Gopika Geetha (Bhagavatha Purana)

gōpya ūchuḥ ।
jayati tē’dhikaṃ janmanā vrajaḥ
śrayata indirā śaśvadatra hi ।
dayita dṛśyatāṃ dikṣu tāvakā-
stvayi dhṛtāsavastvāṃ vichinvatē ॥ 1॥

śaradudāśayē sādhujātasa-
tsarasijōdaraśrīmuṣā dṛśā ।
suratanātha tē’śulkadāsikā
varada nighnatō nēha kiṃ vadhaḥ ॥ 2॥

viṣajalāpyayādvyālarākṣasā-
dvarṣamārutādvaidyutānalāt ।
vṛṣamayātmajādviśvatōbhayā-
dṛṣabha tē vayaṃ rakṣitā muhuḥ ॥ 3॥

na khalu gōpikānandanō bhavā-
nakhiladēhināmantarātmadṛk ।
vikhanasārthitō viśvaguptayē
sakha udēyivānsātvatāṃ kulē ॥ 4॥

virachitābhayaṃ vṛṣṇidhurya tē
charaṇamīyuṣāṃ saṃsṛtērbhayāt ।
karasarōruhaṃ kānta kāmadaṃ
śirasi dhēhi naḥ śrīkaragraham ॥ 5॥

vrajajanārtihanvīra yōṣitāṃ
nijajanasmayadhvaṃsanasmita ।
bhaja sakhē bhavatkiṅkarīḥ sma nō
jalaruhānanaṃ chāru darśaya ॥ 6॥

praṇatadēhināṃ pāpakarśanaṃ
tṛṇacharānugaṃ śrīnikētanam ।
phaṇiphaṇārpitaṃ tē padāmbujaṃ
kṛṇu kuchēṣu naḥ kṛndhi hṛchChayam ॥ 7॥

madhurayā girā valguvākyayā
budhamanōjñayā puṣkarēkṣaṇa ।
vidhikarīrimā vīra muhyatī-
radharasīdhunā”pyāyayasva naḥ ॥ 8॥

tava kathāmṛtaṃ taptajīvanaṃ
kavibhirīḍitaṃ kalmaṣāpaham ।
śravaṇamaṅgalaṃ śrīmadātataṃ
bhuvi gṛṇanti tē bhūridā janāḥ ॥ 9॥

prahasitaṃ priya prēmavīkṣaṇaṃ
viharaṇaṃ cha tē dhyānamaṅgalam ।
rahasi saṃvidō yā hṛdispṛśaḥ
kuhaka nō manaḥ kṣōbhayanti hi ॥ 10॥

chalasi yadvrajāchchārayanpaśūn
nalinasundaraṃ nātha tē padam ।
śilatṛṇāṅkuraiḥ sīdatīti naḥ
kalilatāṃ manaḥ kānta gachChati ॥ 11॥

dinaparikṣayē nīlakuntalai-
rvanaruhānanaṃ bibhradāvṛtam ।
ghanarajasvalaṃ darśayanmuhu-
rmanasi naḥ smaraṃ vīra yachChasi ॥ 12॥

praṇatakāmadaṃ padmajārchitaṃ
dharaṇimaṇḍanaṃ dhyēyamāpadi ।
charaṇapaṅkajaṃ śantamaṃ cha tē
ramaṇa naḥ stanēṣvarpayādhihan ॥ 13॥

suratavardhanaṃ śōkanāśanaṃ
svaritavēṇunā suṣṭhu chumbitam ।
itararāgavismāraṇaṃ nṛṇāṃ
vitara vīra nastē’dharāmṛtam ॥ 14॥

aṭati yadbhavānahni kānanaṃ
truṭiryugāyatē tvāmapaśyatām ।
kuṭilakuntalaṃ śrīmukhaṃ cha tē
jaḍa udīkṣatāṃ pakṣmakṛddṛśām ॥ 15॥

patisutānvayabhrātṛbāndhavā-
nativilaṅghya tē’ntyachyutāgatāḥ ।
gatividastavōdgītamōhitāḥ
kitava yōṣitaḥ kastyajēnniśi ॥ 16॥

rahasi saṃvidaṃ hṛchChayōdayaṃ
prahasitānanaṃ prēmavīkṣaṇam ।
bṛhaduraḥ śriyō vīkṣya dhāma tē
muhuratispṛhā muhyatē manaḥ ॥ 17॥

vrajavanaukasāṃ vyaktiraṅga tē
vṛjinahantryalaṃ viśvamaṅgalam ।
tyaja manāk cha nastvatspṛhātmanāṃ
svajanahṛdrujāṃ yanniṣūdanam ॥ 18॥

yattē sujātacharaṇāmburuhaṃ stanēṣa
bhītāḥ śanaiḥ priya dadhīmahi karkaśēṣu ।
tēnāṭavīmaṭasi tadvyathatē na kiṃsvit
kūrpādibhirbhramati dhīrbhavadāyuṣāṃ naḥ ॥ 19॥

iti śrīmadbhāgavata mahāpurāṇē pāramahaṃsyāṃ saṃhitāyāṃ
daśamaskandhē pūrvārdhē rāsakrīḍāyāṃ gōpīgītaṃ nāmaikatriṃśō’dhyāyaḥ ॥