Citraketu Stuti (Ananta Stotram Bhagavata Purana)

(śrīmadbhāgavataṃ 6.16.34-48)

chitrakēturuvācha ।
ajita jitaḥ samamatibhiḥ sādhubhi-
rbhavān jitātmabhirbhavatā ।
vijitāstē’pi cha bhajatāmakāmātmanāṃ
ya ātmadō’tikaruṇaḥ ॥ 34 ॥

tava vibhavaḥ khalu bhagavan
jagadudayasthitilayādīni ।
viśvasṛjastēṃ’śāṃśāstatra
mṛṣā spardhantē pṛthagabhimatyā ॥ 35 ॥

paramāṇuparamamahatōstva-
mādyantāntaravartī trayavidhuraḥ ।
ādāvantē’pi cha sattvānāṃ
yaddhruvaṃ tadēvāntarālē’pi ॥ 36 ॥

kṣityādibhirēṣa kilāvṛtaḥ
saptabhirdaśaguṇōttarairaṇḍakōśaḥ ।
yatra patatyaṇukalpaḥ
sahāṇḍakōṭikōṭibhistadanantaḥ ॥ 37 ॥

viṣayatṛṣō narapaśavō
ya upāsatē vibhūtīrna paraṃ tvām ।
tēṣāmāśiṣa īśa tadanu
vinaśyanti yathā rājakulam ॥ 38 ॥

kāmadhiyastvayi rachitā
na parama rōhanti yathā karambhabījāni ।
jñānātmanyaguṇamayē
guṇagaṇatō’sya dvandvajālāni ॥ 39 ॥

jitamajita tadā bhavatā
yadāha bhāgavataṃ dharmamanavadyam ।
niṣkiñchanā yē munaya ātmārāmā
yamupāsatē’pavargāya ॥ 40 ॥

viṣamamatirna yatra nṛṇāṃ
tvamahamiti mama tavēti cha yadanyatra ।
viṣamadhiyā rachitō yaḥ
sa hyaviśuddhaḥ kṣayiṣṇuradharmabahulaḥ ॥ 41 ॥

kaḥ kṣēmō nijaparayōḥ
kiyānarthaḥ svaparadruhā dharmēṇa ।
svadrōhāttava kōpaḥ
parasampīḍayā cha tathādharmaḥ ॥ 42 ॥

na vyabhicharati tavēkṣā yayā
hyabhihitō bhāgavatō dharmaḥ ।
sthiracharasattvakadambēṣvapṛthagdhiyō
yamupāsatē tvāryāḥ ॥ 43 ॥

na hi bhagavannaghaṭitamidaṃ
tvaddarśanānnṛṇāmakhilapāpakṣayaḥ ।
yannāma sakṛchChravaṇātpulkasakō’pi
vimuchyatē saṃsārāt ॥ 44 ॥

atha bhagavan vayamadhunā
tvadavalōkaparimṛṣṭāśayamalāḥ ।
suraṛṣiṇā yaduditaṃ tāvakēna
kathamanyathā bhavati ॥ 45 ॥

viditamananta samastaṃ tava
jagadātmanō janairihācharitam ।
vijñāpyaṃ paramagurōḥ kiyadiva
savituriva khadyōtaiḥ ॥ 46 ॥

namastubhyaṃ bhagavatē sakalajaga-
tsthitilayōdayēśāya ।
duravasitātmagatayē
kuyōgināṃ bhidā paramahaṃsāya ॥ 47 ॥

yaṃ vai śvasantamanu viśvasṛjaḥ śvasanti
yaṃ chēkitānamanu chittaya uchchakanti ।
bhūmaṇḍalaṃ sarṣapāyati yasya mūrdhni
tasmai namō bhagavatē’stu sahasramūrdhnē ॥ 48 ॥

॥ iti śrīmadbhāgavatamahāpurāṇē ṣaṣṭhaskandhē ṣōḍaśādhyāyāntargataṃ chitrakētukṛtaṃ anantastōtram ॥