Gauri Dasakam

līlālabdhasthāpitaluptākhilalōkāṃ
lōkātītairyōgibhirantaśchiramṛgyām ।
bālādityaśrēṇisamānadyutipuñjāṃ
gaurīmambāmamburuhākṣīmahamīḍē ॥ 1 ॥

pratyāhāradhyānasamādhisthitibhājāṃ
nityaṃ chittē nirvṛtikāṣṭhāṃ kalayantīm ।
satyajñānānandamayīṃ tāṃ tanurūpāṃ
gaurīmambāmamburuhākṣīmahamīḍē ॥ 2 ॥

chandrāpīḍānanditamandasmitavaktrāṃ
chandrāpīḍālaṅkṛtanīlālakabhārām ।
indrōpēndrādyarchitapādāmbujayugmāṃ
gaurīmambāmamburuhākṣīmahamīḍē ॥ 3 ॥

ādikṣāntāmakṣaramūrtyā vilasantīṃ
bhūtē bhūtē bhūtakadambaprasavitrīm ।
śabdabrahmānandamayīṃ tāṃ taṭidābhāṃ
gaurīmambāmamburuhākṣīmahamīḍē ॥ 4 ॥

mūlādhārādutthitavīthyā vidhirandhraṃ
sauraṃ chāndraṃ vyāpya vihārajvalitāṅgīm ।
yēyaṃ sūkṣmātsūkṣmatanustāṃ sukharūpāṃ
gaurīmambāmamburuhākṣīmahamīḍē ॥ 5 ॥

nityaḥ śuddhō niṣkala ēkō jagadīśaḥ
sākṣī yasyāḥ sargavidhau saṃharaṇē cha ।
viśvatrāṇakrīḍanalōlāṃ śivapatnīṃ
gaurīmambāmamburuhākṣīmahamīḍē ॥ 6 ॥

yasyāḥ kukṣau līnamakhaṇḍaṃ jagadaṇḍaṃ
bhūyō bhūyaḥ prādurabhūdutthitamēva ।
patyā sārdhaṃ tāṃ rajatādrau viharantīṃ
gaurīmambāmamburuhākṣīmahamīḍē ॥ 7 ॥

yasyāmōtaṃ prōtamaśēṣaṃ maṇimālā-
-sūtrē yadvatkāpi charaṃ chāpyacharaṃ cha ।
tāmadhyātmajñānapadavyā gamanīyāṃ
gaurīmambāmamburuhākṣīmahamīḍē ॥ 8 ॥

nānākāraiḥ śaktikadambairbhuvanāni
vyāpya svairaṃ krīḍati yēyaṃ svayamēkā ।
kalyāṇīṃ tāṃ kalpalatāmānatibhājāṃ
gaurīmambāmamburuhākṣīmahamīḍē ॥ 9 ॥

āśāpāśaklēśavināśaṃ vidadhānāṃ
pādāmbhōjadhyānaparāṇāṃ puruṣāṇām ।
īśāmīśārdhāṅgaharāṃ tāmabhirāmāṃ
gaurīmambāmamburuhākṣīmahamīḍē ॥ 10 ॥

prātaḥkālē bhāvaviśuddhaḥ praṇidhānā-
-dbhaktyā nityaṃ jalpati gaurīdaśakaṃ yaḥ ।
vāchāṃ siddhiṃ sampadamagryāṃ śivabhaktiṃ
tasyāvaśyaṃ parvataputrī vidadhāti ॥ 11 ॥

iti śrīmatparamahaṃsaparivrājakāchāryasya śrīgōvindabhagavatpūjyapādaśiṣyasya śrīmachChaṅkarabhagavataḥ kṛtau gaurī daśakam ।