kṣīyati । mā mē̎ pra̠jāyā̠ mā pa̍śū̠nām । mā mama̍ prā̠ṇai-rapa̍kṣēṣṭhāḥ ॥ a̠mūni̠ nakṣa̍trāṇi । sarvē̍ṣā-mbhū̠tānā̎-mprā̠ṇairapa̍ prasarpanti̠ chōthsa̍rpanti cha ।
mā mē̎ pra̠jāyā̠ mā pa̍śū̠nām ।
mā mama̍ prā̠ṇairapa̍ prasṛpata̠ mōthsṛ̍pata ॥ 65 ॥

i̠mē māsā̎-śchārdhamā̠sāścha̍ ।
sarvē̍ṣā-mbhū̠tānā̎-mprā̠ṇairapa̍ prasarpanti̠ chōthsa̍rpanti cha । mā mē̎ pra̠jāyā̠ mā pa̍śū̠nām ।
mā mama̍ prā̠ṇairapa̍ prasṛpata̠ mōthsṛ̍pata । i̠ma ṛ̠tava̍ḥ । sarvē̍ṣā-mbhū̠tānā̎-mprā̠ṇairapa̍ prasarpanti̠ chōthsa̍rpanti cha ।
mā mē̎ pra̠jāyā̠ mā pa̍śū̠nām ।
mā mama̍ prā̠ṇairapa̍ prasṛpata̠ mōthsṛ̍pata ॥ a̠yagṃ sa̍ṃvathsa̠raḥ ।
sarvē̍ṣā-mbhū̠tānā̎-mprā̠ṇairapa̍ prasarpati̠ chōthsa̍rpati cha ॥ 66 ॥

mā mē̎ pra̠jāyā̠ mā pa̍śū̠nām । mā mama̍ prā̠ṇairapa̍ prasṛpa̠ mōthsṛ̍pa ॥
i̠damaha̍ḥ । sarvē̍ṣā-mbhū̠tānā̎-mprā̠ṇai-rapa̍ prasarpati̠ chōthsa̍rpati cha ।
mā mē̎ pra̠jāyā̠ mā pa̍śū̠nām । mā mama̍ prā̠ṇairapa̍ prasṛpa̠ mōthsṛ̍pa ।
i̠yagṃ rātri̍ḥ । sarvē̍ṣā-mbhū̠tānā̎-mprā̠ṇai-rapa̍ prasarpati̠ chōthsa̍rpati cha ।
mā mē̎ pra̠jāyā̠ mā pa̍śū̠nām । mā mama̍ prā̠ṇairapa̍ prasṛpa̠ mōthsṛ̍pa ॥
au-mbhūrbhuva̠ssva̍ḥ ॥ ētadvō mithuna-mmā nō mithu̍nagṃ rī̠ḍhvam ॥ 67 ॥
(prā̠ṇairā̠pūrya̍ti̠-mōthsṛ̍pata̠-chōthsa̍rpati cha̠ – mōthsṛ̍pa̠ dvē cha̍) (a. 14)

(yōsau̠ ṣōḍa̍śā̠mūni̠ dvāda̍śā̠ya-ñchatu̍rdaśa)
(u̠dētya̍sta̠mētyā̠pūrya̍tyapa̠kṣīya̍tya̠mūni̠ nakṣa̍trāṇī̠ mē māsā̍ i̠ma ṛ̠tavō̠-‘yagṃ sa̍ṃvathsa̠ra i̠damaha̍ri̠yagṃ rātri̠rdaśa̍)

anuvākaṃ 15
athādityasyāṣṭa pu̍ruṣa̠sya ॥
vasūnā mādityānāg​ sthānē svatēja̍sā bhā̠ni ॥
rudrāṇā-mādityānāg​ sthānē svatēja̍sā bhā̠ni ॥
ādityānā-mādityānāg​ sthānē svatēja̍sā bhā̠ni ॥ satāgṃ̍satyā̠nām । ādityānāg​ sthānē svatēja̍sā bhā̠ni ॥ abhidhūnvatā̍-mabhi̠ghnatām । vātava̍tā-mma̠rutām । ādityānāg​ sthānē svatēja̍sā bhā̠ni ॥
ṛbhūṇā-mādityānāg​ sthānē svatēja̍sā bhā̠ni ॥
viśvēṣā̎-ndēvā̠nām । ādityānāg​ sthānē svatēja̍sā bhā̠ni ॥ saṃvathsara̍sya sa̠vituḥ । ādityasya sthānē svatēja̍sā bhā̠ni ॥ au-mbhūrbhuva̠ssva̍ḥ ।
raśmayō vō mithuna-mmā nō mithu̍nagṃ rī̠ḍhvam ॥ 68 ॥
(ṛbhūṇāmādityānāg​ sthānē svatēja̍sā bhā̠ni ṣaṭcha̍) (a. 15)

anuvākaṃ 16
ārōgasya sthānē svatēja̍sā bhā̠ni । bhrājasya sthānē svatēja̍sā bhā̠ni । paṭarasya sthānē svatēja̍sā bhā̠ni । pataṅgasya sthānē svatēja̍sā bhā̠ni ।
svarṇarasya sthānē svatēja̍sā bhā̠ni ।
jyōtiṣīmatasya sthānē svatēja̍sā bhā̠ni ।
vibhāsasya sthānē svatēja̍sā bhā̠ni ।
kaśyapasya sthānē svatēja̍sā bhā̠ni । au-mbhūrbhuva̠ssva̍ḥ । āpō vō mithuna-mmā nō mithu̍nagṃ rī̠ḍhvam ॥ 69 ॥
(ārōgasya daśa̍) (a. 16)

anuvākaṃ 17
atha vāyō-rēkādaśa-puruṣasyaikādaśa̍-strīka̠sya ॥
prabhrājamānānāgṃ rudrāṇāg​ sthānē svatēja̍sā bhā̠ni ।
vyavadātānāgṃ rudrāṇāg​ sthānē svatēja̍sā bhā̠ni ।
vāsukivaidyutānāgṃ rudrāṇāg​ sthānē svatēja̍sā bhā̠ni ।
rajatānāgṃ rudrāṇāg​ sthānē svatēja̍sā bhā̠ni ।
paruṣāṇāgṃ rudrāṇāg​ sthānē svatēja̍sā bhā̠ni ।
śyāmānāgṃ rudrāṇāg​ sthānē svatēja̍sā bhā̠ni ।
kapilānāgṃ rudrāṇāg​ sthānē svatēja̍sā bhā̠ni ।
atilōhitānāgṃ rudrāṇāg​ sthānē svatēja̍sā bhā̠ni ।
ūrdhvānāgṃ rudrāṇāg​ sthānē svatēja̍sā bhā̠ni ॥ 70 ॥

avapatantānāgṃ rudrāṇāg​ sthānē svatēja̍sā bhā̠ni ।
vaidyutānāgṃ rudrāṇāg​ sthānē svatēja̍sā bhā̠ni ।
prabhrājamānīnāgṃ rudrāṇīnāg​ sthānē svatēja̍sā bhā̠ni ।
vyavadātīnāgṃ rudrāṇīnāg​ sthānē svatēja̍sā bhā̠ni ।
vāsukivaidyutīnāgṃ rudrāṇīnāg​ sthānē svatēja̍sā bhā̠ni ।
rajatānāgṃ rudrāṇīnāg​ sthānē svatēja̍sā bhā̠ni ।
paruṣāṇāgṃ rudrāṇīnāg​ sthānē svatēja̍sā bhā̠ni ।
śyāmānāgṃ rudrāṇīnāg​ sthānē svatēja̍sā bhā̠ni ।
kapilānāgṃ rudrāṇīnāg​ sthānē svatēja̍sā bhā̠ni ।
atilōhitīnāgṃ rudrāṇīnāg​ sthānē svatēja̍sā bhā̠ni ।
ūrdhvānāgṃ rudrāṇīnāg​ sthānē svatēja̍sā bhā̠ni ।
avapatantīnāgṃ rudrāṇīnāg​ sthānē svatēja̍sā bhā̠ni ।
vaidyutīnāgṃ rudrāṇīnāg​ sthānē svatēja̍sā bhā̠ni ।
au-mbhūrbhuva̠ssva̍ḥ ।
rūpāṇi vō mithuna-mmā nō mithu̍nagṃ rī̠ḍhvam ॥ 71 ॥
(ūrdhvānāgṃ rudrāṇāg​ sthānē svatēja̍sā bhā̠ – nyatilōhitīnāgṃ rudrāṇīnāg​ sthānē svatēja̍sā bhā̠ni pañcha̍ cha) (a. 17)

anuvākaṃ 18
athāgnē̍raṣṭa pu̍ruṣa̠sya ॥ agnēḥ pūrva-diśyasya sthānē svatēja̍sā bhā̠ni ।
jātavēdasa upadiśyasya sthānē svatēja̍sā bhā̠ni ।
sahōjasō dakṣiṇa-diśyasya sthānē svatēja̍sā bhā̠ni ।
ajirāprabhava upadiśyasya sthānē svatēja̍sā bhā̠ni ।
vaiśvānarasyāparadiśyasya sthānē svatēja̍sā bhā̠ni ।
naryāpasa upadiśyasya sthānē svatēja̍sā bhā̠ni ।
paṅktirādhasa udagdiśyasya sthānē svatēja̍sā bhā̠ni ।
visarpiṇa upadiśyasya sthānē svatēja̍sā bhā̠ni ।
au-mbhūrbhuva̠ssva̍ḥ( ) । diśō vō mithuna-mmā nō mithu̍nagṃ rī̠ḍhvam ॥ 72 ॥
(sva̍rēka̍-ñcha) (a. 18)
(ēta-draśmaya āpō rūpāṇi diśaḥ pañcha̍)

anuvākaṃ 19
dakṣiṇapūrva-syāndiśi visa̍rpī na̠rakaḥ । tasmānnaḥ pa̍ripā̠hi ॥
dakṣiṇā-parasyā-ndiśya visa̍rpī na̠rakaḥ ।
tasmānnaḥ pa̍ripā̠hi ॥
uttara-pūrvasyā-ndiśi viṣā̍dī na̠rakaḥ ।
tasmānnaḥ pa̍ripā̠hi ॥
uttarā-parasyā-ndiśya viṣā̍dī na̠rakaḥ ।
tasmānnaḥ pa̍ripā̠hi ॥
āyasmin̎ thsa̠ptavā̍sa̠vā stiṣṭha̍nti svā̠ruhō̍ yathā । ṛṣi̍r​ha dīrgha̠śrutta̍ma̠ indra̍sya gha̠rmō ati̍thiḥ ॥ i̠ndri̠yāṇi̍ śatakratō̠ yā tē̠ janē̍ṣu pa̠ñchasu̍ । indra̠ tāni̍ ta̠ ā vṛ̍ṇē ॥ vityē̠tē ॥ 73 ॥
(dakṣiṇapūrvasyā-nnava̍) (a. 19)

anuvākaṃ 20
i̠ndra̠ ghō̠ṣā vō̠ vasu̍bhiḥ pu̠rastā̠-dupa̍dadhatām ।
manō̍javasō vaḥ pi̠tṛbhi̍-rdakṣiṇa̠ta upa̍dadhatām ।
prachē̍tā vō ru̠draiḥ pa̠śchā-dupa̍dadhatām ।
vi̠śvaka̍rmā va ādi̠tyai-ru̍ttara̠ta upa̍dadhatām ।
tvaṣṭā̍ vō rū̠pai-ru̠pari̍ṣṭā̠-dupa̍dadhatām । sañjñānaṃ vaḥ pa̍śchādi̠ti ॥ ā̠di̠tya-ssarvō̠-‘gniḥ pṛ̍thi̠vyām । vā̠yura̠ntari̍kṣē । sūryō̍ di̠vi ।
cha̠ndramā̍ di̠kṣu । nakṣa̍trāṇi̠ svalō̠kē ॥ ē̠vā hyē̍va । ē̠vā hya̍gnē । ē̠vā hi vā̍yō । ē̠vā hī̎mdra । ē̠vā hi pū̍ṣann । ē̠vā hi dē̍vāḥ ॥ 74 ॥
di̠kṣu sa̠pta cha̍) (a. 20)

anuvākaṃ 21
āpa̍māpāma̠pa-ssarvā̎ḥ । a̠smā-da̠smādi̠tō-‘muta̍ḥ ।
a̠gnirvā̠yuścha̠ sūrya̍ścha । sa̠ha sa̍ñchaska̠rardhi̍yā ॥
vā̠yvaśvā̍ raśmi̠ pata̍yaḥ । marī̎chyātmānō̠ adru̍haḥ ।
dē̠vī rbhu̍vana̠ sūva̍rīḥ । pu̠tra̠va̠ttvāya̍ mē suta ॥
mahānāmnī-rma̍hāmā̠nāḥ । ma̠ha̠sō ma̍hasa̠ssva̍ḥ ॥ 75 ॥

dē̠vīḥ pa̍rjanya̠ sūva̍rīḥ । pu̠tra̠va̠ttvāya̍ mē suta ॥
a̠pāśnyu̍ṣṇi-ma̠pā rakṣa̍ḥ । a̠pāśnyu̍ṣṇi-ma̠pā ragha̎m । apā̎ghrā̠mapa̍ chā̠varti̎m । apa̍ dē̠vīri̠tō hi̍ta ॥
vajra̍-ndē̠vīrajī̍tāg​ścha । bhuva̍na-ndēva̠ sūva̍rīḥ । ā̠di̠tyānadi̍ti-ndē̠vīm । yōni̍nōrdhva-mu̠dīṣa̍ta ॥ 76 ॥

bha̠dra-ṅkarṇē̍bhi-śśṛṇu̠yāma̍ dēvāḥ ।
bha̠dra-mpa̍śyēmā̠kṣabhi̠-ryaja̍trāḥ ।
sthi̠rairaṅgai̎ stuṣṭu̠vāgṃ sa̍sta̠nūbhi̍ḥ ।
vyaśē̍ma dē̠vahi̍ta̠ṃ yadāyu̍ḥ ॥
sva̠sti na̠ indrō̍ vṛ̠ddhaśra̍vāḥ । sva̠sti na̍ḥ pū̠ṣā vi̠śvavē̍dāḥ । sva̠sti na̠stārkṣyō̠ ari̍ṣṭanēmiḥ । sva̠sti nō̠ bṛha̠spati̍-rdadhātu ॥ kē̠tavō̠ aru̍ṇāsaścha । ṛ̠ṣa̠yō vāta̍raśa̠nāḥ( ) । pra̠ti̠ṣṭhāgṃ śa̠tadhā̍ hi । sa̠māhi̍tāsō sahasra̠dhāya̍sam ॥ śi̠vā na̠-śśanta̍mā bhavantu । di̠vyā āpa̠ ōṣa̍dhayaḥ ॥ su̠mṛ̠ḍī̠kā sara̍svati । mātē̠ vyō̍ma sa̠ndṛśi̍ ॥ 77 ॥
(sva̍ – ru̠dīṣa̍ta̠ – vāta̍raśa̠nā-ṣṣaṭcha̍) (a. 21)

anuvākaṃ 22
yō̍-‘pā-mpuṣpa̠ṃ vēda̍ । puṣpa̍vā-npra̠jāvā̎-npaśu̠mā-nbha̍vati । cha̠ndramā̠ vā a̠pā-mpuṣpa̎m । puṣpa̍vā-npra̠jāvā̎-npaśu̠mā-nbha̍vati ।
ya ē̠vaṃ vēda̍ ॥ yō̍-‘pāmā̠yata̍na̠ṃ vēda̍ । ā̠yata̍navā-nbhavati । a̠gnirvā a̠pāmā̠yata̍nam । ā̠yata̍navā-nbhavati । yō̎-‘gnērā̠yata̍na̠ṃ vēda̍ ॥ 78 ॥

ā̠yata̍navā-nbhavati । āpō̠ vā a̠gnērā̠yata̍nam । ā̠yata̍navā-nbhavati । ya ē̠vaṃ vēda̍ ॥ yō̍-‘pāmā̠yata̍na̠ṃ vēda̍ । ā̠yata̍navā-nbhavati ।
vā̠yurvā a̠pāmā̠yata̍nam । ā̠yata̍navā-nbhavati ।
yō vā̠yōrā̠yata̍na̠ṃ vēda̍ । ā̠yata̍navā-nbhavati ॥ 79 ॥

āpō̠ vai vā̠yōrā̠yata̍nam । ā̠yata̍navā-nbhavati । ya ē̠vaṃ vēda̍ ॥ yō̍-‘pāmā̠yata̍na̠ṃ vēda̍ । ā̠yata̍navā-nbhavati । a̠sau vai tapa̍nna̠pā-mā̠yata̍nam । ā̠yata̍navā-nbhavati । yō̍-‘muṣya̠-tapa̍ta ā̠yata̍na̠ṃ vēda̍ । ā̠yata̍navā-nbhavati । āpō̠vā a̠muṣya̠-tapa̍ta ā̠yata̍nam ॥ 80 ॥

ā̠yata̍navā-nbhavati । ya ē̠vaṃ vēda̍ ॥ yō̍-‘pāmā̠yata̍na̠ṃ vēda̍ । ā̠yata̍navā-nbhavati । cha̠ndramā̠ vā a̠pāmā̠yata̍nam । ā̠yata̍navā-nbhavati ।
yaścha̠ndrama̍sa ā̠yata̍na̠ṃ vēda̍ । ā̠yata̍navā-nbhavati । āpō̠ vai cha̠ndrama̍sa ā̠yata̍nam । ā̠yata̍navā-nbhavati ॥ 81 ॥

ya ē̠vaṃ vēda̍ ॥ yō̍-‘pāmā̠yata̍na̠ṃ vēda̍ । ā̠yata̍navā-nbhavati । nakṣa̍trāṇi̠ vā a̠pāmā̠yata̍nam । ā̠yata̍navā-nbhavati । yō nakṣa̍trāṇā-mā̠yata̍na̠ṃ vēda̍ । ā̠yata̍navā-nbhavati । āpō̠ vai nakṣa̍trāṇā-mā̠yata̍nam । ā̠yata̍navā-nbhavati ।
ya ē̠vaṃ vēda̍ ॥ 82 ॥

yō̍-‘pāmā̠yata̍na̠ṃ vēda̍ । ā̠yata̍navā-nbhavati । pa̠rjanyō̠ vā a̠pāmā̠yata̍nam । ā̠yata̍navā-nbhavati ।
yaḥ pa̠rjanya̍-syā̠yata̍na̠ṃ vēda̍ ।
ā̠yata̍navā-nbhavati । āpō̠ vai pa̠rjanya̍-syā̠yata̍nam ।
ā̠yata̍navā-nbhavati । ya ē̠vaṃ vēda̍ ॥ yō̍-‘pāmā̠yata̍na̠ṃ vēda̍ ॥ 83 ॥

ā̠yata̍navā-nbhavati । sa̠ṃva̠thsa̠rō vā a̠pāmā̠yata̍nam । ā̠yata̍navā-nbhavati । ya-ssa̍ṃvathsa̠ra-syā̠yata̍na̠ṃ vēda̍ ।
ā̠yata̍navā-nbhavati । āpō̠ vai sa̍ṃvathsa̠ra-syā̠yata̍nam । ā̠yata̍navā-nbhavati । ya ē̠vaṃ vēda̍ ॥
yō̎-‘phsu nāva̠-mprati̍ṣṭhitā̠ṃ vēda̍ । pratyē̠va ti̍ṣṭhati ॥ 84 ॥

i̠mē vai lō̠kā a̠phsu prati̍ṣṭhitāḥ । tadē̠ṣā-‘bhyanū̎ktā ॥
a̠pāgṃ rasa̠muda̍yagṃsann । sūryē̍ śu̠kragṃ sa̠mābhṛ̍tam । a̠pāgṃ rasa̍sya̠ yō rasa̍ḥ । taṃ vō̍ gṛhṇā-myutta̠mamiti̍ ॥ i̠mē vai lō̠kā a̠pāgṃ rasa̍ḥ । tē̍-‘muṣmi̍-nnādi̠tyē sa̠mābha̍tāḥ ॥
jā̠nu̠da̠ghnī-mu̍ttara-vē̠dīṅkhā̠tvā । a̠pā-mpū̍rayi̠tvā gu̍lphada̠ghnam ॥ 85 ॥

puṣkaraparṇaiḥ puṣkaradaṇḍaiḥ puṣkaraiścha̍ sagg​stī̠rya । tasmi̍n vihā̠yasē । a̠gni-mpra̠ṇīyō̍pa-samā̠dhāya̍ ॥ bra̠hma̠vā̠dinō̍ vadanti ।
kasmā̎-tpraṇī̠tē-‘ya-ma̠gniśchī̠yatē̎ । sāḥ pra̍ṇī̠tē-‘yama̠phsu hyaya̍ñchī̠yatē̎ ।
a̠sau bhuva̍nē̠-‘pya-nā̍hitāgni-rē̠tāḥ ।
tama̠bhita̍ ē̠tā a̠bīṣṭa̍kā̠ upa̍dadhāti ॥
a̠gni̠hō̠trē da̍r​śapūrṇa-mā̠sayō̎ḥ ।
pa̠śu̠ba̠ndhē chā̍turmā̠syēṣu̍ ॥ 86 ॥

athō̍ āhuḥ । sarvē̍ṣu yajñakra̠tuṣviti̍ ॥
ē̠taddha̍ sma̠ vā ā̍hu-śśaṇḍi̠lāḥ । kama̠gniñchi̍nutē ॥ sa̠tri̠ya-ma̠gniñchi̍nvā̠naḥ ।
sa̠ṃva̠thsa̠ra-mpra̠tyakṣē̍ṇa ॥ kama̠gniñchi̍nutē । sā̠vi̠tra-ma̠gniñchi̍nvā̠naḥ । a̠mumā̍di̠tya-mpra̠tyakṣē̍ṇa ॥ kama̠gniñchi̍nutē ॥ 87 ॥

nā̠chi̠kē̠ta-ma̠gniñchi̍nvā̠naḥ । prā̠ṇā-npra̠tyakṣē̍ṇa ॥ kama̠gniñchi̍nutē । chā̠tu̠r̠hō̠tri̠ya-ma̠gniñchi̍nvā̠naḥ । brahma̍ pra̠tyakṣē̍ṇa ॥ kama̠gniñchi̍nutē ।
vai̠śva̠sṛ̠ja-ma̠gniñchi̍nvā̠naḥ । śarī̍ra-mpra̠tyakṣē̍ṇa ॥ kama̠gniñchi̍nutē ।
u̠pā̠nu̠vā̠kya̍mā̠śu-ma̠gniñchi̍nvā̠naḥ ॥ 88 ॥

i̠mān ँlō̠kā-npra̠tyakṣē̍ṇa ॥ kama̠gniñchi̍nutē ।
i̠mamā̍ruṇa-kētuka-ma̠gniñchi̍nvā̠na iti̍ । ya ē̠vāsau ।
i̠taśchā̠-muta̍śchā-vyatīpā̠tī । tamiti̍ ॥ yō̎-‘gnērmi̍thū̠yā vēda̍ । mi̠thu̠na̠vā-nbha̍vati । āpō̠ vā a̠gnērmi̍thū̠yāḥ ।
mi̠thu̠na̠vā-nbha̍vati । ya ē̠vaṃ vēda̍ ॥ 89 ॥
(vēda̍ – bhava – tyā̠yata̍naṃ – bhavati̠ – vēda̠ – vēda̍ – tiṣṭhati – gulphada̠ghnaṃ – chā̍turmā̠syē – ṣva̠mumā̍di̠tya-mpra̠tyakṣē̍ṇa̠ kama̠gni-ñchi̍nuta – upānuvā̠kya̍mā̠śuma̠gni-ñchi̍nvā̠nō – mi̍thū̠yā mi̍thuna̠vā-nbha̍va̠tyēka̍-ñcha) (a. 22)

(puṣpa̍ma̠gnirvā̠yura̠sau vai tapa̍ñcha̠ndramā̠ nakṣa̍trāṇi pa̠rjanya̍-ssaṃvathsa̠rō yō̎-‘phsu nāva̍mē̠taddha̍ sma̠ vai sa̍tri̠yagṃ sa̍ṃvathsa̠ragṃ sā̍vi̠trama̠mu-nnā̍chikē̠ta-mprā̠ṇāg​śchā̍tur​hōtri̠ya-mbrahma̍ vaiśvasṛ̠jagṃ śarī̍ramupānuvā̠kya̍mā̠śumi̠mān ँlō̠kāni̠mamā̍ruṇakētuka̠ṃ ya ē̠vāsau)

anuvākaṃ 23
āpō̠ vā i̠damā̍san-thsali̠lamē̠va ।
sa pra̠jāpa̍ti̠rēka̍ḥ puṣkarapa̠rṇē sama̍bhavat ।
tasyānta̠-rmana̍si kāma̠-ssama̍vartata । i̠dagṃ sṛ̍jēya̠miti̍ । tasmā̠dya-tpuru̍ṣō̠ mana̍sā-‘bhi̠gachCha̍ti । tadvā̠chā va̍dati ।
tatkarma̍ṇā karōti । tadē̠ṣā ‘bhyanū̎ktā ॥ kāma̠stadagrē̠ sama̍varta̠tādhi̍ । mana̍sō̠ rēta̍ḥ pratha̠maṃ yadāsī̎t ॥ 90 ॥

sa̠tō bandhu̠masa̍ti̠ nira̍vindann । hṛ̠di pra̠tīṣyā̍ ka̠vayō̍ manī̠ṣēti̍ ॥ upai̍na̠ntadupa̍namati । ya-tkā̍mō̠ bhava̍ti । ya ē̠vaṃ vēda̍ ॥ sa tapō̍-‘tapyata ।
sa tapa̍sta̠ptvā । śarī̍ramadhūnuta । tasya̠ ya-nmā̠gṃ̠samāsī̎t । tatō̍-‘ru̠ṇāḥ kē̠tavō̠ vāta̍raśa̠nā ṛṣa̍ya̠ uda̍tiṣṭhann ॥ 91 ॥

yē nakhā̎ḥ । tē vai̍khāna̠sāḥ । yē vālā̎ḥ । tē vā̍lakhi̠lyāḥ । yō rasa̍ḥ । sō̍-‘pām ॥ a̠nta̠ra̠taḥ kū̠rma-mbhū̠tagṃ sarpa̍ntam । tama̍bravīt । mama̠ vai tvaṃ-mā̠gṃ̠sā । sama̍bhūt ॥ 92 ॥

nētya̍bravīt । pūrva̍mē̠vāha-mi̠hāsa̠miti̍ । tatpuru̍ṣasya puruṣa̠tvam । sa sa̠hasra̍śīr​ṣā̠ puru̍ṣaḥ । sa̠ha̠srā̠kṣa-ssa̠hasra̍pāt । bhū̠tvōda̍tiṣṭhat । tama̍bravīt । tvaṃ vai pūrvagṃ̍ sama̍bhūḥ ।
tvami̠da-mpūrva̍ḥ kuru̠ṣvēti̍ ॥ sa i̠ta ā̠dāyāpa̍ḥ ॥ 93 ॥

a̠ñja̠linā̍ pu̠rastā̍-du̠pāda̍dhāt । ē̠vā hyē̠vēti̍ ।
tata̍ ādi̠tya uda̍tiṣṭhat । sā prāchī̠ dik ॥
athā̍ru̠ṇaḥ kē̠tu-rda̍kṣiṇa̠ta u̠pāda̍dhāt । ē̠vā hyagna̠ iti̍ । tatō̠ vā a̠gniruda̍tiṣṭhat । sā da̍kṣi̠ṇā dik । athā̍ru̠ṇaḥ kē̠tuḥ pa̠śchādu̠pāda̍dhāt ।
ē̠vā hi vāyō̠ iti̍ ॥ 94 ॥

tatō̍ vā̠yuruda̍tiṣṭhat । sā pra̠tīchī̠ dik ।
athā̍ru̠ṇaḥ kē̠tu-ru̍ttara̠ta u̠pāda̍dhāt । ē̠vā hīndrēti̍ ।
tatō̠ vā indra̠ uda̍tiṣṭhat । sōdī̍chī̠ dik ।
athā̍ru̠ṇaḥ kē̠tu-rmaddhya̍ u̠pāda̍dhāt । ē̠vā hi pūṣa̠nniti̍ । tatō̠ vai pū̠ṣōda̍tiṣṭhat । sēyandik ॥ 95 ॥

athā̍ru̠ṇaḥ kē̠turu̠pari̍ṣṭā-du̠pāda̍dhāt । ē̠vā hi dēvā̠ iti̍ । tatō̍ dēva manu̠ṣyāḥ pi̠tara̍ḥ । ga̠ndha̠rvā̠-phsa̠rasa̠ śchōda̍-tiṣṭhann ।
sōrdhvā dik ॥ yā vi̠pruṣō̍ vi̠parā̍patann ।
tābhyō-‘su̍rā̠ rakṣāgṃ̍si piśā̠chāśchō-da̍tiṣṭhann । tasmā̠ttē parā̍bhavann । vi̠pruḍbhyō̠ hi tē sama̍bhavann ॥ tadē̠ṣā-‘bhyanū̎ktā ॥ 96 ॥

āpō̍ ha̠ ya-dbṛ̍ha̠tī-rgarbha̠māyann̍ । dakṣa̠-ndadhā̍nā ja̠naya̍ntī-ssvaya̠mbhum । tata̍ i̠mē-‘ddhya-sṛ̍jyanta̠ sargā̎ḥ । adbhyō̠ vā i̠dagṃ sama̍bhūt ।
tasmā̍di̠dagṃ sarva̠-mbrahma̍ svaya̠bhvinti̍ ॥
tasmā̍di̠dagṃ sarva̠gṃ̠ śithi̍la-mi̠vā dhruva̍-mivābhavat ॥ pra̠jāpa̍ti̠-rvāva tat । ā̠tmanā̠-”tmāna̍ṃ vi̠dhāya̍ ।
tadē̠vānu̠ prāvi̍śat ॥ tadē̠ṣā-‘bhyanū̎ktā ॥ 97 ॥

vi̠dhāya̍ lō̠kān. vi̠dhāya̍ bhū̠tāni̍ । vi̠dhāya̠ sarvā̎ḥ pra̠diśō̠ diśa̍ścha । pra̠jāpa̍tiḥ prathama̠jā ṛ̠tasya̍ । ā̠tmanā̠-”tmā-na̍ma̠bhi-saṃvi̍vē̠śēti̍ ॥
sarva̍mē̠vēdamā̠ptvā । sarva̍-mava̠ruddhya̍ । tadē̠vānu̠ pravi̍śati । ya ē̠vaṃ vēda̍ ॥ 98 ॥
(āsī̍ – datiṣṭhan – nabhū̠ – dapō̠ – vāyō̠ iti – sēya-ndiga̠ – bhyanū̎ktā̠ – ‘bhyanū̎ktā̠ -+-‘ṣṭau cha̍) (a. 23)

anuvākaṃ 24
chatu̍ṣṭayya̠ āpō̍ gṛhṇāti । cha̠tvāri̠ vā a̠pāgṃ rū̠pāṇi̍ । mēghō̍ vi̠dyut । sta̠na̠yi̠tnu-rvṛ̠ṣṭiḥ । tānyē̠vā va̍rundhē ॥ ā̠tapa̍ti̠ var​ṣyā̍ gṛhṇāti ।
tāḥ pu̠rastā̠-dupa̍dadhāti । ē̠tā vai bra̍hmavarcha̠syā āpa̍ḥ । mu̠kha̠ta ē̠va bra̍hmavarcha̠sa-mava̍rundhē ।
tasmā̎-nmukha̠tō bra̍hmavarcha̠sita̍raḥ ॥ 99 ॥

kūpyā̍ gṛhṇāti । tā da̍kṣiṇa̠ta upa̍dadhāti । ē̠tā vai tē̍ja̠svinī̠rāpa̍ḥ । tēja̍ ē̠vāsya̍ dakṣiṇa̠tō da̍dhāti । tasmā̠-ddakṣi̠ṇōrdha̍ ‘stēja̠svita̍raḥ ॥
sthā̠va̠rā gṛ̍hṇāti । tāḥ pa̠śchādupa̍dadhāti । prati̍ṣṭhitā̠ vai sthā̍va̠rāḥ ।
pa̠śchādē̠va prati̍tiṣṭhati ॥ vaha̍ntī-rgṛhṇāti ॥ 100 ॥

tā u̍ttara̠ta upa̍dadhāti । ōja̍sā̠ vā ē̠tā vaha̍ntīri̠vō-dga̍tīri̠va ākūja̍tīri̠va dhāva̍ntīḥ । ōja̍ ē̠vāsyō̎ttara̠tō da̍dhāti । tasmā̠dutta̠rō-‘ddha̍ ōja̠svita̍raḥ ॥ sa̠bhā̠ṃryā gṛ̍hṇāti ।
tā maddhya̠ upa̍dadhāti । i̠yaṃ vai sa̍bhā̠ṃryāḥ । a̠syāmē̠va prati̍tiṣṭhati ॥ pa̠lva̠lyā gṛ̍hṇāti । tā u̠pari̍ṣṭā-du̠pāda̍dhāti ॥ 101 ॥

a̠sau vai pa̍lva̠lyāḥ । a̠muṣyā̍mē̠va prati̍tiṣṭhati ॥ di̠kṣūpa̍dadhāti । di̠kṣu vā āpa̍ḥ । anna̠ṃ vā āpa̍ḥ । a̠dbhyō vā anna̍ñjāyatē । yadē̠vādbhyō-‘nna̠-ñjāya̍tē । tadava̍rundhē ॥ taṃ vā ē̠tama̍ru̠ṇāḥ kē̠tavō̠ vāta̍raśa̠nā ṛṣa̍yō-‘chinvann । tasmā̍-dāruṇa kē̠tuka̍ḥ ॥ tadē̠ṣā-‘bhyanū̎ktā ॥ kē̠tavō̠ aru̍ṇāsaścha । ṛ̠ṣa̠yō vāta̍raśa̠nāḥ ।
pra̠ti̠ṣṭhāgṃ śa̠tadhā̍ hi । sa̠māhi̍tāsō sahasra̠dhāya̍sa̠miti̍ ॥ śa̠taśa̍śchai̠va ‘sa̠hasra̍śaścha̠ prati̍tiṣṭhati । ya ē̠tama̠gniñchi̍nu̠tē ।
ya u̍chainamē̠vaṃ vēda̍ ॥ 102 ॥
(bra̠hma̠va̠rcha̠sita̍rō̠ – vaha̍ntī-rgṛhṇāti̠ – tā u̠pari̍ṣṭādu̠pāda̍dhā – tyāruṇakē̠tukō̠-‘ṣṭau cha̍) (a. 24)

anuvākaṃ 25
jā̠nu̠da̠ghnī-mu̍ttaravē̠dīṅkhā̠tvā । a̠pā-mpū̍rayati । a̠pāgṃ sa̍rva̠tvāya̍ । pu̠ṣka̠ra̠pa̠rṇagṃ ru̠kma-mpuru̍ṣa̠-mityupa̍dadhāti । tapō̠ vai pu̍ṣkarapa̠rṇam ।
sa̠tyagṃ ru̠kmaḥ । a̠mṛta̠-mpuru̍ṣaḥ । ē̠tāva̠dvā vā̎sti । yāva̍dē̠tat । yāva̍dē̠vāsti̍ ॥ 103 ॥

tadava̍rundhē ॥ kū̠rmamupa̍dadhāti । a̠pāmē̠va mēdha̠mava̍rundhē । athō̎ sva̠rgasya̍ lō̠kasya̠ sama̍ṣṭyai ॥ āpa̍māpāma̠pa-ssarvā̎ḥ ।
a̠smāda̠smā di̠tō-‘muta̍ḥ । a̠gnirvā̠yuścha̠ sūrya̍ścha ।
sa̠ha sa̍ñchaska̠rardhi̍yā̠ iti̍ । vā̠yvaśvā̍ raśmi̠pata̍yaḥ । marī̎chyātmānō̠ adru̍haḥ । dē̠vī-rbhu̍vana̠ sūva̍rīḥ । pu̠tra̠va̠tvāya̍ mē suta ॥ lō̠ka-mpṛ̍ṇachChi̠dra-mpṛ̍ṇa ॥ 104 ॥

yāsti̠sraḥ pa̍rama̠jāḥ ॥ ) (śōrt an-dlōngforṃ arē thē same i-nti̍ ॥ pañcha̠ chita̍ya̠ upa̍dadhāti । pāṅkta̠-‘gniḥ । yāvā̍nē̠vāgniḥ । tañchi̍nutē ॥
lō̠ka-mpṛ̍ṇayā dvi̠tīyā̠-mupa̍dadhāti ।
pañcha̍padā̠ vai vi̠rāṭ । tasyā̠ vā i̠ya-mpāda̍ḥ । a̠ntari̍kṣa̠-mpāda̍ḥ । dyauḥ pāda̍ḥ । diśa̠ḥ pāda̍ḥ । pa̠rōra̍jā̠ḥ pāda̍ḥ ॥ vi̠rājyē̠va prati̍tiṣṭhati ।
ya ē̠tama̠gniñchi̍nu̠tē । ya u̍chainamē̠vaṃ vēda̍ ॥ 105 ॥
(asti̍ – pṛṇā̠ – ntari̍kṣa̠-mpāda̠-ṣṣaṭcha̍) (a. 25)

anuvākaṃ 26
a̠gni-mpra̠ṇīyō̍pa-samā̠dhāya̍ । tama̠bhita̍ ē̠tā a̠bīṣṭa̍kā̠ upa̍dadhāti । a̠gni̠hō̠trē da̍r​śapūrṇa-mā̠sayō̎ḥ । pa̠śu̠ba̠ndhē chā̍turmā̠syēṣu̍ ।
athō̍ āhuḥ । sarvē̍ṣu yajñakra̠tuṣviti̍ ॥
atha̍ hasmā hāru̠ṇa-ssvā̍ya̠mbhuva̍ḥ ।
sā̠vi̠tra-ssarvō̠-‘gni-rityana̍nuṣaṅga-mmanyāmahē ।
nānā̠ vā ē̠tēṣā̎ṃ vī̠ryā̍ṇi ॥ kama̠gniñchi̍nutē ॥ 106 ॥

sa̠tri̠ya ma̠gniñchi̍nvā̠naḥ । kama̠gniñchi̍nutē ।
sā̠vi̠tra ma̠gniñchi̍nvā̠naḥ । kama̠gniñchi̍nutē । nā̠chi̠kē̠ta ma̠gniñchi̍nvā̠naḥ । kama̠gniñchi̍nutē ।
chā̠tu̠r̠ hō̠tri̠ya-ma̠gniñchi̍nvā̠naḥ । kama̠gniñchi̍nutē ।
vai̠śva̠sṛ̠ja ma̠gniñchi̍nvā̠naḥ । kama̠gniñchi̍nutē ॥ 107 ॥

u̠pā̠nu̠vā̠kya̍-mā̠śu ma̠gniñchi̍nvā̠naḥ । kama̠gniñchi̍nutē । i̠mamā̍ruṇa-kētuka ma̠gniñchi̍nvā̠na iti̍ ॥ vṛṣā̠ vā a̠gniḥ । vṛṣā̍ṇau̠ sagg​sphā̍layēt । ha̠nyētā̎sya ya̠jñaḥ । tasmā̠nnānu̠ṣajya̍ḥ ॥
sōtta̍ravē̠diṣu̍ kra̠tuṣu̍ chinvīta । u̠tta̠ra̠vē̠dyāg​ hya̍gniśchī̠yatē̎ ॥ pra̠jākā̍maśchinvīta ॥ 108 ॥

prā̠jā̠pa̠tyō vā ē̠ṣō̎-‘gniḥ । prā̠jā̠pa̠tyāḥ pra̠jāḥ । pra̠jāvā̎-nbhavati । ya ē̠vaṃ vēda̍ ॥ pa̠śukā̍maśchinvīta । sa̠ñjñāna̠ṃ vā ē̠ta-tpa̍śū̠nām । yadāpa̍ḥ ।
pa̠śū̠nāmē̠va sa̠jñānnē̠ ‘gniñchi̍nutē । pa̠śu̠mā-nbha̍vati । ya ē̠vaṃ vēda̍ ॥ 109 ॥

vṛṣṭi̍kāmaśchinvīta । āpō̠ vai vṛṣṭi̍ḥ । pa̠rjanyō̠ var​ṣu̍kō bhavati । ya ē̠vaṃ vēda̍ ॥ ā̠ma̠yā̠vī chi̍nvīta । āpō̠ vai bhē̍ṣa̠jam । bhē̠ṣa̠ja-mē̠vāsmai̍ karōti । sarva̠māyu̍rēti ॥ a̠bhi̠charagg̍ śchinvīta । vajrō̠ vā āpa̍ḥ ॥ 110 ॥

vajra̍mē̠va bhrātṛ̍vyēbhya̠ḥ praha̍rati । stṛ̠ṇu̠ta ē̍nam ॥ tēja̍skāmō̠ yaśa̍skāmaḥ ।
bra̠hma̠va̠rcha̠sakā̍ma-ssva̠rgakā̍maśchinvīta । ē̠tā va̠dvā vā̎sti । yāva̍dē̠tat । yāva̍dē̠vāsti̍ । tadava̍rundhē ॥ tasyai̠ tadvra̠tam । var​ṣa̍ti̠ na dhā̍vēt ॥ 111 ॥

a̠mṛta̠ṃ vā āpa̍ḥ । a̠mṛta̠syā-na̍ntarityai ॥
nāphsu-mūtra̍purī̠ṣaṅku̍ryāt । na niṣṭhī̍vēt । na vi̠vasa̍na-ssnāyāt । guhyō̠ vā ē̠ṣō̎-‘gniḥ ।
ē̠tasyā̠gnē rana̍ti dāhāya ॥ na pu̍ṣkarapa̠rṇāni̠ hira̍ṇya̠ṃ vā-‘dhi̠tiṣṭhē̎t । ē̠tasyā̠gnē-rana̍bhyārōhāya ॥ na kūrma̠syāśñī̍yāt ।
nōda̠kasyā̠-ghātu̍kā̠nyēna̍-mōda̠kāni̍ bhavanti । a̠ghātu̍kā̠ āpa̍ḥ । ya ē̠tama̠gniñchi̍nu̠tē । ya u̍chainamē̠vaṃ vēda̍ ॥ 112 ॥
(chi̠nu̠tē̠ – chi̠nu̠tē̠ – pra̠jākā̍maśchinvīta̠ – ya ē̠vaṃ vēdā – pō̍ – dhāvē̠ – daśñī̍yāchcha̠tvāri̍ cha) (a. 26)

anuvākaṃ 27
i̠mā nu̍ka̠-mbhuva̍nā sīṣadhēma । indra̍ścha̠ viśvē̍cha dē̠vāḥ ॥ ya̠jñañcha̍ nasta̠nvañcha̍ pra̠jāñcha̍ । ā̠di̠tyairinda̍-ssa̠ha sī̍ṣadhātu ॥
ā̠di̠tyairindra̠-ssaga̍ṇō-ma̠rudbhi̍ḥ । a̠smāka̍-mbhūtvavi̠tā ta̠nūnā̎m ॥ āpla̍vasva̠ prapla̍vasva । ā̠ṇḍī bha̍va ja̠ mā mu̠huḥ । sukhādīndu̍ḥ khani̠dhanām । prati̍muñchasva̠ svā-mpu̠ram ॥ 113 ॥

marī̍chaya-ssvāyambhu̠vāḥ । yē śa̍rī̠rāṇya̍ kalpayann ।
tē tē̍ dē̠haṅka̍lpayantu । mā cha̍ tē̠ khyā sma̍ tīriṣat ॥ utti̍ṣṭhata̠ mā sva̍pta । a̠gni-mi̍chChaddhva̠-mbhāra̍tāḥ । rājña̠-ssōma̍sya tṛ̠ptāsa̍ḥ । sūryē̍ṇa sa̠yujō̍ṣasaḥ ॥ yuvā̍ su̠vāsā̠ḥ pari̍vīta̠ āgā̎t । sa u̠ śrēyā̎-nbhavati̠ jāya̍mānaḥ । ta-ndhīrā̍saḥ ka̠vaya̠ unna̍yanti । svā̠dhiyō̠ mana̍sā dēva̠yanta̍ḥ ॥
a̠ṣṭācha̍krā̠ nava̍dvārā ॥ 114 ॥

dē̠vānā̠-mpūra̍yō̠ddhyā । tasyāgṃ̍ hiraṇma̍yaḥ kō̠śaḥ । sva̠rgō lō̠kō jyōti̠ṣā ”vṛ̍taḥ ॥ yō vai tā̎-mbrahma̍ṇō vē̠da । a̠mṛtē̍nāvṛ̠tā-mpu̍rīm । tasmai̎ brahma cha̍ brahmā̠ cha । ā̠yuḥ kīrti̍-mpra̠jānda̍duḥ ॥ vi̠bhrāja̍mānā̠gṃ̠ hari̍ṇīm । ya̠śasā̍ sampa̠rīvṛ̍tām । puragṃ̍ hiraṇma̍yī-mbra̠hmā ॥ 115 ॥

vi̠vēśā̍pa̠rāji̍tā ॥ parāṅgētya̍ (parāṃatya̍) jyāma̠yī ।
parāṅgētya̍ (parāṃatya̍) nāśa̠kī । i̠ha chā̍mutra̍ chānvē̠ti । vi̠dvā-ndē̍vāsu̠rānu̍bha̠yān ॥
yatku̍mā̠rī ma̠ndraya̍tē । ya̠dyō̠ṣidya-tpa̍ti̠vratā̎ । ari̍ṣṭa̠ṃ yatkiñcha̍ kri̠yatē̎ ।
a̠gni-stadanu̍ vēdhati ॥ a̠śṛtā̍sa-śśṛ̍tāsa̠ścha ॥ 116 ॥

ya̠jvānō̠ yē-‘pya̍ya̠jvana̍ḥ । sva̍ryantō̠ nāpē̎kṣantē ।
indra̍-ma̠gniñcha̍ yē vi̠duḥ ॥ sika̍tā iva sa̠ṃyanti̍ ।
ra̠śmibhi̍ḥ-samu̠dīri̍tāḥ । a̠smā-llō̠kāda̍-muṣmā̠chcha । ṛ̠ṣibhi̍-radāt-pṛ̠śnibhi̍ḥ ॥ apē̍ta̠ vīta̠ vi cha̍ sarpa̠tāta̍ḥ । yē-‘tra̠ stha pu̍rā̠ṇā yē cha̠ nūta̍nāḥ ।
ahō̍bhi-ra̠dbhi-ra̠ktubhi̠-rvya̍ktam ॥ 117 ॥

ya̠mō da̍dātva-va̠sāna̍masmai ॥ nṛ mu̍ṇantu nṛ pā̠tvarya̍ḥ । a̠kṛ̠ṣṭā yē cha̠ kṛṣṭa̍jāḥ । ku̠mārī̍ṣu ka̠nīnī̍ṣu । jā̠riṇī̍ṣu cha̠ yē hi̠tāḥ ॥ rēta̍ḥ pītā̠ āṇḍa̍pītāḥ । aṅgā̍rēṣu cha̠ yē hu̠tāḥ । u̠bhayā̎-nputra̍ pautra̠kān । yu̠vē̠-‘haṃ ya̠marāja̍gān ॥ śa̠taminnu śa̠radō̠ anti̍ dēvā̠ yatrā̍ naścha̠krā ja̠rasa̍-nta̠nūnā̎m । pu̠trāsō̠ yatra̍ pi̠tarō̠ bhava̍nti̠ mā nō̍ ma̠dhyā rī̍riṣa̠tāyu̠rgantō̎ḥ ॥
adō̠ yadbrahma̍ vila̠bam । pi̠tṛ̠ṇāñcha̍ ya̠masya̍ cha ।
varu̍ṇa̠-syāśvi̍nō-ra̠gnēḥ । ma̠rutā̎mcha vi̠hāya̍sām ॥
kā̠ma̠pra̠yava̍ṇa-mmē astu । sa hyē̍vāsmi̍ sa̠nāta̍naḥ । iti nākō brahmiśravō̍ rāyō̠ dhanam । pu̠trānāpō̍ dē̠vīri̠hāhi̍tā ॥ 118 ॥
(pu̠raṃ – nava̍dvārā – bra̠hmā – cha – vya̍ktagṃ – śa̠radō̠-‘ṣṭau cha̍) (a. 27)

anuvākaṃ 28
viśī̎r​ṣṇī̠-ṅgṛddhra̍-śīr​ṣṇīñcha । apētō̍ nir-ṛ̠tigṃ ha̍thaḥ । paribādhagg​ śvē̍taku̠kṣam । ni̠jaṅghagṃ̍ śaba̠lōda̍ram ॥ sa̠ tān. vā̠chyāya̍yā sa̠ha । agnē̠ nāśa̍ya sa̠ndṛśa̍ḥ । ī̠r​ṣyā̠sū̠yē bu̍bhu̠kṣām । ma̠nyu-ṅkṛ̠tyā-ñcha̍ dīdhirē । rathē̍na kigṃśu̠kāva̍tā । agnē̠ nāśa̍ya sa̠ndṛśa̍ḥ ॥ 119 ॥
(viśī̎r​ṣṇī̠-ndaśa̍) (a. 28)

anuvākaṃ 29
pa̠rjanyā̍ya̠ pragā̍yata । di̠vaspu̠trāya̍ mī̠ḍhuṣē̎ । sa nō̍ ya̠vasa̍michChatu ॥ i̠daṃ vacha̍ḥ pa̠rjanyā̍ya sva̠rājē̎ । hṛ̠dō a̠stvanta̍ra̠nta-dyu̍yōta ।
ma̠yō̠bhūrvātō̍ vi̠śvakṛ̍ṣṭaya-ssantva̠smē । su̠pi̠ppa̠lā ōṣa̍dhī-rdē̠vagō̍pāḥ ॥
yō garbha̠-mōṣa̍dhīnām । gavā̎mkṛ̠ṇōtyarva̍tām । pa̠rjanya̍ḥ puru̠ṣīṇā̎m ॥ 120 ॥
(pa̠rjanyā̍ya̠ daśa̍) (a. 29)

anuvākaṃ 30
puna̍rmāmaitvindri̠yam । puna̠rāyu̠ḥ puna̠rbhaga̍ḥ । puna̠-rbrāhma̍ṇa-maitu mā । puna̠-rdravi̍ṇa maitu mā ॥ yanmē̠-‘dya rēta̍ḥ pṛthi̠vīmaskān̍ ।
yadōṣa̍dhīra̠pyasa̍ra̠-dyadāpa̍ḥ । i̠danta-tpuna̠rāda̍dē । dī̠rghā̠yu̠tvāya̠ varcha̍sē ॥ yanmē̠ rēta̠ḥ prasi̍chyatē । yanma̠ ājā̍yatē̠ puna̍ḥ( ) । tēna̍ māma̠mṛta̍-ṅkuru । tēna̍ supra̠jasa̍ṅkuru ॥ 121 ॥
(puna̠rdvē cha̍) (a. 30)

anuvākaṃ 31
a̠dbhaya-stirō̠dhā jā̍yata । tava̍ vaiśrava̠ṇa-ssa̍dā । tirō̍ dhēhi sapa̠tnānna̍ḥ । yē apō̠-‘śnanti̍ kēcha̠na ॥ tvā̠ṣṭrī-mmā̠yāṃ va̎śrava̠ṇaḥ ।
rathagṃ̍ sahasra̠ vandhu̍ram । pu̠ru̠ścha̠kragṃ saha̍srāśvam । āsthā̠ yāyā̍hi nō ba̠lim ॥ yasmai̍ bhū̠tāni̍ ba̠limāva̍hanti । dhana̠ṅgāvō̠ hasti̠ hira̍ṇya̠maśvān̍ ॥ 122 ॥

asā̍ma suma̠tau ya̠jñiya̍sya । śriya̠-mbibhra̠tō ‘nna̍mukhīṃ vi̠rāja̎m ॥ su̠da̠r̠śa̠nē cha̍ krau̠ñchē cha̍ । mai̠nā̠gē cha̍ ma̠hāgi̍rau । śa̠tadvā̠ṭṭara̍gama̠ntā (sa̠tadvā̠ṭṭara̍gama̠ntā) ।
sa̠gṃ̠hārya̠-nnaga̍ra̠-ntava̍ ॥
iti mantrā̎ḥ । kalpō̍-‘ta ū̠rdhvam ॥
yadi̠ bali̠gṃ̠ harē̎t । hi̠ra̠ṇya̠nā̠bhayē̍ vitu̠dayē̍ kaubē̠rāyā̠ya-mba̍liḥ ॥ 123 ॥

sarvabhūtādhipatayē na̍ma i̠ti । atha baligṃ hṛtvōpa̍tiṣṭhē̠ta ॥ kṣa̠tra-ṅkṣa̠traṃ vai̎śrava̠ṇaḥ । brāhmaṇā̍ vaya̠gg̠ smaḥ ।
nama̍stē astu̠ mā mā̍ higṃsīḥ । asmā-tpraviśyānna̍maddhī̠ti ॥ atha tamagni-mā̍dadhī̠ta । yasminnē tatkarma pra̍yuñjī̠ta ॥
ti̠rōdhā̠ bhūḥ । ti̠rōdhā̠ bhuva̍ḥ ॥ 124 ॥

ti̠rōdhā̠-ssva̍ḥ । ti̠rōdhā̠ bhūrbhuva̠ssva̍ḥ ।
sarvēṣāṃ lōkānā-mādhipatyē̍ sīdē̠ti ॥ atha tamagni̍-mindhī̠ta । yasminnē tatkarma pra̍yuñjī̠ta ॥ ti̠rōdhā̠ bhū-ssvāhā̎ । ti̠rōdhā̠ bhuva̠-ssvāhā̎ । ti̠rōdhā̠-ssva̍-ssvāhā̎ । ti̠rōdhā̠ bhūrbhuva̠ssva̍ssvāhā̎ ॥
yasminnasya kālē sarvā āhutīr-hutā̍ bhavē̠yuḥ ॥ 125 ॥

api brāhmaṇa̍mukhī̠nāḥ । tasminnahnaḥ kālē pra̍yuñjī̠ta ।
para̍-ssu̠ptaja̍nādvē̠pi ॥ mā sma pramādyanta̍ māddhyā̠payēt । sarvārthā̎-ssiddhya̠ntē । ya ē̍vaṃ vē̠da । kṣuddhya-nnida̍majā̠natām ।
sarvārthā na̍ siddhya̠ntē ॥ yastē̍ vi̠ghātu̍kō bhrā̠tā ।
mamāntar-hṛ̍dayē̠ śritaḥ ॥ 126 ॥

tasmā̍ i̠mamagra̠ piṇḍa̍ñjuhōmi । sa mē̎-‘rthā̠-nmā viva̍dhīt । mayi̠ svāhā̎ ॥ rā̠jā̠dhi̠rā̠jāya̍ prasahya sā̠hinē̎ । namō̍ va̠yaṃ vai̎śrava̠ṇāya̍ kurmahē ।
sa mē̠ kāmā̠n kāma̠ kāmā̍ya̠ mahya̎m । kā̠mē̠śva̠rō vai̎śrava̠ṇō da̍dātu । ku̠bē̠rāya̍ vaiśrava̠ṇāya̍ । ma̠hā̠rā̠jāya̠ nama̍ḥ । kē̠tavō̠ aru̍ṇāsaścha ।
ṛ̠ṣa̠yō vāta̍raśa̠nāḥ । pra̠ti̠ṣṭhāgṃ śa̠tadhā̍ hi ।
sa̠māhi̍tāsō sahasra̠dhāya̍sam । śi̠vā na̠-śśanta̍mā bhavantu । di̠vyā āpa̠ ōṣa̍dhayaḥ । su̠mṛ̠ḍī̠kā sara̍svati । mā tē̠ vyō̍ma sa̠ndṛśi̍ ॥ 127 ॥
(aśvā̎n-bali̠-rbhuvō̍ – bhavē̠yuḥ – śrita – ścha̍ sa̠pta cha̍) (a. 31)

anuvākaṃ 32
saṃvathsaramēta̍-dvrata̠ñcharēt । dvau̍ vā mā̠sau ॥ niyama-ssa̍māsē̠na ॥ tasmi-nniyama̍ viśē̠ṣāḥ । triṣavaṇa-mudakō̍paspa̠r̠śī । chaturtha kālapāna̍bhakta̠-ssyāt । aharaharvā bhaikṣa̍maśna̠yāt ।
audumbarībhi-ssamidbhi-ragni̍-mpari̠charēt ।
punarmā maitvindriya-mityētēnā-‘nu̍vākē̠na ।
uddhṛta paripūtābhiradbhiḥ kārya̍-ṅkurvī̠ta ॥ 128 ॥

a̍sañcha̠yavān । agnayē vāyavē̍ sūryā̠ya । brahmaṇē pra̍jāpa̠tayē । chandramasē na̍kṣatrē̠bhyaḥ । ṛtubhya-ssaṃva̍thsarā̠ya । varuṇā-yāruṇāyēti vra̍tahō̠māḥ । pra̠va̠rgyava̍dādē̠śaḥ । aruṇāḥ kā̎ṇḍa ṛ̠ṣayaḥ ॥ araṇyē̍-‘dhīyī̠rann । bhadraṅkarṇēbhiriti dvē̍ japi̠tvā ॥ 129 ॥

mahānāmnībhi-rudakagṃ sagg̍spa̠r​śya । tamāchā̎ryō da̠dyāt । śivāna-śśantamē-tyōṣadhī̍rāla̠bhatē । sumṛḍīkē̍ti bhū̠mim । ēvama̍pava̠rgē ।
dhē̍nu-rda̠kṣiṇā । kagṃ saṃvāsa̍ścha kṣau̠mam । anya̍dvā śu̠klam । ya̍thā śa̠kti vā । ēvagg​ svāddhyāya̍ dharmē̠ṇa । araṇyē̍-‘dhīyī̠ta । tapasvī puṇyō bhavati tapasvī pu̍ṇyō bha̠vati ॥ 130 ॥
(ku̠rvī̠ta – ja̍pi̠tvā – svāddhyāya̍dharmē̠ṇa dvē cha̍) (a. 32)

(bha̠dragg​ – smṛti̍ḥ – sāka̠jānnā̠ – makṣya- ti̍tā̠mrā – ṇya̍tyurdhvā̠kṣa – ārōgaḥ – kvēda – magniścha – sa̍hasra̠vṛt – pa̠vitra̍vanta̠ -āta̍nuṣvā̠ -ṣṭayō̍nī̠ṃ – ँyō-‘sā̠ – vathāditya – syārōga-syātha vāyō- rathāgnē̠–r dakṣiṇapūrvasyā – mi̍ndraghō̠ṣā va̠-āpa̍māpā̠ṃyō̍-‘pā – māpō̠ vai – chatu̍ṣṭayyō – jānuda̠ghnī – ma̠gni-mpra̠ṇīyē̠ – mā nu̍ ka̠ṃ – ँviśī̎r​ṣṇīṃ – pa̠rjanyā̍ya̠ – puna̍ – ra̠dbhyaḥ -saṃvathsara-ndvātrigṃ̍śat)

(bha̠draṃ – jyō̠tiṣā̠ – tasmi-nrājānaṃ – ka̠śyapā̎-thsahasra̠vṛdi̍ya̠ṃ- napugṃsa̍ka – ma̠ṣṭayō̍nī̠ – mavapatantānā – mā̠yata̍navā-nbhavati – sa̠tō bandhu̠ṃ – tā u̍ttara̠tō – vajra̍mē̠va – puna̍rmāmaitu
tri̠gṃ̠śadu̍ttaraśa̠tam)

(bhadraṃ – tapasvī puṇyō bhavati tapasvī pu̍ṇyō bha̠vati)

॥ hari̍ḥ ōm ॥
॥ kṛṣṇa yajurvēdīya taittirīya āraṇyakē prathamaḥ prapāṭhaka-ssamāptaḥ ॥