Chaurashtakam (Sri Chauragraganya Purushashtakam)

vrajē prasiddhaṃ navanītachauraṃ
gōpāṅganānāṃ cha dukūlachauram ।
anēkajanmārjitapāpachauraṃ
chaurāgragaṇyaṃ puruṣaṃ namāmi ॥ 1॥

śrīrādhikāyā hṛdayasya chauraṃ
navāmbudaśyāmalakāntichauram ।
padāśritānāṃ cha samastachauraṃ
chaurāgragaṇyaṃ puruṣaṃ namāmi ॥ 2॥

akiñchanīkṛtya padāśritaṃ yaḥ
karōti bhikṣuṃ pathi gēhahīnam ।
kēnāpyahō bhīṣaṇachaura īdṛg-
dṛṣṭaḥśrutō vā na jagattrayē’pi ॥ 3॥

yadīya nāmāpi haratyaśēṣaṃ
giriprasārān api pāparāśīn ।
āścharyarūpō nanu chaura īdṛg
dṛṣṭaḥ śrutō vā na mayā kadāpi ॥ 4॥

dhanaṃ cha mānaṃ cha tathēndriyāṇi
prāṇāṃścha hṛtvā mama sarvamēva ।
palāyasē kutra dhṛtō’dya chaura
tvaṃ bhaktidāmnāsi mayā niruddhaḥ ॥ 5॥

Chinatsi ghōraṃ yamapāśabandhaṃ
bhinatsi bhīmaṃ bhavapāśabandham ।
Chinatsi sarvasya samastabandhaṃ
naivātmanō bhaktakṛtaṃ tu bandham ॥ 6॥

manmānasē tāmasarāśighōrē
kārāgṛhē duḥkhamayē nibaddhaḥ ।
labhasva hē chaura! harē! chirāya
svachauryadōṣōchitamēva daṇḍam ॥ 7॥

kārāgṛhē vasa sadā hṛdayē madīyē
madbhaktipāśadṛḍhabandhananiśchalaḥ san ।
tvāṃ kṛṣṇa hē! pralayakōṭiśatāntarē’pi
sarvasvachaura! hṛdayān na hi mōchayāmi ॥ 8॥

iti śrībilvamaṅgalaṭhākūravirachitaṃ chaurāṣṭakaṃ sampūrṇam ।

chauragragaṇya puruṣāṣṭakam ।