Krishna Stuti (Brahma Kruta Bhagavata Purana)

brahmōvācha ।
naumīḍya tē’bhravapuṣē taḍidambarāya
guñjāvataṃsaparipichChalasanmukhāya ।
vanyasrajē kavalavētraviṣāṇavēṇu-
lakṣmaśriyē mṛdupadē paśupāṅgajāya ॥ 1 ॥
asyāpi dēva vapuṣō madanugrahasya
svēchChāmayasya na tu bhūtamayasya kō’pi ।
nēśēmahi tvavasituṃ manasāntarēṇa
sākṣāttavaiva kimutātmasukhānubhūtēḥ ॥ 2 ॥
jñānē prayāsamudapāsya namanta ēva
jīvanti sanmukharitāṃ bhavadīyavārtām ।
sthānē sthitāḥ śrutigatāṃ tanuvāmmanōbhiḥ
yē prāyaśō’jita jitō’pyasi taistrilōkyām ॥ 3 ॥
śrēyaḥsrutiṃ bhaktimudasya tē vibhō kliśyanti yē kēvalabōdhalabdhayē ।
tēṣāmasau klēśala ēva śiṣyatē nānyadyathā sthūlatuṣāvaghātinām ॥ 4 ॥
purēha bhūman bahavō’pi yōginastvadarpitēhā nijakarmalabdhayā ।
vibudhya bhaktyaiva kathōpanītayā prapēdirē’ñjō’chyuta tē gatiṃ parām ॥ 5 ॥
tathāpi bhūman mahimā’guṇasya tē vibōddhumarhatyamalāntarātmabhiḥ ।
avikriyātsvānubhavādarūpatō hyananyabōdhyātmatayā na chānyathā ॥ 6 ॥
guṇātmanastē’pi guṇān vimātuṃ hitāvatīrṇasya ka īśirē’sya ।
kālēna yairvā vimitāḥ sukalpairbhūpāṃsavaḥ khē mihikā dyubhāsaḥ ॥ 7 ॥
tattē’nukampāṃ susamīkṣamāṇō bhuñjāna ēvātmakṛtaṃ vipākam ।
hṛdvāgvapurbhirvidadhannamastē jīvēta yō muktipadē sa dāyabhāk ॥ 8 ॥
paśyēśa mē’nāryamananta ādyē parātmani tvayyapi māyimāyini ।
māyāṃ vitatyēkṣitumātmavaibhavaṃ hyahaṃ kiyānaichChamivārchiragnau ॥ 9 ॥
ataḥ kṣamasvāchyuta mē rajōbhuvō hyajānatastvatpṛthagīśamāninaḥ ।
ajāvalēpāndhatamō’ndhachakṣuṣa ēṣō’nukampyō mayi nāthavāniti ॥ 10 ॥
kvāhaṃ tamōmahadahaṅkhacharāgnivārbhūsaṃvēṣṭitāṇḍaghaṭasaptavitastakāyaḥ ।
kvēdṛgvidhāvigaṇitāṇḍaparāṇucharyāvātādhvarōmavivarasya cha tē mahitvam ॥ 11 ॥
utkṣēpaṇaṃ garbhagatasya pādayōḥ kiṃ kalpatē māturadhō’kṣajāgasē ।
kimasti nāstivyapadēśabhūṣitaṃ tavāsti kukṣēḥ kiyadapyanantaḥ ॥ 12 ॥
jagattrayāntōdadhisamplavōdē nārāyaṇasyōdaranābhinālāt ।
vinirgatō’jastviti vānna vai mṛṣā kiṃ tvīśvaratvānna vinirgatō’smi . ।
nārāyaṇastvaṃ na hi sarvadēhināmātmāsyadhīśākhilalōkasākṣī ।
nārāyaṇō’ṅgaṃ narabhūjalāyanāttachchāpi satyaṃ na tavaiva māyā ॥ 14 ॥
tachchējjalasthaṃ tava sajjagadvapuḥ kiṃ mē na dṛṣṭaṃ bhagavaṃstadaiva ।
kiṃ vā sudṛṣṭaṃ hṛdi mē tadaiva kiṃ nō sapadyēva punarvyadarśi ॥ 15 ॥
atraiva māyādamanāvatārē hyasya prapañchasya bahiḥ sphuṭasya ।
kṛtsnasya chāntarjaṭharē jananyā māyātvamēva prakaṭīkṛtaṃ tē ॥ 16 ॥
yasya kukṣāvidaṃ sarvaṃ sātmaṃ bhāti yathā tathā ।
tattvayyapīha tatsarvaṃ kimidaṃ māyayā vinā ॥ 17 ॥
adyaiva tvadṛtē’sya kiṃ mama na tē māyātvamādarśitaṃ
ēkō’si prathamaṃ tatō vrajasuhṛdvatsāḥ samastā api ।
tāvantō’si chaturbhujāstadakhilaiḥ sākaṃ mayōpāsitā-
stāvantyēva jagantyabhūstadamitaṃ brahmādvayaṃ śiṣyatē ॥ 18 ॥
ajānatāṃ tvatpadavīmanātmanyātmā’tmanā bhāsi vitatya māyām ।
sṛṣṭāvivāhaṃ jagatō vidhāna iva tvamēṣō’nta iva trinētraḥ ॥ 19 ॥
surēṣvṛṣiṣvīśa tathaiva nṛṣvapi tiryakṣu yādaḥsvapi tē’janasya ।
janmāsatāṃ durmadanigrahāya prabhō vidhātaḥ sadanugrahāya cha ॥ 20 ॥
kō vētti bhūman bhagavan parātman yōgēśvarōtīrbhavatastrilōkyām ।
kva vā kathaṃ vā kati vā kadēti vistārayan krīḍasi yōgamāyām ॥ 21 ॥
tasmādidaṃ jagadaśēṣamasatsvarūpaṃ svapnābhamastadhiṣaṇaṃ puruduḥkhaduḥkham ।
tvayyēva nityasukhabōdhatanāvanantē māyāta udyadapi yatsadivāvabhāti ॥ 22 ॥
ēkastvamātmā puruṣaḥ purāṇaḥ satyaḥ svayañjyōtirananta ādyaḥ ।
nityō’kṣarō’jasrasukhō nirañjanaḥ pūrṇō’dvayō mukta upādhitō’mṛtaḥ ॥ 23 ॥
ēvaṃvidhaṃ tvāṃ sakalātmanāmapi svātmānamātmā’tmatayā vichakṣatē ।
gurvarkalabdhōpaniṣatsuchakṣuṣā yē tē tarantīva bhavānṛtāmbudhim ॥ 24 ॥
ātmānamēvātmatayā’vijānatāṃ tēnaiva jātaṃ nikhilaṃ prapañchitam ।
jñānēna bhūyō’pi cha tatpralīyatē rajjvāmahērbhōgabhavābhavau yathā ॥ 25 ॥
ajñānasañjñau bhavabandhamōkṣau dvau nāma nānyau sta ṛtajñabhāvāt ।
ajasrachityā’tmani kēvalē parē vichāryamāṇē taraṇāvivāhanī ॥ 26 ॥
tvāmātmānaṃ paraṃ matvā paramātmānamēva cha ।
ātmā punarbahirmṛgya ahō’jñajanatā’jñatā ॥ 27 ॥
antarbhavē’nanta bhavantamēva hyatattyajantō mṛgayanti santaḥ ।
asantamapyantyahimantarēṇa santaṃ guṇaṃ taṃ kimu yanti santaḥ ॥ 28 ॥
athāpi tē dēva padāmbujadvayaprasādalēśānugṛhīta ēva hi ।
jānāti tattvaṃ bhagavan mahimnō na chānya ēkō’pi chiraṃ vichinvan ॥ 29 ॥
tadastu mē nātha sa bhūribhāgō bhavē’tra vānyatra tu vā tiraśchām ।
yēnāhamēkō’pi bhavajjanānāṃ bhūtvā niṣēvē tava pādapallavam ॥ 30 ॥
ahō’tidhanyā vrajagōramaṇyaḥ stanyāmṛtaṃ pītamatīva tē mudā ।
yāsāṃ vibhō vatsatarātmajātmanā yattṛptayē’dyāpi na chālamadhvarāḥ ॥ 31 ॥
ahō bhāgyamahō bhāgyaṃ nandagōpavrajaukasām ।
yanmitraṃ paramānandaṃ pūrṇaṃ brahma sanātanam ॥ 32 ॥
ēṣāṃ tu bhāgyamahimā’chyuta tāvadāstā-
mēkādaśaiva hi vayaṃ bata bhūribhāgāḥ ।
ētaddhṛṣīkachaṣakairasakṛtpibāmaḥ
śarvādayō’ṅghryudajamadhvamṛtāsavaṃ tē ॥ 33 ॥
tadbhūribhāgyamiha janma kimapyaṭavyāṃ
yadgōkulē’pi katamāṅghrirajō’bhiṣēkam ।
yajjīvitaṃ tu nikhilaṃ bhagavān mukunda-
stvadyāpi yatpadarajaḥ śrutimṛgyamēva ॥ 34 ॥
ēṣāṃ ghōṣanivāsināmuta bhavān kiṃ dēva rātēti naḥ
chētō viśvaphalātphalaṃ tvadaparaṃ kutrāpyayan muhyati ।
sadvēṣādiva pūtanā’pi sakulā tvāmēva dēvāpitā
yaddhāmārthasuhṛtpriyātmatanayaprāṇāśayāstvatkṛtē ॥ 35 ॥
tāvadrāgādayaḥ stēnāstāvatkārāgṛhaṃ gṛham ।
tāvanmōhō’ṅghrinigaḍō yāvatkṛṣṇa na tē janāḥ ॥ 36 ॥
prapañchaṃ niṣprapañchō’pi viḍambayasi bhūtalē ।
prapannajanatānandasandōhaṃ prathituṃ prabhō ॥ 37 ॥
jānanta ēva jānantu kiṃ bahūktyā na mē prabhō ।
manasō vapuṣō vāchō vaibhavaṃ tava gōcharaḥ ॥ 38 ॥
anujānīhi māṃ kṛṣṇa sarvaṃ tvaṃ vētsi sarvadṛk ।
tvamēva jagatāṃ nāthō jagadētattavārpitam ॥ 39 ॥
śrīkṛṣṇa vṛṣṇikulapuṣkarajōṣadāyin
kṣmānirjaradvijapaśūdadhivṛddhikārin ।
uddharmaśārvarahara kṣitirākṣasadhrug
ākalpamārkamarhan bhagavan namastē ॥ 40 ॥

iti śrīmadbhāgavatamahāpurāṇē daśamaskandhē pūrvārdhē
chaturdaśādhyāyāntargataṃ brahmakṛtaṃ śrīkṛṣṇastutiḥ samāptā ।

bhāgavatapurāṇa . adhyāya 10/14/1-40 . ।