Go Suktam

(ṛ.6.28.1)

ā gāvō̍ agmannu̠ta bha̠drama̍kra̠ntsīda̍ntu gō̠ṣṭhē ra̠ṇaya̍ntva̠smē ।
pra̠jāva̍tīḥ puru̠rupā̍ i̠ha syu̠rindrā̍ya pū̠rvīru̠ṣasō̠ duhā̍nāḥ ॥ 1

indrō̠ yajva̍nē pṛṇa̠tē cha̍ śikṣa̠tyupēdda̍dāti̠ na sva-mmā̍ṣuyati ।
bhūyō̍bhūyō ra̠yimida̍sya va̠rdhaya̠nnabhi̍nnē khi̠lyē ni da̍dhāti dēva̠yum ॥ 2

na tā na̍śanti̠ na da̍bhāti̠ taska̍rō̠ nāsā̍māmi̠trō vyathi̠rā da̍dhar​ṣati ।
dē̠vāṃścha̠ yābhi̠ryaja̍tē̠ dadā̍ti cha̠ jyōgittābhi̍-ssachatē̠ gōpa̍ti-ssa̠ha ॥ 3

na tā arvā̍ rē̠ṇuka̍kāṭō aśnutē̠ na sa̍ṃskṛta̠tramupa̍ yanti̠ tā a̠bhi ।
u̠ru̠gā̠yamabha̍ya̠-ntasya̠ tā anu̠ gāvō̠ marta̍sya̠ vi cha̍ranti̠ yajva̍naḥ ॥ 4

gāvō̠ bhagō̠ gāva̠ indrō̍ ma achChā̠-ngāva̠-ssōma̍sya pratha̠masya̍ bha̠kṣaḥ ।
i̠mā yā gāva̠-ssa ja̍nāsa̠ indra̍ i̠chChāmīddhṛ̠dā mana̍sā chi̠dindra̍m ॥ 5

yū̠ya-ṅgā̍vō mēdayathā kṛ̠śa-ñchi̍daśrī̠ra-ñchi̍tkṛṇuthā su̠pratī̍kam ।
bha̠dra-ṅgṛ̠ha-ṅkṛ̍ṇutha bhadravāchō bṛ̠hadvō̠ vaya̍ uchyatē sa̠bhāsu̍ ॥ 6

pra̠jāva̍tī-ssū̠yava̍saṃ ri̠śantī̍-śśu̠ddhā a̠pa-ssu̍prapā̠ṇē piba̍ntīḥ ।
mā va̍-sstē̠na ī̍śata̠ māghaśa̍ṃsa̠ḥ pari̍ vō hē̠ti ru̠drasya̍ vṛjyāḥ ॥ 7

upē̠damu̍pa̠parcha̍namā̠su gōṣūpa̍ pṛchyatām ।
upa̍ ṛṣa̠bhasya̠ rēta̠syupē̍ndra̠ tava̍ vī̠ryē̍ ॥ 8

ōṃ śānti̠-śśānti̠-śśānti̍ḥ ॥