Dhanyashtakam

(praharṣaṇīvṛttam -)
tajjñānaṃ praśamakaraṃ yadindriyāṇāṃ
tajjñēyaṃ yadupaniṣatsu niśchitārtham ।
tē dhanyā bhuvi paramārthaniśchitēhāḥ
śēṣāstu bhramanilayē paribhramantaḥ ॥ 1॥

(vasantatilakāvṛttam -)
ādau vijitya viṣayānmadamōharāga-
dvēṣādiśatrugaṇamāhṛtayōgarājyāḥ ।
jñātvā mataṃ samanubhūyaparātmavidyā-
kāntāsukhaṃ vanagṛhē vicharanti dhanyāḥ ॥ 2॥

tyaktvā gṛhē ratimadhōgatihētubhūtām
ātmēchChayōpaniṣadartharasaṃ pibantaḥ ।
vītaspṛhā viṣayabhōgapadē viraktā
dhanyāścharanti vijanēṣu viraktasaṅgāḥ ॥ 3॥

tyaktvā mamāhamiti bandhakarē padē dvē
mānāvamānasadṛśāḥ samadarśinaścha ।
kartāramanyamavagamya tadarpitāni
kurvanti karmaparipākaphalāni dhanyāḥ ॥ 4॥

tyaktvīṣaṇātrayamavēkṣitamōkṣamargā
bhaikṣāmṛtēna parikalpitadēhayātrāḥ ।
jyōtiḥ parātparataraṃ paramātmasañjñaṃ
dhanyā dvijārahasi hṛdyavalōkayanti ॥ 5॥

nāsanna sanna sadasanna mahasannachāṇu
na strī pumānna cha napuṃsakamēkabījam ।
yairbrahma tatsamamupāsitamēkachittaiḥ
dhanyā virējurittarēbhavapāśabaddhāḥ ॥ 6॥

ajñānapaṅkaparimagnamapētasāraṃ
duḥkhālayaṃ maraṇajanmajarāvasaktam ।
saṃsārabandhanamanityamavēkṣya dhanyā
jñānāsinā tadavaśīrya viniśchayanti ॥ 7॥

śāntairananyamatibhirmadhurasvabhāvaiḥ
ēkatvaniśchitamanōbhirapētamōhaiḥ ।
sākaṃ vanēṣu vijitātmapadasvarupaṃ
tadvastu samyaganiśaṃ vimṛśanti dhanyāḥ ॥ 8॥

(mālinīvṛttam -)
ahimiva janayōgaṃ sarvadā varjayēdyaḥ
kuṇapamiva sunārīṃ tyaktukāmō virāgī ।
viṣamiva viṣayānyō manyamānō durantān
jayati paramahaṃsō muktibhāvaṃ samēti ॥ 9॥

(śārdūlavikrīḍitavṛttam -)
sampūrṇaṃ jagadēva nandanavanaṃ sarvē’pi kalpadrumā
gāṅgaṃ vari samastavārinivahaḥ puṇyāḥ samastāḥ kriyāḥ ।
vāchaḥ prākṛtasaṃskṛtāḥ śrutiśirōvārāṇasī mēdinī
sarvāvasthitirasya vastuviṣayā dṛṣṭē parabrahmaṇi ॥ 10॥

॥ iti śrīmad śaṅkarāchāryavirachitaṃ dhanyāṣṭakaṃ samāptam ॥