Hiranya Garbha Suktam

(ṛ.10.121)

hi̠ra̠ṇya̠ga̠rbha-ssama̍varta̠tāgrē̍ bhū̠tasya̍ jā̠taḥ pati̠rēka̍ āsīt ।
sa dā̍dhāra pṛthi̠vī-ndyāmu̠tēmā-ṅkasmai̍ dē̠vāya̍ ha̠viṣā̍ vidhēma ॥ 1

ya ā̍tma̠dā ba̍la̠dā yasya̠ viśva̍ u̠pāsa̍tē pra̠śiṣa̠ṃ yasya̍ dē̠vāḥ ।
yasya̍ Chā̠yāmṛta̠ṃ yasya̍ mṛ̠tyuḥ kasmai̍ dē̠vāya̍ ha̠viṣā̍ vidhēma ॥ 2

yaḥ prā̍ṇa̠tō ni̍miṣa̠tō ma̍hi̠tvaika̠ idrājā̠ jaga̍tō ba̠bhūva̍ ।
ya īśē̍ a̠sya dvi̠pada̠śchatu̍ṣpada̠ḥ kasmai̍ dē̠vāya̍ ha̠viṣā̍ vidhēma ॥ 3

yasyē̠mē hi̠mava̍ntō mahi̠tvā yasya̍ samu̠draṃ ra̠sayā̍ sa̠hāhuḥ ।
yasyē̠māḥ pra̠diśō̠ yasya̍ bā̠hū kasmai̍ dē̠vāya̍ ha̠viṣā̍ vidhēma ॥ 4

yēna̠ dyauru̠grā pṛ̍thi̠vī cha̍ dṛ̠ḻhā yēna̠ sva̍-sstabhi̠taṃ yēna̠ nāka̍ḥ ।
yō a̠ntari̍kṣē̠ raja̍sō vi̠māna̠ḥ kasmai̍ dē̠vāya̍ ha̠viṣā̍ vidhēma ॥ 5

ya-ṅkranda̍sī̠ ava̍sā tastabhā̠nē a̠bhyaikṣē̍tā̠-mmana̍sā̠ rēja̍mānē ।
yatrādhi̠ sūra̠ udi̍tō vi̠bhāti̠ kasmai̍ dē̠vāya̍ ha̠viṣā̍ vidhēma ॥ 6

āpō̍ ha̠ yadbṛ̍ha̠tīrviśva̠māya̠-ngarbha̠-ndadhā̍nā ja̠naya̍ntīra̠gnim ।
tatō̍ dē̠vānā̠ṃ sama̍varta̠tāsu̠rēka̠ḥ kasmai̍ dē̠vāya̍ ha̠viṣā̍ vidhēma ॥ 7

yaśchi̠dāpō̍ mahi̠nā pa̠ryapa̍śya̠ddakṣa̠-ndadhā̍nā ja̠naya̍ntīrya̠jñam ।
yō dē̠vēṣvidhi̍ dē̠va ēka̠ āsī̠tkasmai̍ dē̠vāya̍ ha̠viṣā̍ vidhēma ॥ 8

mā nō̍ hiṃsījjani̠tā yaḥ pṛ̍thi̠vyā yō vā̠ diva̍ṃ sa̠tyadha̍rmā ja̠jāna̍ ।
yaśchā̠paścha̠ndrā bṛ̍ha̠tīrja̠jāna̠ kasmai̍ dē̠vāya̍ ha̠viṣā̍ vidhēma ॥ 9

prajā̍patē̠ na tvadē̠tānya̠nyō viśvā̍ jā̠tāni̠ pari̠ tā ba̍bhūva ।
yatkā̍māstē juhu̠mastannō̍ astu va̠yaṃ syā̍ma̠ pata̍yō rayī̠ṇām ॥ 10